رواية عاجر الفصل الثاني والثلاثون 32بقلــم الكاتبـــة زينب ماجد (حصريه في مدونة قصر الروايات)

رواية عاجر الفصل الثاني والثلاثون 32بقلــم الكاتبـــة زينب ماجد  (حصريه في مدونة قصر الروايات)

رواية عاجر الفصل الثاني والثلاثون 32بقلــم الكاتبـــة زينب ماجد  (حصريه في مدونة قصر الروايات)

رواية عاجر الفصل الثاني والثلاثون 32بقلــم الكاتبـــة زينب ماجد  (حصريه في مدونة قصر الروايات)

لبست بسرعة وطلعت من الحمام ..

ردت افتح باب غرفتي .. مقفول .. كمت افتح بيه .. صحت : دنيا انت هنا ؟  منو هنا ... منو قافل الباب .. دنيا اعرف انت افتحي الباب ..

كاعد احجي انطبك باب الحوش ..

طب حازم للبيت اني ادك بالباب .. حجه : ها الله يساعدج شكو منو جوا

فتحت دنيا الباب : ها اسفة بس بدلت كلبت بجامتي جنت لابستها صفح .. مو عدل

ضليت اباوع عليها ..

وهو يكللها : شلونج بداستج بابا كاعد ادرسين

- اي اي بابا كاعد ادرس ..

- عفية بويه شدي حيلج ما ضل لنصف السنة شي .. شوكت

- هذا الاسبوع

- ديلا خاطر من تنجحين اجيبلج هدية

مد ايده اخذ وجهه باسها من خدها وراحت تركض للسطح ..

وهو يحجي : اليطب معاملات بدائرة حكومية بالعباس يكره روحه ..

- اني ضليت اباوع وراها

ودخلت للغرفة وهو فتح الكنتور يريد يبدل ويكمل : ما طلعت ورقة خابر فلان وعلان وجيب صورة وجيب قيد وجيب ونعلان فد وضعية من خرب بهيج وضع جايف متت

اني صعدت ع الدجة مال الكنتور ومديت ايدي اتفقد التليفون ماكو .. باوع عقد حاجبه : شكاعد تسوين

- هيج اشوف التربة هنا يمكن خليتها

- اشوفها عنج

- لا عندي غيرها

نزلت ورحت للمطبخ حضرتله غداه واجيت هو مشغل مراد علم دار ومندمج بيه .. حطيت الصينية كباله وكمت .. رفع راسه : جا ما تاكلين

- لا اكلت هواي واني اطبخ جزت روحي

- جا وين رايحة

- اكمل شغلي

- دعوفي كعدي يمي

- هيه بس اخضهن ع السريع وانزل

صعدت لدنيا سادة الباب .. حاولت افتح بيه طكت السركي وفتحته كتلها : خذيتي الموبايل ؟

- لا ما خذيته

- اتجذبين عليه ؟ ترا اني معليه بس لمصلحتج اني ابوج بنفسه وصاني عليج وانتبه الج التليفون اذا ما رجعتي راح اتصرف

- جاي اكلج ما عندي شني كاعد اتهمينيييي

- اش لا تصيحين ؟

- اي شني كاعد اتهميني عد شي .. مو عيب اذا امي سوتلج اني شعليه تريديني اطلعين حركتج بيه

تحجي بصياح .. حتى تسمع ابوها

كتلها : انت رايدة تفضحين روحج كدام ابوج ليش تصيحين

- لان ما عدي شي افتهمتي ..

- خوش افتهمت

ردت امشي .. صاحت - واذا رايدة تروحين لبابا وتحجين لا عبالج اخاف روحي واحجيلا لان اني ما مسوية شي مفهووووم

- مفهوووم ادللي ست دنيا

عفتها ومشيت كلت اني شعليه هسه عسى ما تهرم اني ياهو ماتي شو مكروهه وجابت ولد امها وابوها ما دايرين عنها ولا يراقبوها اكعد اني اراقب وهي شلونها الابيض تسوي اسود .. بسرعة كلبت وكامت تحجي معلك تروح اتطلعني كدامه اجذب وجاي اتهمها .. شعليه

نزلت كعدت كال : شبيج انت ودنيا شو اسمعكم تتصايحون على شنو

-ع الهدوم سالفتهن سالفة مو مجاز تكول حرب البسوس يلبوسون ويذبون محد ينزل الهدوم الوصخة تعال فرزن وشوف منو النظيف ومنو الوسخ .

- خلي هالشي لدنيا كل كم يوم صيحي عليها تلملج اهدومهم الوصخة وتنزلهن

- ان شاءالله

كمت اكل وياه اغمس كمل واني كمت اسويله جاي .. وكاعد يباوع مراد علم دار يعيدون الحلقات مال الاسبوع كله يوم الخميس .. فنكعد نتابعهن .. كتله : العقد مال زواجنا شوكت ..

