رواية عاجر الفصل الخامس والاربعون 45بقلــم الكاتبـــة زينب ماجد (حصريه في مدونة قصر الروايات)

رواية عاجر الفصل الخامس والاربعون 45بقلــم الكاتبـــة زينب ماجد  (حصريه في مدونة قصر الروايات)

رواية عاجر الفصل الخامس والاربعون 45بقلــم الكاتبـــة زينب ماجد  (حصريه في مدونة قصر الروايات)

#عاجر

{ بقلم الكاتبة زينب ماجد } 

الحلقة_ ٤٥

خفگ كلبي واني اشوفها .. كمت اكلب بالطلقة ادخيلك ربي .. شنو اختاري .. كاعد يهددني لو شنو !؟ 

شسوي هسه .. 

ردت اخابره بس تليفوني مو عندي 

احتاريت بكاعي شسوي 

اروح اطيها لعمي 

هدور اكبرها واتندم يربي .. شنو معناها دازلي طلقة 

رجعت صحت بنين : كتله ولج عمه شوكت اطاجياها 

- كبل شوية 

- كون احد شافج 

- لا جنت بالشارع العب كال هاي اطيها لعمة صبا بس لا تفتحينها 

- روحي لراس الشارع بسرعة شوفي موجود بمحله لو لا . 

راحت واني ضليت اتكرضم .. 

يمه هيج ويسويها .. اي يسويها ليش ما يسويها 

شيسوي يكتلني لو يكتل منو ؟ 

غير افتهم شقصده بالطلقة 

اجتني كالت : عمه بالمحل كاعد بالباب 

لبست صاية وفوكاها قمصلة نفخ سودة .. 

ومشيت .. صاح عمي : وين 

- رايحة اجيبن دفتر من راس الشارع لبنونة .. 

- جا ما تروح هي ما عدها رجلين  

- ما اطول عمي 

مشيت وصحتلها : امشي وياي بس لا تحجين 

- عمه هو ليش دزالج طلقة 

- هش لا تحجين بهالحجاية اذا احد سمعها راح تصير مشكلة كلش جبيرة 

وصلت راس الشارع التفيت على محله .. كاعد على كرسي هو وواحد صاحبه .. باوعلي تعديته وفتت للمحل ، فاتت بنونة وياي .. اطيتها ربع : هاج روحي اشتري من هذا الدكان البصفنا 

طب هو : امري خوية 

ضربت الطلقة بالورقة ع الميز : هاي انت دازها 

- شنو هاي 

- تغشم نفسك 

- اذا محتاجة شي امريني 

- حازم تهددني !؟ 

اندار وكف ورا الميز وهو يصيح : بابا علي جيب مي لعمتك 

- لا تحاول تستفزني .. شنو هذا الدزيته اليه بيد بنونه 

- ما ادري عنه انت شوفي شنو هذا 

- كاعد تلعب وياي 

جابلي علي مي .. حطاه كبالي 

اشراله يطلع يوكف يم الزلمة الكاعد .. 

مشى علي واني اباوع وراه انداريتله : احجي لا تخليني والعباس محلك هاذ كله اكلبه فوك جوا 

- اتفاهم بكلشي الا بحقي 

- واي حق الك يمي ؟ 

- انتي كلج حقي .. والياخذ حقي حسابه يمي . 

- قصدك حاله حال جعفر 

- جعفر مو اني الكتلته 

- تنكر وتراوغ وتلعب وكانما اني لعبة بيدك .. خلي يكون بعلمك .. اني وافقت ، وراح اتزوج وما راح اخاف منك افتهمت اني مو لعبة احد . 

شلت المي طشيته بوجهه 

وردت امشي اندار وسحبني من قمصلتي كمت ادفع بيه .. 

صار كدامي وكام يدفع بيه ليجوا ردت اصيح : وخر مني 

حط ايده على حلكي وذباني بالمخزن 

واول ما طبيت سطرني راشدي .. وسد الباب وراه 

فزيت عليه اهامش واريد اخرمشه واكله : انت تضربني ابن النعال 

لزمني حيل وتلاوى وياي وهو يكلي : السانج هذا الطريل اني اعرف شلون اكصره 

حجاها وهويدعني للحايط ويعصر بيه ويا الحايط وكاض حلكي خانكني .. كمت ارافس واوخر بيه .. اختنكت وهو خانكني .. رادت تطلع روحي ذبني وهو يكلي : شوفي شلون تتجاوزين بعد 

- هيج بنفس الطريقة جان بسام يهد عليه ويخنكني ويحاول يتقرب مني ابيتك .. هيج جان يلزمني وانت كدرتك بس عليه .. لانك جبان تكدرلي بس اني 

ضربني راشدي كتله : تضرب لان ضعيف جبان 

اثنينكم نفس الطينة اني كمت اتنكس منكم .. اشمئز منكم .. انتم بؤرة مال نكاسة 

لزم حلكي حيل وودفعين ع الحايط يحصر بيه 

فرك حلكي كمت ادفع بيه واوخره .. طكت شفتي دم باديه كامت تنزف .. وخر مني .. 

كمت ابجي 

كتله : باحلامك ارجعلك تفتهم لو لا .. ما اريدك يا جبان 

- ولا اني اريد وحدة مثلج ادب سز ب والله والعباس لو فكرتي ، الما حطيتعا براسج كبل احطها واخليج اتبعينه الماتو 

دفعته واني الدم بيدي .. واحجي واني اصك على سنوني : ما تخوفني افتهمت ... ما تخوفني 

لزم ايدي دفعني منه ويريد يطلع .. وهو يلزم بركبته كامت تصب دم .. كعدت بالكاع كمت ابجي واني الزم بشفتي واباوع للدم بيدي وامسح بثوبي .. 

طب علي .. وهو بيده كلينكس ويحاول يساعدني اكوم .. 

دفعته حسبالي ابوه .. فز كمت لحيلي .. اخذت منه الكلينكس ودموعي تجري .. 

وما طلعت باتجاه بيت عمي 

مشيت كبل ما ادري وين مطية وجهي .. 

ضليت امشي وادك دروب .. لحد ما وصلت لتقاطع عربية 

حسيت على روحي الناس تباوعلي ابجي واني امشي .. اكو محل مال فلافل .. طلبت لفة علمود اكعد ع الكراسي البرا 

كمت اصفن وابجي .. 

النذل فوك ما سود حياتي .. جاي يهدنني و يطيني طلقة 

لا ويكتلني ويضرب 

كاعد افكر ما احس الا هو فوك راسي : امشي منا يلا .. 

- حازم وخر من عندي 

- امشي كدامي لا والعباس اسحلج سحل 

-خب وخر مني لا بالعباس اشهرك شهر دوخر 

كضني من يم زندي وجرني .. اجا الولد انطاني لفة الفلافل .. 

خذاها منه وسحبني للسيارة واني احاول افلت روحي منه .. حطني بالسيارة .. ردت انزل صعد بسرعة وجرني ومد سد الباب .. ودمغني : كافي لا تخليني اذيج والعباس 

- شوف دمي طلعته وانت بعدك تكول لا تخليني اذيج والعباس اخابر عمي عليج 

- خابري جاي ياهو اللازمج 

- نزلني حازم 

داس بالسيارة كمت الغي .. اعلط واتجاوز واحجي واسب 

وهو ما يرد عليه .. وصلني لباب بيته .

