رواية لاافهمك من الفصل 17-18بقلم الاءاسماعيل البشري
رواية لاافهمك من الفصل 17-18بقلم الاءاسماعيل البشري
لا افهمك
بارت 17 بقلم آلاء إسماعيل البشري
في قصر عائلة آسر
آسر : على فكرة انت ما غلطتش ولا حاجة ...هو يمكن تكون اتسرعت حبتين اه ...بس اللي عملته ما يستاهلش تعتذر عليه
معاذ بضيق- ازاي !! و انا لمحتلها انها مش محترمة !! تلاقيها دلوقت فاكرة اني باكرهها او مستقصدها !
- بص يا حبيبي..هي لو كانت حاسة بمشاعرك ناحيتها هتعرف ان اللي انت عملتها ده رد فعل طبيعي ممكن يصدر من اي راجل بيغير على الست اللي بيحبها ...بالعكس بقى الموقف ده المفروض يخليها تحبك لانك اثبتت انك راجل و مسؤول و بتخاف عليها ...وحتى لو زعلت منك اوعة تستسلم.. ..هي مسيرها تفهم موقفك ..خذ عندك مثلا رنا ... مين كان يقول بعد كل اللي انا عملته فيها ده انها تحبني بالشكل ده !!!
- صح حاجة غريبة فعلا !!؛
- لا مش غريبة ولا حاجة ...عارف ليه ؟؟ لانها شافتني من جواي ما شافتش اللي انا باحاول اظهره و بس ..عرفت تقرا اللي موجود بين السطور يا معاذ ..فهمت بقى يا خويا ؟!
بقلم آلاء إسماعيل البشري
تهللت اسارير معاذ : فهمت ...يعني لو كانت مكتوبالي أكيد الموقف ده هيخليها تقرب مني مش العكس .
- بالضبط كدة .
معاذ بإبتسامة : مش عارف من غيرك كنت اعمل ايه ؟؟
احتضنه آسر : أهم حاجة انك ما تتسرعش تاني ولا تستسلم لغضبك ...و حاول تلين الجو بعد كدة ..
- هأحاول يا آسر انا طالع اشوف رغد و اروح نتقابل في المستشفى بعدين ؟؟
- تمام ...ان شاء الله
خرج معاذ و قد ارتاح قلبه كثيرا بعد الحديث الذي دار بينهم و بين اخيه و تنهد آسر في مكانه
:ربنا يريح قلبك يخوي
خرجت رنا مع رغد و قابلهما معاذ في الردهة
- صباح الورد عاملة ايه دلوقت يا رغد؟!
- الحمد لله احسن ...فيه ايه مالك يا معاذ شكلك بهتان كدة ليه ؟!
- لا ابدا يا حبيبتي ما تشغليش بالك انتي المهم انك بخير
يالا بقى انا مضطر امشي لاني متأخر اوي
بقلم آلاء إسماعيل البشري
رنا - هو فيه حاجة متغيره ولا انا بيتهيئلي يا رغد ؟؟
ابتسمت رغد قائلة : هو واضح أن فيه حاجة بس محدش هيقدر يعرفها لنا غير آسر ...و البركة فيك طبعا
- مين بيجيب في سيرتي ؟؟
رنا- يا دي سمعك الغريب يا آسر !!
- صباح الخير يا احلى رغد
رغد - صباح النور يا حبيبي 🥰
آسر - كدة تخضينا عليك !!؛
- متقلقش يا آسر انا بخير .. يالا نفطر عشان نروح المستشفى ؟
- حاضر يا حبيبتي بسرعة خلصي أكلك و نطلع كلنا
في هذه الاثناء رن هاتفه ..
- طب يا بنات انا مستنيكم في الجنينة ما تتأخروش ..و غمز لرنا ثم ارسل إليها قبلة في الهواء
اتكسفت رنا و بصت لرغد اللي عملت نفسها ما شافتش حاجة
تأكد أنه اتصال على الخط الآمن ثم إجاب : الو مين ؟
خالد بتوتر : هاا يا آسر ايه الاخبار طمنني ؟؟
آسر : اتطمن يا معلم احنا ضبطنا العريس عالآخر و الليلة بإذن الله دخلته
خالد بضيق: بلاش استعباط يا آسر انت عارف اننا عالخط الآمن قول ايه الاخبار من غير شقلبة و حركات
- باهزر معاك يا أخي مالك متضايق اوي كدة هي كانت اول مرة يعني !!
خالد : يا برودك يا اخي!! كل ده و انت ليك مزاج تهزر !!
آسر : و ما يكونش ليا مزاج ليه ؟! ولا انت ناسي الواد الصايع ده عليه كم قضية و كلهم بلاوي زرقة !! مش كفاية ابوه اللي عمال بينخر في اقتصاد البلد زي السر'طان و محدش قادر يعمل له حاجة !! لا و كمان مطلع لنا حتة واد صايع كلها شهرين و يبقى مستشار بفلوس ابوه الحر'ام !! عدل ايه اللي هيطبقه واحد وا'طي زي ده ؟؟ ما تجمد قلبك اومال ما قلنا دي مش اول مرة الله !!..
و بعدين انت من امتى بقى قلبك ضعيف كدة يا خالد ؟
- انا عمري ما كان قلبي ضعيف .. و بعدين انا مش خايف على نفسي قد ما انا خايف على مراتي و بنتي ...عموما أوعدك انها هتكون آخر مرة امشي وراك فيها.!!..المهم قل لي ! متأكد محدش شافكم ؟
- اتطمن يا خالد كله في النظيف اخوه بنفسه اللي موصله جوة الطيارة و لا حتى الجن الازرق يعرف انه طلع منها تاني ...و كمان مسجل وصول في مطار كندا و شافوه و هو نازل ... يعني بعد كدة هو مختفي في كندا ملناش دعوة احنا بقى !!
- تمام طب انت جاي المستشفى ولا لا
- كمان شوية و هنوصل. ..اخبار الشاب ايه ؟
- الدكتور لسة ما دخلش عنده مش عارف حاجة لسة
- طب يالا البنات جوم ... اشوفك بعدين .
