سكريبت كامل وحصري في مدونة قصر الروايات
سكريبت كامل وحصري في مدونة قصر الروايات
لين : بس انا مش بعرف اطبخ
عمر : انا بعرف الحمدلله
_بس انت عندك شغل
=متقلقيش عليا
_و الغسيل ؟
= ماله ؟؟
_مبعرفش اعمله هو كمان
=الحمدلله معانا فلوس نجيب غسالة
_مبعرفش اشغلها
=هعلمك
_افرض معرفتش؟
= هعمله أنا
_اممم .. طب و التنظيف ؟
=مبتعرفيش تعمليه ده كمان؟؟
_ لا بعرف بس مش هعمله كله لوحدي
=و ماله ده احنا عنينا
_طيب و ال..
=وال ايه بقى عندي فضول اعرف و ال ايه خلاص الشقة خلصت مفضلش حاجة فيها
_اه يعني انت مصمم بقى ؟!
=اومال البوكيه و الشوكولاته و الحاجة اللي قاعدة برا دول جايبهم ليه إلا لو كنت مصمم
_بس انت متعرفنيش
=مين قالك ؟!
_اه يعني مكانش بينا اي كلام قبل كده و الأهم من ده بقى اني أنا معرفكش
= عادي نتعرف اومال الخطوبة معمولة ليه ؟ ما عشان نتعرف في حدود الضوابط الشرعية
_ضوابط شرعية ؟!! هو التعارف كمان ليه ضوابط شرعية
اتنهد و قال = ايوه طبعا الخطوبة ما هي إلا وعد بالزواج فقط لكن مفيش اي التزامات من الخاطب على خطيبته يعني مفيش جو تستأذنه و هي خارجة هي لسه في بيت ابوها و ابوها وليّ أمرها ده زائد أنه مينفعش يبقى بينهم خلوة يعني جو تليفونات الساعة ١٢ و روحتي و كلتي و عملتي ده مش موجود و غيره و غيره من كليشيهات الخطوبة اللي فرضها علينا المجتمع كل ده للأسف حرام
(يارب ما تطير من ايدك يا معلم زي اللي قبلها .. بس لا لا مش هتطير لمعة عينها و هي سمعاك لمعة حد عايز يتعلم فعلا .. أنا كان اختياري صح من الاول بس يارب توافق بقى )
_ بجد و الله ؟ أنا مكونتش اعرف كل اللي بتقوله ده حقيقة
= ولا أنا كنت اعرفه بس كلنا بنتعلم و ربنا بيحاسبنا بعد ما نعرف مش قبل و ده من رحمته و لطفه بينا
_ سبحان الله والله .. انت عارف انا داخلة بس عشان إصرار ماما لكن أنا اصلا مش عايزة اتجوز و خصوصا لو حد معرفوش و عشان كده من الصبح بحاول اطفشك
عمر بضيق= طيب احم احم استأذن أنا بقى
_ ردي هيوصلك مع بابا إن شاء الله
= خير إن شاء الله .. يلا يا ماما نستأذن احنا بقى يا عمي
...........................................................................
مش عارفة ليه قومت من القعدة ديه مرتاحة جدا و خصوصًا إني مش شخص بيرتاح للناس بسرعة .. بس لا لا يا بنتي ده بيقولك ضوابط شرعية و شوية شوية و هيقولك حجابك مش مظبوط و هيقولك انتي بتكلمي ابن عمك ليه و قاعدة مع ابن خالتك ليه و هيتحكم فيا و انا ليا استايل حياتي و محبش حد يتحكم فيه حتى لو كان ١٨٠ سم و ابيضاني و عنيه عسلي و.. لا لا فوقي مش موافقة يعني مش موافقة و اتقطع حبل أفكاري لما ماما دخلت
= ها يا بنتي ابوكي سأل عليه و قال إنه شخص محترم و مسؤول مرضيش يتجوز غير ما لما اخواته البنات اتجوزوا و هو اللي شايل بيتهم من وقت وفاة والده و مستني رأيك
مش عارفة ليه اتأثرت من اللي ماما قالته و افتكرت طريقته الهادية و أسلوبه
فقولت بكسوف : اللي يشوفه بابا بقى يا ماما
ماما بتريقة : اللي يشوفه بابا .. عشنا و شوفنا بنتنا جه اللي هيربيها
_ مش انتوا اللي عمالين تقولوا عايزين نفرح بيك عايزين نفرح بيك و لما افرحكم يبقى مش عاجب ؟!
