سكريبت و لِمَ نعود ؟ حصري لمدونة قصر الروايات
سكريبت و لِمَ نعود ؟ حصري لمدونة قصر الروايات
و لِمَ نعود ؟
_بقولك مش عايزاكي تظهري في حياتي تاني
=يا بنتي طب اسمع...
_اسمع ايه ها اسمع ايه؟؟! اسمع لفك و حواراتك و لا عايزاني اطبطب عليكِ عشان معاناتك ؟؟ و لا استني استني هسقفلك عشان انجازاتِك..أنتِ اخترتي بنفسك متبقيش وسطينا..عارفة لو جيتي من سنة واحدة سنة بس كان عندي استعداد اسامحك و انسى اللي فات بس بعد اللي حصل أنا مستحيل مستحيل هسامحك
=طب اسمعيني الاول يا يارا أنا كنت بس ..
_لو سمحتي أنا مش فاضية فياريت حضرتك تمشي و تردي الباب وراكِ أنا تربيتي معلمتنيش اني اقفل الباب في وش حد...سلام ياااا دكتورة سحر
سبتها و مشيت و انا كلي مشاعر غضب و كره عمري ما حسيت بيهم من فترة كنت فاكرة اني فقدت الاحساس بس الشكر ليها رجعتلي اسوأ احساس...هربت و جريت على اوضته...قعدت عالأرض و سندت راسي عالسرير بس معيطتش و كأن خلاص دموعي جفت مبقاش عندي تاني ... رفعت ايدي و قعدت ادعيله كتير لو بس بس كان جنبي دلوقتي كان كل حاجة هتبقى احسن كتير
.................................................
تقريبا الوقت جري و محستش بنفسي إلا و أخويا يامن بيصحيني
_يا يارا...يارااا اصحي يا بنتي كل ده نوم
=اييييه... ااااااه ضهريييييي
_انتي محرمتيش يا بنتي من نومتك اللي عالأرض ديه و كل مرة تيجي تشتكيلي ضهري لا رقبتي لا رجلي
= بس بس بس كل ده كلام هي الساعة كام عالرغي ده
كله بقى
=أنا روحت صليت الفجر و رجعت حضرتك و صحيتك قبل ما اروح بس كالعادة لا حياة لمن تنادي حتى بصي
الشمس قربت تطلع
انتفضت من عالأرض و فتحت عيني جامد لقيتها لسه مضلمة
=انت مش هتبطل تعمل فيا الحركة البايخة ديه أبدًا
_لا .. عشان عمر ما تضيع عليكِ صلاة الفجر (بشر المشائين في الظلم إلى المساجد..)
=بالنور التام يوم القيامة
قولتها بحب و انا بصاله...بالرغم من كل اللي حصلنا بس دايما محتفظ بإيجابيته و عمره ما قصّر في احتياجاتي كان دايما جنبي حتى و هو موجوع زيي عمره ما سمح للحزن بإنه يدخل بيتنا
=خلاص أنا صحيت اهه يلا روح ناملك شوية قبل الشغل و لا عايز تطرد و تبقى عالة عليا بقى و انزل الف بيك في الشوارع و اقول حاجة لله يا محسنين و..
_يابايييي على رغيك خلاص خلاص هغور من وشك..
حد يصحى عنده طاقة للكلام ده كله
قالها بابتسامة جانبية و جري بسرعة تفاديًا للمخدة الطايرة اللي كانت في طريقها ليه
قولتله بصوت عالي و انا داخلة اتوضأ
=متنساش تاخدني معاك و انت رايح انهاردة انا معرفش الطريق للكلية لسه و انا اخاف يخطفوني و انا حلوة و بسمسم كده
=يخطفوكي ده ايه ده انتِ تخطفي بلد...حاضر
.............................................
