رواية رحلة عذاب الفصل الثالث وعشرون بقلم اسماء العذب حصريه في مدونة قصر الروايات

 رواية رحلة عذاب الفصل الثالث وعشرون  بقلم اسماء العذب حصريه في مدونة قصر الروايات 

رواية رحلة عذاب الفصل الثالث وعشرون  بقلم اسماء العذب حصريه في مدونة قصر الروايات 

23

"جلّ الَّذي سَمّاك أحمَد واصطَفاكَ

عَلىٰ البَريّة أن تَكون رَسُولا" ﷺ

عاصم بصلها بقرف من طريقتها وبقت بالنسبة ليه ممله و ادائها مبالغ فيه 

اتكلم بسخرية: 

وافرض لما تمو تي مكنتش موجود واضطريتي تستني بالليل ساعتها هعمل ايه هستناكي للصبح واغيب من شغلي ..جاتك نيله وانتي عبيطة 

بصلها واتكلم بحده

:بطلي شغل الصعبنيات ده شويه ..عاوز ارجع من بره الاقيكي مستحميه ومحضره العشا عشان هتيجي الاوضه 

سكت وكمل بضحكه ماكره وهو بيغمز 

:اصلي جايلي مزاج ارمرم شويه ..عشان كده عاوزك ..وابقي اعملي اي تغيير في شكلك ده ..اي حاجه تفتح النفس بدل ما الواحد تكون نفسه مفتوحه يبص في وشك تتسد 

مروه بصتله بملامح وشها الحزينه وعيونها الدبلانه وهزت رأسها من غير كلام 

عاصم بصلها بضجر واتكلم بغيظ 

:ماتفردي أم وشك المقلوب ده ...طول الوقت بوزك ممدود شبرين ومكشره زي اللي ضايع منها عيل...ده ايه القرف ده

سابها وخرج وهو بيشوح بأيديه 

ومروه علي حالها 

بعدها راحت تشوف هو عاوز ياكل..بصت في الورقه بتاعه النهارده وبقت تحضر العشا اللي مكتوب لحد ما خلصت 

بصت في الساعه لاقت انه فاضل وقت علي ما عاصم يجي ..راحت البلكونه ووقفت شويه وبقت تشم الهوا اللي بقت محرومه منه هو وشوفه الناس 

كانت الأجواء جميله جدا تحت وناس رايحه وناس جايه والحركه في كل حته 

بقت تتخيل نفسها زي منة أو بوسي أو حتي رنا اللي قابلتهم يوم الخطوبه 

بقت تتخيل نفسها بنت ناجحه ليها عيله وعندها شغل والناس بتحبها 

سكتت وبصت قدامها بشرود واتكملت بأستسلام 

:بس هم مش مروه وعمر مروه ما هتكون زيهم لأن مروه دي ولا حاجه ..اكيد لو مُت في يوم من الايام محدش حتي هيحس بغيابي ولا يحزن عليا والدنيا هتعدي عادي 

بلعت ريقها بوجع ودخلت عشان تستحمي وتجهز لعاصم لانها مش جمل كلمه واحده منه 

بصت لنفسها في المرايا بعد ما استحمت وبصت لملامحها اللي بالنسبة ليها وحشه أوي أوي والكل بيكره البص ليها (علي حسب اللي كانت تسمعه طول عمرها من الكل)

راحت ولبست عبايه بنص كم واخدت علبه كحل طانت الست بتاعه الكوافير ادتها ليها هديه عشان تجر رجلها للمكان حسب ما قالت 

اخدت منها وكملت عيونها بطريقه حلوه زي ما كانت تشوف منال علي طول بتعمل 

واخدت حبه علي طرف صباعها وبقت تحطهم علي حواجبها وترسم بيهم حواجبها لحد ما اترسموا رسمه حلوه واخدت السواد اللي باقي علي طرف صباعها عملته محدد وحددت بيه مناخيرها زي ما كانت تشوف منال بتعمل وشافت البنت في الكوافير برضوا بتعمل كده وده كان لوحده كفيل يخلي ملامحها جميله جدا 