رنا بحبور : يالا بينا !!؟
آسر بحب - يالا
رغد تطالع نظراتهما لبعضهما البعض و لم تتكلم فقط اكتفت بالابتسام
بقلم آلاء إسماعيل البشري
في الشركة :
يصل معاذ الى مكتبه و ينادي على السكرتيرة
- صباح الخير يا افندم
- صباح الخير ...شوفي آنسة وئام لو وصلت قوليلها معاذ بيه مستنيكي في مكتبه
-بس الآنسة وئام قدمت استقالتها يا أفندم !
معاذ بعصبية- قدمت ايه ؟؟؟؟ لالا مستحييييل
السكرتيرة بخوف : اهي قدام حضرتك على المكتب .
حاول معاذ يتحكم في غضبه و اتنهد بعمق بيحاول يهدى قد ما يقدر : طب اتفضلي انتي على مكتبك دلوقت .
اغلقت السكرتيرة الباب بحذر و ما إن اختفى طيفها حتى اسقط معاذ كل الاشياء الموجودة على المكتب ارضا و فجأة خبطة قوية دوت على المكتب كانت ان تشقه الى شطرين : ليه كدة يا وئام لييييه !!!
في المستشفى :
وصل آسر و رنا و رغد و توجهوا للطابق الذي يوجد به اسلام
كان خالد بهم بالانصراف اول ما شافهم اتجه عليهم
اكملت رنا و رغد نحو غرفة اسلام و بقي خالد مع آسر
- كويس انك وصلت يا آسر انا لازم امشي حالا عندي شغل مستعجل
- آسر : طب الدكتور طلع من عنده ؟
- انا سبته لسة طالع من عنده يا ريت تعدي عليه الاول تعرف الوضع ايه عشان نتمم المحضر بتاعنا .
آسر : تمام ..
انصرف خالد و صعد آسر الى مكتب الطبيب
بينما توجهت رغد و رنا الى غرفة اسلام الذي ما إن شاهدها حتى حاول النهوض سريعا لكنه لم ينجح
رغد بخوف: خليييك ...ما تتعبش نفسك
جلست كلا منهما بالقرب من السرير
ابتسمت رنا بأدب و هي تشير الى رغد : حمد لله على سلامتك يا استاذ اسلام ..انا رنا مرات اخوها
اسلام : الله يسلمك يا مدام رنا
رغد : ألف سلامة عليك يا إسلام
اسلام بلهفة - الله يسلمك ...قالولي انك تعبتي طمنيني انتي كويسة ؟
رغد بكسوف و هي تنظر لرنا التي اخفت ابتسامتها حتى لا تحرجها و نظرت الى هاتفها و هي تتصنع الجمود
- ايوة الحمد لله أحسن المهم انت دلوقت تقوم بالسلامة .
- ان شاء الله ..و لو ان نظرات الدكتور مش مطمناني ..شكله الموضوع كبير
رغد بمقاطعة: لا بعد الشر !! ان شاء الله هتبقى زي الفل ..و بعدين ما تنساش كلها شهر و تتخرج.. يالا عشان تشد حيلك لو مش عايزني اكون الاولى على الدفعة .
- دي حاجة تسعدني دايما
كانت رنا تستمع اليهما و هي تلتمس حبا جميلا يلوح في الافق
همت بالانصراف حين احست بإحراج كل منهما لوجودها
- احم ...طب انا هشوف آسر فين وارجع
بقلم آلاء إسماعيل البشري
آسر: ها يا دكتور ايه الاخبار
الدكتور بجدية: للأسف زي ما اتوقعنا ..مش هيقدر يقوم كل الفحوصات أكدت وجود شلل
- يعني ايه يا دكتور !؟ الوضع ده نهائي ؟! مفيش أمل أنه يمشي تاني !!
- لا طبعا انا مقلتش كدة ... هو فيه امكانية زرع نخاع بس هو محتاج وقت عشان يقدر يعملها و كمان هي مكلفة اوي
- يعني ايه يا دكتور ؟
- يعني مش هيقدر يقوم ايوة بس ده يعتبر شلل مؤقت...أهم حاجة يمشي على العلاج اللي هديهوله و كمان. يداوم على العلاج الطبيعي ...و هيكون لينا فحص دوري كل ثلاث شهور لحد ما نقدر نحدد امتى الوقت المناسب لعملية الزرع
- تمام يا دكتور ..متشكرين
- ألف سلامة عليه
خرجت رنا من الغرفة لقت آسر جاي ناحيتها و شكله متضايق
رنا بقلق: مالك يا حبيبي شكلك بيقول ان فيه خبر مش كويس !
- مش عارف اقولك ايه يا رنا ...توقعات الدكتور طلعت صح
الواد ده صعبان عليا اوي شاب طموح مثابر مستقيم الدنيا طاحناه من قبل ما يبتدي يعيشها ...جدته مستنياه يكون ليها سند و يعوضها عن سنين الحرمان اللي عاشوها ..حرام اللي بيحصل معاه ده و الله .
- معلش يا حبيبي ده ابتلاء من ربنا أصل ربنا مش بيبتلي غير الناس اللي بيحبهم ...و ان شاء الله ينجح في الامتحان و بعدين احنا معاه و طبعا هتساعده يتخطى ازمته و نتكفل بمصاريفه مش كدة ؟؟ ده مهما كان انقذلنا رغودة هانم !
اقترب منها بحب و هو ينظر يمنة و يسرة : انتي ازاي حلوة كدة ؟؟ جواكي حلو يا رنا انا محظوووظ يبكي بجد .
ابتسمت بمشاكسة: جوااي بس اللي حلو ؟؟؟
غمزلها : ما تبعدي احسن ما اعمل حاجة اموت و اعملها !!
- اتلم يا مجنون !! ما تنساش اننا في مستشفى !!