- بحيل الله الاسبوع الجاي ولو ما تنراد طبت المحاكم فد لعبان نفس وهوسة تكرهين روحج

- جا شلون نصل هيج نتحملها شنسوي

-حكه صدك خابرني قاسم ابن عمي باجر حنة بته امي ومرت محمد راح يروحن وكال خلي العائلة تجي تعرفون عليها العائلة هنا اذا تريدين روحي ويا امي

- وانت ما تروح ؟

- حنة بنات شلي بيها بس احتمال اوصلنكم واحتمال محمد ياخذكم

- ها خوش .. يعني بس بنات

زين .. تقبل اروح صالون

- علويش انت هنا حطيلج حمرة وكحلة و مشيها

- حازم هاي اول مرة يشوفني واني مو كلش اعرف للمكياج خو اروح صالون تمكيجني خفيف احسن عليمن بعد اكعد المطخ روحي

- بكيفج بعد ..

- باجر الصبح اروح لعد .. براس الشارع يمكن اكو صالون ..

كاعد نحجي طب سجاد وعلي من المدرسة

صاح عليهم ابوهم للغرفة وكام يسألهم عن المدرسة ..

و اني كمت حضرتلهم غداهم واصيح عليهم حتى يبدلون ويجون يتغدون ..

وحازم بدل وكال : راح اطلع للمحل محتاجة شي

- راح اروح للصالون اتفق وياهن اشوف شغلهن خاف مو حلو

- وحدج تروحين

- يا جا منو الياكلني

- لا مو .. ما ادري روحي بس لا تتأخرين .

خليته يروح بدلت ورحت للصالون لكيته معزل ..

خابرته كتله .. وسألته : اكدر اروح لبيت ام فراس هناك بناتهم ملتمات العصرية وكعدتهن حلوة

- اخذي امي وروحيلهن

مريت لبيت محمد .. عمتي نايمة كتلها : لعد اروح ومن تكعد خل تجينا اذا تكدر

كاعد احجي كعدت كالت : ها اصبية شتردين

- اجيت عليج اخذج ونتخم

- وين اتخمين

- تخمت ورحت للصالون ردت اسأل عن اسعاره شغله زين مو زين لكيته معزل

حجت مرت محمد : يل صالون مشيتي ؟

- هذا البراس الشارع

- لا تعبي روحج وروحي لذاك المقابيل محلات الاخوين مجربينهم شغلهن يموت

- صدك الكاه مفتح هسه

- لا هسه يعزلن بس روحيلهن الصبح باجر

- خاف نتأخر ع الحنة

- يمعودة من ورا الظهر نطلع هي حنة

- ها زين .. حتى اكمل شغلي واطلع

سعودة ما تكومين تروحين وياي لبيت ام فراس

- شسوين عدهن اليوم شادة حيلج ع التخامة ولج

- جا الواحد وين يروح والله البيت خنكة حتى الكهرباء العصرية تطفى وين نولي .. نتخم ما بيج حيل طبعا ماخمة ازيد مني رجليج مورمات تخامة مال سنين

- عود افتك من السانج اطيني شيلتي اطيني

ناوشتها مرت محمد وكالتلها تروحين ويانا

رفضت عاد كامت غسلت ولفت شيلتها وعبايتها ومشينا لبيت ام فراس واني اكلها : اطيتي ورقة الطلاك لامل

- لا والله ذكرتيني خل ارد اذيها ونمش

- واني وياج تطيها

- بيد الفروخ

رجعت خذته ومشت اطته بيد ابن اخو امل ورحنا لبيت ام فراس دخلنا شالتنا بالصلوات .. ما خلت حاجة محطتها كدامنا .. حجت مرت ابنها : ولج صارلي ساعة اباوع لكلبيتج عليج العباس شوفيني فصالج

نزعتلها العباية من يم جتفي وشلت حجابي كالت : وين مخيطتها عليج الله حيل عجبني فصالها

- اني مخيطتها بيدي

- صدك والله انت مخيطتها تعرفين

- يوم امس غير شغلتي هاي من اني هاكداتني

- عليج الله اطيج قماش تخيطيلي مثلها

- من عيوني جيبلي قماش واخيطلجياها

- بيش تخيطين هذا الفصال

- هذا اخيطه ب٨ .. بس هسه ما كاعد اشتغل اخيطها الج هدية

- لا لا ما اقبل لعد

- لا حرام اخذ

حجت ام فراس : خالة اخذي خاطر يتعودن يخيطن عدج اذا ما تاخذين يستحن بعد ما يخيطن تعبج هذا غير راح تكسرين ظهرج ع الخياط ما يصير

- لا خالة شنو قيمته بس خل تجيبلي القماش وسهلة تدلل

بس مو بس هذا الفصال عدي عدي فصالات خيطتهن لروحي يخبلن .. من حيرتي وكعدتي بالبيت شسوي من اودي قماش بيدج لو بسد احد اكعد اتمعمر بيه واخيط اتلهى

وكمت اشوفهن بتليفوني فصالات ...

