رواية عاجر الفصل الثالث والاربعون 43بقلــم الكاتبـــة زينب ماجد (حصريه في مدونة قصر الروايات)

رواية عاجر الفصل الثالث والاربعون 43بقلــم الكاتبـــة زينب ماجد  (حصريه في مدونة قصر الروايات)

رواية عاجر الفصل الثالث والاربعون 43بقلــم الكاتبـــة زينب ماجد  (حصريه في مدونة قصر الروايات)

#عاجر

{ بقلم الكاتبة زينب ماجد }

#الحلقة_٤٣

فتحت الباب ومديت راسي 

طلع علي ابن حازم .. ابتسمتله : هلا حبيبي ولا عرفت صوتك ولك ..

- شلونج

- زينة ، كول حبيبي

- بس ابوي دزالج ذني

اخذتهن من ايده واني اشوفهن فلوس 

- مال شنو ؟

- مصرف الج

رجعتهن : كله مشكور كاعد اشتغل وعندي خير من الله

- بس هو دازهن

- اي رجعهن كله ما تريد

- انت وين كاعدة

- هو دازك عليه وموصيك لو لا

- لا اني رايد اعرف اخبارج

ابتسمت وكتله : دفوت جوا فوت .. خل انطيك مي

فات وهو يباوع البيت : كاعدة وحدج

- لا هذا بيت اخوي

- بالدوام هو

- اي

- ابوي اشترالي تليفون اي شي تحتاجينه خابرينه

- يمه اعليوي كبر وصار زلمة بالعباس من كلت افتحي اكول صوتمن هذا

- نستي صوتي

- هو اني النسيت صوتك لو صوتك الكل يومية يتغير ويخشن 

فدوة الطولك صاير رجال يبعد عمري .. اشلونه الوضع هناك شخباركم

- زينين .. بس ابوي مو زين

- ليش

- الصار مو هين عليه هو جان يعتبر بشار مثل اخوه للصغير ومامنه الشغل بالمولدة كله وحتى من جان يفوت بيتنا يامنه واطاه اختي بكثر ما يحبه ويثق بيه .

- يحجي عليه ؟

- ابوي بعمره ما اذاج ولا حجه عليج اساسا هو مصدكج

ضحكت : ما اذاني ومصدكني ، علاوي انت بعدك ما تعرف الدينا زين الله لا يذبك بناس مثل ابوك وعمامك

- وشبي ابوي وبيش قصر ترا والله هو تعبان ، وحقه بكلشي يسوي انت الغلطانة

-كبرت وكمت اطب بعيني ولك

-لا مو تجاوز بس انت ما حجيتلا وخليتي بشار يعيدها اكثر من مرة ويدوس بيته وبدال ما تتحملينه وتوكفين وياه بهاي المحنة من دره وانت تعرفين شكد صعب عليه الموضوع شردتي بروحج وخليتي حجي الناس والتعير وتلوم كلها كباله ما فكرتي يمكن يوكف كلبه يمكن يصير بيه شي انت الانانية وعفتي مو هو العافج .. فكرتي بس بروحج خاف تتاذين ما تفكرين هو شكد تأذى شسمع من حجي شكالوله شعيروه

- علي ابوك رماني وصوبني لو ما شوية

- اكلج ترا ابوي ب٢٠٠٣ جان كاض سلاحه ولازم امن قطاع كامل كامل ويحارب الامريكان وما كدروله ومحد كضه يجي يخطيج وانت كباله ابوي لو رايد يكتلج جان سواها .. بس هو بعمره كله ما اذاج بكد ما انت اذيتي .

- هو معلمك هالحجي تحجيلياه

- اني مو صغير حتى احد يعلمني الحجي وابوي صبر عليجن هواي انت وله امي اثنينجن تعبتنه اثينجن تفكرن بس بارواحجن شنو قصوره ؟ .. خلاجن بدون اكل بدون شرب بدون مصرف بدال الشغلة يشتغل ٣ حتى يعيشجن معززات مكرمات ما راد منجن غير بس تمشن وياه عدل بس ما مشيتن.

- هاي انت حتى على امك تحجي ولك

- اي احجي الحق اني حيل احبن ابوي هو تعب علينا وعليجن هواي بس محد مقدر تعبه ..

- بالعافية عليكم ابوكم حبيبي اني وياه انتهينا ..

- هاي بعد يمكم ، ما محتاجة شي

- لا يا حبيبي سلامتك

- الفلوس ذني هسه ارجعهن

- اي كله ما تحتاجهن

- كبل لا انسى .. سجلي رقمي يمج

- لحظة بس احيب تليفوني

ركضت جبتلا موزة من الثلاجة واجيت خليتها بيده وكتله : ردلي

انطاني رقمه وكالي : ثيمالاه

- حبيبي الف سلامة يعمري 

ضليت اباوع عليه كل ما جاله هالولد يمشي طول ويصير نسخة من ابوه .. شلون يدافعله خوش حاطله محامي دفاع

سديت الباب وراه .. 

بس شكد فرق بين تربية علي وتربية دنيا 

علي لان ويا ابوه حمله مسؤلية شغل من هو صغير يحطه بالمحل يعامل ويحجي ويا الزلم ويتعلم منطقهم ..

بينما دنيا لان امها غايب دورها .. ضاعت 

بنية لاهية بسوالف طايح حظها.

قفلت الباب ومشيت .. سويتلي اكل وكلاص جاي وكعدت بالمطبخ بالكاع .. حطيت لكمة بحلكي وصار وجه حازم كبالي .. كمت الوك باللكمة بلا شهية دفعت الصينية مني واخذت كوب الجاي باثنين اديه واني الم رجليه لصدري وارجع راسي للحايط وغمضت واني استذكر موقفي من مريت منه ودار راسه وراي يباوع ..

تنهدت وفتحت عساه لا باوع وعساني لا شفته

هه ابني يكلي متأذي ، وهو واكف ولا عبالك يسولف ويحجي ما مهتم ولا كأنما مسوي بيه هيج ، اني شكو افكر بيه واتعب روحي بتفكيره عساه بعيد وسعيد اني ياهو مالتي بيه لا اريده ولا اريد شوفته .

حنيت راسي واني اشرب واذب حسرات 

شدا يسوي هسه !؟ وشنو ودة فعله من ما رضيت اخذ منه فلوس ؟ 

حطيت كوب الجاي وسحبت التليفون طلعت لعبة وكمت العبها ام الطوبات الملونة ..

ضليت مرحلة ورا مرحلة لحد ما نعست 

مشيت لفراشي اتمددت وكعورت روحي .. غمضت واني اتخيل نفسي بغرفتي القديمة ودوشكي ابو السبرنك واني غايصة بنصه ومتغطية بديباج و حازم وراي والضوا مسدود .. حسيت بشعور راحة وغفيت .

ثاني يوم غبشت للشغل .. روتين كالمعتاد .. 

كملت ورجعت واني بالطريق اطب الفرع وفاء صارت ويا طبتي .. سويت روحي ما شفتها ومدنكة ، كالت : صبا شلونج

انداريت الها : هلا بيج

- شني ما شفتيني غمشتي روحج ومشيتي السلام لله خية

- بالي مشغول وتعبانة جاية من الشغل

- شغل ، رجعتي تشتغلين جا وحازم

- احسن

- اي كالولي طلكاج على اساس لازمينج ويا ابن عمه بالبيت صدك

- لا مو صحيح خطيب بته وبته سوت هالفلم

- وحازم هيج غشيم و طلك بساع ؟

وكفت : شتريدين

- مقهورة عليج ما تستاهلين

- وفري قهرج لنفسج 

عفتها ومشيت منها .. مشت وياي : اني ما حاقدة عليج على السويتيه بيه

- السويته بيج .. وشنو السويته ؟ مصدكة نفسج مظلومة

- ما رايدة نتعاتب .. احنا نضل اخيات والزلم ما تخربنا

- مع السلامة وفاء 

غيرت دربي وطبيت بفرع غير فرعي بس حتى اتحاشاها 

ولفت من الفروع ومشيت للبيت ..

طبيت للبيت غسلت ورحت يم بيت عمي اتعشيت وكعدت وياهم 

حسيت روحي ضعفت ما ادري ليش .. اختلط تفكيري ورجع كلبي وعقلي يشوشون عليه

كلت اتعافيت وكمت وما اهتم بعد 

بس أثاريها الروح ترفة .. تضعف بأول نسمة خبر منهم .

مرت ايام .. 

واني بالصالون خلصت شغل وكعدت ع التليفون 

شفت مراسلة من حساب وعليه صورة بشار .. فتحت الرسالة 

كاتبلي ( انت صبا .. بالي يمج ، شلون اخبارج .. عرفت حسابج من رقمج حافظة عندي )

كمت حذفتها المحادثة بلا ما ارد عليه 

وطلعت من الصالون ب٥ وكمت امشي .. حسيت بسيارة تمشي وراي انداريت .. شفته حازم بس سوا روحه كاعد يسوق واتعداني ما وكف .. ضليت اباوع وراه ع السيارة ..

