سكريبت محمد وناريمان حصرى لمدونة قصر الروايات
سكريبت محمد وناريمان حصرى لمدونة قصر الروايات
- ماما، مين اللي عامل الرز بلبن ده؟.
جاوبتني وهي بتحط الطبق في المطبقية :
- دي ناريمان اسم الله عليها.
سألتها باستغراب :
- ناريمان مين؟.
لقيتها لفتلي و قالت بحماس :
- جارتنا الجديدة اللي لسه ناقلة هي و عيلتها امبارح، بس مقولكش يا واد يا محمد، البت عسل و دمـ ـها خفيف و ريحتها نعناع.
ضحكت وقولت :
- مالي أنا ومال ريحتها النعناعية يا ماما؟
هو أنا هحطها في كوباية شاي؟.
لقيتها اتغاظت وقالت :
- طب انزلّي من فوق الرخامة يا ابن الظريفة وروح لم هدومك اللى على الحبل، معرفش أنا ايه ده!.
كل ما تكسل تحط هدومك في الدولاب تحطهالي في الغسالة!.
نزلت من فوق الرخامة و قولت وأنا خارج :
- براحة طيب متزقيش.
- عوض عليا عوض الصابرين يا رب.
دخلت البلكونة وأنا بغني :
- ابياضيكا ابياضيكا
اسوديكا اسوديكا
نبيتيكا نبيتيكا
يلا بينا
بينا بينا
عالغسيل بينا بينا
ياللي هنا ياللي هناك
ايد هنا و أيد هناك
عالتيشيرب الأبيض
هيلا هوب هيلا هوب
اوعا البنطلون
ياللي عالابيض حوِّد علينا
الولا الحلو أنا
الولا الحلو محمااا
حلو الملامح
أَنّــــا
حاسب حاسب حاسب
الحتة السودة حاسب
على الحبل متمشبكة
حاسب الحتة حاسب
- يا نهار أبيض البنطلون وقع!.
- البنطلون وقع ..
و مشبكين حصلوه
هبات على السطح انهاردة.
قررت ألِم الفاضل من الهدوم عشان لو حاجة تانية وقعت أنزل اجيب كله مرة واحدة
ما أنا مش لاقي صحتي في كيس بسكوت يعني!.
- يا تقولي يا أقولك
يا تقولي يا أقولك
إن وشك نحس عليااا
يانا ياني هياني ياني
تيراريرارااا
- يختااااااااااي التيشيرت وقع
يا فضيحتك يا قرمط ..
اتسحبت بره البلكونة و نزلت الدور اللي قبلنا و خبطت على الشقة و ثواني و فتحت بنت بتضحك
أول ما شوفتها بصيت للأرض بسرعة وقولت :
- لو سمحتي يا آنسة في تيشيرت و بنطلون وقعوا على الحبل بتاعكم، ممكن تجيبهوملي؟.
- ايه ده!، هو أنت اللي كنت بتغني فوق؟.
ابتسمت بثقة وقولت :
- ايوه أنا، اشمعنى في حاجة؟.
افتكرتها هتتصدم أو هتمدح في صوتي ...
بس لقيتها بتقول بشكر :
- الله يكرمك يا أستاذ
بقالنا ساعتين بنحاول نِنَيم إبن أخويا ومنامش غير لما سمع صوتك و فكرك غوريلا بتغني أغنية ما قبل التهام الأطفال، فخاف إنك تاكله ونام.
يعني اخرتها ابقى الغوريلا اللي بتغني اغنية ما قبل التهام الاطفال؟
يا شيخة منك لله أنتِ و إبن أخوكِ وأخوكِ كمان،
حسبي الله.
هي لحظات صمت على ما استوعبت الصدمة و بعدها قولت وأنا عايز الأرض تنشق و تبلعني :
- هدومي يا استاذة خليني أمشي.
- آه ثواني حاضر.
جابت الهدوم و ادتهوملي وبعدها قالت :
- لو سمحت يا استاذ يعني لو ينفع تدي رقمك لأخويا عشان كل ما ابنه يزهقه يتصل بيك تغني في البلكونة؟.
رديت بغيظ :
- معملهالكوش فيديو كليب وانزلهالكم يوتيوب و كل ما المحروس يزمزق تشغلوهالُه.
- أنت بتتريق!.
- يعني المفروض اسمع كلامك ده واجيب طبلة و اطبلك؟
ما أنا لازم اتريق.
بصتلي بقرف و قفلت الباب في وشي ...
~~~~~~~~~~~~~~~
- دلوقتي بعد ما غسلنا الخلاط هنحط كوباية لبن و معلقة كاكاو و اتنين كوكيز و متحطوش سكر عشان الدايت.
- لا حول ولا قوة إلا بالله
أنتَ أتجننت يابني؟
بتكلم نفسك؟!.