كتله : والعباس ما انزل ولو نزلتني لا اصيح بنص المنطقة 

- صيحي صيحتنا اليوم البارحة طالعة 

حجاها ونزل حتى ينزلني .. 

كمت ادفع بيه وكتله : اني امشي وخر 

عافني وبقى وراي : ما اطب دوخر 

- لا اطبين فوتي 

- وعلي اخابر على عمي هسه يسويها ظليمها 

- اي طبي وخابري ياهو الكاضج 

حجاها وهو يغصبني افوت .. دخلت للبيت طبيت المطبخ سديت الباب وراي .. هو هم ما كال باطل جر المفاتيح واقفل الباب من برا 

واقفل باب المطبخ .. كمت اصيح : افتحلي الباب 

- صيحي براحتج 

عافني ومشى .. يا يمة شكثر فار دمي منه .. 

كمت الوب اروح منا واجي منا وبودي الزمه اكطعه تكطع 

رجع فتح الباب .. 

اني بالاستقبال ، طب اني واكفة ومتخصرتله ، طلع من العلاكة عصير وحطه كبالي : انت راح تخبلني 

كاعد اريد احجي طلع سلاح من ورا ظهره وحطه بصف العصير 

سكتت وبقيت اباوع عليه : تعرفين هذا السلاح 

- انت عود جاي تهددني 

رجع وكعد كدامي : اني جاي اتفاهم وياج ، اني وانت اثنينه كبار وما يحتاج تسولفين اني زلمة عدي كرامة وعزة نفس ثقي وحق هو العلي العظيم لو ادري بيج واحد بالمية ما رايدتني جا عفتج وانداريت عنج لا ويطبج الف طوب ما ادورج ولا اهتم شتحتاجين ما تحتاجين بس اني ادري بعدني بكلبج .. وانكري اذا غلطان 

باوعت عليه : اكص كلبي اللي يريدك وما ارجعلك افتهمت لو لا 

- زين تكدرين تكعدين حتى نحجي بهدوء 

- وانت حاطني ابيتك وقافل عليه مثل الحرامية !؟ 

- جاي احاول اوصل وياج لنقطة حل ، بعيد عن الناس وتدخلهم وصدكيني هاي اخر كعدة الي وياج لو ننهي شكو بيناتنا لو نحل المواضيع ، بس اكعدي نتفاهم ليش بعد اكتلج وتتجاوزين وواحد ماكل الثاني احنا كبار مو صغار سمعيني واسمعج لو ما فاد .. بعد ... 

انت ما كارهتني .. 

انت مجروحه مني افتهم ونافرة مني على الصار واني اعترف حقج اني انسان متهور عصبي بس مو صعب ، ليش تنكرين انت غلطتي ووصلتيني للحالة اللي خليتيني بيها ، ليش تعفين نفسج واتخليني بس اني المذنب .. دوسة بيتي وسكوتح على واحد جان يجي عليج وانت على ذمتي مو غلطة صبا جريمة ، ما خليتي لبيتي حرمة 

- ولو حجيت وكتها جان صدكتني ؟ 

- وتخلين الكل يعرف من عداي ! امي اختج مرت عمي الكل اني الوحيد غافل هذا فعل شيتسمى من تخابرني بتي وتحجيلي ليش اسمع منها ليش مو منج ليش سكتي .. جان صرت عصبي بس ما وصلت المواصيل لهالحد تعوفيني وتشردين وما تجين ولا تحجين خليتي عمج يدافع عنج اني شفتهم من سكوتج وشردتج والعباس ما شاك بيج وادري انت شنو بس حطي روحي بمكانج من تصير مثل هيج مشكلة وتشردين وما تحجين ولج مخابرة ما خابرتي ع الاقل وسولفتيلي اللي صار .. انت اللي هدمتي اللي بيناتنا . 

- الحجي بهالمواضيع يتعبني ويرجعني للمربع الاول ولو شكد ما راح اكلك خفت مراح تشوفه تبرير بس اني تبريري الوحيد خوفي .. اني خفت احجي خفت اواجه خفت من كلشي تصدك ما تصدك يمك .. اني تعبت افكر بهالموضوع وارجع اعيده 

- طيب نتعداه 

- ما مستعدة 

- بس مستعدة تعييدين غبائج و تاخذين ابن عمج 

- اقلها ابن عمي ورايدني .. ومتفهم لا عصبي ولا متهور 

- رايدج ! هو انت مستمرة بغبائج هو رايدج لوضعه ما رايدج الح الا وين جان عنج من جنت كاعدة بسكيفة وهو ابيت عامر !؟ هو محتاجج ما رايدج . 

- ما يختلف عنك انت هم اتزوجتني لان وضعك ويا امل مو زين ومحتاج مرة تداريك . 

- اتقارنيني طايحة الحظ ! اني تحطيني بمقارنة ويا ابن عمج 

يوم اللي ركضتلج وانتي الشارع ودمج يجري جنت محتاجلي مرة 

لو من اطيتج دمي .. لو من سعيت و خليت ابن عمي يبيع وصاحبي يطيج اقساط واتكفلج ادفع عنج لو ما دفعتي واحطلج بيت الج مو الي شجنت محتاجج ؟ خو اروح اخطبج واستغل وضعج ليش سعيت حتى انت تستقرين !؟ بوكت الابن عمج جان ما يدري عنج وين بايتة وبيا كاع اني ليلي ما نمته جيف عفتج باول يوم بلا اكل  وكت الاهلح واخوتج ما دروا عنج ومحد منهم خابر وكالج شمحتاجك ولج اني جنت اتنخى الرايح والجاي حتى يساعدونج ويكملون بيتج حتى ترتاحين .. لو اجا نهاية الشهر اتفطنلج من نفسي واروح ادفع سحبج واقساطج بلا ما تحجين اكول مرة محتاجة خطية .. 

تتذكرين كم مرة خطبتح وما رضوا 

شنو نقص نسوان لو بس انت الراح تغيرين وضعي ؟ 

ليش عاركت وليش انكتلت وانشمرت بالسدة وما تبت ورجعتلج .. كلهن لان محتاج مرة تطبخلي وتنظفلي ؟ مشكلتج صبا انت غبية ، لا حديات والله مو محاولة اقلل منج بس انت صدك هيج .. ما تفكريييين وهاي مشكلتج 

ولج منو من الدنيا هاي كلها مشتريج بكدي ؟ 

اخوج يريد منج اتدفعين وياه فلوس البيت وعمج رايدج تاخذين ابنه اتدارينه وتدارين جهاله .. واثنينهم من اطلكتي لليوم احد منهم شال وحط بيدج ؟ سالج شمحتاجة لو شبيج ولج اني بس الابارع بعيونج وادور بيهن واكول شبيج .. جاية اتقارنيني بابن عمج الما عرفج الا هسه من مرته طاحت ! 

تعتقدين كاعد اتعارك وياج وجايبج ليجاي واهددح وخابص الدنيا علمود شنو .. علمود تجين تنظفيلي البيت لو حتى تطبخين لو حتى شنووووو .. انت شليتي حالي يمتى تفكرين ؟ 

لازمج وحابسج هنا لييييش 

لو رايد مرة شحة نسوااااان ، ليش ما تفكرين 

ليش تفكيرج بيه كله شك وظن ليش ما تكولين هذا شعده بعده وراي ولاحكني وشمحتاج مني ، هو ياهو المحتاح منو لو ترجعين الصدك اني المحتاج لو انت ؟ الحاجة مو فلوس بس اني عدي اهل وجهال وحال ومال وبدال الشغلة ثلث شغلات وبدال المرة اكدر احط اثنين .. بس ما تفكرين حاط كوري وياج ليييش ؟ 

جا يمتى البراسج اتشغلينه ؟ 

-ااذا خلصت سوالفك عوفني اروح 

صفن بوجهي تنهد وذب حسرة : - اذا كل الحجيته ما ينفع وياج امشي ، شفايدة الواحد يحاجي حجر . 

