رواية عاجر الفصل الثالث عشر 13بقلــم الكاتبـــة زينب ماجد (حصريه في مدونة قصر الروايات)

رواية عاجر الفصل الثالث عشر 13بقلــم الكاتبـــة زينب ماجد  (حصريه في مدونة قصر الروايات)

رواية عاجر الفصل الثالث عشر 13بقلــم الكاتبـــة زينب ماجد  (حصريه في مدونة قصر الروايات)

#عاجر 

{ بقلم الكاتبة زينب ماجد } 

الحلقة_١٣ 

دخل للبيت فتح باب المطبخ لكاني واكفة سداه وابتستم 

حجه : صرتي مرتي بحلال الله ورسوله 

هزيت راسي ودرت عنه حجه : يا ستار يا بووووويه مدلغمة !

شمالج 

- احس ممرتاحة 

- انا اغلامك يبوي شغلت المحاسيس 

- حازم كاعد احجي جديات مو مال ضحك ونصب 

- هسه وكت جد رحمة لوالديج مو فرحانين وتونا عاقدين مدلغمة ليش 

- فرحتيش هاي اللي بالسر 

- جا مو هذا اختيارج !؟ انا ردته بالعلن وانت الردتي بالسر وما خليته سر جبت الاثق بيهم من اخوتي خاطر يشهدولج باجر عكبة صار ما صار محد يتهمج لو يتهمني بزنا والعياذ بالله . 

- صار ما صار شنو انت متوقع شي !؟ 

- الدنيا كلشي بيها هسه مشينا بعقولنا وسوينا النريده مو التريده الناس ب غير نحسب حساب مو نهبش 

- ما ادري احس خايفة والموضوع مو تمام 

- اكص جدم الخوف لو كربلج يا بعد حيلي 

حجاها واجا ديفع ايدها يحضني .. اتسحبت 

: احنا اتفقنا الزواج يضل بس ورق 

- وشنهي شفتيني چكيت سحابة البنطرون لو دندنلت الحزام .. شبيج صبا 

- مو سويت اللي تريده خلي اروح 

- تروحين وين ؟ 

- ليش اروح وين انت شحاسب عقدنا هاهية اجي اعيش يمك 

- بس هدي اللبك يا بعد عيني كتلج وين ما كتلج ممنوع 

لا تحسبين اغصبج على شي ما طولج صرتي حلال الباقي فصلي على كيفج شلون ما تريدين رتبينا .. بعد 

- اني حسيت بهالزواج بس رايد تكسر عين جعفر جيف تعاركت وياه وزامطت الا ادوس عرضه .. 

- اني زامطت ادرس عرضه 

- يعني تكسر عينه 

- حتى كسرت عينه ما حجيتها يشهد العباس ولاهي ابالي اني ساعة الاغتاضيت منه ما دورتج بسر حتى اكسر عرضه كضيت روحي ورحت هديت عليه وكسرته اله .. 

وسالفتي وياج مالها خص بجعفر لا والله 

بس مرة رغبتها روحي واني زلمة اخاف الله وما اكدر اعوفج .. غير الصدك حلفت ما الي غرض بيج وهيج تعاركت ويا روحي حتى اكضها وما اميل لدربج بعد ومو بالكيف لكيت روحي ارجف واحاسبج من لابسة مو خوش ملابس .. 

بهيج حالة ما بقالي غير دربين 

يا نرضي الله ونعقد ونخلي العلاقة بينا بما يرضى الله ورسولة .. لو نرضي الناس ونضل ع الاتصال والحجي تالي الليل والله غاضب علينا .. ياهو الاهم رضا الله لو عباده ؟ 

- اثنينهم احنا بمجتمع..... قاطعني

- لا الله فوك الكل ومجتمعج هاذ الذباج وما دوراج ولا درى عنج شتاكلين وشتشربين وما فالح غير يعايرج بعاجر ومطلكة وانت ثكيلة عليهم هذا مجتمع ما يستحق اعصي الله لخاطره

نبي وهو نبي الله من استحى من الناس ومن العادات والتقاليد ربه من فوك غضب ودزله ايه ( تخشى الناس والله احق تخشاه )  

- حازم حجي الدين ما ياكل عد ناسنا السوينا عدهم جبيرة 

- وعند الله انا كفلت بنت يتيمة وما خليتها عرضة للشارع ولا لحاجة احد .. وهو وحده اليكفلني 

لزم اديه : ما طولج صرتي مرتي الخوف والهم ذبيهن على اجتافي وارتاحي انا احير بهمج 

يوم اليدرون اخوتج وتخافين لبدي بسدي وانا الامنعهم عنج وما اخليهم ياذوج .. عوفي التفكير وعوفي الوسواس وخلينا فرحانين ما طول الله جمعنا بخير . 

تنهدت وهو سحبني لحضنه .. 

جان اول تقارب بيناتنا وشعور كلش غريب ومختلف 

لاول مرة بعمري رجال يضمني لحضنه هيج ويحاول يطمني . 

دفنت راسي بحضنه وهو لامني بأديه .. رفع وجهي وباسني بكصتي : من اروح فدوة لهالعيون الكحيلة 

رجعني لصدره وحضني حيل وباسني بشعري 

اخذت نفس عميق وشعور كلش مريح ودافي 

بعدني وكال : ما طول عقدنا ورضينا نكعد نتفق على بعض الأمور الترضينا والما تعجبنا 

- شنو هن 

اخذ ايدي ومشى حجيت : جهالك وين 

- دنيا يم امها وعلي و سجاد يم اهلي

-هم خابروك على امل 

- هواي 

كعدي هنا 

كعدت : يردوك ترجعها !؟ 

- اي طبعا غير بت عمي واحنا اهل ورميت يمين الطلاك عليها محد يرضاها من كرابتنا بس اني ذبيت الفالة يم راس الكطان وريحت راسي خاطر لا كلساع يجون و يقنعون 

كتلهم اردها وعلى عيني وعلى راسي من فوك شرط تعزل محلها وتكعد بالبيت وتسكت باب الحوش ما توصله ما ارضى كالوا حك كتلهم توكلوا لو قنعت انتم بديكم جيبوها وشتفصلون اني راضي .. لهذا الكل ذب الصوج بيها ومحد كربلي 

- وتعتقد ترضى تسد محلها وترجع 

- خابراني اخوها كالي انت مو رايد تتزوج اتزوج يا اخي وخلي المرة لبيتها وجهالها ومحلها 

