سكريبت ريماس وبلال كامل سكريبت ريماس وبلال كامل وحصري لمدونة قصر الروايات لمدونة قصر الروايات
سكريبت ريماس وبلال كامل وحصري لمدونة قصر الروايات
-ريماس!
قالها جدي بحدة
قومت من علي الكنبة بتوتر و وقفت قدامه هو واعمامي اللي قاعدين حواليه
-مين اللي كسر الفازة؟!
-انـ...
-انا يا جدو
بصينا كلنا لمصدر الصوت
كان شاب اول مرة اشوفه
بس خمنت انه هو...
-انت ازاي يعني يا بلال؟!
انت لسه طالع!
-لأ ياجدو طلعت من شوية وكسرت الفازة بالغلط، اسف
-طيب، هعديها عشان انت غالي عليا
جدو قام واعمامي كل واحد فيهم راح في ناحية
بصيت لبلال باستغراب وقولتله:
-انت ليه قولت كده؟
ابتسم وقرب وقف قدامي وقال:
-الكبير يتحمل المسؤولية
جت ساندي بنت عمي الصغيرة وقالت بندم:
-شكرا يا ريماس، شكرا يابلال عشان غطيتوا عليا
بصلي باندهاش وقال:
-اصلا!
يعني مش انتِ اللي كسرتيها
-لأ
-اومال قولتِ انه انتِ ليه؟
ضحكت بسخرية وقولت:
-اصل الكبير بيتحمل المسؤولية
اتنهد بعدين قعد وقال:
-وحشتوني جدا
-ايه اللي جابك يا بلال
-مش مبسوطة؟
-اتبسط ليه؟
كنت ايه في حياتي
بصلي باستغراب وقال:
-اقرب حد ليكِ!
-كنت يا بلال
وده كله انتهي بعد ما سافرت منغير وداع وسبتني اتعـ*ـذب ومسألتش فيا حتي
عيونه اتملت ندم
وقال بصوت مبحوح:
-ريماس انا...
قاطعته:
-هروح اغرفلك الغدا
وسيبته ومشيت بكل برود
انا ريماس، عندي 22 سنة
ماما وبابا اتوفوا بسبب حادثة، وانا كنت علي حافة المـ*ـوت برضو بس ربنا نجاني
بعدها علطول عيشت مع اعمامي واولادهم، وجدي
والقوانين عندهم شديدة جدا للبنات
يعني، بعد الـ18 مبنكملش تعليم
لازم طول الوقت نطبخ و نروق ونعملهم شاي
بيشربوا 60 كوباية في اليوم حتي في عز الحر
وللأسف عدد البنات قليل، بنات اعمامي 4 وانا الخامسة
وسط بيت فيه 13 راجل، ودلوقتي بقوا 13 راجل وابن***
مين بلال؟
اكبر حفيد، عنده 25 سنة
بلال كان اقرب واحد ليا من ولاد اعمامي وكنت بحبه وانا صغيرة
لغاية ما سافر وهو عنده 18 سنة وسابني منغير وداع حتي
حطيتله الاكل وادتهوله
اكل وبعد كده قعد مع اعمامي
خلصت غسل المواعين والبنات خلصوا اللي وراهم ولبسنا طرحنا وقعدنا معاهم
-جدو انت عارف اني كبرت وبقا عندي 25 سنة، صح؟
جدو بصله بتركيز وقال:
-اه، عارف
-طيب، انا قررت اتجوز
-مين؟
كله كان قاعد مركز معاه وانا كنت ماسكه الشاي وسرحانه فيه
وفوقت علي صوت بلال وهو بيقول:
-انا عايز اتجوز ريماس
بصيتله بصدمة وكنت لسه هرفض بس افتكرت ان جدي ممكن يموتني فيها
ففضلت ساكته
-مافيش مشكلة
الخطوبة امتي
هنا مقدرتش استحمل واتكلمت:
-ايه ده ايه ده
خطوبة ايه!!
ومين قال اني موافقة اصلا
عمي صالح الوسطاني زاعقلي:
-اخرسي!