تعجبن ووصني على ٣ كتلهن بعيني .. جيبلي قماش واني اخيطه الجن

خلصنا وكمنا وخذيت عمتي وياي .. ورحنا للبيت سويت عشا اني واها وكعدنا نسولف ونحجي .. كالت : دنيا كاعد تقرا لا شو بس فوك ما ينشاف طولها بالبيت

كتلها : والله لا اعرف درجاتها .. ولا تحجيلي شخذت وشجابت .. بس سجاد وعلي مرات يكولون وسجاد درجات مو زينة

- ما تقرينه

- خالة ما يلفي ولو كعدته يندار راسي من كثر ما يتجقلب ويروح منا ويجي منا وجوعان وعطشان وبطني وما يرضى .. فشسويله اعوفه

- ما يروح لامه تقريه

- هو ٢٤ ساعة كدامها بالشارع يلعب قابل ما تعرف تصيحه وتكله جيب كتابك ..

نزلت دنيا كالت : باجر بيش الساعة تروحون للحنة

حجت بيبتها : تروحين ويانا

- ما اروح ما احب

- شعدج هنا شسوين وحدج بالبيت ؟ يجي احد ماحود ما يصير

- ليش كبل شوية مو جنت وحدي عادي

- ما يصير جده .. انت صغيرة والدنيا ما تتأمن

- ما اروح بيبي مالي خلك ولا تبقين تحجين براس بابه ومو زين و ما يصير معليج

زمخت بيها وكامت تصيح عليها وتغلط

عاد دنيا عافتها وصعدت شوية وطب حازم عمتي كعدت تشكي منها وكالتله : ممنوع البت تضل وحدها بالبيت وسالفة البنية بس كارصة فوك لا تنزل ولا تخالط احد حتى من الكهرباء مطفية مو خوش .. امها ماكو انت ابوها اصعد راقبها شوفها شتسوي ما تسوي ..

كامت دنيا تصيح من فوك : صبا حشت براسج وكمت تحشين براس ابوي عليييييه شعليج بيه انزل ما انزل بكيفي

صاح حازم : بت الكلب ياهي هاي الشعليهااااااا

حجيت : لا اوكف اني ياهو مالتي وتكول حشيت ؟ اني يمتى حاشة براس احد ولو اريد خو احاجيك ليش احاجي بيبيتها ؟

صاحلها : انزلي بساع

- بابا ما اريد اروح

- انزلييي لج

نزلت كاللها : منو الشعليها تحاجين جدتج هيج دنيا ؟

- لا بس مو تحجي عليه يمك

- واني شنو عدوج وتحجي عليج يمي طايحة الحظ

احسبي حسابج هالاحد اني اجيج للمدرسة واسأل عنج وعن مستواج .. ولو لكيته ضعيف بالعباس ابطلج

- لا خو بطلني عليمن تروح اني ما احبن المدرسة

- اي بطلي انعل ابو المدرسة شمستفادين بس روحه جيه بطلي بويه

- بس اذا ابطل توديني يم امي اعيش ما انحبس هنا اني

- ممنوع تنكبرين هنا باب الحوش ما توصلين

- وشنو انحبسسس

- اي عيلي روحج وادرسي ما تريدين انحبسي واكعدي .

ضلت ترادده وتحجي .. وما رضت لو تروح يم امها لو تبطل

كاللها امشي للمدرسة واشوف لو لكيت درجاتج مو زينة ابطلج واسد الباب عليج ورجلج اكسرها لو وصلتي تعتب الباب .

عفتهم ورحت لغرفتي .. باردة ثلج

شغلت الهيتر بيها وبدلت هدومي وكعدت انتظر حازم

لثاني يوم .. كعدت من الصبح كملت البيت والغدا

ومشيت للصالون اللي كالتلي عليه مرت محمد .. لكيتهن ازدحام عرايس كتلها : بس مكياج

كالت : انتظري يجي دورج وادللي

صاحبة الصالون ووياها عاملة جوا ايدها بعد ماكو غيرها

والعرايس ٣ و وياهن بنات وكلهن يريدن  .. والصالون صغير .. صايرة لخة

ضليت كاعدة واباوع

العاملة بين تضرب الشعر شسوار وين التحف الثانية

كتلها :تريدين اعاونج احف البنية عنج

-تعرفين

-اي شلون ما اعرف روحي للبنية فيري شعرها واني احف البنية

وكفت لفيت الخيط وكمت احف لبنات اثنين ..

خبطت الصبغ وسالتني : تكدرين تحطي بس على ما اشوف هاي البنية

اخذته منها وكمت احط وام الصالون تباوع كالتلي : مشتغلة صالون كبل

كتلها : اي جنت ويا صاحبتي اشتغل ولو ما عادت صاحبتي

-ليش

-صارت مشاكل

- المشاكل تصير بس اذا صاحبة زينة ما تتعوض

-جنت اعتقد زينة بس طلعت امشية الماي من جواي ..

