سكريبت كامل وحصري لمدونة قصر
سكريبت كامل وحصري لمدونة قصر
لو سمحت لو سمحت
= نعم يا آنسه.. تحبي تطلبي ايه؟
_ ممكن كوباية فاضيه!
=.......
مردش عليا وفضل باصصلي ومستغرب:
_ حضرتك معايا!
= اه معاكِ
_ ممكن كوباية فاضيه طيب؟
= أنسه انتِ في محل عصاير
_ ايوه ما انا عارفه
= طلبك ايه بقا!
_ يا فندم قولت عايزة كوباية فاضيه
= يعني ايه عايزاها فاضيه!
_ هو كده لا اله الا الله
= سيدنا محمد رسول الله
_ طب ممكن تجبهالي!
= عايزاها فاضيه فاضيه!
_ ياربنا... اه عايزلها فاضيه فاضيه
= طب ممكن اعرف السبب؟
_ نعم!
= مش بتدهل والله بس بجد طلبك غريب
_ ولا غريب ولا حاجه.. اتفضل الفلوس أهي وعايزة الكوباية
وأول ما خدتها جريت من قدامه..
هو ليه مستغرب كده!
عشان بطلب كوباية فاضيه يعني!...
طب وفيها ايه!
أكيد عندي أسبابي..
مليت الكوباية مايه وروحت حطيتها قدامهم عشان يشربوا منها..
مين هم؟!
القطط..
وانا مش تافهه بالمناسبة..
بالعكس انا عاقلة جدًا..
الجو حر أوي..
ولتر المايه مش بيستنى في إيدي..
طب وهم!
هيشربوا منين؟!
الجو حر عليهم اوي..
ما هم أرواح زينا..
ملهومش ذنب إنهم ملقوش أسره تعتني بيهم..
حتى لو شوفتهم مره..
لكن ممكن لما حد يشوف الكوبايه بقت فاضيه يملاهالهم تاني..
حطيت المايه في حته ضل...
وابتسمت برضا لما لقيتهم يا حبايبي جريوا عليها..
لسه بلف ضهري وبمشي..
سمعت صوت مألوف:
_ طلبتي الكوباية عشان القطط!
بصيت برفعة حاجب كده:
= هو حضرتك بتراقبني ولا ايه!
_ لا أبدًا أنا بس كان عندي فضول من طلبك
= ورضيت فضولك الحمدلله!
_ الحمدلله
= عن إذنك بقا
_ استني بس
= خير
_ ليه مقولتيش انها ليهم؟
= وأقول ليه؟
_ عشان أشارك معاكِ
= والله القطط موجوده في أماكن كتير وممكن حضرتك تساعدهم لو حابب
_ ليه بتكلميني من تحت ضرسك كده؟.. هو في مشكلة!
= المشكله اني بكلمك أصلًا
_ ده اللي هو ليه؟
= هو ايه اللي ليه!.. يعني لو شاب وقف أختك كده هتبقى مبسوط!
مردش عليا بس ملامحه بان عليها الضيق فكملت:
_ أهو.. طبع بيضايق أهو.. عن اذنك..
= طب...
_ سلام عليكم
مشيت وسبته..
ايه ده!!!..
الانسيال بتاعي..
وقع ولا راح فين؟..
يارب لا..
أنا بحبه اوي..
رجعت أدور عليه ملقتهوش..
روحت وأنا متضايقه أوي اني مش لاقياه..
قعدت عاللاب شويه.. لقيت فيديو لأطفال والشيخ بتاعهم قاعدين مع بعض بس الشيخ مدينا ضهره.. فقولت اتفرج عليه..
فالشيخ بتاعهم قال:..
_ جاهزون يا ابطال!
= هاي هاي شيخنا
_ لا أسمعكم
= هاي هاي شيخنا
_ نبدا كلامنا بـ..
الاطفال كلهم بصوت واحد:
= بالصـلاة على الحبيب والدعاء لإخواتنا في كل مكان
_ ثم!
= نستعين بالله العظيم قبل البدأ
_ وبعدها
= رب اشرح لي صدري. ويسر لي أمري. وأحلل عقدةً من لساني. يفقهوا قولي..
