رواية الصقر المتمرد الفصل الثامن وعشرون 28بقلم إيمان جمال حصريه في مدونة قصر الروايات

رواية الصقر المتمرد الفصل الثامن وعشرون 28بقلم إيمان جمال حصريه في مدونة قصر الروايات

رواية الصقر المتمرد الفصل الثامن وعشرون 28بقلم إيمان جمال حصريه في مدونة قصر الروايات

الحلقة تستاااااااهل وحقكم علياااا.... 

#الحلقة_28

#الصقر_المتمرد

#بقلم_إيمان_جمال

#لؤلؤة_الكتابة

عرفان خرج يشوف صقر راح فين وعرف انه قاعد على البحر وراح قعد جمبه من غير اي كلمة

صقر بصله ورجع بص أدامه……عرفان: انا مش خاين ياصقر

صقر رد عليه من غير مايبصله: واللي انت عملته دا تسميه ايه

عرفان: اسميه حب

صقر بصله بغضب: ماتحترم نفسك

عرفان: انا بقولك اللي انا حسيت بيه على فكرة، وعارف اني غلطان بس حقيقي المشاعر دي جات غصب عني، ممكن تقول صعبت عليا من اللي انت عملته فيها وما انكرش اني معجب بيها أوي

صقر بعصبية: امشي من ادامي عشان اقسم بالله هموتك

عرفان: على فكرة انا جاي اتكلم معاك عشان اقولك الحق حبك ياصقر واوعى تخسره وسيبك مني، انا عارف اني هكون كويس عشان اختارت طريق مش طريقي واختارت حب مش حُبي، حافظ على حبك عشان ذي ما انا فكرت فيها فيه ألف غيري هيفكر فيها وساعتها مش هتعرف تمنعهم

صقر بغضب: مستحيل اسمح لحد يقربلها 

عرفان: كل دا في ايدك انت 

صقر بصله واتكلم بهدوء: انتو راجعين البلد امتى؟ 

عرفان: مش عارف بس ليه بتسأل؟ 

صقر: عشان هرجع معاكم

عرفان ابتسم: هي مش هتيجي غير لما تخلص امتحانات يعني أدامها حوالي شهر او اقل 

صقر: عادي هروح معاكم وهي تبقى تيجي براحتها 

عرفان: طب ماتروحلها القاهرة؟ 

صقر: لا البلد أحسن 

عرفان: ماشي، عالعموم احنا هنقعد شوية نغير جو وبعد كدا نرجع 

صقر: براحتكم والحجز على حسابي ماهو مش معقول تكونوا في القرية بتاعتي وتدفعوا 

عرفان باستغراب: دي قريتك؟ 

صقر: اه شريك فيها بس مكانش حد يعرف 

عرفان: ياعم الخِطر انت

مراد وصل دهب وراح على العنوان اللي بعتو عماد، وعماد اتقابل فيه 

عماد: حمدلله على السلامة ياعمو

مراد: الله يسلمك ياعماد، ها هو فين؟ 

عماد: على البحر ومعاه عرفان

مراد باستغراب: عرفان هنا؟ 

عماد ضحك: دا عرفان وبدر وآدم كمان

مراد ضحك: كمان

عماد: ايوا الشلة كلها هنا

مراد راح معاه لعند صقر وشافه قاعد على البحر ومعاه عرفان، صقر وقف احتراماً لأبوه، وعرفان سلم عليه وسابهم لوحدهم يتكلموا 