-ليش

اصبغ بشعر البنية وكمت اسولف عن وفاء لام الصالون

طلعت صديقتها الجانت هي وياها مفتحات صالون هم لاكيتها تحجي ويا رجلها وتوصي على غراض لبيتها بدون ما تكللها ورجلها ما مقصر

كتلها : ورجلج وينه هسه

-بالبيت مخمود

- وانت هنا تشتغلين

-جا التريد تعيش شتسوي فدوة لعينج لو رديت لاهلي يبطلوني من شغلي ويذبون جهالي على ابوهم خليني اشتغل ومكفية روحي وجهالي ويطبه طوب اسمك رجل يهواي من وحشة الليل

- شتسوين بعد

جيست راس البنية واخذت الشسوار كمت امشي على راسها حتى ياخذ صبغ بسرعة .. خابراني حازم ، رديت : ها

- مو طولتي

- جا ازدحام شسوي واني اجيت من تالي

- اي كليلها مستعجلين فضيها

- عرايس عدها قابل تعوفهن وتندارلي

- دفضيها يا بويه فضيها

- عمتي كالت ب٣ نروح

- اي هم ياله هسه ب١ علما تحضرن ارواحجن صايرة ب٣ يلا

- اي غير كاعد احضر

- فضيها يلا

ضحكت وكتله : ماشي تدلل حبيبي هسه اكللها

سديته خلصت العروس البيدها وهي تكلي : وانت هسه اتزوجتي مو

- اي صالي ست اشهر تقريبا

- احسنلج يمعود صح الرياجيل ما ينحملون بس ولا ذلة الاهل .. من ترديلهم مطلكة شايفة شيسوون بيج تصيرين جبل على امتونهم مو ابنية

- تحجيلي هالحجي

تحسرت وكمت اسولفلها على زواجي الاول وشلون اطلكت واشتغلت خياطة وسوايات اخوتي .. وهي اندمجت وياي حيل .. وكامت تسولفلي عن حياتها وعن عيالها وحمواتها واندمجنا بالسوالف

خلصت الشغل وياهن كالتلي : مكياجج عليه وعليج العباس كل يوم جمعة اذا تكدرين تعاي حطي ايدج ويانا واحسبلج شغلج

كتلها : لا والله تسلمين ما اشتغل ما يرضى بس بعيني .. انت خابرني واكله واذا رضى اجيج شعدي شو بطرك روحي اشكف عباتي واجيج

- اي والله فدوة لعينج .. ياريت

يلا تعاي كعدي خل احطلج مكياجج

كعدتني وكالتلي : عدي عدسات تريدين احطلج

- اي والله حطيلي بس كون لون مو قوي

- لا لون رصاصي غامق يوسع عينج ..

حطتلي عدسات وسوتلي مكياج خفيف .. ولبست ملابسي يمها ولفتلي الربطة هي ودنبستها وحطتلي بروش من يمها.. وما رضت تاخذ فلوس المكياج اخذت بس فلوس العدسات

طلعت منهن وصلت البيت حازم مطنكر يكول : الساعة ٢ ونص شتلحكون بعد ؟

- اني جاهزة شعدي

كام يدرم ويحجي ويخابر على محمد لان محمد كلفه يوصل عائلته ويانا ما بيه حيل يروح ودنيا عاندت متروح كال : اني ارجعلها شسوي على ما ترجعون

خذانا وودانا للشعلة وكال : محمد يمرلكم بعد

دخلنا الحنة وكرابتهم كلهم جانوا ملتمين هناك ..

خوات امل هم جايات

حمواتي و عمتي ما يحجون ويا اهل امل .. على السوته امل بحازم ووصل الموت من ورا الفيديو اللي انشر .

طول الحفلة الاحواء مشحونة ..

اجوي اهل العريس حنوا البنية واحتفلوا وتوزع كيك وبيبسي اني كاعدة يم عمتي والبنات يهزن ويركصن وصوت الديجي عالي .. نبتني اخت امل : ما تكومين تركصين عاد هاي شغلتج شفنا ركصج بالفيديو تعرفين تهزين

- صحيح بس من اتزوجت كمت ما اركص لغير رجلي .. بس هو يستاهل اهزله جسمي واركصله واونسه ..

انغثت وضحكت وهي تبين ضوجتها : جا غير شغلتج

- شلون لعد بعد محترفة بشغلي ..

- ما ادوم وداعتج .. ما طوله البيت مو بيتج ما ادوملج وعلي .

- بس الله اليدوم ماكو غير احد دايم

ردت عمتي : ناس هنا وما اكدر احجي واطلع صوتي عليش ما تجفين شرج وتنداريت وتعوفين مرت ابني بحالها ما كافي الاجاله منكم .. يزي

- هسه انسن زينات امل كلهن وبدلتيهم بهاي ودازتلها ورقة طلاكها ما غزرت بعينج وكفاتها

- زيناتها من وكفت كلبه وسودت وجهه كبال الوادم .. كتلج خلينا ساكتين البيت اله حرمته وناس هنا عيب .