= لا صدقتك يا بت صدقتك هتتجوزي عشان خاطرنا ايوه فعلا .. و العشر عرسان اللي قبله يشهدوا فعلا
في سري _ بس كلهم مكانوش عمر
= بتقولي ايه ؟!!
_ بقول و الله هتضغطي عليا هرفضه هو كمان
= لا و على ايه بقى الطيب احسن .. يا حااااج بنتك بتقول اللي تشوفه يا حااااج
_ يا مامااا !!!
= خلاص خلاص ده انتي قفوشة يبايييييي
ماما خرجت و قفلت الباب و انا اترميت عالسرير و انا مش مستوعبة اني وافقت و على مين على اكتر نوع من الشخصيات مكونتش بقبله خالص .. أما نشوف آخرك يا دكتور عمر هتصبر قد ايه
...................................................................
بعد الخطوبة
(في كافيه من الكافيهات )
عمر : دخلي شعرك
ياسين ( اخويا الصغير ) : و الله يا اونكل عمر دايما بقولها بس مث بترضى تثمع كلامي
لين : ياسييين !!
عمر : الله ما تسيبيه يتكلم .. تعالى يا حبيب اونكلك عمر .. بص يا حبيبي هي لين اكيد مش بتبقى قاصدة أنها تبينه فعشان كده احنا بنبهها و طبعا لازم نقولها بأسلوب كويس عشان ديه اختنا الكبيرة و لازم نحترمها صح و لا ايه يا بطل
ياسين : ثح يا عمو و انا دايما بقولها براحة خالص عشان أنا بحبها و مش بعوز ازعلها
عمر : و انا كمان يا ايسو و الله
لين : ايه ؟!
عمر : ايه ؟!!
لين و هي بتعدل طرحتها في الموبايل : طيب اقوم و اسيبكم أنا بقى طالما القاعدة عليا كده
عمر : اختك بين ديه قماصة اوي يا ايسو اومال لو عرفت اني جايبلك مارشملو بقى هتعمل ايه !!
ياسين : شكرا اوي يا عمو عمر
عمر : العفو يا حبيب عمو و انا مبسوط منك عشان بتمشي باتفاقنا و بتقول عمو بدل اونكل عشان احنا يا حبيبي عرب و لازم نعتز بلغتنا العربية عشان ديه اللغة اللي الله عز و جل اختارهالنا من بين كل اللغات فلازم نتكلم بيها و نبقى فخورين و احنا بنتكلم بيها
ياسين : انت عارف يا عمو أنا بقيت بقول كل حاجة كل حاجة بالعربي حتى اقولك حاجة في ودنك ( لين كمان بطلت تقول انجليزي خالص هي كمان بتسمع كلامك )
و انا بصالهم و سرحانة في طريقة تعامله مع ياسين و قد ايه بيقلب شخص تاني معاه و كلامه اللي عمري بجد ما زهقت منه و كأنه ليه طريقة كده بيسطو بيها عالقلوب لقيت ابتسامة عريضة مرسومة على وشه فعرفت أنهم بيتكلموا عليا
لين : لا و الله يا استاذ ياسين و انت بقى لما تقعد توشوش دكتور عمر انا بقى هعمل ايه ؟
ياسين : بث بث ( بص بص ) مش قولتلك بتغير مني
عمر و هو بيزغزغه و ياسين صوت ضحكته ملت الكافيه : هي اللي بتغير برضو هي ها يا عم هي اللي بتغير
ياسين و هو بياخد نفسه من كتر الضحك : خلاث خلاث يا عمو عمر مش قادر خلاث
عمر : طيب اتفضل روح لماما يا ايسو بقى عالترابيزة اللي جنبنا
ياسين : ماشي بس بثرعة بقى خليها تقعد معاك حبة ثغيرين بث و بعدين هاجي تاني
عمر : جدع يلا يا ايسو ايوه هي ديه الرجالة الكويسة اللي بتغير على اخواتها
لين : على فكرة انت كده بتقويه عليا خلي بالك
عمر : و ماله ؟؟ الولد بيكتسب رجولته من المواقف اللي بتحطيه فيها و تبينيله أنه قد المسؤولية عشان كده كان يبقى ستاشر سبعتاشر سنة و يقود جيش بحاله
كمل كلامه بشجن : أنا بابا من لما بدأت امشي و هو بيصدرني في أي موقف احاسب الراجل اوقف عربية أشيل عن امي و اخواتي حاجات قد وزني مرتين و لما كبرت شوية كان بيخليني اقضيلهم طلبات السوق أو لو في مشوار لمصالح حكومية كان دايما بيجهزني لليوم اللي مش هيبقى موجود فيه
لين و بدأت تدمع : الله يرحمه
_ يارب اللهم آمين .. بس ايه الدموع ديه انا كده هدي كيس الحلويات ده ياسين بقى
مسحت دموعي بضحك و انا باخد كيس الحلويات بسرعة = و ده بقى اللي هتصالحني بيه ؟!