صقر حضن ابوه: متأسف يا بابا ماتزعلش مني

مراد: مش زعلان منك انا زعلان عليك يا صقر

قعدوا سوا على الشاطئ وعماد اخد شنطة مراد ودخلّها الشاليه 

صقر: هحاول احل كل حاجة يا بابا 

مراد: طب انا عندي ليك خبر

صقر بصله: خبر ايه؟ 

مراد: تقى طالبة الطلاق

صقر بغضب: على جثتي

مراد ضحك: وقعت؟ 

صقر دور وشه بعيد عن ابوه واتكلم: الصقر مايقعش

مراد: وليه بتحبي وشك

صقر بصله: عاوز ايه يا بابا

مراد: عاوزك سعيد وفرحان ياحبيبي وحافظ عليها وانسى اللي فات وابدأ معاها من جديد 

صقر: طب ازاي وهي طالبة الطلاق يعني خلاص كرهتني

مراد بتوتر: طب بما انك رافض الطلاق هي قالتلي حاجة تانية

صقر بسخرية: ايه هتخلعني؟ 

مراد: عرفت منين

صقر: بدر قالي 

مراد ضحك: هو مش ناوي يمسك لسانه أبداً 

صقر ضحك: لا ازاي ود تيجي باردوا 

مراد: عاوزك ترجع معايا

صقر: انا هروح البلد 

مراد: اشمعنا؟ 

صقر: عادي عشان فرح بدر واهو اغير جو

مراد غمزله: تغير جو معاها

صقر ضحك: كدا يا بابا 

مراد: ياحبيبي انا عاوزك مبسوط ومرتاح

صقر بص ادامه: ان شاء الله هتصرف 

البنات قاعدة بتذاكر ومنه كانت في الاوضة بتكلم آدم وخرجت للبنات: جدو مراد وصل عند صقر خلاص

ليلى: طب تمام 

تقى: هي جميلة مجاتش ليه؟ 

ليلى: هتيجي بس راحت الجامعة تجيب ملخصات

منه: بقولكم ايه ماتيجو نخرج شوية ونغير جو المذاكرة دا 

ليلى: يلا يابت اقعدي ذاكري

تقى بصت لليلى: بصراحة انا زهقت

ليلى ضحكت: دا احنا لسة بنقول يا هادي 

تقى: لا تعالو نخرج ونقضي يوم حلو ونبقى نيجي نذاكر وكمان شكلك نسيتي ان عيد ميلادي كمان يومين وعاوزة اتصور

ليلى خبطت على راسها: حقك عليا انتي عارفة اللي انا فيه 

تقى ابتسمت: مش زعلانة منك عشان مش بعرف ازعل منك

منه: طب يلا قوموا

البنات قاموا وتقى دخلت تلبس ووقفت محتارة بس هي كانت اشترت دريس اون لاين عشان تتصور بيه 

كان باللون الأبيض وكان بكط (حمالاته عريضة من عالكتف) وكان طوله لحد الركبة فقط واختارت تلبس كعب عالي بس مش عالي ولونه أبيض شفاف وسابت شعرها نازل من غير ماترفعه، البنات دخلوا شافوها

ليلى بإعجاب: ايه الجمال دا

تقى بتبص لنفسها في المرايا: بجد حلو؟ 

منه: جداً 

تقى: يعني اللون الأبيض حلو مع بشرتي؟ 

ليلى ابتسمت: جميل اوي عليكي ياتقى، ماشاء الله مافيش ولا غلطة

منه: يلا بقى

البنات خرجوا سوا هيشوفوا اليوم هيمشي معاهم ازاي 

نيجي للڤيلا، فريدة قاعدة في الجنينة وعلي جه قعد معاها 

علي: انتي خلاص فجأة حبتيه؟ 

فريدة: مش موضوع حبيته يا علي كل الحكاية اني فكرت بعقلي اصل يعني هنوصل لإيه باللي بيحصل دا 

علي بغضب: هنوصل انه ما ياخدش حاجة من ورثنا

فريدة بعصبية: انت غبي ولا مش عاوز تفهم دا اخونا يعني ذيه ذيك يا علي، كفايانا كره بقى 

علي بكره وغل: لا مش كفاية ولازم اخلص منه ماهو يا انا يا هو

فريدة بغضب: فوق لنفسك بقى انت مش شايف عيالك اللي بعدوا عنك ومصدومين من اللي حصل، فوق قبل ماتحصل كارثة 

علي بعصبية وصوت عالي: مايهمنيش اي حاجة غير ان محدش ياخد مني حقي

نادية جات من وراه: لو فضلت كدا هتخسرني انا وعيالك يا علي

علي بصلها وسابهم ومشي اخد عربيته وخرج بارة الڤيلا 

نادية قعدت ودموعها نزلت: انا مش عارفة اتصرف ازاي نفسي يسمعني 

فريدة: للأسف مش راضي يسمع لأي حد خالص

نادية: لازم يسمع، لازم يفوق انا مش هقدر استحمل اللي بيحصل دا

فريدة: ان شاء الله اللي جاي خير 

البنات خرجوا وتقى حاسة انها مبسوطة ومتغيّرة عن كل مرة وهنا إتأكدت ان فيه بداية جديدة وتقريبا حياة تانية 

