رواية عاجر الفصل الحادي والاربعون 41بقلــم الكاتبـــة زينب ماجد (حصريه في مدونة قصر الروايات)

رواية عاجر الفصل الحادي والاربعون 41بقلــم الكاتبـــة زينب ماجد  (حصريه في مدونة قصر الروايات)

رواية عاجر الفصل الحادي والاربعون 41بقلــم الكاتبـــة زينب ماجد  (حصريه في مدونة قصر الروايات)

#عاجر 

{ بقلم الكاتبة زينب ماجد } 

الحلقة_٤١

حازم يجر بسلاحه ويصرخ : اليوم انعل والديك ابن الـ**** 

و بشار يكض بيه ويجر منه واثنينهم محتقنين وواحد شاد بلاخ .. ودنيا تبجي وتصيح همت على بشار تضرب بيه من ورا وتجره من ابوها 

ثارت طلقة من اسلاح حازم 

وهي اتجر بيه اجتي الطلقة بفخذ بشار 

كام يصرخ وحازم سحب السلاح ويريد يضربه طلقة ثانية ذب بشار روحه عليه ونام عليه .. وهو يجر السلاح 

بهالاثناء دخل واحد من كرابتهم بيتهم قريب منه اجا على صوت الرمي والصياح الطالع من بيت حازم 

كام يصيح من الباب من سمع صوت بشار وحازم دخل للبيت بسرعة ويباوع حازم وبشار منبطحين كام بشار يصيح:  السلاح السلاح بس اخذه 

اتلاوى ابن عمه وياه 

دخلت ام حازم .. و حازم ذب روحه على بشار بوكسيات .. 

كاموا يفازعون بيناتهم وحازم يريد يكتله .. 

كاموا العمام والجيران والنسوان يلتمون من كل صوب .. 

بالموت سحبوا حازم من فوك بشار بعد ما خلاه هو والميت سوا .. 

رادوا يكضوه 

حازم اطلع واركض يريد يدور صبا حتى يطيح بيها 

وولد عمه كاضينه ويصيحون ( بس كللنا حازم شكو شصااااير ) 

ما حاجاهم .. 

بس دنيا كالتلهم وهي تبجي شافه هو وصبا وحدهم بالبيت .. 

صرخ حازم بيها وهو يكللها : امشي اصعدي فوك لا انعل امج فوك ابوج بت الكلب وجهج ما اشوفه طايحة الحظ ... وخر انت منييييي 

دفع ابن عمه ويريد يطلع 

ولد عمه البقية شالوا بشار 

عرضلهم حازم وهو يكللهم : بالعباس ماي طلع من بيتي الا جثة 

وكفوا كدام حازم وبقوا يريدون يطلعون بشار وكفت مفرزة مال شرطة طوقت المنطقة كلها .. الفرع كله وكف على حيله من ورا صوت المفرزة مال الشرطة 

شافوا واحد متصوب ومكتول وحازم يصايح ويتعارك 

كوموا الشرطة واخذوا حازم وكلبچوه .. 

ام حازم كامت تلطم بالباب وتصيح اندهرنا يا علي استرنا واحفظنا يمااااي راح ابني انهجم بيته يممممممممه 

تصرخ وتلطم على راسها .

صبا : من حلاة روحي امشي وما ادري بروحي .. 

صوت الطلقة وتكسير الجام والهوسة كلها باذني 

طاير عقلي وكلبي من الخوف وامشي واركض بالشارع لا وعي 

لحد ما وصلت لراس الشارع 

كمت اتلفت وراي واجر النفس كوا وكلبي يدك بقوة 

: اني لازم اروح لامه ، هي التعرف بالسالفة كلها .. 

كاعد ارجع ادخل للفرع .. 

اشوفهم التموا ودخلوا بيت حازم .. 

امه وبيت نعمة وكرايهم وحتى المنطقة طلعوا على صوت الرمي 

حطيت العباية على وجهي وكمت اباوع من بعيد 

طلع حازم وابن عمه يجر بيه وحازم يدفع .. كضيت روحي ومشيت حيل ابتعدت عن الشارع 

دخلت بصالون صديقتي رشا 

فتت بس هي بالصالون كالت : خير يمعودة شجاج شصاير وياج 

كعدت واني اصيح : ادخيلك ربي شسوي بروحي ..