لبست هدومي الجديدة و جهزت شنطتي وحطيت كل حاجاتي و لا كأني رايحة رحلة لبست نضارتي الجديدة عقبال ما يارب اعمل ليزك و اخلص منها بقى و بصيت لنفسي في المراية و بعدين انطلقت على اوضته ده انا متعتي في الترخيم عليه
= يا ياااامن يامونةةة يا مِنمِن ... أنا خلصتتتتت مش معقولة ده كله بتاخد شاور يعني ايه مستحمتش بقالك قد ايه ؟؟
خرج من الاوضه و هو جاهز و بيسرح شعره و بعدين رماني بالفرشة بس على مين تفاديتها بكل مهارة
_هو ايه اللي مستحمتش بقالك قد ايه هو انا معفن زيك ؟ و بعدين من امتى الحماس ده كله ده انا بستناكي بالساعة عقبال ما بتخلصي
=اول يوم مدر .. قصدي كلية بقى و كل سنة و انت طيب
_و انتِ طيبة يا حبيبتي و انتِ طيبة
= بقولك كل سنة و انت طيببببب...شخلل جيبك يا عم
_آااااااه أنا كنت عارف الكلية ديه جاية عليا بخسارة
قالها بحزن مصطنع و هو بيمد أيده في جيبه يطلع المحفظة و قعد يعِد الفلوس و هو عامل نفسه مهموم .. سحبت الفلوس من أيده و جريت عالباب
=يا عم هات كده و سيبهم ببركتهم لحسن بركتهم تقل
..................................................
وصلنا قدام الكلية و انا واقفة و شايفة العدد كبير جداً قدامي فاتجمدت للحظة .. لقيته حط أيده على كتفي و طبطب عليا و كأنه حس باللي حسيت بيه
_انا عارف أنه مكانش حلمك بس انا شاهد على تعبك و انك عملتي اللي عليك و اكيد ربنا اختارلك المكان ده لأنه الخير ليكِ و انا عارف انك هتقدري تثبتي نفسك فيه و تبقى اشطر translator في الدنيا
بصتله و عيني مدمعة من اللي قالوا و بمسحها و انا بضحك
=اسمها Dolmetscherin يا جاهل أنا آداب ألمانييي ... المهم يلا تعالى وصلني فصلي بقى
ضرب أيده كف بكف و قعد يحوقل
_ فصللل وصلت لفصلللل .. مبدأيا هنا مدرجات و الحصص بقت محاضرات و تقدري تخرجي في أي وقت بعد ما تستأذني و لو سمعتي جرس ده مش فسحة ديه حريقة و انفدي بجلدك...ده اولا ثانيا بقى انتي زي الشطورة معاكي جدولك هتروحي تدوري على رقم المدرج اللي مكتوب ويدوبك تلحقي عشان فاضل ربع ساعة اسألي اي حد من اللي موجودين و هو هيدلك..أنا خلاص مش هبقى معاكِ و لازم تعتمدي على نفسك
= بس ا..
_مبسش اتكلي على الله أنا دكتور امتياز و مش فاضي للكلام ده يا بنتي و كفاية اني هاخد تأخير انهاردة عشان الست هانم ... يلا اتكلي على الله
بصتله بفخر و سعادة و انا شايفاه بيحقق حلمه اللي كان بيسعاله من زمان
_في حفظ الله.. مع السلامة
=مع السلامة
................................................