لكنها مشفتش كده ..شافت نفسها وحشه اوي وكل مالها وعماله تزيد وحاشه 

حطت ايدها علي صدرها وحست بوجع مكان قلبها بقي يجي الأيام دي من وقة للتاني لكنها اتجاهلته 

فردت شعرها ونشفته وسرحته كويس اوي لحد ما بقي ناعم ومفرود وسابته علي حالته دي 

بعدها راحت قعدت في الأرض لحد ما عاصم يجي وهي حاضنه رجليها بأيديها بسكوت وعيونها زي ما تكون انطفت فيها الحياة 

محستش بالوقت وهي سرحانه وكل ذكرياتها الوحشه اتجمعت في بالها غصب عنها 

كانت حاسه بخنقه فظيعة من كل حاجه 

من كلام عاصم وتريقته عليها 

من دعاها اللي ربنا مش قابله 

من ذكرياتها اللي مفيهاش حاجه تفرح 

من حبستها هنا طول اليوم لوحدها 

حتي القطه صحبتها بطلت تيجي بعد ما كانت بتتونس بيها

محستش بنفسها غير وعاصم وشه في وشها تمام 

عاصم كان داخل البيت ..لكنه كالعادة لاقاه مضلم ومفيش نور داخل غير اللي جاي من البلكونه 

شاف جسم مروه المتكوم في ناحيه في البيت ومش باين منها حاجه 

نده عليها مره والتانيه لكنها مسمعتش لانها كانت سرحانه ..لحد ما قرب منها وبقي وشه في وشها 

ساعتها هي فاقت من سرحانها علي قربه منها ورغم أنها اتخضت لأنها علي غفله لاقته في وشها إلا انها اتمالكت نفسها وبصتله 

عاصم بصلها وبص لعيونها المتكحله ومرسومه بالكحل ولمعه عنيها اللي خلته سرح فيها 

لكن بوظ ده كله الحزن اللي كان واضح علي ملامح وشها وهينطق من نظرات عنيها 

قام وقف بسرعه وشغل النور وبقي يتكلم وهو متحاشي النظر ليها..لكن لما شاف هيئتها لما النور اشتغل غصب عنه فضل باصص عليها 

اول مره يشوفها عامله حاجه في وشها من ساعه الخطوبه 

كان الكحل لايق علي عنيها جدا ومبينها واسعه وتهبل 

حتي حواجبها كانت لائقه جدا مع عيونها ومكنش واحده تنفع من غير التانيه 

بلع ريقه واتكلم بأرتباك 

:هاتي العشا يلا عشان اتعشى 

هزت رأسها من غير كلام وراحت المطبخ تحت نظراته اللي كانت متبعاها  لحد ما جات واتعشي 

مروه اخدت البواقي لكنها حست نفسها مش جعانه عشان كده حطتهم في طبق وركنتهم علي جنب وخرجت بعدها 

عاصم بصلها واستغرب أنها خلصت بدري 

:ايه اكلتي بسرعه يعني ..

مروه بصتبه واتنهدت ومردتش وكانت مستنيه أمره عشان تيجي وراه 

عاصم فضل شويه علي النل ومروه واقفه وراه من سكات وفضولها غلبها وخلاها تتفرج علي اللي بيتفرج عليه وكان فيلم اجنبي خيال علمي 

حاجات جديدة عليها تماما ..لحد ما فاقت علي قفله للتلفزيون وشاور لها تمشي وراه 

مشيت وراه لحد ما دخلت الاوضه وفضلت برضه واقفه من غير كلمه 

وعاصم اخد هدومه وراح يغير في الحمام..خرج لاقاها علي حالها واتنهد بضيق 

:تعالي يختي بوشك اللي يسد النفس ده ...ايه البوز ده ده لو قا:تلك  قتىيل مش هتبقي ليا كده ..جتك نيله 

..... 

تاني يوم عاصم قام من النوم علي صلاة الجمعة 

يادوب صحي استحمي وخرج 

اما مروه كانت لامه هدومها بتغسلها بعد ما غسلت هدوم عاصم ..لكن الفرق إن عاصم هدومه اتغسلت في الغسالة أما هي هدومها غسلتها في الطشت البلاستيك اللي في الحمام ببواقي الصابون 

يادوب خلصت وراحت بسرعة نشرت الكل في المنشر الداخلي 

لحد ما خلصت وحضرت الفطار وعلي غير العاده اليوم ده عدي من غير ما عاصم يوجه ليها كلمه واحده أو حتي يحاول يضايقها 

لأن باله كام مشغول بحاجه تانيه أو بمعني اصح بواحده تانيه 

.....