-شصاير ولج 

-بس مي رحمة لاهلج 

ركضت جابتلي مي واجت اطتني اخذت شربت منه 

وحجيتلها كتلها نايمة وما احس الا خطيب بت رجلي داخل عليه وخطيبته وراه ويتعاركون ويتصايحون فوك راسي تاهمتني بيه البربو* ومخابرة ابوها تكله شفته يمها بالبيت 

-يا هي هاي الجبتية كبل فترة انخطبت 

-اي هي 

-خية مبينه عرمة ومعذربة هاي وهي صغيرة جا لو كبرت شتسوي 

-كليلي اني شسوي 

-جا انت شردتي 

-خيا الرجال اجا طاير عقلة وشايل سلاحه ما حسيت بروحي الا اركض بالشارع 

-جا هيج ثبتيها على روحج .. هسه حسبالهم شردتي 

- وشسوي هسه كليلي 

- والله خية انا اكولن لو تردين اتعاركي وياه اتطاحني بس لازم وغصبا عليه يصدكج جا ما عدج شي شلون تهيمة هاي .. 

-وارجع هسه وهم بالبيت 

-والله خية ارجعي الطلعة كلش مو بصالحج بس اذا عدج اهل خوش يدافعولج ويطلعون بظهرج لا روحيلهم خليهم هم يكاعدونه ويكاعدون بته ويكلوله على اي اساس بتك اطبب خطيبها على بتنا وانتم اتهمونها 

-منين اجيب الاهل وابو حلك اليحجي اهلي كلهم مجطلين بالنجف ، انوب طلعت لا تليفون لا فلوس لا كلشي ماكو بطرك العباية كليلي شلون . 

- خية اسمعي مني والعباس امشي لبيتج واجهي احجي وياه فوتي بعيونهم شو انت المتعدين عليج وانت الخايفة هيج راح تخلين حتى الثاق بيج يشك بيج من خوفج 

- جا هو اني شمطيح حظي غير خوفي 

- خايبة اليخاف ينداس امشي وروحي البيتج اذا اهلج كلهم ممطولين بالنجف شاردة المن .. لامي ؟  روحي رجعي لبيتج لا اتطلعين منه هناك اتصافوا وياهم وطبي بعيونج هذا حقج لا تخلينهم يركبونج وياكلون حقج . 

- والله ما ادري هسه لو عدي تليفون جا خابرت امه 

- يا امه انت دكومي لبيتج ومناك خابريني اذا ما كدرتي وخفتي كليلي اجيج 

- تجين شتسويلي 

- اشهد وياج شني اكلهم من زمان تكلي وطاكة روحه بس مرة تخاف على بيتها شني تريدون تهجمون بيتها 

- ها 

- اي والله دمشي 

شلت عباتي وطلعت امشي للبيت .. ماكو احد 

كلها طاشة .. دخلت البيت هوسة وغراض وكزاز ودم هواي بالكاع 

عزا العزاني يمه .. ياهو الكتل منو 

ووين راحو ؟ كمت صعدت فوك .. دنيا كاعد تبجي وتصرخ 

كتلها : انت متستحين متخجلين كل الصار من وراح 

فزت عليه وهي تكلي : مل الصار من وراح انت الدمرتي حياتنا 

اطلعي من البيت اطلعي 

ما اريد اشوفج ابيتنا اطلعييي 

دفعتها واني اصيح عليها : فوك شينج كوات عينج ما استحيتي من جبتي ودخليتي عليه واني نايمة طايحة الحظ الف مرة كتلج هذا نكس ومو خوش ادمي انت المفلفلة وكاتلة روحج عليه .. طايحة الحظ 

كامت تصرخ وتدفع بيه 

دفعتها واني اكللها : ابوج وين شصار شسوا احجي 

- كتل بشار وخذوه الشرطة وبيبي وعمامي راحو وراهم .. 

- صخام الصخمج على هالعملة هاي ولج شسويتي 

ولج شصخمتي فضحتيني وفضحتي ابوج هسه لو الناس سالت عليمن كتله شيكلهمممم 

- كتلهم شافه بغرفتج يا ساقطة كله من وراج انت الحطيتي عينج على خطيبي 

- والله من امداج وامدا خطيبج يا زعطوطة يا بربو* 

عفتها ونزلت بسرعة وادور على تليفوني ما هو .. رجعت صعدت الها واني اصيح واكلها : تليفوني وينه ؟ وين وديتي تليفوني 

- ما ادري وخري مني اطلعي من البيت روووحي 

ضربتها راشدي وجريتها من راسها : اسمعي ولج اتطلعين تليفوني لا وحق هو العباس هنا اذبحج 

كامت تدافع وياي وتريد تملخني من راسي 

كتلتها ودفعتها مني وكمت ادور بغراضها وهي ادفع بيه وتجر .. 