تنهدت .. شعده ؟ 

مو طلك ! مو طردني مو ميريدني ... شعده ملاحكني 

او يمكن اني يتخيلي ملاحكني هو هذا الشارع ياخذه للمحل ماله ..

ما رحت للبيت طلعت للسوك 

اشتريت غراض احتاجهن .. وعطور واخذت ثوب قصير فانيلة يصير لونه زيتوني فاتح نص ردن ولحد الركبة قماشته كلش باردة حبيتها ..

رجعت للبيت ماذن الاذان ..

ذبيت عباتي وصليت ولملمت الغراض ومسحت وشغلت قران وعليت صوته ومشيت للحمام .. غسلت وليفت جسمي بغسول جسم معطر اشتريته من السوك .. وحجرت رجليه طلعت جسمي خفيف ريشة وريحة العطور تعط .. نزعت نعال الحمام بباب الحمام حتى لا يلوث البيت وكمت امشي حافية .. المراية فوك المكينة مالتي بالمطبخ .. فتحت شعري وكمت انشف بيه .. وذبيته مبلل يضربه الهوى حتى امشطه .. جريت من الجرارة الكريم  حطيت لوجهي  واخذت الكحل كحلت عيوني .. واخذت الحمرة السحرية ورسمتها على شفتي اروح وارجع عليها .. لحد ما اخذت لون جريت كلينكس مسحتها حتى لا يبقى حلكي يلزك من الحمرة .. باوعت لروحي ضليت اباوع لوجهي .. جريت عطر من غراضي حطيت ورا اذاناتي وعلى الشريان مال المعصم مالتي وكمت افرك معصم بمعصم .. اشتميته ومسحت بيه خواصري وجسمي .. كمت ارفع بشعري والاعبه حتى ينشف واني اباوع لروحي بالمرايا .. صوت القران بالبيت واني وحدي منطيني شعور امان وراحة .. خصوصا من سابحة ونظيفة والعطر يفوح مني .. غمضت عيوني واني ارفع وجهي للسكف .. اتنفس حتى ارتاح واطلع التعب والهم البداخلي

ما اعرف ليش حسيت بشعور احد ديراقبني رغم مكاعد اسمع صوت .. انداريت .. المطبخ بيه ضوا بس الكراج ممشغلة ضواه .. بس كانما لمحت شخص برا

اني سادة الباب الخارجي كلبي خفگ وخطواتي ثكلت 

صحت : منو هنا

فتحت باب الحمام وجان الكى حازم كبالي .. 

حطيت ايدي على كلبي .. راحت روحي .. حسبالي شوف منو

عقدت حاجبي  واستوعبت هو طاب بدون احم ولا دستور ، خصرت ايدي وكتله : لا تضوج من ابن عمك انت وياه نفس الطينة ما تحطون حرمة لبيوت الناس .. وادخلونها بدون مستحى ..

اتقرب مني ووكف اباب المطبخ : لا اتطولين السانج ما جاي اعارك .. جاي احجي وياج

- وانت تعتقد يمتى ما عجبك تكدر تجي وتفوت وتحجي ؟ ترا مطلكين استحي على روحك عيب .. اني كاعدة وحدة ما يحقلك اتطب هيج .. اطلع مني

- ترا لهساج ما كضيتي عدة  ويحقلي اجيج ويمتى ما عجبني الغي وارجعج لذمتي .. وحتى بدون موافقتج

- جاي تتحداني وتتباهى بروحك تكدر ترجعني غصب عني ! انت حاسبني لعبة بيدك يمتى ما عجبك تطردني ويمتى ما ردت ترجعني .. اطلع منا

- اهدي وكومي سويلنا استكان چاي ، كتلج ما جاي اعاركج .. اني جاي حتى اسمعج

حجاها وكعد ع الكرسي اليم المكينة .. ضحكت بصوت عالي : والله يا الله .. انت تضحك .. جاي حتى تكلي تعاي اني مستعد اسمعج ؟ ليش هو انت كلك على بعضك تهمني حتى يمهني احجيلك ؟

اتأخرت حيل 

وكلبي اللي اجاك مشتعل احترك وطفى وصار رماد والكلام مات بنصه .. وما عنده كلمة يحجيها وياك اقرا عليه الفاتحة واتوكل بدربك

فتحت باب المطبخ حيل واشرتله يطلع 

دنك وهو يتنهد ورجع يباوع على غراضي المطبخ .. الوضع 

رجع باوعلي ، حجه : اني اعرف اتأذيتي بس الصار كله صوجج ما احمل احد بكدج .. كل اللي غلطوا سببهم انت

هميت عليه واني ادفع بيه من الكرسي حتى اكومه واحجي : اي صوج يلا واني راضية ومرتاحة امشي كوووم مني ما اريد اشرف وجهك

كام وهو يلزم ايد : صج هششش لا تتجاوزين كافي

- غاثتك اتجاوز عليك بكلمة 

كمت ادفع بيه واصيح : وانت واهلك طعنتو بيه وخليتوني على كل السان هذا مو تجااااوز مو تجاوز .. ولك اني لو عندي زلم حوك اتشك حلكك وحلك اهلك وتعلمكم شلون تهينوني واطعنون بيه .. بس الله ما ينسى وادعي يحركك ويحرك اهلك وعمامك ويطلع لك وبتي منك  اشرف بيك يوم ان شاءالله يشفي كلبي

احجيها وادفع بيه اريده يطلع 

اندارلي وهو يكلي : ماشي ماشي الله يطلعها بيه بس اهدي

كاعد يلزم وجهي .. 

دفعت ايده وسطرته راشدي بكل قوتي على وجهه 

تفاجئ من ردت فعلي بسرعة دفعني وهو يكلي : بت **** انت تضربيني طاااااايحة الحظ

كمت ادفع بيه ومديت ايدي على وجه ويجر بايدي واهامش بيدي الثانية خرمشته واني اصيح : اطلع مني انعل ابوك لابو عشيرتك اطلع منيييييي

بسرعة لف شعري بيده وكام يصيح : بت الكلب منو التغلطين علييييييه

كمت اصرخ وابجي من جر شعري اذاني : وخر ايدك شعري اااااي .. 

دفعني ويا الحايط واني رجعت اصيح وادفع بيه  : وخر مني ما ارييييدك  تلعب روحي من وجهك عووووووفني اطلع منييييي .

وخر من عندي وهو يلزم بخده وركبته كامن يجرن دم من خراميشي .. وكام طلع من البيت بسرعة .

كضيت اليفوني وخابرت على عمي وكمت اصيح : اذا متحطله حد هذا اني اكتل روحي ، ما اريده  يجيني للبيت يكتلينييييي

- خايبة سلامات جا غير نفتهم ياهو الكتلج انت بالبيت خاب يووووسف الحك بوية

- حازم  اجاني للبيت كتلني

- كتلج !؟ بوووويه انت بالبيت مو

- اي بالبيت معليه تحطوله حد اني تعبت منه ما اريدن

سد التيلفون .. واني كمت ابجي بقوة .. 

كمت اسحب بشعري .. اجر بيه من ملخني .. اجا بيده شعري اتكطع .. الله لا ينطي .. لميت شعري وكمت لحيلي لبست ثوب وسحبت الحجاب مالتي

اندك الباب يوسف وهو يصيح : صبا موجودة 

طلعتله واني ابجي فات عمي : شنهي شجاكم

- عمي سادة الباب وكاعدة وما احس الا احد بالبيت منين طب ما ادير وكعد يهددني وارجعج وغصبا ما عليج وكتلني

- هي شني فالتوه يطب بيوت غيره على كيفه

فز يوسف وهو يكول : والله لا اروح انعل والديه ..

طلع يوسف يركض وعمي يصيح : من كون طركاعة اللفتج امشي للبيت خلني الحك الولد راح يتعارك من حدر راسج امشي .

راح عمي يركض ورا يوسف .. 

واني انداريت اريد اخذ عباتي .. شفت سبحة حازم بالكاع .. شلتها ولبست عباتي وخذت غراضي وطلعت لبيت عمي .. دخلت كامت عمتي تصيح : ها ولج شسوالج

طبيت واني ابجي وهي تصيح : احجي ولج شصار

- هجم عليه للبيت

- مو طلكاج جا بعد شيريد منج شنهي ماله رداد

- يكلي والله تعاي احجيلي شصار اريد اسمع وطاب عليه للبيت بدون ميدك الباب ولا حتى افتحلا .. ميستحون لا هو ولا ابن عمه كلهم نفس الطينة .. كرهتهم وكرهت ملتهم وساعة السودة الشفتهم بيها .