من امتي واحنا بناخد رأي البنت في حاجة؟!
رد بلال بحدة:
-من دلوقتي
مراتي تتكلم براحتها!!
مراتي؟!!
ده صدق نفسه بقااا
جدي ضرب ع الارض بالعصاية وقال:
-اخرسوا!!
بعدين بصلي
-مش موافقة ليه يا ريماس؟
-مش عايزة اتجوز
ولو اتجوزت مش هتجوزه
-تمام
بعدين بص لبلال وقال كأنه مسمعنيش:
-انتوا تعملوا كتب كتاب علطول منغير خطوبة
اصلا يعني!!
ــــــــــــــــــــــــــــــــــــــــــــــــ
"بعد اسبوعين"
-بارك الله لكما وبارك عليكما وجمع بينكما في خير
قومت من علي الكرسي
ودخلت اوضتي علطول
بصيت للمرايا ومسحت دموع نزلت من عيني
صعبت عليا نفسي جدا
يعني حتي الحاجة الوحيدة اللي المفروض تبقي من اختياري
اتفرضت عليا
قعدت علي السرير وبدأت اعيط بحرقه
فجأة سمعت صوت الباب بيتفتح ويتقفل
خمنت انه هو
واتأكدت لما جيه قعد جمبي علي السرير بهدوء:
-ريماس، بصيلي
بصيتله وانا لسه بعيط
مسح دموعي وقال:
-اوعدك هعيشك ملكة ياريماس وهخرجك من الجحـ*ـيم ده
اوعدك...
اتكلمت وسط شهقاتي:
-انا...مش عايزاك
مش...مش عايزاك
بصلي بنظرة مفهمتهاش
بعدين اتكلم بحنان:
-انا عارف، بس اديني فرصة
علي الاقل عيشي معايا كأني صاحبك
فضلت اعيط اكتر فحاوطني بايده وطبطب علي ضهري
-اهدي يا ريماس عشان خاطري
والله عمري ما هأذيكِ
بعد ما هديت روحنا بيته
اللي المفروض بقا بيتنا
غيرت هدومي ولبست بيجاما وخرجت علشان احضر الاكل
-بتعملي ايه ياريما
رديت منغير ما ابصله:
-بحضر العشا
-هطلب اكل يا ريماس
سيبي اللي بتعمليه وتعالي عشان عايز اقولك حاجة
حمدت ربنا في سري وروحت وراه
قعد علي الكنبة وانا قعدت جنبه والفرق بينا مسافة طويلة
-مش عايزة تكملي تعليم؟
-عايزة جدا
-حلو، جبتي كام في الثانوية؟
-97%
-ادبي ولا علمي؟
-ادبي
-حلو، عايزة تدخلي جامعة ايه؟
بصيتله بحماس وقولتله:
-انت هتخليني اكمل دراستي!!
-ايوا
يلا بقا قولي
-بص انا عايزة ادخل ألسن انجلش
-اشطا، هسجلك في الجامعة
-بجد يا بلال!!
-بجد ي قلبي
-شكرا اوي بجد
-العفو ياحبيبي
عدي اسبوع
اتنين
شهر
شهرين
سنة!
في يوم كنت بذاكر والموضوع كان سهل بالنسبة ليا لاني كنت شاطرة جدا في الانجلش
بلال دخل الاوضة واداني عصير
وشد كرسي قعد جنبي
-صعب؟
رديت وانا بصاله ومبتسمة
-لأ، كويس
-يعني مش محتاجة مساعده؟
-لأ
-خالص؟
بصيتله بشك وقولت:
-عايز ايه يا بلال
حك رقبته وقال:
-عايز انام ع السرير
-تاني؟
-يا ريماس ما انا ضهري وجعني من الكنبة
-يا بلال مانا قولتلك من الاول نام علي السرير وانا هنام علي الكنبة قعدت تقولي لأ وماينفعش وعملتلي فيها سبع البرمبه
-طب ما ننام احنا الاتنين ع السرير
-لأ وبلاش قلة ادب
نام انت علي السرير وانا هنام علي الكنبة
-ماشي
وفعلا نام علي السرير
طفيت النور وشغلت الابجورة
وبعد نص ساعة خلصت وقفلتها وخدت مخدة وبطانية وطلعت نمت علي الكنبة
منكرش اني حبيته شوية في الفترة دي
احم حبيته اوي
يمكن رجعتلي مشاعر الطفولة اللي كنت بحاول اتجاهلها
لما خلاص روحت في النوم حسيت بيه وهو بيشيلني ونيمني علي السرير
وباس جبيني بعدين خرج من الاوضة
صحيت اليوم اللي بعده وانا مقررة حاجة
مقررة اني اعترفله بحبي!