جريت تليفونها وخذيته ... كامت تصرخ وتبجي الا انطيهياه .. خذيته وما اطيته ونزلت 

اجت وراي تريد التليفون 

كتلها : تطيني تليفوني اطيج تليفونج .. اريد اخابر على جدتج اعرف شصار اطيني 

ما تقبل وبكل صلافة تجر بالتليفون مني 

ضربتها وبعدتها مني وطبيت للحمام وقفلته عليه وكمت ادور على رقم بيبيتها .. بين الارقام لحد ما لكيته  خابرت عليها 

ردت : الو 

هااا بشري حازم شنو وينه 

- صبا الله لا يوفقج ان شالله الله يهدج بجاه هو الحسين ولج ابني راح يروح من ورااااج 

- اني ياهو مالتي مو حجيتلج كلشي وتعرفين وكتيلي ما يجيج بعد ولا تحجين لحازم

- خليتي حازم ولج ابني بالسجن من وراج ومن ورا مصايبج 

- مصاااايبيي انت الكتيلي سكتي واني اوكف وياج هسه تكليلي مصايبي انتم وين كليلي خليني اجيكم 

- ابعدي واطلعي من حياة ابني امشي ولج لا اتكربين هجمتي بيت ابني ابني راح ينسجن من ورااااج 

سديته وهي تصيح 

وكمت ابجي وانتر باديه وافرك بوجهي 

شلون ياربي شلون .. ماخذته الشرطة وراح ينسجن من ورا بشار النكس شلون بيه يربي 

ما لازم ابقى هنا 

اذا هي امه التعرفني وحاجيتلها كلبت عليه 

جا الباقين شراح يسوون بيه وهو بالسجن 

طلعت من الحمام هي بعدها بالباب وتهامش تريد التليفون 

دفعتها مني ومشيت لغرفتي خذيت كلشي احتاجه .. وكمت طلعت من البيت .. لازم ادخل عمي بالسالفة واحجيله كلشي واشهد سهى بالموضوع 

بس اني شلون راح الكى سهى وهاي البربوك ماخذة تليفوني 

خذيت تكسي ومشيت لعيال سهى .. نزلت هناك عدهم سلمت على عمتها وسهى من وجهي افتهمتني بيه شي خذتني لغرفتها 

كتلها : مصيبة وطاحت على راسي ولج خية اتلاحكيلي 

- صخام بوجهج شكو ولج 

- حازم درى بالموضوع وكاض بشار كاتلة وطاكة طلقة مدري شمسويله وماخذينه الشرطة 

- عزا العزاج يصبية وهسه 

- هستيش ولج اكلج بالمركز راح ينسجن واني اروح بيها اصخام الصخمني كون .. كومي كومي امشي وياي

- وين نروح 

- لعمي احجيلا كلشي وانت تشهدين على حجيي شلون كليلي اضلن هيج 

- بالله شلون اروح وياج اوكفي 

عافتني بغرفتها وراحت 

واني اتكرضم واتنخى ها يخو زينب حلها 

ها يالكافل ادخيلتك .. احسبني زينب وادخيلتك مالي احد بهالدنيا من بعد الله غيرك .. دخيلك يالعباس 

شوية ورجعتلي 

كالت: امشي كومي وصيت عمتي ع الجهال ما اتاخر امشي 

لبست بسرعة وطلعت وياي رحنا لبيت عمي 

دخلنا عمي مو بالدكان .. رايح ويا ميلاد مرت يوسف للمستشفى جيف يوسف بالدوام . 

انتظرناه لحد ما اجا بـ ١٢ 

واحنا نسولف العمتي الصار والجرى كامت تلطم على خدودها .. 

فات عمي علينا كال : ها اليوم هنا يا ستار وجوهجن ما تبشر بخير 

سهى : جا شعدنا غيرك عمي عدنا ابو اهلها كلشي ماكو من بعد الله انتي عمي وهالجايينك 

- خير شني السالفة 

- مو مال وكفة اكعد 

- جا خلني بس اكضي صلاتي وذن المومن سالفتجن امبينة طويلة وداچة خلني اصلي 

- اي صلي وتعال 

راح اتوضى وصلى واحنا نتكرضم ما طلعت صلاة .. تراويح

يا طولها .. ما تخلص 

لحد ما كمل ارواحنا خلصانة 

حجه وهو يسبح بالسبحة : احجن 

بدت سهى وكالتله .. من فترة وواحد من كرابة حازم يتحارش بصبا هذا الخطب بته ..  وحاولنا وياه بكل طريقة ننهره وما انرد .. ومن رادت صبا تحجي الرجلها عمتها ما رضت كالتلها انت تريدين تهجمين بيوت وتخربين العمام وابني ما يتحمل ومريض واسكتي وافعل ما افعل لو حجتي لحازم وسكتت صبا 

عقد حاجبه وكعد وهو يثني رجله : ايييي وشسوالها 

- اليوم بت حازم الخطبها هذا المگير .. ما ندري شلون جايبته ومدخلته على صبا ومصورتهم و وسادة الباب عليهم ومخابرة ابوها حازم متسودن حسبالة صبا لاعبة من وراه وهي والله يا عمي وحك هاي صلاتك كل يوم تخابرني كل دمعة تبجيها اتشك الحجر واكللها اصبري اتحملي 

