رواية عاجر الفصل الرابع عشر 14بقلــم الكاتبـــة زينب ماجد (حصريه في مدونة قصر الروايات)

رواية عاجر الفصل الرابع عشر 14بقلــم الكاتبـــة زينب ماجد  (حصريه في مدونة قصر الروايات)

رواية عاجر الفصل الرابع عشر 14بقلــم الكاتبـــة زينب ماجد  (حصريه في مدونة قصر الروايات)

#عاجر 

{ بقلم الكاتبة زينب ماجد } 

الحلقة_١٤ 

وكف حازم .. وجهي كام ينطي الوان واني اباوعه 

التفت اسعد وراه : هلا ابو علي .. 

سلم عليه حازم سلامه ثكيل بسرعة بادرت وكتله : الدكتورة طلعت علمود الحجز الوصيتني عليه بلكي باجر 

اسعد : تروحين وياي للبيت تتعشين وفاء هم مشتاقتلج غاد 

- غير مرة ان شاءالله 

- جا كومي خل اوصلج 

حجه حازم : سجليلي حجز هسه 

حجاها وهو يخزر 

كتله : اي 

حجه اسعد : شنو اخابرك ابو علي 

-نسال عنك شعدك هنا

- والله شفت البنية 

واشر عليه : خطية نازلة وتتعارك ويا هذا ابن الجحش 

عقد حاجبه : منو !؟ 

حجيت : حسن اجا ليجاي وراح

- خل يولي كضيته شحته هالمطي ابن المطي لازكلها شني علچ 

ضل يباوع بوجهي اني كمت ارجف اريد اكض جنطتي اريد اشوف دربي حرارة صابتني براسي من الخوف .. وكتلهم : المعذرة منكم بس اقفل العيادة 

اسعد : اطيني القفل خل اسدنها الج 

خذيت القفل وطلعت حازم بس يباوع 

واسعد يكلي : المفاتيح وين 

مديت ايدي .. ترجف تهتز من الخوف العرك كام يصب من كل جسمي واباوع لحازم .. خزرني واشر انزل 

حجيت : عوفها جوا السندانة المفاتيح 

نطقت وحازم وكف كدامي اشرلي بحواجبه انزل كدامه .. 

نزلت بس من الخوف ما عرفت دربي حطيت رجلي على حافة الباية زلكت وهو لزمني من وراي .. وكض ايدي حيل : امشي للسيارة كبل لا اصلبج هنا 

ما نطقت ولا حرف نزلت 

اخذيت يسرى مشيت لان اسعد راح ينزل ورانا خوما اركب بسيارة حازم ويشوفني 

كمت امشي والهوى عالي شوية يطير عباتي واجيب وارد بيها منا بس حتى ابتعد واسعد ما يصيح لو يلزمني على توصيله حازم تقدم بسيارته داس هورن ووكف .. بسرعة من السارع توجهت وركبت وياه 

- مسويتلج شدة يا ورد بيهم مو 

خوش لمة حسن واسعد وينه ووين شريف روما مووووو 

ما نطقت ولا رديت بأي كلمة بس دموعي كامت تجري من الخوف .. باوع شافني امسح بعيوني وما احجي صاح : سهلة سهلة 

داس بيها السيارة .. 

ما جاوبته ولا حتى حاولت ابرر لان عصبي وكلمة زايدة حتى لو تبرير يزيد نار .. شفته دخل بفروعهم وصل لبيته ، حجه : انزلي 

باوعتله : حجه كلمة زايدة والعباس اطبك اولها على تاليها واطلع العمج هسه .. انزلي 

مسحت عيوني ونزلت من السيارة توجهت للبيت 

طب وراي .. فتت للدوانية كبل ، حجه : اكعدي هنا صبا 

شموكفج ويا حسن ولج !؟ 

- وحق دم الحسين كالي واحد رايدج 

- ياهو الكالج 

- ما اعرف ابو التحليلات الكبالنا 

- وتعرفين ابو التحليلات حلو 

- لا والعباس ما عرفه بس هو كالي اكو واحد يريدج اني حسبالي انت .. نزلت 

- نزلتي وسويتيلج شدة ورد مو 

- والقرأن ..... صاح 

- لا تحلفييييين عوفي القران بريئ منج ومن عمايلج الطايح حظها شفتي حسن ما اجاري ولا احاجي اصعد .. وكف اسعد احجي انهر خوية روح منا اني ما ارضى توكف وياي وتحجي عرف ولف تحاجيني ، هيج حجي ليييييييييش ما تردين ليش ما تنهررررين 

منطيتهم مجال ومستحية وتصيحين هممنممم 

- والله ما منطية مجال بس هو صعد وراي 

- رزلتيييييي وصعد كالج جاي على شوفتج وهو تعرفينه رايدج منعة تسكتييييين لييييييييش 

- جا شكله 

- شتكليله السانج وياي بتارة توصلين وياهم ينعكد السانج مو .. اسمعي .. كافي بيج هبطتج والخوفة الأنت بيها ما راح ازيد عليج بس وحك هو علي داحي الباب يا صبا لو شفتج نوبة اللخ واكفة ويا احد لو يحاجيج براحة وانت فاتحتله مجال وتجاوبين لا احطج واسويج نصييييين والله . 

وطلعة منا ماكو وشغل بعد انسي لو جبتيلي طاري الشغل الدنيا احركها بالعباس انعل ابو الشغل اليخليج تتمضحكين ويا الزلم بت الاوادم جاي اشوفج 

.. مو اخوج بالدوام ١٥ يوم مالج حجة تكعدين هنا وتسكتين ..  لا تجبريني بالعباس اسوي امور ما تسرج .. كعدي 

حجاها وطلع بهمة .. 

وطبك الباب وراه بقوة .. دمعت عيوني .. 

جا اني افتك من اخوتي وعمي واعصابهم النار اجي لحازم التحسه يكهرب من يصير عصبي .. وين ما احطها سودة مصخمة 

هسه اضل هنا لو اجا واحد من اهلي للبيت وما لكاني 

لو مر جعفر ولو وحدة من خواتي شكللهم وين جنت .. 

ضليت كاعدة بالنص ساعة بمكاني ما كمت .. 

وحازم ما اجا ولا مر .. 

كمت نزعت العباية والحجاب ومشيت بالبيت .. 

صعدت فوك غرفته نظيفة على حطيتها بس دوشة و بطانيته مبين يكعد الصبح يطلع منها يرجعلها بالليل .. بس البيت الجوا وغرفة الجهال هوسة العاب وهدوم ونساتل وكواغد مال حلويات هواي بالكاع 

مشيت للمطبخ .. فتحت الثلاجة 

لحم مثروم مايع وكانما يريد يصير اسود سحبته شميته ما بيه شي .. بس لان ما شامره بالفريز صاير هيج .. طلعته وطلعت بصل و بتيتة .. وكمت ادور بالكاونتر واتفقد .. المطبخ وصخ يحتاجله كوم شغل بس مو مال هسه مال واحد يتفرغله .. هوسة شي شابج بشي بالكوا لكيت المبراشة برشت بتيتة وبصل بس ما جان اكو خضرة ولا فلفل اثرم .. اخذت بصل اخضر وثرمت العوادين  الخضر مالته وياه وسويت كباب عروگ . 

