رواية عاجر الفصل الثالث والثلاثون 33بقلــم الكاتبـــة زينب ماجد (حصريه في مدونة قصر الروايات)

رواية عاجر الفصل الثالث والثلاثون 33بقلــم الكاتبـــة زينب ماجد  (حصريه في مدونة قصر الروايات)

رواية عاجر الفصل الثالث والثلاثون 33بقلــم الكاتبـــة زينب ماجد  (حصريه في مدونة قصر الروايات)

#عاجر 

{ بقلم الكاتبة زينب ماجد}

الحلقة_ ٣٣ 

ذبيت الجاهل من ايدي ورحت الها اركض واصرخ 

: البنية رااااحت يما .. 

عمت عيني يمه وجه البت راح .. 

دخييييلك ربييييي 

فزوا الجوارين والبشارع اتلاكفوها 

ذبيت حسوني على بيت سارة  وفتت جبت جيزداني وتليفوني وطلعت اركض ولحكت ابن الجيران شالنا بسيارته 

حطيت البنية بيدي 

واني اصيح : شكول عليج شهلاء الله لا ينطيج كون 

اكو ام تعوف بزرها ربي تشوف تطي الجوز للما عده سنون 

حكمتك وقدرتك ربي ناس تذب جهالها وناس تتمنى تشم ريحة الجاهل .. هيج بنية تنذب ولج شكول عليييج 

اباوع الها وجهه انمرد مرد .. 

نص حلكها راح انشك 

اتشوهت الجاهلة ربي .. دخيلك يا علي .. 

استعجل عليك العباس خوية البت راح اتموت 

وصلنا للمستشفى شلتها واركض بيها 

اطيتها لواحد من اليشتغلون بالمستشفى وكضيت تليفوني خابرت على سهى ، ردت كتلها : الحكيني يمعودة اني ويا بت جعفر بالمستشفى 

- خير شكو شصاير 

- شهلاء ذبت جهالها وكالتلي حيروا ابزركم ونونة ركضت وراها تبجي ودعمها بايسكل شك وجهه شك يمعودة الحكي وخابري عمي حيدر شوف منو الجاهل ذاك ضل عد الجيران لحكيلي 

- صخام الصخمها تعوف جهالها شلون واحنا قصرنا وياها وتذبهم شو بيت واطيناها شتريد بعد وين انت هسه 

- مستشفى القادسية بسرعة تعاي 

- يلا يلا هسه اخابر على رجلي واجيج واخابر عمي همي يجيلج يلا 

سديته منها ورحت لحكتهم مدخلينها للعمليات الصغرى 

كالي تعاي لزميها .. اجيت لزمتها والجاهلة تصرخ من كل كلبها من الوجع .. وهو ضمد وجهه وخيط الجرح .. فرفحت البنية بين اديه شبعت بجي وياها 

واني كاضتها التليفون مالي يدك 

سحبت ايدي كوة وثبتتها بايد وحدة وجريت تليفوني

باوعته (حازم) ذبيته ع السديا ورجعت كضيتها واني ادير بوجهي عنها وهو يشتغل بوجهه كلبي انمرد مرد عليها 

لحد ما كمل ضربها ابرة 

ونظفها شلتها من السدية انتهت بيدي الجاهلة هلكدها ذبلت كلش وماعت من الوجع .. حطيتها بحضني وكعدت ليغاد شوية ذبت روحها على صدري حضنتها وكعدت ابجي .. لحد ما خويت 

خابر عليه عمي 

جريت تليفوني رديت عليه ، كال : ها صبا وين انت عمي 

- بالاستشارية فوت كاعدة مقابيل العمليات الصغرى 

شوية واجاني شفته كبالي اشرتله 

مشالي بهمة 

كالي : ها شني شمالها البت 

سولفتله 

كام يكول : لا حول ولا قوة الا بالله العلي العظيم 

بزركم شني مخلفين احنا جايبين شو هاي الناس ما تعرف تفكر 

هو ابوها جدها بيبيتها موجودين خاطر بزركم غير امها هي ..

- تكلي تعبت من الحمل وهاج انتم اتحملوهم 

- نتحمل جهال اثنين ياهو اليتحملهم ومن ما تكدر تحمل جاهل وتشيل مسؤليته اعليمن خلفت ؟ 

- هسه عمي الحجي مو وكته راحت روحي بالعباس  بس هاك جيب هاي الشرابات وصى بيها الدكتور لازم اجيبه الها .. عود من نرجع نسولف خل اكومن ذاك عفته ابيت الجيران . 

- شعدج تروحين للشماعية غاد وحدج صار ما صار ع الجاهل هم تعالوا الحكولي .. 

- جاي وين اروح عمي 

- دتعاي عدنا لحد ما نشوف الجاهلة شني وضعها .. رجلج وينه 

- ابيته وينه 

- متزاعلين لو شنهي ؟ 

-مشاكل وجيت ليجاي ارتاح عشتو  .. خابرت على سهى تجي 

بلكت تكدر تمشي لبيت سارة تجيب حسوني خل ارجع اخابرلها 

شلت البنية دك تليفوني .. هو بيدي شفته حازم .. 

رديت ورفعت اديه وحطيته بحجابي .. كال : الووو 

- ها 

- شها اخابرج من الصبح ما تردين عود شني تشوفين روحج علي انت 

- اكلك اني بيا حال وانت تصيح 

- وييين انت 

- بالمستشفى 

- شتسوين 

- هسه كاعد امشي وكوة معلكة التليفون بربطتي راح يطيح 

حجيتها وفلت التليفون .. كضيته بجتفي وراسي وعمي يمشي كدامي كتله : عمي بس شوية 

اجاني تناوش البنية من ايدي 

وخذيت التليفون حازم يصيح : الوووووو

- اكلك من اوصل اخابرك راح نطلع لبيت عمي 

- ويييييييين انت 

- ليش اتصيح شنو فوك شينك كوات عينك 

- شيني اني بت الاوادم ياهو الشين 

- جا اصياحك هذا شنو شين لو زين اني بيا خال وانت تصيح كاعد اكلك راح اروح لبيت عمي .. تصيح بعد شني 

مع السلامة 

سديته ومشيت 

رجع خابر .. رديت صاح : اتسدين التليفون بوجهي 

- كتلك مع السلامة شكلك بعد اني برا مو بالبيت وكوا اسمعك 

- سهلة 

سداه ضميت التليفون ولحكت عمي .. 