_ جزاكم الله خيرًا يا حبايبي.. يلا بينا نبدأ محكي قصة سيدنا نوح والسفينة!
= يلا بيناا..
ميـن سيـدنا نـوح أصلًا؟..
سيـدنا نـوح هـو النبـي التـاني اللـي ربنا أرسـله لعبـاده فـي الأرض عشـان يـؤمنوا بيـه…
تعـالى كـده نبـدأ مـن الأول..:-
بعـد وفـاة سيـدنا آدم _عليـه السـلام_ تكـاثرت ذريتـه وانتشـرت فـي الأرض،
كـان فـي منهـم الصـالحين، ومنهـم المفسـدين،
الصـالحين دول كـانوا بيـدعوا النـاس لعبـادة الله ﷻ….
مـر زمـن طـويل ومـات أغلـب الصـاحين،
فاتجـه البـاقي لعبـادة الأوثـان..
إيـه أصـلًا الأوثـان دي وإيـه بـدايتها؟
التمـاثيل دي عملهـا البـاقي للصـاحلين وحطـوها فـي قبلـة المعـابد اللـي كـانوا بيعبـدوا فيـها ربنـا ويفتكـروهم،
ويفتكـروا أعمـال الخيـر والبـر اللـي كـانوا بيعملـوها…
وبعـد مـرور السنيـن، جـه نـاس غيـرهم،
فضحـك عليـهم الشيـطان وأمرهـم إنهـم يعبـدوا التمـاثيل دي،
ويتـركوا عبـادة الله ﷻ،
فكـان مـن لـطف ربنـا بعـباده العـاصيـن دول أرسـل ليـهم رسـول وكـان الـرسول ده هـو سيـدنا نـوح _عليـه السـلام_.
فكـان سيـدنا نـوح بيـدعوهم لعبـادة الله وحـده وتـرك عبـادة الأصنـام، لكـن هـم مكـانوش بيؤمنـوا…
فسيـدنا نـوح كـل مـا يلاقيـهم بيعنـدوا معـاه أكتـر يـزوّد هـو دعـوته وحثّـه أكتـر،
حتـى كـان بيـروحلهم فـي الأنـديه بتـاعتهم وأمكـانهم،
والعكـس مـع الكفـار،
كـان كـل مـا سيـدنا نـوح يـزيد اجتهـاده كـانوا هـم بيـزيدوا استكـبار وعنـاد،
دول حتـى وصلـوا لمـرحلة إنهـم كـانوا بيحطـوا صـوابعهم فـي ودانهـم عشـان مـايسمعوش دعـوته،
ونـاس تـانيه وصـل بيهـم الأمـر إنهـم كـل مـا يشـوفوا سيـدنا نـوح جـايلهم فـي أمـاكن لعبهـم إنهـم كـانوا بيحطـوا هدومهـم فـوق راسهـم!!..
سيـدنا نـوح _عليـه السـلام _ قعـد يـدعي قـومه سنيـن طـويله لحـد مـا بقـوا 950 سنـة!!.. انـت متخيـل؟
ومـع كـل السنيـن دي مفيـش نـاس كتيـر آمنـت معـاه بـرضو!
وفـي بـرضو فئـة لسـه بتعـاند معـه فسيـدنا نـوح قـالهم كمـا ذُكـر فـي سـورة "نـوح"..
" يُرْسِلِ السَّمَاءَ عَلَيْكُم مِّدْرَارًا (11) وَيُمْدِدْكُم بِأَمْوَالٍ وَبَنِينَ وَيَجْعَل لَّكُمْ جَنَّاتٍ وَيَجْعَل لَّكُمْ أَنْهَارًا (12)"
ولمـا مـاءامنش مـع سيـدنا نـوح إلا فئـة قليلـة دعـى عليـهم،
فـربنا ﷻ استجـاب لـدعاء نبيّـه،
وأمـره أنـه يصنـع سفيـنة كبيـرة أوي عشـان يـركب فيهـا هـو واللـي ءامنـوا معـاه..