- طب خلاص اتلمينا ...اوعي من قدامي هأدخل أشوف اسلام
خبط على الباب و دخل
كانت رغد قاعدة بتتكلم معاه اول ما دخل اتوترت و قامت
آسر - الحمد لله على السلامة ي أسلام ...
- الله يسلمك ...انت استاذ آسر ؟! كنت بشوفك من بعيد بس
- ايوة انا ...اتشرفت جدا بمعرفتك و مش عارف اشكر حضرتك ازاي على الموقف الشهم اللي انت عملته مع رغد .
اسلام بخجل : العفو حضرتك انا معملتش غير الواجب اي حد مكاني كان هيعمل كدة ....هو الدكتور قالك ايه لو سمحت ؟؟ أصل جدتي ست تعبانة و كبيرة زي ماانت شفت و ما لهاش غيري يهتم بيها
آسر : الدكتور بيقول تستنى كمان شوية عشان لسة ما ظهرتش نتيجة التحاليل
بقلم آلاء إسماعيل البشري
لاحظ آسر نظرات رغد لإسلام فاردف و هو ينظر إليها
- طب احنا هنسيبك دلوقت و هابقى ازورك وقت تاني و ما تقلقش على الست جدتك دي في عينينا ..مش كدة يا رغد ؟؟
رغد بتوهان : هاا !! اااه أكيد .
و أكمل آسر و هو طالع مع رنا : انتي جاية يا رغد ولا ايه !!
- ..ااااه طبعا .. جاية
بصت لاسلام بتوتر و خجل : ألف سلامة عليك مرة تانية .
خارج الغرفة :
رغد بتوتر : هو الدكتور قالك ايه يا آسر ؟؟
- هنتكلم في الموضوع ده بعدين .
رنا : على فكرة يا آسر ... ياسين مستنينا من بدري
آسر - ما نسيتش طبعا ...يالا يا رغد احنا رايحين عند ياسين هنوصلك البيت في طريقنا للمستشفى
- لا انا رايحة معاكم انا كمان كان نفسي ازوره بس اللي حصل شغلنا كلنا
- طب يالا بينا
بقلم آلاء إسماعيل البشري
في الشركة :
معاذ يضغط على زر الامانة بتاعته
تدخل السكرتيرة : خير يا استاذ معاذ حضرتك طلبتني ؟
- ايوة يا منى...انا عايز ملف الآنسة وئام .
منى و هي تنظر بدهشة الى المكتب بحالته الفوضوية
- حاضر يا افندم دقيقة و يكون عند حضرتك
- اطلبي لي قهوة و ابعثي حد يلم الفوضى دي ...
- حاضر .
شوية و كان الملف فوق مكتبه..دون عنوانها في موبايله و خرج مسرعا
بقلم آلاء إسماعيل البشري
دخلت رنا أولا و تلاها رغد و آسر
- حبيب اخته عامل ايه النهاردة ؟؟ بص جاايبالك مين معايا ؟؟
رغد : ازيك يا ياسو القصر مظلم من غيرك و الله
ياسين بفرحة طفولية : رغوووودة وحشتيني اوووي
دخل آسر : و عموووو ما وحشكش كمان ؟؟
ياسين بزعل طفولي - لا انا زعلان منك يا عمو آسر.. يومين بحالهم ما اشوفكش!
جثى آسر بركيته أمام ياسين
- و انا ما يرضنيش زعلك يا ياسين باشا و مستعد لأي عقاب عشان اراضيك ...هاااا !! البطل عايز ايه !!!؟
- عايز العب معاك احسن البت ريم جننتني عالآخر و لا تعرف التسلل امتى ولا تعرف ضربة جزا امتى ولا أي حاجة في الكورة و كل ما اغلبها تقعد تعيط ....انا بكره البنات اوي !!
آسر بمشاكسة و هو ينظر لرنا تحت نظرات رغد : ليه بس ؟؟ ده حتى البنات دول هوما البنبونات بتاعتنا .. الحاجة الطرية اللي محلية حياتنا 😉
رنا و هي تضيق عينيها بغيظ : آسر !!!!
آسر بمزاح : ايه ؟؟ 😂
نظرت رنا بحدة و لم تعقب و اردف ياسين بغضب طفولي
- جرى ايه يا عمو انت هتعاكس اختي قدامي ولا ايه !!
- مراتي يا عم اعاكسها براحتي 🙄😉
- يعني يرضيك اعاكس رغد قدامك !!!
ضحكت كل من رنا و رغد على تفكيره ! ايعقل ان هذا ابن عشر!
تصنع آسر الجدية : خلاص انا آسف يا عم مش هاعاكسها تاني يالا نلعب ولا هنقضيها كلام طول اليوم ؟؟
نسي ياسين ما كان و صاح بفرحة طفولية : يالاااا !!!
خرجت رنا مع رغد خارج الغرفة
رغد و هي تلكز رنا و تشير الى الداخل : هي ايه الحكاية بالضبط !!!
رنا ببلاهة : حكاية ايه مش فاهمة ؟! 🙄
- مش فاهمة ولا بتستعبطي !! 😂 وديتي آسر اخوي فين !؟؟
رنا بتصنع الغباء: ماهو عندك جووة ؟؟!
رغد بضحك : لا يا شيخة !!! اخوي صحيح طيب و حلو من جواه. ..بس عمره ما كان قليل أدب كدة هو ايه اللي بيحصل بالضبط ؟؟ من الصبح نظرات و ابتسامات و حب و بوس و غزل ....بركاتك يا شيخة رنااااا
رنا : هاااا !! امتى حصل كل ده !!
رغد بقلة صبر : بنت انتي ما تجننيش معاكي !!! هتتكلمي فيه ايه ولا اروح اسأله هو !!!
ابتسمت رنا و توردت وجنتاها في خجل : يوووه بقى يا رغد!
بقلم آلاء إسماعيل البشري
قفزت رغد فرحا لدرجة انها لفتت انتباه بعض المارة في الردهة : يبقى حصل !!!! و حياتي قولي انه حصل !!