صعدنا بتكسي ووصلانا لبيته .. التمن البنات عمتي والجناين 

يسألون ويستفسرون .. نومت البنية واني احجيلهن 

انداريت كضيت اليفوني خابرت سهى 

كتلها : شني ما جيتي 

- غير انتظر رجلي يجي من الشغل اغدي واجيكم قابل بيدي 

- وكت غدا رحمة لاهلج اني حايرة بالبت منا والولد عد الحيران حيدر وينه 

- خابرته بالدوام عكب باجر ينزل 

- وهسه شلون كليلي 

- اخذي البنية روحي لبيت الشماعية 

- يا واحيرن بيهم اثنينهم شصيرن 

- وشلون هسه اني هذا مطنكر الا يرجع يلا يجيبني الكم 

- شمدريني ما خابرتي منى

- خابرتها ما تكدر تجي رجلها ما يرضى 

- اكلجن فدوة لعينجن كل وحدة بيجن تصيح رجلي ما يرضى جا اني اليرضى مو خابرني يصيح ويهوس 

- انت وياه مو متزاعلين 

- جا ازيد الطين بله 

- هسه استغليها ما طولج زعلانة وضلي يم الجهال لحد ما نشوف شلون تنحل 

طب عمي واني احجي ويا سهى 

كال : خابرت على اهل شهلاء كتلهم بالصار راح يجون 

- يجون جية الخطار ها الحمدلله ع السلامة 

احجي وسديته من سهى 

- والله يا عمي  انتم كلكم بخويطكم خربطة بخربطة شعدل بيكم روحي جلت من مصايبكم والعباس لا بيه اشيلن ايدي واكولن مالي غرض ولا الي حمل مصايبكم وابتليت بيكم بلوة . 

- شسوي يا عمي بيدي قابل 

كاعد نحجي اندكت الباب .. 

مشى عمي وفتح الباب لمحت بس سيارة حازم وسمعت صوته يسلم على عمي .. كاله فوت 

وحازم يرده : لا بيت العامر ان شاءالله بس كللها خل تجي حتى ارجع تعبان 

- ما تكدر تجي هسه عمي لو تعوفها شوية 

- شصاير 

- مرت المرحوم ذبت بزرها وبتها ركضت وراها تبجي واندعمت واحتارينا 

- احتاريتم ابو يوسف مرتي ياهو مالتها ؟ 

- جا غير عمتها 

- وعماتها البقية وينهن شني بس صبا موجودة 

- عد ارجولتهن شنسوي هم حاكمينهن 

- جا ارجولتهن حاكمينهن اني ما حاكم مرتي شلون حجي هذا .. صيحلها رحمة لاهلك حجي تعبان وواصلة وياي ليغاد 

غطيت الجاهلة وكمت له 

اشرت لعمي يفوت وكضيت الباب ورديته حجه هو : البسي عباتج وكومي بسرعة 

- عوفك من بت اخوي ومن مشاكل اهلي .. مشكلتي وياك ما انحلت حتى جاي تحجي معلك وتزمخ حازم 

- وشترين اكثر من صميت حلكي على سوالفج الطايح حظها وساكت 

- منو طالب منك تسكت .. اني الاريدك تحجي تليفون ينحط بكنتوري وزلمة يخابر وينطق باسمي وملفقاتها عليه وتكلي اسكت لو سكتت لا تجي ولا تمرلي 

- ياهن ذني الملفقات 

- اني حجيتلك وسويتي اتهم ومرت اب 

- وبتي ملفقة عليج ولج بت الاوادم جاهله عمرها ١٣ شتفتهم من هالسوالف وتسويهن 

- ماطولك مصدك بيهم بالعافية عليك وعليهم 

ما مستعدة ارجع واني متهومة ومسوي فضل عليه ساكت .. 

اذا ما اتطلع اصل السالفة لا تجيني ولا تمرني . 

- حنجلوج ابهالجهال وكلهم ضمو روسهم امهم المخلفتهم ضامة راسها وعايفينج راس البصلة كلشي براسج وجاية اتهدمين بيتج وياي حتى تحلين مشاكل اهلج 

- بيتي وياك من رمل ما طوله متروس عثة 

- ومنهو العثة ؟ 

- حازم خصم الحجي ما ارجع اذا ما تستكشف السالفة شنو وتعرفلي منهو الحط التليفون ومنو الخابر وكال اسمي .. مال اتطمطم السالفة وارجع لا .. لا تفكر 

- خوش .. بعيني 

راح .. واني طبيت جوا 

بس ما ارتاحيت ولد عمي فايتين طالعين 

صوت الدكان .. البنية كل ساعة تفز .. كتله : عمي يس اجرلي سيارة خل اروحن للبيت احسنلي لليل سهى تجي وتعاوني بالبنية هسه حتى لو اجت نضايقكم وانتم مكانكم ضيك 

ما كال لا 

بسرعة كال : جا خل انده لرسول بلكت الله يوصلكم 

صاحله كاله : هسه اني اوصلهم بس خل اتغدا 

اكل وكمل وخذاني لبيت الشماعية 

كامت البنية تبجي وتنوح من الوجع واني حاطتها بحضني والوليها واسكت بيها .. خابرت على سارة تجيب الجاهل 

هستوها تريد اتطب سارة 

فاتت شهلاء بلهفة وهي تصيح : بتي وين بتي شصاير وياها 

خذتها من حضني وحسوني كام يبجي ذب روحه عليها

خذت جهالها بحضنها وكامت تبجي وامها واكفة تعاتبني : الله الاحد عافتهم يوم هيج جرى الحالهم غير بزركم تتنوعيله تنتبهيله 

- بزري شنو مخلفتهم اني جايبتهم غير بزر بتج ذبيتوهم علي وطلعتو شاحتار بالجاهل اليبجي لو اكض بالزغيرة التركض .. 