- وشوسا حازم احجي 

- جار اسلاحه ورايد مصوبها لو ما هذا المكير كاض بيده وصايبة الجامة لا جان اجتي الطلقة براس صبا وهسه احنا بالنجف .. وكايم على ذاك مصوبة بالسلاح وكاتلة وهسه حازم خذته الشرطة وصبا اجتني واني جبتها واجيتك عمي شنو الحل 

- جا انتن بعد ما عميتنها جايتني ادورن حل 

من اتحرش بيها من اول مرة غير اتكللنا غير تحجن ويانا نحجي نعاتب 

- جا ولو نكروا عمي 

- ينكرون شنهي احنا نكلب الدنيا عليهم ونخلي حازم ياخذ دوره 

- يا عمي والعباس رادت تحجي بس امه ما رضت 

- امه شنهي بكيف امه هي هاي سالفة تطمطم شسوالها اتعدى عليها لو شني 

- لا هيج بس حجي وبس ماكو اي شي صار من اللي ابالك 

- هسه حازم وين بيا مركز 

- ما ندري عنه ، بس عمي هي اجتني واحتاريت اكلها ترد لبيتها لو تضل لو شتسوي 

- ترد شني طاعنين بيها ومدخلين عليها زلمة وفوكاها رجلها رايد يكتلها وترد .. شني غمان .. جا غير عرضنا شني هيج عرضنا سكط ويطعنون بسنا ونسكت .. غير نكلهم تعالوا بوية ابنكم هيج وهيج سالفتة والعلة بام حازم عرفت وما خلت بتنا تحجي .. 

سهى : اي عفية هيج كون ما تخليهم يركبونا 

- جا شلون نسكت سالفة هاي ما ينسكت عنها .. شيبتيني ولج شيبتيني من وراه مصايبج ودهايرج 

- شبيدها يا عمي ياهو الرايد الاذية الروحه بس بعد قسمتها الله رايد يمتحنها بهالمصايب وموكلك بيها جيفن انت زلمة مومن وتخاف الله واجرك يم الله شكبرة عمي هي هم يتيمة ومالها بعد الله غيرك 

- خليها تكعد هنا هسه اني اخابر اعلى جبيرهم ونتفاهم وياهم .

- يطيك العافية عمي وما اوصيك عليها بعد كلبي ترا هي غمة وما تعرف شلون تتصرف .. لا تخليها تروحلهم عبن بيها حكلك بس تغفل عنها ما تحسها الا اباب المركز تريد تشوف حازم 

- غير اكص اجدامها بالعباس تكعد هنا وتستجن واني احلن الموضوع . 

- اي بعد كلبي 

كامت وهي تكلي : ضلي ورا عمي لا تتصرفين من راسج .. لا تخابرين احد منهم ولا توصلين ولا تحجين وياهم ابد خلي عمي ياخذ حقهم منج .

هزيت راسي وكامت لحيلها 

وعمتي كعدت تحاجي عمي على موضوع ميلاد وهو غمزلها .. وكام للدكان شاف سويسو واكف بيه .. جيكه .. على ما صبتله هدى مرت رسول وكعد ياكل عمتي وهدى كعدت يمنى ويترقبن حجية 

كالنله : هسه شني حالتها ما عرفت 

- كدامها كلت سوفان ويحتاجلها عملية واتطيب بس الدكتور كالي وكسر ظهري .. المرة شاك عدها مرض خبيث .. ولازم اليوم ناخذها كشف على حسابنا حتى نودي اله باسرع وقت .

لطمت عمتي وهي تصيح : ادخيلك يربي المرض الخبيث منين يجيلها استرنا يربي واحمينا شني هالمصايب الجاي توكع علينا . 

- خل يجي رجلها وناخذها العصر بحيل الله ونشوف 

التفت عليه وكال .. احجيلي السالفة من الاول وبالتفصيل ولا اتضمين عليه شي خاطر من اسولف اعرف شحجي 

كمت احجيلا واسولفله على طباته وجباته للبيت ..

واحنا كاعد نحجي طب يوسف وعمي بلغه بحالة مرته .. تسودن وانضرب راسه .. وكاللها تحضر نفسها هم يلا يروحون الساعة ٣ الظهر منا لما يوصلون بهالازدحام .. تصير اربعه وشوية

كاله عمي : تحتاجوني اروح وياكم لو اطلع للعشيرة على سالفة بت عمك 

يوسف : لا يابه انت اخذ راحتك .. اني اخذنها واروح 

- جا خوش 

اندار عليه وحجه : صبا ما طول ما عدج شي روحي وياها عمي مرة مريضة وتايخة ابتلشت بيها الصبح من مشيت وياها كل شوية ادوخ وتكعد وما تكدر تمش 

- اي بعيني ما عدي شي .. اذا محتاجتني اروح 

- اي عمي روحي وياها واني اروحن للعشيرة . 