اومأت رنا رأسها بالايجاب فأحتضنتها رغد بحب
-ياااااه !!! اخييييرا !!! يعني هبقى عمتوو قريب ؟؟
- هسسسس يا مجنووونة حد يسمعنا !!!
رغد : طب بقولك ايه انا رايحة أتصل بماما اطمنها علينا من الصبح مش عارفة اخبارنا
- تطمنيها برضو ...و لا تفرقعي المفاجأة ؟؟!
- اخصة عليك يا رنون يعني انا فتانة !؟؟ طب انا مخاصماكي
احتضنتها بحب : انا مليش غيركو اصلا ...يالا ما تتأخريش
- حاضر يا احلى مرات اخ في الدنيا 🥰
بقلم آلاء إسماعيل البشري
امام احدى العمارات متوسطة الحال
وقت المغرب يقف معاذ و هو ينظر الى هاتفه يتأكد من العنوان
دخل الى العمارة و قبل أن يهم بالصعود وجد وئام تنزل برفقة شاب ما
حاول معاذ تمالك اعصابه و تصنع الهدوء و هو يقترب منهما
كانت علامات الدهشة بادية على وجه وئام فور رؤيتها له
وئام بدهشة: أستاذ معاذ ؟! انت بتعمل ايه هنا ؟؟
معاذ : آنسة وئام ممكن أتكلم معاكي كلمتين ؟
اجابه ذلك الشاب بعصبية: و تتكلم معاها بتاع ايه ؟؟
معاذ و هو يحاول ان يكتم غضبه : انا مديرها و كنت محتاجها في حاجة تخص الشغل
كان سيتكلم لكنها اشارت إليه بيدها
وئام بهدوء - استنى يا ادهم ... انا آسفة يا معاذ بيه ما اقدرش اتكلم معاك في الشغل قدام باب العمارة بتاعتنا ...أظن حاجات الشغل ليها مكتب ولا انت رأيك ايه ؟؟
شعر معاذ ان كلماته كانت قاسية جدا و اشعرتها بالاهانة ...و الدليل انها لا تزال تتذكر كل كلمة منها .
قبل أن يجيب ...اندفع ادهم بعصبية : أظن انت كدة اخذت الرد اتفضل بعد اذنك عشان مستعجلين
معاذ بغضب : و انا بأكلم الآنسة وئام و لسة ما خلصتش كلامي !!
- بس خطيبتي قالت لك كل اللي عندها !!
معاذ بصدمة : خطيبتك !!!
عقدت الدهشة لسان معاذ الذي قرر أن ينسحب قبل أن يفعل شيء يندم عليه
همت وئام أن تتكلم : بس..
قاطعها معاذ - أنا آسف يا آنسة ..انا بس كنت عايز اقولك ان استقالتك مقبولة..تقدري تتفضلي تاخذي المبلغ اللي ليكي عندنا من الاستاذ محمود .
غادر فورا نحو سيارته قبل أن تنطق هي بكلمة حتى !
نظرت الى ادهم بغضب شديد : انت مين سمحلك تتكلم بدالي ؟؟ و بعدين ايه خطيبتك دي؟؟ هو احنا هنكذب الكذبة و نصدقها ولا ايه يا ابن عمي ؟؟
ادهم بتحدي: ايوة خطيبتي ان مكانش النهاردة يبقى بكرة
و بعدين تعالي هنا !!! الجدع ده كان جاي هنا عايز منك ايه ؟؟
- ملكش دعوة يا ادهم و حل عن سمايا بقى !! اقولك حاجة ؟! و الله لا انا طالعة البيت
ادهم بحدة: مش كان عندك طلبات من شوية و لازم تنجاب ضروري ؟؟! ولا هي كانت صرمحة و خلاص !!
وئام بتحدي؛ مش عايزة طلبات ولا عايزة من وشك حاجة ..
طلعت بغضب و أردف و هو بتحدي: و الله لادفعك ثمن كل كلمة وحشة سمعتها منك يا وئام ...اصبري عليا نتجوز و اتلم عالورث و بعدين هيبقى لنا كلام تاني يا بنت نادية
في المستشفى
آسر : الوقت أتأخر يا بطل احنا هنسيبك دلوقت
ياسين - و النبي يا عمو جولة وحدة كمان
رنا : و بعدين معاك يا ياسين !! عمو تعبان و الوقت أتأخر و بعدين انت كمان عندك بكرة جلسة و لازم ترتاح و تنام بدري
آسر : أوعدك اني هآخذ يوم أجازة و اكون عندك من صبحية ربنا و نقضيها لعب يوم بحاله
ياسين : بجد يا عمو ؟؟
آسر و هو بيبص على ياسين و يخطف نظرة لرنا : عمو و قلبه و عيونه و روحه و كل حاجة فيه ليك انت و اختك انت بس اطلب انت و هي و عمو هينفذ من غير مناقشة.😉
رنا و هي مبتسمة و تهم بالخروج : مفيش فايدة فيك أبدا. ..
آسر بحب - يالا بينا يا حبيبتي ...
بقلم آلاء إسماعيل البشري
وصلوا السيارة كان سينطلق ثم تذكر أخته
آسر : بس انا مش فاهم ايه اللي صربع البت رغد كدة !! ماكانت قاعدة معانا و نوصلها احنا ؟؟ يعني انتي عارفة انها لسة تعبانة مكنتيش تقدري تمسكي فيها ساعة كمان ؟
- معلش يا آسر انت عارف انها بتحضر في مذكرة التخرج سيبها براحتها ...رغد مش طفلة عشان امسك فيها بالعافية
اتنهد آسر بعمق ثم زفر بضيق
رنا : يا ساااتر !! ايه كل ده ؟؟ شكل فيه حاجة مضايقاك !
- بصراحة ...اخواتي الإثنين مش عاجبني حالهم
رنا بإستغراب : ازاي يعني ؟؟
-هنتكلم في الموضوع ده بعدين ..خلينا نمشي احسن اتأخرنا
وانطلقا الى المنزل
دخلت وئام الى منزلهم فاستقبلتها والدتها بدهشة: رجعتي بسرعة يعني !!