روحت و الحمدلله لقيت المدرج اي نعم لفيت السبع لفات لحد ما وصلت بس الحمدلله وصلت .. بعتله طمنته عليا و لبست السماعات و شغلت سورة الرحمن بصوت الشيخ اللي بحبه ... اصلي بتخنق من الأماكن الزحمة و بتوتر فلما بشغله بيهدى توتري لحد ما دخلت دكتورة المادة
( بعد المحاضرة )
يمنى: أنا معدتش فاهمة حاجة لا عربي و لا الماني هي الدكتورة ديه بالعة راديو
سلمى بضحك : يا بنتي هي لسه قالت حاجة ده كانت بتعرف نفسها بس و قعدت تتكلم عن المادة لسه مدخلناش في المنهج
يمنى : و الله انا حتى معرفتش اسمها ايه
التفتّ للأصوات اللي كانت ورايا و انا حاسة انها مألوفة بالنسبالي
= يا نهااار ابيض... هو انتوا ورايا ورايا
يمنى : يا بنت اللذينة بتعملي ايه هنا
= أنا اللي بعمل ايه هنا ؟؟ عجبني الجو قولت اقعد شوية .. هو انا اسيبكم في الدروس تطلعولي في الكلية كمان
سلمى : أما الدنيا ديه ضيقة بشكل اوضة و صالة حرفيًا
انبسطت اوي لما اكتشفت أنه سلمى و يمنى معايا في القسم كنا أصحاب من دروس الثانوية و يشاء القدر يجمعنا و نبقى في الكلية كمان و سلمى كمان طريقها من طريقي يعني مش هروّح لوحدي
= طيب أنا عطشانة حد هييجي معايا السوبرماركت اللي برا ده ؟
يمنى: ما الكافيتيريا قدامك أهيه يا بنتي
= لا كل المياه اللي عندهم مقاطعة يبقى ليها اسم و تبصي عالإزازة من ورا تلاقي الشركة المصنعة شركة تانية
سلمى و يمنى : طيب يلا جايين معاك
روحت اجيب المايه و انا رايحة احاسب خبطت في حد
_ أنا آسف جدًا و الله مكانش قصدي
مرفعتش عيني من عالأرض لما اكتشفت أنه شاب
=لا و لا يهمَك مش مشكلة
حاسبت و روحت عند البنات اللي كانوا واقفين من بعيد و شافوني
سلمى: اووووووه كليشيهات الكلية بتتحقق يا ولااااد
نغزتها في كتفها و انا بجز على اسناني بابتسامة مصطنعه
= يا بنت لمي نفسك محصلش حاجة للي بتعمليه ده
يمنى : محصلش حاجة ايه ده يخسارة انك لابسة شنطة كان زمانكم بتلموا الكتب من عالأرض دلوقتي
قعدت تضحك هي و سلمى عليا و هما بيسلموا على بعض
= بقولكم ايه انتي هتستلموني و لا اييييه مبحبش الهزا..
فجأة لقيت ملامحهم بقت جادة و هما باصين ورايا لحد ما سمعت صوت ورايا
_ احم احم... لو سمحتِ يا آنسة
..............................................
يتبع
2/
= بقولكم ايه انتي هتستلموني و لا اييييه مبحبش الهز..
فجأة لقيت ملامحهم بقت جادة و هما باصين ورايا لحد ما سمعت صوت ورايا
_ احم احم... لو سمحتِ يا آنسة
التفت عالصوت و لقيته نفس الشخص اللي لسه خابطة فيه
=نعم ؟؟
قولتها بجدية تداري الخوف اللي حسيت بيه مش عارفة ليه
_حضرتك وقعتي المفاتيح ديه؟
و مدّلي أيده بمفاتيحي اللي تقريبا وقعت مني و انا بحاسب
=ايوه هي فعلا شكرا جدا لحضرتك
قلتها باقتضاب و انا بحمد ربنا في سري أنه سترها و مش هتهزق من يامن كالعادة عالمفاتيح اللي بضيعها
_لا شكر على واجب
قالها بسرعة و مشي تقريبا كان مستعجل لحاجة لسه بلتفت و انا متوقعة كمّ التحفيل اللي هيحصل عليا منهم دلوقتي
سلمى : شكرا جدا لحضرتك هههههههه
يمنى : طب كان كمّل جميله و طلب رقم الوالد طيب هههههه
قعدت اضحك معاهم مع أن جملتها الأخيرة كسرتني جامد... ازاي هيطلب مني رقم حد مبقاش موجود !