ليلى شايفاها سرحانة: سرحانة في ايه؟

تقى: سرحانة في اللي جاي

منه: اكيد اللي جاي هيبقى مع صقر

تقى بصتلها بهدوء: اللي جاي لو هيبقى معاه فأنا مش عاوزاه 

ليلى: مش يمكن يحصل تغيير؟ 

تقى: عارفين انا بقيت حاسة اني باردة، حتى قلبي قفل على حبه لصقر وبيتعامل كأنه مش موجود على الرغم اني عارفة انه هيضعف مع أول مقابلة بعد كل اللي حصل بس انا مش هسمحله، همشي ورا عقلي يمكن اكسب

منه: طب ولو كان حبك؟ 

تقى ضحكت: حبني مرة واحدة، دا انتي طموحك كبير اوي

ليلى: منه عندها افرضي فعلاً حبك ساعتها هتعملي ايه 

تقى: والله انا مافكرتش عشان مش عاوزة افكر في وهم، بقولكم ايه قفلّوا عالموضوع دا يقى ويلا قوموا صوروني 

البنات محبوش يضايقوها وراحوا يصوروهم ويتصوروا سوا 

آدم كان عارف ان تقى عيد ميلادها كمان يومين وحابب يقول لصقر وخرج يدور عليه واتقابل في عرفان 

عرفان: رايح فين؟ 

آدم: ماتعرفش صقر فين

عرفان: تحت مع بدر، ليه؟ 

آدم: تعالى وانت تعرف 

نزلوا سوا وصقر كان مع بدر ومراد وعماد وقعدوا معاهم 

آدم: خالو

صقر بصله: طالما قولت خالو يبقى هتتكلم جد

آدم ضحك: بصراحة اه

صقر: طب اتكلم

آدم: انا ماقولتش اي حاجة من اللي انت قولتها يعني لمنه عشان ماتقولش لتقى، قولت لما تيجي منك هتبقى احسن بس انا عايز اقولك ان عيد ميلادها كمان يومين

صقر بهدوء: وايه المطلوب؟ 

عرفان بصله بغضب: يارب صبرني

بدر ضحك: استنى بس ياعرفان 

عماد ضحك: محدش فيكم هيقدر عليه

مراد: صقر اصلا مكانش بيهتم بيوم ذي دا، احنا بنحتفل بيه معاها كل سنة 

آدم: بس ياجدو السنين اللي فاتت تقى مكانتش مرات خالو صقر بس السنادي غير كل سنة واكيد هي كان نفسها تحتفل بيه معاه 

صقر: انا مش شاغل دماغي 

مراد: طب ليه ياصقر، يعني انت قولت هتحاول تصلّح اللي حصل، ابدأ بعيد ميلادها

صقر: لا يا بابا 

صقر قام وسابهم…..بدر: اراهنكم انه هيعمل حاجة

عماد: لو هيعمل كان قال

بدر: لا صقر بيكابر ومش عاوز يبان ادامنا انه خِسر وقلبه كسب في الآخر

آدم: ما اظنش لانه كشف نفسه لما اعترف انه بيحبها ادامنا

عرفان: في اللحظة دي صقر مكانش ناوي يعترف بس من كتر الضغط اعترف وبعدها سابنا ومشي فذي ما بدر قال انه لو عمل مفاجأة ليها مش هيقول 

عماد: واعتقد باردوا انه مش هيعرفها بإنه صاحب المفاجأة

مراد: للدرجادي فاهمينه؟ 

عماد ضحك: بص ياعمو حضرتك والده اه بس احنا اصحابه، خرجنا وقعدنا واتكلمنا وشاركنا في مصايب ومقالب فأكيد فاهمين دماغه 

نرجع للبنات خلصوا تصوير وتقى قاعدة سرحانة وبتكلم نفسها من غير صوت

(لازم تاخدي حقك منه، لازم تفوقي وتثبتي انك أد إيه قوية، لازم يا تقى تردي كرامتك أدام الكل) 

ليلى بتكلمها: انتي يابنتي

تقى فاقت من سرحانها: ايه يالولو

ليلى: سرحانة في ايه؟ 

تقى: لا أبداً مافيش، انا بفكر بس في حاجة وعاوزة انفذها

منه: حاجة إيه؟ 

تقى: عاوزة احتفل بعيد ميلادي 

ليلى باستغراب: دي اول مرة تحبي تحتفلي بيه اشمعنا المرة دي؟ 

تقى بتفكير: عادي حابة احتفل بيه السنة دي خصوصاً ان عاوزاه يكون مميز واني هبدأ بداية جديدة 

