رواية عاجر الفصل الخامس وعشرون 25بقلــم الكاتبـــة زينب ماجد (حصريه في مدونة قصر الروايات)

رواية عاجر الفصل الخامس وعشرون 25بقلــم الكاتبـــة زينب ماجد  (حصريه في مدونة قصر الروايات)

رواية عاجر الفصل الخامس وعشرون 25بقلــم الكاتبـــة زينب ماجد  (حصريه في مدونة قصر الروايات)

#عاجر 

{ بقلم الكاتبة زينب ماجد } 

الحلقة_٢٥

كضيت حجابي ورحت للباب اركض .. اصيح : منوووو 

صاحت سهى : فتحي الله لا ينطيج فتحييييي 

فتحت الباب دفعتني وفاتت : ارتاحييييتي ارتاحيتي من هجمتي بيتيييييييي 

-شكو سهى خير 

-تعاركت اني ورجلي من وراااااج جايبة كوا*ج وجاااايه عليه 

-يااا دهر السانج منا ناس شقصيتج دطبي 

- مستحية من الناس تعرفين المستحى اننننننننت 

- هسه دطبي واحجي وفهمينا شكو 

فاتت جوا وشهلاء تحجي : خير يمعودة شكو ؟ 

- يضل خير وهاي البومة جايبة الجلب مالها ولاحكتني لعيالي ياهو السمحلج تجين وشني من عين وكحة تجيبنه وتحين على عياااااالي ولج اني استحي بسالفتج يجي يحجيلهم القصة ويكول على اخوووووتي ذبووووج ولج جاااان استحيتي 

- اكلج شو كافي تغلطين جاية هنا تصيحين وتلعلعين بصوتج ياهو الكايلج روحي فشري وغلطي عليه 

- ردت ابعده منج واسترج يمفضووووحه تروحين تفضحيني كدام عيالي يكلهم تفشر عليه ويشوف الفشار الرجلي رايده تهجميييين بيتي 

- لا اوكفي يعني صحيح انت المراسلته ومفشرة عليه !؟ 

- وانعل سلفى سلفاه خاف ما ترضيييين 

- ومن تكولين منو السمحلج تجين بيت عيالي اريد اعرف منهو السمحلج تاخذين تليفوني وتراسلينه منه وتغلطين كانما اني شلون تتجرأين اسوين هيج شي من ورا علمي 

- حيدر انطاني التليفون وكالي اتصرفي بهالفضيحة طميها شلون نكعد نتفرج وانت حاطتنا علج على كل الساااان 

- تليفوني هذا منو انت ومنو حيدر حتى تاخذون تليفون وتحجون عني ويا فضيحة الجبتها الكم شنو زنيت لو شسويت .. اتزوجت ومحد حاط بحلكي حتى اله كلمة عليه افتهمتي يوم اللي تجيبين من رجلج وتوكليني ذاك الوكت عود اخذي دور المسؤلة عني .. بس محد منكم مسؤل عني ولا احد يحقله يحاااااسبني اصلا 

تفلت عليه وهي تكلي : امداج وامدا خيرج ولج تفضلين الزلمممممة علينه ولج احنا اهلججججح تفضليييينه علينا 

- وياهو العافني بالمستشفى محد وياي واني عمليه لان رجلها ما يقبل شو يمكم حلال ويمي جاية اتفلين ترا كافي سكتت واكول اختي وعيب بس كافي وصلت حدها وياج 

- اني عدي جهال انت شعدج منه ولازم بزلمة فاضحنا ومكير حظوظنااااا شنهي حجتج 

- حجتي ما عندي غيره ... محد الي بهالدنيا غيره مو بس افضله عليج افضله عن الكل ما طوله واكفلي وساندني كلكم بخويطكم محد مهتم لامي كلكم خايفين على اروحاكم وشايلين هم انفسكم خاف توصلكم كلمة من وراي هو الوحيد الشال عني .. لا تضنين افرط بيه لكائن من يكون 

مو جاية تعاركيني واتفلين وتغلطين علمود رجلج 

اني هم اكلج رجلي بيا عين رايحة تغلطين وتفشرين عليه 

فد يوم اني كاربتج لو مسويتلج مشاكل بينج وبين رجلج .. كافي عوفيني اتبري مني واحجي عليه كدام الكل بس عوووفيني

عفتها تصيح ورحت طبيت للحمام .. غسلت 

وطلعت حطيت طاوة وسويت ريوك وهي بعدها مستمرة تصيح وتغلط وجهالها اجو يمي : خالة جوعانين 

- هسه يماما راح اسوي اكل وتدللون 

سويت صينية بيض طك وبيض بتيتة سلك .. ودزيت جبن مثلث وكيمر وصمون راح ابنها جابلنا واجا .. واني بعدني بالمطبخ .. 

