سكريبت -انتَ طالق كاملة وحصريه لمدونة قصر الروايات
سكريبت -انتَ طالق كاملة وحصريه لمدونة قصر الروايات
-انتَ طالق
-افندم؟
-سوري يا فندم اندمجت في الرواية
بصلي باستغراب وقال:
-طب عموما انا عايز رواية حرب النجاة
-يا استاذ شوفها علي الرف
-وانتِ لزمتك ايه مش فاهم
-احم، حاضر ثواني هجيبهالك
طيب، انا كوثر
في الوقت ده كان عندي 17 سنة
وليه قولت في الوقت ده؟
عشان دلوقتي عندي 25
ومين اللي كنت بكلمه؟
مدثر، اللي اكتشفت بعد كده انه ابن صاحب بابايا
واللي بقا ييجي كل يوم جمعة للمكتبة
مدثر عنده 27 سنة
مهندس، انا كنت بكره المهندسين، وهو كرهني فيهم اكتر
-السلام عليكم
-وعليكم السلام
جيه وقف قدامي وقال:
-صباح الخير يا آنسة
-صباح النكد
-مش طايقاني ليه يا كوكو
-بطل تقولي كوكو!
-حاضر
-اجيبلك رواية ايه
-مش عايز، جيت اتكلم معاكِ في موضوع شديييد الأهمية
-ارغي
شد كرسي وقعد جنبي
-بصي يا ستي
في الشغل واحد قالي يا مدثر
-الف مبروك؟
-قالي يا مدثر!
-وبعدين يعني، هو انت اسمك فتحي وانا معرفش؟!
-يا كوثر قالي مدثر حاف!
-وهو المفروض يقولك مدثر بالشطة والكمون؟
-المفروض يقولي يا بشمهندس مدثر
نفخت بضيق وقولت:
-يخربيت الغرور اللي بيعليلي الضغط ده بقاااا
-يعني انت ترضي تبقي مهندسة وحد يقولك كوثر بس؟
-ياحبيبي ما يقولي كوثر بس هو انا السيد البدوي؟!
-يا ايه؟
استوعبت اني قولتله ياحبيبي وشتمت نفسي بكل الشتايم اللي اعرفها في سري
-هتصدقني لو قولتلك ان الكلمة دي بتطلع تلقائي؟
ضحك بصوت عالي وقال:
-هصدقك يا كوكو
-ايه كوكو دي يااااض
اتفزعت انا وهو علي صوت بابي حبيبي
-بهزر معاها والله
ضربه علي ضهره جامد لدرجة ان ضهري وجعني بداله وقاله:
-طب انشف كداااا
قام من جنبي وهو ماسك ضهره
احسن ابن حلال ويستاهل
-الا قولي يا مودي الخطوبة هتبقي امتي
-الاسبوع الجاي ان شاء الله يا عمو
-الف مبروك يا حبيبي
لأ stop كده
خطوبة ايه؟
-انت هتتخطب؟
-اسمها هتخطب يا جاهلة
-بـ...بجد؟
أ...ألف مبروك
-الله يبارك فيكِ
ابتسمتله وانا عيوني مليانة دموع
لميت حاجتي وقولتلهم:
-بعد اذنكوا
ولفيت عشان امشي
-استني يا كوثر
بصيتله
بصلي باستغراب وسأل:
-مالك؟
-ماليش
-لأ انـ...
وقفه ايد بابا وهو حاططها علي كتفه
بصيت لبابا بامتنان وطلعت برا
هوضحلكوا
انا ايوا بحبه
وألف تبا لقلبي
اصل شخص بشوفه كل اسبوع
وانسان وسيم ودمه خفيف
عيونه بتنسيني انا مين
ابتسامته بتخلي الدنيا تضحك حواليا
عايزيني ما احبهوش؟!
وعموما انا اكتشفت ان بابا عارف بس عامل نفسه من بنها
خرجت من المكتبة وروّحت البيت
طبعا معيطتش
انا ولا يمكن اعيط علي راجل... عيطت علي مهندس
ــــــــــــــــــــــــــــــــــــــــــــــــ
مشيت وانا متأكد انها كانت هتعيط
بس ليه!!
بصيت لعمو عبد العزيز وهو حاطط ايده علي كتفي
وسألته:
-هي مالها!؟
اتنهد وقعد علي الكرسي اللي كنت قاعد عليه
بعدين قال بجدية:
-بص يا مدثر
انت خطوبتك قربت يا حبيبي وان شاء الله الفرح كمان وهتتجوز
اتمني ان في الفترة دي متكلمش كوثر ولا تيجي المكتبة فالايام اللي بتبقي موجوده فيها
-ليه!!