كامن يتنادسن لحد ما اجت ام البيت كامت تحجي وياهن بسكوت حتى يسكتن .. عمتي خابرت على محمد .. شوية واجانا طلعناله ..وعمتي الطريق كله تسولف وياه ع الصار

وصلنا البيت حازم منتظر بالبيت ..

نزعت وكعدت اسولفله وهو يبدل ويسمع .. كمل كال : خل يولن معليج بيهن

عافني وطلع .. واني طفيت الضوا ونمت

كلت اناملي ساعة واكعد راسي حيل دايخ من صوت الديجي ..

بس شو ذبيت روحي مثل الميت

كعدت بالليل  ظلمة حيل وباردة واحس حازم بصفي ..

تلمسته نايم يا شوكت طلع شوكت رجع

جريت التليفون ب٣ ونص بالليل

شكد نمت ولا حسيت .. ذبيت التليفون وشلت ظهري امط بجسمي اريد اكوم .. اتحرك حازم واندار على جيهتي ..

مديت راسي بسته بخده بلحيته بركبته شميته .. وجاي اوخر كضني : تعاي يمي

- لا يمعود بس اشرب مي

- شربي وجيبلي وياج

حجاها واندار نام على بطنه ..

جريت الغطا وغطيته زين وبسته براسه وكمت اتلمس قراصتي ما لكيتها ..

اني لابسه ثوب نوم ستن ماروني يصير فوك الركبة

وصلوخ ما بيه ردن طلعت الباب البيت مثلج .. كمت اركض على اطراف اصابيعي .. واصيح : ييمييييي باااردة

شغلت ضوا المطبخ .. ودنكت للكاونتر طلعت سراحية ترستها من البوري ووكفت شربت .. ورحت طفيت الضوا ...

وما احس الا رجال واكف ع جامة المطبخ  يباوع

فزيت بسرعة اني حسبالي جنة لو فد شبح وفتحت الضوا بسرعة .. ردت امشي للكراج

اتذكرت روحي مصلخة عزا العزاني ..

ردت ارجع للغرفة اجيب شي ..

جان تطب دنيا من برا .. كتلها : منو هذا الجان

-ما ادري اني جنت بالتواليت منو

-واحد برا اني شفته جان ديباوع من جام المطبخ

رجعت تباوع : ماكو احد

-خل اكعد ابوج

-كاعد اكلج ماكو احد مشت طلعت باوعت ماكو احد

-اني شفته قابل اتخيل ..

خلت وصعدت واني مشيت لحازم .. كتله : حازم اكعد

-شكو

-اكو واحد من طبيت اترس مي وطفيت الضوا جان ديباوع من جام المطبخ

-واحد

حجاها وفز : منو

-ما ادري ما شفت شكله بس رجال متأكدة

-رجال وانت بهالوضع بدلييييي

كام بسرعة ومشى للكراج تفقد الاستقبال الباب

ماكو شي كال : كلشي ماكو

- دا اكولك والله شفته

- يعني منو ساطي علينا بهالليل حتى شايفته

خلا وطلع للشارع هم ماكو احد

صارن عيونه بكصته وهو يريد يفهم شكو خصوصا اني جنت ما لابسة ملابس محتشمة كام يصيح : الف مرة كايلج من اطلعين من الغرررررفة بدلي ملابس زينة طالعة وزرورج وزنودج وصدرج كله طااااالع وضعيييية هاي

- حازم بس ردت اشرب مي والساعة ٣ منو كاعد كلت بس اشرب وارجع  شيطلعلي ملابس ابدل علمود اشرب مي

- وهسه هذا منو الباوعج

- شمدريني دنيا تكول ماكو احد بس اني شفته والله

- دنيا جانت برا ؟

- اي بالتواليت البرا

صاح عليها ما ودت صعدلها نايمة كال : البنية نايمة

- خاف هسه نامت جانت كاعدة

- دطبي خل اقفل البيت ..

قفله واجاني .. ما خذت عينه نوم

اني ضليت اتكلب بفراشي وافكر وهو يدخن ..

نزلت راسي من مخدتي وحشرت راسي بزنده .. طفه الجكاره واجا شال راسي ومد ايده .. حجيت : متاكده شفت واحد

- اني اتأكد من الموضوع باجر شوف شلون

حضنته ونمت بين اديه وراسي مشوش

ثاني يوم الظهر ..

الظهر جان حازم متمدد يتابع اخبار واني كاعدة ع المكينة مالتي اشتغل بيها ..

اجتني رسالة ..

مكتوب بيها : من شفت زرورج ولحد هسه اني شايط مو مرة ماخذله ابن الكلب خوش قطعة .

