رواية عاجر الفصل الرابع والاربعون 44بقلــم الكاتبـــة زينب ماجد (حصريه في مدونة قصر الروايات)

رواية عاجر الفصل الرابع والاربعون 44بقلــم الكاتبـــة زينب ماجد  (حصريه في مدونة قصر الروايات)

رواية عاجر الفصل الرابع والاربعون 44بقلــم الكاتبـــة زينب ماجد  (حصريه في مدونة قصر الروايات)

#عاجر

{ بقلم الكاتبة زينب ماجد } 

الحلقة_ ٤٤

ضليت اباوع بوجهه 

شحاجيها ؟ .. وحتى لو حجيت كلمة اخاف لا يصير بيها شي وتتمرض .. كتلها : هاهية خية تامريني امر وما يصير خاطرج الا طيب المهم انت سالمة 

بس انطيني المفاتيح اخذ غراضي منها 

اطتني .. رحت لميت غراضي وحاجيت عمتي ع الموضوع كالتلي : معليج بيها وهذا بيت عمج وهي وان جانت مريضة ما من حقها اطردج منه 

- ميخالف عمة وجعها كافي خطية ما اريد ازيدن عليها 

عفت بيت عمي ورجعت لبيت حيد بس الدمعة تلالي باطراف عيوني .. دكيت الباب فتحلي حيدر ، شافني مدمعة : خير شبيج

- ما بيه شي بس طلعت من بيت عمي 

- شصاير 

طبيت للاستقبال طب وراي .. واجتي رقية : ها صبا شلونج 

- هلا حبيبتي 

- منو طردج 

كعدت سولفتله ، كال : وشني بيت الخلفها الواحد عود ليش ما يحترم نفسها تشوف روحه مريضة وعاجزة لا تكدر تطبخلا لا تكدر تطي حقوقه لا تداري جهالها .. خو تخلي يتزوج اول وتالي متزوج 

- حيدر يا حق تحجي بيه اني يوسف كله ما مفكرة بيه 

- وما تفكرين بيه ليش غير ابن عمج خو احسن من الغريب 

- لا غريب ولا قريب اني ما رايدة الزواج كله

- واتظلين عزبة وعالة على غيرج 

- خلف الله عليك ما صارلي دقيقتين طبيت 

- اني ما طاردج بس الى متى تضلين هيج اول وتالي تتزوجين وتروحين لبيت رجلج 

- ما اريد بحيل الله حازم بس يطيني طيني اشتريلي بيه بيت واكعد واستقر 

- خاطر نرجع للمربع الاول .. من اخذتي بالسر وصخمتي وجوهنا 

- حيدر هسه مال نحجي على السمج البشط مو حجي نقطة راس سطر كل عرس ما يتسولغ بيه وميلاد موجودة اذا الله اخذ امانته ذاك الوكت عود حاجوني بهالطاري هسه عوفوني بحالي الله يخليكم 

رقية : يعني اليوم تباتين هنا 

باوعلها : جا تبات بالشارع ؟ ما تسمعين تكلج طاردينها 

دارت وجهها ومشت وهو كام مشى .. 

تنهدت بس بهضم .. شكد ذلتني الدنيا شكد نزلتني منازل .. 

كل يوم اكول ها يا الله ارتاحيت .. ثاني يوم الاكي روحي ابير يوسف . 

كمت من مكاني رحت للمطبخ .. 

وكفت ادور بغراضي واعدلهن صارن هوسة بالعرس .. كمت اسمع مصايحهم بالغرفة ، وهي تكله : اي ما خلتنا نرتاح يومين واحنا عرسان .. نريد نكعد نضحك شنو راح تضل مكابلتنا 

- هي تشتغل من الصبح لليل يلا تجي يعني ما راح تأثر عليج لو بقت بالليل 

- وبليل ما نريد نكعد نسوي نضحك احنا مو عرسان متكول عيب 

- ما تسمعين طاردينها جا شسوي اذبها بالشارع 

- جذابة محد طاردها قابل ميلاد ام البيت .. بس اختك شلون معرسين دودت 

سديت باب المطبخ حتى ما اسمعهم 

وكمت اصفط غراضي .. طلع منها اجا للمطبخ كال : صبا لا تسوين صوت خاف انام .. 

- جني خوية لو جاهل واكامز حتى اطلع صوت !؟ 

- لا يعني بالمكينة لا تشغلينها صوتها بالليل ما يخلي الواحد يرتاح 

- تأمر حبيبي بس دا اصفط غراضي ما مشتغلة ما عندي خياط 

- اي احسن 

- راح اسوي عشى متعشي 

-لا والله احسبي احسابنا 

-تدلل 

كمت سويت صينية اجا هو اكل هي ما اجت 

كملت شغلاتي ورحت للغرفة اتمددت وطفيت ..ثاني يوم توكلت لشغلي وكمت اتعمد اطول لاكثر من ٦ بالصالون .. ابقى على تليفوني اكلب بالانترنت اكضي وكت احسن ما ارجع للبيت 

مرت يومين اجاني حيدر كال : صبا انت ماعد تشتغلين وما عدج شي واني مطلوب ع العرس وما طولج عايشة ويانا فحالج حالي ايدج وياي بالايجار والمصرف ما جاي الحك 

- تدلل حبيبي ايجار البيت شكد 

- ٢٥٠ 

طلعت ١٢٥ وكتله : اني وياك بالنص ع الايجار وسهلة لا تشيل هم المصرف تدبر هو احنا على كثرنا تلث نفرات .

- اي التعاون حلو واني والله لو ما مطلوب ما اطالبج 

- لا حبيبي ما بيها شي حقك انت عريس جديد ومصاريفك هواية 

خذاهن وكام مني .. 

تنهدت .. وكلت ياربي صبرني وتمضي حياتي على خير 

الواضح رقية حاطتني ابالها ولو صف ويا مرته اني اصفى بالشارع .. اشتري راحتي بفلوسي وارضي ولا ابقى فرجة للشمات . 

بس ما جازت مني .. حطت كورها وياي ومن الفراغ وكعدت البيت ما كدامها غيري تركز بيه .. 

اني احب اهتم بروحي .. كحلي والحمرة السحرية من ضمن السستم مال وجهي من اول ما اطلع من الحمام اجرهن واخط عيوني وشفايفي .. ما اخلي وجهي  باهت.. 

طلعت من الحمام هي واكفة 

اني خطيت وجهي وكاعد ارش عطر كالت : شدعوى اني العروس ما اتمكيج واتعطر واسبح بكدج يومية تجين كبل للحمام تسبحين 

- جا غير جنت بالشغل وارجع اتنظف خو ما انام بوصخي ؟

- لا اتنامين  بمكياجج .. اني عروس ومو مثلج 

- وما تمكيجين يا عيني كاضتج 

احجي واني ادهن بوجهي كريم .. وادلك بوجهي 

- تدرين حتى حرام 

- شنو الحرام 

- المرة التتمكيج حرام عليها بيوم القيامة الله يحرك وجهه بتيزاب 

- وهو التيزاب موجود بيوم القيامة 

- يعني بالنار مو حلو الاستهزاء بالدين حرام حتى الحرام ما تعرفينه 

- اي والحرام يكول ميصير الوحدة تتمكيج وتنام 

- لا انت مو بس هسه بكل وكت الحمرة والكحلة ما يفاركنج 

- وشنو بيها غير بنية 

- لا حرام ما يصير 

- اكلج رقية راح يحركج بمكاني لو تتحاسبين عني ؟ 

- لا عساه يحركج شعليه بيج بس انبهج 

- مشكورة 

حجيتها واني ارش واعطر بروحي 

هزت ايدها - الله يطيني خلكج 

- امين 

حيدر وينه ؟ شو ماكو 

عافتني ومشت .. 

ثاني يوم حيدر موجود وكاعد بالمطبخ هو وياها طلعت من الحمام هم كاعدين كالي : شو تجين من الشغل كبل للحمام 

- اذب تعبي شغلي كله وكفة جسمي ييبس من اسبح بمي حار شوي ارتاح جسمي يحلل 

احاجي واني احط الكحل 

كالي : صبا عوفي المكياج وهالسوالف يا اختي انت مطلكة اتروحين اتجيبين النظرة الج ما اتوبين

- خوية ما طالعة راح انام 

- اي جا المن تكحلين وتحمرين اذا تنامين 

- لروحي 

- لا بطليهن وذبي المكياج عيب مرت الثانية من اشوفج محمرة ومكحلة بالعباس اسويها كربله

- حيدر شبيك مو هاي رقية كاعد تتمكيج بالليل 

- اي تتمكيج الي غير متزوجة 

- واني لروحي ! 