- غير عمتهم ومن دمهم ولحمهم 

- وياهو الاقرب الخلفت لو العمة شمالها الناس باعت ضميرها 

- باعت ضميرها شني بتنا حمرة صفرة جم دوب تضل تكابل الفروخ وتكسر طهرها عليهم ما طول جايينها ناس يتخطبونها نطي البت وانتم داري بزركم 

- مثل ما بتج تريد تتزوج والتاخذه ما يرضى بجهالها اني هم بذمة رجال شلون يرضى اجيب جهال اخوي عده ويتحملهم .. احجو ضميركم 

- بعد هاي يمكم يمه انتم اهلهم واعلم بامرهم اخوج حيدر وينه خل يكابلهم 

- وحيدر يعرف يكابل جاهل شلون حجي هذا انتم خالة ما عدكم ذمة ما عدكم ضمير شقصرنا وياها احنا شو اطيتها بيت ومسواكها كاعد نجيبه للباب ونطي هاليطلع بدينا بعد شنسوي نعوف بيوتنا ونحتار بيها 

- لا جا بت ليوحدها تكعد اخوتها ما يرضون يومية مسويلنا مصيبة 

- ومن ما ترضون تكعد لوحدها ما خليتوها ابيتكم وصنتو بتكم وداريتوها 

- مكان البت ابيت وجلها انخليها ابيتنا شني .. هسه لا تكثرين حجي خالة بتنا النا وجهالكم الكم .. ما تريدونهم شوفولكم دار ايتام وذبوهم خو احنا ما نكعد نحتار ابزركم 

هزيت ايدي .. 

عمت عينك جعفر جنت تكوم تكعد تصيح شيكولون عليه انسابتي 

وتخاف وترجف من انسابتك ذبيتني ومرمرتني من ورا انسابتك ولا يحجون عليه انسابتي .. هم ذولة انسابتك ؟

هالذبو بزرك مثل ما ذبيتني 

انداريت لشهلاء وهي كاعدة تبجي 

كتلها : انت راضية بحجي اهلج ؟ 

- شسوي وشبيدي ما اكدر اداري الجهال ولا اعرف اعيشهم 

كلبي كاعد يتكطع عليهم بس ما بيدي عليهم شي 

كاعد تحجي طبت سهى 

كامت تعد وتصف ويا ام شهلاء .. 

وام شهلاء تريد تاخذ بتها.. كالتلها سهى : تريدين تاخذينها تاخذين الجاهلة وياها لحد ما تطيب عود نحجي نكولون ما نتحمل تعوفونها هنا يم بتها لما تتشافى الجاهلة تريد امها شني انتم ما عدجن احساس مستحى ماكو درينا كاتللت روحجن ع الزلمة وتريدون بس تلزكونها بس هالله هالله بهالجهال اقلها اعفوا الاصول المرحوم سنته ما طلعت وكمتو ادورون زلم اليسمعكم تحجون بالاصول والعيب واليجوز والما يجوز يتحنصلكم بس خيعون الشاف وعرف وتورج ع اليطلع منكم 

تلاسنت وياهم لحد ما شهلاء هم كامت تحجي ويا امها وخابروا على اخوتها بقت يم بتها  .. 

لليل اجت منى والتمينا وكعدنا كل وحدة بينا تسولف مشاكلها ومشاكل عيالها .. 

كالتلي سهى : زين تسوين اذا ما يطلع الحط التليفون منو لا ترضين ترجعين مسوي عليج فضل ساكت عساه لا سكت حاط حيايا ابيته وفوكاها هو الما راضي 

الا كولي ذهبج فلوسج بس كون جبتيهن 

- لا والله ضل ابغرفتي ما جبتهن 

- عمى بعينج كون اكو وحدة تعوف ذهبها وفلوسها 

- شمدريني اني بنص العركة احتار بالذهب لميت هدومي وطلعت ما اتحملت 

- اغبشي من الصبح باجر جيبي فلوسج وذهبج وتعاي لا تصيرين غشيمة ويبوكنهن ومن تردين هم ينكرن .. ساعتها اضلين اتصفنين لو تكعدين اتهمين هذا وذاك وتعاي جيبي اليصدكج واطلعين انت فد وحدة راعية مشاكل اذبين ابلواج على المسيجينات الفقيرات الحبابات واطلعين انت الما تستحين 

قنعت بكلامها .. 

وصدك ثاني يوم كلت حازم ما موجود 

امر للبيت اخذ ذهبي وفلوسي واطلع اكيد مدام اني مو هنا الجهال عايفهم لو عد امهم لو يم اخوه . 

غبشت من الصبح 

لبست عباتي وطلعت للبيت فتحت الباب ودخلت لغرفتي ..كعدت الم بذهبي وفلوسي 

سمعت صوت امل من فوك تصيح : منو جوا حازم ررررررجعت 

عقدت حاجبي صوت امل لو يتخايلي !! 

طلعت من الغرفة واشوفها تنزل ع الدرج .. 

كتلها : شعدج ؟ 

- اني الاسئلج شعدج شجايبج 

- شمدخلج لهنا ؟ 

- بيتي انت الطابتله مو اني .. 

- يا بيت هذا اللي انت مطلكة منه 

- الله لا يجيب الطلاك يمه بيتي طلاكيش بيناتنا جهال وبيت وعشرة الله لا يخلي الشيطان يطب بيناتنا .. جاب السيد امس ورجعنا بخير وسلامة 

ضليت اباوع عليها .. 