..............................................
في المستشفى
يحيى : ايه يا عم يامن التأخير ده كله هو انت ابوك صاحب المستشفى و انا معرفش
يامن بتنهيدة : الله يرحمه .... لا يا خِفة كنت بوصل اختي الكلية و بعرفها المكان و كده
_ يا حنيننن ... طب الحق بقى عشان لو دكتور سيد شافك هيعملك خصم زيادة على خصم التأخير
=لا قدر الله ياعم تفائلوا بالخير هو وصل و لا لسه؟
_لا ربنا سترك .. بس بيقولوا في دكتورة جراحة جاية تشتغل هنا من كندا و من حظنا أننا هنبدأ الاسبوع الجاي مديول جراحة و هنتعلم منها
= من كندا مرة واحدة .. و ايه اللي جايبها مستشفى في الريف ديه
_ معرفش بس في ناس بتقول أنها اتربت هنا و هي رجعت عشان تقدم حاجة لبلدها و كده... المهم يا عم بيقولوا شاطرة جدا و هنتعلم معاها و احتمال تقدر تساعدنا نعمل معادلة
=حيلك حيلك طيب ادينا هنشوف
_يا يامن هو انت هتنقص ايد أو رجل لو اتحمست شوية
=لا أصلي شايفك يعني شوية و هتركب جناحات و احنا مشوفنهاش ولا حتى نعرف اسمها ايه
_اسمها سحر دكتورة سحر
..................................................
في عيادة أسنان الدكتور محمد الصاوي
"مكالمة هاتفية"
عمر : يا عم انس دكتور ياسر قالب عليك الدنيا هنا
انس : خلاص والله انا تحت و طالع ... كان في بنت وقعت مفاتيحها بعد ما خبطت فيها و كنت بديهالها
عمر : طيب يا عم السوبر هيرو أنجز .. ما أنت مش بتتهزأ لوحدك يعني!
أنس : أنا مش عارف ابويا ده مقوّيه عليا ازاي .. ايش حال مانا ابنه يعني عاجلًا أم آجلًا هبقى صاحب العيادة
صوت دكتور ياسر في الخلفية : هو انا بتكلمه !! قوله لو اتأخر خمس دقايق كمان هيتخصمله انهاردة ... احنا مش فاتحينها سبيل!! مش عشان شاطر المرضى تستناه اليوم كله يعني
انس بسخرية : حبيب قلبي يا دكتور ياسر والله حقيقي معرفش يومي ممكن يعدي ازاي من غير تشجيعك المستمر ده ليا ربنا يديمك نعمة في حياتي يارب
...................................................
في البيت
يارا : آااااااااه يا يامنننن.... الكلية ديه صعبة اوي خلاص مش قادرةةة
يامن : كلية ايه ده انتي روحتي محاضرتين و روّحتي اومال اللي واقف على رجله من صباحية ربنا ده يعمل ايه
_و لو و لو أنا just بنوتة في الاول و في الآخر يعني
=طيب يا ست البنوتة عملتيلنا غدا ايه بقى ؟
_عملتلك ملوخية و رز تاكل صوابعك وراهم كده
=والله الواحد من غيرك مكانش عارف هيعيش ازاي
قالها بامتنان و صدق دايما بيسعى يبينهولي مع اقل حاجة بعملها .. اصل ملناش غير بعض في الدنيا ديه
_ يامن
=يامن حاف بالنبرة ديه يبقى في حاجة فضي ما بعجبتك يا فتاة
ابتسمت ابتسامة حزينة _ ماما
=ايه اللي جاب سيرة الست ديه دلوقتي
_جت
يامن بطّل اكل و سكت شوية
= جات هنا ؟
قالها بغضب مكتوب و في نفس الوقت هدوء مراعاةً لحساسيتي
_آه
= كانت عايزة ايه بقى؟
_معرفش .. مسيبتلهاش فرصة تتكلم
=طيب
_ بس كده؟
=عايزاني اقول ايه يا يارا
_متقولش حاجة يا يامن .. أنا بس قولت اقولك عشان زي ما انت عارف مش بخبي عليك حاجة
_ ماشي يا حبيبتي
و قام من عالأكل و حضني من ضهري و باس راسي و راح على اوضته
=طب مش هتكمل اكلك طيب؟
_ لا خلاص شبعت الحمدلله .. أنا مكونتش جعان اوي اصلا
=أنا آسفة اني سديت نفسك عن الأكل والله مكانش قصدي أنا بجد كنت...