حطيتلهم الصينية والتموا جهالها حواليه كتلها : تتريكين لو راح اتضلين لاوية خشمج علينا 

دارت وجهه عني .. واني كعدت اسوي لفات لجهالها 

وشهلاء تكللها : دكوم يا عيني تنحل والله تنحل كومي 

- شكوم رجلي من شاف التليفون وعرف اني مفشرة كضاني ما خلا على حالي حال حتى كتل كتلني البارحة كعدت الصبح والله راسي يوجعني 

حجيت : من ايدج سهى ليش اتهميني بذنبج اني لو داريه والله جان بلعتها وسكتت بس حازم ما يسكت ولا ينامله على سالفة رايحة تفشرين وتغلطين ما حسبتي حساب لو درى شيسوي 

زين كضت بس بحجي 

هو كل حجيه بالعشاير والمكاتب جا لو مكاوم رجلج من ورا هالفشار شتسوين .. اتغلطين وتصيحين علينا اكول اختي الجبيرة وتمون بس تروحين تفشرين عليه عود والله اني ميكشفج 

- ومنين كشفني 

- حرام والله ما ادري ترا اني هسه يلا منج تأكدت 

هو كالي اختج واخذني وكالي دليني واجيتج واني ما ادري صدك التليفون عدج لو شك .. بس هو ما ادير شلون متأكد انت بحيث حجه مترهي يعرف 

- يمن كون سرطان ان شالله ويفكنا منه ناخية علي 

- اسم الله فال الله ولا فالج .. صخونة على هالدعوة عود شني معناتها 

- ويطبه طوب شني خايفة عليه 

- اذا عليه ما اخاف عليمن اخاف لعد .. لعلمج الجاية ادعين عليه لو ما هو اني وهالمسكينة وذول الجهال من ورا اخوج الشفية جان صفينا بالشارع 

- وليش يمه شسوالكم اشترالكم قصر شعشوع 

- ما اشترالنا قصر شعشوع بس بايع اللبيت ولاغف الفلوس وابو البيت يريد بيته 

- والشفية مالج شسوا 

- كاللهم البيت بيتي وراح يطلع حيدر يتصافون وياه وياخذون فلوسهم منه 

- امبارك فرحانة راح تخلي الزلم تكاوم اخوها انت شكد طايحة حظ 

- انتم ليش باطلين وادافعين لحيدر مو باع بيتي واخذ فلوسه .. وين فلوسه لازم هم مامنه عندج ما طول الموبايل يمج 

- لا منطيني فلوس ولا ادخليني بهالسالفة فلس احمر ما مستلمة من بيتج الله لا يعوزني 

- جا وين حطهن ابو البيت يريد فلوسه 

- يضربه وجع مو تكولين الشفية مالج تكفل البيت وطرداه خل يولي 

حجت شهلا : الزلمة كرايبي واشتراه على معرفة جعفر وثاق بيه شلون خل يولي  الزلمة يريد فلوسه حلال حرام 

- وانت جاية ادافعيلا ما يكول مكعدينج بيه ما يكول ارملة وين تروحين لو طلعاج من البيت 

حجيت : وهو ياهو مالته بيها عم وليد خال بنية شو يصير كرابتهم الله يعين ضيمي شو انتم اخوتي وذبيتوني وجاية على هالمرة تعايرينها بكرابيها ليش ما ينطيها بيت واحدكم ربع ما انطاني وع الناس يهبل ويتكلب ليش ما ينطيها بيت .. ياهو الينطي بيت 

- يمه صايرات حبايب الله يرحم من وزت جعفر عليج وطردتج من بيتها 

كامت شهلاء انداريتلها : سهى شتريدين .. جا من انا ضايكة اللوعة واني بطرك روحي اروح اذبها هي وجهالها انتقم منها العشته ما اتمناه لعدوي مو لمرة ذبها البين .. خليج محضر خير 