باوعلي يوسف كالي : خوية اذا تريدين جنطة ملابسج خليها فوك بغرفة الجهال 

وصاح على بته داليا كاللها : اخذي جنطة عمتج بابا وخليها بكنتوركم فوك 

- تنتظرون بس اسبح بسرعة احسن بنفسي عركانة من الهبطة والركضة اليوم 

كال : يلا على راحتج ننتظرج 

اخذت ملابسي ورحت للحمام بسرعة بس غسلت روحي وطلعت لغرفة رسول جان ما موجود .. بس هدى موجودة مشطت يمها ولفيت حجابي وطلعت يوسف برا وميلاد بالدوانية 

مشيتلها واني اكود بيدها 

صعدتها ومشينا للدكتور .. بقينا للعشرة بالليل بس ع التحاليل لحد ما رجعنا بس اتي راسي دايخ وعقلي شارد .. وما ادري شسوي الدنيا وين تجيبني ووين تاخذني .. شاردة من ضيم بشار ومصيبته وهاي مبتلشة وكاضة بميلاد وارفع بمعنوياتها والاشيها خاطر لا تنقهر .. 

وين تودني الدنيا بعد ما ادري 

رجعنا للبيت .. 

عمي بالدكان صعدت ميلاد لغرفتها .. ساعدتها تغير ملابسها ونومتها ونزلت عمي ويوسف واكفين .. كال : تعبناج خوية اليوم عذرينا 

- لا يخوية صدك جذب ابطن عيني بس كون تكوم بسلامة لفريخاتها .. اي عمي كول شسويت ما سويت 

- كبل لا اكلج شسويت .. سويلنا استكين جاي حلكي يبس من الحجي والفحطه 

- اي 

رحت خدرت جاي وصبيته لعمي ويوسف ولروحي 

ورجعت وكفت يم باب الدكان ويوسف كبالي .. وعمي يحجي : رحت على جبيرنا وحجيتله القضية كيت وكيت وكال مالها رجعة بعد فوك ما ابنهم متعدي اعلى بتنا و داخل حرمة بيتها وبته مسويتلها كمين ومطببه خطيبها يتهمونها ويريدون يكتلونها .. 

خابرنا على جبيرهم 

وكال سمعت بالسالفة وحازم بعده بالتوقيف وابن عمه الكاتلة بالمستشفى وحالته صعبة وبعدنا ما نعرف الامر شنهو باجر بحيل الله اروحلهم وافتهم الخبر منهم وبيكم خير وتشرفونا 

- وشراح يصير بعد هذا كله 

- حجيت ويا جبيرنا وكتله  كعدة بنصهم ما تكعدين بعد .. حازم يريدج خل يطلع بيج بيت بعيد عن اهله وكرابته ماطولج غريبة وبنص گرابة ما توالفين .. يطفرونج لو جنتي بت نبي ملة ونعرفهم ما يوالفون الغريبة واحدهم ما ياخذ من غير كرابته الغريبة البنصهم ما تعيش لو تشعللهم العشرة شمع 

- ولو ما رضى حازم 

يوسف : وبكيف حازم شني شننطر بعد شو ابن عمه اتعى وفات ع البيت وفوكاها العينيتن يريد يصوبج بطلقة .. ما كافي من مصايبهم يوم مرته مفتنة عليج يوم ناشرتج و شاهرة ابختج ومرة يدزون واحد يسطي على بيتج ويخرب سمعتج خوية ذولة مو ملة شرف .. ما يتعاشرون 

- وشسوي يا يوسف حازم هم متلزك باهله ما يرضى يبتعد شكثر بجيت وزعلت وما رضيت اكعد وياهم حتى بيت الشماعية باعه جيف جنت اطلع من بيته واكعد غاد خو مرة حشم بحيدر خلاه يجيني يطلعني من البيت غصب ويرجعني لبيته .. شبيدي بعد واني لا حول ولا قوة غير ارضى بالامر الواقع . 

- الله كريم نحلها ان شاءلله لا تهتمين 

كاعد نحجي طب رسول : اليوم هنا شلوووونج 

ابتسمت : هلا بيك خوية الحمدلله انت شلونك 

- بخير 

حجه عمي : وينك بوية ياخذك صباح الله ما يردك الا مساه وين تروح وين تكعد 

- ويا جماعتي بويه 

- ويا جماعتك شتسوي واحد يطلع من شغله يروح لجماعته لو يرد للبيته يشوف مريته فريخاته يمتى تتعدل تعبتني يا رسول 

غمزلي وهو يكلي : انجرخت الاسطوانة المچروخة 

ابتسمت : غير المصلحتك يا خوية 

- جا انا جاهل .. 