كتله ولو رايد اتزوج اخذ رايكم ترضولي لو لا 

بس اني ما ارضى مرة تشتغل وهذا الحجي مو بس الأمل .. والج هم 

- اني شنو !؟ 

- العباية حلينا موضوعها ما تنزع ولا ينلبس جواها بنطرون وضيك ولو طارت العباية انكشفت اعراضنا هالحجي انتهينا منه .. واتفقنا عليه 

-اي 

-تضل سالفة الطلعة 

- واني وين طالعة 

- الصدك مسويتها فالتوه بس ما عليج عتب جيف مجبورة واخوتج مو زلم ويكدرون يشيلون مسؤليتج بس سالفة تباتين ابيت غريب والله عد وفاء صاحبتي والله كلبت ابيتي سارة اتعشى وياها والله طلعت للسوك والله رحت لفلان يطلبني ممنوع وما ارضاها ابد 

بيت عمج اللي هم بيت عمج ممنوع منعا باتا تباتين عدهم تصلين مرة و العده زلم ولا تكولين مثل اخوتي بدنيانا هاي حتى الاخ جاي تزيح عينه على اخته والشيطان حاضر ويا الكل .. ما ارضى بغير بيتج .. تعاركتي صار ما صار اني اتكفلج ... مفهوم 

- مفهوم بس سالفة السوك شلون جا منو اليتسوكلي 

- اني اتسوك ومسواكج يوصلج جاهز سواء هالزواج جان بالسر او علن ويوصلج وياه مصرفج شكثر بالاسبوع يكفيج ٥٠ محتاجة اكثر اوديلج بس طلعة سوك وشغل ممنوع 

- حتى شغل ! 

- حتى شغل انت مرتي شمحتاجة من الشغل اكل شرب لبس زايدة ناقصة هاي مسؤليتي اني اوفرهن مو انت سالفة يومية اطرطرين بالعيادة وزلم طالعة وطابة ما ارضاها وهالتشوفين مرة طلكتها لهالسبب 

- بس الدكتورة ما اكدر اعوفها واساسا انطتني راتبي مال هذا الشهر شلون 

- اي رجعي 

- شرجع هو شضل منه !؟ لا عليك الله مو هيج 

- وشتسوين 

- وشلون التقيك لو ما اشتغلت ..

- الوكت اللي على اساس تكضي بالعيادة من ٢ للتسعة تجين تكضي ابيتي 

- بس احنا اتفقنا الزواج هذا يضل ورق وما يتحقق لحد ما الله يفرجها واهلي يرضون 

- يا ورق الاتفقنا عليه ما عاقد محكمة اني حتى ورق اتفقنا يضل سر وما طالبتج بحقوق زوجية وكتلج وراح اضل اكلج بكيفج وجيتج هنا ما غايتي منها هالامور بس شوفة عينج هذا بيت ينعاش بيه !؟ 

اني ما رايد منج غير تجين 

تنظفيلي البيت هدومي فراشي اكلتي الجهال لو كدرتي تساعديني بوضعهم 

- والجهال لو احو وشافوني بالبيت وحجو وامل راحت حجت لجعفر بهالحالة انفضحنا 

- اني كتلج هالامور لا تشيلين همها .. اني احيرن بيها وارتبها من تصير هوسة كل العليج تخابريني حازم تعال اجي اخذج والمشاكل وياي انت مالج بيها 

- بس الشغل وطلعت السوك يعني مو كلش حازم 

- هسه اكدر اتساهل وياج واكلج هالأسبوع تشتغلينه وتكعدين عمي راضي 

- مو الاسبوع اخلص الشهر 

- عمي اكضي الشهر بعد ؟ 

- والسوك 

- يا مصيبة السوك يابويه تحسينها طير وحطيته بقفص  متعلمة الا خوارة 

-لا والله بس لو كعدت اكيد ما راح اكعد بالبيت اصفن اني احب اخيط واحتاج شغلات وحتى لو مو خياطة مسواكك احتمال ما يعجبني اريد اتسوك على ايدي اشتريلي شي الي شنو يعني انت راح تعرف تشتريلي ملابس داخلية مثلا

- لا ذني مكدورلهن اجي اخذج واذبج بالسوم وما احب اخوارة السوك اتفق وياج بفلان وكت تكضين اجيج ارجعج 

- بس هيج راح تصير جياتك وروحاتك للبيت هواي 

-اعرف منين اخذج ومنين ارجعج 

لا تشيلين هم هالموضوع .. بعد 

صفنت احس بعد اريد احجي لان حسيت بشعور راح انحبس وضغوط زايدة بدت هو غير زواج سر وحتى ما نصل بعلاقة حرام بعد هاي المشاريع شنو بس ما كاعد اكدر اعبر عن المكنون لان لكلشي عنده جواب وما راح يقبل وما ادري ... 

جرني وهو يسحبني اله : بعد هكو شي بكلبج كلشي تريدينه كولي 

- لاااا 

- شو لا بخشم ملوي شنو الما راضيه بيه 

- احس هواي 

-شني هنه الهواي 

- ما ادري اكعد من الشغل و انت كلشي عليك ولو سالوني منين جبتي هالفلوس وهالمسواك 

-مو كتلج ساعات الشغل تجين تكضينهن يمي بالبيت 

- ولو سألو ... قاطعني 

- مو كلنا عوفي اللو وليش وشلون اني احيرن بيها 

- مو يعني ما ادري 

ضحك : هاي تالية الياخذ مرة طول عمرها معتمدة على روحها تعال اقنعها اكعدي ارتاحي تحس حتى الراحة فخ وشي مو مريح 

ابتسمت : اي بالعباس من لما جنت عد عدنان جنت احيرن بالمسواك والعيشة والشغل ويداين واحير شلون اوفي واجيبنها منا واسدنها منا وما جان يحاسبني اطلع سوك لو لبيوت الناس لو وين ما اروح المهم مكفيك البيت وكاعد اشتغل وانطي .. واخوتي اخس منه 

- وهالاجيت خاطر اكلج ارتاحي واني اشيلنهن عنج كلهن 

شو تعاي 

رجع ظهره للتخم واخذ راسي لصدره .. مد ايده لشعري لافته

سحب الشال من ركبتي وشمره وسحب القراصة ونزل شعري .. صار يلعب بشعري ويفرك راسي بأديه وهو مخليني على صدره 

غمضت عيوني على كثر الراحة الحسيت بيها 

حجيت : تصدك 

باوعتله : متزوجة كبل بس ولا مرة حضني هيج حتى ما جان .... قاطعني وهو يحط ايده على حلكي 

-امورج الخاصة ويا القديم لا تحجينها گبالي ابدي صفحة وياي جنج ما عايشة كبل ويا احد ما احب اسمع انت ويا غيري حتى لو قديم انسي الفات وخليج بيه 

رجعت راسي لصدره ( ماشي ) 

تنهد واني على صدره وكال : أسال الله ان يسهل امرنا واتضلين عدي طول العمر واحطج على صدري هيج وارتاح بيج . 