- ومنين نزلت عليج الحنية 

- خية حنيتيش بس جهال اخوي وين يرحون نذب لحمنا بالشااااارع غير جهالنا ذولة شبيج سهى 

-هسه صارو جهال اخوج وانت اخوج الذمة ما باريته 

-وبزره ياهو مالتهم بذنب ابوهم اروح اذب جهاله والله هو ذباني واذب حركتي بالجهال !؟ 

ما ردت ضلت دايرة عني 

كتلها : كابلي جهالج خل اروحن بعد .. تأخرت 

- مو بطلتي  من الدكتورة شعدج بعد وين رايحة 

- مو للدكتورة لبيت حازم 

- فلك وتروحين لبيته شني تبياته 

- سهى شنو هالمفردات الخايسة مرته اني وهو مريض مسوي عملية وما عندا اليداريه اروح اكابله للمغرب ارجع

-وشني تاليتكم بالله تضلون هيج 

-لا بس تخلص اربعين جعفر نتزوج 

-عمت عينج خليتي جعفر تغفى عينه وتاخذين وترابه اخضر 

- اكلج رحمة لوالديج لا تدخلين اخذ ما اخذ يخصني ما يخصج 

خووووش 

كامت تحجي عفتها وراي وكمت غسلت اديه وكتلها : شهلاء مو تنسين فدوة المواعين وياج 

- اي بس تطولين 

- للمغرب 

- جيبي وياج شي لحسوني سنونة كاعد تطلع وكاعد يتأذى 

-يعني شجيب اني ما افتهم بهالامور 

-بس كلي للصيدلي يفتهم وهو يكلج 

-خوش يلا مع السلامة 

لبس عباتي وطلعت ورجعت كتلها : سهى جيتج زعلانة لو مسيرة 

-ليش رايدة تطرديني 

-صخونة رايدة اجيبلج عشا بطريقي شطردج 

- لا ما ارجع اخذلي يومين هنا وعود ارد تعبانة ما بيه حيل اكابل خلقته ع السواه بيه البارحة من ورا الشفية مالج 

عفتها وطلعت لبيت حازم دخلت ١١ ونص تقريبا هيج 

فتحت الباب وفتت البيت مطفى .. باوعت الدوانية هو نايم بسريرة والكهرباء طافية بس الغرفة باردة الظاهر توها طافية 

.. رديت الباب على كيف رحت جهاله نايمين بغرفهم .. دخلت المطبخ صاير حلبة مصارعة من المواعين شي فوك شي .. عفتهن ورحت للغرفة الهو نايم بيها .. 

دنكت عليه بسته من خده استشعر وحس .. 

بقيت ابوس بخده وركبته مط جسمه وفتح تك عين : اجيتي يحيلي 

- يبعد حيلي كله متأخر بنومتك شعجب 

- مو ضليت سهران وياج ورجلي اذتني الصبح نسيت اخذ العلاج بالليل يمكن 

حجاها وهو يفتح اديه .. 

كعدت بين اديه كام يبوس بخدي وزندي حجيت : اسويلك ريوك 

- خليج يمي شوية 

جريت نفسي : تلحك عود .. احجيلي شنو ابالك اكل شمشتهي 

- بخيلة 

تنهد وباوعلي : بكيفج شتسوين سوي 

- ما عاجبك شي مشتهي شي 

- عاجبني تشريب لحم هاذ السوب الاصفر هيج على رون اخضر ودهين وحار اشربه الله حيل ابالي 

ضحكت : جنك على لحم صدك جذب .. 

- ما عدنا شجني 

- وابوه جبير الكصاب براس شارعكم 

- وياهو اليروح 

- ازرك احيب واجي شنو القضية 

- اكلج هاي زروكج عوفيهن ما احبهن سويلنا اي شي نعمة من الله . 

- هسه راح اسويلك بيضتين سلك تاكلهن خفيفات ويا استكانة جاي حتى انطيك علاجك على ما اشوف ادز ياهو واسويلك الغدا 

- جا خل اخابر اشوف ياهو الكاعد علي موجود ؟ 

- نايم 

ذب التليفون : اي جا كعديلياه بالعجل 

حجيتها واني اكعد يمه : ما عاجبني 

وكمت افرك راسي بجتفه واحشر روحي بيه رفع ايده واخذني لحضنه : كون دوم ما يعجبج وتجين بحضني هيج 

بسته بخده : اذا نعسان ارجع نام على ما اكمل شغل 

- لا الجامع كاعد يمجد ما يصلح بعد .. 