فزيت من مكاني ..

كتله : حازم شوف هاي الرسالة ..

يمه ادخيلك ربي

كام بسرعة .. اخذت التليفون من عندي وقراها

لو تسودن تحس وجهه صار اسود اتصل .. رن ..

اجا رد .. حازم صاح : الووو

انسد الاتصال بسرعة

رجع خابر عليه مغلق .. كام يخابر يرد كله مغلق ..

انوب رجع عليه

انت كله منج وانت ما تستحين ولابسه مصلخ بالبيت

كتله : هسه اني شعليه طلعت بس اشرب مي .. شمدريني احد ساطي علينا همهاي لازم اتحذر منها قابل اني كاعدة بغابة شو بيتك وكل كرايبك وعمامك داير مدايرنا .

- اسكتي بالله اسكتي .. هسه هذا منو منين اعرفه ؟

اخذ التليفون وبدل وطلع من البيت ..

واني بقيت بالبيت .. نزلت دنيا كالت : وين راح بابا

- شمدريني

- سمعته يصيح عصبي

- من كتلج البارحة شفت واحد اتجذبيني تكليلي اني جنت برا وماكو .. الولد دزلي رسالة وطلع صدك شايفني

- هو دزلج رسالة

- تعرفينه

- اني شمدريني انت الشفتي لو اني اني ما شفت احد

- مستحيل ما شفتي ..

اني بين شوفتي اله وبين رجعتي للغرفة ودخولج للبيت ثواني يعني اكيد شفتي كدامج من مشى والا ثواني شلون شرد ؟ الباب مقفول 

- شمدريني انت كله اذبينه ابلوتي دروووحي

عافتني وصعدت ..

واني راسي اندار بالسالفة

لليل رجع سالته روحه طالعة .. ما كدر يحصل معلومة عن الرقم ولازم دعوة ويصعدها حتى يعرف صاحب الرقم شسمه ومعلومات ما يصير تنطي لاي واحد ومن هالكلام ومنتظر باجر جماعة بشركة الاتصالات بلكت يكدرون يطلعوله معلومات الرقم .

مر يومن وتلاثة ..

اسبوع يلا جابوله معلومات الرقم مال التليفون ..

اسم ما يعرفه .. واحتار بالسالفة ..

من بعد اسبوع خابرتني ام الصالون ..

كالتلي : اذا عدج مجال تجين تساعديني

كتلها : بس ابلغ رجلي

من كتله كام يحجي ولا تجيبلنا الحجي واكعدي

وطكت روحي منج ويومية مصيبة ويومية مسويتلي سالفة واستري عليه

سكتت ما جاوبته بس ضجت  وجهي اختمر هلكد ما استهضمت من حجيه ، حس هو اذاني بالحجي ..

عااد كسرها وكال : يومية هي لو بس اليوم ؟

كتله : البنية دزت عليه حيف جمعة ولود ما يحتاج تصيح وتسويها هوسة اختصرها ما تروحين وكافي بعد ما تعول تلكالك حجاية حتى تطلعني اني سبب المشاكل ليش ؟

- هسه كافي ..  روحي كم ساعة وارجعي لا تطولين

لبست عباتي ورحت للصالون ..

اشتغلت ويا البنية وافتره من اجي يمهن اخلص من ضيجة البيت وحبسته اشوف وجوه احجي اسولف

من كملت ما رضت اطلع الا تطيني اجرتي ١٥

حلفت ما اخذها .. من رجعت لكيتها حاطتها بجنطتي ..

الصراحة ما محتاجة الفلوس لان حازم ما مقصر وياي بمصرف ديترك مصرف البيت بيدي عشرة الالف .. اصرف منهن للبيت الاحتاجة والباقي الي .. وملابسي وطلعتي وطبتي كلها اخذها منه ما محسوب من اللي اجمعه من مصرف البيت .. فما محتاجة فلوس بكثر ما محتاجة اختلط واسولف  واطلع من وحدتي .

طلعت ثوب صيفي من مالات عرسي كاعد اخذ منه الفصال حتى اخيط عليه .. من خيطت الثوب عليه ولبسته شو ضيك ما طب بيه ..

رحت ع الثوب الصيفي لبسته ..

ما يطب .. احس بروحي سمنانة بس معقولة هلكد ما يطبن ثوابتي القديمة بيه

العصر رحت لبيت محمد عدهم ميزان

اني جان وزني يتراوح بين ال٥٧ و ٦١ ما فد يوم بحياتي صعد اكثر من ٦١ هذا اكثر رقم شفته لوزني من يوم يوم

صدك اصعد ع الميزان ووزني ٧١ كيلو !

يا عزا العزاني صايرة برميل نفط واني ما ادري ..

