رواية وأنصهر الجليد( الجزء الثالث)جمر الجليد الفصل الثامن عشر والتاسع عشر بقلم شروق مصطفى حصريه

رواية وأنصهر الجليد( الجزء الثالث)جمر الجليد الفصل الثامن عشر والتاسع عشر بقلم شروق مصطفى حصريه

رواية وأنصهر الجليد( الجزء الثالث)جمر الجليد الفصل الثامن عشر والتاسع عشر بقلم شروق مصطفى حصريه

18،19جمر الجليد الجزء الثالث حصري بقلم شروق مصطفى

الفضل الثامن عشر

جمر الجليد الجزء الثالث حصري بقلم شروق مصطفى

عاصم! مالك!

 اصحى!

والله هسمع كلامك! بس ما تمشيش…

ما تسبنيش!

والله هسمع كلامك… بس افتح عينيك، بالله عليك…

كان يبكي بصوت عالٍ، كطفل ضائع عن أمه، ينظر إليهم وهم يحملونه أمامه فوق ناقلة الإسعاف، بعدما أُجريت له الإسعافات الأولية بسرعة. تبين وجود انخفاض حاد في ضغط الدم، فهرولوا جميعًا خلفه، ملتحقين بسيارة الإسعاف حتى وصولهم إلى المستشفى.

ساد التوتر وأعصابهم مشدودة، ينتظرون بخوف خروج الطبيب من غرفة العناية الفائقة. لم تحتمل “سيلا” الوقوف أكثر، فجلست على أقرب مقعد قابلها، تدعو في سرّها أن يُنجيه الله.

رفعت عينيها بذهول نحو “معتز”، الذي كان يستند برأسه على الحائط، يدفعه بعنف كأنما يعاقب ذاته، فتدخل “وليد” مسرعًا ليمنعه:

وليد: بلاش يا معتز كده، هيبقى كويس، عاصم قوي وهيعدي منها.

معتز (بألم وقهر): أنا السبب… أنا اللي المفروض أكون مكانه، مش هو!

أنا اللي وصلته للحالة دي!

لو جراله حاجة، هموّت نفسي! مش قادر أشوفه كده… أنا تعبت… آآه… آه…

فجأة، أمسك برأسه، يئن من شدة الصداع الذي اجتاحه كعاصفة كهربائية رجّت رأسه، وبدأ يتلوى من الألم حتى خارت قدماه، وسقط كالهلام المرتعش، يصرخ مرتجفًا:

معتز: آه… آه… هموت! مش قادر!

انفجرت “سيلا” بالبكاء بحرقة، مما تشاهده أمامها، فلم تحتمل الموقف أكثر. وسرعان ما تم استدعاء طبيب آخر. حمله كلّ من “وليد” و”عامر” إلى غرفة الكشف المجاورة، حيث أُعطي بعض المسكنات المؤقتة.

ومع مرور ساعة من الانتظار، خرج الطبيب أخيرًا.

وقفت “سيلا” متلهفة، وركض كلّ من “وليد” و”عامر” نحوه:

سيلا: خير يا دكتور… طمّنا!

عامر: هو كويس، صح؟ يا دكتور طمّنّا!

رد الطبيب بنبرة مهنية، وقد بدا على ملامحه التعب والخبرة:

الطبيب: المريض تعرّض لضغط شديد أثر على عضلة القلب شبه جلطة، الحمدلله

لحقتوه بسرعة، لو كنتوا اتأخرتوا شوية كان الوضع هيبقى خطر، والتجلطات كانت هتزيد.

لكن السرعة أنقذته.

إحنا دلوقتي مدّيناه إبر سيولة لتذويب الجلطات، وهيبقى تحت المراقبة في العناية المركزة لمدة أربع وعشرين ساعة.

بعد كده، ينقلوه لغرفة عادية وتقدروا تزوروه.