_اصالحك على ايه ؟!
= على فستان الخطوبة اللي مكونتش موافق البسه
_ماله ؟!
= دكتور عمررر!!
_بس الفستان ده كان مبالغ فيه بدرجة كبيرة و كان ضيق مكونتش هقدر اخليكِ تظهري بيه قدام الناس
= بس انت خليت خطوبتنا منفصلة اصلا يعني كنت هبقى مع بنات بس
_ طب مانا كنت موجود و زي ما قولتلك أنا لسه أجنبي عنك ده زائد أنه ممكن اي بنت من البنات تنزل صور الخطوبة استفدتي أنت ايه بقى .. و بعدين ما فستانك التاني كان جميل برضو و بعدين مش بالفستان باللي لابسه
خدودي احمرت و انا مش متعودة منه أنه يقولي كلام حلو عشان ضوابط الخطوبة و حتى هو حسّ فقعد يحمحم و سمعنا اذان العصر
_ طيب يلا بينا نقوم بقى
= يلا
مشي قدامي و هو ماسك ايد ياسين و انا مشيت ورا أنا و ماما و مامته قعدت اتأمل منظرهم و تفكيري
بأنه ازاي بأسلوبه البسيط دايما بيقنعني و عمري ما حسيته أجبرني يعني عمري ما تخيلت اكون لابسة اللبس الواسع الفضفاض اللي انا لابساه دلوقتي ده بس بكلامه المتكرر معايا حسيت اني فعلا لازم البسه و مرتاحة جدا
و انا لابساه مش زي لبسي التاني اللي كان بيوهملي أني حرة في حين اني كنت بس مأسورة لنظرة مجتمع غلط بتملي عليا البس زيهم دلوقتي أنا لابسة زي ما الدين أمرني و بأخد اجر عليه و على تحمل مشقته
قطع تفكيري صوت مامته و هي بتهمسلي
_انا اول مرة اشوف ابني عمر سعيد كده من ساعة وفاة والده يا لين يا بنتي ربنا يتمملكم على خير يارب و يسعدكم دايمًا و أبدًا
تمتمت بابتسامة عريضة = يارب اللهم آمين يا طنط
.......................................................................
عند المأذون
"بارك الله لكما و بارك عليكما و جمع بينكما في خير"
كان بيبصلي و عينه مدمعة جامد و مسك أيدي و باس راسي و حضني جامد و هو بيهمس
_اهلا بكِ في قلبي يا لِينَتُه
= مرحبا بك فيه يا عُمَرَ عمري
بعد ما استأذنّا الناس و احنا مقررين أننا مش هنعمل فرح عشان هنطلع عمرة بإذن الله بعد اسبوع من كتب الكتاب خدني من ايدي و روحنا عالكورنيش قعدنا شوية و احنا ماسكين ايد بعض و مش بنتكلم
_ طب ايه ؟
= ايه ؟
_ حاسة بإيه ؟
= مبسوطة اوي
_و أنا كمان
بصيتله و سرحت شوية = دكتور عمر
_ لا خلاص التزام الكلفة ده كان زمان دلوقتي انا عمر عادي
= عمر
_ عمرُه
اتكسفت شوية بس كملت عشان من زمان بسأله السؤال ده و بيقولي استني = ليه أنا ؟
_ من لمعة عينك
= يعني ايه
_ من لما شوفتك في الكلية و انتي لفتّي انتباهي بالرغم من اني كنت دايما بقول لأ و انك شبههم و مش مناسباني الا ان في حاجة جوايا كانت دايما بتخليني اتجذب ليك مهما غضيت بصري و مهما أقنعت نفسي كنت بصادفك في مكتبة في ممر من ممرات الكلية حتى عند عم صبحي و انت بتطلبي قهوتك السكر زيادة كنت بشوفك..
قولتيلي في الرؤية الشرعية اني معرفكيش بس كنت عايز اقولك اني اعرفك اكتر من نفسي
بتحبي المانجا بس مبتقبليش طعم الموز ..
بتحبي اللون الاسود و بتكرههي حاجة اسمها كحلي عشان شايفاه بياخد من جمال الاسود ..
لما بتتوتري بتعضعضي ضوافرك ..