باوعت كنتورهم الصفطته ذاك اليوم كله مفردشي عاد شلت الهدوم لم من الكاع ذبيته بكنتورهم و عفته وبالماسحة جريت الهوسة والزبايل وكشيت الكاع .. لميت ورحت حطيت سطل وزاهي وتايت وقاصر ورشيتها بالكاع ورجعت والماسحة .. لحد ما اشتميت ريحة المنظفات بالبيت تعط يلا ارتاحيت نفسيا وكعدت .. 

جابني ب٩ وهسه دعش ونص وهو ماكو .. 

دورت ريموت ما لكيته ولا عرفت منين افتح تلفزيون .. تركته وتمددت ع القنفة .. اول ما حطيت راسي كمت اغفي .. لحد ما نمت .. 

شوي وسمعت صوت جهال وحازم يصيح : مو هنا ابني غااااد 

فتحت عيني .. جايب ولده اثنينهم 

انتبهت لروحي نايمة على بطني ع التخم ومتغطية بالعباية تعدلت بسرعة وانداريت ومديت روحي حتى اكعد واني اباوع لرجليه طاب للبيت بشحاطة الشارع ويمشي ع الكاشي ... 

باوعلي ما حجه .. عاكد حواجبه وما طايق روحه 

وحط كدامي مغلف ورق بيها لفات فلافل و جيس عمبه وصاص 

..

حجيت : سويت كباب عروك .. 

ونزلت رجليه من التخم وكمت تركته وراي ورحت للمطبخ حطيت طاوتين كليت طماطة و بتنجان و كباب عروك وحطيت العمبة والصاص بكاسات .. وزلاطة وجاي وسويت صينية 

سجاد كام يصيح : علاوي عشا تعاااال اكل 

حطيتها هو اول واحد كعد حجه : المن هذا ؟ 

- غير عشى 

- مو جبتلج فلافل 

- متريد يعني 

كعدوا ولده اثنينهم كاللهم : مو هستوني عشيتكم عوفوا عشاها 

- هذا كله اكله وحدي غير سويت عشا للكل .. ما تاكل 

تنهد وكام من مكانه .. 

مشيت حميت خبز وصمون بالثلاجة باقي وخليته كبالهم 

وسجاد يشبك بيه : عليج الله ابقي يمنه هنا 

- ان شاءالله حبيبي اكل 

سويتله لفة صغيرة وحطيتها بيده وصبيت جاي لحازم خليت كباله وهو يباوع .. رد سجاد يحط راسه عليه وهو يكول : اني احببببج 

حازم : اكعد بابا .. كافي عوفها تاكل 

- اني هم احبك حبيبي كمل حتى انطيك بعد 

ردت اكل بس ما اشتهيت خلصتها بس جاي .. اتعشوا كملوا وحازم يكللهم : يلا روحو نامو .. جروا الفراش ونامو 

كمت شلت الصينية وكتلهم : بالاول امشي غسلوا اديكم وحلكم واني افرشلكم 

راحو للحمام واني حطيت الكباب البقى ع البقت من الطماطة وضميتها بالثلاجة وخضيت  المواعين ومشيت فرشتلهم وفرشت وياهم .. 

حجه : راح تنامين ويانا 

-  ليش متحب انام يمكم 

سجاد : لا يمي يمي معليج 

علي : لا عبالي تنامين يم بابا 

- ليش انام يم بابا ! ؟ 

- اني ادري متزوجين بس هو كاللنا منكول لاحد 

- مكلتوا لاي احد 

- بيبي سألتنا ابوكم صدك جايب مرة للبيت كتلها لا وسجاد كاللها ما ادري 

- وكون كلتوا لماما 

- ماما تعرف بيكم من سألتنا وكتلها لا كامت تغلط عليه 

- ليش 

- تكلي من اسألك لا تضمضم لابوك حتى لو يوصيكم 

بس ما حجينا لا اني ولا سجاد 

- بهيج عمر شنو ذنبكم تعيشون هالازمات وضم اسرار ما ادري مدري حظكم مدري حظ ابوكم مدري حظ منو .. نام حبيبي باجر انتم ظهري لو صبحي 

- دوامنا كله صبحي 

فات حازم باوع اني فارشة ويا الجهال وكاعدة يمهم اسولف .. تنهد وكال : نامو بابا لا باجر اكعد واجرجر وما تكعدون لا اتعبوني ... ناموا 

حجيت : كوم حبيبي طفي الضوا 

اني وسجاد بفراش وعلي وحده بفراش .. هز ايده حازم وسد الباب وصعد نام ..  نمت بنصهم واني اسولف وياهم واحاجيهم وسجاد على ايدي وحاضني .. حجه علي : يومية يخبصني احضني اخاف اليوم حاضنج 

ابتسمت واني اباوعه : خطية 

الولد حلو مملوح وشعره حيل سرح ومسوي حفر .. يشبه الطفل الويا هيثم يوسف (بس انت وحدك ليه ) بس لغوي ولوكي .. بس ينحب . 

بقيت حاضنته للصبح .. 

لحد ما حسيت بحازم وهو ينده بولده .. فزيت وكمت للمطبخ بسرعة وهو يصيح عليهم يكعدون .. لكيته جايب بيض وصمون حار .. غسلت وجهي وطلعت الكباب البارحة ثرمته وحطيته بطاوة وشمرت عليه بيض وسويت لفتين حطيتهم بعلاكة وحازم يبدل فوك يصيح عليهم يكملون

رحتلهم سجاد يريد يلبس البوتين ماله بس ما كاعد يكدر يدخل رجله ساعدته واخذته للمغسله غسلتله وجهه وبفرشة مشطتله ركض صعد لابوه جاب العطر واجا حطيتلهم اثنينهم وانطيتهم لفاتهم .. 

حازم صار وراي : يلا اركضوا بويه اتاخرتو 

علي : ماشي بابا مع السلامة 

سجاد لزم راسي وباسني بخدي وكلي : مو ترووووحين 

- ما اروح ابو السان بس روح 

ركض وهو يضحك 

باوعتله : ريوكك 

باوع عليه : يلا بس استعجلي 

طفيت الجاي على نار هاديه وحطيتله الطاوة وماعون صغير صبيتله جبن من اللي جايبه ، حجه : ما تكعدين 

- كمل 

اندار باوعلي : شنو زعلانة لو تتجفجفين مني لو شنو موضوعج

- ماكو شي هيج شوية متضايقة 

- منين متضايقة ؟ 

- من نفسي 

- زين تدرين بروحج غلط .. 

ما جاوبته .. حجه : اكعدي ما احب هذا الاسلوب اتصبيلي وما تاكلين لو تاكلين لو لا تسوين ما اريد . 

جبت كلاص وحطيت جاي وكعدت بصفه كابلته 

نقشت وياه واشرب جاي .. 

كام من مكانه غسل وكال : محتاجي شي من اجي اجيبه ؟ 

- لا 

تقرب مني .. ودنك عليه حظني من ورا وكالي : لا تضوجين مني ما اكرهج اني لو ما بعز روحي جا شمرتج وفسخت العقد وكلمن بدربه بس احبج وعلي ما اتحمل ذول الخياس يدورون داير مدايرج ويباوعولج بعين نزواتهم وانت فريسة بعيونهم .. 

اني رايد الناس تهابج تخاف تحجي وياج صيري قوية وانهري اليتقرب منج لا تستحين ولا تجاملين .. قابل عدج يم احد شي وتخافين لا تخسرينه رزليهم وانعلي ابهاتهم خليهم يخافون يتورطون وياج بكلمة لا تصيرين سهلة لاحد 

واني اسف اذا صيحت عليج امس بس والله من كد حبي وغيرتي عليج . 