- ولو ما سهل امرنا !؟ 

- حبيبتي البومة سدي حلكج وفكينا منه . 

ضحكت ورفعت عيني اله : ضل شي ما شبهتني بيه فارة جريذي بريعصي وبومة وبعد ؟ 

- مو يكلج الحبك لاشاك بس انت ما تفتهمين 

- ما افتهم !؟ 

- لو تفتهمين جا هسه .... 

- اي ... لا احجيها كول 

- جا سألتيني جوعان متغدي رايد اسويلك شي 

- يا سودة عليه صدك والله جوعان اسويلك شي 

- والله جوعان بس مو للاكل 

- اي مو دريناها من الاول احنا 

ضحك بصوت عالي ، حجيت : وادري راح تضل تدك و تلوف حتى ..... 

- حتى شنو 

- اكوم اشوف شنو اسويلك اخيرلي

- مو جوعان بعلي بس ضلي عمي ما اريد شي نعلت ابوهم بس ابقي . 

رجعني لصدره ..

وحجه : اي هيج واحد ضميره يرتاح 

اخليج على كلبي وما افكر ها هالكلمة حرام اذبنها وها حرام اكضنها و ضال عايش ازمة ويا الضمير هسه لو احد حاجاج ما اكل للروح شعليج اهد وانتفض بحيلي .. حلالي 

يحجي واني راسي على صدره ويا كثر الراحة الحسيتها واني بين اديه .. ما ادري احنا غلط صح .. الادري حلال واحنا كلش مرتاحين . 

شوية وكومني من عنده 

كال : لو ضال الحال هيج اخرب روحي واخرب وياج 

-ليش ؟ 

-عوفي الليش كومي خلي اطلعج ما دامج حاسبة حسابج زيارة امشي نزور 

ضحكت : يلا 

بدلت وطلعنا وهاي جانت اول مرة بحياتي اكعد وياه بالصدر 

هو يسوق ومركز واني كاعد استذكر اللحظة 

هو اني صدك اتزوجته 

وصار رجال مسؤل عني 

وبعد ما احيد تالي الشهر منين اجيب ومنين اوفي 

ولا امشي بالشارع وعقلي شارد وافكر بعيشتي ويا عمي لو اني شكثر ثكل ع احدهم واستهضم من روحي وثكلها ع الناس .. 

صار عندي اللي يشيل حملي ومسؤليتي 

صار عندي الالتجئ له من احتار .. ويسد حاجتي من احتاج 

ما راح اعيش النقص بعد واجا اليكملني !؟ 

درت وجهي رايدة اصدك اللحظة الاني بيها 

باوعلي : ها يبعد حيلي جعتي 

ابتسمت : لا 

- جا تباوعيلي 

- انت حقيقي 

- لا جني .. شني لكفتي شمالج بويه 

- مو هيج قصدي شبيك قصدي راح تبقى الي واعيش وياك طول العمر 

- بإذن الله تعالى 

- ما راح يجبرنا شي نترك بعض لو نعوف بعض 

- لو مشيتي وياي على مايي ما راح اعوفج ولا اهد ايدي من ايدج وعوينة امه وابوه اليگربج 

- اتمنى وضعنا مو هيج وابقى وياك ما ارجع لا لبيتي ولا اروح لاي مكان اخلص العمر يمك

- وهيج الجاي ان شاءالله 

- ابالك شي 

- اشياء لا تدوخين بيها . 

حجاها وهو يمد ايده ياخذ ايدي ويشبك اصابيعي باصابيعه .. تنهدت 

وصلنا وهو صف سيارته بكراج 

كتله : جا لو جايبين الولد ويانا خطية بدال ما ظالين ابيت اهلك 

ابتسم : نوبة اللخ ان شاءالله

مشى كدامي واني امشي وراه 

وجان ابالي راح نمشي سويا ومرتاحين ومتونسين 

بس طلع الزلمة شاد تايرات برجليه .. واني كاضة عباتي واركض وراه .. 

ردته ياخذ ايدي ويلزمها حتى يمشي على مشيتي 

سشو هذا يكلي : جا بالشارع اكض ايدج شني ما عدنا بيت نا عدنا سيارة شافنا احد يعرفني ما يكول هذا شماله مستخف 

- جا مو تكول معلينا بحجي الناس 

- اي بس مو اكض ايدج بالشارع زحمة بويه 

- جا امشي على كيفك 

- واني راكض مو هالحاي امشي 

- يا حاي تمشي حاط تايرات تعبت 

ضحك وحاول يخفف بس شمرته هيج شوية ورد يمشي لطبيعته حرام لا باوعت منا ولا باوعت منا كضيتها اريد الحك بيه . 

وصلنا للامام ودخلنا سوية زرنا والتقينا بالصحن ردت اكعدلي شوية كال : تكعدين لو اخذج تتغدين 

- بس اقرا الزايرة واصلي 

كعد هو واني اصلي .. ضل يراقب بصلاتي 

عدلي ظهرج واستقيمي  وكبري يلا تركعين ما يصير هيج 

بابا افردي اديج من اتصلين لا تلميها 

قطعتها : حازم شنو رايك تحي تصلي بمكاني 

- اي مو صلاتج غلط 

ما يصير تكولين الله اكبر وانت بعدج ما مستقيمة 

لو تنطيها حقها لو لا تصليها 

- جا هي النية بالكلب 

- وياهو الحاجي بكلبج بس غير تنطيها حقها 

من توكفين للصلاة لازم كل عظمة بالجسم تاخذ مأخذها الصحيح لا تحركين ايدج منا ولا راسج منا هذا يسمى التسليم لله بالصلاة مو واكفة وتأشرين لو تباوعين لليمر لو راكضة بيها بعدج ما مخلصة ( سبحان ربي العظيم وبحمده ) رفعتي ظهرج بعدج ما مستقيمة نزلتي للسجود خو اركع واحجي الكلمة لله خالصة وبهدوء واكوم استقيم واكبر بوضوح .. حتى الله ما يقبلها من تركضين بالصلاة كباله هيج 