لما بتتخنقي من حاجة بتلفي وشك و تبصي للفراغ ..
لما بيكون نِفسك في حاجة اوي عينك بتلمع لمعة غريبة لمعة خطفتني من اول يوم صادفتك فيه لما طلبتِ مني فكة عشان تدفعي تذكرة المترو حتى كتابك اللي نسيتيه في مرة في المترو لسه معايا
بصيتله بحب و انا مش مصدقة أنه بيحبني اوي كده و انا مكونتش عارفة ..
كنت دائما بغير من صحابي المخطوبين لإن دايما كان خطيبهم بيعبر عن حبه ليهم و كده بس اللي انا حاسة بيه دلوقتي معتقدش هما هيحسوا بيه و انا نفسي مش عارفة اعبر عن اللي حاسة بيه
قطع تفكيري نظرته الحانية و هو بيسألني _ طب ممكن اسألك بقى ليه أنا
= هتصدق لو قولتلك معرفش .. يعني دايما كان في حاجة بتجذبني ليك أنا معرفهاش ..
يمكن طريقتك الحنينة اللي بتبان من نظرتك أو حتى استيعابك ليا الدايم حتى لو غلطت و صبرك عليا ..
حنيتك مع ياسين اللي انا نفسي اتعلمتها مؤخرًا ..
خوفك عليا حتى من نفسك و حرصَك اني اكون شخص كويس ..
حتى في مشاكلنا في الخطوبة و لما كنت بَعنِد معاك كنت بتسمعني و بتناقشني بهدوء و بتسيب القرار ليّا و عمرك ما فرضت عليا حاجة ..
على فكرة بعرف اطبخ و اغسل و كل حاجة بس كنت بحاول اطفشك و كنت بالفعل هرفض بس بعد ما مشيت حسيت جوايا شعور اني مش عاوزاك تمشي ابدا
أنا كنت حاسة أن روحي تايهة لحد ما لقت روحك
_ ده كله و مش عارفة اومال لو عارفة بقى .. ده احنا واجعين وجعة كبيرة جوي يبويييييي
ابتسمت على طريقته و انا بصاله بحب و وصلتله الرجفة اللي في أيدي فشدد قبضته عليها و كمل
_انت عارفة أنا ليه كنت مضيقها علينا في الخطوبة اوي كده ؟ عشان ده
و شاور على قلبي و قلبه و كمل
_ كنت عايز احافظ على دول من الفتنة كنت خايف لأجرح قلبك لما مطلعش مناسب ليكِ عارفة مكونتش بحب اشوفك بتدمعي ابدا عشان مكونتش هقدر أمسح دموعك و لا حتى هقدر اطبطب عليكِ مكونتش عارف اقرب عشان قربي ميجرحكيش لكن دلوقتي ..
لف لقاني قاعدة بعيط اصلا فمسح دموعي بالراحة و ضمني بكتفه
–لو حابة تعيطي للصبح أنا موجود و كتفي بيشيل بدل اللتر عشرة من الدموع طول مانا موجود انتي متاحلك تعبري عن مشاعرك بأي طريقة .. بس سؤال ممكن تقوليلي بتعيطي ليه دلوقتي
= عشان مبسوطة مبسوطة اوي
_ يا نكدك يا عمر يا صغير عالحِزن يا واد يا عمر هو انتي بتعيطي و انتي زعلانة و انتي فرحانة كمان
مسحت دموعي و انا ببتسم و بنغزه في جنبه و ببعده عني
= بس يا عم بقى
بتمثيل_ آه جنبي آه انتي ايدك تقيلة اوي ده انا هروح اشتكيكِ
= بجد والله ؟! و هتشتكيني لمين بقى
_للظابط يعني هيكون لمين يعني
= و هتقوله ايه بقى إن شاء الله
_هقوله في واحدة تعدت عليا و سرقت مني قلبي
بصيتله و ضحكت من قلبي و هو فضل سرحان في ملامحي شوية
_ ابقي فكريني نتكلم في موضوع النقاب بقى لحسن الغمازات الحلوة ديه مش لأي حد كده
و بعدين حط دراعه على كتفي و قربني ليه و احنا بنتفرج عالغروب مع منظر النيل و همس في ودني
_ اوعي تبعدي عني تاني و لو حتى بهزار انتي مكانك هنا على طول
= هنا فين ؟
_ جنب قلبي
"أحببتكِ يا لينَةُ قلبي
و اكتملتُ بِكَ يا عُمَرَ عمري "
.......................................................................
تمت
تعليقات
إرسال تعليق
فضلا اترك تعليق من هنا