طب عمي وهو يجر يوسف .. حجه عمي : تعاي جاي انت صدك متعدية ع الزلمة ومطلعة دمه

- ردت اطرده

- جا اتطلعين دمه لو تخابرينه نجي نرده ، رحنا نتعارك وياه تالي يكللنا اني ما جيتها عراك بس ردت انطيها مصرف وكلت اهديها بس هي ادبسز تغلط وتفشر و هاك وجهي هاذ شسوت .. ولج هكو مرة تمد ايدها على زلمة صبا

- عمي اجاني للبيت شسوي شلون ادافع عن روحي

- غير تخابرينه وتخلينه احنا نرده

- ما خلاني استفزني يكلي والله شوكت ما يعجبني اني ارجعج لذمتي وحتى بدون موافقتج كاعد يذلني .. فوك ما طعنوا بيه وسووا ما سووا جاي يحجي وياي ويذلني

حجه يوسف: لا اتكعدين بعد بالبيت وحدج هنا ذيج غرفة الجهال .. واصعدي نامي بيها مالج كعدة وحدج ذولة ما راح يجوزون منج لا ما يسوولنا مصيبة شكبرها

صعدت كعدت فوك جسمي يرجف .. 

ميلاد جانت موجودة مشيت سلمت عليها وكعدت يمها بس كالتلي ها .. دموعي كامت تجري ، حجت : اتعاركتي وياه لان اجاج لو لان متضايقة منه

- ما ادري ما عولت اكوم لحيلي واشيله من بالي وابدي من جديد رجع يطلع بوجهي .. الما سمعني وطردني بدون ما يسمع مني حرف جاي هسه يكلي اسمعج بعديش ؟ بعد ما حركني واذاني شيفيد الحجي

-جان بدال العصبية كعدتي وحاجيتي وعود بعدين طلعي من البيت .. ولا هالمشكلة

-متحملت من شفته كبالي اتهسترت مستفز كسرني وحرك غرفتي وحرمني من كلشي وطلكني ووكت اليعجبه يجي يكلي اريد اسمعج ما اريد احجي ولا اريده

-جذابه انت تريدينه بجيج هذا و وهوستج وتجاوزج عليه بس لان مجروحه منه .. رايدة اتطلعين حركة كلبج بيه بس لا اتنكرين انت ما رايدته

-لا ما اريده .. مستحيل بعد السواه بيه مستحيل ارضى اشوفه لو احاجي لو يعدي الموضوع طبيعي ما اريد شوفته ولا اريده ولا اريد اهله ولا اريد كلشي منهم اني بس اريدهم يعوفوني تعبت منه .. كلش تعبت

كامت تطبطب عليه وتكلي : ميخالف كولي يا الله روحي ارتاحي ومدد ومالج علاقة بيه

عفتها ورحت بالغرفة داليا جوا يم بيبيتها 

كعدت بالغرفة وحذي .. التفيت بروحي وكمت ابجي .. مقهورة منه حيل بعديش جايني يكلي اريد اسمعج .. بعد ما مرضني وخلاني رماد .. طلكني وخلا اليسوى والما يسوى يتشمت بيه والصيت طلكاها لان لكاها ويا بت عمه .. كلش اتأذيت منه كرهته لعبت روحي منه

باوعت سبحته بيدي لافتها على معصمي اكثر من لفة مسويتها سوار ومنزلتها لابهامي نزعتها وضميتها بين جفوفي .. وقربت وجهي منها ابجي .. ريحتها صارت بخشمي .. ريحته وعطره كله مطبوع بيها

ذبيتها مني وكمت ابجي بالزايد .. ما اريده حيل اذاني ما احبه 

حطيت راسي ع الفراش دخت من الهوسة والبجي وعيوني كامت تغوش .. جريت اللحاف من رجلية .. وغطيت روحي .. جسمي باد وروحي تعبت حيل ..

كلت اتعافيت 

وهو مثل السرطان شما فرحت وكلت طبت منه يطلعلي مدري منين .. مرضني .

صارت السبحة كبالي .. مديت ايدي سحبتها وقربتها من وجهي ..  غمضت عيوني .. ليش كل هذا صار .. اني جنت مرتاحة .. جنت كل يوم انام واغفى براحة ويجي تالي الليل يلمني واشتم هالعطر بيه وتامن روحي بين اديه .. خربت كل حياتي بعد ما كلت عمرت .. خذلني واذاني حيل وهو الوحيد الجنت مامنته وما متوقعه منه يخذلني لو يعوفني .

ضليت صافنة واثار الدموع جامدة بعيني 

المن جاي !؟ .. وليش رايد يسمعني .. بعده يحبني ؟ اليحب ميأذي وهو اذاني حيل .. يمكن هو هم اتأذى بس مو بكدي .

الله لا ينطيك بشار ولا ينطي كلمن سعى وخرب حياتي 

جنا حيل مرتاحين وفرحانين ابعضنا .. دخلوا بيناتنا مثل الشيطان حركونا وخربونا .

بس هو اجا .. صح متأخر بس اجا حتى يرجعني 

ولو اجا .. جيته ما تنفع بشي .. ولا اتغير شي 

ذبيت السبحة من ايدي وانداريت منها وكاني اهرب من عطره وذكرياته .

كمت اجبر روحي ع النوم .. لحد ما غفيت .. 

كعدت ب٨ ونص فزيت من كل حيلي وركضت لزمت عباتي وطلعت اركض للصالون متأخرة نص ساعة .

رجعت العصر .. لبيت عمي 

ما كابلت احد رحت اعتزلت بالغرفة بس داليا يمي .. 

ولازمة السبحة بيدي .. خرزها كبار وكهرمان  كل ما فركته .. يطلع عطر خفيف وحيل طيب .. الع بالخرز اجيبهن منا اوديهن منا وصافنة .. ما اعرف شنو ابالي لو شنو الاريده كلش مشوشة وكاعد اعرف اني لسما لو لكاع ..

صاحني عمي 

ونزلت يمه كام يسولف وياي ويكلي : بعد من حيدر موجود روحي ويا اخيج للبيت بس من يداوم لا اتظلين وحدج انت عزبة وهاي المنطقة ما ينضم بيها شي والحجي عليج هواي .. اكعدي هنا .. ونشوف بين نا تكضين عدك بخير وسلامة نحلها ونسد حلك الوادم

- شلون يعني عمي

- عرفي الشلون لا ادوخين راسي افتهمتي الحجي لو لا روحة للبيت وكعدة وحدج ماكو خوووش

- ان شاءالله عمي

كاعد احجي والسبحة بيدي 

مد ايده رسول واخذها وهو يكلي : منيلج هاي 

باوعتله بس ما جاوبته مالي خلك

رد كرر السؤال : منيلج ؟

- عدي

- ترا غالية هاي يطلع سعرها فوك الخمس ملايين !؟

- سبحة سعرها خمس ملايين شكو يمعود

تستمر القصة أدناه

حجه عمي : بس لا مو كهرمان اصلي

فركه رسول وهو يگله : يا مو اصلي دشم ريحتها بس تفركها تبين

اخذها عمي اشتمها : اي اصلية .. منيلج هاي عمي

- مال حازم وكعت منه شلت وضلت بيدي ..

- لا لا رسول رجعه للزلمة .. عيب غالية مو مال ناخذها منه زحمة

- دخله يولي هو حاضر وغايب غلس عليهن وما اطاها ترجعله سبحة

مديت ايدي وكتله : عرفها عندي عود اني شوف شلون ادزها احتمال اخابر على ابنه اخلي يجي ياخذها لابوه .

خذيتها وصعدت اباوعلها .. تنهدت 

ورجعت اشتم بيها .. عفتها ع الميز مالتي وكعدت بالغرفة ع التليفون .. اليوتيوب يونس فيديو ورا فيديو ما تحس الا الوكت رايح ونص الليل وانت ما نايم .. وقته ونمت ..

ثاني يوم كعدت ٧ ونص سبحت وبدلت وكاعد اروح للصالون .. خذيت السبحة وياي .. طول الشغل واني افكر .. ارجعله السبحة لو اخليها عدي ..

كملت شغلي .. 

ومشيت من بعيد شفته واكف بالباب مال المحل مالته وابنه كباله يحجي وياه .. لمحني ودار وجهه يفوت للمحل ..

خفت اتقرب للمحل اكو هواي ناس ع الشارع وزلم تروج وتمشي شارع الداخل معروف يمتى ما تجي ازدحام خصوصا وكت المغرب

اتعديت المحل وكلت ما انطي .. 

بس وكفت وكلت على شنو مبقيتها عندي وهي غالية تروح تضيع يصير عليها شي .. هلي اخلص منها وانطيه اياه .

