رواية خلقت من ضلعه الفصل الخامس 5بقلم ميادة يوسف الذغندى حصريه في مدونة قصر الروايات
رواية خلقت من ضلعه الفصل الخامس 5بقلم ميادة يوسف الذغندى حصريه في مدونة قصر الروايات
#_الحلقة_الخامسة
#_رواية_خلقت_من_ضلعه
#_بقلم_ميادة_يوسف_الذغندى
عصام…
واقف في جنينة بيت صغير، عصاه في الأرض، وبصلابته المعهودة بيحاول يخبي ألم رجله.
عم جرجس واقف جنبه، ماسك المفاتيح وبيبتسم بحنية.
جرجس:
ما تيجي تقعد هنا يا باشمهندس، رجلك هتوجعك… لسه الجبس فيها.
بس البيت حلو صح؟ قول آه بس.
عصام:
بيلف بعينه على المكان… البيت بسيط ومرتب، والورد حوالين السور ريحته واضحة.
حلو… بس لازم نشوف من جوه، ولما المهندس ييجي آخد رأيه… ونشوف محتاج يتغير إيه.
جرجس (متردد وبيقرب):
معلش يا باشمهندس… سؤال كده يعني… هو انت صحيح هتتجوز وصال؟
عصام
يبص له من طرف عينه:
ليه؟ فيها حاجة؟ البنت—
جرجس بسرعة:
لا حاشا لله! وصال دي الأدب والأخلاق والتربية… والله بحبها وعزها زي بنتي مريم بالظبط.
دي متربية معانا… إحنا والبيت في البيت.
بس أنا بتكلم على المستوى يعني… انت فين وهي فين؟
عصام يسند ضهره على السور:
المستوى؟
أنا اللي كنت في السما… ووقعت على الأرض.
وهي؟ عمرها ما طلعت السما ولا نزلت الأرض… ثابتة.
وده اللي ناقص حياتي.
جرجس:
بص له ببَلَه: يعني إيه؟ مش فاهم.
عصام يضحك:
ههههههه… اللي زي وصال صعب تلاقيه في الوسط اللي أنا عايش فيه يا عم جرجس.
يسكت لحظة.
عصام:
طيب يا عم جرجس… ندخل نشوف جوه ولا نستنى المهندس؟
قبل ما يرد
صوت خطوات خفيفة…
وصال ماشية من ناحية البوابة ومعاها مريم شايلة كيس خضار وبيضحكوا.
جرجس:
يا نهار أبيض… دي وصال ومريم!
عصام يبص… أول مرة يشوفها من قريب من أيام المستشفى.
ينادي بهدوء:
وصال!
تبص له ثانية واحدة… وتكمل مشي.
مريم:
مساء الخير يا باشمهندس.
(وتدخل هي ووصال البيت)
جرجس مصدوم:
وصال! بقولك الباشمهندس بينادي!
وصال ما تردش.
داخل البيت:
مريم تهمس:
ليه عملتي كده؟ الراجل بيكلمك!
وصال بصوت واطي:
أنا مش مستعدة أكلم حد… مش وقته.
في الجنينة…
عصام بابتسامة بسيطة:
واضح إنها زعلانة… أو بتحاول.
جرجس:
بنت أصول… قلبها حساس. ما تزعلش يا باشمهندس.
عصام:
أنا ما زعلتش… اللي يستاهل الرد… ييجي وقته.
جرجس:
يعني إيه؟ عندك كلام مش مفهوم.
---
بعد 3 ساعات – في الشقة اللي اتأجرها فوق العيادة
عصام:
تعبتك معايا يا عم جرجس… (ويديله فلوس) اتفضل.
جرجس:
إيه ده يا باشمهندس؟ أنا واقف معاك حب مش طمعان. كده أزعل منك.
عصام يدس الفلوس في جيبه:
لا لا… كفاية إنكم شلتوني فوق راسكم، في الوقت اللي أهلي ودمّي رموني في الموت.
جرجس يسمع صوت تحت:
استنى… في حد بينادي.
(ينزل لحظة)
يا باشمهندس… في ناس عايزاك تحت.
ده عز العايدي ابن عمك… عضو مجلس الشعب.
عصام يضيق عيونه ويحاول يمسك أعصابه:
ابن عمي؟ يامرحب… خليهم يطلعوا.
عصام (صوت داخلي):
اهدى… وخليك بارد.
الحق يتاخد بالعقل… مش بالصوت.
وديني لأخد حقي تالت ومتلت.