لو احد يحجي وياج بهالسرعة وبدون اهتمام هيج بس يريد يخلص منج ترضين ؟ 

ضليت ساكتة ومبتسمة 

حجه : لا السالفة ما بيها ضحك لو تصلين لله وانت تعرفين انت واكفة كدام منو وتنطين حق الصلاة لو لا تصلين هو ما ما محتاج صلاتنا .. احنا المحتاجيله مو هو محتاجنا فمن نصلي .. نصلي صلاة العبد المحتاج لربه،  لو كدامج رئيس لو مدير ورايده منه حاجة تعاملينه بهالطريقة اللي اتصلين بيها !؟ 

- هاي تأمر راح اصلي عدل بعد 

- عفية .. يلا عيدي 

كمت عدت الصلاة وركزت بيها 

وكعدت قريت الزيارة وهو لازم السبحة ويسبح بيها 

حجيت : نكوم 

باوعلي مرتاح ابتسم ولم السبحة بيده  : بكيفج .. اني كلي بكيفج شتريدين خادمج نكوم نكوم نضل نضل 

ضحكت ؛ ههههه لا حشاك حبيبي ونظر عيني مو خادم

- بعد حيلي واهله ، يلا گوملينا

كمنا وهو يكلي : شفتي شلون كلمة حبيبي شمحلاها وشمسهلها تطلع بالحلال 

ابتسمت ومشينا كعدنا بمطعم نزل النا كباب ولبن 

كملنا غدانا .. ورجعنا للسيارة ركبنا كال : هسه وين 

- الساعة ب ٦ المغرب بعدلي ثلث ساعات لازم ارجع للبيت 

- باجر انت دوام 

- اي سبت دوام طبعا 

- وشلون تجين 

- اركب واجي شيرادلها 

- ليش ما تنتظريني اكمل دوامي وامرلج 

- بيش تكمل دوامك ب١ ونص بالثنتين اني بالثنتين لازم بالعيادة وبعدين توصلني وترد على محلك انوب على بيتك تصير وياك هواي اني من راس الشارع اركب واجي 

- بس ما اوصيج صبا 

رقم غريب ما تردين وكائن من يكون يخابرج ما تردين بس اذا جانت مرة واذا رقم غريب ادزين رسالة منو اذا مرة تجاوبيها اذا زلمة تتعذرين ترا هالامور تأذيني ما ارضاها 

- ادلل 

- انت التدللين عليه عيوني انت 

ابتسمت وحرك السيارة ومشى .. وصلاني بالفروع قريب من بيتي .. وبقى يوصيني : ديري بالج على نفسج وموبايلج خلي قريب منج وعبري لا تتمشكلين ويا اخوتج يغلطون يحجون سايري لحد ما الله يفرجها 

-ان شاءالله 

-وها دينج ويا اسعد يمي ، لو خابراج ابد لا تجاوبين لو عرفت بيج مجاوبته تصير مو خوش 

- صار 

-يلا حبيبي مع السلامة وبحيل الله باجر اتسوكلج 

ابتسمت : الله وياك 

مشيت وهو بقى واكف انداريت .. اشرلي اكمل 

مشيت كملت ولفت لبيتي دار ومشى من كدام بابنا شافني دخلت راح 

فتحت باب الغرفة .. ياربي شكد مرتاحة 

فتحت التلفزيون حطيته على قناة اغانينا .. طالعة اغنية ( طلعت حرامية ) عليته وكمت اتمايل والم بالبيت وانظف وطايرة فوك .. 

طب حيدر كال : خير شني شو صوت التلفزيون لذاك الصوب شني كيولية 

- هيج اجا ابالي انظف واسمعلي شي انطرب عليه 

- شو فرحانة خير 

- جا ابجي 

- ما ادري شو احسج مو على بعضج صاير شي 

- شصاير يمعود ، متعشي اسويلك عشا ؟ 

- اي .. عدنا صمون 

- اثنين يكفنك 

- لا راح اروح اجيب بعد عندج خردة 

- اي 

اجيت لجيزداني اطيته الف 

كال : شكثر جاي تستلمين من الدكتورة 

- ٣٠٠ نصهن اطيهن لـ اسعد يضلي ١٥٠ 

-ها 

- شسويت على سالفة حسن 

- ما ادري بعد يم جعفر بلكت هذا الاسبوع تصير الكعدة ويعقدون 

- كتله ياجر ويطيني مهر مقدم 

- مهر مقدم شتسوين بيه 

- جا اريد اشتريلي ذهب نيشان اعدل روحي شني ماخذني فصلية 

- اكل لجعفر يكله عود .. 

مشى .. واني سويتله عشا 

رجع كعد يتعشى واني فرشت واتمددت وافكر 

احس الحياة اخذت لون ثاني .. وصارت تشع الوان 

انرسمت بكلبي گلوب .. كمت اكدر اخذ النفس براحة 

شيريد يصير حل يصير ما طولني حظيت بزلمة ابن اوادم يشيل مسؤليتي ويخاف عليه . 

ثاني يوم من الصبح 

كعدت من ٧ ونص رج التليفوني يمي 

رحت للمطبخ جاوبت كال : راح اطلع للدوام محتاجك شي

- لا يبعد عيوني ونظرها تروح بالسلامة 

- الله يسلمج بالجية اتسوكلج خوش 

- على راحتك ترا عندي مسواك 

- ميخالف 

مشى والنومة طارت من عيني .. 

ضل ابالي بيته هوسة وما مرتب وهو من هالزواج كله ما رايد غير بس انظفله واديرله بيته مبين هالموضوع ما مريحه لا طالبني بحق شرعي ولا جبرني بشي 

فكرت اروح لبيته وانظفه ما طوله ما موجود 

حيدر نايم صحت : حيدر راح اروحن للسوك محتاجة غراض 

كال : روحي 

واندار لف راسه 

لبست عباتي وطلعت لبيته 

ردت افتح الباب ما عرفت .. صحت جاهل وعبرته فوك البيت طفر وفتح الباب من جوا .. دخلت الباب الجوا مفتوح ما مسدود بس مطبوك .. 

اتفقدت البيت شحتاج 

ومشيت جبت تايت وزاهي ومزيل دهون وقاصر وفرجة مال كاع ومعطر واكو ابو مخضر وحاطلة عربانة دجاج اخذتلي دجاجة ذبحها وهلسها.. ورجعت للبيت .. شلت هدوم حازم كلهن بالغسالة وذبيت تايت وشغلت .. وشلت الزوالي من الكاع كلهن ولفيتهن برا بالحوش .. 