ما جاوبته 

وكمت من مكاني حتى اطلع 

كال : اوصلج من بعدها مالي غرض بيج لو وين ما رحتي .. ما راح اوكف بطريقج بعد هاهية مو انصاف ترجى ابشر ما مشتريك . 

مشيت وصعدت بالسيارة .. 

صعد هو يسوق .. جان الحجي يفور بكلبي بس ما اعرف شلون اترجمه واحجي .. مكاعد اعرف منين ابدي وشلون انتهي ، والدمعة باطراف عيوني اخاف انطق وتنزل ويا اول كلمة وتخرب سوالفي كلها .. فحاولت اسكت .. 

تاليتني كدرت اسكت الساني 

بس عيوني ما كدرت .. نزلن دموعي واني اعيد السوالف ويا روحي . 

صف السيارة وكال : مو راجع ومخليج لحالج بعد تبجين ليش ؟ 

- ماكو شي هي عيوني هيج متحسسات 

ضل يباوع عليا بالمرايا ، تنهد وهو يحجي بهدوء : وحق هالدموع وحمار عيونج وهو العباس ... بروحي ما تلكين غيرج ولا غير روحي يهم بيج ويشتريج . 

فتحت السيارة ونزلت وهو يحجي .. 

ما تبعني ولا حاول يكلي اصعدي اوصلج .. 

اتمشيت للشارع خذيت كية ورحت لبيت عمي ، محد سالني وين جنت والمن طلعت عادي دخلت محد مهتم، غير جهال جعفر وحسوني اليركض يشد بذيالي ويريد اكل جوعان . 

مشيت سويتله خبز وجاي وكعدت يمه اشرب استكاني 

وراسي بهوسة .. ما ادري شقرر واتندم لو لا 

الظهر جنت موافقة ومقتنعة بيوسف 

ومن شفت حازم تغيرت كل افكاري 

مو بيدي احس اكو ضعف بداخلي ، روحي تريده بكد ما كارهته 

ما متعديته ولا ناسية عشرتي وياه وبكل صفنة اتحسر عليها .. ما انكر احلى واهدأ ايام عمري عشتها ويا حازم .. جانت تصير مشاكل بس لا عد اهلي ولا عد عدنان ولا عد اي بشر شفت الحب والراحة اللي شفتها يمه ، سهل المعشر ما بيوم غصبني على شي .. شلت عن روحي المسؤلية صرت ما افكر غير شلون الهي روحي واسد وقت الفراغ .. يمه ما احتاجيت لشي ابد . 

ضليت دايخة بتفكيري .. 

اجت عمتي كالتلي : يمه ولو اكلفنج بس تصعدين تغسلين هدوم يوسف وجهاله خطية ما عدهم ملابس نظيفة 

صعدت اغسل بملابسه هو وجهاله .. 

صعد فوك لكاني واكفة ع الغسالة .. تقرب من عندي : متعشية 

- اي 

- محتاجة شي 

شكراً 

شاف ملامحي جافة ومو مال حجي واخذ وعطى تركني 

هستوا دخل للغرفة مالته ، واني بعدني على وكفتي طلع يركض وهو يصيح : بوووويه 

فزيت وراه من شفته يركض : شكووو 

وهو يصيح : ميلاد ماتت ، خابرتي اخوووها ماتتت 

كعد يبجي وعمي يصيح : لا حول ولا قوة الا بالله 

وكفت على صفحة ابجي اني وعمتي وهدى .. 

رسول خذاه وطلعوا عمي ورسول ويوسف وعمتي للمستشفى .. اني وهدى بسرعة كمنا للبيت لميناه كله .. نص ساعة وانترس هوسة وناس تلطم ناس تصيح ناس تبجي 

صعدت جهال جعفر بغرفة جهال يوسف ونومتهم وسديت الضوا عليهم خفت لا يخترعون من صوت الصريخ والبجي .. ونزلت ويا هدى ع المطبخ 

للفجر جابوا الجنازة للبيت 

خواتها وامها واخوتها لميلاد كطعوا ارواحهم من البجي والصريخ على تابوتها .. وجهالها يكسرون الخاطر .

خذوا الجنازة .. وراحو 

وهدى كالتلي : استغلي الفرصة وخلي نروح ننام .. لل٨ الناس تلتم تروح رجلينا ومحد يباوعلنا خل نرتاح 

صدك صعدت نمت من ٥ الصبح ل٧ ونص  كعدوني 

نزلت اشتغل وخابرت على ام الصالون خاطر اتعذر منها كتلها : خية عدي فاتحة اعذريني اليوم ما اكدر اجي 

كالت : عادي حبيبتي وياريت للشهر الجاي تشوفيلج غير شغل لان الصراحة ما كاعد اخذ راحتي بالصالون وعيب من ابو علي صاحب زوجي ويستحي منه 

- لا عادي مو عيب هذا شغل واذا متضايقة مني ادبرلج الفلوس مال نص شهر واطيجياهن 

- لا الفلوس مو مني بس مرات بسببج التزم بالصالوني عني شوية ما ارتاح باحد وياي تعرفين فانت عادي خلصي الشهر على راحتج بس بنفس الوكت شوفيلج شغل بهالمدة هاي يناسبج 

- لا لحظة الفلوس مو منج شلون انت اطيتيني فلوس الشغل مقدما 

- لا والله الصدك مو مني حازم ابو الانشائية يصير صاحب زوجي وطلب منه يخليني احطج وياي بالصالون وكال اني اتكفل شهريتها ، بس اني ما ارتاح بوحدة وياي وتشوفين الشغل مو هواي . 

كامت تحجي بعد .. اني جرخ راسي 

شكيت هو الدافع بس نكر .. تنهدت وتشكرت منها وسديته 

ورحت اوكف بالمطبخ وافكر .. 