سيلا بصوت مرتجف غير مصدّقة: يعني هو فاق؟! بجد؟!

عايزة أشوفه… بس من بعيد، مش هتعبه.

الطبيب: الزيارة مش هتنفع دلوقتي، خصوصًا في الساعات الجاية.

لكن ممكن تتابعوه من ورا الزجاج، من بعيد.

ممنوع يتكلم أو يتعرض لأي ضغط نفسي، عشان حالته لسه حرجة، وأي انفعال ممكن يسبب له جلطة بجد حاولوا تبعدوا عنه أي توتر… ممنوع يتعب تاني.

أنهى الطبيب حديثه وغادر سريعًا ليكمل عمله.

اقتربوا جميعًا من الزجاج الفاصل، يتأملون “عاصم” في الداخل، عاري الصدر، موصول بعدد من الأجهزة التي تصدر صوت التعرجات القلبية، وعيناه مغمضتان، كأنهما لم تعرفا النوم منذ دهر.

عامر: طيب دلوقتي وقوفكم هنا مالوش لازمة… الزيارة ممنوعة لحد بكرة.

إحنا نمشي ونرجع بكرة. إيه رأيكم؟

سيلا: مش همشي من هنا غير وهو معايا… امشوا انتو.

معتز: وأنا كمان… مش همشي غير لما أشوفه… ويسامحني.

مش هقدر أمشي. هقف هنا، مش ماشي!

وليد بلا حول: روح انت يا عامر، ريّح شوية وتعالى الصبح بدري، ونبدّل.

مش هينفع أسيبهم لوحدهم.

عامر: ماشي… همشي وأرجع الصبح بدري، في ناس بيكلموني في الفندق، حاجات معطّلة.

ثم غادر بعدها بصمت.

جلست “سيلا” على أقرب مقعد، فجلس “وليد” إلى جانبها يطمئنها:

وليد: هيعدّي، كله هيعدي.

أحمدي ربنا، واهدي شوية، عشان ما يزعلش لو شافك كده.

ازدردت ريقها، وكبحت دموعها، قائلة بشفاه مرتجفة: مش قادرة يا وليد… أول مرة أشوفه كده.

الدكتور بيقول لحقناه… يعني لو اتأخرنا شوية بس… كان…

غطّت وجهها براحة يدها، تشهق بقوة، كأنها تستشعر ألم خسارته قبل أن تقع.

اقترب منها “معتز”، وجثى على ركبتيه أمامها، بعينين دامعتين، وقلب يعتصره الألم: آسف يا سيلا… سامحيني… عشان خاطري، سامحوني كلكم. أنا السبب! هو فعلاً أبويا اللي رباني… عشت معاه أكتر من أبويا نفسه.

يعزّ عليا أشوفه كده…

ما تزعليش مني يا سيلا، أرجوكي، وما تبكيش هعمل اللي يريحكم… بس متخلهوش يزعل مني!

نظرت إليه “سيلا” وابتسمت، ثم ربت “وليد” على كتفه يحثه على الوقوف، واحتضنه بقوة: أقوى يا مان كده… خليه يشوفك قوي، وبطّل عياط أنشف كده!

وقفت “سيلا” أيضًا، تمسح دموعها: وأنا مش زعلانة منك…إنت أخويا، والله، وبعزّك.

عمري ما زعلت منك غير مرة واحدة بس… لما باعدت عن مي… وسبتوا بعض.

حاول تكلمها يا معتز… هي لسه بتحبك.

تطلع إليها وابتسم دون أن ينطق بكلمة أخرى.

وظلّ المشهد صامتًا، لكنه مشبع بكل ما لا يُقال.

على الجانب الآخر، كانت “مي” تمارس روتينها المعتاد في الجريدة. وبعد ساعات طويلة من العمل، أنهت دوامها وغادرت من البوابة الرئيسية. وقبل أن تتخطى العتبة، فوجئت بشخص يقطع طريقها، واقفًا أمامها بابتسامة عريضة، هاتفًا:

مازن: إيه الصدف الحلوة دي!