_يا حبيبي انتي مسديتيش نفسي ولا حاجة و متعتذريش اصلا اللي غلطان بس هو اللي يعتذر إن كان ينفع الإعتذار
..................................................
عدى الاسبوع هادي جدا مفيش احداث جديدة يعتبر اتعودت عالكلية و كوّنت صحاب جديدة كتيرة و كذلك يامن في شغله المعتاد مفيش جديد
في المستشفى
يحيى : ايوه بقى المديول اللي متحمسله من بداية الامتياز هيبدأ
يامن : مجدي يعقوب اللي جاي اهو يا اخوانااااا
_يا عم بطّل هزار بقى انت عارف الموضوع ده يعنيلي قد ايه
=عارف عارف والله ربنا يوفقك لما يحبه و يرضاه
_يارب اللهم آمين ... الدكتورة اللي بقولك عليها جاية انهاردة هتعمل عملية استئصال الغدة الدرقية و سامحة لجزء من جروبنا يدخلوا يشوفوها
=طيب يلا والله خلينا نشوف
.................................................
في غرفة التعقيم
_انا خلصت اهو اخلَص بسرعة بقى و الحقني هي لسه مجتش
=حاضر
و انا واقف عند المغسلة سمعت صوت حد ورايا
_لو سمحت ممكن تناولني الجاون (لبس العمليات بتاع الأطباء ) من جنبك
_ايوه طبعًا اتفض... هو انتِ؟!!!!
دكتورة سحر : يامن!!!
_طب كويس و الله انك لسه فاكرة انك عندك ابن اسمه يامن
=ازاي بس تقول الكلام ده هو حد بينسى روحه
_روحه؟!! ده بأمارة ايه بقى ده ... بأمارة انك لسه عاملالي الفطار و انا خارج ؟؟ ولا احنا لسه بايتين مع بعض امبارح ؟؟؟ أنا مشوفتش وشك بقالي ١٥ سنة قال روحه قال
قالها و هو بيخرج من الاوضة والدته مسكت أيده
_يامن لو سمحت اسمعني الاول
=اسمع ايه ها اسمع ايه؟ عايزة تقوليلي أنه في أي مبرر على وجه الأرض يخلي ام تسيب عيالها و تمشي و كأنها مخلفتهمش.. تسيب بنتها اللي كانت لسه متعلمة الكلام و لا تسيب ابنها اللي لسه في مراهقته مش عارف هيعمل ايه في حياته و لا جوزها مريض القلب اللي عاشرته و كلت معاه عيش و ملح .. ده أنتِ حتى مكلفتيش نفسك تيجي عزاه و ..
_عزاه!!! هو ... هو ... هو جلال مات ؟
قالتها و هي بترتجف و ملامحها كلها صدمة من اللي قاله
يامن قعد يضحك بهيستيرية و سخرية = يعني كمان متعرفيش أنه مات .. ده انا كنت احيانا بكذب على بنتك و اقولها و احنا صغيرين انك متابعة كل اخبارنا و عارفة حياتنا و بتطمني علينا من بابا عشان تعرف تبطل عياط و تنام .. حتى ديه معرفتيش تعمليها ده انا خسارة فيك كلمة أم
لسه يامن هيخرج من غرفة التعقيم سمع صوت حاجة بتقع عالأرض جامد رجع لقاها مرمية عالأرض جري عليها و قعد يهز فيها
=يا.. يا دكتورة سحر يا دكتورة سحر انتي سامعانييي ؟!!