وئام بضيق - انا ما رحتش اصلا !
نادية - ليه يا بنتي حصل ايه اوعي تكوني اتخانقتي انتي و ادهم تاني !!!
- و النبي يا ماما ما تجيبي لي سيرته ..
- فيه ايه المرة دي 😏 ما انا عارفاكي واقفاله عالوحدة
- يا ماما انا مش فاهمة انتي طايقاه ازاي ده بني آدم مستفز
بجد !! و بعدين فيها ايه لما اطلع اشتري الحاجات اللي لازمانا لوحدي !؟؟ هو انا عيلة صغيرة خايفة أتوه؟؟
- يا بنتي الدنيا قربت تظلم و احنا ولايا ..عايزة الناس تقول علينا ايه ؟
- يقولوا اللي يقولوه ما لناش دعوة بحد و لا حد له دعوة بينا كانوا فين الناس لما اترملتي و اتلطمتي و شقيتي و جوعتي ؟
- برضك يا بنتي احنا ما لناش غير سمعتنا. ..و ادهم مهما كان من لحمك و دمك و هيخاف عليكي و يحميكي ..
- يحميني !! و النبي انتي طيبة اوي يا ماما .. انا اكثر واحدة فاهمة ادهم و اللي زيه .. ده مستني الفرصة بس عشان ينهش فيا اكثر من الغريب ..
- عيب يا بنتي ما تقوليش كدة على ابن عمك ..مش كفاية انه الوحيد اللي بيسأل علينا بعد عملتك المهببة إياها؟؟
- يوووه يا ماما !!! هو احنا اللي هنقوله هنعيده؟ انا و مجدي ما اتفقناش و الجواز مش بالعافية ..
- تقومي تفركشي قبل كتب كتابكم بيومين ! مين هيصدق ان انتي اللي لغيتي الفرح مش هو ؟؟ زمان الكل فاكرك معيو٫بة
- قطع لسان اللي يجيب سيرتي .. و بعدين طظ في الناس كلها مش فالحين غير في الكلام و بس
نادية بضيق : برضو بلاش تعاملي ادهم المعاملة الز"فت دي الواد بعد كل اللي حصل لسة شاريكي
اتنهدت وئام و همست بينها و بين نفسها - شاريني ولا شاري البيت و الارض اللي حيلتنا ؟ و اردفت بصوت مسموع نسبيا
- عموما انا مش هاتكلم اكثر مهما قلت هتدافعي عنه و هيطلع هو الملاك و انا الحية ام جرس ...المهم ....انا داخلة أنام يا ماما تصبحي على خير
- و انتي من اهل الخير يا ضناي ..ربنا يريح بالك و يطمنك
في غرفة معاذ
معاذ يتحرك ذهابا و ايابا في غرفته يكاد ينفجر من الغضب و هو يردد لنفسه
- طلعت مخطوبة !! سامع يا غبي !!!
اومال كنت فاكر ايه !؟؟ تتصرمح و تصيع في البارات و في الاخر تاخذ وحدة زي وئام و رنا ؟؟
أكيد مش هتبص لك حتى لانها عارفة ماضيك و سيرتك الز"فت ..أكيد فيديوهات لميس وصلت لها
اي وحدة محترمة و بنت ناس هتخاف منك و مش هتأمنلك !
اللي زيك مش مكتوب له يحب يا معاذ ...و يوم ما يحب يقع على جذوور رقبته ..و مش هياخذ غير الخيبة و الوجع
بص على نفسه في المرآة و اردف بغضب : عارف ليه ؟؟!
لانك واحد فااااشل.... و هتفضل طول عمرك فاااشل !!!
أمسك قارورة العطر و ضرب المرآة بقوة فتناثر الزجاج في انحاء الغرفة و وقع معاذ ارضا و هو منهار و ينزف بشدة من يده
سمعت رغد صوت تكسير قادم من غرفة اخيها فاقبلت بسرعة لكن سرعان ما صدمت من المنظر : د د د. د.م. !!!
و فجأة دوت صرخة عظيمة منها و هوت ارضا
يتبع ....
لا افهمك
بارت 18 بقلمي آلاء إسماعيل البشري
سمعت رغد صوت تكسير قادم من غرفة اخيها فاقبلت بسرعة لكن سرعان ما صدمت من المنظر : د د د. د.م. !!!
و فجأة دوت صرخة عظيمة منها و هوت ارضا
اسرع على اثر هذا والديها و اخفى معاذ يده المصابة خلف ظهره و هو يحاول ان يهدئها
- أهدي يا حبيبتي مفيش حاجة ...أهدي
أولا دخلت فاطمة التي شهقت من المنظر و على اثرها محمد
فاطمة : ما مصيبتي !! ايه الدم ده مالك يا معاذ !!
معاذ و هو يشير الى رغد التي ترتعد بشدة : مفيش حاجة يا ماما خذي رغد على اوضتها
فاطمة بفزع - بس انت .....
معاذ بمقاطعة : يالاااا يا ماماااااا !!
اسندت فاطمة رغد و خرجتا من الغرفة و هي لا تزال على صدمتها
محمد : هو ايه اللي حصل يا معاذ ؟! و ايه كل ده يا ابني ؟
معاذ بضيق : مفيش يا بابا ...و بعدين هو انا عيل عشان الكل يتفزع عليا بالشكل ده !! ده جرح بسيط دلوقت هاعقمه .
- بسيط ايه دي شكلها ايدك اتفتحت شبر و نص.. قوم يالا نروح المستشفى نعملك غرز .
- قلتلك مفيش داعي يا بابا سيبوني في حالي بس !!!
نظر محمد الى ولده بحزن على حالته و علم ان الكلام لن يفيد معه و هو في هذه الحال ...
خرج من الغرفة و أتصل على آسر .
