سكريبت بارك الله لكما وبارك عليكما وجمع بينكما في خير كامل وحصري لمدونة قصر الروايات
سكريبت بارك الله لكما وبارك عليكما وجمع بينكما في خير كامل وحصري لمدونة قصر الروايات
بارك الله لكما وبارك عليكما وجمع بينكما في خير
"مع آخر جملة قالها المأذون، بقت مراتي خلاص
بنت خالتي وأكتر بنت حبيتها في حياتي
حب طفولة، وحب مراهقه، ولو جينا للحق، حب كل فترة في حياتي
كنا بنحب بعض من أيام الطفولة، بس الظروف كانت ضدنا
أتقدملها واحد مناسب، وبعد ضغط شديد من أهلها وافقت"
- انت واثق من اللي حصل دا
_ واثق إيه يا محمود، بقت مراتي خلاص
- مبتحبكش، انت مش شايف...
"رفعت عيوني
كانت قدامي بتودع أهلها ودموعها نازلة زي المطر"
- خلي بالك منها يا أمير، صدفه في عينيك
"الجمله طلعت من كل اللي موجودين
سلمت عليهم، وهي استأذنت تدخل تجيب شنطتها"
_ احم...ممكن أدخل !
= اتفضل
_ كل دا بتجيبي الشنطه
= أمير أنا...
"كانت خايفه تبص نحيتي
صدفه اللي شخصيتها قوية، ضعيفه قدامي دلوقتي
عيونها فيها حزن الدنيا، مكنتش عارف أعمل ايه
غير اني أسمعها
كلامها مش مترتب، بس أهم حاجه عندي تطلع اللي جواها"
= متقربش..
_ اسمعي الكلام
= مش عايزة حضن، مش عايزة، أنا بس...
"أخدتها في حضني"
_ كل حاجه هتتحل
= ليه بتعمل كدا
"ضميتها ليا أكتر"
_ عشانك مراتي حببتي وماليش غيرك
"ساكته، مبتعملش حاجه غير إنها بتعيط"
_ طيب يلا يا أستاذة، نعيط في بيتنا أحسن
= بيتنا؟
_ لا صحصحي كدا، إنتي مرات أمير بدر ياحبيبتي
"ضحكت"
_ يلا !
"مسكت إيدي ونزلنا
كانت ساكته، سرحانه طول الطريق
الوقت عديَ، وأخيرًا وصلنا"
_ نورتي بيتك
"بتبص علي كل رُكن في البيت"
= أمير، دي كلها صور ليا !
"سِكت ومعرفتش أقول إيه
اكتفيت بإبتسامه وبدأت أساعدها في ترتيب هدومها"
= هتاكل !
_ إنتي هتاكلي !
= ماليش نفس
_ إنتي مأكلتيش من الصبح
= ولا هاكل
_ طيب اقعدي اسمعي معايا الفيلم دا
"اتنهدت"
= حاسه إني....حاسه إني مش مرتاحه
_ طبيعي يا صدفه، اليوم أحداثه صعبه
= طيب أنا هدخل أنام أحسن
"سابتني ودخلت قبل ما أرد عليها
كنت عارف إنها داخله تكمل عياط"
_ صدفه !
"قعدت جنبها وفضلت أطبطب عليها"
= هو ليه عمل كدا؟ ليه سابني يوم الفرح، ليه
|فلاش باك|
- صدفه هتتجوز وانت قاعد محلك سر، اعمل حاجه ياخي
- سيبها تتجوز يا معتز، هي كدا كدا مبتحبوش، هو غصب يعني ؟
- جرا ايه يا محمود، الواد اللي هتتجوزو اصلا محدش راضي عليه، و....
_ اسكتو بقا، اسكتو ممكن
- ايوا والعمل؟
_ معرفش
"كانت ليلة عبارة عن دموع
عدَّت في ثواني وجه يوم الفرح، فرح صدفه"
"خالتي رنت عليا
كنت مفكرها بتسأل مجيتش ليه
فجأة قالت:
- أمير انت فين، صدفه هتموت نفسها
ركبت العربية وطلعت بسرعه علي بيتها
روحت لاقيت المعازيم برا عادي والطبل شغال والزغاريط صوتها عالي
طلعت الشقه فوق لاقيتهم قافلين، خبطت"
_ ايوا يا خالتي، أنا أمير افتحي
- الحق يا أمير صدفه
"خالتي منهارة
كانت حالتها صعبه، وأنا مش فاهم حاجه"
_ صدفه، افتحي الباب طيب ونتفاهم
= لا مش فاتحه، مش هفتح
_ لو عملتي حاجه في نفسك....
- بعتلها رساله وقالها كل شئ قسمه ونصيب، واحنا مش عارفين نعمل إيه
"قلبي اتقبض، ازاي يعمل حاجه زي كدا، وليه
من نحية صدفه قافله علي نفسها، ومن نحية خالتي مش فاهمه في إيه"
_ صدفه، عشان خاطري، مش احنا صحاب صح؟ افتحي وفهميني إيه حصل وأنا هجبلك حقك، افتحي بس خلينا نتفاهم
"بعد محايلات كتيرة
فتحت الباب"
_ صدفه....سيبيني يا خالتي معاها دقيقتين
- والمعازيم، والناس والمأذون اللي قرب يوصل
_ الفرح هيتعمل متقلقيش
= عايز إيه
_ إيه حصل
"أدتني تليفونها
قرأت الشات بينهم، واللي فهمتو إنه سابها وراح خطب بنت تانيه وفرحهم قرب كمان
أمر عجيب، ازاي قدر يكسر قلب بنت بالشكل دا"
_ تتجوزيني يا صدفه؟
= كدا كدا أنا انتهيت وحكايتي انتهت يا أمير
_ ششش، تتجوزيني؟
|باك|
_ يا صباح الورد
= .......