نظفت الدجاجة وككصتها وسويتها مركة حمرة وخليتها على نار ناصية وحطيت الماي ع النار للتمن ومشيت مديت الصوندة ورشيت البيت كله وجبتلي سطل ترسته تايت وقاصر وديتول عدهم بالبيت .. ورشيته بالبيت كله وزلمته بالفرجة مال الكاع كله فرجته .. ورجعت عليه بالماسحة انوب رشيت معطر ومسحت بالوصلة .. لكيت المي طاير نصه ذبيت التمن وخليته يسلك على ما رحت نشفت ملابس حازم وشريتهن .. رجعت بزلت التمن وطبكته بشعرية وبهارات .. 

وهدرته ومشيت اول ما صعدت لغرفة حازم 

كنتورهم نص هدوم امل بعدهن موجودات ما كضيتهن بس خليتهن بخانة وحد ولزم الكنتور كله صفطته ورتبت هدومه .. سمعت التليفون يدك 

نزلت اركض ، رديت عليه : الو 

- حيدر كاعد لو نايم المسواك شلون اوصله الج 

- اني مو بالبيت 

- ها صبا حا انا شحجيت  البارحة لخاطر لكعبة 

- دطي صبر اني ابيتك 

- ابيتي ! شسوين 

- عجبني اجي شني عدك مانع ؟ 

- اني العدي مانع .. جايج 

ابتسمت .. طلعت ايرد انزل شفت الفراشات بالترك مصفطات 

مشيت جريت حصيرتين .. فرشت الاولى صغيرة فرشت الثانية بغرفة حازم وشغلت المروحة بيها وفرشتله جودلية 

بس اتعجبت من شغلة 

هو يشتغل وهي تشتغل ليش محد منهم مشتري غرفة نوم 

غرفة نومهم كنتور و زاوية وميز تواليت وخشب عراقي قديم .. اذا هم اثنينهم يشتغلون وهو بدال الشغلتين تلاثة .. يداوم بالوزارة و عنده محل وكهربائي مال بيوت ... وايده خير

بيتهم مو مال واحد بيه اثنين يشتغلون ورزقهم خير من الله هوسة وقديم . 

كمت نزلت لغرفة الجهال مطلعين كواني الهدوم الصيفية بالكاع و بالكنتور هدوم شتوية هم عزلت الهدوم الشتوية عن الصيفية .. ضميت الشتوي وحطيته فوك الكنتور وكعدت ارتب بهدوم بملابسهم 

هم شفت مو هلكد اطفال امهم وابوهم يشتغلون 

المفروض ملابسهم تصير زينة وحلوة مو جرود ونصهن ملثكات خفت اذبهن ويستفقدون لو تصير حجاية شعليه.. بعدني جاي ارتب بملابسهم 

سمعت صوت الجهال طبوا البيت 

كمت من مكاني .. طلعت فات هو كال : يا الله شنو هالريحة الطيبة اخ يابويه جعت 

واني مبتسمتله يحجيها وعلاوي اجا مد ايده يسلم بدون صوت : هلا حبيبي 

شلونكم بالمدرسة 

- زينين 

حجيت وهو يتفقد الجدورة : جانوا ابيت جدهم 

- اي 

سد الجدوره واجاني : خل اسلم عليج بالاول 

وفتحلي اديه استحيت اتلكاه كدام جهاله مديت ايدي وسلمت ضحك وباس راسي 

سجاد الصغير فرحان ويضحك بس علاوي يباوع ومستغرب وحازم يكول : شمسوية شعاملة شدخلاج البيت 

- بواكة محترفة لا تخاف عليّ 

ضحك : ما تبوكينا اني وجهالي رحمة لوالديج 

- اضمكم بگلبي .. بدلوا حتى اصبلكم تأخرت على العيادة 

- لا اتاخرتي ولا هم يحزنون نكضي الغدا واخذج 

- خو ارتاح واني اروح 

- ويا راحة الارتاحها وانت تروحين وحدج ارتاح من احطج بيدي بويه .. يلا صبي على ما اصعد ابدل 

- ان شاءالله 

صعد واني رحت ويا الجهال لغرفتهم طلعتلهم اتراكسودات بيجامة وقميص يتشابهن مو بجامة شكل وقميص شكل وعزلت البعدني ممكمله تصفيطه على صفحة ومشيت شيفت زلاطة وصبيت .. 

نزل هو : يبعد حيلي وكلبه تعباج البيت بالتنظيف اليوم مو

- اني اكثر وحدة تتونس بالتظيف ما اتعب 

اذا صجت وردت ارتاح اكوم اطلعلي شغل من جوا الكاع واشتغل .. اكعد يلا حتى نتغدا بس بالاول خل اجيبلي شي نكعد عليه خوما بالكاع بيها لسعة برودة 

- جيبي الفراش نفسه 

- لا وصخ شنيه 

رحت جبتلي جرجف فرشته وجبت مخده لحازم ذبيته وكتله : اكعد هنا 

اجا باس راسي وكالي : يصير لو تضلين لا تردين ولا تطلعين لشغل 

- جهالك منا يمعود دكعد 

ضحك هو يكللهم : مو صحيح لو تبقى تعيش ويانا 

سجاد : اي عليج الله عليج الله ابقي 

علاوي مبتسم بس ميحجي مستغرب الوضع 

حطيت حصة دجاج كدام كل واحد منهم وكتلهم : اكلو وادللو 

سجاد عنده فرط حركه يسولف هواي ويكوم ونص غداه سوالف وحجي كتله ؛ شو اكعد ابو السان صل بس العوادين 

كمت اوكل بيه بيدي وافلس له وحازم ياكل ويكلي : رحم الله امج وابوج على هذا الأكل الطيب 

- الف عافية عيوني ، هدومك كلهن غسلتهن بعد بس هدوم الجهال ما لحكت 

- سهلة اني اغسلهن عود 

- لا يا شتغسل .. اني غير مرة اجيهن واغسلهن بس استعجل فدوة ولو كاعد تاكل العيادة الساعة ٢ وعشرة 

- يلا هاي كملت . 

خلصت الماعون لسجاد شبع 

جريته للمغسلة غسلتله وغسلت اديه ووجهي .. 

ما نزعت الشال كدام حازم واولاده موجودين خاف يستغربون او يحجون .