تسمرت في مكانها، تحدق فيه بدهشة، ثم ردت بتردد:

مي: مازن؟! إزيك؟… بتعمل إيه عندنا؟

مازن: كان معايا واحد صاحبي بزوره، قريب من هنا… دي الجريدة اللي فيها، صح؟

هزّت رأسها بالإيجاب، وابتسامة باهتة شقّت طريقها إلى شفتيها، لكنها لم تصل إلى عينيها:

قصص الحياة

مي: آه… هي.

استرسل في الحديث، مشيرًا إلى الكافيه القريب:

مازن: عارفة الكافيه ده؟ بيعمل قهوة جامدة جدًا!

إيه رأيك أعزمك عليها؟ فرصة نتكلم شوية…

بدت عليها علامات التوتر، أخذت تفرك كفيها، ثم قالت بسرعة:

مي: أحم… يعني… آسفة، مش هينفع وكده…

أعمل حاجة من ورا هيثم؟!

أنا كمان متأخرة، ولازم أمشي.

استدارت لتغادر، لكنه استوقفها بصوت هادئ وابتسامة ما زالت تلازم وجهه:

مازن: عندِك حق فعلاً…

بس لو تسمحي، أكلم هيثم تاني ونحدد ميعاد أزوركم في البيت قريب.

إيه رأيك؟

خفضت نظرها خجلًا نحو الأرض، وصمتت دون رد.

وحين طال صمتها، بادر هو بالكلام، نبرة صوته تحمل مزيجًا من الصدق واللين:

مازن: صدقيني… القبول ده حاجة مش بإيدينا.

أنا أول ما شوفتك… حسّيت براحة، وحبيت أتكلم معاكي وأعرفك بجد.

صمت لبرهة، ثم أكمل:

مازن: احنا هنتكلم… مجرد تعارف، مش أكتر.

لو لقيتي نفسك مش مرتاحة، كلّمي هيثم، ومش هيبقى في أي خطوة تانية غير لما تكوني متأكدة من مشاعرك.

ازدادت توترًا، واحمرّ وجهها من شدة الخجل.

هتفت بصوت متقطع، وهي تسرع مبتعدة عنه:

مي: لازم أمشي… ضروري… اتأخرت أوي!

راقبها وهي تبتعد، ثم ضحك بخفة، ورفع يده يمسد شعره متأملًا، تمتم ضاحكًا:

مازن: هو لسه في حد بيتكسف دلوقتي؟!

طيب أعمل إيه… أنا هكلم هيثم برده، وزي ما تيجي بقى…

يتبع تفاااعل للفصل الجديد

الفصل التاسع عشر _ جمر الجليد الجزء الثالث حصري بقلم شروق مصطفى

غادر مازن متوجّهًا إلى منزله، وكان الحظ حليفه حين لمح صديقه هيثم يركن سيارته أمام منزل والدته بجانب الطريق. أوقف سيارته إلى جواره، وأشار له لضبط زوايا الركنة، ثم ترجّل من سيارته هاتفًا به:

هيثم: عاش يا صاحبي! مبروك، صحيح نقلت ولا لسه؟

أجابه مازن بابتسامة مرحة:

– آه نقلت، فاضلي حاجات بسيطة كده بنقلها معايا في العربية. كنت عاوزك في موضوع كده، ما تيجي معايا فوق، وأهو تتفرج عليها. إحنا طلعنا جيران، عمارتك قصاد عمارتي.

قهقه هيثم وقال:

– يا عمّ، ما أنا اللي جايبهالك! تتهنّى بيها يا رب، ويجعلها قدم السعد ليك. يا دوب أشوف الوالدة بعافية شوية، أسلم عليها وامشي على طول.