-مش مهم ليه يا مدثر
اعمل اللي قولتلك عليه بعد اذنك!
-تمام
خرجت من المكتبة وانا متدايق عشان بيقولي مكلمهاش!!
ازاي مكلمهاش وابعد عنها بعد ما اتعلقت بيها وبكل تفاصيلها!
ازاي ابعد عنها وانا بدوب لما بتبصلي!
ازاي ابعد عنها وانا بستني كل يوم جمعة عشان اشوفها واشوف ضحكتها اللي بتخطفني!
ازاي ابعد عنها بعد ما حكيت لمذكراتي عنها!
ازاي ابعد عنها بعد ما كتبت شعر في عيونها!
ازاي ابعد عنها بعد ما...بعد ما حبيتها!!
ايوا، انا بحب كوثر
بالنسبة لبنت عمي اللي المفروض تبقي خطيبتي؟
احنا الاتنين مجبرين علي بعض بسبب وصية غبية من جدي
وقررت انا وهي اننا هنفشكل الخطوبة بعد شهر وكل واحد فينا هيروح للي بيحبه
وانا هروح للي بعشقها!
دخلت الشقة وانا مش طايق نفسي
-مدثر!
بصيت لبابا منغير ما اتكلم
فشاورلي اقعد جنبه
-مالك؟
-انا مش عايزها يا بابا
-ياحبيبي مانا عارف، بس دي حاجة مش بأيدي!!
-بس انا بسببها هخسر اللي بحبها!!
اتنهد وقالي:
-بتحب مين يا مدثر؟
قولتله بغضب منغير ما اعلي صوتي:
-هتعمل نفسك مش عارف؟!
ما انت عارف اني بحب كوثر!!
-اعملك ايه يا مدثر؟
-فعلا، هتعملي ايه
قومت وقولتله:
-انا هفشكل مع سارة بعد شهر وهخطب كوثر
-انت بتحبها كده ليه؟
-عشان عمري ماشوفت ولا هشوف زيها
دخلت الاوضة
وانا عارف انه مش هيعترض، لأنه نفسه مش موافق علي اني اتجبر علي حد، وعارف كويس
اني بحب كوثر
دخلت اوضتي وقعدت علي المكتب منغير ما اغير هدومي حتي
فتحت مذكراتي اللي عاملها كلها لكوثر
فتحت صفحة، وكتبت فيها:
-"هَل لِي يَا كَوثَرُ أن أنَالُكِ بَعدَ حُبٍ دَامَ أعوَامَ؟
أخَافُ البُعدَ عَنكِ فَتَصيرُ الأمَانيُّ أوهَامَ
أفَيا نَاسُ تَعجَبونَ مِن حُبٍ صَادِقٍ وهَيامَ؟
وَمَا كَوثَرُ إلا دُرةً سَكنَت فِي القَلبِ عِوامَ"
قفلت النوت بوك
وقومت بهدوء غيرت هدومي ونمت
نمت وانا بحاول اهرب من واقع ان حتي لو سبت سارة، كوثر ممكن ترفضني
انا عارف كوثر كويس، وعارف ان نفسها عزيزة وممكن ترفضني لفكرة انها هتفتكرني شايفها بديل، وانا مش شايف غيرها والله
ــــــــــــــــــــــــــــــــــــــــــــــــ
عدي شهر
شهر وانا ماشوفتش مدثر تاني بعد اخر يوم
والشهر بقا اتنين
والشهرين بقوا تلاتة
حاولت انساه، بس معرفتش
بس حاولت انساه علشان خاطر خطيبته، مش حلو انها تبقي مخطوباله وانا بفكر فيه!
ــــــــــــــــــــــــــــــــــــــــــــــــ
عدي تلت شهور
حاولنا نفسخ الخطوبة كذا مرة بس كل المحاولات بائت بالفشل
فتحت النوت بوك وبدأت اكتب ودموعي بتنزل علي الورق:
-"صَارَ الفُؤَادُ مُشتَاقٌ، وصَارَتِ الأحلَامُ بَعيدٌ
صَارَت الأمَانيُّ وَهمً، وصَارَ قَلبي مُقيّدٌ
أيَا كَوثَرُ صَار قَلبي مُشتاقٍ لحَرفٍ مِن فَمِك سَاحرٌ"
قفلت النوت بوك وبدأت اعيط اكتر وانا بدعي ربنا انها تكون من نصيبي...
-مدثر
بصيت لبابا وانا عيوني محمرة
فكمل:
-قابل اخو سارة يديك الشبكة، سارة مش هتكمل
ــــــــــــــــــــــــــــــــــــــــــــــــ
كنت قاعدة في المكتبة عادي زي دايما، وفجأة الباب اتفتح بشده ودخل منها مدثر وهو شكله جاي جري
-كوثر!