وفعـلًا بـدأ سيدنـا نـوح فـي التنفيـذ، وكـل مـا الكـافرون يعـدّوا عليـه ويـلاقوه مشغـول هـو والمـؤمنين فـي صنـع السفيـنة يتـريقوا عليـهم ويسخـروا منهـم،
ليـه؟!
عشـان هـم أصـلًا كـانوا فـي صحـراء مفيهـاش مـايه،
فـ ازاي بقـا بيصنعـوا سفيـنة؟
فضـل سيـدنا نـوح واللـي ءامنـوا معـاه يصنعـوا السفيـنة لمـدة سنيـن كتيـر،
ولمـا اكتمـلت وبقـت جـاهزة للـركوب،
جـه أمـر ربنـا بهـلاك الكـافرين خـلاص،
وأول عـلامة لـركوب السفيـنة هـي…
" خـروج المـاية مـن الفـرن اللـي فيـه نـار"
فـ ربنـا عـز وجـل أمـر سيـدنا نـوح إنـه يـركب هـو واللـي ءامنـوا معـاه وأهلـه كلهـم فـي السفيـنة إلا ابنـه ومـراته!!
لإنهـم كـانوا كفـار،
وكمـان أمـره إنـه يـاخد مـن كـل صنـف مـن الحيـوانات والطيـور اللـي كـانت عـايشـة فـي الـزمان ده زوجيـن،
فـركبوا كلهـم وخـلاص استعـدوا،
وكـل ده تحـت استغـراب المشـركين!،
هـم ازاي هيمشـوا بيهـا والأرض مفيهـاش مـايه؟
فجـاء أمـر مـن الله ﷻ
فنـزلت مـايه بغـزارة شـديدة مـن السمـاء،
والينـابيع اللـي في الأرض انفجـرت انفجـار عنيـف،
لحـد مـا كـل اللـي علـى الأرض غـرقوا،
ومفـيش حـد نجـى مـن الطـوفان إلا سيـدنا نـوح _عليـه السـلام_ واللـي ءامنـوا معـاه،
بـس سـاعة مـا ابـن سيـدنا نـوح كـان بيغـرق فـناداه سيـدنا نـوح: "وَنَادَىٰ نُوحٌ ابْنَهُ وَكَانَ فِي مَعْزِلٍ يَا بُنَيَّ ارْكَب مَّعَنَا وَلَا تَكُن مَّعَ الْكَافِرِينَ"
فـرد عليـه ابنـه: "قَالَ سَآوِي إِلَىٰ جَبَلٍ يَعْصِمُنِي مِنَ الْمَاءِ"
فسيـدنا نـوح قـال: "قَالَ لَا عَاصِمَ الْيَوْمَ مِنْ أَمْرِ اللَّهِ إِلَّا مَن رَّحِمَ ۚ"
والنتيجـة:-
"وَحَالَ بَيْنَهُمَا الْمَوْجُ فَكَانَ مِنَ الْمُغْرَقِينَ"
وبعـد مـدة نـادى الله ﷻ: "وَقِيلَ يَا أَرْضُ ابْلَعِي مَاءَكِ وَيَا سَمَاءُ أَقْلِعِي "
فالسمـاء وقفـت مـطر،
والأرض شـربت المـايه،
واستقـرت السفيـنة علـى جـبل اسمـه "الجـودي"،
كمـا قـال الله سبحـانه وتعـالى:
" وَغِيضَ الْمَاءُ وَقُضِيَ الْأَمْرُ وَاسْتَوَتْ عَلَى الْجُودِيِّ"
فسيـدنا نـوح أطـلق كـل اللـي كانـوا معـاه،
واتفـرقت المخلـوقات فـي كـل الأنحـاء،
وابتـدت حيـاة جـديدة باللـي نجـوا مـن الطـوفان،
فـي السفيـنة…
وبـس كـده… القصـة خلصـت
الولاد كانوا مبسوطين وبيضحكوا مع بعض ومع شيخهم..
قفلت الڤيديو وانا بتنهد براحه والإبتسامه على وشي إن في حد بيعمل كده مع الأطفال..
واتمنين لو ربنا يعطيني حد لين كده في التعامل...