بالليل كضيت حازم واحجيله : انت تدري وزني شكثر صار ؟

-شكثر

- وشنو يعني

-سمنانة حيييل يمعود كل عمري ما واصلة ٦٢ انوب هيج ٧١ كله من كعدت البيت

-يعني هسه شنو تريدين ترجعين تخورين

-لا مو اخور بس وزني زاد حيل

ضحك وهو يكلي : غير صايرة تخبلين يا بويه هي المرة اذا ما بيها لحمة تنكض ما تتسمى مرة

-يااا واضل بوزني هذا بس والله كله منك ومن ورا الكنافة والبقلاوة التجيب بيهن تالي الليل وتخليني اسمن

مدلي اديه وكالي : شو تعاي يدبدوبة بحضني

تمددت يمه حجه : اذا مو تعبي وفلوسي اشتري بيهن التحبيهن ويفرحنج واشوف فرحت عيونج وانت تتلكيني وتاخذيني من اللي اتحبي شقيمة تعبي وشغلي ؟

همستله : وتعبك يروح لبطني

-حيلي وكلبه كله يروحلج فدوا يصل على تعبي

ابتسمت وهو يكلي : دشوفي الزنود من سممنن شصارن

كاعد يحجي دك تليفون بكنتوري

كال : تليفونج يدك

عقدت حاجبي : لا هذا تليفوني

-جا شنو هذا الصوت ؟

-ما ادري

حجيتها واني اسحب بروحي حتى انزل من الجرباية فتحت كنتوري البنص .. شفت التليفون مال دنيا .. رجف كلبي

وهو يدك بيدي

كام اجا يمي : تليفون من

-ما ادري

رد بس ما حجه .. اجا صوت : الو صباوي

حجه : منو انت

انقفل التليفون بسرعة

اني كمت ارجف من الخوف

باوعلي : منو هذا صبا

-والله ما اعرفه ؟

-يكلج هلا صباااااوي شنو ما تعرفينننه

-حازم مو تليفوني

-بس محطوط عدج

حجاها وكام يكلب بالتليفون

شاف رسايل كلها دارميات فشار وضحك

ومشتاقتلك واحبك وبعدين نحجي من يروح للشغل

تسودن : شنو هذاااا صبا

-حازم والقران ما اعرف شي هذا مو تليفوني

-تليفون منو هذا

-ما ادري .. بس مو تليفوني والله

كام يصيح ويكلي : هاي مكتوب احاجيك من يرررررروح للشغل شنو مو تليفوووونج

-بالعباس ما ادري

ركعه بالكنتور انفطرت جامة الكنتور

وهو كام يصيح ويدفر ويصيح منو

اخر شي اعترفت كتله : هذا التليفون مال دنيا

-مال دنيا شنو دنيا منيلها تليفوووون

-اني شفته عدها وخذيته ورجعت خذته مني من الغرفة بس والله مو مالتي

-دنيا ما عدها تليفوووون منين جابته

-ما ادري اسألها

دا اكلك والله مو مالتي

كام يصيح على دنيا نزلت : ها بابا

-هذا التليفون الج

عقدت حاجبها : بابا اني ما عندي تليفون

-صبا جاي تكول تليفونج ماخذته منج كبل ايام

- بابا والله مو مالتي ليش هيج تحجين مو حرام عليييج ليش هيج تشوهين صورتي كداااام بابا اني شمسويتلج

-هذا تليفونج واخذته منج كبل ايام شفتج تحجين بيه

واخذتي من الغرفة

-والله جذابه حرام عليييج بابا والله جذابه

اندارلي : بالاول كلتي ما ادري وبدين ذبيتيها بدنيا

-ذبيتها !!!! شذب اذب تهمة على بتك قصدك

-جا ليش ما كلتي من الاول لزنيا اذا الها

-خفت تاذيها بس ما دامها جايبته بغرفتي هي قاصدة اذيتي

-شنو خفت اذيها شنو قاصدة اذيتج الطفلة بيش تتقصد اذية ومنيلها تليفون وتجيب وتأذيج

-قصدك اني اجذب وصاف ويا بتك

-انت من البداية ما حجيتي

دنيا : جذابة بابا والله جذابه وهي من تطلع كله تصيح عليه علمود انزل اشتغل

-اني مصيحة عليج علمود تشتغلييين لو علمود الهدوم الفوك تنزليلي هدومكم

-بابا والله جذابه

صرخ : صبا هذا التليفوووووون مالمن

-ما دام مصدك بتك وبعدك تسالني مالمن معناها الحجي ما يفيد

رجعت لغرفتي اجا وراي حجه : عود رايدة تشردن من الموضووووع انت التليفوووون هذا مالمن

-ما ادري ماااااا ادري

سطرني راشدي حجيت : هاي ثاني مرة تضربني وتمد ايدك

حرام والله ما ابقى

-لو طلعتي عتبة هالدار مالج رجعة الها

-تهددني حازم

-هسه تكليلي هذا مالمن

-حجيت العندي وما اعرف اكثر من الكلته وما دامك هددت اني راح اطلع .. ونفذ تهديدك

لميت هدومي كام يصيح ويهدد وما اجيبج ولو طلعت باب الحوش اعلمج والا افعل والا اسوي ..