- ايوه بكلمها
أصلي مش لاقي حد أكلمه قولت اكلم نفسي.
لقيت عينيها لمعت و ضحكت وقالت :
- طب ما تيجي اجوزك؟.
- تجوزي مين؟.
- أنتَ.
- أنا مين؟.
- أنت يالا
متعملش فيها عبيط.
- عبيط مين؟.
- أنتَ يا روح أمك.
- أنا مين؟.
هي متكلمتش كلمة زيادة
هي خرجت من المطبخ وأنا انتهدت براحة
الاستعباط حلو اوي
وقال جواز قال
ليه؟
أنا ناقص؟
ما كفاية البعيدة اللي قفلتني من الصنف كله، قال غوريلا قال.
~~~~~~~~~~~~~~~
- هوم غير هدومك؟.
- ليه يا ستي قلة الراحة دي ما تسيبيني يالترينج.
- هتخطب بالنرينج؟.
- أخطب!.
- أيوه يا حبيب أمك
هخطبلك ناريمان جارتنا
البت حلوة و ألف من يتمناها
قوم أنجز.
- لا اكسكيوز مي بقى
مين ده اللي يخطب؟
أنا؟؟.
- ما تخلص يا واد هو أنا هتحايل عليك؟.
~~~~~~~~~~~~~~~
- ما تقومي يا بت البسي بقى
العريس زمانه نازل.
- يا ستي مش عايزة اتجوز.
- أنا عايزة، قومي بقى.
- طب ما تتجوزيه أنتِ يا ماما؟.
حدفتني بالشبشب وهي بتقول :
- اتجوز مين يا قليلة الأدب!
قومي يا بت.
- عارفة يا ماما لو مكانتش طاعة الأم واجب؟
كنت اشتكيتك لجدو.
~~~~~~~~~~~~~~~
- احنا هنا انهاردة يا يوسف يابني عشان يزيدنا و يشرفنا نطلب ايد ناريمان لمحمد.
ابتسم أخوها وهو بيبصلي و بيحاول يكتم ضحكته وقال :
- الشرف لينا يا أم محمد.
و بعد الكلام المعروف
(مش عارفة غير الكلمتين دول)
دخلت العروسة وهي شايلة صينية العصير حطتها على الطرابيزة و قعدت جنب أمي وهي مبتسمة بكسوف
فضلنا نتكلم شوية لحد ما سابونا نتكلم شوية مع بعض ...
- ايه ده
هو أنتَ!.
- للأسف ايوه.
- طب ايه؟
مغصوب؟.
- الله ينور عليكِ.
- طب نرفض؟.
- عندي فكرة احلى.
- قول.
- أحنا ندي العلاقة الغريبة دي فرصة يا تكمل يا تخرب على دماغنا، متفقين؟.
- متفقين.
~~~~~~~~~~~~~~~
- تعرفي يا نرنر؟.
قعدت جنبه وأنا بقول بفضول :
-لا معرفش.
لقيته بيقول بإستفزاز وهو بيلاعب حواجبه :
- شكلك وأنتِ حامل بيفكرني بالـ افوكادو.
- نعم؟.
- ايوه لما بنقسمها نصين بيبقى في نص فيه البذرة
أنتِ بقى ببطنك دي شبه النص اللي فيه البذرة.
حدفت عليه مخدة وأنا بقول بغيظ :
- يا متنمر يا غلس، وربنا أنت رخم.
قولتها قومت من جنبه فقام ورايا وهو بيقول :
- يا بت استني
أنتِ زعلتي بجد؟.
- أيوه زعلت.
- طب ما أنتِ قولتي عليا غوريلا بتغني.
- أنا مالي يا عم ابن يوسف هو اللي قال الله!.
- طب معلش متزعليش
تعالي اقعدي بدل ما أنتِ مش عارفة تمشي كده.
- بتتريق عليا؟.
- ياختاااي
ياختاااي عليا وعلى سنيني
شكل الواد هيطلع نكدي بسببك.
- بسببي؟
نكدي؟
يعني أنا نكدية؟.
باس راسي وقال :
- حقك على راسي
أنا اللي نكدي
حقك عليا يا ستي
مرضية كده؟.
ابتسمت وقولت :
- ايوه خلاص
شوفت الاعتذار حلو ازاي؟.
- شوفت يا افوكادو.
- افوكادو تـانــــي!.
- ذلة لسان
ذلة لسان يا كبير
أنتِ بسكوتاية مش افوكادو يا حبيبي.
- احم استحيت.
- خليكِ مستحية بقى يا حبيبي، ياختي عليكِ وأنتِ مستحية.
~~~~~~~~~~~~~~~
تعليقات
إرسال تعليق
فضلا اترك تعليق من هنا