.....................................................
يتبع
منتظرة آرائكم ؟؟
3/
= يعني كمان متعرفيش أنه مات .. ده انا كنت احيانا بكذب على بنتك و اقولها و احنا صغيرين انك متابعة كل اخبارنا و عارفة حياتنا و بتطمني علينا من بابا عشان تعرف تبطل عياط و تنام .. حتى ديه معرفتيش تعمليها ده انا خسارة فيك كلمة أم
لسه يامن هيخرج من غرفة التعقيم سمع صوت حاجة بتقع عالأرض جامد رجع لقاها مرمية عالأرض جري عليها و قعد يهز فيها
=يا.. يا دكتورة سحر يا دكتورة سحر انتي سامعانييي ؟!
خرجوا الدكاترة على صوت الوقعة الجامدة اللي وقعتها عالأرض و بدأوا يفوقوها و لما ملقوش استجابة اخدوها الطوارئ على طول
"في غرفة من غرف الطوارئ"
الممرضة: الضغط 180/100… النبض 48… والتنفس مش منتظم يا دكتور
الدكتور : ده معناه أنه في ضغط كبير على المخ… لازم يتعملها أشعة مقطعية حالًا
يامن واقف برا جنب شباك من شبابيك المستشفى و مش قادر يستوعب اللي بيحصل معاه و مشاعره كلها اتلغبطت ما بين غضب و نقمة عليها من تخليها عنهم زمان و خوف و قلق عليها أنه يخسرها زي ما خسر أبوه زمان هو آه مكانش في بينهم علاقة لكن كان بس بيطمن من مجرد معرفته من خاله انها بخير حتى لو بعيد عنهم
قطع أفكاره خروج الدكتور من الاوضة فراحله جري
يامن: لو سمحت يا دكتور .. أنا امتياز هنا و حاسس ان الحالة طوِلِت اوي على أنها تكون حالة اغماء عادية .. هو في حاجة
الدكتور : حضرتك تِقرَب لدكتور سحر؟
يامن بتوتر : آه .. لأ .. هي بس كانت المفروض عندها عملية فوق و كنت هشوفها يعني و ... و .. و كنت برضو عايز اعرف يعني لو في تطورات في حالتها و كده خصوصا اني امتياز و بتعلم يعني و..
الدكتور قاطع كلامه لما زهق من رغيه : بص يا بني هي في مؤشرات انه في ضغط عالمخ و ادينا بعتنا نعمل أشعة و هنشوف هو انت في الطوارئ هنا؟
يامن بتوهان بيستوعب كلام الدكتور : ايه .. لا أنا مديول جراحة
الدكتور : اومال بتعمل ايه في الطوارئ
يامن و هو ماشي : بتعلم يا دكتور بتعلم
.............................................................