هدى يمي واني اصب بالشكر هواي حجت : خية احاجيج بالج وين 

- اي 

كاعد احجي طبت منى اختي 

اندارت الها شلت بتها من ايدها وسلمت عليها وصعدت بتها فوك ونزلت لكيت سهى كاعدة ، اتعديت ومشيت اجت وراي : شنو بحلكج عظم ما تسلمين 

- هو منو الزعلان اني لو انت 

- وتشوفيني ما تسلمين انت شكد وحدة طايحة حظ وما عدج خوة ، برة منج نفسيتج ولا تنحمل 

منى : سهى منا ناس 

- جا تشوفني وما تسلم فوكاها هي الزعلانة .. بدال ما تتعذر وتكول قصرت بحقج 

- ليش قصرت بحقج بالله ؟ 

 رجلج موجود وجهالج عدج وكاعدة ومستقرة وجاية اطلبين مني واني مدري تحيرب عيشتي مدري بعيشة جهال جعفر الامهم ذبتهم وانتن ولا وحدة منجن سالت لو تفقدت خاااف اذبهم عليجن واحملجن مسؤليتهم هواي جن جعفر اخوي بس اني انتن غرب بس بالحجي تعرفني وتحجن وياي صالي شكثر احتاجيت وانهايت وانضربت .. وينجن اكو وحدة اجتي سالت عني شبية ما بيه 

سهى : يطبج مرض مو يوسف كاتل روحه عليج ورايدج عاليمن ضالة تترجين من عدنا هو حطي زلمة حدرج وعيشي حالج من حالنا ضالة تتحسدينا عدجن رجل وجهال 

- اني ما حاسدة وحدة منجن بس من تزعلين عليه حقج لان ما اطيتج بس من اعاتبج جيف ما داريه عنج واني الدنيا ذابتني تحسبيني حاسدتج 

-  جا اداينين الغرب وما ادايني شنو مو حكي ازعل 

- ما مداينة صديق يوسف شغل الفلوس وكاعد يطيني منهن كل شهر ، ولو الحجي وياجن ضايع ، هم غبرة وكاعدة اعتب واسولف وابرر 

منى : حقج بس شبدينا صبا تعرفينا محكومات 

- اني هم جنت محكومة من جنت عد حازم بس اتفقدجن واخابر واسال ولو احتاجيتن شي اني يمجن واجي واتعنى وحتى لمتجن صارت عدي كلش هر تلتمني مي تاكلن وتشربن واحملجن اشكال الوان ذبتني الدنيا وذبيتني وياها .

سهى : هسه عوفي الحجي هاذ وين وصلت سالفتج 

- متعاركة ويا حيدر وطالعة حاجي يطيني تليفوني مو صغيرة ولا من حقه يسحب مني واصلا مو حقه يحاسبني .. بالفلوس صبا اطيني ما مجبور يتحملني ويعايرني بكل كعدة .. وبالمحاسبة يصير اخوي .. لا والله مو اخوي ولا احد اله حق عليه يحاسبني 

- اي مو هيتة كاعدين بامريكا ومحد يحاسبج 

- اليحاسبني غير كون شايل مسؤليتي يدري عني يشيل همي واحدكم بس بمحاسب .. اتجيبلي تليفوني منه . 

دخلت هدى سكتنا .. وهي مشت مني .. 

من صايحة حيدر وضالة تحجي وياه .. مسوي روحه شريف ومتحلفلي شلون احجي ويا حازم .. 

من كايلتله على تليفوني كاللها : بعته 

تخبلت من سمعت كتلها : على اي اساس يبيع تليفوني خذاه مني لان مخابرة حازم افتهمنا يبيعه ليش ؟ 

- شوين هسه نروح نتعارك وياه على تليفون 

- مشتريته ب٥٠٠ شني ما اتعارك وياه تليفوني 

راحت حاجته على فلوس التليفون يكللها : فلس احمر ما اطيها .. ولا اطيح حظها والله . 

كمت افور فور .. غلطان وخذاه امنا 

بس يبيعه وما ينطيني فلوسه هذا بوك علني وعينك عينك وجيف مالي لا حول ولا قوة .. مستقوي علي وماخذه . 

ردت احجي كامت يحجن عليه وسكتي وبعدين 

ضليت اخدم بالفاتحة لثاني يوم يلا اجت رقية مرت حيدر .. وكاعدة تتفيك حيدر مشتريلها تليفون حديث ! 

كمت اباوع من بعيد 

حاطتله كفر ومغيرة الخلفية 

وصيت بنونة تراقبها من تسهى تجيبه وتجيني .. 

صدك بنونة كعدتلها كعدة لحد ما سلتته من جنطتها واجتني خذيته ورحت للتواليت اتفقده .. شلت الكفر تليفوني هو نفسه اعرفه حتى بي شخط من جنت بالصالون وكع مني وصار بالحافة بس هو نفسه .

يربي اتعجبت على صلافتهم 

بايك تليفوني وحاطلة كفر ومفرمته ومنطي لمرته ويصيح بعته وما انطي فلوسه ! 

شلته وضميتة بغرفة ميلاد فوك .. 

من فقدته خبصت الدنيا ع التليفون البيت كله وكف على حيله يدور على تليفونها 

لحد ما ذبت البكلبها وكالت : اكص ايدي لو ما صبا الماخذته .. هي البايكته والله ، هي الخذت تليفوني 

باوعتلها ببرود حتى احرك اعصابها وكتلها : كلمن عدوه كبال عينه 

ورفعتلها حاجب 

كامت تشيل بروحها وتركعها .. 

اجتني سهى تكلي : اذا انت الماخذة التليفون صبا رجعي الها لا تسويلنا طلايب 

باوعتلها : اني شعليه روحي شوفيها وين مضيعته 

- ولو انت الماخذته 

- اكلج انت شادة حيلج عليه من عدج السان ما تروحين اتطالبين بحكي من اخوج بدل ما جاية وكدرتج عليه ، ما عندي واي واحد يسالني على تليفون بعد والله الدنيا احركها افتهمتوا لو لا كافي عيب روحي طلعت منكم . 

سكتت بس صفت ويا حيدر ومرته واعتبرتني اني ماخذة التليفون حتى اسوي مشاكل .. ما اهتميت الها . 

يومين شلنا الحادر وصفينا الفاتحة 

واعل ميلاد متضايقين من بيت عمي وصايرة بيناتهم مشاحنات لان ما اهتموا بيها ذيوا حملها على اهلها تجيلها يومين يتعاجزون منها بحجة ما عدنا احد يداريها يا دوب كاعد نكدر نداري جهالها .. رغم جهالها اكثر الايام يم امهم ابيت جدهم 

بس للامانة محد منهم كشت بوجهي ولا حاجوني رغم يعرفون يوسف رايدني بس اني ما قابلة لان ميلاد مريضة احترموا موقفي هذا .. ومحد منهم سمعني حجاية ع الموضوع . 

خلصت الفاتحة وثانيي  يوم الظهر ب١ .. 

خذيت التليفون ومشيت لمحل حازم انتظرته دقايق اجا ، كال : البقية بحياتج ماتت وصارت الساحة الج 

- ما جاية اسمع منك تعزية ولا استمعلك 

بس ما محتاجة تتصدق عليه بفلوس، كتلك محتاجة شغل ما لايقة تطي فلوس لصاحبك حتى مرته تشغلني 

- المطلوب 

- ما عدي فلوس اوفيك بس عدي هذا التليفون فرمته وبيعه واخذ فلوسك وشكد يزيد منه دزلياهن 

- افرمته ! لازم بايكته 

- ليش يوم بايكتك حتى هسه ابوك 

- جا ليش ما تعرفين رمزه 

- حيدر يوم الخابرتك وسحبه مني مفرمته ومنطي المرته وعينك عينك يكول بعته وما انطي فلوسه وطلع منطي لمرته . 

- اي نعرفه من زمان اخوج خوش زلمة 

حطيت التليفون وكتله : من تبيعه كلي عود 

طلعت من المحل ، ومشيت 

شافني عمي .. صاحلي : شعدج بمحل حازم 

- عمي طلع هو المنطي لام الصالون فلوس علمود تشغلني واجيته رجعتله الفلوس 

- وليش ما اطيتينياهن اني اوصلنهن اله ، انت ما تجوزين ما اتوبين ترا تعبتيني .. 