ها اي .. بالعافية عليكم تتهنون 

دخلت الغرفة ، وكفت اباب الغرفة هي : صبا انت مثل اخيتي انا ما رايدة طلعتج من البيت وارضى نعيش اثنين على حب الله .. ما عدي وياج شي واني واعدته افتح وياج صفحة جديدة ونصير خوات . 

- افتحي لصفحة لوحدج الكتاب اليجمعني بيج احرك صفحته مو افتحها .

- هاي بقت يمج .. اني كاعد احاجيج خاف تكولين طردتني قصرت وياي البيت مفتوحلج يمتى ما تجين الزلمة هم تعب من مشاكلنا اني وياج خطية خلي يرتاح 

واكفة وتحجي اني لميت غراضي 

وردت اطلع حجت : فلوسمن هاي الجاي تاخذينها وتمشين 

- ميخصج وبالعافية عليج رجعتج متهنايين 

طلعت من البيت .. 

احس النار اشتعلت بروحي .. رجعها وهو يعرف هي السبب بنشر الفيديو الرادوا يكتلوني من ورا 

شهرتني وفضحتني ورجعاها .. وتعاي اعيش وياها بنفس البيت .. 

الطريق كله دموعي تجري .. 

بدال ما يدور اصل السالفة شنهو ويعرفها .. يرجعها حتى يغيضني !

طبيت للبيت .. 

شهلاء مار عليها اخوها ماخذها وسهى متعاركة وياهم ورايحين 

طبيت اتلكتني بالحجي والصياح 

كتلها : سهى رحمة لاهلج عوفيني احير بروحي لو بالجهال 

- خير شصاير وياج 

سولفتلها 

لطمت على خدها 

رجعااااااها .. جا مو طلكها وتحرم علي وما اردها وما اريدها حجيه ذاك وين شو  بس غبتي ليلة رجعاها من اكلج مو امان ولج مو سند وتنتجين عليه ولج هذا ذيب هذا ياكلج ويذبج وهالشفتي شلون رجعاها وعافج 

- وشسوي بهالحالة عقلي وكف .. كليلي

لا بيه اعوفه مالي غيره ولا بيه اتحمل ! 

- خايبة اني من الاول كتلج شلج بالرجل وضيكة الرجل خايبة ضلي حرة نفسج شو هذا البيت موجود وايدج خير من الله ضالة تنحسرين منه على يا مال 

كاعد تحجي دك اتصال هو 

ما رديت .. اطيت رفض 

حجت : هو ؟ 

- اي 

- اشلعي كلبه وحطي بيده ديري بالج اتريحينه ما دام سوا بيج هي خايبة لوبجي  يفتر على روحه وما يلاكيج وعود خلي تفيده امل ام السواكه خل يعرف قيمتج .. سدي التليفون خلي يولي 

جرت التليفون مني وسدته وطفته 

ضليت اتصفن ومهدوم حيلي .. بدال ما ينصفني ويطلع السوا بيه هيج وتهمني يرجعها ! 

للعصر اني روحي فايرة والوب ما مرتاحة 

ولا اتهنيت لا بكعدة ويا خواتي .. ولا بسالفة 

بس منزوية لوحدي وحسوني بيدي والاعبك كبالي وبالي مشغول 

اندكت الباب اجتي منى كالت : رجلج رايدج بالباب 

سهى : اكعدي لا اتطلعين اني اطلعله 

كامتله ومشت .. كمت على حيلي يهمني اسمع شراح تحاجي ويحاجيها ، فتحت الباب كالتله : هله ابو علي 

- هلا ، صيحيلي صبا 

- والله اعذرنا خوية صبا ما لها طلعة ولا الها حجاية وياك 

- وانت ياهو ماتج بنصنا 

- ما مدخلة ابيتك بس هاي اختي من تستغلها وحاطها خدامة ابيتك والحيايا مالاتك يفرن عليها ويومية تاهماتها تهيمة ومسوياتلها مصيبة وبدال ما تطلع السالفة تروح تكسرها وترجع امل الفضحتها ورادت كتلتها وموتها .. شني خوية ماخذها بالعين الصغيرة لو جيف مالها احد توليتها 

- سايم الله ومحمد وعلي عليج خوية انت اطلعي منها وصيحيها احاجيها واني وياها نتفاهم 

- لا والله لا اصيحها ولا احاجيها ولا اخليك تحجي وياها وهم تلعب على عقلها .. اختي مالها رجعة لبيتك 

- حجي ويا النسوان مالي اخابر عمج وهو اليتصرف 

- روح خابر شيخ العشيرة الجان اختم مفين الشرايع وجاي يهدد بعمي الله وياك خوية 

سدت الباب وعافته برا 

طبتلي : ديري بالج تريحيله كلب وتردين لو تحجين وياه خلي يتمحرك ويعرف قيمتج هذا مستصغرج حيل وما مخليلج قيمة 

منى : سهى لا تهيجينها هي من اخذته تعرف بيه متزوج وعده فروخ ما يكدر يهد مرته ذيج لو شما تسوي بسبب بزره .. بس حازم يحبها واحنا نعرف 

- يا حب هذا يمصخمة يحبها يرجع الفضحتها والا شوية رادت تنكتل من وراها 

- سالفة الفضيحة ما اتاذت بيها صبا بكثر حازم هو الشالها وانفضح بين اهله وعمامه وربعه هي شجرالها .. طخه ما طخها  وبقت معززة مكرمة عده محد كاللها على عينج حاجب خلي البنية تحاجي رجلها وتتصافى وياه

- رجلها مستصغرها وما مخليلها قيمة 

- لو ما مخليلها قيمة ما يتعنى ويجيها بس هو هم ما بيده شي خو نعرفه ونعرف وضعه حيايا شيكدر يسويلهن احتار بيهن حيرة اقلها متصافي ويا صبا خلي ترجع وتتصافى 