هزيت راسي : اعرف 

- انداريلي شو 

كمتله حضني باثنين اديه وكال : يا بختي لو اكعد كل يوم والاكيج كبالي واترسين بيتي بروحج الحلوة ... 

والله وعلي رايدج ما رايد اضرج بس وضعنا هذا مأذيني ماخذ بت بالسر شني مستحي منها لو خايف من احد .. ما حاسب حساب لاحد غيرج ولا خايف من احد كثر ما خايف عليج . 

بسته بخده : اعرف واعرف انت عصبي وتعبر عن اللي بداخلك بعصبية لهذا سكتت مناقشتك 

-جا ليش عفتيني ونمتي يم الجهال ؟

-حسيتهم محتاجيني اكثر منك خصوصا سجاد كل الليل حاضني ومحتاج احد يحتويه ويداريه 

- الجهال لو تخافين مني جبانة 

باوعت بعيونة واني احاول ابعد الضحكة : لا مو هيج بس 

ابتسمت .. ما ادري حبيت انام يمهم . 

لزم وجهي : وجودج بركة بحياتي الله لا يحرمني منج 

باسني بكصتي وكال : لا تخافين مؤدب وملتزم ما اوسي شي ما يعجبج .

ابتسمت وكتله : وشغل اليوم لازم اروح مو مال اكعد

- اتأخرت .. يلا من تحتاجين شي خابريني 

- دا تتهرب 

- عوفي ما يفيدج يلا مع السلامة 

حجاها واخذ محفظته حطها بجيبه وشال موبايله وسويجة وسبحته وطلع . 

تنهدت .. شلون بالله لو ما رضى .. 

يربي شلون بلوة هاي .. 

ردت ارجع انام بس طارت النومة 

عاد كمت طفيت الثلاجة و المجمدة وترست جدرتين مي وحطيت بيهن ملح من فارن .. شلتهن وخليتهن وحدة بالفريز والثانية بالمجمدة وسديتهن على ما طلعت غراض الكاونتر .. نص الحدورة والسلالي والغراض ذبيتهن لان دهن ووصخات ومدهنات يلعبن النفس .. كلت عود اوصي حازم يجيب ونظفت الكاونتر لل١٢ اذن وطبو الجهال .. يلا حسيت على روحي تأخرت .. عاد كمت سويتلهم لفات تصبيرة و ذبيت تمن ومركة عدس .. وكملت الشغل ونظفت البيت ركض كبل لا يجي حازم .. 

ب٢ الا ربع اني خلصت .. وطفيت الغدا .. 

اريد اسبح ماكو 

حطيت بالغسالة مي وتايت وشغلتها وصعدت اخذت دشداشة رجالية من حازم مال بيت .. ونزلت سمعته طب ركضت للحمام لا انوب يجي يسلم لو يحضن واني ريحتي كلها عرك .. 

جكيت هدومي واني اسمعه يسأل ولده عني وهو بالمطبخ يفتح جدوره وهم يكلوله : فوك 

فتحت الباب شوية وصحت : علاوي 

طلعلي هو : ها شلونج 

رجعت ورا الباب : هلا بس هاك انطيها لواحد من الجهال يذبهن بالغسالة فدوة 

اخذهن من ايدي وهو يكول : شكاعد تسوين 

- بس اريد اسبح

تقرب وكال : تريدين مساعدة 

سديت الباب بوجهه كام يضحك .. سبحت بسرعة 

ولبست اتذكرت هدومي الجوا انطيتهن ويا الثوب .. لبست الدشداشة مالته وزلت الخاولي على جسمي ولامة روحي مستحية .. 

تلكاني سجاد : ها ههههههههه لابسة مال بابا لابسة مال بابا 

- خب اشششش شهرتني 

نزل هو من فوك لابس دشداشة مال بيت 

شافني كام يضحك كتله : والله ما عندي ملابس شسوي 

وكف يضحك من كل كلبه هم وولده 

كتلهم : والله انتم فلا تستحون مشيت للغسالة غاسلة الهدوم وواكفة .. شطفتهن وخليتهن بالنشافة .. 

طلع هو وكف وراي حضني من ورا .. وهمس : محلية هدومي ولج كون ما يشاركني بملابسي غيرج 

ابتسمت وهو كام يهمس ويحضن بجسمي : واني شلون احمل هالحسن كله 

- جهالك منا وخر 

- جا صعدي شوية شبيييج 

- احنا اتفقنا 

- عمي فوكانيات هسه ما اسويلج شي بس اصعديلي 

- لا حازم عليك الله وخر 

- هلكد يابسه من خرب يومج .. 

- وخر خل افوت 

- هسه لازمج اني فوتي 

- تخوف والله 

ضحك وفات .. عاد شريت ملابسي ع الشمس ودخلت صبيتلهم وفرشت جرجف وكعدنا نتغدا سويا .. حجيت : حازم عليك الله 

- شنو 

- بس اروح فدوة والله عيب من الدكتورة 

- عوفي هالموضوع لخاطري 

- خاطرك غالي بس والله هي معتمدة عليه اقلها ابلغها تشوفلها وحدة بمكاني ميصير اتركها هيج 

- عوفي هسه كتلج 

عقدت حاجبي : براحتك 

عفت الاكل وكمت صاح : كاعد نتغدا شنو معناتها كمتي 

- بالعافية 

عفته وطلعت ادورلي على مشط امشط هو خلص بسرعة وكام وراي : صبا ولو انعادت !؟ 

- بطلني 

- وعد ما تضوجين ولا تكولين ليش وبيش 

- وعد والله ما اكول 

تنهد : يلا كومي ميخالف 

- ابدل يعني 

- اي بدلي 

فزيت بسته بخده وركضت بدلت و رحتله مكمله .. صعد بالسيارة بهدوم البيت وصلاني وكال : ما اوصيج ترا المرة هاي عديتها المرة الجاية تصير مو زينة 

- ما تصير والله

- ديلا انزلي وديري بالج على نفسج 

ابتسمتلا ونزلت الوحله .. وصعدت ركض الساعة ٣ ونص حيل تأخرت .. امد ايدي جوا السندانة المفاتيح ما هو .. وين خليته .. ادور ماكو .. جريت السندانة هم ماكو 

.. ديلا بالله 

هسه وين الكاه 

وكفن اثنين مراجعات .. واني ادور حتى هن يدورن وياي 

اتذكرت امس اسعد هو الخذا المفاتيح و سداه .. اني شلون انطيته اله .. هسه بالله شسوي وحازم حذراني 

اخذت تليفوني وردت اخابر على حازم تراجعت 

يعني لو خابرت شراح يسوي يخابر اسعد يكله مفاتيح العيادة وين هسه يكول جا ليش هو يخابر ليش مو هي .. ويكوم يشك 

خابرت على اسعد .. 