خضيت الصينية الاكلوا بيها واني واكفة ع السريع وهو صعد يبدل .. نزل وهو يكول : حتى الملابس مصفطتهن رحم الله والديج 

- لو بيدي اكثر بس هذا الاكدر عليه 

اخذ اديه وباسهن : اروحلج فدوة 

- اسم الله على روحك .. يلا تأخرت 

- يلا 

لفيت حجابي وجريت عباتي وهو يوصي بولده  يكعدون ع التلفزيون لحد ما يرجع .. طلعنا حجيت : حازم صدك ليش ما عدكم غرفة نوم زينة جرباية ترتيب مو دواشك وهيج وانت تشتغل وحتى امل جانت تشتغل 

- والله يابويه ما ادير هاي الامور ما اعرفلها وعلي .. والبيت صارلنا سنة مسوينه فندق نجي انام بيه ونطلع الصبح ومحد يدري عن الاخر حتى ندري عن البيت لو نشتري فد شي 

غير المفروض هي 

- ما لحكت انظف هواي امور 

الكاونتر الثلاجة المجدة خو صايرة حل وشد 

- لا اتعبين روحج بيهن 

- شيعتبن يمعود اني بس اكول اذا هي مستقتلة ع الشغل الفلوس وين كاعد توديهن اذا قنفاتكم قديمة غرفتكم قديمة اثاثكم مو شي .. 

ما اقارن بس اشوف روحي من استلم فلوس 

احير اجيبلي سندانة لو دانتيل اسوي للتلفزيون ومخدات .. 

واحير شجيب للبيت سلات دواسات خلاط امور .. 

انتم حتى الدواشك جراجفهن راكدات وقديمات 

- التحسين محتاجات تغيير كليلي يعني هاي المخدات والجراجف وهالامور وشكد تحتاجين فلوس كليلي 

- ينرادلهن كعدة مو هيج ادخل ع الماشي 

- حاولي يعني اذا شفتي شي يحتاج ترتيب كولي 

- استقبالك اول شي اذا تريد ذبلك مليونين تلاثة واشتريلك تخم جديد وميز تلفزيون جديد بردات جدد .. اكو بعد احد حاط معرض خشب من الحايط للحايط ابيته .. كلش قديم 

- من يصير عدج وقت لو اجازتج الثلاثاء عاونيني ونروح نجيبهن اني اكيف بس ما افتهم بيهن والله . 

- ان شاءالله 

وصلاني ورجع .. 

هم نظفت العيادة وكعدت اسجل مراجعين خابرتني وفاء 

كالتلي : اكلج انت وين 

- بالعيادة 

- ما تكدرين تمريلي 

- لا والله كولي 

- اسمعي اريدج تخابرني على حسن 

- وشعدي اخابره 

- اريدج تخابرينه وترزلينه وتغلطين عليه كون رزالة غسل ولبس 

- ليش ؟ 

- احسن حتى يتربى اني هسه رزلته ونعل ابو ابو وانتم لا تقصرين 

- ما اريد وفاء خل يولي لزكة وما عنده كرامة من مرة ترزله يكوم يضحك يحس عبالك تعازله مو ترزله 

- جا اطيج رقم امه خابريها واغلطي عليها ورزليها 

- وامه ياهو مالتها المرة ارزلها واغلط عليه. 

- اكلج شني انت رايدته احجي بعد ليش الجذب 

حتى اذا رايدته بالعافية ما يعز عليج ترا 

- ومن حوره هو ويعز انت شبيج هو هاذ هم وجه واحد تكلبه بس اروح ارزل المرة ليش اني حتى رقمها ما اعرفنه 

- حتى تفك ومرته تدري وتصيرله هوسة ويفك منج والله بعد ولا يكرب 

- دوديلي رقم امه 

- ديلا بس مو تنسين 

رجعت دزتلي رقم ام حسن ومرته 

عاد اني هم عربانة وبس كالتلي هيج رحت اربد واخابر على ام حسن ، ردت كتلها : الو مرحبا ام حسن 

- هلا ومرحبا منهي ؟ 

-اني صبا الخاطبها حسن 

- حسن خاطب يمتى هالحجي 

- الحجي كدامكم ورا ظهوركم ما ادري عنه بس خاله اني ابنج لا اريده ولا اواطي واخوتي منطينه كلمة وموافقين منهم وعاصبيني واني هواي بغير درب واعتقد تفتهمين رطني .. ابنج اني لا بهواي ولا اتحمل اشوف وجهه مو ارضى بيه فاذا عدكم ذرة كرامة .. اتبعدين ابنج عني خالة مالي خلك مشاكل ويا اخوتي 

ما خليتها تحجي وسديته ورجعت خابرت مرته 

ردت الو 

: الو خية شني عيونج غافلات نايمات وين راسج 

- ياهي انت 

- اني المرة الخاطبها رجلج وما رايدته 

ردي رجلج عني شني زور لو كوة ما اريدنه وهو راسح لاخوتي ماخذ منهم كلمه ورايدين يجبروني عليه حجي هذا

- يعععععع حسن رايد يخطب علييييه 

- يا صخونة امي كون على كولة ذاك البالي .. جا خية ما تدرين برجلج من يتمعشك ويتخطب  فالحة بس باليععععع 

حيتها وما خليتها تفرغ اعصابها 

سديت الخط بسرعة عليمن اخسر رصيد واسمعلهم يحجون 

حجيت الاريده ويطبهم طوب . 

لهناك خابرتني وفاء : ها شسويتي 

حجيتلها كالت : خايبة من اروح سبع فدوات غير بعشر زلم لا والله شو الزلم تروحلج فدوة خبطتيها عليه 

- طبعا شعبالج يمعودة طكيت منه لا يستحي ولا ينرد هسه اكله ما اريدك شني من لزكة امداج وامدا حظج علكتي روحج اسنين بهااااااذ 

- حظي بعد بس لا لا اعوض الجاي وربج بس صبر 

- ها لازم لاكيتلج عوض 

- ان شاءالله نلكى ليش ما نلكى الف واحد يتمناني 

- اي هيج صيري كاضتلي بذيال حسن المحفر شبيج يحظي 

لا جسم ونكول والله عضلات مفتولة لا وجه ونكول وجهه يرد الروح لا شخصية متكليلي على يا مال حبيتي يمصخمة 

- ههههههه شكد مشتاقة لسوالفج عليج الله مريلي ضلي يمي ضايجة 

- لا خية ما اكدر 

- جا بس مري 

- لا والله مناك البيت 

- هسه البيت طاير دمري نتعشا سوا ونباوع ميرنا وخليل هسه بادي هم مهند بس بغير دور يموت اخذها بالسر عن اهلها كلش حلو 

- اخذها بالسر 

- اي ولج ما رضولها تاخذها خذته وطفرت بيه 

ااااالله حلو الزواج البالسر كله بوس وحضن

- واني شمدريني 

- جا هسه لو نلكالنا واحد نتسرسر وياه 

- يا نلكالنا شني معوزة خية 

- هههههههههه شبيج المسلسلة تسوي واهس 

- ها .. اي عود من ارجع اباوعه بالبيت 

- دمري ونباوعه سوا شلون خليل مزين هالمرة ولج ياخذ الروح مري خلي نباوعة 

- لا والله ما اكدر حيدر كام يحجي ذاك اليوم 

غير مرة 

- ديلا براحتج 

صفنت صدفة هي لو شنو !؟ 

ما ادري ... 