انداريت ودخلت المحل شافني هو ودار وجهه عود مسوي روحه ما يهتم لطبتي وما يباوعلي وهو يصيح : بابا علي المجلدات طلعن برا اعرضهن .. لا تخليهن جوا

وكفت كباله وحطيت السبحة كدامه .. باوعتله .. حاط لزكة على وجهه وركبته ضليت اباوع عليه هو باوع لسبحته .. حجيت : اعتذر عن التجاوز والغلط هاي سبحتك جبتلكياها 

رفعت وجهي بوجه باوعلي وهو عاقد حاجبه 

بس بعد لا تجي ولا تتقرب مني ابد .. بس ابتعد

سحب السبحة من كدامه واندار 

علي طلع من وراي .. عفته ردت امشي .. لزمت باب المحل وسديته اندار عليه : الوادم منا شجاي اتسوين انت

-مو تريد تسمع ؟

اندار بسرعة وهو يوخرني ويفتح الباب ويكلي :-الناس منا بت الاوادم وين كاعدين اني امرلج ونحجي

-شكو ادفع لا تمرلي ما اريد بعد .. خلي الناس تفيدك

مشيت اريد اطلع كضني من زندي وهو يكلي : فوتي يبلوة فوتي للمخزن

تستمر القصة أدناه

-لا ادفع ما اريد وخر خلي اطلع

رجع جر الباب وصار كباله : انت ليش مشكلة فوتي جوا

فتت للمخزن وهو صاحله : علي اوكف ابدالي ابني تعال هنا

واجا وراي حجيت : لا تعتقد كلامي الراح احجي حتى اقنعك ببرائتي لو اثبتلك لو رايدتك من الاساس اني لعبت روحي منك ومن كلشي يخصك

-هذا الجاية تحجينه وسديتي الباب حتى اسمعه ؟

-لا ومعليك اني شحجي احجي ..خوش انت مو ضابط على الساني

جر كرسي ودفعه من ناحيتي واشرلي اكعد عليه ما كعدت بس حطيت ايدي وتجيت عليه وهو يأشرلي بمعنى ( اي )

-السالفة تبدي من يوم الجنا نايمين بالليل ليلتها كمت للمطبخ حتى اشرب مي بس بتك الشريفة جانت مطببته للبيت بلا ما ندري .. يومها اذا تتذكر كمت اصيح شفت احد بالكراج ورجال ودنيا جانت برا ونكرت وانت كتلي تتخيلين بس بمرور الايام استوعبت الشفته ذاك بشار مو اتخيل ..

وكتها كام يدز رسايل على تليفوني ويحجي حجي مو زين بجسمي وانت جنت تقرا الرسايل وتعاركني منو هذا واحلفلك ما اعرف وتبقى شاك واتدور وما عرفت هو بشار

وكت العرضلنا من اتعاركنا وانت وكلته ياخذني لبيتهم يومها ما اخذني وكالي حازم ما يستاهلج وعوفي ومستعبدج ورايدج خدامة .. وبدل ما يحطني ابيت اهله وداني لبيت الشماعية .. رغم اني ما طلبت منه بس من رجع انت اعرف شحجالك وخلاك شكد تعوفني وما تجي تاخذني وامناك بحيث كمت اتودي بيده وهو يجيني شايلي مسواك ميكلي منك ويسويله نفسه المهتم ضجت من تصرفاته وملحته بس وكتها كلت هو ابن عمه مو معقولة يحط عينه عليه بس اكتشفت نكاسته من رحنا زيارة وانت تكله دير بالك عليهن .. رجعت واني ناهرته وكمت ما اكابله ولا اكاعدة بمكان حتى لو اجتمعنا بلمة عمامك لان لعبت روحي من نكاسته

بليلة الجنت انت طالع للعمارة بفاتحة يومها طفى عليه الكهرباء حتى انت تخابره وتكله روح سويها وبفعل انت خابرته وخليته يجي لبيتك ويطب بس ما طب للكهرباء اجا يتعدا عليه .. ومن صياحي خاف احد يسمع وكام يهددني لو حجيت

فتحت كلبي لسهى  وحجتلها واني ميته خوف وكالتلي اقفلي بابج ولا تكولين ويلوفونها عليج .. بس ما بطل مني حتى من اتصوب كام يخابر ويدز رسايل شككاك بيه .. واريد احجي بس سهى كالتلي لا اتكولين

انت شاهد على حالتي وخوفي 

حتى من طلب بتك حاولت بكل الطرق امنع بس انت اعتبرتني اكره اهلك واتجاهلتني ..ومن وافقت اجا وهو يكلي هذا الزواج راح يقربني منج يومها خابرتك اصيح وابجي واكلك حطله حد وهو يكلك اني بس طبيت اخذ ماسحة وانت كتلي انت كاعد تكبرين الموضوع جان بودي احجي بس اعترف بغلطي وخوفي المنعني احجي خاف يلوفها عليه وينكر واهله يوكفون وياه ويسووني اني المو زينة ومحد يصدكني فكلت اريد دليل حتى اعرف الزم عليه شي اخلي كبالك تصدكني بيه من احجي بس هو حان داير باله حيل وكل طباته للبيت انت تدري بيهن يعني لو ردت احجي اطلع اتبلى

وسواها وعادها ودخل للبيت من جنا متعاركين اني وياك وانت عفتني وبتت فوك .. يومها خابرتك وكتلك طلكني لان كتلني الخوف وبنفس الوكت كرهت عيشتي واني اسكت على هاللعبان نفس .. يومها دزيتلي امك هددتني وكالتلي ما تحجين لحازم كلبه ضعيف واني ارده واسكتي وصمي حلكج .. وعفت لموضوع لامك بس امك ما انطت غير بيه احد ما بتك كملتها وياهم ودخلته عليه واني نايمة وقفلت علينا الباب حتى تجي انت وتلكانا سوا بس هو كسر الباب وصعدلها يتعارك وياها

ومنا انت عرفت 

وبدل متحاسب الكل .. اول واحد صوبت عليه سلاحك اني 

وبدل ما تسمع مني حكمت عليه برصاصة جان راح تجي براسي لو ما شبر بعدها عني ..

تسألني ليش ضميتي وليش خفتي 

سلاحك وتهورك وعصبيتك وحكمك عليه بدون ما تسمعني هو الخلاني اخاف .. واشرد وما احجي  لان اخاف ..

جنت انتظر منك تجيني تسمعني اطمني تردلي حقي منهم كلهم حتى امك بس انت اختاريت تطردني وتخذلني وتكسر گلبي .. واعترف مو بس كسرت كلبي انت شوهتني وكرهتني بلكشي بالدنيا واولهم انت

ما اجيت هنا احجيلك حتى اخليك ترجعني 

بس اجيت حتى تعرف حجم جريمتك اللي جرمتها ببنية يتيمة طلكتها وخليت التهمة تثبت عليها وعفتها لكلام الناس تتشمت وتطعن وتحجي بكيفها .. ادعي الله اليوم كبل باجر يطلع حوبتي بيك وباهلك ويشوفني بيكم يوم

واتمنى من هاللحظة بعد لا تتقرب مني 

اتركني اشافي روحي منك واعيش 

لكيت شغل وكاعد ارتب حياتي وما محتاجك منك حتى الربع اني راح اكدر اوكف على حيلي واواجه قدري الكاتبه الي بس بدونك .

مسحت وجهي وردت اتعدا كض ايدي 

راد يحجي رفعت اديه لاذاني وبعدت روحي منه واني اكله : لا تحجي ولا اريد اسمع اي شي .. جيت حتى احجي مو حتى اسمع ، عوفني بس

طلعت بسرعة محمد صار بوجهي  وهو يحاجي علي : جا وين ابوك .. صدلي وحازم وراي .. عفتهم وطلعت من المحل كله .

محمد : خير هاي انوب حتى بالمحل ؟

- علي سد المحل وتعال وراي

- وين حازم

- انت جنت تعرف امي تدري بسالفة بشار وساكتة

- صدكتها بكلمتين حازم جزي روحك منها ما مليت

- علي سد الباب وارجع ويا عمك

كض سيارته وطلع بوجهه لامه دخل عليها كاعدة ع السجادة ، كاللها : اتعرفين الله وتصليله يمه ؟ اتعرفين الله وانت رضيتي ابيتي ينداس

- اسم الله الستار يمه خير شمالك

- انت المانعة صبا اتكلي على دوسة بيتي !؟

- يمه انا خفت عليك

- خفتي علي وخليتي النكس يدوروس بيتي ويتجرا على عرضي 

حجاها ودفر البوفية مالتها فزت من مصلايتها كام يصيح ويغلط وهي تكله : اني ردت احجيلك بس اخيك ما خلاني

وحازم يصيح دخل محمد تلتزم وياه وتعارك بوكسيات وامه ومرت محمد وكعن بيناتهم يصفن بيهم .. عايف بيت محمد رايح ع البيت داخل .. امل امددة و دنيا كاعدة يمها ..