_ عملت نفسي الشيف حسن وحاولت أعمل فطار
"مكانتش بتدي أي رد فعل بتكتفي بإبتسامه مصطنعه وبس"
_ طيب ياستي، حابه تعملي إيه في يومك انهاردة
= ولا حاجه....
_ طيب تحبي نخرج؟
"بَصَّتلي بِفرحه"
= هتخلص امتي؟
_ ورايا كام حاجه بسيطة كدا، مش هتأخر
_ طيب أنا عايزة...
_ كملي كلامك
= حابه أروح الملاهي
_ بس كدا؟ دا احنا عينينا، بس تاكلي الأول، عشان لو جرالك حاجه هيقولو أمير السبب
|مساءًا|
"خبطت علي باب الأوضة"
_ جهزتي !
= ايوا، دقيقة بس
"استنيتها"
_ عديَ عشر دقايق
= إيه رأيك؟
_ إيه دا إيه دا، مراتي حلوة كدا
"خبطت كتفي"
= احم، طول عمري حلوة يا باشمهندس
_ دا معناه إيه بقا !
"قربت خطوة"
= أمير، إياك وإلا...
"قربت خطوتين"
_ وإلا إيه
"قربت خطوة"
= أمير انت مجنون...
"نزلت علي الأرض
وبدأت أربط في الكوتشي بتاعها"
_ دا معناه إن فاضل رُباط الكوتشي، ينفع تنزلي من غيرو؟
"ضحكت"
= عليك حركات !
_ عسل صح؟
= عسل أسود
_ إنتي كويسه !
"رفعت عيونها"
= لا
"فتحتلها حُضني"
_ أنا فاشل أوي في المواساة بصراحه، بس أقدر أخبيكي جوايا بعيد عن الدنيا دي
= خايفه
_ عارف
= مبهزرش والله، كل حاجه بتعلق بيها بتمشي وتسيبني
أنا بقيت خايفه، أنا حتي خايفه أبصلك، خايفه اتكلم معاك كتير، خايفه أضحك معاك، خايفه أحكيلك، خايفه أتعلق بيك وأصحي ألاقيك مشيت زي ما...
_ مش هيحصل عشان أنا...
= ؟؟؟
"مسكت إيدها"
_ فيه كلام كتير اوي عايز أقولهولك، كلام قديم وجديد، زي حواديت ألف ليلة وليلة كدا
مستعده تسمعيهم؟
"اتنهدت"
_ إدي نفسك فرصه تشوفي الحلو اللي في الدنيا
= طيب يلا؟
_ يلا فين
= الملاهي يا أمير، انت نسيت !
"ضحكنا"
_ يلا
"وصلنا الملاهي
لعبت بكل الألعاب، كانت بتضحك من قلبها
عديَ كام أسبوع علي جوازنا، وأول مرة أشوفها فرحانة كدا
كانت طفلة، طايرة من الفرحه بالألعاب اللي في المكان"
= أمير هو انت هتخذلني امتي؟
_ ليه بتقولي كده
= اصل اشمعنى انت يعني اللي هتنصفني
_ انتي شوفتي مني حاجه وحشه
= لا
_ من واحنا صغار زعلتك مرة !
= ايوا يا أمير، كنت بتشد شعري، وتطلع تجري ورايا
"ضحكت"
_ ياااه يا شيخه، لسه فاكرة
= وقال إيه، صدفه هي اللي غلطانه
_ إنتي اللي كنتي بتستفزيني وفي الاخر تقولي لخالتي أمير ضربني
= ياسلام، اتصدق انك...
_ أنا بحبك
"ضحكت بعيونها"
= لسه !
_ منتهاش اساسا
= حتي بعد ما كنت هتجوز غيرك
_ مكانش هيحصل، عشان كنت بدعي بيكي، والدليل أهو، إنتي معايا دلوقتي
= وافرض كنت....
_ مكنتيش، عشان كنت واثق في ربنا، كنت واثق إنه هيجمعني بيكي
"ابتسمت"
=طيب يا فنان، يلا نروح
"أشطر واحده تقطع اللحظات الرومانسية"
_ يلا ياختي
"وصلنا البيت"
= صحيح...
_ سامعك
= عايزة اسمع حواديت ألف ليلة وليلة اللي كنت بتقول عليها دي
_ بحيث كدا اعتبر دي فرصة...
= لا متحلمش كتير
"ضحكت"
= والضحكه دي معناها إيه بقا
_ بداية السطر كنت بحلم بيكي، ونهايته معاكي إنتي
= ودا إن دل علي شئ !
_ هيدل إني بحبك
تمت
تعليقات
إرسال تعليق
فضلا اترك تعليق من هنا