كملت شغلي .. خابراني حازم 

نزلتله كال : مسواكج من الظهر بالصندوك خاس تلكينه 

- لا الجو مو حار ما عليه شي 

- باجر جهزي روحج اخذج للسوك 

- شوكت 

-العصر 

- العصر عدي شغل ليش شنسوي 

- اخذلج حلقة اني ما عرف بهالامور بس اتذكرت غير اشتريلج اقلها حلقة ذهب تحطينها جا هيج عقد 

- شلبس حلقة شبيك شكل لليسالني 

مفلفلة لو بنفسي رجل لو متزوجك بالسر دعوفها 

- هسه يابويه لا تاخذين حلقة اخذيلج قطعة ذهب مال عقد حطي بيدج 

ابتسمت : هي العدها منجم ذهب شتسوي بالقطعة 

ابتسم : ميخالف بويه حكج هذا 

هو المفروض نيشان كامل بس بعد 

- سهلة خليها ع الثلاثاء اذا تكدر خاطر بيوم عطلتي 

- على راحتج 

وصلاني ونزلت علاكات المسواك كلهن وراح واني صحتي ولد صبي من الشارع عاوني وشلت المسواك للبيت وكعدت اعزل بيه  ما مخلي شي ما متسوكه وجايبه لحم دجاج مخضر حتى البهارات 

هو معدل بس محتاج مرة تعدل تفاصيله 

دخلت .. حطيت التلفزيون على ام بي سي فور .. 

طالعة ميرنا وخليل صدك الممثل مال مهند .. عفته ورحت اريد اشتغل شو احس ظهري واكف حيل ماذيني 

عزلته شلون ما جان ورحت تمددت ظهري موتاني من الالم تخذتلي حبايتي مسكن الم .. ولفيت راسي اجا حيدر كال : جا شني ما مسوية عشا 

كتله : اكليك طماطة 

- طماطة شني سويلي حميسة شغلة الم كلبي 

انت هم طبخي سويلج كبة كباب شني نكضيها طماطة وبيتنجان 

- والمن اسوي شو اني بس اتريك هنا غداي وعشاي غاد 

- جا واتحسبين بس نفسج ما تكولين وادم عايشة وياج

- هسه شسويلك 

- ما عدج لحم 

-اللحم رايدة اسوي دولمة .. 

- اتسوين دولة وتاخذينها غاد تتشيمين شوفو طبخي واني هنا شاكل 

- اعزلك منها عود 

- وهسه 

تنهدت وكمت طلعت شوية من اللحم المثروم وسويته اله بس حتى افتك من السانه .. واخذت بس كلاص الجاي وكعدت بفراشي ظهري ماذيني . 

دز رسالة حازم : رحم الله والديج اليوم نايم ومرتاح مكان نظيف فراش نظيف يمتى الله يمن عليه ويحطج ابيتي 

كاعد اريد اكتبله 

حجه حيدر : عدج رصيد 

- لا ليش 

- بله اطيني 

- شطيك

-  تليفونج 

- وليش حتى تشوف رصيدي 

دطيني لزمت وحذفت رسالة حازم كلهن واني احجي والعثم .. كتله : دروح والله ما اطيك 

كاملي واني احذف 

جراه : شجاي تحذفين 

- شحذف دوووخر 

-جيبي كااااعد اكلج 

جراه طب للرسايل رجع طب للمكالمات .. 

حازم ابو الانشائية مخابرج اليوم بالليل شعدج وياه ولج 

- حيدر الزلمة يطلبني بكد شعر راسي وخابرني يريد دينه 

-خابري 

- الساعة ١٢ شخابره 

- خابري هسه 

- حيدر لا تحرجني وياه رحمة لاهلك كافي ترا طكت روحي والعباس شنييييه 

- مخابرج عليمن 

هاي الصبح هم مخابرج هم على دين انت جاي تلعبين علي شني 

- خابرني الصبح اني بالسوك ما سمعته رجع خابرني بالليل مريت انطيت ومشيت 

- خب مبينه جاي اتجذبين وجهج يطي الوان احجي شعدج وياه . 

كمت احجي واكله : ما عدي شني كافي مني هسه زلمة ما عدي وياه شي كافييييي مني مو تريد تنطيني لحسن اطيني وخلصني بس رايديلكم حجه علي 

كام حول رصيد من جهازي لجهازه وكال : التليفون يضل يمي بالليل بعد وخل اشوف شلون ما عدج شي وياه 

- اخذه

كلتها بس كلبي دك ورجف من الخوف 

ما خليت ال١٤ معصومين كلهم جبتهم وحطيتهم واتنخى وانذر بس كون حازم لا يخابر ولا ولا يدز 

لفيت راسي وسويت نفسي ما مهتمة وما عندي شي 

بس جنت احسب حساب اليوم جنازتي لو دره حازم عده شي وياي حرام لا يحط طلقة براسي ويخلص مني 

لحد ما مر الوكت ونام .. 

ردت اسحب التليفون من يم راسه خفت لا يفز ويعرف عندي شي ذبيتها على الله وابو الحسن علي اليكفيني هالمشكلة هاي 

لوجه الفجر يلا كعدت .. هو نايم يشخر غاط 

جريت التليفون ودزيت رسالة لحازم ( لا تدز رسالة ولا تخابر ابد حيدر سحب التليفون مني وهسه بايكته وكاعد ادزلك رسالة منه لا تجاوب على هاي الرسالة ) 

كمت افتش بالجهاز .. 

فردشته ما خليت عليه شي 

ورجعته يم راسه .. ورجعت نمت للظهر ب١٢ كعدت صليت ورتبت مسواك البارحة زين ولفيت دولمة ع السريع وذبيتها ع  النار ورحت لميت البيت وغسلت الكراج وسبحت وطلعت جريت الكحل وحمرة خفيفة ولفيت حجابي وطفيت الجدر .. 