ثم صمت فجأة كأنه تذكّر أمرًا ما، وقال:

– موضوع إيه اللي قلتلي عليه؟ كلّمني طيب فون أو في المركز بكرة ولا إيه؟

تنحنح مازن وقد بدا عليه التردّد:

– أحم… أنا، ومي. المهم، أنا عايز أجي أزوركم. أنا كلمت مي النهارده صدفة قدام الجريدة. بص، من الآخر يا هيثم، أنا مرتاح، وفيه قبول من ناحيتي. ومش هينفع غير لما أتكلم معاها، وتشوف هي بعدها من ناحيتها إيه. كلّمها تاني كده، عشان خاطري… ماشي؟

تأمّله هيثم وقد شعر بصدق كلماته، ثم قال:

– اللي ربنا رايده هيكون، وكل شيء قسمة ونصيب. هعمل اللي عليا برضه وأقولك.

ردّ عليه مازن بأمل:

– جرّب تاني، والله حاسس إن نصيبنا مع بعض، وإن شاء الله أسعدها عن اللي شافته.

ابتسم له هيثم، وربّت على كتفه، ثم ودّعه وغادر متجهًا إلى داخل البناية.

بينما غادر مازن إلى بنايته الجديدة، فتح باب الشقة ودخل، ثم ألقى مفاتيحه بإهمال على أقرب سطح أمامه، وجلس على المقعد المقابل، يشاهد التلفاز باحثًا عن أي شيء يسلّي به نفسه. ابتسم فجأة عندما خطرت بباله بخجلها وبراءتها وركضها من أمامه، وهمس لنفسه:

– شكلك هدوّخيني… عقبال ما تتكلمي معايا.

نهض من مجلسه عندما سمع صوت اصطدام زجاج نافذة غرفته. دخل الغرفة، فوجد النافذة مفتوحة، وصوت التصادم ناجم عن حركة الهواء. كاد أن يغلقها، لكنه توقف فجأة.

كانت هناك… أمامه. أسدالها يتمايل، ووجهها الملائكي يشعّ نورًا وهي تحتسي مشروبًا ما. وقف متأملًا من نافذته، يتطلّع إليها بصمت، وابتسم داخليًا لما اجتاحه من مشاعر غريبة لم يألفها من قبل. وما إن رآها تدخل إلى الداخل، حتى أغلق نافذته هو أيضًا، بهدوء.

—

على الجانب الآخر، صعد هيثم إلى والدته، وفتح الباب بمفتاحه الخاص. دخل إلى الشقة فوجد نبيلة في غرفتها، فاقترب منها وجلس إلى جوارها ليطمئن عليها.

قال بلطف:

– إيه يا أمي؟ عاملة إيه دلوقتي؟

سعدت نبيلة برؤيته، وابتسمت بدفء مع دخوله عليها:

– ببقى كويسة أول ما أشوفك داخل عليا، الحمد لله… بس الكحة مش عاوزة تسيبني.

ربّت هيثم على يدها بحنان وقال:

– يباركلي فيكي يا رب… هي البِت دي مش بتعمل حاجات دافية ولا إيه؟ هي فين؟ ما شفتهاش وأنا داخل.

ربّتت نبيلة على كتفه:

– حرام، لسه عاملالي من شوية أول ما جيت من الشغل، وكل نص ساعة تعمللي حاجة. هتلاقيها في أوضتها… خبط عليها كده.

تنفّس هيثم بهدوء، ثم قال:

– بصي يا ست الكل، دلوقتي مازن كلّمني تاني… وكلم مي كمان. ونسيت أقولك إنه باع الشقة اللي كان متجوز فيها، وجاب الشقة اللي في العمارة اللي قدّامنا، عشان العروسة الجديدة ما تدخلش على شقة حد.

المهم… هو اشترى، ومش عاوز غير إنهم يتكلموا، يشوفوا إذا فيه قبول ولا لأ.