في الجامعة
سلمى : يا يويو بالله عليكِ بقى مش أنتِ استأذنتي يامن و قالك ماشي
يارا : ايوه يا بنتي بس انا مش عارفة اجي معاكِ اعمل اييه؟ و انا مبحبش دكاترة الاسنان اصلا
سلمى : هو انا قولتلك اتجوزيه بقولك تعالي معايا عشان مش عايزة اروح لوحديييي .. و بعدين ده العيادة قدام الكلية يعني مش مشوار
يارا : أنا مالي بقى شوفي يمنى أو اي حد تاني بقى انا استأذنت يامن بس عشان تنزلي من على دماغي
يمنى : لا يا ماما خرجوني من الحوار ده انا اصلا هخلص المحاضرة و يدوبك اجري على بيتنا عشان الحق اجهز الغدا ده انا امي تعاملني بطاطس محمره لو سيبتها لوحدها و احنا عاملين عزومة
يارا : و انا كمان ورايا غدا و تنظيف و حاجات كتيرةةةةة
سلمى و هي ماشية تقعد بعيد عنهم : والله ؟! يعني محدش هييجي معايا يعني طيب ماشي
يارا ليمنى : هنعمل ايه في الحوار ده
يمنى : روحي معاها يا يارا أنا فعلا لو كان يناسبني كنت روحت بس مش هينفع و بعدين جددي نية انك بتعينيها ( والله في عون العبد ما كان العبد في عون اخيه )
يارا بتنهيدة : طيب يلا نروح نصالحها
يمنى : نروح ؟؟ اسمها تروحي هي مطلبتش مني اصلا
يارا : بتلبسيني يعني ماشي ماشي
يارا راحت لعند سلمى و هي مكانتش بعدت اوي ديه سابت البنش اللي كانوا قاعدين عليه و راحت للبنش الاول
يارا : بسبس يا بس
سلمى بضيق مصطنع : بسبس ايه هو انتي بتنادي قطة
يارا : احلى قطة يخواتي
سلمى : ثبتيني ثبتيني يختي ما هو الكلام ببلاش
يارا : و الله ما بثبتك و بعدين خلاص يا ستي هاجي معاكِ
سلمى بعد ما ابتسامتها بقت من الودن للودن : بجد يا يارا هتي.... آااااااه ضرسي
يارا : ده أنتِ حالتك صعبة خالص
سلمى و هي ضاغطة على سنانها : اه والله يا بنتي ده معرفتش انام امبارح خالص
يارا : شفاكِ الله و عافاك يا قطتي .. ركزي بقى لحسن الدكتور على تكة و يطردنا
......................................................
في المستشفى
يامن قاعد على كرسي من كراسي المستشفى في قسم الطوارئ
يحيى : ايه يبني قاعد هنا ليه ده انا قلبت عليك قسم الجراحة ؟؟
يامن : ايه .. لا مفيش مفيش بريّح بس
_بتريّح ايه بس يا عم ده انت شكلك مش هنا خالص .. انت كويس في حاجة؟
=أنا كويس كويس .. أنا بس سمعت الدكتور بيقول أنه الدكتورة سحر ديه عندها مشكلة باين
_ يااه هي لسه مفاقتش لحد دلوقتي ؟؟
=لا فاقت فاقت من شوية كده بس كانوا بيقولوا طالبينلها أشعة عالمخ
_بجد .. ربنا يعافيها بس انت ايه دخلك بقى بالحوار ده كله
=ايه..لا لا مليش دخل هو بس فضول يعني و بعدين انت مش عمال تقول دكتورة شاطرة و بتاع
بصله بشك _ شاطرة اه بس متعملش فيك ده كله ده انت قلقان عليها زي ما تكون امك يعني
=يا عم عادي ما هي روح زي اي روح و الواحد كان حابب يتعلم منها فطبيعي يقلق لو فيها حاجة مش طبيعية
_ماشي ماشي هعمل نفسي مصدقك
خرج الدكتور من مكتبه و هو شايل شوية تحاليل اول ما شافه يامن قام جري عليه
بخبث_روح برضو ؟! متقلقش يا يامن وراك وراك لحد ما اعرف ايه اللي ورا الحوار ده
.............................................................