رد بسرعة : الو خويا مسا الخير 

- هلا هلا يا مسى الورد والياسمين 

- امس سديت الباب من رحت المفاتيح ما جاي الاكي وين حطيته 

- فوك الباب 

- يا باب 

- الخشب بس مدي ايدج فوك 

باوعت ايدي ما توصل فوك الباب ما تنوش 

سديته بوجهه و رحت على ابو التحليلات صحتلا .. مد ولكاه 

انطانياه فتحت العيادة وسجلت المراجعات .. وكعدتهم 

ومسحت العيادة بسرعة دخلت الدكتورة واني امسح 

كالت : متأخرة اليوم 

- اي والله المفاتيح مخليته تحت السندانة ما لكيته طلع فوك الباب 

- ومنو حاطه فوك الباب خاف احد داخل العيادة 

- لا اني احتمال ونسيت بس ما اتذكر ما ادري عقلي وين صاير هالفترة 

- يلا ربع ساعة ارتاح ودخليلي المراجعين 

- تأمرين دكتورة

سجلت الاسماء والكارتات وحطيت ٤ اول ارقام ليكدام علمود ادخلهم .. واستمريت اكمل شغلي .. خابراني اسعد ما رديت عليه بعد 

كاعدة والبنية تسولف وياي 

انتبهت لمرة طبت بعباية باوعتلها ودرت ورجعت ركزت بيها (امل ) درت وجهي عنها كالت : مساء الخير 

- مساء النور 

- رايدتج بموضوع احاجيج 

-اعتذر اذا تريدين حجز انطيني ٢٥ واتفضلي اكعدي واذا ما عندج ما اكدر اخدمج بشي ثاني 

- ما راح اضايقج ولا راح اضرج برزقج 

باوعتلها .. تنهدت 

حبيبتي باا زحمة تكدرين تكعدين غاد 

كالت : اي ادللي 

مشكورة يعمري 

واشرت لامل تكعد اول ما كعدت كالت : اني جايتج وادري مالي وجه احجي وياج 

باوعتلها من غير أهتمام حجت : بس ضاكت بيه واجيتج والنساء للنساء مو هجي يكولون !؟ 

-شرايدة من عدي 

- ادري انت من ضيمج جلبتي بحازم وحاسة بيج وغلطت وياج واذيتج جثير بس ما تعرفين شكثر تاذيت اني وجهالي 

بچت 

- ومنو الاذاكم غيرج ؟ 

- اعرف اني الاذيت روحي واني الاذيت حازم وجهالي وهجمت بيتي بيدي ورايدة ارجع اعيد روحي 

- واني شنو بالموضوع 

-من يوم الطريتي بدرب حازم وحازم مو حازمنا الاولي 

جان لو سهيت ومشيت  يهتم هسه صار غيابي عده مثل الحضور ويمكن مرتاح اكثر بغيابي عبن انت سادة الوحشة عنه وملهية ايامه 

اني ادري واعرف بكلشي بينكم والشاهد الله وهاي اجتافاتي لابو فاضل الجان حجيت لو كلت لاحد عن الصار بينج وبينه بس الاترجاه منج وما طولج صغيرة وما عدج اليربطج بيه مثلي تهديلي الدرب وياه 

- اهدلج شلون 

-هالتشوفين حالنا جهالي بصفحة وهو بصفحة واني بصفحة وعلي ناوية اسد المحل بس ما ينسد بليلة ويوم ولو سلميته بيد احد اخسر بيه ملايين هالاريد اصفي على ايدي وجزت لا اريد شغل ولا اريد طلعة خية اريدن بيتي ورجلي وجهالي 

-اني ما هاجمة بيتج ويوم الاتهجمتي علي بالزيارة ما جان بيني وبين رجلج شي غير رجال يساعدني واتأمل بيه خير بس اسوايتج يم اخوي هي الخلتني اتعلك بيه وهو ينتفض يحاميلي 

-احلفنج بالعباس ابعدي من دربه 

اهلي دزوا عليه جثير ناس وهو شارط الا اعرف المحل وكتلهم اصفي شهر شهرين واكعد بس ما رضى يكلهم ما طولها تطلع وتطب ما تصيرلي مرة يوم التعرف شغلها ردوها وكتلج ليلة ويوم ما اكدر واني ذابه عليه ملايين وتعرفين هذا موسم صيف ومشترية بضاعة 

-لو ابتعدت هو ما راح يبتعد الموضوع ما عاد مثل اول 

-ادري بس مو لخاطري سويها لخاطر الجهال

بجت وكامت تمسح دموعها بعباتها : ادري غلطت وخسرت كلشي احلفج بالعباس ابو فاضل وصح اذيتج بس احسبيها لاله وخلي عائلة ترجع وتلت شملها واكسبي اجرها واجرج يم ربج شكبره . 

- وشلون اخلي يعوفني حازم وتعرفي... قاطعتني 

- انت تعرفين شلون تبعدينه وما تردين عليه كون هيج حسسي انت بعد ما تريدينه وعدج غيره ادري كاعد اطلب منج شي صعب بس اترجاج بروح اهلج بروح كل عزيز ميتلج 

تنهدت وكتلها : الله كريم ان شاءالله 

- تعوفينه وتبتعدين من دربه 

- راح ابعد اذا شفتج صدكي تريدينه وتريدين البيت مالي حق ادخل بينكم بس لو شفتج على حالج وبس تريدين تبعديني ويضل حازم هذا وضعه راح يتغير الموضوع 

- يا اكلها حتى المحل كرهته وام البنين لو طبيت اختنكت اكولن على هذا المحل خسرت بيتي وجهال امداها لابو خيره بس تعرفين موسم وذبيت بيه كومة ملايين مو مالت اخسر وانطلب 

ضلت تبجي وتتوسل ومشت 

اتعاطفت وياها وكسرت خاطري بدموعهاواعدتها راح ابتعد 

وصفنت ويا روحي .. الجهال محتاجين امهم خصوصا سجاد وهو يكول قبل المحل جانت زينة ونعم المرة يمكن من شافتني صحت على زمانها وكاعد تحاول تلحك الباقي من بيتها 

واني شتأمل 

المنحوس منحوس لو حطوا على راسه فانوس .. واني مالي حظ بكلشي ضلت على حازم صح يحبني ويخاف عليه .. بس مو صحيح ابني سعادتي على هجمان بيت ثاني . 

ذبيت حسرة 

وحازم احس تعودت عليه وعلى وجوده بحياتي وعلى اهتمامه .. هيج ارجع للصفر ويروح مني ... وارجع لوحدي ومحد بحالي ! 

ضليت سارحة بافكاري اجيب واودي 

خلصت ب٨ ونص وطلعت الدكتورة .. لملمت الاكدر عليه .. وقفلت العيادة ونزلت عبرت لذاك الصوب ركبت كيا وطلعت للبيت ، كبل لا اوصل .. خابر حازم 

رديت : الو 

- انزلي متانيج 

- راح اوصل للبيت 

- يا بيت ؟ 

- بيتي 

- واني ليش مالي خبر 

- والله حازم هذا الصار بعد ومالي خلك حساب وكتاب 

- شني حساب شني كتاب .. حضري روحج اجيج 

- ما راح اجي ومالي خلك احد رايدة ارتاح 

- وابيتي ما مرتاحة 

- لا ما مرتاحة يضل بيتك مو بيتي مالي مكان بيه 

- اسويلج مكان وهذا حقج باقرب وقت اشتريلج غرفة وانصبها 

- ما اريد رايده ارجع احلل ابدل ارتاح ما اسمعلي حس جهال ودوخة وهوسة 

- تضايقتي من جهالي 

- يلا اني بالطريق ما اكدر احجي اكثر بيباي 

- اوصلي ورمشيلي 

سديته ووصلت للبيت .. ذبيت عباتي وكعدت 

احس ثكلت متوني وبهتت روحي من اخذت قرار بروحي اعرفه واكرهه بنفسي واخلي يتركني .. بيش الهي روحي منه 

كمت مسحت البيت و المعرض مال التلفزيون والكاونتر .. ردت اسويلي شي بس احس الزاد ما اشتهي .. شغلت تلفزيون بالي مو ويا المسلسلة .. 