ليلى بتبصلها اوي: ناوية على ايه ياتقى

تقى: ناوية اني أفرح نفسي ويلا عشان نرجع البيت 

منه وليلى بيبصوا لبعض مستغربين طريقة تقى 

آخر اليوم صقر قاعد لوحده بعيد عن اصحابه بيفكر في ازاي يقدر يفرّحها ويفاجئها في عيد ميلادها وفي اللحظة دي تليفونه رن وكان تقى ومكانش مصدق نفسه انها بترن عليه ورد 

صقر: الو

تقى: اذيك ياصقر

صقر: الحمدلله انتي عاملة ايه

تقى: تمام الحمدلله، انا بكلمك عشان اعزمك على حفلة عيد ميلادي

صقر استغرب كلامها: حفلة عيد ميلادك؟! ودا من امتى 

تقى: من دلوقتي انا حابة ان احتفل بيه واحتفل بإن كل واحد فينا هيعيش حياته لوحده

صقر بهدوء: يعني بتحتفلي بانفصالنا كمان؟ 

تقى: هتيجي ياصقر؟ 

صقر اضايق منها: اكيد هاجي عشان انفصالنا يستاهل حفلة فعلاً 

تقى: وانا عرفت ان اصحابك معاك اتمنى تعزمهم كمان عشان انت عارف ان معنديش اصحاب غير ليلى والبنات ومش عايزة الحفلة تبقى صغيرة 

صقر: تمام ياتقى سلام

صقر قفل المكالمة واضايق اوي وبيكلم نفسه بصوت: يعني انا قاعد افكر ازاي افرّحك وانتي عاوزة تحتفلي بانفصالنا تمام يا تقى 

البنات عرفوا من تقى انها عزمت صقر واستغربوا أوي 

منال: انتي معقولة كلمتيه؟ 

تقى: ايوا 

منال: وعزمتيه كمان؟ 

تقى ضحكت: اه يا بنتي في ايه

ليلى: هو ايه اللي في ايه، هو انتي مش مستغربة نفسك؟ 

تقى ابتسمت واتكلمت بثقة: دي اول مرة ما استغربش فيها نفسي 

منه: يعني انفصالك منه يستاهل احتفال؟ 

تقى: ايوا

جميلة: انتي بجد عاوزة تنفصلي عنه خلاص؟ 

تقى: ايوا ودا قرار مش هرجع فيه خالص 

البنات مستغربينها وسكتوا ومحبوش يطوّلو في الكلام معاها 

صقر راح للشباب وابوه وقعد من غير كلام 

مراد بصله: مالك؟ 

صقر بصله وبص للي قاعدين: تقى كلمتني تعزمني على عيد ميلادها

آدم باستغراب: عيد ميلادها؟ وهي من امتى بتحتفل بيه؟ 

صقر: هي بتحتفل بانفصالنا 

مراد: انفصال ايه؟! انت مش قولت مش هطلقها

صقر: هي اللي بتقول كدا يا بابا

عرفان: طب وانت هتروح؟ 

صقر: اه هروح وكلنا راحين

عماد: كلنا مين؟ 

صقر: كلنا كدا هنروح لأن قالتلي اعزم اصحابك كمان وانا هقول لتامر باردوا 

بدر: انا مش فاهم حاجة

آدم: ولا انا قادر افهم ايه اللي بيحصل دا 

صقر: انا عرفتكم اللي حصل فكلنا راحين الحفلة 

مراد: يعني هنرجع امتى؟ 

صقر بتفكير: بكرة 

صقر قام يشوف تامر فين وعرفه انه هيرجع القاهرة معاهم خصوصاً انه كان هيرجع عشان العيادة ونور هتستنى في دهب شوية عشان خاطر ابنها، وتامر وافق انه يحضر العيد الميلاد 

صقر مستغرب كل اللي بيحصل بس هو عارف انها خلاص اخدت القرار وبيكلم نفسه من غير صوت: انا لازم اتصرف وذي ما بابا قال هبدأ بعيد ميلادها ولازم اعتذر لها بس مش هعرّف اي حد عشان تبقى مفاجأة 

الوقت بيعدي والشباب رجعوا القاهرة والبنات عرفوا برجوعهم، وتقى حجزت مكان على النيل وعزمت كمان اصحاب الجامعة سواء ولاد او بنات 