- عمي اجيت اتفاهم وياه والله وانطيته الفلوس قابل شعدي وياه 

رجع للبيت كام يصيح ويغلط وانت ما تصيرلج جارة وانت فد وحدة ما تستحين واني تعبت منج ومنين ما اجيبج ما تجين،  سكتت على كل غلطه ما حجيت ، لحد ما كال : اسمعي بويه وهذا اخر حجي وياج ، كدامج هاليومين تقررين يا ترضين بيوسف وتنسترين واتسكتين وباب الحوش ما اتطلعين .. يا اتطلعين من بيتي ويحرم عليج هالبيت ما اطبينه ولا اني عمج بعد .. خوش ؟ 

-تامر عمي ، ادلل . 

حجيتها وكمت منه رحت للحمام استهضمت حيل .. 

كمت لحيلي .. بدلت ملابسي ولبست عباتي وكمت ، لزمتني عمتي كالت : وين طالعة يا بتي واكعدي وعمج رايد مصلحتج 

كتلها : عمه ما طالعة بس متضايقة ورايحة اروح ازور ارتاح شوية 

-اذا تزورين روحي .. بس لا تشيلين ابالج وفكري ترا عمج رايد مصلحتج ويوسف مشتريج ورايد ...

ما جاوبتها 

بقيت ساكتة .. وهي تحجي 

اجتني هدى وعمتي تحجي كالت : صبا اذا تروحين اخذي الجهال وياج اني يا دوب متحملة  جهالي وجهال يوسف مو ادور جهال جعفر . 

كمت من حيلي بدلت الهم واخذتهم وياي .. 

وطلعت اني وياهم مشي لبانزين خانة ركبنا سيارات النجف .. وطلعت بينا السيارة حجزت الهم كرسي بصفي وكعدتهم بس تحركت السيارة اثنينهم نامو .. 

واني ضليت اصفن بدربي 

امر بامور ومعارك بحياتي ما يدرون بيها .. 

يعني شكل لعمي رحت انطي تليفوني حتى يبيعه وياخذ فلوسه هسه يكلي معناتها انت البايكة تليفون مرت حيدر ، محد يكول حيدر خذا تليفوني واطاه لمرته ، الحق عليه دائما لان اني مرة .. هم يسوون كلشي غلط محد يحاسب واصغر اغلاطي عدهم جبيرة وما تنغفر محد ديسال اني ليش اسوي هيج كلها تحكم بدون سمع بدون معونة .. كلها تريد مني بدون ما تسمع مني .. لو توافقين لو انطردح وحيدر طردني وبس تعيشين ابيت وحدج نكسر رجلج .. لا اطيك ولا اخلي رحمة الله تنزل عليك ما ابري نفسي عندي اغلاط بس ما سويت وياهم غلط يخليهم يهدوني ويذلوني لهالدرجة .. محمد منهم متحملني وذابين عليه ولد اخوية غصبا ما عليه اتحملهم . 

باوعت للجهال نايمين .. ذولة مثلي محد بحالهم ومحد يريدهم 

كلنا يتامى ومالي غير اروح لابو اليتامى اشكي .. 

وصلت النجف هناك .. 

نزلوا كل الركاب كعدت بنونة كامت بس حيدر نايم كام يبجي ما رضى يكعد اضطريت اشيله وانزل بيه .. وامشي امشي امشي .. وبنونة تجر بعباتي واني شايلة اخوها وانعثل بيه : عمة عطشانة اريدن مي 

-يا عمة هسه بس اطيني صبر ما اشوفيني حايرة باخوووج 

- اريد ميييي 

وكفت واريد انزل حسوني يبجي ومطنكر وما يرضى يحط رجليه بالكاع يصرخ .. حطيته على جتفي .. ومديت ايدي اتفقد جوزداني .. ادور منا ارد منا .. جوزداني ماكو ..

نزلته حسوني بسرعة حطيته بالكاع نط من البجي واني ادور ماكو 

يا الله جوزداني وينه بيه بالميه وخمسين .. عزا وصخام بعيني وينه هسه شلون يربي دخيلك دسكت يا عمه والله خرذلتني دكااافي 

حطيت الجهال يم ابو المحل ورجعت بنفس الدرب هوسة وروجة اطك روجة مال ايرانيين وباكستان و لان محرم .. رجعت لكيت ابو المحل مبتلي بيهم خطية خذيتهم منه ومشيت شايلة حسوني ودموعي كامت تجري : هسه شلون يربي وين اروح والمن اطي وجهي 

خذيتهم ومشيت للامام اول ما صدت عيني بكبة الامير 

نزلوا ادموعي واني اكله : تشوف اني وياهم يتامى وجيت لبابك بعد ما انسدت بوجهي كل الابواب والكل طردني من بابه .. الي مكان يمك .. تعوفني ضايعة اني وياهم لو تساعدني 

كلش تعبت يا علي .. ساعدني 

بوعني دخيلك .. انت ابو اليتامى واريدك تتكفلنا .. وتفتحلي باب يساعدني ويريحني .. 

كعدت بالضريح ابجي واشكي 

ما كدرت اطب للشباج لان ازدحام وخفت اضيع واحد منهم بالازدحام .. حسوني نايم بحضني وبنونة منتجية عليه وتكلي : جوعانة عمة هسه شلون 

صحت للكايم ، اشرتله اجا كتله : خوية المضيف مفتح ؟ اذا اريد اكل للجهال جاعو 

- لحكي اخذي بطاقة كبل لا يكضن منا لنص ساعة ينسد .. ويوزعون الاكل ما راح يطون بعدها 

مشيت صدك وكفت سوا واخذت بطاقة 

ورحت لمضيف الإمام علي .. ربع ساعة وطببونا .. وجابولنا تمن باكلة و مركة تبسي ودجاج ومي ولبن . 

اكلت ووكلت الجهال وشبعتهم واخذت بطالة المي وطلعت من المضيف رحت كعدت بالصحن بس برا مو بداخل الضريح .. وكعدت حايرة وفلس ما بجيبي .. شلون راح ارجع وحتى لو خذيت تكسي وطلعت لبغداد وصلاني منو يدفع عني فلوس التكسي حرام يسووها سودة مصخمة عليه ومحد ينطي .. 

حتى تليفون ما عدي 

حتى اخابر اتفق ويا عمتي تحضرلي عدها لو ما عدها ويا يوسف عمي اي واحد بس تليفون ماكو شلون راح ادبرها وهالجهال وياي 

اتذكرت فلوس التليفون .. 

كلت اخذ تكسي وانزل يم محل حازم وهو يدفع الفلوس ويطيني فلوس التليفون الباقيات .. بس منو كال بايعه ؟ ولو رحت وهو ما موجود بالمحل منو ينطيني .. 

خل اخابره واتفق وياه يبلغ اللي بالمحل من اجي واحد منهم ينطي لابو التكسي فلوسه .. بس اني هم مدري شلوني هو اني منيلي تليفون واخابر واتفق وياه 

اني ما حافظة رقم احد ابالي غير حازم 

لان جان رجلي فحافظة رقمة عن ظهر غيب .. بس احتريت منين اخابره . 

جان اكو واحد من الحرس الموجودين بالامام .. 