لفيت راسي دايخة حيل .. 

خابر هو ما رديت .. رجع خابر مرتين ما جاوبت 

جبرت نفسي ع النوم .. كعدت الصبح طلعت للسوك اتسوكت جراجف واقمشة حتى من ارجع ب٩ التهي بيهن لحد ما انام احسن ما اضل هيج . 

خابرني واني بالسوك اكثر من مرة .. لحد ما جاوبت 

كالي : اخابر عليج من امس ليش ما تجاوبييين 

- اني بالسوك 

- بالسوك شني احنا شحجينا شطلعااااج 

- اني طلعت محتاجك غراض للخياط وطلعت 

- وليش ما كتيلي 

- نسيت 

- صبا مو على بعضج البارحة جنتي شلونج .. شصاير 

- ما صاير شي بس هيج ضايجة 

- ضايجة منيش ؟ 

- هسه اني بالسوك اكعد احجيلك باي 

سديته كملت غراضي ورجعت ذبيت الغراض وفتت للحمام كبل.. كام يدك التليفون واني بالحمام 

خلصت سبح ورجع دك للمرة الثالثة 

فتحت خط : كل هذا سوك 

- لا رجعت 

- وليش ما خابرتي 

- دخلت للحمام الجو احتر عركت 

- صبا صاير شي وضعج ما مطمني 

- ما صاير شي بس احس اللي جاي نسوي غلط ولازم ينتهي 

- رحمة لوالديج لا تحسين وارحمينا من احاسيسج 

- عاد هذا اللي اشوفه حازم اللي نسوي غلط شنو بايتة ابيتك بالسر اجا احد كشفني شراح اسوي .. 

- احتمال ضغطت عليج وانت ما متعودة بيت وجهال وهوسة وبيت .. ميخالف ارتاحي حبيبي واذا تحبين اتعذري اليوم لا تداومين 

- ما اكدر لازم ابدل واجي للدوام 

- انظريني اخلص وامرلج 

- الله كريم 

- ديري بالج على نفسج روحي انت 

- ماشي 

تنهدت وسديته من عنده غمضت عيوني 

ما بودي ابعد منه رايده ابقى وياه واشبع بدلاله واهتمامه يربي ساعدني ودليني طريقي ... 

مشطت ولميت البيت .. 

وسويتلي مقليات بيتنجان وكبة تمن وزلاطة واخذتها وياي بعلاگة .. كملت وطلعت رمشلي واني جاي اطلع

لكيته واكفلي ليغاد مشيت عنه شوية لف السيارة وراي وصعدت وياه .. بس طلعنا المنطقة اخذ ايدي لزمها حيل وكرص خدي : شبيج ضايجة يبعد حيلي 

- ماكو شي 

-وتعلميني بوجهج حافظه اكثر من وجهي 

- حازم ما بيه شي كافي 

- يا بويه صايرة شنيكة ما تتحاجى 

يحقله الحلو يحقله .. 

الريحة طيبة كاعد تجي من علاكتج واني جوعان كلش 

- كبة تمن وزلاطة 

- سويلي لفة بروح ابيج 

- ما عندي صمون 

سكت من شاف فرن كباله نزل اشترى بخمسمية وصعد اطانياه حار حيل .. تنهدت كال : اوكفي خاف ضامته الج انت 

مجاوبته حجه وهو يمد ايده لوجهي : صباوتي .. شو باوعيلي شبيج 

- غير اسويلك يا حازم شنية 

- والله مو على بعض اكو شي مأذيج عليج العباس احجي وعلي ضل بالي 

- ما بيه شي 

انطيته اللفة باوعلي 

حجيت : اخذذذ 

اخذها من ايدي وكام ياكل سويتله الثانية وخليتها كدامه 

والباقي قليل سويتها لفة اليه ولفيتها بعلاكة الصمون وصلاني كالي : من تريدين ترجعين خابريني مااااشي 

نزلت صاح : سمعتيييي 

-ماشي 

رحت للعيادة كملت شغلي ونزلت اتمشيت ومريت للفرع مال عمي هو كاعد اباب محله ورجال كاعد بصفة لمحني من بعيد كام بسرعة وتبعني 

حجه : وين رايحة انت تعاااي 

- لصاحبتي 

- يا صاحبتج 

- وفاء حازم شبيييك 

- اخت اسعد او غيرها 

- اي هي 

- ارجعي ماكو فوته لبيتهم 

- مو بكيفك ولا جاية ماخذه رأيك رايده اروحلها متانيتني 

- تمشيني منا لا والعباس اسحلج كلت خطية ضايجة ومتكأبة خل اقدر بس مال تجفصين اكصج كص والله 

- انت ما كادر غير عليه شو روح من عندي 

- صبا امشي منا لا وهو دم الحسين اجرج بنص شارع عمج وافضج 

- حازم طلعت روحي من خنكتك اني بنية فالتو ومتعودة اطلع واطب ما ايريييدك افتهمتت ما اريدك 

لزمني من عباتي : امشي لج اعلمج الفالتووو 

- حازم عوووف 

- لا ما اعرف ما طول عمج هنا خل اخذح اله واحجيله كلشي 

- عازم عوف ايدي 

- امشي 

- حازم راح تفضحنييييي وخرررر 

- اذا ما رايدتني اجرج لعمج عدل وكبل للسيارة يلا وعلي لو ثانيتين تأخرتي هسه سحل اسحلج لعمج وافضح كلشي وغصبا ما على الكل احبسج ابيتي امشي يلا 

عفته ومشيت بسرعة وهو سبقني لسيارته فتحلي السيارة وطبك الباب وراي حيل .. صعد كتله : دا تسوي هالشي متعمد وانت تعرف هالفرع كله يعرفني ويعرف اني بت حجي راضي 

- اعلمج شلون تروحين وتطلعين وتتجاهلين كلامي 

-مالك كلام عليه البيناتنا عقد ولازم ينتهي 

حجه باستهزاء وهو يكول : شنووووه

-يعني اتطلكني 

-ليش انت محسبة الطلاك على كيفج 

-اي على كيفي واني ما اريدك جزعت 

- صبا احنا مو جهال وكلمة ما اريدك عيب تعيدينها كافي ترا تساهلت وياج لا تتمادين 

- لا يا عيني مسوي عليه فضل من متساهل وياي لا تتساهل طلك وروح 

- وشنو السبب حتى رايدة نتطلك !؟ 

- ما اريد احس الزواج كله قيود .. واني ممتعودة احد يقيدني 

- من هذا حالج هيج مو محد يقيدج محد بحالج 

- شلون ما كان اني راضية 

- صبا ياهي الاجت وكالتلي دربي بدونك صعب لا تعوفني ورديتلها وعقدت عليها شني تلعبين علي لو هو فندق ادخله وكت الما يضل عدي بيت واغادره وكت ما يعجبني .. سدي السيرة هاي ولا اتجيبين طاريها بعد 