- ديلا لعد خلي احطلك كرسي بالمطبخ حتى تكابلني واني اشتغل .. ومن اكمل شغل اسبحك 

- هم اليوم اسبح 

ضحكت : عاجبك تضل هيج 

- لا مو رجلي تون عليه .. 

- بس زين الك السبح ينضف جرحك 

- شيكومني بعلي اتعاجز بهاي رجلي  وعملية بطني 

بسته بخده : اني اساعدك انت بس ذب نفسك عليه واني اخلص كلشي 

كعدت علي وديت جابلي لحم غنم .. 

ريكته هو وجهاله وكمت انظف البيت وهو كاعد ع الكرسي يسولف وياي اجت دنيا كالتله : بابا 

- ها يبعد ابوج 

- اريد اروح لخوالي 

- ليش شعدج غاد 

- ما رايدة ابقى هنا كاعد اتضايق 

- منين 

- هيج ابالي 

- سالفة كل يومية ترحين بويه زحمة بنية انت 

- بس بابا اني هنا دا اتضايق 

حجتها ودمعت تخبل هو يفتحلها اديه 

- منين تتضايقين بعد ابوج تعاي 

باسها بوجهه ويكللها : دنيتي شو عاينلي بويه 

مسح دموعها وهي تكله : مدا اتعود على هاي الحياة هنا 

تقصدني هو كاللها : بس تردين ويا امج من تجي 

- ماشي 

وصى علي ياخذها ويرجع .. واني بقيت انظف لحد ما كملت واللحم ستوا سويتله مشتهاته ونظفت مكانه وسريرة واخذته للحمام هم غسلته ولبته هدوم نظيفة .. وصبيتله غداه  وخليته كباله .. 

طبت امل للبيت تقريبا ٢ الا شوية 

كاللها : سوكيش هذا اللي يضل للـ ٢ 

كلتي ب١٢ وسكتنا سويتها بالوحدة وغلسنا شو كامت تزيد ومسوية البيت فندق 

هو يحجي وهي تباوع ع البيت وعاكده حاجبها ردته : جنت عد اهلي مريتهم ما اضن محتاجني بشي ما شالله خدامتك حاضرة وقايمة بالواجب صاحبة واجب ما شاءالله تركض 

- اذا جانت هي خدامتي فانت تروحيلها فدوة اقلها مو واجبها وبعدني ما حاطها ابيتي وتتعنى وتجي حتى تكضي واجباتج الانت هاملتهن ومكابلة شوارعج 

- شوارعي اخير من كعدتك وزنتك ورنتك اروح اخض روحي اخيرلي 

غمها وهي طلعت .. 

رحت اجيبلا مي لكيتها بالمطبخ تصب لنفسها اكل خذت ماعونها وصعدت فوك .. 

اخذ المي .. كابلته وكعدت اسولف وياه .. واحجيله على سهى اجت من الصبح وبقى يجاريني بالسوالف ويجبها ع العشيرة وياخذني على ايامه كبل  وشلون جان عايش وعن مرهقته .. 

وسوالف تجر سوالف لحد ما كالت الخمسة العصر هاي اني ... 

كمت دزيت سجاد على كعك ابو الدهن .. نزلت امل جانت نايمة بغرفتها فوك .. كالتلي : ما كضيتي مسامرج ويا .. 

- لا والله هالوديت كعك واريد اسوي جاي عصرية ، ليش ؟

- ما تستحين على روحج فضيحتج و اسمج على كل السان وانت متلزكة بيه ؟

- كافي الله يعرفني الناس متهمني المهم اني مرتاحة .

- مرتاحة بجالي مكابلتني ابيتي وتضنين اهدج 

صحت واني اتجاهلها : حازم جاي هيل لو بدووووونه 

رد :- اي والله مهييييييل 

حجت : خايبة انت ما تعرفيني من احطج براسي وعلي ما اخليج تندلين دربج منين 

- كل الصار بيه والجرا علينا وحتى جرح حازم انت سببه لو من البداية ما رايحة لجعفر وما ادري شحاجية وشمصفطة عليه يمه جان البيوت ما نهجمت .. واليهجم بيوت الناس الله يهجم بيته 

- والله يهجم بيتي بيج ؟ . 