كتله : بعد اختك خوية ولو اكلفك 

- امري اختي 

- بس تليفونك اخابر تليفوني ضاع 

- اي تامريني امر 

طلع تليفونه اطاني .. دكيت رقم حازم 

دك رن رن رن .. رد : الو

- ها حازم اني صبا 

- ها صبا خير شكو 

- اكلك بعت التليفون 

- خو ماكو شي كبل شوية اطيتينياه وين الكاله شراي بجم ساعة وهو تليفون بنية غير كون واحد ثقة ، تريدين اطيج فلوسه ويضل عدي يمتى ما ابيعه 

- اي ماشي لعد حط فلوسه بالمحل اذا اجيت يطينياهن او اذا انت موجود 

- شنو القصة شكو ، صاير وياج شي 

- مو ضاع جيزداني واني بالنجف واريد ارجع فراح ارجع بتكسي ومن يوصل يم المحل عود اطيني الفلوس اطي للسايق 

- بهالليل تجين بتكسي  من النجف ، انت شبيج بابا عاقلة مخبلة 

- حازم هسه بس حطلي الفلوس بالمحل واني اتدبر امري 

- ابقي بمكانج اني جايج انت بالامام 

- لا تجي حازم تليفون الولد .. ما اكدر اتأخر .. بس خلي اكوم اخذ تكسي وارجع تعبت من الجهال

- ها عاشت ايدج ووياج جهال همين ، جايج ابقي بمكانج . 

سداه 

ديلا بالله هسه جايني هو انت ورا البيت 

خو ارجع واتسلم فلوس من المحل وابوك الله يرحمه 

الله ذبني بيد حازم هسه شنتظر والجهال ذول راح ينامون يربي 

اطيت التليفون للولد كال : خوية محتاجة شي تريدين فلوس اذا مضيعة فلوسج 

- لا يطيك العافية بس خابرت اهلي راح يجون ما رضوا اجي وهم يدفعون فلوس التكسي 

- هو الصدك مو امان وحدج انت وجهالج اترجعين بهالليل .. بس شلون راح يندلونج وانت تليفونج ماكو 

- والله ياخوية ما ادري اني ليش ردت ارجع 

هسه انتظر ولو اجو شلون اديلهم 

كاعد يحجي دك التليفون رد الولد 

كاله : هلا بيك خوية ، اي والله ذول هي والجهال ،  اني منتسب بالعتبة .. ان شاءالله .. تامر بعيني 

هاهية 

سده كال : كومي وياي خوية خلي ادخلج يم البنات جوا وانطي علم للعتبة ولو اجا بس يسال عنج يدلونه بيج ما يتيهج جان بقيت بس دوامي راح يكضي بعدله ساعة ما اضن يلحك علي 

كمت رحت ويا المنتسب دخلوني جوا بالعتبة 

بقسم الافتاء .. نسوان تدخل تسال اسئلة شرعية ونسوان بالعتبة دارسات حوزة يجاوبن .. ضليت لاهية وياهن والجهال نامو من التعب .. 

تلث ساعات 

اجتني بنية كالتلي : حبيبتي اهلج يريدونج 

كمت واني اكعد ببنونة وشايلة حسوني 

كامت بنين تمشي وتتطوطح وانعثل بثاني .. طلع حازم كدامي من شافني اتقرب مني ومد اديه وهو يكلي : شجابج انت والجهال متكليلي .. اكو واحد يطلع طلعتج هاي صدك جذب 

- اذا جاي تحسابني وترزلني وتذمني ارجع ترا واصلة ليجاي بس تكلي بز ابجي والله 

- جا عقليش اجيبن جهال تنعثلين بيهم للنجف ما خفتي على روحج ما كلتي يصير ما يصير مستشبعة بروحج .. طريق هذا وخطر وانت جاية تهرولين فكرررري 

- اكلك اطيني ما ناقصة اني اسمع صياحك وعلطك اني غبية ديلا اطيني 

- امشي كدامي لا تفضحينا منا الناس 

- جا كافي .. لا تضل تدوس فوكاي .. لا انت والدنيا عليه ترا مليت 

- واني يمتى صاير عليج ولج درب هذا جايبة الجهاااال 

يحجي ويمشي ويطلع من الامام واني كاضة بنونة وامشي وراه .. واحجي : اختنكت وردت ازور وين اوديهم وبيت عمي محد يتحملهم 

- كلهم معتمديييين لان انت متصدرة .. جاي اتشوفين روحج انت لو لاااااا ، كلهم ببيوتهم مستقرين ومرتاحين وانت ضالة مهجرة من بيت لبيت وذابين براسج مسؤلية الجهاااال اتعلمي تكولين معليه مثلهم اتعلمي ما تحطين روحج بامور ما تخصج 

- ما اكدر اذا غيري يغيب ضميره وما يفكر بهالجهال اليتامى ويكول معليه اني ما اكدر .. حالهم من حالي محد الهم لو عفتهم منو الهم رقيييييه حتى تكعدهم بكتلة وتنومهم بكتلة !؟ منو ياخذهم خواتي الكل وحدة ترجف من رجلها ياهو اليتحملهم 

- وانت شعندج 

- عندي ضميري والله فوكاي لا ينساني ولا ينساهم اسوي اليطلع بيدي والباقي على الله .. الخلقنا ما ينسانا . 

هز راسه ما راضي ووصلانا للسيارة 

صعدت ورا وناوشني حسوني وبنونة كعدت يمه بالصدر .. وهو صعد .. 

حرك السيارة ، كسر وحجه : اي وليش مختنكة 

ما جاوبته دايرة عنه 

حجه : مو احاجيج كافي واحجي ليش مختنكة 

- عمي شافني اطلع من محلك اليوم وكام يحجي وضل يهدد 

- يهدد ! يهدد بيش 

- لو اقبل بابنه لو مالي كعدة ابيته .. 

واني ما مستعدة .. نفسيتي ما مستعدة اتحمل رجال واجامله ما اريد زواج اريد اعيش اريدهم يخلوني لحالي تعبت منهم طكت روحي .. حيدر يطرد من صفحة وياخذ تليفوني ويطي المرته واني الدافعه ايجاره وطاردني وسحبه وعمي لو اخذ ابنه لو يطردني وخواتي ما داريات عني .. تعبت من دنياتي كلها اريد اهج اريد اروح لمكان ما بيه احد 

- مو عدج سبعة 

- سبعتيش 

- السبع ملايين اطينياهن اني اداين عليهم واشوفلج بيت حواسم قريب واني اوفي الدين وامعدي واستقري واشتغلي وسدي بابج معليج باحد من الدنيا بس اكعدي استقري . 

- وياهو الراح يرضى اكعد وحدي كلهم يصعد الشرف براسهم وما يرضون .. عمي وحيدر حلفوا لو اجرت وكعدت بيت يكسرون رجلي وما يخلوني .. 