اول ما خرجت من الاوضة شوفته قاعد علي الكنبة ومديني ضهره وكان بيتكلم في التليفون
-عندي صفقة مخـ*ـدرات تحفة
اول ما سمعتها اتجمدت مكاني
طلعت مني كلمة بصدمة
-مخـ"ـدرات!
لف وشه ليا بسرعة وقال بتوتر:
-بـ...بقولك ايه اقفل
قفل و وقف قدامي وقال بارتباك:
-صدقيني الموضوع مش زي ما انتِ فاهمة!
-جوزي تاجـ*ـر وشمـ*ـام!
-يا ريماس انا...
قاطعته بحدة:
-اخرس
انا رايحة لبيت اعمامي
دخلت البس وانا منهارة وهو طبعا مقدرش يكلمني نص كلمه
خرجت بشنطة هدومي وكان معايا الكتب اللي بذاكر فيها
-هوصلك
-لأ، هرن ع اي حد ييجي ياخدني
-هوديكِ انا ي ريماس
-لأ
زاعق بطريقة خوفتني:
-لو رنيتِ علي حد فيهم هكسـ*ـرلك ايدك!!
انا قولت هوديكِ!
بصيتله وسكت
بعدين نزل وانا نزلت وراه
وصلني البيت ونزل معايا
اول ما دخلنا جدو اتكلم:
-انتِ غضبانة؟
-لأ، جيت عشان وحشتوني
بص لبلال بشك وسكت
بلال دخل الشنطة اللي فيها الكتب، فعمي الاصغر اياد اتكلم بسخرية:
-انتِ فاكره انك هتذاكري وانتِ هنا؟
اتكلم بلال بحدة وصوت عالي:
-اه هتذاكر
ولو عرفت ان حد فيكوا منعها مش هيحصل كويس
عمي صالح بص لجدي وقاله:
-انت شايف بيتكلم معانا ازاي
جدي: محدش فيكوا لي دعوة بيها
ذاكري براحتك
ابتسمت لجدي ودخلت الاوضة وبلال دخل بعدي يحط الشنط
بصلي وقال بحزن:
-انا آسف اني خبيت عليكِ
-...
-كنت هبطل والله، انا مش بشـ*ـرب انا بتـ*ـاجر بس وكنت هبطل اقسم بالله
-يعني انت شايف ان ده كلام مقنع؟
-لأ بس...
قاطعته:
-مافيش بس، ورقة طلاقي توصلي
-طب آسف
-بتعتذر علي ايه؟
ايه اللي هيتصلح؟
مسك ايدي واتكلم بندم والدموع في عينه:
-مش عارف بس والله هتغير يا ريماس
بالله عليكِ متبعديش عني
سحبت ايدي بعدين قولتله بحدة:
-معتقدش ان قراري هيتغير
خاف من ربنا يا بلال
اتنهد وسابني وخرج
عدي بعد اليوم ده شهرين
وفعلا محدش من اعمامي ولا اولادهم اتكلم معايا نص كلمه عن موضوع الدراسة
وبرضو محدش كان بيضغط عليا في شغل البيت
بعد الفترة اللي عدت دي جيه وقت الامتحانات
صحيت اول يوم امتحانات
خدت دش وفطرت وجهزت عشان انزل
اول ما نزلت لقيته تحت وساند علي العربية
وشه كان شاحب
سرحان
خاسس شوية
اول ما شافني جيه ناحيتي
-وحشتيني...