كض دنيا من راسها وكاللها : انت الدازة لبشار ومطببته على صبا ذاك اليوم

كايمة تبجي وامل فازة .. راكع راسها بالخايط وامل تشاكف عنها كاض امل ودنيا وطابك عليهن الحزام اثنيناتهن .. سجاد رايح لبيت خالة

جاي خاله متعارك ويا حازم .. 

حازم كض منفضة ونومها براسه وخلي دمه بطوله 

وصارتلك هوسة وامه اجته ..

نزل جوا اخذ بانزين وروح على بيت عمك 

وكام يصيح .. ويكلهم تعرفون بابنكم نكس وما مضيتوا عن بيتي وتهمتوا مرتي بشرفها يا ناقصين الشررررف .. رش البانزين بالكراج مالتهم وذب الدبة بالبالستقبال .. واشمر جداحتك .. خلا النار توصل ابيت عمه للضالين

نسوان وجهال وعمه واثنين من ولدهم جوا .. 

والنار كامت تاخذ بيهم .. وولد عمه الباقين كاضينه وهو يغلط ويصيح ويفشر عليهم ..

راجع جايب سلاحة .. 

والناس اتطفي ابيته .. وهو يهدد الا يشيلهم منا .. 

صايرة بيناتهم لخة بين امل واخوها الكاتله وبين بيت عمه الثاني الحركة .. صارت هوسة من هوسة .. سحبوا حازم كوا من بينهم واحا جبير عشيرتهم رده عنهم ..

صايرة هوسة عمام بيناتهم وكلهم كابين ضده حتى اخوه .. 

بس هو ذاب عهد كدام جبير عشيرتهم وكايله يا يدلوني بابنهم اكتلنه واخذ ثاري منه يا يجلون من المنطقة وما يضلون .. بعلي لو مو نسوان بالبيت لو يتامى لا احرك البيت عليهم مثل ما حركوا بيتي وداسو

اخو بشار الجبير ناكر ويكل لجبيرهم بشار ما عده شي وياها هي الجانت تغوي ومع هذا كله ما انجرف وياها وجان يجي على خطيبته بس الغريبة هي التهمته

عاد جبيرهم طالب بشار .. وكايللهم تحلفون كلكم براية العباس بشار متعدي على حرمة بيته لو مرت حازم هي اللي اتبلت على بشار وغوته .

مخابرين على بشار كايله دير بالك تشهد كدام الشيخ بحجيك انكر وكول هي الجانت تطلبني للبيت وانغويت بيها وطاوعتها كم مرة بس تبت ..

بس بشار من مخابره الجبير 

مبري صبا من السالفة وكايلة ما اطعن بشرف البنية اني اللي انغويت ومشيت ورا نزواتي ودست بيت اخوي بس هي صدتني واني والله جزت وما تقربت منها بعد حتى ما اذيها بس بت حازم دزتلي رسالة من رقمها كاتبتلي حازم اكتشف الموضوع وراح يكتلني تعال ساعدني من جيت لكيتها ناصبتلي كمين ومصورتني 

حتى تورطنا كدام ابوها .. ووالتصوير موجود اذا تسال عنه عد بت حازم ضمته بتليفونها ما اطتنياه .

راحع جبيرهم طالب من خوال دنيا تليفون دنيا 

كايليله الحجي جذب .. وماكو هالكلام ودنيا ما عدها تليفون .. حازم سامع بجبيرهم طالب تليفون دنيا

داز علي على صبا كايله اسالها التليفون عدها 

علي مخابر صبا كايلتله : اي وبيه التصوير وكل المراسلات

رايح علي ماخذ التليفون منطي لحازم 

شايف الرسايل من بته جانت اتدز لبشار وتكله اعرف والله انت ما بيناتكم شي بس رد عليه اني اسفة ما اتهمك بعد 

ورسايل هواي بينها وبين بشار وبشار ما يجاوبها 

وشايف الفيديو .. ورايح لجبيرهم كايله هذا الفيديو بس اعذرني ما اكدر اخليك تشوفه لان الفيديو مو مال ينشاف .

جبيرهم كايللهم تجلون من المنطقة واتطلعون .. جزات رضايتكم لدوسة بيت اخوكم .. و ابنكم دمه مهدور لحازم وين ما يشوفه يكتله .

ساعتها الجبير ساعي ومخابر على عمي وكايله : احنا نريد ندخل طبابين خير ونرجع المرة لرجلها وحازم محتاج مرته وانتم اهل الطيبة والعزوبية وبنيتكم رايتها بيضة

كايله عمي :  الله يسلمكم بس بتنا ما تريد بعد الصار وياها جزينا اولها سالفة الفيديو النشرته مرت حازم لبتنا ورادت تنكتل وطلعت هي ورا السالفة والثانية هاي ما بينا حيل لثالثة .. بنيتنا عدنا وزلمتكم شوفوله مرة تفيده .

عاد الجبير ما مكتفي هم ماخذ ناس من عشيرتنا وجاي على عمي حتى يرجعني لحازم .. وكايله صيحلها وخلي القرار الها يمكن البت تريد رجلها ترضى برجعتها .. خلي نسمع منها

مخابرني عمي اني بالصالون .. 

خذيت رخصة ساعة وطلعت لبيت عمي .. 

فتت للبيت اطوني عباية وفتت لجبيرهم .. كالي : ابو علي رايدج وشاريج وانت تعرفين المشاكل الصارت كبل وهسه وشكثر وكف وياج وما تنازل عنج وهو متنخي بينا نردج لذمته .. هاي المشاكل تصير والمرة والرجال كلشي يصير بيناتهم والزلمة مشتريج 

ومن هالحجي ..

كتله : من رخصتك عمي اسألك سؤال واحلفك بالعباس ابو فاضل تجاوب ابختلو جانت عندك بنية وطعنوا بيها وسووا بيها اللي سواه حازم و اعله وعمامه بيه جان رضيت ترجعها ؟

- حلفتيني بالعباس والعباس شارته جبيرة .. لا والله عمي لو عدي بنية ومسوين بيها اللي سووه بيج جا وذريتهم توذر من زمان وخيط من ثوبها ما اخليهم يتناوشون

- وهذا جوابي عمي .. الغريبة ما تعيش ابيناتهم ويتهونها ويلفقون عليها لحد ما يهججونها شنطر بعد الاكثر من هذا .. ما طوله حكم عليه بالموزين كبل لا يسمع مني ويعرف الحقيقة وطلكاني ... هاهية الطلاك وكع والله يعني ويسعده ويا عائلته .. اني ما اريده بعد .

عدلي بدلي .. 

انطيت قراري النهائي .. 

حازم انطوت صفحته .. وانتهى .

من بعد الصار كله .. 

ارتاحيت صح الناس ما تسكت حتى لو عرفت الحقيقة تضل مجلبه بالمو زين وتصدكه اكثر من الخبر الصدك بس المهم .. حقي طلع وعرفوا اني شنو ورجعولي يتوسلون ومثل ما نهروني وما قبلوني .. نهرتهم ورفضتهم .. احس اخذت ثار كسرة كلبي من رديته وما رضيت ارجعله جزاة ايام الجفا الما ردلي بيهن .

مر على طلاكنا تقريبا ٤ اشهر وانتهت العدة 

ووكع الطلاك بيناتنا ..

وكت الكضت العدة وما رجعت لحازم 

وكتها قرر يدفعلي حقوقي .. الحاضر والغايب خمسة بخمسة .. ومن ضمنها ذهبي جان ب٣ ملايين ونص .. فسلم بيد عمي سبع ملايين كاله : بعد تطلبني ١١ مليون فلوس البيت مال الشماعية البعته .. مسوي سلفة بحيل الله بس استلمها اوفيها دينها .

انطاني عمي السبع ملايين وذهبي .. 

ردت اضمنهن كلت من يوفيني فلوس البيت ال١١ مليون يصيرن عدي ١٨ مليون لذاك الوكت بلكي مجمعتلي مليون ولو اكدر مليونين حتى لو ابيع ذهبي واشتريلي بيت اذا عشرين مليون يجيبلي بيت بالتجاوز زين ونظيف .

بس ما مر يومين على حازم من انطاني الفلوس .. 