- شبيج انت مخبلة شترجع بدال ما يعالج السالفة ويطلع الوراها راح رجع مرته والله حتى يغيضها وتكلي ماصافي هذا شافها محد الها وكام يلعب ويتملعب بكيفه 

- صدك مو جذب محد الها .. جيف حازم موجود حيدر كاف عنها وربج لو ما حازم تلاكين حيدر هنا بنص البيت يامر ويتامر هاي اذا ما ياخذ البيت ويذبها للشارع مو عشنا وشفنا بعيونا لا توزين البنية خلي تحاجي رجلها وتتفاهم وياه 

- اني ما واكفة بطريقها بس اريدها تربي تسويله عبرة تحسسه هي مو لعبة مو بكيفك يسوي اليعجبه وما حاطها ابالها خلي تحطلها قيمة ويحسب احسابها من يتصرف

اخذت وضعية المتفرج بين سهى ومنى 

مدا اعرف شنو الصح وشنو هو الغلط .. راسي هوسة وكلبي كلش كاش منه .. وما بودي احاجي ولا حتى اشوفه 

لليل خابراني عمي على تليفون سهى

كالي : رجلج اجاني ورايد يحاجيج وانت سادة تليفونج وسهى ما مخليتج اتطلعيلا 

- مو سهى اني اللي ما اريد اشوفه عمي 

- شصاير 

- ما حجالك 

- لا والله كال مشاكل عائلية ورايد اتفاهم وياها واختها نابصة بنصنا وكاعد اتخربها علي وذيج بلا عقل تابعتها وسادة تليفونها وما اعرف شلون اتفاهم ويا مرتي 

- مرته! هو خلا بيها مرة عمي 

- شصاير غير افتهم جا هسه بالله من اريد احلنها غير اعرف اصل السالفة خاطر اعاتبة احاجي 

- تليفون ابغرفتي لكاه مو مالتي رد وزلمة يحجي باسمي صار عصبي ويكلي ياهو هذا واني لا اعرف منو ولا ادري عن التليفون ولا تليفوني اصلا 

- جا تليفون منو 

- شمدريني اني الاعرفه تليفون منو لو هو اليدور وينبش التليفون مالمن وشجابه بكنتوري ذيج نشرولي فيديو هسه شنو الناوينه عليه 

- عمي ذني مشكلة ما ينعاش وياهن كله يطعنن بالعرض ويشوهن سمعة 

- من يوم يومها امل هيج 

شنو نسيت من راحت لجعفر لو من هدت عليه للعيادة وفضحتني سوالفها هاي بس هو ما يقنع وبعده يسالني التليفون مالمن 

- هسه اخابرنه وارجه جا شني هي يومية تهيمة ما صايره هاي مو عيشة 

سداه مني .. شوية ورد عمي رجع خابر 

كال : رجلج يكول عرفت السالفة كلها واعرف هي مالها ذنب بالسالفة واني جاي حتى اتفاهم وياها بس هي لا تطلعلي ولا تفتح تليفونها شلون احاجي افوت بنص بيت متروس نسوان ما بيه زلمة 

حاجي رجلج عمي واتفاهمي وياه 

-شتفاهم جاي تكول عرف السالفة واني مالي ايد بيها ومع هذا مرجع امل ! ويريدني ارجع لا والله عمي لا اريده ولا اريد امل ولا اريد عيشتهم اني جزعت من تهايمهم 

رفضت اشوفه وكلبي حيل شايل عليه 

وروحي مهمومة وكئيبة ومالي خلك اكابل احد لو اكعد ويا احد ابد .. روحي بازعة من الدنيا كلها 

منى رجعت لبيت رجلها .. 

وسهى خذت حسوتي ورجعت بيه لبيت رجلها 

واني ضليت ويا بنونة .. تبجي وتنوح تريد امها واني مرة احاحيها واقنعها ومرة ابجي وياها مدري على حظي مدري على حظها اليشبه حظي واردى .. اذا اني اهلي ذبوني على كبر هي انذبت بعمر الورد 

كمت اشربها المسكنات اللي كاتبها الدكتور الها .. اتضل خطية مسحونة روحها ونايمة وفاتحتلها التلفزيون تباوع كارتون .. 

ثاني يوم جنت متمددة يمها 

والاعب بشعرها ما ترضى اكوم منها تبجي 

تخاف اكوم وتتأذى وباقية وياها بالفراش .. غفيت وهي على ايدي تباوع 

سمعت صوت الباب انطبكت بس عبالي الهوى ناسية اسده من اشتريت .. ضليت مغمضة 

اندكت باب الغرفة علينا فزيت : منووو 

فات حازم ، وحجه : اكو احد غيرج موجود ؟ 

- لا ، شعدك جاي 

-جاي احاجيج 

-وشضل حجي بيناتنا حتى تحجي 

- اكو هواي انت ما الجاي اتسمعيني 

-ولا اريد اسمعه ولا الي خلك اسمع خليني حايرة بضيم هالبنية وعوفني 

دنك الها : شلون صارت ؟ 

باوعت عليه وانداريت بعصبية واني ارفع حواجبي ما طايقته حتى اطيق اجاوبه 

باوعلي : ام خشم اليابس شايلة خشمج عليه ليش 

- شجابك ؟ 

- الجابني انت 

- صدكتك 

- ما منتظرج اتصدكين اني جاي اخذج 

- باحلامك 

- باحلامي ليش صبا كلتي ما ارجع لا ما تعرف اصل السالفة وعرفتها وكلامج الكلتي صحيح الغلط غلط بتي وعلي ابني حجالي السالفة وكال دنيا عدها تليفون و صبا خذته وما كالتلك ورجعت دنيا خذته وتاهمتج بيه .. اصلا كبرتي بعيني من ما اطيتي ابتي كدامي واني ابوها لحد ما حمت الحديدة 

- وشنو الفايدة ؟ 

- بتي ادبتها وكتلتها بس البنية ضحية امها .. لو عدها ام تراقبها وتكعدلها ما انحرفت .. وهل رجعت امها لهالسبب 