-ايه اللي جابك يا بلال
-جيت اوصلك الامتحان ي حبيبة بلال
بجد انسان مستفز بشكل
-مش عايزة منك حاجة
قال برجاء:
-ارجوكِ ي ريماس
-انا قولت مش عايزة منـ...
قاطعني صوت جدي:
-اركبي مع جوزك
-حاضر...
ركبت ورا بضيق وهو ركب وبدأ يسوق
-ريماس
-...
-ردي عليا
رديت بزهق:
-نعم
-انا تُبت يا ريماس
-طيب
-مش هترجعيلي؟
-لأ، واظن اني قولتلك اني عايزة اطلق
-ذاكرتي كويس؟
-بلال انا بتكلم بجد، طلقني!
-ان شاء الله الامتحان هيبقي سهل
-بلال!!
-قلبه
-طلقني!
-انزلي يلا وصلنا
نزلت وانا بضحك غصب عني
خلصت والامتحان كان سهل الحمدلله
وطبعا كان واقف مستنيني
-عملتي ايه
-الحمدلله
-كان سهل؟
-اه
فجأة جيه صوت من ورانا:
-آنسة ريماس!
قبل ما التفت ورايا بصيت علي ملامح بلال اللي اتغيرت
مسكني من دراعي و وقفني وراه
جيه الشخص اللي كان بينادي وكان زميلي في الجامعة
وقف قدامنا وقال:
-هو حضرتك اخوها؟
-لأ يحبيبي جوزها
عايز ايه؟
-ا...انا بس كنت هديها المحفظة عشان وقعت
شد المحفظة من ايده بعنف وقاله:
-ماشي امشي
مشي وبلال بصلي
فضل باصصلي شوية بعدين مدلي ايده بالمحفظة
وقال بغيظ:
-خدي يا آنسة ريماس
خدتها منه وضحكت ع طريقته
جيت اركب ورا راح مسك ايدي وقال:
-اركبي قدام
-لأ
-مافيش مكان ورا
شنطك فيها
-شنطي!
-ايوا، اصلك هتروحي معايا
بصيتله بضيق بس استسلمت للأمر الواقع وركبت
طول الطريق كان ماسك ايدي وكل شوية يبوسها ويقولي:
-حقك عليا بحبيبي
او
-حقك علي قلبي
او
-سامحيني
وعموما سامحته
وحسيت انه اتغير فعلا
روّحنا البيت ولقيت شغال فيه اضاءة خفيفة
وشموع في كل مكان
مسك ايدي وباسها
بعدين قالي بندم كبير حسيته في صوته:
-انا آسف يا ريماس
صدقيني انا اتغيرت و...
قاطعته:
-انا بحبك يا بلال
كنت عايزة اقولهالك يوميها بس حصل اللي حصل
ابتسم وقال بحب:
-وانا بحبك اكتر يا قلب بلال
ــــــــــــــــــــــــــــــــــــــــــــــــ
-بلااااااااال
-نعم ي حبيبي
-شوف بنتك بقا انا زهقت وهعيط والله
جيه شالها وفضل يهديها لغاية ما نامت وحطها علي السرير
بعدين قعد جنبي ومسح علي شعري
-مالك يا ريما؟
-تعبت
-معلش ياحبيبي بكرا تكبر وترتاحي
-ايوا فعلا، هرتاح اوي
-اممم، او يمكن لأ
-ليه!
-عشان هنجيب عيال تاني
-بلال
-قلبه
-طلقني
-بكرا هتمتحني اخر مادة في الكلية
-يابلال طلقني
-ذاكرتي؟
-بلال!
-قلبه
-طلقني!!
-ان شاء الله يبقي سهل
-تمت-
ــــــــــــــــــــــــــــــــــــــــــــــــ
تعليقات
إرسال تعليق
فضلا اترك تعليق من هنا