-بسم الله
في ايه يجحش؟!
وقف قصادي وقال فجأة:
-تتجوزيني؟
-نعم!
-تتجوزيني؟!
-انت مخطوب
-اولا اسمها خاطب
ثانيا الخطوبة اتفسخت
ها، تتجوزيني؟!
-لأ
-ليه!!
-عشان عمري ما هتجوز مهندس
ــــــــــــــــــــــــــــــــــــــــــــــــ
-بارك الله لكما وبارك عليكما وجمع بينكما في خير
عملنا كتب كتاب بعد الخطوبة بأسبوع
قومت سلمت علي بابا وباباها وقرايبي
بعدين روحت لمصلي السيدات علشان اشوفها
وشوفتها
كانت واقفه ولابسه فستان ابيض وخمار نفس اللون
جميلة اوي...
كالعادة...
قربت منها ببطء وحضنتها
وخرجت مني تنهيدة، وخرج معاها تعب كبير
كده هقدر اخد كوثر في حضني!
بقت مراتي!
البنت اللي بكتب عنها من اول مرة شوفتها من 8 سنين بقت ليا!!
روحنا البيت
واول حاجة عملتها اني اديتها النوت بوك، قرأت اول كام صفحة وعيونها بدأت تدمع
-كل ده ليا يا مدثر؟
-كل ده ليكِ ي عيون مدثر
حضنتني وقالت:
-انا بحبك اوي يا مدثر
-مش اكتر مني ي حبيبي
ــــــــــــــــــــــــــــــــــــــــــــــــ
-مدثر
مودي
ي بشمهندس
ي وااااد
-نعم يا كوثر
-مبتردش عليا ليه؟
-ياحبيبي ما اكيد مش هرد عليكِ وانا نايم
-انت مابقتش تحبني
-فعلا
-نعم!
-بعشقك
قعدت جنبي علي السرير وقالت:
-انا خايفة اوي
-من ايه ياكوكو
-خايفة من الولاده يا مدثر
-متخافيش يا حبيبي هتبقي كويسة
النهاردة عندك معاد مع الدكتور صح؟
-ايوا
-ماشي ياحبيبي
بوست جبينها وقومت
عدي كام ساعة وجهزنا علشان ننزل
وصلنا عند الدكتورة وطمنتنا علي إلياس ابننا
عدي كام يوم وصحيت عليها وهي بتأن من الوجع
قوت مخضوض وسألتها:
-في ايه يا كوثر؟!
هتولدي!!
هزت دماغها فقومت جري غيرتلها لبسها وانا لبست اي جاكيت قدامي ونزلنا سوقت بسرعة جدا ووصلنا المستشفى اخيرا
كوثر دخلت اوضه العمليات وانا كنت قاعد علي اعصابي وجنبي عمي عبد العزيز وبابا
بعد فترة الدكتورة خرجت
جريت عليها وسألتها بلهفة:
-ابني عامل ايه؟!
وكوثر! كوثر كويسة؟!
-كويسين الحمد لله يا استاذ
اتفضل عشان تكتب الـ...
قاطع كلمها صوت الممرضة وهي بتقول:
-المريضة قلبها وقف!!
الدكتورة جريت علي الاوضة وانا فضلت واقف بصدمة
عمي عبد العزيز بيعيط
وانا مش عارف استوعب اللي سمعته
مقدرتش انطق غير:
-يارب متكسرنيش بيها
يارب متكسرنيش بيها
الدكتورة طلعت بعد شوية وانا لسة واقف مكاني
نطقت جملة واحده:
-البقاء لله، المدام اتوفت
ضحكت وقولت:
-مستحيل
كوثر مش هتسيبني!
حبيبتي مش هتسيبني!
-شد حيلك
دموعي نزلت من عيني
وقولتلها بهدوء معرفش جبته منين:
-انا عايز اشوف إلياس
خدتني لي
كان شبه كوثر جدا
بوسته وحضنته
بعدين روحت كتبت بياناته
وخرجت وانا بمشي في ممر المستشفى
بفتكر ايامي مع كوثر
بفتكر فرحتي لما وافقت بعد اقناع طويل
بفتكر دعواتي انها تبقي ليا
وقفت في نص الطريق
بصيت لعمي عبد العزيز اللي كان بيعيط بحرقه وبابا بيهديه
فجأة
الدنيا اسودت حواليا..
نفسي داق..
جسمي بقا تقيل..
اخر حاجة حسيتها كان جسمي وهو بيتدب علي الارض...
"البقاء لله، الأستاذ اتوفى"
-تمت-
تعليقات
إرسال تعليق
فضلا اترك تعليق من هنا