- يعني بدال ما تعاقبهم تعاقبني الي برجعتهم

- اعاقبج برجعتهم ليش 

- لا نسيت شسوت بيه امل وشلون فضحتني 

- لا ما نسيت صبا بس امل عدي منها اثنين ولد وابنية وكلهم صغار وتعهدت كدام عمامي وناس هواي باب البيت ما تطلعه بعد تكابل جهالها وتكعد وهي رضت وعافت المحل بس حتى ترجع.. لهالسبب رجعتها هلي تكابل جهالنا ولدي ذوله راح يضيعون بيناتنا 

- محد ضاع بيناتكم غيري 

- ما عاش اليضيعج اندل دربج واجيج 

- هالحجي هذا لا تصفطه يمي ما دامك رجعتها وبطلت وراح تكابلك وتكابل جهالك بالعافية عليكم هاهية مو هاذ الجنت تريده شلك بيه 

- هذا الجنت اريده كبل لا اعرفج .. اما بعد فلا اني ما رايد غيرج 

- اما اني فلا اريدك ولا اريد بيتك ولا عيشتكم 

- والتالي 

- عوفين مو طايقة اباوعلك حتى 

- حقج اني شككت بيج رغم اني من داخلي مصدكج والعباس بس صيري بمكاني صبا 

- لا اصير ولا اريد .. عوفني وبس 

- البنية هاي شنو وضعها راح تبقى يمج لو شلون حليتوا الموضوع 

- ميخصك 

ضلي يباوع عليه اني دايره عنه اباوع للتلفزيون بدون انتباه .. طك خشمي باصبعه : ام خشم اليابس والعباس مشتاقلج شلون نضل كل واحد ابيت 

-ارجع لمرتك وكابلها وهلي تكابلك مدام فرحان عافت المحل وراح تكعدلك 

-خر** بيها اني لو ما جهالها يوم ما اخليها عدي 

- سولفهن للدبة 

- انت صايرة دبة خو اسولفهن الج .. شو سمنانة بالزايد ولج شتاكلين

كض زندي جريت ايدي منه 

:لا والله ضعفانة الله لا يطيهم جا اني اتعب واسمن وتاليتهم يضعفونج بيومين ما ارضى 

-حازم عوفني ما رايدة احاجيك 

-لا تحجين يا عمي اني رايد وخليني احجي لوحدي راضي .. بعد ؟ 

- شرايد حازم 

- رايدج يا بويه قابل شرايد 

- واني ما رايدة .. تفضل روح كابل بيتك وعوفني 

- هسه كليلي انت من شنو زعلانة السالفة وحليتها وعرفت دنيا وراها وكتلتها وادبتها شسوي اكثر من هيج ؟ 

- ما رايدة شي حازم اني ما رايدة ارجع لبيتك هاهية كافي شنتظر بعد مرتك وبتك من يوم ما عرفتكم ما خلن سالفة وما طعنني بيها شنتظر اكثر بورطني بسالفة لخ 

- كولي يا الله حذرتهن والله ما يكربنج حتى سالفة الشغل حجيت بيها وكلت ممنوع تشتغل لاحد لو تخدم احد ما مجبورة باحد هي على كدها التطبخها ويعجبها تشتغل ما يعجبها محد اله عليها ويحاسبها وحلفت والله مالها غرض بيج ولا تأذيج ولا صار العكس ساعتها نحجي 

- كملت ؟ 

- صبا والعباس مشتاقلج البيت ما ينطب وانت مو بيه ما مرتاح والعباس متعلعل بفراكج كافي

ما جاوبته .. تنهد ورجع ظهره للحايط 

التلفزيون مشتغل على ام بي سي ثري شاعلته لبنونه 

واثنينا نباوع بيه بدون تركيز 

رجع اندار عليه : وهسه ؟ 

-اذا خلصت كلامك سد الباب وراك الدنيا باردة 

حجيتها وجريت البطانية لوجهي اتغطيت بيها وانام 

كام لحيلا راح للحمام .. 

ورجع طلع وسد الباب .. كعدت على حيلي 

وروحي بين ناوين نار ما طايقته ونار مشتاقتله 

ما اريده بس ادري بروحي كلش فاشلة وما اتحمل بدونه 

ما ادري شاملي عليه وبيش ابرد ناري منه 

باوعت لبنونة غافية غطيتها على كيفها وكعدت لحيلي ولميت روحي صافنة 

رجع دخل شايل علاكة مسواك وحلويات 

من داخل الحمام فات المطبخ وفاتح الثلاجة لاكيها فارغة 

حط علاكة الحلويات يم فراشنا .. ومشى خلا المسواك بالمطبخ 

نزع قمصلته وضل يباوع للكنتور 

جر دوشك ذباه وفتحه واتمدد واخذ من وراه مخدة .. 

حجيت : اي ؟ راح تبقى هنا 

- المكان الانت بيه راح ابقى بيه شسوي بعد 

مكتوبلي اتعلعل 

-علويش تتعلعل مرتك وجهالك غاد وروحلهم 

-ان شاءالله ، انطيني بطانية اذا تكدرين 

ضليت اباوع عليه باستغراب يتجاهل الكلام ويبدله بثاني 

باوعلي وكال : ما بلازم 

اندار للحايط ينام صفح بدون غطى 

عفته لحد ما حسيته فات بنومته صدك 

كمت من مكاني واخذت غطا وغطيته على كيف .. فز 

باوعلي واخذه من ايدي وغطى راسه ورجع لنومته 

كمت للمطبخ عزلت المسواك الجابه 

وكعدت اطبخ وسديت الباب وخابرت سهى سولفت الها جيته 

كالت : مرجع ست الحبايب للبيت وجاي يقشمرج بسوالف الحب 

-وهسه شسوي حايرة كلش وما اعرف شتصرف 

-ما تعرفين خايبة فوك شينها مرجعها وانت حايرة انعل ابو لابو زينة اني منج اشحته واشحت والديه 

- شحته وتالي ؟ 

- تالي شنو بحاجته انت .. دخلي يولي من يوم الشفتي بس المصايب فوك راسج شفرق يعني بدال ما جنتي تشتغلين برا البيت كمتي تشتغليله ولجهاله والمكموعة مرته .. دخلي يولي 

- ما ادري حايرة 

- بعدها خايرة يالكعبة 

- سهى احبه مو بيدي صح متضايقة منه وما اريده بس ما اكدر اعوفه روحي مريضة بدونه 

- غمه التغمج خلي سوالف الحب تفيدج الظاهر حيل مأثرة بيج المسلسلات التركية دروحي روحي 

سدته مني .. 