في عيادة أسنان محمد الصاوي
سلمى : لو سمحتي كنت حاجزة معاد باسم سلمى مصطفى
السكرتيرة : ايوه تمام اتفضلي حضرتك هو الدكتور ياسر جدوله مشغول شوية بس في دكتور أنس لو حضرتك حابة
سلمى بصت ليارا بحيرة : مش عارفة هو انا كان معادي مع دكتور ياسر و هو صاحب بابا و كان بيروح عنده من زمان
السكرتيرة : متقلقيش حضرتك دكتور أنس لا يقل كفاءة عن دكتور ياسر ده هو اللي مدربه بنفسه
سلمى في سرها : يارب اكتبلي الخير حيثما كان
يارا : خلاص تمام حضرتك ياريت حضرتك تحطي المعاد مع دكتور أنس
السكرتيرة : تمام اتفضلوا حضراتكم في غرفة الانتظار و هو دكتور أنس على وصول
بعد ما قعدنا في غرفة الانتظار
سلمى بهزار : انتي يا بنتي انتي حد قالك تتكلمي مكاني؟
يارا : مانا لقيتك تنحتي و معرفش كنتي بتشتمي في سرك بقى و لا ايه
سلمى : لا كنت بستخير .. ماما الله يرحمها كانت معوداني اني استخير في أبسط حاجة حتى الصحابة كانوا بيستخيروا ربنا في الحذاء بتاعهم
يارا ربتت على كتفها بلطف و هي بتفتكر مقابلتها مع والدتها من اسبوع
يارا : الله يرحمها يا رب .. عامة متقلقيش إن شاء الله دكتور أنس ده يكون كويس أصله لو زي ما بتقولي فعلا دكتور ياسر ده شاطر فمش هينفع يشغل معاه حد إلا لو كان شاطر زيه فمتقلقيش
سلمى : إن شاء الله
بعد ساعة انتظار
يارا : لو سمحتي مش معقول كل ده تأخير يعني ... هو مفيش اي احترام للمواعيد هو فين الدكتور أنس ده كله مش معقول يعني هو احنا مواراناش غيره و لا ايه
أنس من وراها : الدكتور أنس وصل اهو مين اللي متضايق ده بقى
التفت لقيته نفس الشخص اللي اداني المفاتيح فقعدت اندب في سري عاللي عملته و سلمى ورايا كاتمة ضحكتها بالعافية
يارا و هي بتحاول تستجمع نفسها ما هو مش معقول ننتظر حضرتك ده كله يعني ده احنا بقالنا ساعة هنا
أنس بهزار : مش تلتمسي لغيرك العذر مش يمكن بدي لناس تانية مفاتيحهم و لا حاجة ؟
يارا و هي محرجة : أفندم ؟؟
أنس متجاهلها و بيكلم السكرتيرة : ربعاية و دخليلي اللي في الكشف
روحت قعدت أنا و سلمى و هموت من الاحراج و هي هتموت من الضحك و هي بتتأوه عشان ضرسها
سلمى : مش قادرة يا يويو بجد هموووووت .. و بعدين داخلة في الدوك شمال كده ليه ده شوية و هيبقى مننا و علينا يعني
يارا : دوك ايه ده شخص ... مش عايزة اشتم حد بقى خليني ساكتة استغفر الله العظيم
سلمى : يا بنتي ليه بس ده حتى ابيضاني و حليوة كده و دكتور كمان
يارا : يا بنتي بس حرام بقى و بعدين المفروض تغضي بصرك
قاطعهم صوت السكرتيرة : تقدروا تتفضلوا
قومنا و انا بقدم رجل و بأخر رجل و بدعي ربنا يسترها و يعدي الساعة ديه على خير
........................................................
في المستشفى
يامن : ها يا دكتور ايه النتيجة ؟
الدكتور : والله يا دكتور ...
يامن : يامن يا دكتور اسمي يامن
الدكتور : عاشت الاسامي ... والله يا دكتور يامن اللي ظاهرلي أنه في ورم عالمخ و ضاغط بشكل كبير عالأعصاب فأعتقد مع الصدمة العصبية اللي اتعرضتلها الورم ضغط اكتر فحصل الإغماء
يامن و هو بيحاول يستوعب : ورم ؟؟ ورم ايه يا دكتور
........................................................
يتبع
تعليقات
إرسال تعليق
فضلا اترك تعليق من هنا