- عوفي هاي مال روحي واعوض نفسي وهالحجي الخر* 

حجت : كاعد يحجي لمصلحتج صدك هالسوالف تجيبلج السمعة من غير هيج انت عليج هواي حجي هسه محد مانعج من شغل بس كافي .. هو انت حتى العباية ذبيتيها شيكولون عليج الناس استهترت كلش 

حيدر : صدك ليش ذبيتي العباية ؟ 

صفنت بوجهه : صارلي خمسة اشهر من تركتها .. 

- وليش تركتيها 

- ملابسي ما بيها شي عراض ومستورات قابل الستر الا عباية 

- لا بس تغطيج من العيون 

- واني عيب حتى اتغطيني 

- كافي الحجي عليج هواي شبيج انت ما تفتهمين ما تتعضين 

- واني شعليه بالحجي ؟ الناس لو بيدها اتطمني شلون اطم روحي 

- لا بس تنعدلين 

- والعباية تعدلني !؟ 

- اي تسترج 

- حيدر صالي خمسة اشهر ومن اول ما شفتني ما حجيت .. هسه اتذكرت لو من فطنتك رقية . 

شلون هيج كوم وادمغني وهو يكلي : طايحة الحظ فطتني شنو اني امشي بحجي النسوان . 

ابتعدت منه وهو كام يصيح ويغلط 

سكتت ما جاوبت ولا كلمة على حجية ورقية راحت لغرفتها . 

ثاني يوم كعدت لشغلي .. لكيت رقية كاعدتلي من الصبح تراقب تريد تعرف راح البس عباية لو بنطرون وقميص 

لبست بنطروني وقميصي مال كل يوم وطلعت .. 

كلت ولا اخليهم يمشيوني بكيفهم بعد كاعد انطيهم كلشي يردونه .. وساكتة وصامة حلكي عن كل غلطهم وتجاوزهم بس توصل بيه اخلي رقية تمشيني بكيفها وتمنعني من حمرة وكحلة حتى هي ترضى حرام فلا امشي بكيف احد 

خابراني .. رديت عليه 

كالي : يعني مشكلة امس من نهرتج وما رديتي كمتي الصبح لبستي بنطروج وقميصج وحطيتي مكياج ورحتي حتى تعانديني مو 

- لا والله يا حبيبي مو اعاندك بس ما اشوفها تسوى اني وياك نتعارك على حمرة وكحلة .. 

- لعد لا تحطينهن بعد 

- الله كريم 

رجعت بالليل وكفت بالشارع طلبت لفة وكعدت اكل برا يم ابو المشويات حاطلة طبلة وكرسي كملت عشاي ومشيت للبيت  .. سبحت وكبل رحت لفراشي وطفيت ونمت .. وبقيت جوا البطانية اكلب بتليفوني 

لا اجا ولا وصل يمي .. 

ثاني يوم من الصبح .. هو ملتحق .. 

لليل رجعت هي مبدلة والمكياج بوجهه اتلال اتلال .. الرميل واصل للاذن تكول نفر تيتي والضلال وردي طوخ على عيونها ولمع وحمرة بنفسجية .. كتلها : ها وين 

- لبيت اهلي حيدر واهلي يخافون عليه ابقى وحدي من يلتحق 

- اي والله احسنلج .. خصوصا اني مو بالببت وانت صغيرة مو مال تبقين بالبيت وحدج ، بس شنو هذا المكياج مو على اساس حرام 

- اول شي رايحة لاهلي وبالسيارة مو بالشارع اتمشى والكل يباوع بوجهي وثاني شي اني عروس يعني حتى عيب ما احط مو مثلج انت لا عروس لا عندج رجال واتطلعين مشي للشغل 

- هاي يعني بالسيارة محد يشوفج فحلال .. والعروس  والمتزوجة حلال همينه بس الما عدها رجال حرام ! 

- وانت شعليج ما تحاسبين روحج جاية اتحاسبيني ؟ 

- خية اني ما احاسبج بالعكس حلو من تهتمين بروحج بس لا تصيرين بعد مفتي وتحرمين على غيرج و على روحج اتحللين .

- معليج انت خوش لو لا 

عفتها ربع ساعة واجو اهلها راحت 

يا بويه .. بودي اتمدد بوسط الكراج وافتح رجلي  وادية هيج بالكاع من كد الراحة .. ما عدها غيري بالحياة تركز بيها ، جاب الله علة فوك كلبي خاف عايزة. 

اسبوعين يلتحق حيدر يلا يرجع 

ارتاح من القيل والقال من كبل زواجه لهاليوم ما شايفة الراحة 

لا بجسد ولا بروح ولا بتفكير .. 

كمت اطلع الصبح على كيفي .. 

ارجع المغرب اسبح اسوي اكلتي اكعد التلفزيون كبالي .. اكل العب بالتليفون .. اصفن هدووووء ... 

لحد ما قرب محرم بقاله اسبوع 

كامن زبايني يخابرني يريدن مني خياط لمحرم .. 

اكو المتعودات عليه حتى لو بعيدة يتعنن ويجني حتى اضبطلهن القماش وما يخرب . 

فكمت ارجع من البيت .. استغل ع المكينة لحد ما انام 

صح تعب ليل نهار شغل بس شسوي هاي الدنيا ما تريد النايم تريد الصاحيلها والساعي بيها حتى تعينه . 

من بعد اسبوع اجا محرم .. 

اول يوم محرم ام الصالون انطتنا اجازة كالت .. جيف اول يوم .. 

لان اصلا بمحرم الشغل هو والماكو سوا .. ماكو افراح ماكو اعراس حتى احفافة وكص شعر تخف تصير تقحيط .. يوم الجمعة اللي بايام العادية ينكسر ظهرنا بالشغل .. يصير يوم عطلة لان اصلا محد يجي كلها تلتهي بالمجالس والعزاء 

فكعدت يوم الجمعة .. 

سمعت هوسة بالباب وجهال تتعارك .. 

كمت لحيلي حطيت حجاب على راسي ومديت اباوع للشارع .. 

شفت رجال شايل جدورة وجهال اثنين يتعاركون على جدر وابن جيرانا ليغاد يلعب بالبايسكل  صغير ، اشرتله اجا : شكو 

- كاعدين يوزعون هناك ع الشارع 

- شيوزعون ؟

- قيمة وتمن 

- ها 

سديت الباب شو اجتي بخشمي اشتهيتها كلش 

واني وحدي بالبيت مو مال اكوم اطبخ لو اسويلي شي .. لفيت الحجاب واخذ عباية ع السرعة وكضيت جدري وطلعت لراس الشارع حتى اجيبن تمن وقيمة شو حيل اجتي ابالي 

بس من وصلت هناك  .. يا يمة 

عينك وما تصد ناس .. هنوب زلم مو نسوان 

كلمن كاضله جدريتين تلاثة ويصيح علمود ياخذون جدورته 

والجهال وحتى نسوان  والصياح والهوسة يبوووو هوسة منين ما تصد من صدك ركع جدورة .. ضليت اباوع بحيرة هسه شنو ارجع لو اوكف على صفحة وهم ينطوني ! 

تقرب رجال وهو يصيح وصار قريب مني 

اتحاشيته ورجعت ليورا واباوع باستغراب ع الوضعية وكاضة جدري .. لا مو مال اوكف على هالناس تخلص الجدورة والسره ما يوصلني .

اجاني صوت من وراي : شني صايرة ادورين ثوابات ؟ 

انداريت حازم وراي 

مدري ليش بفطرة بدون قصد انرسمت البسمة على ملامحي من شفته لاكفني بالهوسة اني والجدر 

.. ضحكت : شمدريني اشتهيتها وكلت اجي اخذ بس لا هوسة عيب مو مال اتدافع 

ابتسم  ومد ايده : انطيني 

باوعت - شنوه ؟ 

- انطيني جدرج واكفي على صفحة 

باوعت لجدري وشلته اله انطي : انت هم جاي تاخذ ؟ 

خذاه من ايدي وهو يكلي : بس صيري على صفحة من الهوسة لا احد ينطخ بيج 

رجعت للحايط وهو صاح : حسيييين ، لك هناااااا 

اندارله رجال من الواكفين يوزعون كاله : هلا ابو علي جيب ، شني بس هذا الجدر 

- لا مو الي بس حط بيه للجماعة حصتي توصلها لمحلي لك 

ضحك وياه وهو يكله : تأمر امر ابو علي صدك جذب 

- الله يسلمك 

كمل وياي : لا والله شبهت عليج من بعيد واجيت طلعتي انت .