:عاصم 

عاصم عامل نفسه مش سامع اللي بينده عليه وكمل بسرعه عشان يخرج 

لكن قاطعت طريقه لما وقفت قدامه واتكلمت بأعتراض 

:إيه هو انت مش سامع ..بقالي يومين بنادي عليك وانت مش هنا

عاصم بلع ريقه بتوتر واتكلم بتهرب 

:معلش يا منة مخدتش بالي أصلي مستعجل 

حاول يمشي لكنها وقفت قدامه من تامي واتكلمت بشك 

:عاصم أنا من ساعه خطوبة رنا وانا بقولك عاوزه اكلم مروه وانت مش راضي وكأنك بتتهرب ..في ايه يا عاصم 

عاصم بصلها واتكلم بتوتر واضح

:منة اكيد انا مش قصدي كده ..انا بس مشغول الفتره دي ومروه الدكتور مانع عنها الزيارات و..

منة قاطعته:

عاصم لو سمحت لو انت مش عاوز تعرفنا علي مراتك وتخليها تختلط بينا لأي سبب يبقي تقول علي طول يعني مفيش داعي تفضل تخلق أعذار وكل شويه تطلع بحجه شكل ..انت بس قول انك مش عاوزها تختلط بينا واحنا حانفهم علي طول 

كانت هتمشي لكن عاصم وقف قدامها واتكلم بضيق 

:منة انتي بتقولي ايه بس ..انتي فكراني مش عاوز اعرفكم علي مراتي يعني ولا عاوزها تقرب منكم لا طبعا الموضوع مش كده ابدا ..انا بس بخاف عليها اوي وهي زي ما قولتلك مناعتها ضعيفة أوي..أقل حاجه بتتعبها وأنا مش بتحمل أنها تتعب أو حتي تكح قدامي 

منة برفعه حاجب :

وبالنسبة أني بقولك عاوزه أكلمها..دي عذرها ايه بقي 

عاصم داري عيونه منها واتكلم بتبرير 

:أصل انتي عارفه انها موبايلها بايظ زي ما قولتلك ولسه بيتصلح وهي اصلا مش بتستخدمه عشان كده مطنشه المووضوع هي اصلا مش بتكلم غير اخوها وبتكلمه من علي موبايلي 

منة ابتسمت بأصفرار واتكملت بسماجه 

:خلاص يبقي خليها تكلمني من علي موبايلك واهي اتحلت أهيه وبالنسبة لموضوع الزيارة ده يتحل بعدين 

عاصم حرفيا عصر علي نفسه لمونه ورسم بسمه اصطناعية علي وشه واتكلم بهدوء مصطنع 

:حاضر يا منة ..اول ما هروح هخليها تكلمك ..

منة بحماس: 

وياريت بقي لو تصلح تليفونها في أسرع وقت ..إحنا البنات منقدرش نعيش من غير رغي ..وانا واثقه أننا هنكون شله جامده بعد ما مروه تدخل الشله دي 

عاصم بهمس لنفسه 

:البت منة دي مخها لاسع..لازم اخد بالي منها ..دي بحركه مجنونة واحده ممكن تعملها هتكشفني خالص ..والبت مروه دي اصلا هبلة يعني مش هتاخد مجهود وتقر علي كل حاجه ..واللي هيضيع في النص هو أنا بعد ما كل الشركه تشمت فيا لما يعرفوا بجوازه الشوم اللي أنا متجوزها..الوضع ده مش هينفع..انا للزم أسرع في خطوه طلاقي دي وإلا ساعتها هقوم ألاقي نفسي لبست الخازوق 

بص لمنة واتكلم وهو ماشي 

:حاضر يا منة إن شاء الله..لما اوصل هبقي اخليكي تكلميها 

سابها ومشي بسرعه قبل ما تمسك فيه وتطلب تاخد رقمها عشان تكلمها لما التليفون يتصلح ولا تطلع بأي فكره جديدة 

.....