ما طولج جيتي عليج الله عشا 

عمي : متزاعل انت وهدى مو 

- هسه يا بويه اني وياها نتصافى انت سهمك الراحة 

- سهمك الراحة وبالليل نفز اعلى صوت الصريخ 

- لا تخاف انام يمك 

رحت للمطبخ فتحت الثلاجة وسويتله اي شي .. 

اجا وكف يمي وهو مندمج بالتليفون .. دك تليفونه ابتعد عني وهو يكول : اي اي اني بالبيت بس بعد لا تخابرين الا اني اخابرج لا تسويلي مشكلة .. ديلا بعدين نحجي 

رجع وكف كتله : خطية ليش بعدين شوفها شتريد 

باوع بوجهي : سمعتي 

- ما تجوز 

- يمعوودة كنج ما سمعتي 

- اني معليه بس هدى خطية ومتحملتك 

- جا اني احبها والله بس هيج يمعودة ضوجة 

- جا ترضى من تضوج اتدور غيرك 

- هاااا صبا شني الحجي هاذ دكملي 

- جا خوية راعي مشاعرها انت داير على كيفك وبس تحجي المسكينة تعاركها 

- تصفى تصفى كملي 

وكفت وراه هدى وهي تحاجيني ما تحاجي : شنو اللي يصفى 

- اموركم 

- والله الما ناري يصفيها ما تصفى، المن هذا العشا ؟ 

اشرت براسي اله 

اندارتله وهي تكله ؛ تاكل سم كون 

حجتها واندارت تريد تمشي دمغها بجف ايده بكل قوته على راسها وهو يكللها : سم بكل ابوج بت الجلب 

وكفت تعاركه وهو يعاركها .. طفيت الطباخ ومشيت عنهم ورحت يم عمتي كالت : هم تكاونوا 

- بعد رسول وسوالفه . 

- شلع كلبي هالرسول لا هو ينرد ويداري مرته وجهاله ولا هي تتحمل وتسكت عنه وضالين يومية شدو روسكم يكرعان 

- والله يا عمة ماكو اثنين على سطح هالكوكب متصافين .. كانما الله خلقنا حتى واحد يعارك الثاني .

حجيتها واني اخذ تليفون دنيا واكلب بيه .. 

شفت الفيديو اللي مصورة شلون بشار طب للبيت .. وشلون اجا لغرفتي وفتحها 

شوفت الفيديو العمتي 

كالت : يا يا يا .. خية شنهي من بت هاي مطببته عليج وانت نايمة ما تكول مرة معرسة يمكن مشلحة يمكن بوضع مو زين وهذا شلوني طب عليج هيج 

- جا عمه اني شكاتلني وعلي راسي شيب من ضيمهم ..

- صوجج المفروض من اول مرة سواها تكليل لرجلج 

- عمة اول مرة هدداني لو حجيت يكلبها عليه واهله وعمام حازم متمكنين بكلب المواضيع لو كلبوها عليه وما عدي دليل وكال هي التجيني وهي تلزك بيه وفبركوها علي ياهو اليصدكني ؟ 

رجلي واعرفه بهيج امور متسرع عقله يغيب ما يفكر يفعل بسرعة .. وهاي شوفت عينج بمجرد ما سمع لا حاول يفهم مني لا حاجاني كبل جاب سلاحه وصوباني والطلقة براسي لو ما الله واهل البيت يشكفونها عني ووتجي بالجام 

- مصيبة وعلي .. الله يعينج يعمة 

ضليت احجي وياها واكلب برسايل دنيا وهي تتوسل وتدزله رسايل حتى يرد عليه وكاتبتله ( ادري والله ما بينكم شي واني واثقة منك بس اني غلطت وحجيت عليك الله رد عليه ) 

ردت اخابر عمتي اشوف اخابر حازم 

مرت عمي ما رضت كالت ... عوفيهم عمه 

عمتج الدرت وكلبت عليج وصفت ويا ابنها ع الباطل لا تامنيلها بعد .. وبخويطهم لا تامنين لواحد منهم عمة كلهم مصايب الله يستر منهم . 

احتاريت منين اعرف اخبار حازم لو الاخبار عنك 

شلون اضل كاعدة هنا وبعيدة عن الصار وما ادري عن الجاي يصير وياهم . 