- حازم من صدك اني رايدة الطلاك مو جذب 

اندار : صبا كلمة الطلاك لا تجيبينها على السانج عيييب 

- مو طلكت مرتك وهاي دايرة على حل شعرها اني شنو فرقي 

- الفرق اني رايدج 

- بس اني ما اريدك 

- ومن يمتى هالحجي وما تريديني 

- من اليوم .. اتركني وروح حازم رجع عائلتك واتصافى وياهم اني ما افيدك 

- مو انت التعرفين شنهو اليفيدني و شنهو الما يفيدني كافي واهدي وكفي مشاكل ترا والعباس تعبان 

- مشكلتك اني دا اكلك اختنكت مليييييت طلكني 

ييييييه شنو لزكة خو ما لزكة 

عقد حاجبه واندار : شنو صبا 

تتجاوزين 

سكتت 

حجه : تجاوزين علي ! ولج اني لزكة 

هاي تاليتها وياج صبا صرت لزكة وطافح على كلبج 

بسيطة بعيني لا اعلمج اللزكة منو 

بسيييييطة 

سكت والنار كامت تغلي جواه ما نطق اي حرف بعد ولا اني 

وصلاني البيت نزلت وهو شحط السيارة ومشى .. دخلت للبيت دمعت عيوني 

نزعت العباية والشال شمرتهن .. ودخلت للمطبخ كبل كاعد اطلع ماي من الثلاجة بس روحي كاشي مني وما طايقة نفسي جريت البطل من الشبچات شربت .. حسيت الباب انفتحت واني اشرب 

انداريت انفتح باب المطبخ فات حازم 

بسرعة فزيت : عزا العزاني شلون طبيت 

- منو اللزكة صبا 

- حازم رايد تفضحني اطلععععععع 

جرني من ايدي حيل : اني التلزكت بيج ولج 

- اااااي حازم وخر اييييدك .. 

اطلععععع 

- لو حاسبتني على كيفج علطانة وعلي .. 

احترمتج واحترم كلشي ردتي .. ردتي بالسرررر ورضيت 

ردتي ما نتقرب لبعض ورضيييييت ولج بوسة ما بستج واني محتررررررمج طايحة الحظ تالي تتجاووووووزين عليه 

- حازم بس اطلع لا يجي احد علييييك الله بس اطلعععع 

سحبني اله وطلعني بالغرفة وهو يكلي : كلشي كلتي وردتي احترمته و ما حاولت افرض شي عليج تاليتني اطلع اني المو خوش صبا

- اطلع اكلك شني هي كووووا 

اطلعععععع 

- ولو ما طلعت شتسوين 

- وتلومني من اكلك .. 

- سحبني حيل اله من ايدي : اي عيدي شتكولييين 

- انت اناني ما يهمك غير روحك 

- المفروض اصير هيج 

حجاها وكام نزع التيشيرت الاسود من راسه 

رجعت للحايط : شتريد 

- ما طولج خلفتي وياي كلشي وحاسبة هالزواج كلك .. واجبي اخلف وياج واعلمج شلون تتجاهليني ووتجاوزين علي

-حازم لو حاولت تتقرب مني والله اصرخ والم الناس كلها عليك 

اضطك وياي بالحايط عصرني : واني شرايد اني اتمناها من الله 

-حازم عليك الله . 

اوخر وادفع بيه ما يوخر .. شثكله علية 

كمت انزل بروحي من جوا وادفع وابعد بوجههي مني وهو يكلي : لا تحاولين ما طول قررت اخذ اللي اريده 

- دوخر مني هي شنيييي صدك لزكة ما جذبت وخررر 

انطاني مجال فلتت من الحايط بسرعة اريد اوخر 

حطلي رجله وكعت للكاع وهو نزلي : اعلمج اللزكة شلونها 

مجربتها لو حاجيلج عليها 

- حازم لو سويت شي واتجرأت عليه راح تشوف مني شي ما يعجبببببك والله 

جر ملابس من جوا وكام يعت بيهن وهو يكلي : هو اني رايد اشوفج وجهج الثاني يلا جربي 

- كووووم وخرررررر 

احجيها واجر بملابسي انزلهن 

عتهن مني ونزعهن من راسي .. 

كمت اصك بسنوني واكله : عود صايرلي زلمة وتتقوى عليييييه 

وخر مني ادب سز 

بس حجيتها سطرني راشدي وسحبني من راسي : لا اثيرين اعصابي ولج مو والله ما ارحمج منو الادبسز ولج .. منووو 

لزمت ايده من راسي اوخرها واكله : ااااااي شعري وخرررر 

عاف شعري ودنك لركبتي .. 

- حازم الباب مفتوح عليك الله لا وخر ابووووس ايدك 

وخر راسه مني وهمس : ليش تتجاوزين بس وخر عليك الله 

- كومي سدي الباب 

- عليك الله روح 

- والله التحلفين بيه ما اروح ورايد اللي براسي ومن حقي وشرع  الله ما من حقج اتمنعيني ابد

- بس احنا متفقين 

ابتعد وكعد وهو يجر ثوبي : سدي الباب قفليه بسرعة وارجعيلي 

سحبت الثوب لبسته وكمت طلعت الباب البرا ضربته سركي .. ودخلت للغرفة لكيته ديطفي الضو .. حجيت : انت من كل عقلي 

- اي من كل عقلي 

- حازم عليك الله لا 

- استعجلي يلا فرشي فراش .. 

- شفرش روح حازم الجيران من يشوفون سيارتك بالمنطقة شيكولون وتنعرف ما طولها غريبة 

- صفيتها بعيد واجيت .. افرشي 

- حازم كافي ترا طوختها والقرأن 

سحب المخدة وكعد عليها وهو يطلع باكيت الجكارة وحجة : امشي جيبيلي جداحة 

- حازم رايد فضيحتييي 

- جدااااااحة 

- عزا العزاني  صوووووتك يمعود الجيراااان 

- امشي جيبي 

ركضت جبت الجداحة مال الطباخ انطيتها اله 

وكعدت احجي اقنع يدخن ساكت وعينه بالتلزيون ما رد عليه ابد لحد ما خلص جكارته .. طفاها بحافة الحايط وجعصها 

فزيت : هي شني انوب توصصصصصخ 

فزيت شلتها ومشيت للمطبخ رجعت المنفضة بيدي حطيتها ع المعرض وكتله : شلون وياك هسه 

امدد دجليه بالبنطرون والفانيلة الداخلية وجاوب : - انت الجبتيها لروحج خذيتج لبيتي وكتلج اتظلين هنا انت الخالفتي 

- مااااا اريد كوووة 

- لا تريدين هالاجيتج 

حجاها ورد كال : انطيني تليفوني خلي اخابر 

- تخابر منو 

- خالتج .. اطيني 

مشيت اخذت التليفون من الكاع وكاعد انطي 

حط رجله ودفع رجلي تعثرت سحبني بحضنه : حازم كاااافي 

همس يم اذني : هششششش 

وهو ياخذ التليفون و يم ايده على بطني يثبتي بحضنه : دوخر شنية 

- بطلي تعتنتر 

- انت متخيل لو هيج واحد اجا بالصدفة جعفر احد خواتي ياهو الجان متخيل شيصير بينا 

باوع بوجهي من قريب وهو بعده قافل ايده على بطني همس : شيصير 

وباسني بخشمي 

: لا عليك الله حازم والقران ننفضح 

- واحنا مسوين جريمة ترا اثنينا كبار وعاقلين وافهمين ولا هذا اول زواج الج ولا هم مسؤلين عن عيشتج حتى يحقوج انت ليش هيج مضعضعة 

حجاها وكال : هششش

وهو يدوس اتصال كمت اريد اجر بيده .. ما وخر 

رد شكلت اذاني ويا اتصاله .. طلع كاعد يخابر الصانع ماله .. يرصي يقفل المحل ويخلي المفتاح عنده 

من سمعت الاتصال مو مهم وخرت ايده هو مركز بالاتصال وخر بسرعة وهو يكله ؛ لا كل لمحمد خلي الجهال يمك اليوم اني راح ابات برا 

اي اي .. عفية ابني يلا 

وكفت فرشت فراشي 

جودلية وحدة وهو يباوعلي .. 