- اني مالي غرض بيج بس لا تظنين اعوفلج حازم وامشي سويتها مرة وكلت تعدل حياتها وطلعتي ما تستاهلين وما تنعاد .. جهالج الج بس حازم الي . 

- اني موجودة وانت موجودة وانشوف منو اليهجم بيت منو . 

حجتها اني عفت وكاعد اروح يم حازم لكيت حازم متجي وواكف يم الباب مال الدوانية .. كتله : انت هنا 

هز راسه وكاللها : اذا بعده السم بكلبج وما كفاج الصار بينا لو صار ازيد انت الخسرانة وجهالج ضحيتج .. شتريدين سوك انكلعي لسوكج عساج لا رديتي وجوزي مني اشوف حياتي شلون ما اريد ما تدخلين 

- ما ادخل تاخذها وتطلع  ما تكابلني ابيتي ولا اريد اشوف خلقتها هنااااا 

- يوم الاحطها ابيت الخلفج عود احجي هاذ العدي وهذا بيتي وبكيفي يعجبج يعجبج ما يعجبج بيا حايط زين الطخي راسج 

جاب سجاد الكعك ... 

حطته وشلت الجاي ومشيت للاستقبال وهي وياه يترادمون ويتعاركون .. صحت : حاااازم الجاي راح يبرد واني وراي رجعة للشماعية يلا عيني 

عافها تحجي واجا كعد ع القنفة 

وهي طبكت باب البيت بكل قوتها انرج البيت رج من الصوت 

كال : كسر كون 

صبيتله استكانة وحطيتها بيده وهو يكلي : ضلي رديها لا تسكتيلها ولا تسكتين لاي واحد يتجاوز وياج .. واليتمادى اطيني اسمه لا ارجعه بامه وحق هو علي . 

- دشرب عيني عوف موضوعها اذا كل ما تطب وتطلع تحرك اعصابك 

شوب وهو يكلي : جهالج الج بس حازم الي مو 

ضحكت : وهذا الصدك .. اني من هالدنيا كلها ما اريد غيرك .

ابتسم وشرب استكانته وهو مبتسم

وبقينا نسولف لحد ما راد يصير المغرب كتله : خلي اروح بعد خاف يتأخر الوكت 

- خليج ما طولنا كاعدين 

نتعشى واوصلج غاد .. خاطر ناخذ سهى ونرجعها لرجلها 

- نرجعها ليش 

- تضل مرة خطية مو مالت نأثر على بيتها حتى لو مو ادمية ما طول سوالها درس تابت منه هاهية .. 

- جا هو كاتلها واحنا نرجعها .. هي تريد ترتاح منه 

- جا خليها اني احلنها 

كمت عشيته وانطيته دواه .. وخذاني بالطريق خابر على رجل سهى تعاتب وياه وكاله : اذا تعزني وتريد خاطري وانت زلمة كلف تجي تاخذ المرة وتصالحها اني بس ردتك تمنعها ما ردتك تسوي مشاكل ويا عايلتك واني منتظرك بالبيت . 

مشينا للبيت .. 

طبيت حازم وياي دخل طلعت سهى وهي تكلي : وين مطببته مو البيت بيه مرة كاضة عدة 

خزرتها وهو يكللها : ما طولج كاتلة روحج على مرت اخوج وخايفة عليها تيلا شدي حيلج وكابليها وحطيها ابيتج 

كالتلا : بالله بلا زحمة خوية اني ما حاجية وياك 

- ومن ما تحجين وياي جاية لبيتي شنهي 

- يا فدوة عساني لا طبيت بيتك كاعدة ابيت اهلي 

- اهلج ذول وين 

-البيت بيت اختج 

- هي اختج اللكمة ما مدبرتها مو ادير بيت .. ما ادري يمكن اخيج لو رجلج دافع بمكاني عنها واني ما ادري 

عافته وطبت كتله : حازم جا تعيرنا 

- سمعني انا ما اسوي حاجة لبشر لا ما اعايره وازرف راسه بالمعاير .. عبن كل البشر شما تحطيلا ينكر ضناج المن لحمج ودمج لو كبر نكر تعبج فضلي عايري كبل لا احد ينكر وتضلين تعضين اصابيع الندامه .. اقلها انت ماخذه حيفج منهم ليكدام 