اني اباوعلهم اندار وكف كدامي كتله : يعرفوك ؟

- شني السالفة من اني بكد علي ابني اشتغل بشار الداخل كلهم اعرفهم  الولد واحد واحد 

سكتت اندار : شلونج ؟ 

ابتسمت : زينة 

- زينة زينة لو ازوينة 

جاوبت بابتسامة على مراوغته حتى يعرف اخباري : لا الحمدلله زينة 

- يمكن خبر ما يهمج بس دنيا انخطبت 

- صدك ! يمتى 

- كبل محرم باسبوع 

- بالخير 

- يصيبج ، وين كاعدة هسه؟ 

- ويا حيدر اخوية 

- ها ، اي احسلج من بيت عمج

- سكت رجع حجه:  اني ذاك اليوم شفتج ويا هذا ابن عمج الجبير شسمه ؟

-يوسف !

-اي يوسف بس ما ارتاحيتله 

-لا ليش يوسف خوش ولد حباب !

-ما اعرف حسيته يتملحس، هو مرته مريضة سمعت ؟

- اي 

- مبين 

-شلون  يعني مبين ؟ 

- يعني رايدج بدل .. اني مالي علاقة وهاي حياتج اكيد بعد انت حرة وتعرفين قرارج بس يعني .. الله كريم 

مجاوبته 

حجه : صدك مسوية فيس شفت اسمج طلعلي ع الرقم 

- اي بس ما اعرفله 

- جا المن محملته اذا ما تعرفيله ؟

- رسول سوالياه وضل عدي 

- خل يولي عوفي ما يناسبج اذا هاي نزلي فايبر مثل الخط بس الاتصال بارقم جهازج بلاش 

- صدك !؟

- اي والله يفيدج بشغلج بدل ما تصرفين رصيد 

- لا هو هيج هيج ميفيدني لان ما عدنا نت ابيت حيدر بس بالشغل يجيني النت وبالشغل مالي وكت اكض تليفون فما راح استفاد يعني .. اسمه عندي تليفون كلكسي صاير طابوكة مالي وكت اشوفه 

ابتسم : العباية تلوكلج اكثر من الملابس ذنيج الكمتي تلبسينها .. طالعة حلوة . 

ابتسمت ومجاوبت 

رد سألتي : - شغلج متعبج ؟

جاب الرجال الجدر انطاهياه واني اكله : مشكور ما قصرت .. من رخصتك 

- الجدر حار اوصله عنج 

- لا يطيك العافية اخلي العباية جواه .. 

- صبا 

- ها 

- مالج غرض بالصار بيناتنا لو احتاجيتي شي لا تترددين تخابريني .. انت غالية 

- مشكور ، من رخصتك 

- اوصلج 

- لا مشكور ينطيك العافية . 

ضل يباوع عليه تنهد بحسرة وهو يگلي : براحتج

عفته ومشيت .. 

رجعت للبيت وحدي حطيت الجدر حار كلش تمن ومركة 

اكلت خاشوكيتن وموقفه كله ابالي .. شبهت عليج من ابعيد واجيت .. ع الشبه تعنى .. واجا يتأكد اني ... حاولت اتحاشاه وما اكثر حجي وياه .. بس بوكفة وحدة سألني كومة اسئلة تسولف عن اللي ضالات بكلبه .  

بقيت اكلب بالقيمة واجيبها منا واخوط بيها منا 

اندكت الباب كمت الها .. صحت منو .. اجاني صوت حيدر كمت فتحتله الباب بسرعة .. وخذيت الجنطة مالته من ظهره وكمت اهلي بيه .. كعد يمي بالمطبخ ومدد رجليه تعبان ويسولف كتله : تمن وقيمة ثواب هستوني جبته ما تاكل 

- اي والله شو قدميلياه 

انطيتهياه كام ياكل ويسولفلي على شغله وسوالفهم هناك ..

ودزتي على ملابس رحت حبتلا وطب للحمام غسل وذب روحه ع النوم .. واني رجعت اخيط .. حسيت بخيط برودة والمطبخ غيم .. سديت الباب .. 

كامت تمطر الدنيا ..

عفت الخياط وكمت وكفت اباب المطبخ واباوع المطر 

الدنيا كامت ترعد قوي .. صليت ع النبي وكمت اقرا ايات .. واني احضن نفسي من البرودة .. اتذكرت من طب ذاك الشتا ، جنت ابيت حازم .. ومتونسة بفرش الزوالي واشتي البيت .. واطلع بالصوبات و الدفايات .. اشتاقيت لجو بيتي ومكاني هناك .. اصعب شي ع المرة تخسر بيتها وترجع لا شيء شكد ما تقوي بروحها وتحاول توكف على رجليها تضل حسرة و قهرة بكلبها تعصرها كل ما صفنت .

لليل .. كعد حيدر كال : راح اروح اجيب رقية واجي 

مشى الشوارع فايضة المي واصل للركب .. لـ ١٢ بالليل يلا اجو اني متمددة بغرفتي ونايمة 

نص الليل صحيت المي جوا افراشي .. 

كعدت وشلت تليفوني بسرعة وكلبته يشتغل فزيت من مكاني بسرعة وكمت للضوا .. لكيت غرفة الاستقبال كلها طايفة والدنيا تمطر بقوة . 

اختاريت وين اروح .. 

مشيت للمطبخ .. هم المي واصله بس نص .. 

كمت اشيل بغراضي واحطهن على صفحة .. وكعدت ع الكرسي وغفيت على مكينتي لحد ما طلع الضوا .. خذيت المفاتيح وكلت اروح انام بالصالون .. وصلت الشارع احتاريت شلون اعبر .. المي واصل ليوين 

اضطريت اشيل حذائي واجفص بنص المي واعبر لذاك الصوب واوصل الصالون .. متت من البرد .. وصلت هناك الصالون بارد فد مرة .. حاولت احول السبلت الموجود للتدفئة ما عرفتله .. 

للعشرة ومحد اكو 

لا العاملات اجوي .. ولا زبائن 

الشوارع فايضة فمحد طالع وكلهن مخابرات ام الصالون مسترخصات منها الا اني الفطيرة اجيت على عمى عيني راكضة . 

للعشرة واني اگلك من البرد .. وكاضة كوب الجاي باثنين ادية .. بلكت ادفى .. ما اكو شي اتغطى بيه وادفى ورجلية صارن قالب ثلج سبحان ربي البارحة صيف شتت بسرعة ومتنا برد شبسع 

ضليت الهي نفسي بالتليفون .. واشرب جاي صرت ترمز 

دك تليفوني .. حازم .. رديت : الو 

- الو ها .. وين انت بالشغل لو بالبيت 

- لا بالصالون 

- ها، اكلج هاي الشوربة الجنتي اتحبينها ام السبع اشكال شنو جنت اتسمينها ؟

- ها شيلان الزهراء .. شبيها 

- جابولناها ثواب هسه واشتهيتها الج .. حارة . 

- لا مشكور تسلم ما مشتهية 

- وين انت بيا صالون دكتبيلي احطها بالباب وامشي .. بالطريق بعد 

- عشتار 

- هاه يعني انت بهذا الصالون القريب من محلي 

- اي 

- ديلا مسافة الطريق وجايج 

سده شوية وخابر : هاي انت شلون اجيتي شارع الداخل فايض اكلج بياهو منهن ذني اثنين انت بهذا لو بذاكه الصالون 

-هسه راح اطلعلك 

كمت اخذت حجابي وطلعت من الصالون .. شفته من بعيد .. لف السيارة واجا كال : بنطرونج مبلل وبلا جواريب شني قصتج 

- اتنكعن من اجيت متشوف فايض الشارع ، الا صدك هذا منو مسوي ثواب بهالمطر مجاهد 

- جيرانه بيت ابو فراس بالكراج مقرنص .. ووزعو عمي منطقتنا ما بيها مي هيج شوية طشاطيش .. هنا صايرة شوربة لو ما جاية ياهي تطلع بهيج جو وتجي للصالون مخبلة 

- ما ادري هن هم كل البصالون ما جايات بسبب المطر بس اني 

- جا رجعي 

- ان شاءلله مشكور ع الشوربة 

- امشي اوديج خاف تتورطين بالرجعة 

- لا مشكور تسلم اني ارجع 

- هي شنو المشكور .. شلون راح تفوتين والمي هاج واصل ليجاي 

- ادبر روحي 

- دمشي سدي الصالون وتعاي اوصلج وامشي لاهلي .. ولا تعاندين منتظرج 

راح اني فتت جوا طفيت كلشي وقفلت واخذت جدر الشوربة واجيت كعدت ليورا .. واني اباوع بالجدر  ما اباوع بحازم حجيت : جدري هذا التيفال شو مكلوب لونه مصخم ليش كاعد تطبخون بيه 

شلت راسي للمرايا لكيته مبتسم 

حجيت : وصلني لراس الشارع اني اكمل للبيت 

ما حاوبتي وصلني غاد عن بيت اخوية نزلت .. وكتله شكرا 

من مشيت اريد اروح للبيت اتذكرت البيت فايض .. وزوالي ما عندي وين اكعد .. اتعديت وكملت بالفرع لبيت عمي 

شافني وهو كاعد يطلع الفرع .. لف ورجع : شو ما طبيتي 

- حازم روح جا الجدر وجبته بعد تحاسبني وين اروح ووين اجي 

- وسم شبيج اتزمخين غير كلت اشرفها ليش ما طبت 

- وانت شعليك 

- يطبج طوب اني شعليه 

عافني ومشى .. وكفت اباب الدكان صحت : شلونك يحلو 

باوعلي عمي : هلا المختفية وينج 

- من الشغل للبيت ومن البيت للشغل شسوي 

- دطبي طبي باردة 

- ميلاد موجودة 

- لا يم اهلها ليش 

- لا هيج 

طبيت وكتله عمي خوش شوربة تاكل 

- اي والله جويعان بعد عمج 

رحت ذبيتها ع النار ونصيت واخذت هدوم من عمتي ولبست .. 