- لانج غبية 

- حازم كافي رحمة لربك .. ترا طكت روحي والقران .. كافي البيه لا انت والدنيا ضدي 

- لان من صدك غبييييه بيتج موجود وانت حايرة بروحج وين تكعدين وراضية لهذا وذاك يذلج ويتمنن عليج ويحاسبك 

- يا بيت تقصدك بيتك الطردتني منه وحطيتني ع الباب بمجرد ما اختلفت وياي .. البيت الانطرد منه مو بيتي ولا عمره جان بيتي اني متوهمة وهذا الخلاني اشيلك من بالي لان جنت متعشمة بيك بس الخذلان الشفته منك ما انساه بعمري 

- بتل بتل خذلانيش هن شهر ورجعتلج اتملحس حتى اصالحج .. كل اثنين متزوجين تصير بيناتهم مشاكل .. هاي امل وهي ام جهال كم مرة بمرة بمرة اطردها من البيت وارمي عليها يمين الطلاك وتهدا الامور واتعوذ بليس وارجعها لخاطر الجهال  ، وانت من ذاك اليوم لهذا اليوم احاجيج واقنعج وما تقنعين وراضيتلهم يذلونج ويهينوج وتفترين وشكين وتشتغلين حتى شنو ؟ تحصلين ١٠ الاف الجنت احطهن الج يومية مصرف كبل لا اطلع  وانت نايمة ومرتاحة للظهر .. انت الراضية لنفسج الشكى ومحد غيرج متعبج 

- امل من تطلكه وتطردها عدها بيت اهل تروحلهم اما انت طلكتني وخذلتني وانت تدري اني مالي مكان بهالدنيا غير هالبيت العايشة بيه وياك ..  ورضيتلي اتبهذل 

- ما راح تتعدين هالموضوع يعني .. جرينا وعرينا بيه هواي 

- اتعدى انت طردتني وعفتني مذبوبة عد بيت عمي!؟ 

- الحل شنو كليلي اتضلين هيج 

- رايدني ارجع اتسجل البيت باسمي يلا ارجعله 

- هااااااه الا باسمج ، كاعد تساوميني صبا 

- هذا الموجود 

ضل يباوع : ما جنت اعرف بيج طماعة 

- اخذه بالعافية عليك ما اريده حتى اطمع بيه بس من تكول بيتي سجله باسمي حتى اكدر اطمئن وما ابقى بخوف لا فد يوم من تزعل من لو تضوج تطردني منه .. ساعتها اكلك انت الاطلع منه بيتي ، غير هيج لا تكول بيتج . 

- مقتنعة بحجيج ؟ 

مجاوبته .. 

سكت وضل ساكت طول الطريق .. 

رجعني لبيت عمي .. ذبني لغاد عنهم ومشيت صاح وراي انداريتله : بس ذني بجيبي خليهن عندج لحد ما اجيبلج فلوس التليفون شوف شوكت باجر لو عكبة. 

ماشي 

خذيتهن ورجعت كبل صعدت فوك ووصيت بنونة متكول عمو حازم وصلانا .. ونمت ثاني يوم هوسة وخبصة كاعد نحضر للسبعة ونجهز الها .. 

يومين صارت السبعة .. 

اجني خواتي عمي موصيهن كعدلي كعدة 

ويوسف رايدج وشاريج ورايد يعقد عليج مهر هالفترة حتى تستقرين وكافي ومحد يفيدج غيره .. وارضي واكسبي راحتج واقنعي ما ملتي من عيشة الترحال استقري .. وما تلكين احسن من يوسف 

وكعداي فد كعدة يقنعن بيه 

عقلي تشوش بين نفسي لحد هسه ما طايبة من حازم وبين عقلي مقتنع ويكول شتسوين المهم استقر واعيش مو مهم كلبي شيحس وشيحب . 

لحد ما كمت للمغسلة اغسل بحسوني 

كضتني اخت مسلاد جايات للسبعة حجتلي حجاية واني واكفة كالتلي : ما ادري اذا انت راح توافقين على يوسف مدري لا .. بس احجيها حجاية للزمن ونصيحة من وحدة لا تكرهج ولا هي حاقدة عليج .. الذب مرته ام جهاله بالمستشفى وراح يدور غيرها ويفكر بين رجليه وشلون يفرغ شهوته وياهو اليغسل هدومه ما راح تعزين عليه بطرك روحج .. كلش متوهمة لو حسبتي سند .. بس تتمرضين وما بيج حيل تخدمينه وتخدمين اهله وعلي وتراب اختي الما نشف كبرها لا يذبوج ذبة الجلب .. وانت فكريلها الما صان عشرته ويا ام جهاله يصونها وياج !؟ 

غيرت وخربطتت كل افكاري 

يوسف اكثر واحد جان شايل روحه لا يدخل بيه ولا يدري عني ملتهي بعايلته من مرته تمرضت لكاني بديل .. هاي دنيا صار ما صار تاليتي وين .. وياهو الالي هم يذبني ؟ 

حازم واني غريبة شال حملي وساعدني واطاني دم كلبه جيف شافني بصريفة ابيت عمه .. ابادله بيوسف ! 

واني عفت حازم على موقف بس لان طردني من بيته بساعة عصبية اجي اخذ يوسف الذب مرته وهي مريضة وما اتحمل مسؤليتها

خلصوا السبعة بالليل راحو اهل ميلاد وصفوا بس كرابتنا 

عمي ما رضى خواتي يروحن كاللهن : عد موضوع اريدجن تحضرنه 

سووا جاي والتموا بالدوانية وكعدوا يفاتحوني بموضوع العقد مال يوسف ، واحن بسبعة مرته ! يعني حتى ما انظروا اربعينها تمر ويحجون .. احس لعبت روحي منهم حيل اقلها واحد يلزم حداد حق العشرة .. مو بيوم سبعة فاتحتها يحجونب موضوع عرس . 

خصمتها وياهم وكتله : عمي تعذرني اني ما مستعدة اتزوج .. ويوسف ابن عمي واخوية ما اشوفه غير هيج وما اكدر 

حجت سهى : شني الحجي الماصخ هذا زلمة رايدج ومشتريج وانت تتعززين عليه اشايفة روحج ؟ ولج شو سمعتج بالكيعان وعاجر وما بيج خير فوك ما راضي يلفيج ويلفهي هالجهال ذول .. 

- اذا ع الجهال تكدرين تاخذينهم يمج 

- اخذهمي مي عايزة اني مبتلية بكوم جهال اكلكم بكيفكها هي تقرر شنو انتم هم دري شلونكم محد منكم يكضها ويغصبها شني نظل احنا حايرين بصبا ومشاكل صبا ختولي غصبا ما عليها توافق 

- خية انت ياهو مالتج حياتي هاي واني ما اشوف روحي مستعدة 

حجه عمي : ولج اصبية طكت روحنا منج والعباس .. فوك ما راضين بشينج وسوالفج ومتجرعينج كاعدة تتمضيكين علينا ولج 

حجه حيدر : هاي مال واحد يكضها ويمسح الكاع بيها اني عن نفسي اتعذرها وبيتي ما اطبه والله ولو جيتي وطبيتي بالعباس لا اكضج وثرمج ثرم 

وعمي يكله : ولا بيتي يتحملها وعلي ليلة ما اخليها عدي هالادبسز صارلنا كوم منتظرين جانت تتحجج ومرته وهاي مرته ماتت هسه تصيح ما مستعدة واحنا الوكفتالها يوم الذبها صاحبها السودت وجوهنا وياه ورجعتلنا مطلكة هالخايسة 

حجيت : اني لا اتجاوزت على واحد بيكم ولا ردت منكم شي بس كتلكم ما مستعدة اتزوج وهذا حقي .. وما تريدوني لا تريدون اني من عين باجر اشوفلي بيت ايجار واكعد لحد ما اخذ فلوسي من حازم واشتري بيت ما بحاجة احد يكعدني عنده ما تتحملوني شيلوا اديكم مني . 

اني حجيت هيج وحيدر كاملي على حيله وكض براسي وهو يصيح : حتى تحرمين وتكو*** بكيفج ولججججج احنا بكيفج نمشييييي ساقطة 

جر براسي كامتله منه وهو يرافس بيه ويصيح ويريد يتناوشني .. 