- يااا هههههه .. يمعود لله البشر ما يجازي 

- والنعم بالله بس جا حتى الله بقرانه يعاير البشر بفضايله ونعمه ويمنن عليهم حتى يتذكرون نعمته 

- يااااااا استغفر والله انت مصيبة 

- عايني اني لا اسكتلي لبشر ولا اناملي على حك ولا اتجرعلي واحد حرام كل واحد وانطي طينته بكصته واليرشني بماي ارشنه بدم .. هالتشوفين الوادم تحترم وتتجفى ملاوي .. 

هالناس ذول من يشوفولهم واحد فقير ومدمغ مثلج 

يكومون يركبون فوكه ويعلون وبس يحجي يدمغونه ما يحترمونه .. ناسنة صلفة تصالفي بحقج لا تسكتين لاحد ما دامه ما حاط ايده بحلكج ومنطيج . 

- والله كاعد تكبر براسي واني شلوني يعتازلي بس دفعه 

- اني هاي الدفعة انطلقي واني بظهرج اشك امه فوك ابوه اليجيسج 

- يااااااا هههههه

كاعد نحجي اندكت الباب .. 

كام وهو يكلي : عاونيني 

عاونته وهو يرتكز على عكازته 

ودخلت جوا كالت : شني رجلي اجا ؟ 

- اي دز عليه حازم 

-وليش دز عليه 

- يحاجي 

كاموا يحجون بالحديقة واني سويتلهم جاي 

ورحت قدمت الهم وسلمت عليه صاح على سهى اجتي وحازم يكله : هي مثل اختي الصغيرة وما طولها عرفت غلطها هاهية انا ما رايد مشكلة بينك وبين عائلتك والله يحفظكم ويسهل امركم بجاه هو الحسين . 

تصافوا وتصالحوا واخذت جهالها وراحت 

وهو دز حلويات لبت جعفر وضل يلاعبها ويلاشيها واطاني فلوس كالي : خليهن جوا ايد امها خطية الجهال ذول مالهم ذنب . 

اخذتها من ايده وكتله : متندم 

باوعلي : هالموضوع كلنا ما نحجي بيه 

-بس رايده اعرف شعورك 

- لا والا تضنين لو جعفر باقي اني وين ؟ ميت ولو ما ميت راح تكضي ؟ هو الحط روحه بدربي اني حاولت ابعدنه هواي وذبيت الامر يم عمه بس ما تاب ولا يتوب مني ومنج لا ما يبرد كلبه بيه وبيج . 

- يكتل ! 

- جا ما ذباني بالسدة اني والميت سوا لو محد عاثر علي وضال النزيف يجري ما ميت هسه اني ؟ 

- اترك هالموضوع يغثني ما اريد افكر بيه ، الصار صار والله يجازي الظالم اني مالي غرض باحد 

-ابتسم وهز راسه وكام : محتاجة شي 

- لا 

راح وسديت الباب وراه 

من بعدها سوا تنازل لحيدر وطلعاه من المركز وكاله : شرط ما توصل لبيتي والست ملايين انت تحتار بيهن ويا الزلمة 

حيدر صدك راح بقى فترة يم عمي 

وطلع منطي الفلوس لرقية مأمنهن يمها .. 

من راجع وكايللها اريد الفلوس .. كايلتله : اخطبني واطيك الفلوس شمدريني لو اطيتك الفلوس واختك راح تتزوج ما تنتظر عدة مرت اخوك تطلع واني افلس من كلشي 

لو تخطبني واطيك لو ما انطيك كلشي ومثل ما لعبت عليه العب واخذهن منك .. ولو تقربت لبيت اهلي انكر وعمامي يتجازون وياك 

اجاني اني ابيتي كال : هسه اني لا ادخلت بسالفة زواجج 

ولا وكفت وعارضت والبيت عفته الح ولمرت حعفر بس رقية حطيت الفلوس عدها وما تنطيني الفلوس الا اخطبها واني ما اكدر اخطب وجعفر توه ميت . 