خابرتني سهى كالتلي : خايبة اصبية جايتج وطالبتج واني اختج

- اي كولي

- عليج العباس رايدة منج ثلث ملايين دين تداينيني لرجلي يجمل على فلوسه ويشتري سيارة شلعت كلبه هاي العده يومية عطل وهو يريد ياخذ بيها خط بلكت الله تصير بيده ويكدر يعزلني ابيت ليوحدي

صفنت .. رجل سهى اذا اداينه ربع لو مليون كانما منطي عطية ما يرجعهن بعد لو تموت ولو طالبت بيهن هو ابو الحق .. اكثر من مرة طلبت مني من جنت عد بيت حازم واشتغل وما محتاجة وتاخذ ال١٠٠ وال٢٥٠ .. لرجلها محتاج وما يرجعن

ولو حاجيتها هي تتصداله تكلي شبيج خية نمونة هنه جا هسه انت كعدتي بشارع على ذني منين يجيب لو اطاج معناها يقصر علينا .. احسبيهن عطية لاختج شني تكاطعت

واستحي واكول فدوة

بس ٣ ملايين مو شوية واطيهن 

ولو اطيتهن شيرجعهن بعد .. حرام مايرجعن

فكتلها : سهى تعرفين اطيج عيني 

بس والله اني كاعد ادورلي على بيت بالتجاوزات اريد اشتري احسن ماضالة اني هيج لا اني لسما ولا اني لكاع

- ليش تشترين مو كاعدة ابيت حيدر هم تروحين تكعدين ابيت وحدج وتعال حيب المشاكل .. شعدج شو كاعدة ومرتاحة

- بعد يومين حيدر اتزوج شلون ؟

- اي تكعدين وياه قابل يطردج

- ليش ما سواها الكبله

- هسه لا اندورين دفاتر عتك صدكي كعدة بيت وحدج ما يخلونج عكب زواجة حازم الطلعنا منها بسواد الوجه

- حتى لو ما اكعد بيه اسمه بيت الي حتى لو اجره طاكني بعصا استفاد بفلوس ايجاره

- عود كلت اخذ منج واسوي سلفة ويشتغل ويوفيج ما يطول

- جان بعيني بس كتلج والله كاعد ادورلي بيت بلكت الله والكى

- اي جا البيت طاير من يوفيج عود اشتري .. وبعدين مو تندعين حازم فلوس بيت الشماعية .. منا لذاك الوكت يمكن حازم مطيج ورجلي موفيج واشتري الاحسن منهن

- حازم يوفي شبيج خية بيت الشماعية اني دافعة بيه مليون حجاية ذباها بلكت احن وارجعله بس ماي طي حازم واعرفنه

- لا يطي خو ينكرهن لو ما يريد يطي عليمن يسجلهن عليه كدام عمي بس هو كال عدي سلفة اكضي واطيهن

- صدكي وداعتج اعرفه لحازم .. بعدين دخل اشتريلي هسه وعود لو اطانياهن زيادة الخير خيرين

- كولي خية ما تريدين اداينيني .. وبخلتي بيهن على اخيتج

ضليت احجي وياها 

زعلت وسدت الخط .. حجيت لعمتي .. 

كالت : بالج حسج اداينين منهن ربع والله لو اطيتي منهن حرام ما تحصلينهن بعد ويضيعن من اديج

- وشسوي عمة .. وين الكالي بيت تجاوز ب٧ ملايين

- لا عمه البيوت صعدت انا اكولن اطيهن ليوسف صاحبه يشتغل مستثمر يشغلهن الج ويطيج منهن ويمتى ما طلبتيهن يطيجياهن

- ما بيها ربا يعني خاف حرام

- لا الربا اذا انت طلبتي لو حددتي سعر بس اذا هو من كيفه يطيج اليريده ما ينحسب ..

راحت حاجتلي يوسف كال : احسن لا اتصرفيهن شغليهن وخلي يجيبلج فلوس بلكي يوفيج حازم الباقيات اطكيلج بيت زين

خابر صاحبه واتفق وياه ١٥٠ الف ينطي كل شهر ع الفلوس .. واذا ردتهن لازم ابلغه كبل شهر حتى يجهزهن الي .. اطيتهن ليوسف .. ويوسف سلمهن لصاحبه بشهود .

ورا ما سلمتهن بيوم 

نزل حيدر كال : محتاج خمسة ادايني ع العرس واني وافيجياهن بعد العرس اسوي سلفة واوفيج

كتله : الفلوس اطيتهن ليوسف صاحبه محتاج وكلهن داينتهن

كال : وانت بكيفج اداينين ليوسف وصاحبه خذاهن كلاهن عليج منين نجيبهن تعالوا فدو العشيرة جيبولنا فلوسنا

- لا يوسف اتكفلهن هو صاحبه ويعرف

- ما دام صاحبه خابري كليله نريدهن محتاجيهن

- يا خوية تلكي صرفهن وراحن

- كولي انت ما رايدة ادايني وتوكفين وياي صالج تلث تشهر مطلكة وذابيج بركبتي وكاعدة ابيت تاكلين وتشربين وتاليتها تبخلين علي فلوس اداينين بدال ما توكفين وياي اعرس كبل محرم .. بعدله شهر ما ضلي وكت والناس كامت تحجي قابل كرايبي وهيج اطول الخطبة

- اي شسوي لو كايلي من كبل غير داينتهن

- اي خابري يوسف كليله يرجعهن

- شيرجعهن الولد معتاز واشترى بيها

كام يصيح ويغلط والا تخابرين وغصبا ما عليج تطيني وادايني 

خابرت على يوسف كاله : ما اكدر عيب استحي داينته البارحة واليوم اكله تعال جيبهن

- اذا تستحي منه اطيني رقمه اني اروحله اخذهن منه

- ما اطيك رقمه علويش هو كم شهر ويرجعهن

- كم شهر شني اني رايد اتزوج ومحتاجهن

كايم يتصايح ويا يوسف ويوسف متعارك وياه 

طاب عمي بالسالفة .. كايلتله عمتي : محتاج فلوس لعرسك وتريد اني اداينك بس هاي كدام عمك كل شهر تطيني نص مليون وتوفيني

كاللها : لا اداين منج ليش خو اداين من اختي وارجعهن على كيفي اسوي سلفة ام ال٣٠٠ واوفيها

كالتله : هسه شنو الفرق بيناتنا اني واختك انت مو تكول مستعجل ورايد هاي اني اطيك الفلوس بس كدام عمك تسوي سلفة وتوفيني ما سويت تطيني ٥٠٠ كل شهر

جايبها منا رادها منه 

ما كادر ليوسف وعمتي 

رجع عليه يغلط ويصيح .. وطردني من بيته جيف ما داينته 

اجيت كعدت عد بيت عمي ..

من سمعت سهى اني داينت الفلوس لصاحب يوسف 

زعلت مني وكالت حرام يا الساني بعد ما يطخ السانج 

يوم النخيتج وكتلج اخيتي ومحتاجة دين ما داينتيني واني منج وبيج وتروحين اداينيهن للغريب

كتلها ما داينتهن شغلتهن 

كالت ها يعني ما تريدين تشترين بيت ورايدة تستفادين بيها ومن كتلج محتاجك سويتي روحج كاعدة ادورين بيت بس حتى ما اداينين لرجلي شيسوي بيج الله بعد عاجر ومطلكة مرتين من الحقد واللئم البداخلج ولي لا انت اختي ولا اعرفج

سدته بوجهي وقاطعتني 

بس شكثر انقهرت منها ، هي اختي واقرب الناس الي لان ما داينتها عايرتني بمرضي واتشمتت بطلاكي .. جا شحال الغريب ؟

اتعديت 

هي ضلت عليها اذا هو العشكته روحي خذلني وراد يحط الطلقة براسي لو ما شوية ، التهي بروحي ومالي غرض بكل بشر اخو جان لو اخت .. بخيرهم ما خيروني بشرهم عمو عليه ..

لو تطينا لو ما نريدج .. 

بقيت ابيت عمي تقريبا اقل الشهر .. 

جان محرم ع الابواب فحيدر جان مستعجل يريد يكضي عرسه لان نسابته لحو عليه وما رضوا ياجلها لفرحة الزهرة

فخابراني كانما لا طاردني ولا شي 

يكلي : ها صبا وين انت

- ابيت عمي ليش

- ها جا حضري روحج تروحين وياي

-وين

- للبيت شعدج كاعدة عد عمي ولدهم موجودين ورسول عوينجي لا اتظلين كاعدة هناك رجعي

- شنو الحجي هذا رسول اخوي وصح عيونجي بس وياي بحسبة اخته ما فد يوم اتطاول عليه بنظرة

- هسه انت ليش تلغين هواي كتلج ارجعي واكعدي اخوج اني واعرف بمصلحتج

- هاهيه تامر خوية تعال مرلي حتى ارجع وياك

مر عليه لبيت عمي 

رجعني لبيته وراد مني نسوي حملة للبيت نلبخ غرفته ونعدلها 

وجاب عمال طلعهم بيوم لبخ الغرفة واني اطبخ الهم .. من كضوا اشتغلت عمالة وراهم ونظفت البيت ..

رجع اشترى غرفة ونصبها .. 

واطاني فلوس وصاني اشتري احتياجيات الغرفة 

زين اني عندي شغل .. من ٨ لل٦ العصر شلحك

اخابر منى تكلي والله جهالي عدهم مدرسة ما اكدر اجي 

زين شوفي سهى .. سهى تكول مالي غرض بيهم ما عدي بيت ما عدي رجال ضالة وراهم اني

اضطريت اخذ رخصة من ام الصالون .. 