كعدت يم عمتي وعمي كام يصيح على ولده يوسف ورسول واحد منهم يجي يوكف بمكانه كتله : جا ما مداومين 

- شبيج عمي غير سبت اليوم 

- يا .. والله راح من بالي 

طب يوسف كال : سمعت صوتج من فوك شني عمي الحلب العضج كتلناه 

- شسوي غير شغل 

- قابل مجبوره عليه يا عيني دكعدي وارتاحي 

حجاها وهو يجي ياخذ الخاشوكة ويحط راسه بالجدر يباوع ويريد ياكل 

صاح عمي : جا صحتلك تكعد بمكاني لو تجي تكابل صبا 

حجت عمتي : مرتاحة بشغلج عمه حويدر مرته شلونهم وياج 

- الحمدلله 

يوسف : بس ما احسها لايقة تشتغلين بصالون 

- لكيت شغل احسن منه وكلت لا والا شعاجبني اشتغل ١٢ ساعة باليوم ب١٠ الف يعني الساعة تطلع ب٧٥٠ ..سعر لفة فلافل الله وكيلك بس شبيدي 

- الله كريم 

كام لعمي واني كمت اسولف ويا عمتي 

ندستني وهي تتسمع ليوسف وعمي يحجون بيناتهم صاحتله : راضي الشوربة راح تبرد 

اجا كعد سولف وياها واندارلي كالي : عمي يوسف توا كاعد يحجي وياي يكول خل تعوف الشغل واني اخذها 

- ياخذني وين ؟ 

- مرة اله على سنة الله ورسوله شمالج طكج الثول 

- يا دهر شياخذني عمي ومرته تشتم الهوى 

- جا شلون زلمة يضل بلا مرا .. هم يريدله التكعد وياه تغسل هدومه هدوم جهاله يضل هيج عمتج منا ركبها ما تكدر تكوملا ولجهاله ومرت رسول يومية مشكلة وطلابة وكاعد يغسل هدومه هو وجهاله بيده .. جا مرته ضلت سنة مريضة شلون يضل سنة هيج 

-جا لو متمرض يا عمي تعوفه وتروح لو تحمله وشيل حمله 

-هسه هذا الحجي الماصخ شلج البيه المرة تكدر تعين نفسها الزلمة ما يكدر قابل يعرف يطبخ يغسل وانت مو تعرفين اليصير والما يصير اكثر من الله ما طول الله الحلل هشي 

-حلال حرام عمي اني ميلاد مثل اختي وما اكدر تعذرني 

- وتضلين عزبة هيج ؟ 

- عمي ما صالي خمسة اشهر من اطلكت شني السالفة 

-حسي على روحج حمل ابنادم ثكيل ليش توصلين روحج ليوم حيدر يطيح بيج ويطردج 

-ما يطردني كاعد ادفع وياه ايجار ومستفاد مني .. 

- يوم المرته تضيك منج ينعل ابو الفلوس جا حكه زلمة يريد يرتاح مكابلته ومكابلة مرته على يا مال 

-مو مشكلة اذا هاي اجر بيت لوحدي واكعد شسوي 

-حرام بالحرم افنيج فني نسيتي سواياتج ذنيح مو صارت دموم من حدر راسج تالي شحصلنا طلعنا ابفضيحة ابد لا تفكرين فد يوم اخليج تكعدين ليوحدج بالعباس اخليهم يتناوشونج ويكصون ركبتج 

-الله كريم عمي 

-الزلمة منتظر منج جواب الله كريم شني راضية لا 

-لا 

-وليمتى 

-لحد ما يجي وكتها عمي ما طول مرته موجودة لا تفتح الموضوع وياي كلش ما اخذ مكانها وتروح بسببي ما اسويها 

- زين ياجرلج واتزوجي وما نكل لاحد بس استقروا انت وياه هو محتاجج وانت محتاجته واثنينكم ولدي وافكر بمصلحتكم بدال ما ضالة عمي بهالبرد تتمخطرين بالمطر خاطر تحصليلح عشرة الاف تطيهن لحيدر حتى يرضى يعيشج خو اخذيلج زلمة ياجرلج واتكعدين وترتاحين واكل وشربج وكلشي تحتاجينه يطيجياه واتسترين روحج يا عمي وتسدين حلوك الناس الما كاعد تسكت وامني الحجاية ما توصل لميلاد واخذيها مني.

- هسه ما مستعدة عمي ما اكدر 

- كبل شوية ميلاد هسه ما مستعدة .. كاعد اطلعين وعاويص خاطر تخربين الموضوع 

- عمي لحد هسه اني ما متعافية من اللي صار وياي 

- مريضة خاطر تتعافين الحجي هاذ الملزك يمتى تفتكين منه 

حجت عمي : الزواج مو غصب اذا تكلك ما مستعدة هدها جا هي كوا 

-جا يضلون هيج 

-عمي اني ما شاكية وضعي 

- وعساج لا شكيتي الوادم كلت وجهي من سالفتج بت اخوك يا طركاعة بت اخوك طلكيناج منا اشتغلتي صالون منا حجي هاذ 

-عمي صالون بنات ومحترم قابل زلم بيه وعيب شغل وعايشة بيه يشرف بعد العيب شنو 

- الناس ما تفهم هالحجي بتي افهمي ترا طكت حوصلتي 

-واني والناس شنو عمي منطيني الناس معيشيني لو بس فالحين بالگالة و الحجي على هذا وذاك اموت روحي حتى هم يرضون 

- واني كايلج موتي لو رايدج ترتاحين بت الاوادم 

سكتت منه ضل يحجي ويقنع ويرزل 

لحد ما مل وكام .. عمتي كالتلي : حجي عمج صحيح يا بنيتي فكري بمصلحتج عدل .. الزواج اخيرلج عمة من ضلتج هيج 

- بس بعدني عمة .. شلون اتزوج رجال واني نفسي برجال ثاني وما طابت منه . 

- انت النا ردتي حازم عمة اجاج واترجاج وشكثر دز عليج ما ردتي 

- ما اريده لان خذلني بس روحي ما طابت منه .. مو سهل انسان حبيته ينمحي من كلبي بشهر وشهرين العشرة يا عمة متهون يوم اللي احس اني كلبي فارغ واكدر احبن واعيشن ذاك الوكت ما الكى احسن من ابن عمي اخذنه والا ما اكدر هسه امثل دور الزوجة عليه واني نفسي بغيره .. حتى حرام . 

- لا ما يصير، مالج غرض اني احاجي عمج واقنعنه . 

ضليت عدهم نمت وارتاحيت 

وهي حاجية ويا عمي ما مقتنع .. كايللها تحجي هيج تتحجج هاي تعجبها عيشة الخوارة والتسهت بلا رجال ولا احد فوك راسها يديرها تريد تعيش على حل شعرها ما تتقيد بزلمة واحنا الطايحين بيها من حجي الناس وكالتهم الكلت وجوهنا. 

للعصر اجا حيدر لبيت عمي اني نايمة كال : جا هنا نايمة 

-وين اروح لعد 

-ولد عمي منا يجي احد انت نايمة هنا امشي للبيت 

- الاستقبال فاضت شلون انامن بيها 

-لازم اشتري زوالي واني ما عدي كل البجيبي ميتين وبعدنا ببداية الشهر 

- وشلون 

-شكد عدج 

-ذاك اليوم اطيتكياهن ما ضالات عدي يمكن ٧٠ الف 

-اي دطينياهن اشتري بيهن زوالي واني اطيج بعدين اذا صار عود . 