حجيت : من تصير فوك ال١٢ والكل ينام اطلع 

كام من مكانه تراجعت : اسمع شوف اذا حاولت تتجرأ 

لطش نفسه بيه : شسوين 

- وخر 

- لا لا شو عاجبني خبالج وهوستج وحاب اعرف شسوين 

-ما اسوي بس وخر 

-بس اني عاجبني اسوي 

-حازم انت انطيتني كلمة 

-لا احنا اتفقنا وحطينا امور وكلنا هذا ممنوع وهذا مسموح 

-اي واني التزمت 

-شلتزمتي 

وهو يسحبني للدوشك : اااخ وخر 

-لا اتعبين نفسج الرايده ما اتراحج منه فانطينياه بمحبة ومشاعر حلوة احسن ما اخذ بدون محبة 

-بس اني التزمت 

-بشنو التزمتي 

حجاها وهو يحط وجهه ورا اذاني ويمد ايده يفتح القراصة ويفرش بشعري 

-حازم 

- بعد حيل حازم 

-عليك الله وخر 

-لخاطر الله التحلفيني بيه كافي اني هم رجال ومن حقي شقصرت وياج حتى تتمنعين 

-بس زواجنا اتفقنا بالسر 

-وهسه منو اليدريز

كام يزيد واني اتمنع واوخر صجت كمت ادفع بيه لزم اديه حيل : لو اتمنعتي تأذين روحج خليها برضاج بداعتي .. 

حجاها وهو يبوس بخدي وبحنچي 

غمضت عيني وسبلت اديه منه ما اتمنعت عرفت الموضوع اباله وما ناوي نتفق ولا بنيته مختلفين وما التزمت بس نفسه طالبه هالشي .. ما دامه حلال والله راضي  والوضعية كلها خربانة استسلمت وخضعت لرغبته .. 

هو طار من الفرح حسباله اني طاوعته 

راح لمني باحساس ولهفة واشتياق .. 

ابتعد مني .. اتسحبت بس عاكدة وجهي 

تغطه وشال ظهره سحب راسي باسني براسي ... دفعته : وخررر مني يلا 

- شلون ما تكونين احبج

لو مو ادفعين لو تكضيني وتكتليني هم على كلبي عسل منج 

كمت للحمام بسرعة .. 

غسل وسبحت .. واتذكرت ما جايبة هدوم .. 

اصيحله لو امشي كدامه بالخاولي شلون يربي .. 

لفيت الخاولي على جسمي 

ومشيت طكيت الباب وكتله : دير وجهك خل اخذ هدوم 

-  جنت غافي خر* بيومج بخبالج كعدتيني دفوتي 

-اندار 

-ديلا 

باوعته صدك اندار فتت منه ووكفت يم راسه الكنتور فتحته واخذت هدوم باوعت شايل راسه : استحي على روحك واندار يلا 

-ديلا عيني هستوج جنتي جواي مستحية مني ليش 

- شنو هاللغة شنو هالحجي ترا عيب حسن الفاظك 

- عمي جنتي وياي فضيها 

فضيتها 

- جا ما طولج خلصتي يلا تعاي 

- وين 

- اريد انام 

- وكبل شوية شصار انت شنو ترا طووووختها 

- انام قصدي اغمض عيني واغفى يا فاسدة يا ما تستحين 

- اي حقك اني ما استحي 

مشيت وكفت امشط .. وهو امدد على فراشي وماد ايده على كصته ويباوعلي .. لفيت شعري فتحلي اديه 

عبرته ونزلت دوشك ثاني وفرشته من الجهة الثانية 

ضحك .. كعدت ع الفراش حجيت : ليش مترجع امل عود ؟ 

- بكيفي 

- كاعد احجي وياك مثل الاوادم 

-واني شلون جاي احجي وياج مثل الصخووول 

- جاوب 

-من تجين بحضني نسولف 

-عوف كلاواتك هاي واحجي 

- هلو مرة طلكتها وانتهينا انت ياهو ماتج 

- وابتلي بخلفتك بالله ؟ 

باوعلي : لا اذا ما تكدرين لمداراتهم عادي اني اضل اداريهم ما عندي مشكلة 

- انت ملعب وفد واحد يتكلب ع الحبلين 

- هاااه وشلون 

- والله من باب تجبرني عليك وتغصبني لرغبتك حتى الزواج هذا يتم ومن باب شارط ما ترجع امل الا تكعد بالبيت بالله ليش تكعد حتى تكابلك واذا كابلتك اني شنو اكابل الحايط لو رايد تاخذ الغرفتين وتحطنا كبالك اثنينا وتعيش دول الحاج متولي 

- مفتهمت الرايدته شنو 

- رجعها لجهالها وخليها لمحلها المرة مو تريد محلها و جهالها وبيتها .. رجعها وانطيها التريده

وانت ظل اليه .. اذا معدتها من محلها اني شستفاد يومية اتشاعف وياها من الراس حتى احصلك ؟ لا عيني ما اريد هيج عيشة ما اريدها 

-ولو ضلت بمحلها ليش ارجعها وشنو فايدتها للجهال 

-اقلها تكعدهم للمدرسة تطلعهم ترجع الظهر تشوف ناقصتهم زايدتهم ترجع المغرب تكابلهم هي اذا ما موجودة منو يسوي ذني كلهن !؟ انت اللي من شغلك للمحل ما ترد غير تالي الليل ! 

-اذا موضوع الجهال مضايقج وما عندج اشكال برجعة امل ارجعها لخاطرج بس وضعنا اني وياج شلووون 

- وشبي وضعنا 

-اروح لعمج واكعد وياه كعدت زلم وافاتحة بالموضوع واذب السالفة يمه اكله تريد تسويها دموم بكيفك تعرفنا مو كليلين شر تريد تستر البنية وتمشي قسمتنا اتكفل الموضوع وخليني اخذنها من بيتك برضاك بدون شور اخوتها هم مو ذبوها عليك كولتن انا المسؤل عليها واني الازوجها الذباها ما يجي يتشرط عليك زوجتها لو اطيتها .. واحاجي واحط الحجي على ايده وافضها 

-وتعتقد جعفر يرضى 

- وعساه لا رضى بابا منو هو وبيش متفضل علينا حتى ندور رضاه 

-ولو سوالك مشاكل 

-دخلا يكوم .. غير احط رجلي بيه واشك حلكه . 

-بس بشرط 

-شنو هو 

-منعيش ابيتك ما دام ترجع امل فتصير يوم ابيتكم هناك ويوم هنا 

- واعيش ابيتج 

-انت دا تدفع اقساط اسعد عني بعد يا بيتي هاذ 

-اني اكعد ابيت مرة شمالني مخبل 

- وتكعدني ويا امل !