وتمر الأيام.. لحد ما في يوم ماما قالتلي إن في عريس جالي..
وانا مكنش عندي حجه إني أرفضه زي العشرومية اللي قبله..
فوافقت نقعد وخلاص..
ويوم الرؤيه بقا خرجتلهم وانا في قمة كسوفي وعماله بتأمل في السجاده اللي هموت واغسلها حالًا عشان طلع فيها بقعه..
سابونا لوحدنا ولقيته بيحمحم عشان يكسر الصمت:
_ احم احم... أعتقد بقا المره دي مش هتكلميني من تحت ضرسك
رفعت راسي بذهول ليه!
= هو انت!
_ شوفتِ!
= انت ايه اللي جابك؟
_ ايه قلة الذوق دي؟
= قصدي يعني انت هنا ليه!
_ ألاه!
= أقصد مين سمحلك تيجي؟!
_ اسكتي ياحنين.. بجد اسكتي.. كل ما بتيجي تكحليها بتعميها أكتر
=احم.... طيب
_ طب ايه!
= ايه!
_ ايه انتِ!.. احنا قاعدين نتكلم ولا مش واخده بالك
= معرفش المفروض أقول ايه!
_ ولا انا بس هنحاول
= معلش سؤال
_ أهي بدإت تندع أهي
= هو انت ليك فيديوهات عاليوتيوب؟
_ يا فضيحتشيي!.. هو الموضوع وصللك!
= هو انت الشيخ اللي بتقعد مع العيال بضهرك!
_ ضاع التنكر
ضحكت غصب عني على ريأكشنه:
= تنكر ايه يا غالي!.. ده تلاقي أم سماح بتاعت الفراخ عرفاك
_ احنا وصلنا لمرحلة أم سماح!
= تخيل!
قعدت أضحك عليه.. لقيته بصلي ومبتسم فاتوترت أوي ورجعت ابص في الأرض..
_ طب استفادتي حاجه طيب ولا التنكر ضاع عالفاضي!
= لا استفادت بجد جزاك الله خيرًا
_ طب مش ناوية تكوني جزء من الخير ده وتبقي جزاتي!
= مش بتجوز حد فضولي
_ انا مش فضولي بس بجد طلبك كان غريب
= مش مبرر
_ اسكتي بقا بلا مش مبرر.. انا باخد رايك ليه من الأصل؟
= يعني ايه يعني!
_ يعني كده كده هتجوزك
= والثقه دي شاريها ولا كاسبها مع مج نسكافيه!
_ خفة دمك دي لازم تندفن فاهمه!
= لا بقا.. ومش هنتجوز
_ وانا بقولك هنتجوز
= على جثتي..
احم احم..
وعشان تعرفوا إني استرونج اوي اوي جايه أبلغكم إن انهارده كتب كتابنا..
أحلى حاجه بحبها فيا..
الثبات عالمبدأ..
شايفين!..
وبعد الجملة الشهيره لقيته جاي عليا:
_ طب ايه طيب!
= ايه!
_ احنا كتبنا الكتاب
= ايوه عارفه
_ وده مش مديكِ إيحاء بحاجه!
= حاجه زي ايه!
مسح على وشه بنفاذ صبر:
_ نزلي النقاب يا حنين.. انا نسيت شكلك
= احم...
_ انجزي يختي
= طب متزوووقش
ونزلته وانا هموت من الإحراج:
_ أيوه كده يا شيخه.. خليني أحفظ الخِلقه دي
= ما تحسن ملافظك
_ خلاص آسف
ولقيته مسك ايدي وبيلبسني الأنسيال اللي ضاع!
_ لقيته وكنت هديهولك بس استنيت لحد ما البسهولك بنفسي
معرفتش ارد من الكسوف بس بعدين قولت...
= إلا قولي
_ اممم
= هتديني كوبايه فاضيه!
_ وهنشرّب القطط سوا...
وباااااس كده...
اسكريبت على بعضه أهو اي خدمة..
متنسوش تصلوا عالنبي ياحبايب..
وهستنى رأيكم..
تعليقات
إرسال تعليق
فضلا اترك تعليق من هنا