سلمي كانت قاعده في الكافتيريا وقت الاستراحة وكل تركيزها مع باب الدخول ..لحد ما اللي كان نفسها فيه حصل ولاقت عاصم داخل هو وحامد والاتنين بيتكلموا 

عاصم لما شافها وقف لثانيه وعينه جات في عينها 

سلمي كان عندها أمل أنه لسه بيحبها وعيونه هتفضحه 

لكن عاصم كأنه عرف اللي بتفكر فيه عشان كده بعد عيونه عنها وراح قعد وحامد راح جاب ليهم قهوة وحاول ينشغل معاه بالكلام وميركزش معاها 

سلمي لوت شفايفها بزعل بس فكره لمعت في دماغها خلتها تقوم بسرعه وهي عاوزه تنفذها 

كانت يادوب معديه من جنب طربيزه عاصم وعملت إن كعبها اتلوح وهتقع..كانت مستنيه منه أنه يمسكها او يلحقها او حتي يعمل اي رد فعل يقول إنه مهتم بيها 

لكن ولا حاجه..لاقت نفسها بتقع في الارض علي رجليها بعد ما مسكت نفسها من الوقعه بطريقه بايخه قدام الكل 

:ألف سلامة عليكي يا آنسه سلمي..مش تخلي بالك 

سلمي رفعت عنيها واتكلمت بضيق 

:شكرا يا حامد هخلي بالي حاضر

بصت لعاصم مستنيه منه أي رد او كلمه لكن كل اللي عمله انه كان بيشرب قهوته ببرود وبيبص في التليفون بتاعه ومش مركز معاها اصلا 

سلمي وقفت وهي حاسه بنااااار من عاصم لكنها حاولت متبينش 

بينما عاصم كان عامل نفسه مش واخد باله منها لكنه كان مركز معاها ومع كل حركه منها 

وبطلوع الروح قدر يحافظ على ثباته الانفعالي وهو شايفها بتقع قدامه 

لكنه اقنع نفسه في النهايه انها متستاهلش حتي نظره منه 

بينما حامد كان فاهم اللي بيدور في دماغ الاتنين لس ٧امل نفسه مش فاهم 

.....

عاصم يادوب رجع البيت لاقي اتصال من منة 

كنسل عليها ودخل بسرعه لاقي مروه كالعا بتبص الأكل علي السفرة 

شدها من أيدها وقعدها علي الكنبه بسرعه وهي مش فاهمه حاجه وبتبص ليه بأستفسار 

عاصم بلهفة

:اسمعي كويس ..منة بتتصل وعايزه تكلمك ..

شاورت علي نفسها بمعني أنا 

عاصم بنفاذ صبر

:لا ماهو ده مش وقت غباء .منة من يوم الخطوبه وهي عاوزه تكلمك وانا بتهرب منها لكن النهارده مقدرتش ..عشان كده انا هرن عليها دلوقتي وانتي هتكلميها وتباني عادي ..ولو سألتك عن معاد تيجي تزورك فيه قولي انك مش عارفه وهتسألني وبعدها اديني التليفون وانا هتصرف ..اهم حاجه مش عاوزها تشك في حاجه واتكلمي زي بنات الذوات وخليكي ذوق فاهمه..ولو عجبتيني هديكي..

مروه قاطعته واتكلمت بهدوء 

:انا مش عاوزه حاجه يابيه ..انا خلاص الحمد لله رضيت باللي معايا ومش عاوزه حاجه ..ممكن حضرتك تكلمها وانا إن شاء الله مش هجيب ظنك ومحدش هيعرف انك متجوز واحده خدامه متقلقش 

عاصم بصلها بشك ورغم ده كله حس بزعل من نبره صوتها ..لكنه اتجاهل كل ده ورن علي منة اللي فتحت بسرعة 

:ألو..ايوه يا عاصم فين مروه 

عاصم بهدوء: 

منة معلش كنسلت عليكي..مروه كانت في الحمام ولسع خارجه ..أهيه معاكي كلميها

منة بحماس: 