جنت رايدة اجيب فراشي وانام بالدوانية يم عمي وعمتي 

بس رسول جاب فراشه اتمدد ونام فاحتاريت وين انام ضليت كاعدة واكلب بالتليفون .. طب عمي وهو يكلي : فرشيلي عمي تعبت ظهري راح 

كمت جبت فراشه وفرشتله اتمدد على بطنه 

كعدتله امرغ ظهره كام يصيح : اي اي رحم الله والديج بويه اي بعد

ضليت افركله ظهره طب يوسف كاله : بويه هسه باجر الصبح اخذ ميلاد لو اداوم لو شنو حتى العلاج ما جاي يفيدها .. والنتيجة تطلع بعد يومين 

-شتاخذها بويه توكل لدوامك وعوفها لو تعبت ناخذه للمستشفى منا 

اندارلي وهو يكلي : خوية اذا تريدين اتنامين صعدي فوك بغرفة جهالي سويسو متعود ينام هنا يم اجداده بس داليا بالغرفة تنام اخذي راحتج ونامي وياها بالغرفة 

-يطيك العافية واني حايرة بنومتي جا خل اصعد 

صعدت ليفوك لكيته مسوي اسره لجهاله سرير لسويسو وسرير لداليا .. نمت على سرير سويسوا واتغطيت ..ودنيا تقرا 

كتلها : شوكت تخلصون امتحانات 

- الخميس هذا 

بقى الضوا مفتوح واني اتكلب والموقف كله ينعاد براسي 

استهضمت حيل من موقف حازم .. يعني لو ما بسار فاز عليه وموخره جان صوبني بلا ما يسمع مني وجان الطلقة اجتي براسي 

معقولة جاله من عقله يصدك اني اخونه وبسرعة قرر يكتلني ! 

اشاف عليه وراد يكتلني .. شلون امن بعد ارجعلهم واعيش وياهم 

تعبت من مكايدهم و مصايبهم كل يوم اكول انتهت يبدي وياهم فلم جديد اني ضحيته .. حيل تعبوني 

كمت ابجي واني بفراشي 

اجتي داليا حطت راسها على راسي : لا اتضوجين يا حبيبتي 

ابتسمت وانداريت بستها : بعد كلبي شسوي 

هذا اليتيم يلدو يعيش عمره مظلوم مهضوم ماكول حقه 

لو عدي اهل وابو ينخاف منهم جا محد كدر يتجرا ويظلمني ويهضمني يخافون من اهلي 

واني لا اهل لا عزوج لا جهال .. عاجر من كلهن 

-يمكن الله ضاملج الاحسن بالجنة اني ذاك اليوم سمعت بالمحاضرة ويا بيبي يكول رب العالمين يمتحن الناس الاقوياء و المؤمنين باصعب المصائب 

باوعتلها الكلام اكبر من عدها بس فاهمة وعاقلة 

: الله يحفظج حبيبتي اتمنى تبقين هيج واتركزين بالدراسة و العلم وما تنجرفين بعلاقات وامور سخيفة تضرج ما تنفعج 

-لا اني كلش احب الامام الحسين والسيدة زينب حتى طلبت من بابا يجيبلي عباية زينبية البسها 

ابتسمت : الله يوفقج ياربي ويفتحلج اوسع ابوابه 

عمرها يمكن ١١ مدري ١٢ بس كلش واعية وحبابة 

ولان دائما مرافقة بيبيتها .. تحجيلها عن السيدة زين عن السيدة الزهراء عن الدين فمأثرة على تربيتها ومخليتها تربية دينية وعقلها واعي ومحبوب . 

شكد فرق بين دنيا وداليا 

اثنينهم بنات وامهم وابوهم موجودين .. ودنيا اكبر من داليا بس الفرق داليا اكو اليتابع يراقب ينصح يرشد يعلم .. يحجيلها عن السيدة زينب عن فاطمة الزهراء يربيها .. دنيا ضالة تتربى بالقدرة ذبوها بالبيت الاب بالدوام والام بالشغل يرجعون محد منهم اله خلك يحاجيها يسمعلها .. مبارك يشترولها اكل وملابس وينطونها . 

التربية الها دور خصوصا البنية بمجتمعنا 

الولد بمجتمعنا شيسوي ما عليه عيب بس البنية معيوبة حتى بالمو عيب .. فمن عمر ٩ سنوات لحد ما تدخل العشرين اذا ما وراها احد ينصح يرشد يعلم يربي .. تبقى للمسلسلات و الافلام  والاغاني تربيها وتعلمها .. عاد ذاك الوكت استلم شتطلع . 

نمت ثاني يوم الصبح كعدت على صوت ميلاد وهي تتلوى 

اطيتها علاجها ونومتها بفراشها وسويتلها اكل وكمت اداريها .. وطبخت اكل لجهالها ورجلها خاف يجي .. وبقيت يمها 

من اجا يوسف ما صعد حتى لا يقيدني والبس حجاب ، بس راد غدا صبتله داليا واخذتله واني بقيت بين كاعدة بغرفة الجهال ع التلفزيون وبين غرفة ميلاد اكعد وياها عن الوحشة حتى لا تلتهي بوجعها 

مر اليوم كله ولا خبر من بيت عيالي 

بس سهى ومنى يخابرني .. 

ثالث يوم .. 

اجا عمي كال .. 

حازم عمامه متنازلين عنه وطالع من التوقيف .. 