صحت : حيدر راح اروح للشغل اطيني التليفون 

- ما اطي روحي 

اندار يغطي بروحه 

- هي شنيه حيدر شغلي وحجز الدكتورة كله على خطي دطيني يا عيني وسويتلك شلون دولمة عليك الله دكوم 

- ترجعين تطينياه 

- بعيني اخذه الك بس اكضي شغلي 

- واراقبه حتى لو تحذفين اعرف ترا 

- بعيني 

خذيته وحطيتله ماعون دولمة واخذت الجدر بالخاولي شايلته واريد اطلع .. هستوني مشيت من الفرع الساعة ثنتين ونص تأخرت .. اندك هورن وراي 

باوعته حازم 

باوعت لبابنا من الفرع مسدود 

صعدت بسرعة ، حجه : شصار امس كون طكاج 

- ما طكاني بس راح نص حيلي من الهبطة 

- شصار 

- حول رصيدي لرصيده وكعد يراقبني 

- خب هذا هسه هم زلمة ونخاف منه ونضم زواجنا ترا بالقران قهر اني وياج هذا حالنا وهم واحدهم قندره ما يسوى يبوك برصيدج زلمتيش هذا

- بعد حظي 

كض ايدي : لا تنقهرين يبعد حيلي 

احنا هم لازم ناخذ حذرنا بعد من ترجعين صفي تليفونج وما اخابرج الا ترمشيلي 

ولو ط... اني هم عجبني دور زواج السر وكاعد ادورلي خطط للتعامل .. بس شسوي غير انت الحاطتلي قدر لناس لجوا رجلي ما احطهم مو احسبهم اهل وانطر رضاهم 

- بعد محسوبين عليه 

- شمحسوبين انت .. الاهل ام اب جد 

الاخوة شرعا ما محسوبين ولي امر حتى تنتظرين رضاهم 

- هاي شرعا اما عرفا هم اخوتي من اخالفهم اطلع مو خوش 

- وهم الخوش 

- وياهو اليهتم هم خوش لو لا الناس ما تباوع لاغلاط الزلم ما عدها غير الزلمة ما ينعاب واحنا المو خوش بكلشي . 

- الله كريم ، هسه احجيلي شنو هالريحة الطيبة 

شمسوية 

- جدر دولمة بس ع السريع ما ادري طيبة ما ادري لا دولمة المستعجل 

- غير ريحتها تجيب التايه بروح ابوج اخذ وحدة ميت جوع 

شلتله جدر ناوشته واخذ وحده 

وجه وملامحه كلها تفرح بالاكل الطيب 

شكد ما رجال وخوش زلمة بس ما ادري ليش احسه طفل بهالحالة يفرح بأكله طيبة ..

وصلاني .. 

وانطيته جدر الدولمة يتغدا بيه هو والجهال .. 

وكضيت وكتي بالشغل .. من ردت ارجع صفيت تليفوني ورجعت كبل لا انزل .. حازم كال : هاج 

باوعت ورقتين حمر : شتي هاي 

- مصرفج مال الاسبوع 

- بس ما محتاجته باقي عندي من الراتب مالي 

- واني ياهو مالتي بالعدج بالعافية عليج هذا مصرفج مني .. اجمعي لان هذا اخر شهر تشتغلين . 

- مشكور 

نزلت .. 

فتت للبيت اباوع للفلوس 

تنهدت .. الواحد ببداله واني حلاله جان دور ختلات جبرني حتى لو بوسه بالغصب بس حازم احترم قراري وما حاول يضايقني ابد .. 

جنت خايفة الزواج هذا رايد يكسر عين جعفر بيه 

بس هو حتى ما حاول يبوسني حتى يكول يكربني ويكسر عين اخوي بهيج امور .. هو بس كاعد يشيلني ويلمني ويساعدني . 

حبيته وكبر بعيني زايد 

لان زلمة ما تسيره شهواته .. عقلاني حيل ويحبني بجنون وعقل لدرجة اتزوجني بالسر واحترم اني ما رايدة تقارب وحط روحه بوضع لو انفضح يتأذى عشائريا هواي .. بس ما مهتم غير اني اصيرن اله رغم ما مستفاد مني شي غير اطبخله وشغلات خفيفة . 

رجع حيدر كام يشمر علي واخذ التليفون 

عفته ما اهتميتلا يوم يومين جر عدل وما كام يطلب تليفوني بس اني حذره كلش 

سالفة حسن انلاصت وحسن بعد لا رد خبر لاخوتي ولا حجاية وعمي خابر جعفر وجعفر خابراه وحسن .. ما راد على جعفر مغلس 

لحد ما مرة .. جنت اني بالعيادة خابراني حسن وما رديت 

اجاني واحد كال : اكو واحد طالبج جوا رايدج 

توقعت حازم جوا وما خابراني خاطر انزله

لكيته حسن كتله : خير شكو 

- رايد احاجيج على انفراد 

- ما عدي شي ينحجي وياك على انفراد اعذرني 

- ما اطول بس كلمتين 

- ما اريد اعتذر 

جاي اريد اصعد .. صد اسعد بوجهي : هذا شرايد منج 

- لزكة شرايد تكول علج امطه اريد اوخره وبعده لاطش 

حجيتها وصعدت 

وسمعت العرك والصياح حسن واسعد جوا ..

بس حسن ماخذ سيارته وشارد ما متواجه ويا اسعد .. 

كايم اسعد صعدلي للعيادة كال : هذا شرايد منج الخنيث 

- لزكة يمعود .. بس اتمنى ما تتصايح وتسوي مشاكل بمكان شغلي 

- لا جا اني لو اريد اكضنه ادافر وياه بس احترمت مكان شغلج شلونج بالشغل مرتاحة 

- الحمدلله 

- اذا تحتاجين شي لا تترددين تخابرين عيوني اثنينهن اشلعهن واطيجياهن

يحجي وحازم خابر حتى انزل 

زين شلون انزل واسعد وراي والله لا يكلب الدنيا 

حجيت : شجابك جاي لهنا شني 

- شني جاي اطردين 

- لا اطردك شني خوية كاعد على راسي بس شفتك جاي 

- اي والله وفاء حاجتني بيج وكالت حسن مضايقها 

من ناهرته وطاردينه منه كالب عليج 

- هي ودتك يعني 

كاعد احجي وصعد حازم واسعد يحجي : لا والله ما ودتني بس اجيت اشوفج 

وكف حازم اني وجهي كام يذب الوان ..... يتبع

تكملة الرواية من هناااااااا 

لمتابعة باقي الروايه زورو قناتنا علي التليجرام من هناااااااااا

بدل ماتدور وتبحث علي الروايات عمل 

متابعه لصفحتنا على فيس بوك هنااااااااااا

الرواية كامله من هناااااااااا

مجمع الروايات الكامله 1اضغط هناااااااا

مجمع الروايات الكاملة 2 اضغط هنااااااا