رجعت خابرت على منى .. حايرة اريد احد يفكر وياي بس كون ميكلي عوفيه لان ما اريد اعرفه اريد احد يوجهني ويكلي شنو الصح وشنو الغلط عقلي وكلبي بمعركة بين اريده وبين الما اريده 

ردت منى سولفت الها 

كالتلي : فرصتج املي عليه التريدي ما دامه شاريج واح ينفذلج التريدينه 

- اي

- كليله اني اخذتك متزوج بس عدي تحفظات على مرتك وبتك ما اكدر اعيش وياهن يا تحطلي بيت وحدي يا كل واحد من عدنا بطريق وربج راح يكلج امرج وشتريدين حاضر .. حازم مشتريج جابره يكابلج هسه ويجيج ويتلزك بيج لو ما مشتريج وحابج صدك .. نكول ذيج عده منها جهال وملوية ايده ما يكدر يعوفها بس شنو الجابره بيج انت غير هو صدك حابج ورايدج 

صبا والعباس لو تفترين كاع الله شبر شبر مثل حازم يحبج ما تلكين .. خلي من عشتي وصرتي عده فحتي وسمني وارتاحيتي صار يومج اكل ونوم وحتى اتبطرتي كمتي تبوسين اليكلج اطلعي واشتغلي وين جنتي واين صرتي صبا تتذكرين من جنتي تشتغلين ومحد راضي عليج وتتمنين اليكلج الله يساعدج .. هسه هو ما كايلج الله يساعدج عمي هو شايل عنج الحمل كله ومساعدج شتردين اكثر من هيج 

- اعرف .. بس مقهورة منه حيل 

- ليش 

- يعرف امل والسوته بيه ورجعها بين ليلة ويوم حتى بدون ميكلي 

- ميخالف الواحد مو نبي صبا هم يغلط وتطلع منه تصرفات مو زينة ساعة عصبيته انت ما تباوعين الزيناته وكت المرتاح تباوعين لشيناته وكت المعصب .. البشر هيج وهيج بس الزين اليحط ميزان ويقيس يا كفة التميل وحازم نعرف زيناته تميل اكثر صح لو لا 

تنهدت : ما ادري حجيج صحيح بس احس ما اريد ما طايقة احجي وياه بأي شي 

- اهدي ولا تتعركين وياه وعوفي على راحته بايت يمج علوا خلي يمج لا اتظلين اتطردين وروح وما اويدك الزمي السانج عنه وضلي دايرة وكت التحسين مستعدة للحجي اححجي . 

- الله كريم ريحتيني خابرت سهى طلعتني غبية وما بيه خير جيف ساكته 

- سهى سالفتها سالفة معليج بيها اصفي انت ورجلج محد يفيدج غيره والله 

- الله كريم 

سديته منها وبقيت اكمل بالعشا .. 

اذن توضيت ورحت اصلي .. وكعدت كاضة المسبحة واسبح تشبيح الزهراء .. حسيت عليه كعد ما تحركت من مكاني 

تقرب وحضني من وراه 

وكام يبوس بظهري وجتفي والتف عليه حضني حيل ويهمس : بالحسين مشتاقلج 

- زين .. شوية عني 

ذبيت السبحة وليمت السجادة وكمت .. صبيت صينية العشى واجيت  لكيته يصلي .. حطيتها كباله ابتسم وهو يسبح : حتى وانت زعلانة ما ناسيتني ؟ 

ما جاوبته .. 

خلص صلاته وكعد ياكل واخذ الريموت داره ع الاخبار 

لحد ما كعدت بنونه وضلت تبجي وتتنحس كمت سويتلها تشريب صمون وسوب دجاج وكوة اوكلها وهو يقنعها وياي بالحلويات الجايبها .. 

اخذت علاكة الحلويات بحضنها وكامت تاخذ كم لكمة من ايدي 

لحد ما هو كام يفتحلها الحلا ويرغبها ويشاقيها .. كامت تضحك وياه وتاخذ الحلويات منه بس من تريد تاكل تكوم تبجي تتأذى .. 

اخذها بحضنه وكام يوكلها على يكفه 

ارتاحتله  وضلت بحضنه يوكلها على كيف .. لحد ما هدت وضلت تباوع تلفزيون وهي بحضنه 

باوعلي .. 

حجيت : راح تبات هنا 

-مضايقج 

-جاي اسال 

-اذا ما تروحين وياي ، اي ابات 

-مالي روحه لهناك هذا بيتي وابقى بيه عاجبك تجي تعيش وياي اهلا وسهلا ما عاجبك بكيفك ما اجبرك 

-اعيش بالحواسم ليش واني عدي بيت 

-منو كاضك ذاك بيتك وروحلا 

تنهد وتعدل وحط بنونه بفراشها وكام يمسح على شعرها وكال : شنو التريدينه صبا 

-اول شي اريده الطفلة هذه مالها اهل وانذبت وهي بهالعمر جربت شعور اهلي يذبوني وما رايدة اخلي الجاهلة تعيش العشته اني ما عدي بزر واريدها 

-هاي بيها حرمة وحلال وحرام ويجوز وما يجوز خو مو بكيفنا تضل البنية غريبة واني محرم عليها 