يدخل عز العايدي فاتح دراعه:
ابن عمي الغالي!
ألف سلامة! عرفت بالصدفة إنك عامل حادثة… فكرتك بره مصر.
عصام بابتسامة باردة:
حبيبي ابن عمي… ما اتصلتش ولا سألت؟
معلش… الدنيا تلاهى.
أشرف:
ألف سلامة عليك… عرفنا باللي حصل من مجدي.
عصام:
ربنا قدر ولطف… حادثة وأنا راجع من البلد… ومش فاكر حصلت إزاي.
---
♤♤♤♤♤♤ عند نعمة
نعمة قاعدة مع ست بتجيب هدوم حريمي للبيت.
نعمة:
يا اختي أنا قايلة قمصان نوم… تهبل.
إيه اللي ينور ده؟ هو أنا ترلا نقل؟
بسمة:
ههههه… يخيبك يا نعمة!
ده موضة يا بت!
وصال تدخل:
العصير يا خالتي… اتفضلي.
بسمة:
تسلم إيدك يا عسل.
شوارك وجهازك كله من عندي يا وصال… دا أنا اللي هجهّزك لعريسك!
نعمة:
هو الراجل اللي أبو وصال أنقذه… عايز يتجوز وصال.
وصال تهرب:
أنا رايحة أكمل مذاكرة.
نعمة:
اطلعي نظفي عيشة الفراخ… ولمّي الغسيل… وأكّلي الطيور.
وصال:
عندي مذاكرة يا خالتي.
نعمة:
مذاكرة إيه؟
ده عريسك متريّش… وغني… ومهندس زي العسل!
روحي اعملي اللي قولتلك عليه، وشوفي مين بيخبط وافتحي الباب ووراكي.
وصال تفتح الباب…
عصام:
كنتِ مستنية حد تاني ولا إيه؟
وصال تعض شفايفها:
حد تاني مين؟ ولا أولاني؟
عصام:
نعم يا جميلة… أنا ولا أولاني إزاي؟ أومال أنا إيه؟
وصال:
بابا مش هنا… إيه جابك؟
عصام:
جايله… نتفق.
وصال:
تتفقوا على إيه؟
عصام:
هفضل واقف كده كتير؟
وصال:
لأ… وقفلت الباب جامد!
بقي هو وهي برّه.
عصام مستغرب:
يعني إيه؟!
وصال:
طالعة فوق أنضف للطيور… وألم الغسيل.
عصام:
آه فهمت… كله عليكِ؟ وخالتك مش تعمل ليه؟
وصال:
خالتي جوا ومعاها ضيفة.
وانت امشي من هنا… مش يصح.
استنى عند جدي تحت.
عصام:
ماشي يا جميلة… هنزل أقعد مع جدك… وأتعرف عليه بالمرة.
وهو نازل بالعكاز… رجله تخونه.
وصال تتخض وتمسكه:
حاسب!
عصام قلبه يدق… وياخدها بالحضن من غير تفكير.
وصال تزقه… يقع من على السلم!
عصام:
آاااه!
وصال تنزل بسرعة:
حصلك حاجة تاني؟ انت موعود!
الجد يظهر:
فيه إيه يا وصال؟
إيه الهبدة دي؟
انت مين؟ وإيه وقعك كده؟ ده متجبّس!
وصال:
ده الباشمهندس يا جدي… اللي كان في عيادة دكتور أبانوب.
الجد:
آه… الغريق؟
عصام:
أيوه… كملوا تعارف وأنا مرمي! كمان بقيت غريق!
وصال:
أسند يا جدي معايا.
عصام:
لأ… جدك شكله تعبان… هاتِ إيدك إنتِ.
وصال:
يا محمود! تعال بسرعة!
تبص لعصام… وترجع لورا… وابتسامة خفيفة تطلع.
عصام:
هانت… كلها أيام… وكله هيبقى تمام.
---
يتبع…
ياترى إيه مستني وصال وعصام؟
تكملة الرواية بعد قليل
لمتابعة باقي الروايه زورو قناتنا علي التليجرام من هناااااااااا
بدل ماتدور وتبحث علي الروايات عمل
متابعه لصفحتنا على فيس بوك هنااااااااااا
الرواية كامله من هناااااااااا
مجمع الروايات الكامله 1اضغط هناااااااا
مجمع الروايات الكاملة 2 اضغط هنااااااا
تعليقات
إرسال تعليق
فضلا اترك تعليق من هنا