واروح للسوك .. اشتريت غراض الغرفة .. فرشة  مدات تيبلام .. بطانيات دواشك ..

ارجع الظهر اصفطهن واطلع العصر ويا رقية وامها علمود النيشان يكملنه ..  ورجعت خذيتها للصالون صبغت شعرها وسرحته كبل العرس بخمسة ايام

حيدر منطيها فلوس مال نيشان وبدلات وصالون مال حنة وعرس اطاهن مليون ونص .. صدك من تكمل تسريح و صبغ وميش .. امسحي اديج بالحايط تكلي ناسية الفلوس اطيهن واني عود اطيجياهن بعدين

اتفقت ويا ام الصالون تكصهن من يومياتي 

كالتلي ... صبا شكصهن من يومياتج اني اشتغلتلها بدون ما اخذ الفلوس مقدمة لان اعرفج .. بس الشغل الاشتغلناه لشعرها صار بـ ١٥٠ الف يعني يومية مال ١٥ يوم ما الج .

كتلها : شسوي بعد ما شفتيهن والله اخوي منطيها فلوس الصالون بس سوت روحها ناسية الفلوس وعود هي تطينياهن

كالت : معليج عليه مو راح تجي وتطيني عربون مال مكياج عرسها ١٥٠ راح اكللها هاي فلوس الدين مال شعرج .. واخذ منها الباقيات الطتهن نشتغللها الما اطتهن بعد يمها تشوفلها صالون ثاني

صدك من اجتي قبل العرس امها حتى تتفق وياها 

عود لان اني اشتغل هنا رادته بنص السعر .. ما نزلت الها ام الصالون غير ٢٥ الف .. وما تحجزلها اذا مو عربون حجز ١٥٠ الف

انطتها امها الـ ١٥٠ كالتلها 

هاي فلوس الشعر والتسريح .. بعد فلوس المكياج

اتخبلت امها تكللها : فلوس الشعر اطيناهن لصبا تطيجياهن

كالت : ما اطتني صبا 

اني كاعد اشتغل على زبونة صاحتني كالت : صبا كرايبكم مسلمتكم فلوس الشعر والتسريح

- لا والله يمتى اطيتيني الفلوس كلها يمكم اطاكمياها حيدر

- اي بس كتلج دين واني اطيجياهن لو شايلة جا هسه اطيتهن بس حاسبة احسابي عربون ١٥٠ حجز منين احجز بعد لازم ارجع للشماعية

كالتلها ام الصالون : المحبس البيدج الذهب سلمي للصالون عربون وعود بيوم العرس سلمي الفلوس واخذي

كالتلها : يا علي العباس مو مالتي هاذ مال حماتي

كالتلها : بعد بكيفج

جرتني وتكلي : حاجيها

- ما تقبل شسوي اني غير هي ام الصالون

- اي اطي واني اطيج

- حرام والله ما شايلة غير ١٥ الف بجيبي

كومي وخابري حيدر واشتكيلا 

خابرني حيدر ما مفتهم الموضوع شنو حسباله اني ماخذة الفلوس وما مطيتهن لام الصالون .. كام يخرط ويغلط ويصيح وفشلتيني ويا انسابتي

كتله : افتهم بس افتهم .. 

ما افتهم مني سداه وهوي تحلفلي

عاد خابرت عمتي كمت احجيلها واني اشتغل ع الزبونة 

خابرته مفهمته ام مرته ما مسلمة فلوس الصالون رايدة مني دين واني ما شايلة .

عاد ذاك الوكت مخابر على انسابته وحاجي وياهم 

كايلتله رقية : وشصار عليها احتاجيت وردتها ادايني وهي تعرف ام الصالون وتكدر تتساللنا بس هي اختك موصية ام الصالون ما تنازللنا .. ربع ما طيحت النا واحنا المصاريف هواي

خابرني كالي : ام الصالون ليش ما مطيحتلهم من السعر

- اكلك حيدر هو صالون الخلفوني ياهو اني وتتنازل بفلوس شغلها علمودي كلي يلا عاملة .. طيحتلها ٢٥ الباقي تدفعهن قابل اني ادفعهن من شغلي هي يوميتي عشرة شكد استلم مليون

كام يخوط ويخربط بالحجي 

واليكتلني واحدهم من يحجي وياي حسبالك متمنن عليه وعايشة بجاله ويحجي معلك وحرام واحدهم محد مطلع من جيبه ربع ومنطيني .. باقية هيج مساحة ينفهون بيها عن نفسهم ويرزلون

ولازم غصبا ما عليه اشتغل .. واركض وارتب واحضر تحضيرات عرسه الوكعت بركبتي كلها حتى المسواك والله اني اللي غبشت للعلوة اشتريت وطلعت للصالون

وصلت مرحلة من التعب كمت اسهر لليل واني اجهز واكمل ترتيب عرسة لوحدي واغبش واكضي نهاري اشتغل .. متت من التعب

لحد ما اجا يوم الحنة .. 

اتفقنا ما نسوي عرس .. بس حنة يحضرون بيها جماعته وعشا .. طلعت من الصالون ب٢ ويا طلعت رقية كالتلي ام الصالون: اطلعي ويا مرت اخوج لا تبقين كملي عرسة وعود الله كريم

رقية خذوها لاهلها واني رجعت للبيت 

على اساس اروح وياهم للحنة ما رضى حيدر كال : انت ابقي جهزي العشا مال الحنة سهى و منى يسدن مكانج هناك

كتله : ميخالف 

صدك جابوا كيا حملوا النسوان كلهن 

خواتي و عماتي وكرايبنا و جيرانا قبطن كوستر وطلعت بيهم للشماعية ، واني بقيت وحدي بالبيت .. اكمل العشا الهم

جان العشا عبارة عن مواعين سفري هذا اليسمووه لابتوب .. 

نحط بيه حميسة دجاج و فنكر اصابع و طرشي وصمونة

سلكت الدجاج واني اثرم فلفل وبصل 

ويوسف وابنه وكفوا وياي كاموا يكشرون بتيتة .. وابن سهى يعاوني ..

حجه يوسف : هذا الشغل مو مال انت وحدج جان المفروض وحدة اتضل وياج .. كسران ظهر هذا

- شسوي يا خوية

ابتسم وهو يكلي : يلا سهلة سهلة

بزلت الدجاج وكمت افلس بيه واحمسه واحط عليه البهارات 

ويوسف يثرم بالبتيتة ويسويها اصابع .. صاح ولد من كرايبنا خلا ناس تفتح صمون وناس تشيف الطرشي

للمغرب كملنا تكلا كمنا نجهز المواعين 

والولد ياخذون ويوزعون .. لحد ما خلصت .. احس ظهري ما احس بيه بعد .. دمعت عيوني من التعب

باوعلي يوسف : تعبتي حيل امشي لبيتنا ارتاحي

- لا فدوة لعينك تسلم هسه تفض وامدد

- شتفض هي ما عدكم غير الاستقبال وهاي ما راح تفرغ لباجر العصر كومي امشي كومي

كاعد يحجي اجتي سيارة النسوان .. 

دخلن وهن يسالني ع العشا صاح بيهن يوسف وهو يكللهن : اكلجن ما مشتغلة عد الهلفوجن انتن مو غربة هاي ضل خير التريد عشا تسويلها لفة وتاكل

هدى : على كيفك عيني على كيفك اشوفك محترك كلبك عليها .

- جا خطية هم بشر هي كلجن رحتن تهزن وتركصو الا هي انصلبت هنا ع المطبخ

- شايل همها يوسف خير

حجت عمتي : بت عمه وشايل همها شلون بالله لارم يسكت ياهو مالتج انت سويلج لفة واسكتي

اندارلي : اوصلج

- لا امشي منا  هو هذا وينه بيتكم

- الباب كله شباب شطلعين ، امشي وياي

لبست عباتي وطلعت وياه لان الشارع بيه الحنة وكلها شباب 

بيت عمي يمنى بس الولد يركصون كالي : امشي نطلع ع الشارع ناخذ سيارتي ونفتر ع البيت

اني من التعب صرت انسان الي وين ميكلي منا منا 

امشي انسطرت سطر من التعب ..

طلعت وياه للشارع .. 