ليلى: ليه عزمتيهم؟ 

تقى: عادي اصحابي

ليلى: ودا من امتى ياتقى؟ 

تقى: بقولك ايه يالولو ماتعديها بقى انا حبيت ان الحفلة ماتبقاش فاضية

ليلى: تمام يا تقى هعديها بس انا شكة ومش بش شكة انا كمان متأكدة انك مخبية حاجة

تقى ضحكت: ولا مخبية ولا حاجة انا بس اللي عاوزة اتغيّر شوية عن زمان

ليلى: تمام هحاول اصدقك

تقى بصتلها: لازم تصدقي ويلا بقى قومي نشوف ناقصنا ايه

صقر خرج من الڤيلا وقرر يشتري ليها هدية عشان يبدأ معاها صفحة جديدة ووصل عند محل دهب شيك

ونزل اختار دبلة جديدة وخاتم واسويرة ومن حسن الحظ ان هناك سلاسل بالحروف واختار سلسلة عليها حرفها T 

صاحب المحل: مش حابب تاخد انسيال كمان؟ 

صقر: انا جبت انسيال عليه حروفنا

صاحب المحل: تمام يافندم اي حاجة تانية؟

صقر: موجود دبل فضة كمان صح؟ 

صاحب المحل: ايوا يافندم المحل شامل كل حاجة 

صقر: تمام عاوز اختار واحدة

صاحب المحل: تحت امر حضرتك

صقر بدا يختار من الدبل واختار دبلة باللون الاسود جميلة ودفع الفلوس ومشي 

في الڤيلا، نادية وفريدة قاعدين مع مراد

نادية: غريبة ان تقى تحتفل بعيد ميلادها يعني 

مراد: انا بس مستغرب اننا كل سنة كنا بنتحايل عليها تحتفل بيه وهي كانت بترفض اشمعنا المرة دي

فريدة: هو ليه شايفين ان الموضوع غريب مايمكن حابة تفرّح نفسها 

نادية: هي فعلاً قالت كدا للبنات بس حاسة ان الموضوع فيه إنة 

مراد: ولا إنة ولا حاجة سيبوها تعمل اللي هي عاوزاه كفاية اللي عاشته الفترة اللي فاتت ويلا قوموا عشان تجهزوا وانا هنزل اشتري ليها هدية

تقى لبست دريس بلون اللاڤندر وخرجت راحت مكان الحفلة والبنات استغربوا بس هي قالت حابة تشوف كل حاجة بنفسها 

تقى وصلت المكان وبدأت تتابع كل حاجة واتفقت على كام حاجة 

واحد من اللي شغالين في المكان: يعني أهم حاجة النور اللي هينوّر على الشخص اللي حضرتك قولتي عليه؟ 

تقى بتفكير: ايوا 

الشخص: تمام

تقى فضلت في المكان وبعد شوية بدأ الكل يتجمع بس هي اختفت وبيدوروا عليها، صقر وصل وهو لابس تي شيرت باللون الأبيض وبنطلون باللون الاسود وكوتشي أبيض وفي ايده بوكيه ورد باللون الأحمر وفي ايده التانية شنطة هدايا فيها الهدية وأول ماوصل المدخل النور اتنوّر عليه ووقف مكانه يبص حواليه والناس كمان 

تقى ظهرت وفي ايديها المايك وبدأت تتكلم وعنيها عليه: انا عارفة انكم مستغربين ان دي اول مرة احتفل بعيد ميلادي بس انا مش بس بحتفل بعيد ميلادي لا انا كمان بحتفل بأنفصالي عن صقر، انا جايا اقول اعتراف، أعترف اني اول مرة اندم على اختيار ندمت اني حبيتك ياصقر عشان انت قاسي اوي مش بتحب غير نفسك وبس مش بتحاول غير انك دايما عاوز تجرح اللي ادامك وبس وتكسره ادام الكل، انا قولتلك تحضر وكل الناس عزمتهم بنفسي عشان اعرفهم انك انسان متكبر ومتمرد انا خلاص سميتك الصقر المتمرد، انت مش راجل ياصقر

صقر بيسمع الكلام وعينه كلها غضب وبيبص حواليه شايف الكل بيبص عليه وطبعا مصدومين من تصرف تقى

تقى بتتكلم بكل قوة: انا النهاردة بقولك ادام الكل انا ندمانة ان في يوم قلبي حبك عشان انت ماتستاهلش قلبي لان قلبي يستحق واحد غيرك يكون راجل، راجل ما اهونش عليه مش ذيك سبتني مرمية في المستشفى ومادخلتش حتى تطمن عليا لو بالكدب، انا استاهل راجل يحبني مش راجل قاسي وكل همه يجرح ويكسر وبس 

الحلقة خلصت ياترى اللي جاي شكله ايييييه؟؟!!

تكملة الرواية من هنااااااا