كتله : وهسه شكللهم ومنين تعرفها حتى اطيتها وشلون اطيتها 

- بعد امنت شسوي وعمي اكل راسي يريد الفلوس يرحعهن للزلمة كاعد يجي 

رحت لسارة نكرتهن كلش ما تدري عنهن 

كتلها : حاجيها 

راحت واجتني تكلي : علي العباس اختي لا ماخذة فلوس ولا منطيتنا فلوس .. 

ونكرت رقية الفلوس وخلت حيدر يفر باذانه 

راح على امها يتوسل بيها وامها تكله : حرام بتي ما عدها فلس لا تتهم البنية وتكسر بختها .. وابعد عن بتي لو شفتك تحوم عليها لو تتقربلها لا احجي لاخوتها وعمامها يخلون ركبتك علوة نصة ويكسرونك . 

حيدر احتار بكاعه وعمي اكل راسه يريدله احد يداينه ماكو .. 

كلت لحازم كالي : خلي يواعدها وانت صوري وثبتي عليها .. وكون تحجي الحجي كله يجرجرها .. ويلزم عليها ممسك حتى نعرف نهدد البرابيـ * بيه .. اذا ما انردن نحطه بيد احد من عشيرتهن يشيل الفلوس عنهن . 

حجيت لحيدر كلام حازم كالي : والله خوش فكرة بس هي ما ترد عليه .. 

كتله اخذ تليفون مرت جعفر ما تعرف رقمها وخابرها وقنعها وكللها : دبرته وفدوة الج كل الفلوس واني مشتاقلج وبس اريد اشوفج 

وواعدها هنا على ابو اني ما موجودة ومرت جعفر عد اهلها .. 

صدك خابرها وردت وقنعها وجرجرها بالليل تجي .. 

اني اخذت مرت جعفر مبوشة وانداريت على سارة كتلها : عينج ع البيت راح اخذ مرت حعفر واروح لحازم منك خاف احد ماحود يسطي لو ابو البيت اليريد البيت يسويلنا سالفة فدوة اتفطني 

كالت : بعيني 

صدك من راس الشارع ركبت مرت جعفر واني رحت لبيت عمي .. لان عكب باجر الاربعين مال جعفر 

ضليت شوية عدهم وخابراني حيدر 

كتله : ها بشر 

كال : صورتها بكلشي مو بس وهي تحجي فتحت فيديو حتى واني ابوسها خاف تفكر تلعب وياي لو ما تطيني . 

- كتله هاي عاشت ايدك كتلها لو بعد 

- لا بعدني ما حاجيتها وكتلها صورتها كلت خلي تروح حتى ادزلج الفيديو تحفظينه يمج وانت تكلين لسارة وتشوفينه الها .. اذا ما اطتني الفلوس اطي التصوير لعمامها . 

- تمام 

سديته وسلمت على بيت عمي ومشيت لمحل حازم حتى يرجعني للبيت وكتله بالسواه حيدر كالي : اخيج هاذ فد كديييييش شايفة لو عمامها لمحو عليه هيج صورة وياها لا يكعدونه بفصل مرتب يعلسون الجواه والوراه 

- يا .. جا غير بتهم الجايته للبيت 

- العشاير ما تفهم هالامور يسمونه مجرجر البت وطبعا لو ياخذها لو يطيهم فصل وهم راح يعتزون ابتهم حتى ياكلون الفصل شيسوون بيه ويطونه مرة من حوره ...

الوادم هيج صارت ادور المشاكل دوارة خاطر اطكلها فصل ب٥٠ مليون ١٠٠ كليون تاخذلها بيت بروس الزواج وتكعد وزن . 

- حرام حيدر يطيني فصلية 

- باع عاي وياهو الكام يدور فصلية بوكتنا هاذ !؟ خو ياخذ الفلوس ويروح يطكله مرة توب التوب يجيبل وحدة فصلية شني وين عايشين بالهور 

- ها يعني حتى الفصلية كامت ما تمشي 

-هاي سوالف الفصلية من جانت الناس فكور ومحد عده ياخذ مرة وواحد يوصل الثلاثين وما معرس والنسوان معنسة شافولهم درب يطون فصلية بدل الفلوس  الا بهالوكت هاذ ياهو اليرضى ياخذ فصلية يكلك غصبا ما عليك تطيني فلوس تداين تبيع نهجم بيتك لو ما انطيت من تكليلا اطيك فصليه يطكج زيج ويدك بيتج . 