كتله : اليطلع بيدك لا تقصر بيه

لبست عباتي وطلعت من البيت

هو كام يدفر ويصيح بالبيت وطلع وراي ..

ما رضى امشي كام يجر بيه ويخزر ويكلي : ارجعي لا ابتلي بيج

-ما ارجع ما طولك شاك بيه وما مصدكني ما ارجع

جرني من زندي كمت اجر بروحي منه

وشارع منه دفعني وكال : امشي لبيت محمد

وصار وراي مشيت وهو يدفع بيده حتى امشي لمحمد دخلت البيت

صاح : فوتي جوا

-انت اتريد اتطلع مشاكلنا كدام الناس ليش

-وخايفة من شنو حتى ما تطلع

-اخاف من القال والقلت ما مجبرة اعرض مشاكلي كدام اهلك

-امشي رجعي للبيت لعد

-ما ارجع ما طولك شاك بيه ومصدك بتك ما ارجع

-اصدك بتي شنو ولج مو كدامج رد وهو يصيح هلوووو صباوي

-اي هاهية ما طول مصدكه و ما مصدكني عوفني اروح

طلعت امي على حسنا كالت : اسم الله الستار شجاكم شكو

كاللها : يمه كضيها لا وعلي ابتلي بيها

-هو شنو تبتلي بيه قابل اني صغيرة وتبتلي بيه ما مصدكني عوفني ما مجبور بيه

-اذا ما اطلع اصل السالفة شنهو اتظلين كداااامي انت سبب

-اني سبب شعلييييييه

-التليفووووون بكنتوووورج شنو شعليييج وجاي يصيح صباوووي

امه : يا يا اصخام ددخلوا حوا شهرتونا دنيا الليل طبوا

دكيت رجل ما اطب الا يوديني لبيت الشماعية

وهو يحلف لو طلعت يندمني واني حلفت ما طول شاك بيه ما ابقاله

ختمها محمد وهو يطب للبيت ولكاني معاندة

اخذني ووصلني البيت الشماعية وحازم دزلي .. سهلة .

من طبيت لبيت الشماعية

شفت شهلاء مو على بعضها مثكلة عليه

حتى ما سالتني شكو شبيج شصاير وياج .. 

اني هم كعدت لوحدي .. وما كابلتها وراسي صار طبل من كثر التفكير

صدك اكعد الصبح ..

والكاها لابسة عبايتها .. كتلها : ها شهلاء وين

كالت : اخوي راح يجي علي ياخذني انت بعد عينج ع الجهال

-وشوكت ترجعين ؟

-ما ارجع صح الجهال جهالي بس مرجعهم الكم وبزركم واني تعبت من الفكر والضيم ما مجبورة بيهم ولا بتربيتهم

-يا جا اذا انت ما مجبورة بجهالج ياهو المجبور بيهم غيرج ؟

-انتم اهلهم

-انتم ياهمه ؟

-انت سهى منى حيدر ذولة جهال اخوج اني مرة ما اكدر لعيشتهم انتم احتارو بيهم اني رايحة لاهلي

-اكو احد مضايقج

-لا بس بزعت اخوي متانيني

تحجي وتبجي الجاهل صغير عمره سنة وشوية ونونة عمرها ٦ تقريبا .. حسوني ناط من البجي ونونة كاضة بعبايتها وتصرخ تريد تروح وياها

نكثت عبايتها من ايد بتها وطلعت

والبنية ركضت للشارع ركضت اجر بيها

اخوها خذاها ومشى ونونة تركض ورا السيارة

طبيت ذبيت الجاهل بالكاع وجريت عباتي اريد اجيبها لكيت الجيران جايبيها

طبيت للغرفة واني اريد اسكت بنونة

لكيت حسوني صاير ازرك من البجي .. شلته من الكاع فلتت نونة من ايدي تركض للشارع واركض وراها وحسوني بيدي ..

واحد كاعد يمر ببايسكل بسرعة وهي طلعت بسرعة

دعثر بيها والحديدة مال البايسكل فوتي بوجهي وشكي خدها وانداسي جوا البايسكل والولد وكع فوكاها وفوك البايسكل

فزيت من كل كلبي وركضت اريد اجر البنية

شفت الدم بادن ادية كلت ماتت البت الحاهل وكع من اديه كمت اصيح : البنييييية راحت يمممممه ..... يتبع

تكملة الرواية من هناااااااا 

لمتابعة باقي الروايه زورو قناتنا علي التليجرام من هناااااااااا

بدل ماتدور وتبحث علي الروايات عمل 

متابعه لصفحتنا على فيس بوك هنااااااااااا

الرواية كامله من هناااااااااا

مجمع الروايات الكامله 1اضغط هناااااااا

مجمع الروايات الكاملة 2 اضغط هنااااااا