كاله عمي : اخذ اخت واطلعوا من بيتي .. اني ما اتحملكم بعد ليجاي حدي اختك هاي تكتلها اتذبها للجلاب مالي غرض بيها 

كضاني وهو يعت بيه .. 

ومنى تحاول تجرني ردت اصعد بالسيارة واركع راسي بالسيارة كصتي كلها كامت تفور نار 

سحبت روحي كتلها : ما اصعد بسيارته 

- ولج اصعدي وين تروحين يمعزاية 

- ما راح اصعد افتهمتي ..

سهى : ولج فضحتينا وخزيتينا الله لا ينطيج امشي .. امشيي 

كامت نجر بيه .. سحبت روحي وحلفت ما اصعد سيارته 

راد يكتلني بالشارع .. 

ادخل رجال من المنطقة كال : كولوا يا الله يمعودين بس اهدو 

سحبت نفسي وحيدر يريد يكضني بالشارع يكتلني 

اريد امشي وسهى ومنى كاضات بيه .. جبرني وسحبني واخذني غصب لبيت حيدر 

عاد هناك هو استرجل واتمرجل كدام مرته 

ما خلا فشار ما فشر عليه .. ما خلا ضرب دفرات جر شعر تمليخ راشديات .. 

كمت اصرخ وابجي واكله : والله حرام عليكم هذا كله بس لان كتلكم ما اريد اتزوج واني اكعد بوحدي ما اريدكم افتهمتووووا ما اريدكم 

جريت عباتي .. خواتي كاضات بيه : ولج لا يشيل سلاحة ويحط طلقة براسج انت ليش ما تكعدين 

- وخروا مني مو محد منكم متحملني مو محد منكم رايدني كاعد تسوون بيه هيج بس حتى تجبروني اتزوج والله ما اتزوج ومو انتم التمشوني 

تلاويت وياهن وهو يريد يلزمني اتفلتت منهم وطلعت امشي بالشارع بسرعة ودموعي تجري منهم ... 

طلعت للشارع العام .. 

اخذت تكسي وصعدت لبيت ام فراس .. جارتي كبل يعرفوني ويحترموني وامون عليهم .. دكيت الباب شافتني اتخبلت .. حلفتها ما تكل لحازم بجيتي يمها كال : بس دطبي بتي ما اكول لاحد طبي . 

دخلتني جوا كمت احجيلها واشهك وابجي واكللها : خالة انت جبيرة وبمقام امي شيريني وكليلي شسوي كل الابراب انسدت بوجهي 

-دارتاحي الليلة بتي واهدي والصباح رباح 

الواحد بساعة غضب ما يعرف يفكر ..

فرشتلي ونومتني بس حطيت راسي هلكد ما مضروب وخاوية من البحي بسرعة غفيت وهي سدت غرفتها عليه حتى محد يتقربلي 

شوية واجتني فتحت عيني كالت : حازم عدنا ويريدج 

- خالة مو كتلج ما تبلغينه .. عليج العباس لا 

- والعباس الحلفيتيني بيه لا حاجية ولا كايله فراس هو الكالة عدنا واجاني يكلي ندهيها 

- كليله ما تجي نايمة اتحججي اي شي 

- دكومي وياه واتفاهمي ولا اتحسبينها مني اريد اخلص مني الله شاهد عليه وروسوله ما اريدج اتطلعين بس ترا حازم مشتريج وفرفح ساعة العرف انت داكة بابنا تبجين ، دكوميلا بنيتي كومي 

كمت من مكاني 

فرغولنا الاستقبال .. كال : داكة باب الجيراني وما جايتني صبا 

- ما اريد احد منكم اني اريد اخلص منكم كلكم .. عوفني الله يخليك اني بس رايدة اشرد بروحي 

- وتعتقدين جيتج ليجاي راح تصلح السالفة ؟ 

- المرة مثل امي ورايدة شورتها انت ياهو مالتك انت مو طلكتني كافي عوفني وفك مني ياخة 

- لا ما افك كومي وياي للبيت 

- باعتبارك منو ولو مشيت وانت طليقي شيكولون عني الناس لو انت سمعتي ما تهمك 

- راح اصعد لجهالي وانت اقفلي عليج باب بيتنا 

- كلتها بيتك ما اريده 

- صبا كافي رحمة للعباس كومي وياي وانعل اهلي لو اتقربت للبيت والله ما كربلج بس كومي وامشي .. 

كمت منهم وحاجيت الحجية ما رضت اطلع واعوفها 

بس حازم ما رضى .. مشيت منهم دخلني للبيت واطاني مفاتيح البيت وكالي سدي عليج وامني 

صدك قفلته ودخلت للاستقبال 

لكيت فراشه ممدود نكثته ونمت عليه 

جانت ريحة حازم مشبعة بيه .. ارتاحيت وروحي امنت ونمت. 

للصبح دك الباب عليه 

كمت لحيلي كال : كومي وياي 

- وين 

- هسه دمشي وياي ما راح اضرج بس امشي 

- انت متعرف البارحة شصار .. حازم كتلوني اني ما اكدر ابقى عدهم بعد اريد تشوفلي بيت ايجار 

-هو اني رايح اشوفلج بيت لازم تستقرين وضعج هذا ما لازم يبقى هيج والنوم ما يفيدج كومي امشي وياي 

لبست وصعدت كتله : ما عندك دوام ؟ 

- لا خذيت اجازة 

- ها 

حجه : صدك مستمسكاتج وين 

-يم عمتي ليش 

-محد ياجرلج وانت ما عندج مستمسك 

اخذني ذبني براس الشارع تمشيت ودكيت الباب طلعلي سويسو 

كتله : گل لبيبي صبا تريد مستمسكاتها 

طلعلي عمي : وين رايدة اتولين ولج 

-مو شغلك عمي ما طول طردتني من بيتك اتبرى مني عوفني اني وحيدر 

-شما يسوي بيج حيل خلاه بعد ايدي كون يكسر راسج 

خذيت مستمسكاتي من عمتي وطلعت للشارع ركبت ويا حازم 

شو هذا اخذني لدائرة حكومية ، كتله : شنو هاي ؟ 

-كاتب عدل 

-وشنسوي بيه 

-نتكاتب و احط البيت باسمج مو هذا التريدينه 

-لا حازم اني ما حجيتها بصدك جنت احجي 

قاطعني : افتهم ردتي اتصعبينها علي حتى ما افاتحج بهالموضوع بس اني مقرر اذا تسجيل البيت ينهي كل هالمهزلة هاي ويخليج تأمنين وتخلصين من هذا وذاك يذلج ابيته .. اني الرايد اتنازل بيه 

ضليت اباوع بوجهه مستغربة : بس لا والله ما جانت حجياتي بصدك ما اريده 

-بس اني اريدج ، اكعدي وامني واستقري ولو يوم اختلفنا خليلي الشارع احتار بوضعي  وانت ضلي ابيتج .. يتبع 

________

 تكملة الرواية من هناااااااا 

لمتابعة باقي الروايه زورو قناتنا علي التليجرام من هناااااااااا

بدل ماتدور وتبحث علي الروايات عمل 

متابعه لصفحتنا على فيس بوك هنااااااااااا

الرواية كامله من هناااااااااا

مجمع الروايات الكامله 1اضغط هناااااااا

مجمع الروايات الكاملة 2 اضغط هنااااااا