مروه حبيبتي..عامله ايه يا قلبي وايه أخبارك 

مروه بصت لعاصم واتكلمت بمنتهي الهدوء 

:الحمد لله يا منة يا حبيبتي..انا كويسه خالص ..انتي اخبارك ايه طمنيني عليكي 

منة بزعل:

انا كويسه وكنت طول الوقت بحاول اتواصل معاكي من ساعه خطوبة رنا..كنت عاوزه اتطمن عليكي..والله زعلت اوي لما عرفت انك تعبتي ..حتي كان نفسي اقعد معاكي حبه كمان اما وبوسي ..بس ملحقناش

مروه ببمسه هاديه: 

والله وانا كمان حبيتك يا منة ..انتي وبوسي وحتي رنا  ورندا مع إني متكلمتش معاها كتير ..بس حبيتكم كلكم 

وكنت عاوزه اتطمن عليكم واعتذر عن اللي عملته آخر مره ..اكيد العروسة اتضايقت جدا من قله ذوقي

منة بسرعة 

:تضايق ايه يابنتي هو انتي عملتي كده بمزاجك...ده كله كان غصب عنك ..انتي ملكيش دخل وبعدين تعتذري 

ليه اصلا ..ده المفروض احنا اللي تعتذر علي اللي حصلك ..اكيد اللي حصل ده لأن العصير كان مش صحي وفيه مواد حافظه أثرت عليكي 

عاصم فضل مركز في كلمه كه مروه لانها كانت فاتحه السماعه الخارجية 

حرفيا طان متفاجئ من ردود مروه اللي كانت بمنتهي الذوق والعقلانيه كأنها اتبدلت وبقت واحده راقيه غير مروه العشوائية التلقائية العكاكه اللي عارفها 

عاصم بقي يشاورلها بأيده علس حاجات تعملها 

مروه فهمت عاوز يقول ايه وبقت تعمل نفسها بتكح 

منة بقلق:

ألف سلامة عليكي يا قلبي..طب انا هقفل دلوقتي واسيبك ترتاحي..بس هتصل تاني  متخافيش..ده انتي قعدتك مينشبعش منها 

مروه عملت نفسها بتكح وبتتكلم وهي بتكح زي ما عاصم بيقولها 

:معلش يا منة..بجد آسفه بس هضطر اقفل لان حلقي وجعني وفي دوا لازم اخده دلوقتي لأن مواعيد الدوا بتاعتي مينفعش تتأخر ..سلام يا قلبي

عاصم أخيرا قدر ياخد نفسه بعد ما قفلت المكالمه وحط إيده علي صدره براحه 

:ياااه كنا علي شعره وهنتكشف 

بص لمروه وكمل :

لا طلعتي بتعرفي تمثلي وتمرت فيكي اللقمه اللي بتاكليها عندي ..بس بكش منة تتهد وتبطل تتصل ..مش اي واحده تشوفها تكون عاوزه تصاحبها..دي غريبه اوي

.....

يوم الجمعة الساعه عشره ونص الصبح كان عاصم لسه صاحي ..بص في الساعة لاقي إن لسه فيه وقت علي الصلاة عشان كده قرر يكمل نوم ..خصوصا أنه نام متأخر ليله إمبارح 

لكنه فتح عينه بسرعه لما لاقي مروه داخله عليه وبتتكلم بتوتر

:عاصم بيه ..عاصم  بيه الحق الباب بيخبط 

عاصم اتعدل وبصلها وعيونه مش قادر يفتحها وبصلها واتكلم 

:مين اللي بيخبط في الوقت ده 

مروه بتوتر أكبر: 

انا لما بصيت من العين السحريه لقيت اللي بيخبط منة وبوسي والعروسة اللي رحنا فرحها ..حتي أصحابك الأولاد كله واقف علي الباب ..أعمل إيه 

عاصم بصدمة: 

مين؟!

يتبع... 

تكملة الرواية من هناااااااا 

لمتابعة باقي الروايه زورو قناتنا علي التليجرام من هناااااااااا

بدل ماتدور وتبحث علي الروايات عمل 

متابعه لصفحتنا على فيس بوك هنااااااااااا

الرواية كامله من هناااااااااا

مجمع الروايات الكامله 1اضغط هناااااااا

مجمع الروايات الكاملة 2 اضغط هنااااااا