اطيتهن اله واخذني رحنا اشترينا زولية ومدات للاستقبال و الغرفته بس مدات لان المكان صغير ، واحنا كاعد انمد اجتنا جارتنا حايط ع الحايط رادت مني اخيطلها دشداشة وكعدت تسولف وياي .. وجبناها ع النت كالت : احنا عدنا راوتر اذا تريدين اطيج الرمز 

صدك حطتلي نت من عدهم .. وطلبت مني اكمل الخياطة كبل يوم السابع مال محرم تريد تروح بيها لعيالها مسوين مجلس للامام العباس 

فردت اشتغل بالمكينة 

رقية ضاجت تكلي صوت المكينة يزرف الراس لا تشغلينها بالليل 

كتلها : مستعجله ع القماش لازم اكضي ..

شوية واجاني حيدر يصيح ع المكينة عفتها 

ثاني يوم هم مطر جانت 

فما رحت للصالون كعدت اكمل الدشداشة .. من الصبح 

هم كعدت تصيح .. شلون ما انام .. صوت المكينة ما ينحمل . 

عفت الخياط وكعدت ع التليفون .. 

نزلت الفايبر وكعدت احط رقمي حتى اسوي .. 

اجتني كالتلي : بدال ما كاعدة كومي سوي ريوك ما طولج اليوم ما عدج شغل 

- ريوك المن 

- النا 

- اني شربت حاي انسدت نفسي 

- انت ما تاكلين احنا نصوم شلون على ما اطب اسبح .. 

مشت للحمام اني طكيت بيضتين وخدرت الجاي وكعدت كدام المكينة .. كالت : هم شغلتيها ترا طلعتي ارواحنا 

- رقية شجاج هسه هم تريدين تنامين وتنزعجين عدي قطعة رايدة اشتغلها ما عدي فلوس كل العندي انطيته للايجار والزوالي .. كافي 

- وعليمن تصيحين كاعدة اتمننين علينا مو زين كاعدة وتاكلين وتشربين بروسنا وما راضية 

سكتت عنها .. 

وهي صاحت حيدر كعدوا اثنينهم يتريكون واني اخيط 

كام يحجي على صوت المكينة بقيت اكص وافصل بيدي وهي كعدتها وياه كلها الغاز و تغمز على اسوالف سخيفة . 

رادت منه يطلعها بالمطر يفررها 

كاللها كومي .. بدلت ورادت تطلع بدون عباية ما قبل 

كامت تصيح شنو بس اني ما البس عباية وكدرته بس عليها .. وضلت تبجي وتتزعل حتى ما تلبس العباية وهو ما عنده اشكال تنزع العباية بس خلته بموقف لان هو ذاك اليوم متعارك وياي ع العباية وما انرديت .. عاد سواها بصيغة جمع كال : دولن شتلبسن لبسن فلا الي علاقة بيجن احتركن بنار جهنم 

واخذها وطلعت هي وياه بدون عباية .. 

اني الغاثني مو طلعت بلا عباية بس ليش تستشرف وتصيح عيب وحرام وميصير وهي طلعت تريدهن بس مو بيها وترجع تتعارك حتى يقبل تسوي اللي حجت عليه من وراه ... يسمونه نفاق والعيشة وياها ما تنحمل . 

بس كيفت من طلعوا كضيت الدشداشة كلها 

وكعدت ع الفايبر .. كم رقم من اللي عندي موجود عنده فايبر وحازم من بينهم . 

رجعوا حيدر ورقية بالليل حاجاني بموضوع يوسف وزواج بدون علم مرته الاولى ما قبلت .. كام يحجي ويرزل ويغلط .. 

ما اهتميتلا .. وسديت الموضوع . 

بالليل اني كاعدة بالمطبخ لان يجي نت اقوى .. 

واسمعها تحاجي .. تكله : طبعا ما تقبل تتزوج وانت عايفها على حل شعرها تشتغل وتطلع وتطب وين لاكيتها تروح تتزوج وتنحبس مثلي وتصير الطلعة حسرة عليها ، هم شغل وتتلهى ويا امهات الصالون وحجي شكالت الزلم وشحجت النومة وهم كرف فلوس وهم دياحة .. تريدها تعوف هذا كله وتنستر وتتزوج طبعاً ما تقبل .

صدك من ثاني يوم رجعت .. 

حيدر كام يحجي ويصيح ويكلي ماكو شغل بعد واكعدي وممنوع اطلعين .. بس ما سمعتلا .. كمت من الصبح طلعت للشغل ورجعت لبيت عمي بقيت عدهم .. 

وكلت لحد ما يلتحق يلا ارجعلا .. 

بس ميلاد اجتي لبيت عمي وهم دزت عليه وكامت تحجي .. 

طكيت وياها وكتلها : هو اني شاردة من بيت حيدر حتى ما يغصبني اكعد واتزوج يوسف .. اني شصير .. ووين اروح ترا اكدر اخذ رجلج واتزوجه بالسر وانت يا غافل الج الله بس اني ما اريد انت مريضة ما اريد ازيد عليج بس هم لا اتزيدين عليه كل واحد علته بكلبه .. عوفيني رجلج لا اريده ولا مواطيته ولا اريد الزواج عندج حجاية روحي احجيها وياه لا تحجينها وياي . 

ونزلت جوا .. 

بس طلعت روحي واستهضمت .. يعني واحد ما يريد يتزوج وين يروح لو يبطلوني لو يزوجوني .. وممنوع تاجرين وتكعدين وحدج وممنووع وممنوع وممنوع .. روحي طلعت منهم . 

كمت اطلع من الصبح ما ارجع الا بالليل لبيت عمي اكعدلي ساعة ساعتي وانام حتى ما اثكل عليهم .. وحتى اكل اجي متعشية حتى لا افتح ثلاجة واكل من احد . 

لحد ما شهلاء اتزوجت .. 

واجوا اهلها لبيت عمي .. حطوا الجهال عده وكالولهم : بتنا اتزوجت وذوله جهالكم تريدون ربوهم تريدون ذبوهم بالشارع احنا ما نربي جهال غيرنا . 

اني جنت بالشغل 

عمي مخابر على حيدر .. حيدر محتار بكاعه 

جايبهم لبيته رقية لاعبة لعب شلون جايب الجهال الها تكله : ذبهمب الشارع اني ما اتحمل الجهال وما احب الجهال .. ما اربي ولا اداري احد . 

خابراني كالي : صبا تكدرين تجين 

- ليش شكو 

- اهل شهلاء ذبوا الجهال علينا .. وعمي اطانياهم شلونب الله ذوله وين اوديهم 

- وين توديهم !؟ ليش انت مفكر تذبهم 

- لا ما كاعد اذبهم بس ياهو اليداريهم رقية ما ترضى تعاي بالله شوفيلي حل اني ما اكدر اتحمل مسؤليتهم وحدي . 

- اي مو مشكلة اني اجي ونشوف حل . 

- استعجلي بالرجعة . 

كملت شغلي .. ورجعت للبيت لكيت الجهال بملابس صيفية وحال الضيم حالهم وكاعدين يم حيدر خالسهم ما يسوون صوت حتى لا رقية تضوج ، ورقية زعلانة وبغرفتهم شلون جايبهم للبيت 

كتله : حيدر تحجي صدك خالس الجهال وانت تشوفهم كاعد يرعدون من البرد بهالملابس اي دشغللهم صوبة شغللهم تلفزيون ضحكهم خالسهم ليش ترى يتامة 

- اي واني اعرف اتصرف ويا الجهال حتى اتصرف وياهم انت كابليهم 

- زين بس امشي وياي نشتريلهم ملابس 

- منين اني ما عدي 

- اني اشتريلهم بس امشي وياي 

اخذني ووصلني للسوك مال الداخل نزلت اخذتلهم كل واحد فد ٤ اتراكات شتوية وجواريب .. ورجعت للبيت دفيت الهم الحمام وسبحتهم ولبستهم تراكاتهم الجديدة والجواريب واخذتهم للاستقبال فتحتلهم قناة افلام كارتون وكتلهم : العبوا على ما اسويلكم عشا 

سويتلهم طماطة وبيض واجا حيدر كابلنا يلاشيهم وياكل ويانا 

حجه : انت عندج شغل .. شلون راح تشتغلين وهم موجودين ترا هاي ما ترضى تبقيهم عدها 

- لازم ننقل مدرسة بنونة واذا على حسوني اخذه وياي شسوي بس انت ما طول عندك سيارة بس انقلها قريب من عدنا حتى تداوم يومية بمدرستها ما تبقى يم مرتك 

- ماشي باجر اخذها و اسويلها النقل 

ثاني يوم خذيت حسوني وياي للصالون وكح ما اتحملوا ويلعب بالغراض ويبحوش .. كالتلي : امشي حطي باي مكان وارجعي لان ما نكدر بهالوضعية هو صالون مو حضانة 

مشيت حطيته ابيت عمي كام يلعب ويا جهال رسول وكتله : عمي اخلص شغلي واجي اخذه 

حيدر ما مكمل معاملة النقل .. 