-هسه اني رجعتها وحضرتيلي المشاكل 

-اي معلية كعده وياها ما اكعد اني اريد ارتاح اكابل امل شبية جايزة من روحي 

-كلشي اتطلبينه الج وادللي بعد !؟ 

بس تعاي يمي 

-ما تسوي اي شي خارج القانون من هسه اكلك والا والله ما انام بفراشك 

ضحك بصوت عالي .. كمت وجفصت ابطنه واني اكله : صوووتك 

صرخ : اااااخ نعلعلا يومج 

-صوووتك دا اكلك هسه يبين احد عندي بالبيت والبيوت متطابكة 

-دتعاي واني اسكت 

تمددت بينه وبين الحايط حضني حيل واشتمني : من اروحن فدوة لهالريحة هاي .

كام يبوس بكصتي وضمني لگلبه 

دفعته : صدك تذكرت انت ضربتني راسي وخر 

صحك بصوت خفيف انداريت بفراشي وانطيته ظهري .. 

كام من مكانه التفتت : وين ؟ 

- جا مو ما تريديني 

كمت اراقب بيه واني دايره طك البنكة لل٥ ورجع سحب البطانية وحشك روحه وراي 

اطمنت وانداريت شال راسي مد ايده جواي 

وغطانا ببطانية وحدة وحط ايده على خصري .. عاد انداريت من مكاني وحشرت راسي بصدره وغفيت . 

بنص الخوف وخطر ومشاعر مختلطة 

بس سكنت وامنت روحي وارتاحت بوجوده 

تحص مكعب ناقص واكتمل بيه من يصير وياي .. 

على صوت المروحة المشغليها اول مرة غفينا والتلفزيون مفتوح 

وهو لامني بحضنه ومغركني بحنيته . 

الصبح كعدت على صوته وهو يحجي بالتليفون .. كاعد ياخذ اجازة ما يداوم .. كمت اتحرك بفراشي نهى اتصال وشمر التليفون ورجع حضني صار وجهي بركبته وراسه على شعري يبوس بيه .. 

من حس على انفاسي اني كاعدة ومغمضة 

كام يتحشك ويتطلب ورجع جدد رغباته وكمل اللي بداه بالليل .. الجو جان حلو مروحة مشتغلة وصوتها يدوخ وباردة وضوا طالع ومسدودة البردة ومتغطين .. خلقتله جو مناسب لرغباته .. 

رجع للمخده ونفسه عالي باوعلي مد وباسني بكصتي : اموت عليج وحق هو علي لا تكليلي طلكني اني ما عولت الكالي انسانة مثلج حلوة ومؤدبة وكلبي ذايب بيها ما اعوفج لو تريدين لو اكسرج ما اعوفج لاحد تضلين الي العمر كله واشك حلكه يفك حلكه وياج 

تغطيت وحشرت روحي بجسمه 

حضني حيل واخذ نفس قوي وهو مرجع ظهرة للكاع .. رفعت وجهي اباوع لملامحه لحيته حواجبه تفاحة ادم اللي ابلعومة .. صفنت بروحي شكد فاشلة وضعيفة كدامة .. عود سويتلي فعالية واتجاوزت وهوبزت حتى يعوفني شو تالي اخذني وتمم زواجنا ودار عقلي وخلاني حتى اقتنع وارضي يقربني .. جني ذيج الراحت تعارك حتى ترجع حق اختها رجعت حامل بتوم . 

اخذ الريموت وعلى التلفزيون 

جان طالعة اغنية (من الصبح لليل افكر اني بيك) لعلي حاتم 

رفعت راسي خليته على صدره واني اباوع للتلفزيون وهو لاف ايده عليه 

حجه : الاغنية الج 

شلت راسي باوعتله مبتسمة 

سحب راسي وباسني .. كمت من عنده وجريت ملابس ورحت للحمام سبحت .. وطلعت من الحمام لافة الخاولي على راسي .. وفتحت الثلاجة طلعت لحم و بصل وفلفل خليتهم ع الكاونتر وجريت التختة وكعدت احاول اخذ من اللحم المثروم الجامد 

فات هو حضني من ورا : يمكن هذا اجمل صباح عايشة بحياتي منين طلعتيلي منين الله جابج

هو يحجي واني احاول باللحم انتبه كال : عنج يروحي 

اخذ السجينة واني سحبت السحينة الثانية وكمت اثرم ووكفت اسوي الريوك .. 

هو يباوع بالمطبخ بالتفاصيل  : بيتج مثلج صح بسيط بس نظيف ومرتب وبيه روح حلوة تخليك ترتاح نفسيا . 

-تسبح 

-لا شسبح ملابس ما عندي واللابسهن تنجسن .. كمليلي الريوك حتى اطلع للبيت اسبح وابدل واروح لعمج 

-قبل لا ترجع امل لا تحاول ويا عمي لان ما راح اقبل 

-وشلون نبقى هيج 

-رجعها المرة تريد بيتها جهالها 

-عوفي هذا الموضوع صبا رحمة لوالديج 

- انت ما رايدها 

-دختولي هاي تمشي كلامها علي وترجع مثل ما طلعت لو تموت وما تبطل وترد ذاك الطاس وهذا الحمام ما اريدها

-بس اني اريدك والجهال يردوها 

اول متعرفت عليك كلت حجاية حلوة كبرت بعيني بيها 

كلت اذا اني شفت نفسي وهي شافت نفسها ذوله منو يضل الهم .. باوع حالك حازم هي عد اهلها وانت بايت هنا يمي تعرف الجهال وين وشنو شعورهم وديواجهون بالحياة وانت وياها كل واحد اختار حياته !؟ 

-ولو رجعتها راح تكابلها 

-اقلها عدهم ام بالبيت يجي المغرب يلتفون عليها ما يبقون صايعين ابيت جدهم وذيج عد خوالها مأمن وهي شابة وحلوة محد يتحرش بيها لو محد يحرف افكارها وغيرها الام ام حتى لو قصرت يبقى اقل شي منها كلش عظيم عد جهالها لان محتاجيها اكثر مما هم محتاجيك 

اني عشت يتم الام واني صغيرة وافتهم 

وعشت امور وتحرشات واني صغيرة وصعوبات ما تنحمل لان نا جانت عندي ام والاب ما يكدر يصير ام لو يحط روحه وياهم ميصير 

- الله كريم هسه دكملي وعود بعدين 

-خليها ابالك ما اخطي اي خطوة بدون ما انت تخطي ومتروح لعمي اذا مترجع امل 

-سهلة سهلة دكملي 

نصبتله صينية مخلمة وبيض سلك وجبن وكيمر ومربى وجاي وكعدنا نتريك اني وياه وما نحس الا الباب مالتنا تندك .. 

فزيت من مكاني : عزا العزاني يمه بس لا حيدر نزل اجاززززة يمممه  هيج وكت هو ينزل دخيلك ربيييييي .... يتبع 

__________

تكملة الرواية من هناااااااا 

لمتابعة باقي الروايه زورو قناتنا علي التليجرام من هناااااااااا

بدل ماتدور وتبحث علي الروايات عمل 

متابعه لصفحتنا على فيس بوك هنااااااااااا

الرواية كامله من هناااااااااا

مجمع الروايات الكامله 1اضغط هناااااااا

مجمع الروايات الكاملة 2 اضغط هنااااااا