وهو قالّي لو مفيش من ناحيتها، كأنه ما اتكلمش خالص.

ها، يا ست الكل؟ أخليه ييجي؟

تنهدت نبيلة وهي تلتقط أنفاسها وقد تهيّج صدرها من السعال. وبعد أن هدأت قليلًا، قالت بصوت مبحوح:

– الرأي الأول والأخير ليها… كلّمها وشوف رأيها، أنا مش هضغط عليها في حد.

كفاية إننا اتسرعنا أول مرة… وكمان شايفة نفسيتها مضايقة، كابتة في نفسها يا عين أمها.

رغم إنها بتظهر قوية، بس هي هشّة من جوا.

عاوزة تتحسّن نفسيتها الأول، مش ورا بعض كده… فاهمني؟

أومأ برأسه وقد فهم ما تحكيه، وأخذ نفسًا عميقًا وقال:

– حاضر يا أمي… هقوم أشوفها وأكلمها، وأعرف دماغها فيها إيه.

واللي ربنا رايده… هيكون.

طرق باب غرفتها، فلم يتلقَّ أي رد. فتح الباب ودخل مناديًا عليها، ثم وجدها تدخل من الشرفة.

قال بنبرة تحمل العتاب:

– إيه يا بنتي، بنادي من بدري… بتعملي إيه عندك؟

هتفت مي وهي تعود من الشرفة:

– هيثم! جيت إمتى؟ معلش، مسمعتكش… شوفت ماما؟

أومأ برأسه وقال مباشرة:

– آه، شوفتها. وكنت عايزك في كلمتين كده… انتي شفتي مازن النهاردة؟

تفاجأت من سرعته في طرح السؤال، وسرحت في حديث مازن، وفي إصراره على التحدث معها عن ارتباط جديد وزواج، بينما هي لم تلتئم بعد من جرحها الأول. وما إن وصلت لتلك النقطة في التفكير، حتى ارتجف بدنها وهتفت بتوتر:

– آه… آه، شوفته صدفة. كان عاوز نقعد في كافيه، وأنا مرضتش طبعًا.

قالّي إن أنسب حل إنه يزورنا وكده…

مش عارفة يا هيثم، أنا خايفة… خايفة أدخل في علاقة جديدة.

أنا فعلاً مرعوبة من الفشل تاني، مش عارفة أعمل إيه،

أنا بقيت بخاف أوي من أي راجل.

ربّت هيثم على كتفها، ثم احتضنها ليهدّئ رجفتها، وتأكد من حديث والدته أن الجرح ما زال يسكنها، وأنها بحاجة إلى أن تستعيد ثقتها بنفسها قبل اتخاذ أي قرار. لم يعد الأمر بسيطًا، فقد ترك معتز داخلها أثرًا نفسيًا عميقًا يصعب تجاوزه بسهولة.

قال برفق:

– أهدي… وماتخافيش من حاجة. مازن مش وحش، وطبعه هادي ومسالم جدًا وصبور.

وهو كمان ظروفه زي ظروفك، لكن هو ماوقفش، لسه مستمر.

لازم تكسري حاجز الخوف اللي جواكي،

بصي… إيه رأيك تبقى العلاقة بينك وبين مازن… علاقة دكتور ومريضة؟

انتي عارفة إنه طبيب نفسي، وانتي فعلًا محتاجة دعم نفسي،

عشان تكسري الحواجز اللي جواكي.

وده مش هيحصل إلا لما تحكي مع حد… ويسمعك.

تيجي معايا بكرة المركز زيارة عنده؟

لو ارتحتي، كان بها…

ولو ما ارتحتيش، يبقى احنا زي ما احنا.

تطلعت إليه في صمت، ثم هزّت رأسها بالموافقة. فقبّل جبينها هامسًا بحنان:

– خلاص يا حبيبتي… كله هيعدي وهيبقى زي الفل.

ريّحي انتي دلوقتي، وأنا هشوف ماما وامشي.