عند آسر
كان يهم بالدخول الى المنزل و هو يحتضن رنا التي حاولت ان تلتمس الدفء في احضانه حين رن هاتفه فجأة
- الووو يا آسر !!
- خير يا بابا ؟؟ ماله صوتك ؟؟
- الحقني يا آسر ...معاذ اخوك شكله تعبان اوي لدرجة أنه معور ايده جامد و رافض يروح المستشفى يوقف النز"يف
- هو فين دلوقت !؟؟
- في اوضته يا ريت تجي بسرعة انت الوحيد اللي تقدر تخرجه من اللي هو فيه و تقنعه يروح المستشفى
- طب انا جاي حالا ..
رنا يقلق : خير يا آسر ماله معاذ ؟؟
- مش عارف ...ادخلي انتي و اقفلي كويس ... انا رايح له
-هتتأخر ؟؟
- على حسب ...يالا خلي بالك من نفسك يا حبيبتي
قبل جبهتها بحنان و انطلق بسيارته مسرعا
بقلمي آلاء إسماعيل البشري
وصل الى القصر و هرول نحو غرفة معاذ
ما إن رآه حتى معاذ قادما نحوه حتى انهارت قواه
احتضنه و ترك له العنان ليبكي كالاطفال
هو الوحيد الذي لا يخجل ان يظهر امامه ضعفه و دموعه هو الوحيد الذي يستطيع ان يشاركه احماله
- مالك يا قلب اخوك ؟؟ ايه اللي قلب حالك بالشكل ده انا سايبك زي الفل الصبح !!!
- مش قادر يا آسر ....حاسس ان قلبي هيطلع من مكانه
موجووووع اوي يا اخوي
- احكيلي فيه ايه بس يمكن اساعدك
- هو انا وحش الدرجة دي يا آسر ؟؟
- مين قال كدة يا حبيبي ؟ بالعكس انت عمرك ما كنت وحش طول عمرك طيب و نظيف من جواك كنت محتاج بس حد يقف جنبك و يوجهك ...بس ايه لزمة الكلام ده دلوقت ؟؟
- قدمت استقالتها يا آسر ...مش كدة و بس !! دي طلعت مخطوبة ! 😭😓💔 ما قالتليش ليه طيب...سابتني اتعلقت بيها ليه ؟؟
- تنهد آسر و لم يدر بما يجيب ...اخذ نفسا عميقا و هو لا يزال يحتضن رأس أخيه بين يديه و يرتب خصلاته بحنان
- خلي أملك في ربنا كبير و اتماسك عشان خاطر ابوك و امك
انت راجل عيب اللي انت بتعمله في نفسك ده ...و بعدين انت عارف ان اختك تعبانة ..يعني يصح اللي انت عملته ده !!! كدة تخضها و احنا ما صدقنا انها هديت ؟؟
اومأ معاذ برأسه حزنا: غصب عني ...الصدمة كانت شديدة مش مصدق اني بعد ما لقيتها اضيعها بكل بساطة كدة !!
آسر بحب - طب يالا يا حبيب اخوك ...احنا هنروح المستشفى نخيط الجرح ده و بإذن الله كل حاجة هتتحل ....مش بيقولوا تبات نار تصبح رماد "؟ ...انت بس قول يا رب و ربك كريم و قادر على كل شيء ..و لو من نصيبك محدش هيقدر ياخذها غيرك صدقني .
معاذ بإستسلام: و نعم بالله
آسر و هو يسنده: طب يالا اساعدك تغير مش كفاية سايب مراتي و جاي لك على ملا وشي يا بئف؟؟ يالا يا اخوي اتحرك قدامي عشان ما ينفعش اتأخر عنها اكثر من كدة
ابتسم معاذ بكسرة : يا بختهاااا ...ربنا يسهلو يا سيدي
- ايوة كدة أضحك يا عم شكلك بيبقى وحش اوي و انت زعلان
في غرفة وئام
دخلت غرفتها و هي تتمتم في حنق : قال خطيبته قال !!
خبطه قطر و ريحنا منه و من ثقل دمه في يوم واحد !!
تمددت على سريرها و تنهدت بعمق ثم امسكت هاتفها و فتحت صفحته الشخصية تطالع صوره و هي تهمس بحزن : يا ريت اقدر اقولك عاللي ف قلبي ...بس انا خايفة اقرب منك...خايفة اوي... لا انا مرعوبة ...خايفة اندم... خايفة اكون مجرد رقم في حياتك...و بعدين انا فين و انت فين !! كدة أحسن لينا احنا الإثنين انا اصلا الدنيا ملطشة معايا بزيادة ...و مش حمل كسرة قلب كمان 😓
بقلمي آلاء إسماعيل البشري
في بيت آسر
وصل آسر متأخرا و كانت الساعة تقارب الثانية صباحا
كانت رنا تطالع كتابا حين سمعت صوت سيارته في الخارج فركضت نحوه بقلق ما إن دلف من الباب
- حبيبي ...طمنني ايه اللي حصل !!
- انتي ايه اللي مصحيكي لغاية دلوقت ؟
- يعني معقولة هيجيلي نوم في الظروف دي ؟ هااا قل لي معاذ ماله ؟؟
تنهد بحزن : خلينا نطلع الاول على اوضتنا هنا الجو برد عليكي يا حبيبتي
- لا برد ولا حاجة تعال اقعد هنا و احكيلي
في صباح اليوم الموالي
في بيت وئام
خرجت وئام بتثاقل - صباح الخير يا ماما
- صباح النور ..يالا تعالي افطري بسرعة عشان تلحقي تروحي شغلك يا بنتي الساعة عدت ثمانية و نص انتي متاخرة النهاردة
وئام بملل: لا ماهو أنا مش رايحة يا ماما لا النهاردة ولا بكرة
نادية باستغراب :بتقولي اي !!! ليه كفى الله الشر ؟؟
- لاني قدمت استقالتي يا ماما
خبطت نادية على صدرها و شهقت بصدمة : يا نهار اسود !! ده اللي هو ازاي !!