جيب تايد وجيب موافقة ومن هالحجي تلث تيام والبنية ما منقولة .. تالي ابتليت اني بيها اترخصت من ام الصالون حتى اروح اجيب ورقة النقل وانقل بت اخوي 

كالتلي روحي ومشيت كضيتلها المعاملة وخلصتها وباجر تداوم يمنا بالداخل .. خابرتني ام الصالون بالليل تتعذر مني وتكول محرم وماكو شغل ياريت تجينا من يخلص محرم تعاودين الشغل هالفترة احسبيها استراحة الج . 

اتضايقت حيل .. وروحي طلعت من خشمي 

وكلت ادبرها شلون ما جان بفلوس اليطينياها صديق يوسف وشغل الخياط حتى اذا قليل .. 

بس من التحق حيدر ومشى .. مرته راحت لاهلها 

بقيت بس اني والجهال .. اطلع بنونة للمدرسة واكعد اكابل حسوني . 

اندكت الباب .. 

اني كاعدة حتى خياط ما عدي اشتغل العاشر خلص والنسوان كفت رجلها محد تخيط بعد الا ورا الاربعين .. فلبست حجابي وكمت للباب ، طلع رجال حجيت وياه من ورا الباب : اتفضل خوية 

- خوية بس ايجار البيت رايدة 

- هاي اي .. بس اخوي بالدوام من يجي يمرلك 

- شوكت يجي 

- والله هو منتسب .. يعني فد اسبوع ويجي 

- لا عمي هواي واني ايجار ذاك الشهر مستلم نصه ما صايرة هاي صار عليكم شهر ونص ما دافعين وانتظر اسبوع مو حجي هذا 

- اي شسوي عمي والله بس اني والجهال بالبيت 

- اي وانا هم حقي غير ايجار بيت .. تخابرين اخوج مدري رجلج واتكليله كدامك هاليومين لو ما ودالي فلوس الايجار خل يطلع من البيت . 

حجاها ومشى 

خابرت حيدر كال : واني منين ادبرله خل ينتظر عود من استلم راتب 

- يا راتب ما صارلك اسبوع من استلمت 

- اي اطيت منهن سلفة واني مطلوب ع العرس لصاحبي ما ضللي  وكتله اتحملني بس هالشهرين بس اوفي انطيك مال شهرين بس ما رضى اطيته نص ومن استلم انطي نص يعني شسويله

- وهسه شلون 

- هسه ددبريها لحد ما اجي 

- ادبرها شلون اني حتى من الشغل كعدت وما بجيبي هواي وهو يريد ٣٧٥ حتى مو ٢٥٠ 

- اي خل يولي 

- ولو اجا مرت الثانية 

- سلمي كليله الفلوس عد اخوي يس خل يجي 

- سديته منه .. 

شو ورا يوم .. وابو السحب طفى الكهرباء 

رحتله يكلي ما دافعين صارلكم شهرين .. اطونا ايجار مال شهرين وننطيكم . 

التمن عليه واني ما بجيبي يمكن ٦٠ الف .. اطيت خمسين وكتله : من يجي اخوي يكملكياهن فدوة لعينك شغلهن بس اني والجهال بالبيت . 

صدك شغل النا .. 

وبقت عدي عشرة .. صمون على شغلة منا جيب منا .. 

جيبي فرغ ما عدي ربع دينار .. وبنونة واكفة فوك راسي تريد مني دفتر ابو المية للقراءة دفتر قرائتها شاكة حسوني 

رحت على عمتي ادايني .. 

كالت كل العدي اطيتهن لحيدر وداينتهن 

اطتني ٢٥ الف مصرف ايد وكالتلي دبري نفسج بيهن 

احتاريت بكاعي .. 

دنياتي مو مال اكعد الها واعتمد .. كل الحواليا ما بيهم اعتماد لازم اشوف شغل .. كضيت حسوني وافتريت المحلات على شغل ماكو .. خابرت الاعرفهن ما حصللي خصوصاً ايام محرم .

نشرت ع الفيس مالي .. 

محتاجة شغل .. اللي يعرف احد صالون لو شي محتاج عاملة يبلغني . 

يومين محد شايف المنشور ولا احد منطي لايك 

لان اصلا ما ضايفة احد بيه حتى يطلع المنشور الا اذا احد بحث عن حسابي ودخل يلا يشوف . 

والظاهر من بعد يومين .. حازم داخل وشايف اني ناشرة هيج 

جانت الساعة ب١ بالليل واني كاعدة ع التليفون وروحي طالعة .. دزلي ع الفايبر ( كاعدة ) 

فتحت الرسالة بسرعة ( اي ، كول ) 

- دخلت حسابج وشفت ناشرة تريدين تشتغلين ليش 

 - شنو ليش كعدت من شغلي بذاك الصالون ومحتاجة شغل 

- محتاجة ؟ 

- لا ما محتاجة فلوس محتاجة اشتغل جهال اخوي بركبتي وحتى البيت فلازم اشتغل 

- اتصل لو احد يمج 

- ليش تتصل 

- يمكن الكالج حل 

- لا مشكور ، ان شالله الكي 

- هو الشنو الا مشكور اساعدج 

- لا تستغل ظرفي حازم مشكور اني ممحتاجة مساعدة 

- صبا ترا اني حازم اذا نسيتي اتذكريني واتذكري ابيناتنا لا تعامليني جني واحد من الشارع رايد يساعدج ما تعرفينه 

- ولا انت حازم ما اريد ، بعدني ما ناسية ذاك اليوم الوكفت واريد اشرحلك وكلي امل لو شفتني راح تكلي طبي امشي جوا ما اريد اشوفج وتنظر تهدا مثل كل مرة وتجي تسمعني بس انت طردتني وسديت الباب بوجهي يومها ما تذكرت اني صبا ما اتذكرت كلشي بيناتنا جاي تكلي انت اتذكري 

اتصل 

رفضت كال : راح اجي اكسر راسج ترا ردي 

-ما محتاجة مساعدة شتريد تسويلي مثلا .. اذا تريد تساعدني شوفلي شغل . 

ما جاوب .. وسديت التليفون 

وحاولت انام اجيب راسي منا وارده منا .. حيل ضجت منه 

ما اعرف لا جاي يتوب مني ولا جاي يعوفني بحالي مخليني معلكة اكول انساه .. ويطلع بوجهي يرجعني اتعارك ويا روحي من وراه . 

ثاني يوم الصبح كعدت .. بنونة ظهري 

كعدتها واني اقريها واوكلها ريوكها .. لحد ما صارت ب١١ ونص مشت  لمدرستها طبكت الباب وراها وسمعت التليفون يدك . 

مشيت للاستقبال حسوني كعد على صوت التليفون 

باوعته حازم .. رديت : ها حازم 

-كدرت الكالج شغل ٣٠٠ بالشهر تكفيج ؟

-يا ريت وين ؟ 

- ب ١ اجي للمحل واخابرج علمود تجين 

-اشتغل عدك بالمحل تريديني 

-اي اتبيعين بواري وقفايص شبيها 

- ياااا حازم والله هذا مو شغل نسوان 

-وانت حاسبة روحج ع النسوان ؟ 

- يا فدوة ليش النسوان ابيش احسن مني حتى لو ما احبل واجيب بس هذا قدرة ربك 

- يروحلج فدوة 

ضحكت : هسه لا اتسوف الموضوع اني ما اكدر اشتغل بمحلك 

- لج عوبة صارلج شكد وياي ما تعرفيني 

-يعني شنو 

- يعني اني ارضى احطج بمحلي كدام جماعتي وربعي اتبيعيلهم اشبية شادهن لو املمعهن ؟ 

ضحكت : جا ششتغل 

-انت متعرفين اتسكتين وتجين ع الموعد 

-من هسه الشغل بيه مذلة ما اريده عمي 

- دنجبي واكلي ** وتعاي من اخابرج 

سداه .. ضحكت 

مشيت للمطبخ باوعت لوجهي الابتسامة شاكة وجهي من الطول للطول .. عابت هالوجه وخفى بكلمتين شك حلكج ضحك امداج يالغبية . 