-البنية جاهلة حراميش 

-غمض فتح تكبر هم اكلج ذاك اليوم بالسقوط دنيا تشخ على روحها وجاهله اليوم مرة كبالي احاسبها وادبها واملي عليها الينملي ع النسوان .. البنية بسرعة تكبر 

- مو مشكلتي اني اريد هذه البنية تعيش عندي ما جربت شعور الامومة خليتي اجربه بيها 

-هذا مو موضوعنا المختلفين عليه صبا 

-احسبه موضوعنا 

اخذ نفس : غير الطفلة !؟ 

- ما اعيش ابيتك 

-سالفة ما اعيش ابيتك انسيها عيشة هنا ما ارضى حواسم هاي مو امان بيها المكبسلجي وبيها الحرامي وبيها الفكر اليسطي ويبوك وبيها اشكال والوان وانت مرتي مو صاحبتي ما امن اعوفج بنص حواسم .. من رضيت كبل جنت مو مرتي وردت طريقة ترتاحين بيها من بيت عمج وجانت هاي الطريقة افضل السيئات بس مو مال ارضاها على عرضي ما اقبل 

- شد حيلك واجرلي بمكان قريب من اهلك 

هم كولي عرضي 

- لا خو اقسم البيت 

- العايشة بيه امل وبتك 

- خوما اذبهن بالشارع صبا 

- واني كايلتلك ذبهن اني اريدلي بيت لوحدي 

- اي اقسم البيت وكلمن اله طابق 

- بشرط 

تنهد وباوعلي بملل : شبعد ؟ 

- الطابق الجوا الي.. غرفتي ما اغير مكانها والدرج البيني وبينهم ينسد .. وتفتحلهم درج من برا لا لشوفهم ولا يشوفوني 

ضل يباوع بوجهي : هاهية التريدينه .. بعد 

-اي وكتلك البنية هاي تعيش وياي 

-ليش انت من دون خواتج 

-خواتي عدهن جهال اني ما عدي واتمنى يصير 

تنهد وهو يكول : لا اله لا الله 

-شكلت 

-سالفة اقسم البيت تتأخر يحتاج وقت وفلوس ابني فوك وجرا ارتبهن ..

-ابقى هنا لحد ما تكمل 

-عاد كااافي لهنا وبسج ترا جايج باللين والاسلوب واكول خطية بس لا تتمادين افتهمتي لو لا 

-وشجابرك بيه 

-انجبي وسدي حلكج كافي شجابرني بيج لاكيج بالشارع وشجابرني بيج .. مرتي اذبج هنا وارووووح 

-ليش تغلط ؟ 

-لان مصختيها 

-ما طولني ماصخة روح دور الملح يم اموله شعندك بيه مو مرجعها وبعدين تعال غلست ع العقد مال زواجي وراح ترجعها وتعقدلها محكمة واني اضل بس عقد سيد لا والله رجعة ما ارجع لا ما عقد المحكمة بيدي خوش لو لا ..

-ضلي امشي بكلام خواتج وكلمة تجيبج ولخ تردج وحطي عقلج هنااااك فوك الستلايت تحفة فنية عليمن متعبة راسج وشايلته بدون استعمال 

-عود دا اتهين ؟ 

-الله كريم 

كام طلع من البيت بس تليفونه ضل .. حاطه صامت شفته يدك 

من مكتوب ام علي عرفتها امل .. رديت : الو 

-الو .. صبا 

-اي شرايده 

-مخابره حازم وينه 

-طلع شوية ويجي

 رجع بيده كارتونة بقلاوة وكنافة 

اجا حطهن يمي وكرص خدي انتبه تليفونه بيدي 

حجه : تليفوني هذا بيدج 

-مشغول هسه بعدين يحاجيج 

سديته منها عقد حاجبه : ويا منو جنت تحجين بتليفوني 

-ويا امل 

-شتريد 

-تسال عنك اشتاقتلك 

-احسن من غير ناس يطردون بينا 

ذبيت التليفون ودرت عنه 

كرص خدي وهو يكلي : لا تردين ع التليفون بعد 

-ليش تخاف 

-اي ارجف من الخوف بس لا تردين 

جريت البطانية وانداريت انام 

ضل هو ويا الجاهلة يلاعبها ويشاقيها 

اني غفيت .. لحد ما نامت بنونة منومها بمكانها وهو اجا حشر روحه وراي وحضني : ام راس اليابس 

انداريت وهو مد ايده جوا راسي وسحبني اله باس كصتي .. ضليت هادية بحضنه وهو يتمادى شوية شوية ... حسيت بيه صدك مشتاقلي .. واني عقلي الحلو نسى الزعلة والهوسة والعركة وذبيت روحي بين اديه ما جن متعاركين ابدددددد . 

ثاني يوم الصبح .. 

جان يوم جمعة .. اجا رجل سهى مر النا للبيت دك الباب طلعله حازم .. ركضت للغرفة جوا .. طب وشايل حسوني بين اديه 

كال : اعذروني خوية تني بزري كوة متحمله مو انوب بزر غيري هذا الجاهل اخذوه وشتريدون اتسوون بيه سووا اني مالي غرض بيه ولا ارضى يربى عدي . 

خابرت على سهى كتلها : جا دزيتي حسوني شني اني اتحملهم اثنينهم وين اكدر 

-خية رجلي ما يكدر شلون بالله اطلك واعوف فروخي واكابله انت عاجر ما عدج ضنا حسبيهم جهالج ما بيها شي هم جهال اخوج.... يتبع 

—————-

#زينب_ماجد

 تكملة الرواية من هناااااااا 

لمتابعة باقي الروايه زورو قناتنا علي التليجرام من هناااااااااا

بدل ماتدور وتبحث علي الروايات عمل 

متابعه لصفحتنا على فيس بوك هنااااااااااا

الرواية كامله من هناااااااااا

مجمع الروايات الكامله 1اضغط هناااااااا

مجمع الروايات الكاملة 2 اضغط هنااااااا