وئام بملل : زي الناس يا ماما ...مش عاجبني جو الشغل
نادية بحزن: ليه بس يا بنتي ده انتي حفيتي على ما لقيت الوظيفة دي و بمرتب ما تحلميش بيه حتى ! تقومي تسيبيها عشان مش عاجبك الجو !! ما تقولي هو ايه اللي حصل بالضبط ده انتي كنتي هتطيري من الفرحة اول ما اتقبلتي !
- ماما ارجوكي ما تضغطيش عليا أكثر ما انا مضغوطة .. صدقيني كدة احسن ..انا ما اقدرش اشتغل في مكان انا مش مرتاحة فيه .
في الوقت ده رن جرس الباب
قامت نادية تفتح الباب و هي تكمل جملتها
- طب و هنصرف منين يا حيلتها ولا انت ناوية تصرفي على هدومك و شكلك من فلوس ايراد الارض اللي مش جايبة همها !
إجابت وئام و هي ترتشف الشاي - لا يا ماما انا هبقى اتصرف.. ..انتي عارفة اني اقدر اشتغل من البيت .
صوت رجولي- و تشتغل ليه اصلا و حنا كدة كدة هنتجوز !!!؟
نفخت وئام بضيق و هي ترى ذلك الضيف غير المرغوب فيه:
- يا فتاح يا عليم يا رزاق يا كريم ! خير ؟؟؟ فيه ايه عالصبح يا ادهم؟؟
- الناس تقول صباح الخير الاول ولا ايه يا بنت عمي؟؟
بقلمي آلاء إسماعيل البشري
في بيت آسر :
صحيت رنا قبل آسر تحضر له الفطور
دلفت الى الغرفة فوجدته لا يزال نائما
فتحت الستائر ثم مالت على خده تطبع عليه قبلة هادئة : ما تقوم بقى يا كسلان..!
كادت ان تذهب حين امسكها من يدها لتجد نفسها فوقه
- معقولة رايحة من غير ما اصبح عليكي ؟
رنا و قد كست حمرة رقيقة وجهها : آسر اوعة هنتأخر !!
آسر بإبتسامة ماكرة - ما نتأخر ايه المشكلة ؟؟
شدت نفسها منه فزاد من احتضانها مانعا إياها من الحركة
رنا : يوووه يا آسر انت عارف ان ياسين عنده جلسة النهاردة و انا مش بحب اسيبه لوحده و بعدها لازم نطلع على القصر عايزة اكون جنب رغد في ظروف زي دي
- عارف كل ده يا روح آسر هو انتي مش بتنسي حاجة أبدا !!
- انسى ازاي دول عيلتنا و حبايبنا يعني لازم نكون معاهم في الشدة قبل الفرح
- ماهو انا ما حبتكيش من فراغ !! و طبع قبلة رقيقة على انفها
فأردفت رنا بدلال و هي تمسح على وجهه بحنان :
و بعدين انت لازم تلاقي حل لمشكلة اخوك مش معقولة هنسيبه كدة يتعذب !!
تنهد بعمق و هو يحتضنها بحب: معاكي حق يا حبيبتي. ...انا اكثر واحد عارف الشعور ده مر قد ايه ..حاضر يا روحي انا هاتصرف.
رنا و هي تهم بالوقوف : طب يالا بسرعة عشان نفطر ☺️
همس في اذنها بعشق و هو يعيدها لاحضانه
مش قبل ما اقولك حاجة مهمة اوووي لسة مفتكرها حااالا 🥰
في بيت عائلة آسر
فاطمة : الساعة عدت 11 و معاذ ما طلعش من اوضته يا محمد ..ما تروح تشوفه !
- و انا هاقدر اعمل له ايه بس يا فاطمة !! الواد نفسيته ز،فت و لو اتكلمت معاه هتتعقد الدنيا اكثر احنا ما صدقنا أنه هدي و سمع كلام اخوه امبارح ...سيبيه براحته بقى !!
فاطمة: مش مطمنة يا محمد ...حرام عليك انا حاسة اني باخسر ولادي واحد ورا التاني و حنا واقفين نتفرج عليهم
محمد : بقولك ايه احنا مش هنفضل نعجن و نعيد في نفس الكلام كل يوم !! انا احسن حل اروح الشركة اشوف ايه الاخبار بدل ابنك اللي مش راضي يروح ده
- ربنا يهديه و يريح قلبه
في هذا الوقت خرجت رغد من غرفتها
- صباح الخير
الإثنين مع بعض : صباح النور
فاطمة : ازيك يا بنتي حاسة نفسك احسن النهاردة ؟
رغد : الحمد لله يا ماما
محمد : اومال لابسة و رايحة فين عالصبح يا بنتي انتي لسة تعبانة
- بالعكس يا بابا جو البيت هو اللي بيخنقني و بعدين انا عندي اوراق مهمة لازم اخلصها في الجامعة و هاعدي بعدها على اسلام في المستشفى ...الا هو معاذ فين و ايه اللي جراله امبارح ؟؟
- محمد : في اوضته قافل على نفسه
رغد : لا الولد ده أكيد فيه حاجة انا رايحة اشوفه
فاطمة : مش هيفتحلك ..انا حاولت كثير مفيش فايدة
- مش مشكلة أحاول انا كمان ...
بقلمي آلاء إسماعيل البشري
في بيت وئام
- الناس تقول صباح الخير الاول ولا ايه يا بنت عمي؟؟
همهمت وئام مع نفسها في ضيق : عامك دبب يا بعيد
نادية : اتفضل اقعد يا ابني تشرب معانا شاي هجيب لك كوباية اعتبر نفسك في بيتك
اعتدل في جلسته و اكمل ببرود و هو ينظر الى وئام : عموما ..انا جاي اتكلم مع مرات عمي في موضوع .
وئام بضيق: موضوع ايه عالصبح كدة ! احنا مهما كان ولايا و عايشين لوحدنا ...ولا انت ما تعرفش في الاصول يا ادهم!!