غميت روحي وانداريت الحسوني اليجر بثوبي يصيح : عمة دوعاااان 

- يبعد عمتك وكلبها 

طلعت الطاوة مال البيض وبتيتة وكعدت اوكله .. وبعدها دخلته سبحته ولبسته وكعدته على تليفوني لميت البيت ونظفته وسبحت صارت ب١ وربع خابراني حازم .. خذيت حسوني ورحت لمحله . 

لكيته منظرني اباب المحل .. 

الجو جان بارد بس من شفته كلبي كام يدك وكصتي عركت .. امشيله وهو يباوعلي باوع لحسوني .. شاله وباسه : ابن حيدر هذا 

- يا حيدر يمعود ذاك اليوم حيدر اتزوج هذا ابن جعفر شبيك

- هاه امهم هم رجعت ذبتهم 

- بعد شسوي 

- ديلا امشي 

مشى وياي خطوتين لصالون قريب من محله كال : صاحبة الصالون اعرفها مرت صاحبي وحاجيتها كالت محتاجة عاملة .. ادخليلها واتفقي وياها 

جاي ادخل الها كال : عوفي الجاهل يمي خل اخذه اشتريله 

راح واني فتت 

بقت تسالني اعرف احف اعرف اصبغ وبقت تسولف وياي .. 

وكالتلي .. من باجر بلشي الشغل .. من الساعة ٩ الصبح لحد الساعة ٣ وهذا راتبج 

خذيته وطرت من الفرح من لكيت شغل 

خابرت ابو البيت انطيت نصه وكتله يبقى ايجار البيت من يجي اخوي يكملك كال : مو مشكلة بس تطونياه هذا الشهر 

-ادلل خوية 

وخابرت حازم اتشكر منه هواي .. 

كالي : اتشكريني ليش هو اني شسويت قابل اني مشغلج 

- لا بس انت سعيت برزقي 

- سهلة دشوفي الشغل وياه شلون وطمنيني 

- مشكور الله ينطيك العافية 

- تدللين بويه 

سديته منه .. 

وثاني يوم كعدت من الصبح بدلت بنونة من وكت ووديتها هي وحسوني لبيت عمي كتلها : عمة من تصير ب١١ خليها تروح يبقى بس هذا المصيول عينج عليه 

كالت : روحي 

مشيت للشغل .. وكعدت ويا ام الصالون 

كضيت اليوم كله نسولف ماكو ولا وحدة طبتلها .. 

ثاني يوم كالتلي ما راح اجي اخذي راحتج ... وراها داومت 

بس ام الصالون متامرني .. بالعادة اذا عاملة تطلب تنظيف المحل تكلي جيبلي هذا الشي او سوي هيج .. البنية كله شتتغل التريده بنفسها متطلب مني 

اسبوع مر .. 

الشغل كلش خفيف بس مرتين حفيت .. والباقي اخلصها سوالف لحد ما اطلع ب٣ .. اجتي كم مرة نسوان على صبغ ام الصالون هي كام خبطت وصبغت .. 

شكيت .. 

انتظرت الساعة ب١ وكمت كل شوية اباوع للشارع حتى اذا اشوف سيارة حاكم اروحله .. لحد ما سمعت بيه يصيح على العامل مالته . 

طلعت من المحل .. 

هو عصبي وكاعد يصيح .. شفت وجهه خفت احجي 

كال : ها خير محلج بصفي يومية راح تتسرسحين تصفطين براسي ؟ 

- وشبييييك تصيح ؟ 

-شرايدة ؟ 

- ما ريد منك شي 

-جا شعدج جايتني 

- اني دا اشك انت منطي فلوس لام الصالون مشغلتني 

- انت شحاسبة روحج فد مندلة واني حاير بيج ؟ ما عدي شغل وعمل غيرج تشتغلين واني ادفع عنج ؟ شايفة روحج شوفة 

- وليش تتجاوز اني كاعد احجي وياك طبيعي .. 

- دولي روحي واصلة ليجاي مالي خلكج امشي 

- مو صوجك .. صوجي اني جاية احاجي واحد مثلك .

- دولي . 

كضيت شغلي رجعت .. لكيت حيدر ومرته موجودين من نازل رايح الها كبل وجاي للبيت ، كتله ع الشغل الجدير وابو الايجار كال عود اني اذبرها 

كلت بكلبي بعديش ؟ 

بعد ما دفعت سحب ونص الايجار 

لليل .. اني بالوحدة واني جوا الفراش العب بلعبتي السخيفة ام الطوبات الرايحة اعيوني من وراها وما ادري شمستفادة منها .. طلعت رسالة كدامي واني العب من حازم كاتب : كاعدة 

فتحت : لا نايمة شرايد 

- رايدج 

ما جاوبته 

اتصل ، دست رد واني جوا البطانية 

كال : اسف يمكن جاي اضايقج بهالليل بس حسيت كاعدة 

- خير ؟ 

- ما اعرف احس بروحي تعبان وضايع وما ادري 

- اي 

كام يتنهد واسمع صوت جداحته وهو يشغل جكارته . 

كتله : مبين من صياحك اليوم 

- شلون 

- ما ادري حسيت اكو امور مضايقتك وطبعا كالعادة ذبيت حركتك بيه 

- طلكت امل  

- شنو الجديد انتم باقين يا مطلكين يا راجعين .. لا تضوج كلها يومين وترجعها 

- مو ادمية وتعبتني حيل .. هسه البيت وصخ  سكتتمكاني الاريد انام بيه مو نظيف عمي ادفع وانام ورضيت اكل ماكو لو يلعب النفس بيض وطماطة طماطة تكلاه وهالسوالف وكلت نعمة .. بس وصلت بيها مواصيل ما كاعد اكدر اتحملها ابد 

يحجي واني اسمع حركة شلت راسي شفت رقية سدت الباب ، حجيت - اللي هي ؟ 

- مفيزة لتركيا ومكملة ومتفقة على يوم السفر وجاية اتبلغني من باب العلم والله تتسوك مناك المسواك رخيص وتستفاد.. من ما رضيت ضربي الباب واطلعي .. حلفت لو سافرت ومشت اطلكها وما انردت .. سافرت البارحة بالليل واني اخر من يعلم بكلشي! 

- وشسويت ؟ 

- جبت شيخ وخذيته ابيت اهلها وطلكتها وانعل ابو اليوجعها 

- لا هو انت حتى لو تريد ترجعها بعد ما اتعقد تكدر 

- ما فهمت 

- ما ادري اني الاعرفه من اتطلكها مرتين وترجعها الطلاك الثالث بلا رجعة 

صفن : هذا طلاكنا الثالث 

- طلاكك الثالث اللي اتطلكه بشيخ وشهود واني ادري بيه

غيرها انت كم مرة رامي الطلاك هيج بعصبية ما ادري 

سكت : انعل ابوها .. مرضتي الله لا يوفقها 

- بعد هاي حياتكم وانت احكم بيها 

كاعد احجي انشالت البطانية من راسي درت وجهي حيدر وهو يكلي : ويامن كاعد تحجين ؟ 

- مو ويا احد 

جر التليفون من ايدي شاف حازم والاتصال مفتوح 

سطرني راشدي وجراني من الفراش من راسي : تعاي ساقطة جاي تحاجينة وانت مطلكة ومحرمة عليه .. رايدة اتفضحينااا 

ولزمي يجر بيه من راسي كمت اصرخ وابجي 

كام يرفس بيه ويصيح ويغلط ورجع خابر على حازم يفشر عليه وحازم يغلط ويصيح عليه .. 

كعدوا الجهال كاموا يتصارخون وهو يدفر بيه 

بنونة ذبت روحها عليه وتبجي .. تفل عليه واخذ التليفون ومشى .. حضنت الجهال وكمت ابجي .. وبنونة حاضنتني وتكلي : لا تبجين حبيبتي لا تبجين هسه ادعي رب العالمين يكسر ايده 

بستها وكتلهم : يلا لفراشكم 

رادوني يمهم .. نمت بنصهم وحضنوني ورجعوا ناموا . 

ضليت ابجي لحد ما خويت ونمت . 

كعدت الصبح .. طلعت بنونة للمدرسة

وطلعت وراها .. للشغل ، لكيت حازم واكف اباب محله من شافني اجا كاعد يحاجيني زمخت بيه وكتله : انت متوب مني وخر مني جوووز كل مشاكل ومصايبي منك 

- وانت ليش متحملة تبقين عنده وهو كاعد يمد ايده عليج هيج 

- حتى ما اضل عندك متحملته حتى لا ارجع لعيشتي وياااك افتهمت وخر مني وبعد لا تتقرب مني . 

عايفني ورايح لعمي كايله اني بس خابرتها بموضوع يخصني واني المرك مرتي وبعدني نفسي بيها .. ورايد ارجعها لذمتي . 