واخيج هذا غشيم ما يعرف بسوالف العشاير ودروبهم .. ولو سواها يروح بشربة مي 

.. وصلاني البيت كلت لحيدر 

كال : جا خل امسحن لا يضلن ويتسربن وصدك ابتلي خلي بس من تحجي بالفلوس وتعترف عدها حتى اخذهن منها . 

صدك مسح الفيديو اللي يبوسها بيه .. وبقى بس الفيديو اللي هي تعترف بيه .. نقله الي بالبلوتوث .. ثاني يوم اني انداريت لسارة وكتلها : خية مو كلتلي وحلفتي بالعباس فلوس حيدر مو عد اختج 

- يا علي العباس مو عدها شمالج قابل هي بواكة 

- لا جا اني اتهمها هاج شوفي 

شوفتها الفيديو كامت تلطم على خدها. .. 

كالت : وعلي ما ادري عنها تحلف وتتكفر ما عدي والله ما ادري عنها عليج العباس هذا الفيديو عد منو وشوكت هي رايحة وياه 

- الفيديو عد حيدر ويكول لو ما دزيتولي الفلوس اليوم .. الفيديو هاذ اودي لعمامها وهم يتصرفون وياها 

- لا عليج العباس وعلي هسه اروح املخنها تملخ بس لا تفضحينها تعرفين اخوتي ما يرحمون والله لو دروا بسوالفها هاي يكتلونها والله اني مني تاخذين الفلوس والله مني 

- بعد يمج خية تعرفين اني والله مو طلابة شر ولا رايد افضح البنية مثل اختي بس فعلتها هاي ما تنحط بالعب .. 

- لا هسه اروحلهم .. يا العب بحالها لعب والعباس بس اصطبريلي وشوفي 

خذت عبايتها وراحت لاهلها .. 

شوية هناك العصر وجابتلي ٥ ملايين و٥٠٠ وكسور 

وتكلي صارفة منهن وامي تكول اني اداين واسددهن بس خلي يسترون ع البنية ويحذفون الفيديو والله يتيمة ولو دروا اخوتها يكتلونها وهي جاهل ماخذها الطيش صغيرة والله 

كتلها : بس الفلوس هالايام ترجع سارة لازم ننطي 

- لو اعرف اداينهن من رجلي واطي والله اجيبلج ياهن بس عليج العباس مسحي الفيديوات من تليفون حيدر بنية وتعرفين شصير لو اشتهرت 

- بعيني والله احذفهن بس خل تكمل الفلوس 

شلت الفلوس اطيتهن لعمي مو لحيدر وكتله : بقية الفلوس حيدر يكملهن .. 

جان بيت عمي هوسة خواتي عده والناس .. 

وماجرين كوستر للاربعين حتى يروحون للنجف اشتركنا ع الروس كل واحد ٢٥ اني وخواتي وحيدر و ولد عمي وعمي .. 

فمسوين ثواب وبالليل الكوستر بعد الساعة ١٢ تجي .. 

التموا الناس عد عمي ونفسه الحجي عليه رغم عمي كاللهم عرسي بعد الاربعين يزفونها ويروحون .. بس الناس ما تصدك تلكالها سالفة تحجي بيها 

كاعد اشتغل خابر حازم .. 

وقت العشا ويا الاذان كال : اطلعي 

- وين اطلع 

- انسحبي بسرعة 

- ليش ؟ 

- مثل ما اكلج بدون نقاش وبسررررعة 

- اكو شي 

- البسي عباتج واطلعي اكلججججج 

ضل بالي شكو ليش هيج يحجي  كضيت عباتي وكاعد اطلع الا وتصد بوجهي وفاء .. وحازم برا بسيارته  اشرلي بسرعة تعاي .. مفتهمت شكو وشصاير ..... يتبع 

—————

#زينب_ماجد

تكملة الرواية من هناااااااا 

لمتابعة باقي الروايه زورو قناتنا علي التليجرام من هناااااااااا

بدل ماتدور وتبحث علي الروايات عمل 

متابعه لصفحتنا على فيس بوك هنااااااااااا

الرواية كامله من هناااااااااا

مجمع الروايات الكامله 1اضغط هناااااااا

مجمع الروايات الكاملة 2 اضغط هنااااااا