هعدّي عليكي بكرة من قدّام الجريدة… ونروح سوا المركز، ماشي؟

يلا… تصبحي على خير.

خرج من غرفتها، واطمأن على والدته، ثم غادر بعدها. استقلّ سيارته، وأخذ يهاتف صديقه، فقصّ عليه كل ما حدث، وشرح له الطريقة التي سيتعامل بها مع الأمر، ثم أغلق الهاتف متنهدًا، داعيًا لها في صمت بصلاح الحال.

قصص الحياة

…

بعد مرور أربعٍ وعشرين ساعة، نُقِل عاصم إلى غرفة عادية. دخل عليه كل من سيلا، ومعتز، ووليد، ولحق بهم عامر.

ابتسم عاصم رغم شحوب وجهه، ونظر إلى طفلته التي وقفت بعيدًا، محاولًا أن يبدو بخير، وهتف:

– سيلا… قربي، واقفة بعيد ليه؟ وحشتيني.

قهقه الحاضرون داخل الغرفة، فحمحمت وليد بمرح:

– احم احم… إحنا هنا، ها! خد بالك.

حمد لله على السلامة يا عاصم، كده تخضّنا عليك!

اقتربت سيلا منه، تمسك براحة يده، تقبّلها برقة، وتبتسم له بحب:

– وحشتني أوي… كده تقلقنا عليك!

إنت كويس؟ ما تتعبش نفسك بالكلام.

ابتسم لها محاولًا طمأنتها، ثم وجّه أنظاره نحو أخيه الأصغر، الذي كان متوقفًا عند باب الغرفة، وناداه هامسًا باسمه، بينما التعب ظاهر في صوته:

– معتز…

ربّتت سيلا على يده، وهمست له تطمئنه:

– معتز كان خايف عليك أوي، وزعلان من نفسه،

وحاسس بذنب ناحيتك… فوقلنا انت، بس، عشان نقدر نفوق له.

استمع إلى كلماتها الأخيرة، وحاول أن يعتدل في جلسته، رغم اعتراض عامر ووليد، لكنه أصرّ على الجلوس، ونادى على معتز أن يقترب.

فدلف الأخير إلى الداخل، ثم ارتمى في أحضانه، يبكي بصمت داخل صدره:

– متزعلش مني… حقك عليا.

ربت عاصم على ظهره، وحدّثه بنبرة حازمة دافئة:

– أجمد كده… أوعى أشوفك تعيط تاني، سامع؟

إنت ابني… عمري ما أزعل من ابني.

أنا بقيت كويس… وعايز أخرج من هنا.

ثم التفت إلى عامر وقال بجدية:

– شوف لي إجراءات الخروج بسرعة، عشان أحجز للسفر برّه.

همس له معتز معترضًا بلُطف:

– استنى… نطمن عليك الأول، ونشوف موضوع الـ…

لكن عاصم قطع حديثه بنظرة نارية حادة، وقال بصرامة:

– مفيش “نستنى” تاني… سامع؟

يتبع لو لاقيت تفاااااعل هنزل بالتطوراااااات

جمر الجليد الجزء الثالث حصري بقلم شروق مصطفى الجزء الأول والثاني موجود كامل واتباد اعمل سيرش بأسم رواية هتلاقيها

تكملة الرواية من هناااااااا 

لمتابعة باقي الروايه زورو قناتنا علي التليجرام من هناااااااااا

بدل ماتدور وتبحث علي الروايات عمل 

متابعه لصفحتنا على فيس بوك هنااااااااااا

الرواية كامله الجزء الاول 1من هناااااااااا

الرواية كامله الجزء الثاني 2من هناااااااااا

الرواية كامله الجزء الثالث 3من هناااااااااا

مجمع الروايات الكامله 1اضغط هناااااااا

مجمع الروايات الكاملة 2 اضغط هنااااااا