محل حازم ع اليمنى براس الشارع 

عيوني متعودة تندار لمحله كل ما مريت .. فبنظرة سريعة باوعت لكيت حازم كاعد اباب محله .. وكاعدين يمه جماعته .. انتبهلي

يوسف حاط سيارته ع الشارع اشرلي عليها 

ردت اصعد ليورا كالي : هنا هنا صبا 

صعدت ليكدام .. وافتر القطاع ودخل بالفروع واندار لبيتهم .. نزلت بالباب .. عمي كاعد بالدكان صاح : ها كضيتو

يوسف : بعدها الحنة الشباب كاعد يركصون

- جا شو رجعت وعفت الحنة

- بس جبت صبا خطية حيل تعبت

باوع : اي هاي عاشت ايدك مسكينة هالبنية بويه ابتلت باخو طايح حظه .. ساك عليها سوك المطي بعرسه يصارخ صراخ ما تكول اخيته ومتفضلة بوكفتها وياه بعرسه

عفت عمي يحجي واخذت ملابس من بوفية عمتي حتى ما بيه حيل اصعد واجيب .. وبوجهي للحمام غسلت ومشيت .. محد ابيت عمي بس عمي ويوسف ، بس طلعت من الحمام الخاولي على راسي يوسف صار كبالي : نعيماً

-مشكور

- اصعدي نامي محد فوك

-مرتك وين لعد

-يم اعلها هنا تتعب لان ماكو احد يداريها وخطية حالتها تعبانة حيل

- خطية ، تصبح على خير

- اجمعين

صعدت ذبيت روحي مثل الميته بالخاولي لا مشت ولا سويت شي ..

الصبح كعدت على صوت منى كعدتني : يلا صبا ام رقية خابرت علمود تروحين اتجيين البدلات الها

- اني اجيب البدلة ليش غير امها

- شمدريني غير متفقات

- لا متفقة ولا ابد اني رايحة للصالون ما اكدر اتاخر عود هناك التقيها

بدلت بسرعة وطلعت .. اجتي رقية بس مو امها الجاية وياها سارة اختها وما تعرف البدلة وين بالسوك ، كتلهن : ام الصالون متقبل اطلع

تستمر القصة أدناه

صدك ما طلعت 

كامن يتراكعن عاد امها مناك طلعت جابتها واجت علينا 

خابرني حيدر يكلي : صبا انت بعد لا ترجعين للبيت من الصالون روحي ويا الزفة ومن الزفة روحي لبيت عمي لان احنا راح نرجع للبيت ويعني هي عروس لازم البيت فارغ

- شلون هي عروس وصغيرة خاف تحتاج شي

-بيت عمي مو بعيد عود اخابرج

- هاهيه حبيبي شايف الف خير ومتهني ان شاءالله

- الله يبارك بيج

كضيت ويا رقية وبالصالون .. مكيجتلي ام الصالون ع السريع ولبست ملابس مرتبة وطلعت ويا العروس .. لبيتها ورجعت لبيت حيدر جهزتله امور عرسه كلهن حتى ما يحتاج شي وسديت الباب

وسوينا زفة بالمدينة 

خذيناها طول بعرض .. لحد ما رجعنا زفينا حيدر البيته 

والناس طشت واني رجعت ويا خواتي لبيت عمي 

سهى لحد هسه مثكلة ودايرة متحجي .

بدلت ملابسي ولبست ثوب كشمير لونه اصفر فاتح .. 

والمكياج بوجهي .. وكعدت بالاستقبال .. اسولف وياهن ونحجي عن العرس

طب رسول جايبلنا فلافل فرط وعنبة وصاص .. وصمون حار 

كمنا نسوي لفات ونوزع ع الجمع .. فات يوسف صاحلي : صبا

- ها

- تعاي

كمتله لكيته يم عمي كال : جبت دجاجة شوي 

حطي لابوي واكلي منها تعبتي حيل

- لا يطيك العافية .. كاعد اكل وياهن فلافل 

- يا فلافل دسويلج لفة دجاج وحطي لابوي

حجاها ومشى كال عمي : ابن عمج شايل همج بويه يكول تعبت

- لا بعد اخوي اذا ما اوكفله بعرسه شوكت اوكف

- ميخالف ارتاحي .. ولو اني رايدج بموضوع

- خير عمي

- هو خير ان شاءالله

حجت هدى من وراي : رايدج ليوسف يعني شرايد 

الله الاخد مرته بعدها ما ماتت ودورتله مره عمي .. تريدون المرة بس خدامة بس اتطيح اتبدلونها

نهرها وهو يكللها : وهو مقصر وياها بس المرة مريضة وهو معتاز مرة تعاونه بجهالة وبت عمة اوحيدة احسن ما ياخذ الغريبة ياخذ بت عمه

- عمي الحجي هذا مو وكته وزواج اني ممفكرة اتزوج جربت حظي مرتين جزت عن الثالثة .. فاذا تحبني عمي سد هذا الموضوع

- عمي ما بيها شي جا غير ابن عمج

- اي بس اني ما اريد

- شنهي ما تريدين قابل اتظلين هيج بلا زلمة والحجي يطرطر وراج اني رايد مصلحتج يا عمي ورايد راحتج الطابق الفوك كله يضل الج وجهاله حدر عينج

- عمه مرته موجودة حرام شنو الحجي هذا قابل ميتة

- مرته يا عمي يوم هنا وشهر عد اهلها والزلمة ضايع

- وبطرانة رايحة لاهلها غير مريضة بسرطان يا عمي جا لو سمعت حجيك هاذ والله اطك وتموت

- هسه خليها اني كتلج اليوم بس غير هاي الملكوفة حجت اني عمي رايدج لابن عمج هم انت كبال عيني وترتاحين و هم هو يرتاح واثنينكم ولدي .. بعد شوكت نا تقررين واتريدين بكيفج خاف تكولين عمي غصبين

- ان شالله عمي 

حجيتها حتى اسلك لان اذا اوكف واكله ما اريد راح يتضايق مني ولو عمي اتضايق شسوي ووين اروح هي ميلاد مريضة قابل ميتة .. اتحجج بمرته موجودة واسلك الموضوع لبين ما الكالي درب اخلص منه .

رايحة هدى مخابرة على ميلاد حاجتلها الموقف كله 

ثاني يوم من الصبح ميلاد اجتي لبيت عمي .. اني جنت طالعة

كعدت من الصبح اشتريت كيمر وكاهي وسويت صينية عرسان واخذته لبيت حيدر انطيته من الباب وطلعت لشغلي بالصالون .

رجعت وصعدت فوك كالعادة حتى اكعد بغرفة جهال يوسف 

لكيتها مقفولة .. صحت : داليا وين مفاتيح غرفتكم حبيبي

- عد ماما

- غراضي بيها اريد الشاحنة

- ادخلي اخذي المفاتيح من ماما

طبيت لميلاد كتلها : مفاتيح غرفة الجهال يمج

هي متمددة وكلش تعبانة .. حجت وهي دايرة : اي عدي شتريدين

نبرتها غريبة مو مثل كل مرة 

حجيت : شاحنتي جوا اريدها

باوعتلي : شعدج هنا ؟ بعدني ما ميتة ورايدة تاخذين مكاني ويا رجلي

- يا ميلاد شنو هالحجي والعباس ماكو هيج

- اتحلفين بالعباس والبارحة عمي محاجيج وكايلتله ان شاءلله

- هدى وصلتلح الحجي مبين بس اني كلت ان شاءلله حتى اخلص .. مو يوسف لو اي بشر ميلاد اني ممستعدة اتزوج وانت كلش زين اتعرفين البداخلي شنو .. روحي لحد هسه ما اتشافت من جرح حازم حتى احط ووحي بواحد ثاني بس شسوي كتلها حتى اسلك وما يبقى يعيد ويصقل بالموضوع والا وحق هو ابو عبد الله يا ويوسف مثل اخوي وحرام لو مفكرة اتزوجة سواء هو او غيره .

- شوفي صبا اني مريضة .. وما اكدر اتحمل هالامور واقل قهرة احتمال اتموتني واذا متت انت سبب موتي

- اني ياهو مالتي !؟

- اني كاعد اشوف يوسف يميل الج ومتعاطف وياج هواي وهاويج .. بس منتظرني اموت حتى يعلن عن تفكيره والصراحة ما اتحمل رجلي يباوع الغيري واني موجودة .

- واني شنو ذنبي !؟

- ذنبج باقية كباله .. تروحين وترجعين كدام عينه 

مخليته ينتظر موتي اليوم  كبل باجر حتى ياخذج ويجدد روحه وياج

- ميلاد يوسف مثل اخوية والله

- بس هو ما حاسبج اخته وعيونة كاعد تلاحكج

- وشذنبي بعيونه وتفكيره اني ما رايده لا يوسف ولا غيره والله .

- اسمعي صبا ، اذا ما رايدتني اموت وعندج كرامة يوم واحد ما تبقين هنا .. اخذي غراضج واطلعي من البيت ولا تخلين عيون يوسف تشوفج لان لو شفته يباوعج اطك واموت وانت السبب .. فاطلعي من البيت ...... يتبع

 تكملة الرواية من هناااااااا 

لمتابعة باقي الروايه زورو قناتنا علي التليجرام من هناااااااااا

بدل ماتدور وتبحث علي الروايات عمل 

متابعه لصفحتنا على فيس بوك هنااااااااااا

الرواية كامله من هناااااااااا

مجمع الروايات الكامله 1اضغط هناااااااا

مجمع الروايات الكاملة 2 اضغط هنااااااا