عمي من يمه رافضه وكايله : المرة ابن عمها رايدها ومتفقين على زواجهم ان شاءالله 

حازم من داري عيج متسودن راجع عليه .. 

اجتني ام المحل تكلي : ابو علي يريدج 

طلعتله كالي : انت صدك مخطوبة لابن عمج لو عمج جاي يجذب عليه . 

- لا صحيح ، شرايد 

- وافقتي يعني !؟ 

- مو شغلك 

- اسمعي بالعباس يا صبا لو وافقتي واتزوجتي ..

قاطعته:- اي شتريد تسوي ؟ وشنو يطلع بيدك تسوي لا اني مرتك ولا اني اخصك افتهم الطردتها لا تريدك ولا تحلم فد يوم ترجعلك .

- دسويها شوفي شلون اندمج . 

عفته ودخلت .. الظهر دخلت حيدر مدبل عليه .. 

رغم يدري بطلعتي الصبح طلعت وهو بالحمام حجه ولا لحكني .. بس الحجي البراسه زاد بس شافني طبيت كالي : شلون اطلعين لشغل بدون علمي ؟ 

- شلون انت جنت بالحمام واني طلعت 

- اطلع الكاج طالعة 

- حيدر تليفوني عندك وحازم اني ما رايدته والبارحة خابر على شغلة تخصه واعترف غلطت ورديت بس ما عندي شي وياه 

شو هذا كاملي ويجر براسي ويصيح : اني مو كوا* صبببا 

اني مو ****  وتكو*** براسيي 

ودفرات وضرب كمت اصرخ وابجي 

ورقية واكفة ما حركت ايدها ولا اجت يمي .. دفعته مني وكضيت الباب وطلعت لبيت عمي دخلت لعمي ابجي .. 

كالي عمي : حيل وياج الا زلمة ثاق بيج ومتحملج ابيته وتروحين تتخابرين ويا حويزم .. حويزم الشهرنا وخزانا وخلا اليسوى والما يسوى يحجي بينا 

كمت ابجي واكله : عمي والله اني ما رايدة حازم والعباس ما رايدته بس غلطت وجاوبته بس ما عندي شي وياه خو لو اريد ارجعله بس اني ما ارييييد 

- جا شعدججججججج مخابرته بنصاص الليالي 

- خابراني على شغلة تخصه وكاعد يحجيلي واني كتلك ادري غلطت ما عندي شي والله 

- واغلاطج هاي يمتى تنتهي ؟ ترانا جزعنا ملينا كافي عاد صبرنا عليج وفاض صبرنا لا عرس ترضين تعرسين لا ستر تنسترين شلون وياج تعبتينا 

كام يهين ويغلط ويعايرني 

انت عاجر وباجر عكبة تنذبين بالشارع وشوفي روحج واتلاحكيلها لا اضلين ماخذة الدنيا بحيلج كافي استحي على روحج تعبتينا واختزينا جوزي . 

سكتت ما حجيت اي حجاية ، 

ضليت كاعدة بس مستهضمة ، شوية وطب يوسف كال : صبا 

باوعتله : كومي وياي رايدج 

- وين 

- ما نطول كومي 

باوعت لعمتي كالت : كومي ويا ابن عمج شوفي شيريد منج 

كمت حسبالي للحوش 

كال : لا البسي عباتج خلي نطلع 

لبستها ومشيت ردت اكعد ورا كال : هسه اني غريب تعاي كعدي كدام .. 

كعدت ليكدام وسديت الباب .. ساق السيارة وطلع ع الشارع داس بيها لحد ما وصلنه لمتنزه يصير شوية عن صالون اريدو .. صف السيارة وطفى .. كال : انزلي 

- لا خلينا هنا ما حابة انزل باردتلي هنا ادفى 

- براحتج ، اني شتريدين براحتج .. 

اني يا صبا لا رايد اغصبج ولا رايد استغلج .. اني ابن عمج وكلام الناس هواي عليج والعباس يشيب الراس مع هذا انت عرضي ويقهرني اتكحفين واتعبين وتعبج لغيرج .. 

اني نقطة رايد افهمها بس 

انت رفضج وامتناعج رايدة حازم .. لو سبب ثاني 

- اني لو رايدة حازم خو اوافق عليه من لما اجاني ودز ناس ترجعني بس اني ما رايدة حازم ومخابرته بالليل لان هو شافلي شغل ومتفضل عليه استحيت انهره واني بكل مرة اطرده وانهره مني .. بس ما ابالي ارجعله ولا اريد 

- واني هذا الكلته لو رايدة خو ترجعله شني مستحية 

بس الى متى وضعج هاذ احجيلجياه هيج اخوج خوية ما رايدج .. ومتعاجز منج ومرته تريد تاخذ راحتها ووجودج حتى لو مو اتدفعيلهم فلوس لو ادفعيلهم مي كلبج ما يريدون ولاخر يوم يحسبونج عالة عليهم .. فالى متى راح تخلين روحج عالة على غيرج 

- اني طلبت اجر وحدي بس ما يخلوني 

- صبا صبا ، لا لحظة الله بالخير عليج 

ترا احنا بالعراق ومجتمع عشائري ومحافظ 

ما اريد اذكرج هاف تكولين يعايرني بس تذكرين من كعدتي ذيج لمرة لوحدج شصار فضيحة وعشاير تكاتلت رانشرينا ع الحبل .. مرة انت وتغلطين بس ما يجوز مجتمعنا صعب . 

- يعني ما اعيش الا اتزوج 

- والزواج راح يكسر مجاديفج ؟ اني لا ابالي اوكف بطريقج ولا رايد امنعنج من شي على راحتج باللي اتريدينه بس كون ابيت وحدج مستورة محد يوصلج ولا توصلين احد وبذمة رجال اليفكر يحجي عنج حجاية يفكر الف مرة يخاف لا ينكض بيها .. راحة اله والا شمستفادة كليلي اطلعين من الصبح لليل حتى نهاية الشهر حيدر ياخذهن وتضلين بحسرة الربع ، خو اكعدي واستريحي والتريدينه يجيج للبيت 

- وجهال اخوي 

- جا دوله لحمنا لو رايدة تخلينهم عدج اني ما عدي مانع بس انت تكدرين لمسؤليتهم ؟ 

سكتت : ما ادري ، انطيني مهلة افكر 

- شكثر 

- ما ادري 

- على راحتج ما اقيدج بس راح انتظر منج جواب . 

فر السيارة ورجع وكف ع الشارع اشترالي عشا وحلويات للجهال ومن هالامور واجا يدخل للفرع حازم كاعد اباب محله شافني كاعدة وياه بالصدر . 

رجعت للبيت ..

كعدت افكر اجيبها منا اردها منا .. 

شفت نفسي كاعد اراوح ع الخالي .. شمتأملة ارجع لحازم ؟ 

اني تعبت منه ومن اهله حتى اذا هو زين اهله ما يعرفوني بحالي لو اضم روحي بشيشية منهم يكرهون الغريبة وهو متهور وعصبي ومتسرع المرة الفاتت الطلقة ما اجتي براسي .. ثاني مرة منو يضمنلي ما اموت بيها بلحظة غضب منه ؟ 

يبقى ابن عمي قريب عليه ويعرفني ويعرف اني شنو ويرضى بجهال اخوي .. وهم هو زين وخوش ولد ويأجرلي بيت احسن من عيشة الرحالة الجاي اعيشها .. يوم هنا يوم يم حيدر .. ارضى بقسمتي واخلص من عيشة الذل 

لان لو شما ردت اصير قوية واعتمد على نفسي محد يخليني وكلهم واكفيلي حجر عثرة وموس بزردومي بحجة مطلكة وعزبة وما عدي رجال 

اتزوج واخلص حتى لو ما احبه .. اتزوجت الاحبه شستفاديت 

خليني على ابن عمي احسنلي اقلها متفهم وهادى لا عصبي ولا متهور . 

كاعدة افكر اجتني بنونة : عمة عمة 

- ها حبيبتي 

- هاي عمو حازم دزلجياها 

- شنو هاي !؟ 

باوعت ورقة وملفوفة لف على شي فتحتها رصاصة والورقة الممجعصة مكتوب عليه ( اختاري ) .... يتبع 

 تكملة الرواية من هناااااااا 

لمتابعة باقي الروايه زورو قناتنا علي التليجرام من هناااااااااا

بدل ماتدور وتبحث علي الروايات عمل 

متابعه لصفحتنا على فيس بوك هنااااااااااا

الرواية كامله من هناااااااااا

مجمع الروايات الكامله 1اضغط هناااااااا

مجمع الروايات الكاملة 2 اضغط هنااااااا