- و انا ابن عمك و في حكم خطيبك مش غريب يعني !
- خطيبي ايه و زفت ايه ؟؟ انت مصدق نفسك بجد !
ادهم ببرود مصطنع: ايوة خطيبك ....و بعدين مادمتي تعرفي الاصول و خايفة على سمعتك اوي يعني ! اومال البيه مديرك كان جاي امبارح يتكلم معاكي بعد ما الدنيا ليلت ليه ؟! ولا هو ما يعرفش لا مؤاخذة ان انتو ولايا و لوحدكم؟
- انا ما اسمحلكش تقول كلمة وحدة زيادة يا ادهم فاهم ! انا ساكتالك من الصبح لانك في بيتنا !
نادية - فيه ايه مالكم يا ولاد صوتكم جايب آخر الشارع ليه ؟؟
وئام بغيظ و هي تنظر لأدهم: مفيش يا ماما انا داخلة اوضتي
أدهم : ماشي يا عروسة ...بس اعملي حسابك ان كتب كتابنا هيكون يوم الخميس
وئام و امها بصدمة : ايه ؟؟؟
ادهم : زي ما سمعتو ...انا مش هاقدر استنى اكثر من كدة و ده الموضوع اللي انا جايلك فيه يا مرات عمي .
وئام بغضب- و كمان محدد معاد كتب كتاب! مين قالك اني موافقة اصلا !؟؟؟
ادهم بخبث - عمامك موافقين و ده المهم ...ما تنسيش ان احنا صعايدة و ما عندناش نسوان تقعد لوحدها لولا بس وصية عمي الله يرحمه انك تكملي علامك هنا و اديكي خلصتي جامعة و بعد اللي حصل طبعا ما اعتقدش ليكي عين تتشرطي و تتأمري ...
- ما اتشرطش ليه هو انا كنت عمية ولا مكسحة يا ادهم !! انت عارف كويس اني رفضت مجدي لأنه كان عايز يقعدني في البيت ... اوافق عليك انت بامارة ايه ؟
إعتدل في جلسته بفخر: لاني ابن عمك و اولى بيك من الغريب
قامت وئام و هي تنفخ بغضب-
و انا مش موافقة يا ادهم و لو انت آخر راجل في الدنيا مش هتجوزك فاهم ؛!!
دخلت غرفتها و اغلقت الباب ورائها بشدة
نادية : بالراحة عليها يا ابني مش كدة ..الكلام اخذ و عطا
ده جواز مينفعش يكون بالغصب و هي مش عيلة عشان نغصب عليها ...سيبها تفكر براحتها مستعجل على ايه؟!
- راحتها ايه يا مرات عمي ! اللي من عمرها بقى عندهم بدل العيل ثلاثة !..انا اتفقت مع اعمامي خلاص ..هنجي يوم الخميس نكتب الكتاب و نلبس الدبل اعملوا حسابكم على كدة انا مش جاي اخذ رايكم انا جاي ابلغكم بس. . عن اذنك.
خرج من الباب و هو ينفخ بغضب:شايفة نفسك كل ده على ايه مش فاهم !! ماشي يا وئام الگلبة...ان ما دفعتك ثمن كل كلمة و ر'ميتك في الشارع زي كيس الز'بالة ما ابقاش انا ادهم ....صبرك عليا بس !!
بقلمي آلاء إسماعيل البشري
عند آسر
خرج الى الحديقة يرتشف كوبا من الشاي و هو يتصل باحدهم
آسر - فهمت المطلوب منك !!
نادر- فاهم يا آسر بيه
آسر-بس زي ما قلتلك يا نادر عايز المعلومات دي من هنا للليل .
في هذه الاثناء وصلت رنا
رنا : انا جاهزة يالا بينا انا اتصلت بياسين هو مستنينا اصلا
آسر : تمام ..بس يا ريت تتصلي برغد الاول تسأليها عن اخبار معاذ
انطلق بالسيارة و بعد فترة اتصلت رنا
- ايوة يا رغودة عاملة اي حبيبتي ؟
رغد- الحمد لله بخير .. انا سامعة صوت عربيات ! هو انتو جايين ولا ايه
- احنا دلوقت طالعين عالمستشفى بس جايين لكم بعد الظهر آسر كان عايز يتطمن على معاذ اخباره ايه النهاردة ؟
تنهدت رغد - قافل على نفسه و مش راضي يفتح لحد و مش راضي يروح الشركة...الا قوليلي يا رنا هو انتي عارفة ايه المشكلة بالضبط ؟! أصل آسر هو الوحيد اللي اتكلم معاه !
نظرت رنا الى آسر الذي اومأ لها بالنفي ثم اردفت : لما نتقابل هنبقى نتكلم في الموضوع يا رغود يالا سلام .
في مكان آخر نقصده لأول مرة
قصر أسعد الحديدي
أسعد بغضب: يعني ايه يا حسام !!! هو حصوة ملح و ذابت؟؟ ولا يمكن اتبخر !!! اخوك مختفي فين يا ز،فت انت !!!
حسام بتوتر: مش عارف و الله ... يعني من ساعة ما وصل كندا و احنا مش قادرين نوصله ...ده احنا حتى دورنا ف كل الكاميرات اللي في قُطر 10 كيلو من المطار هنا و هناك ..... ملوش اي أثر
أسعد : انت عرفت منه ايه الحكاية بالضبط !؟!
حسام : كل اللي عرفته أنه ضرب حد بالنار داخل الجامعة و كان خايف اوي و عايز يختفي كم يوم
أسعد بغضب جحيمي: ماشي ي مروان الگلب بس اشوفك !!
نظر الى حسام بغضب
- بقولك ايه !!!! هي كلمة واحدة ي حسام ! اخوك لو مظهرش في ظرف 24 ساعة انا هأو،لع فيكم كلكم فااااهم !!!
يتبع
تكملة للرواية هنااااااااااا
تعليقات
إرسال تعليق
فضلا اترك تعليق من هنا