بس الولد بالمستشفى ولحد هسه حالته صعبة وصايرة هوسة بيناتهم وجبيرهم يكلي اطينا مهلة نحل المشكلة بيناتهم .. ونندار الكم . 

اهل بشار رغم امه تعرف ابشار هو المتعدي وناهرته وما تاب .. بس تاهميني اني بسالفة .. وكايلي لحازم مرتك لو ما منطيته مجال وغارته وهو ولد شاب جا الولد ما اتجرى واتعدى حرمة بيتك 

وحازم داك على ابنهم الا يكتله موت ومتحلفله .. 

ام حازم حاجية لمحمد وكايلتله صبا حجتلي على بشار واني الكتلها ارده واتفقنا اني وامه نرده وما نوصلها خاطر لا تصير جبيرة ..

محمد مانع امه تحجي الحجي هذا لحازم وكايللها 

اطلعين من السالفة جنج اول مرة تدرين خلينا نخلص من صبا ومن طاري صبا من لفتنا ولهاليوم ما شفنا منها خير ، خل يطلكها حتى نفتك . 

وما حاجية لحازم ولا كلمة من اللي عرفته عني 

وضل الكلام عني يجيبون ويصفطون بكيفهم .. 

لحد ما جبيرهم داز على حازم ومحمد 

حازم ما رايحله .. بس محمد رايح .. وحاجي لجبيرهم وكايله البت من الاول مو خوش خذت الزلمة بالسر عن اهلها وانفضحت وصارت دمايا وناس تكتلت وتكاوم من وراها وسكتنا .. انفضحت بمقطع ادك وتركص بيه ومطلعه جسمها وضمضمناها وهم عديناها .. واجت هالسالفة .. اتضن اكو زلمة يتعدا بيت ويطبلا لو ما شايف مجال البنية مو راحة عمي هي كوا .. بس حازم الما يسمع ولا ينلزم 

كايله : جا حازم وين 

- محد يعرف شنهو اباله وشيريد 

كل اليكوله رايد يكتل بشار .. غير هالحجي ما كاعد يحجي 

لا يكاعدنا يلا يحاجينا لا يفهمنا اليريده عجزنا نريد نكضه ونفتهم منه ما يرضى 

- حكه مو سهلة خطيب بته .. ومرته 

شيكول وشيحجي .. مو سهلة ولا هي هينة خاطر يسولف بيها 

منين ما يجيبها سالفة ادنك راسه الله يساعده كلبه شيحمل من ضيم هالمرة تعبته حيل . 

- شيسوي بلاء ونزل على راسه . 

هالحجي ناقلينه العمي وكايله : التهيمة لافتهم اثنينهم والكل يكول صبا هي المخلية الولد يفوت لبيتها .. 

كايم عمي متعارك وياه 

وكايله احنا عدنا فيديو عليهم من بت حازم اتصور وهي تنصب كمين لبتنا وادهل خطيبها للبيت وتخلي يفوت على مرت ابوها وهي نايمة .. فوك شينكم اتهمونها هي المسويتله مجال .. كولوا نريد نهجج ونطلكها من ابنه بس مال تتهمونها ابختها عيب وجزعنا من سوالفكم مرة تنشرون فيديو عنها وهي بعرسها وويا النسوان وتخلووها على كل السان ومرة اطببون عليها واخد منكم وتتهمونها .. عيب استحوا كافي 

متعاركين فيما بينهم ومتصايحين 

عاد جبير من العشيرة كاللهم هسه انتم تتعاركون وما تعرفون حازم شنهو رايه ولا البت شنو حجيها .. تحجون الطلاك وبالعرض  مو عيب مو حرام .. 

الحجي والربط يم حازم نكعد ويا حازم .. ونشوف رايه شنو اكيد يعرف مرته ويعرف تهل بيته ولو اكو انه بالسالفة هو يكشفها ومحد راح يحكم بهالسالفة غيره . 

عاد رجع منهم عمي وكال : هذا الصار وهذا الجرى 

كتله عمي : خلني اخابر حازم 

كال : لا ابد ما تخابرينه ولا توصلين ولو سمعتج مخابرة حازم وحاجية وياه الا راسج اكصه يريدج ومصدكج يجي ياخذج معززة مكرمة من بيتي ما يريدج كلعة مردي 

- كلعة مردي شلون عمي حا اني ايهو الالي غير حازم 

- لا تخافين ما يطلكج بس ابقى وراي واني احلنها 

- بس اخابرله احجيله الموضوع جا عمي اذا ما سمع مني شلوني يحكم بالسالفة .. غير احجيله اكله شصار وشسووا 

- جا هو ما يعرفج الا انت تحجيلا اكو احد ما يعرف مرته زينة لو لا اتسويها وتخونه لو لا .. الا اذا حاسبج مو زينة ما يصدكج . 

- هو يعرفني شلون ما يعرفني بس مع هذا عمي لازم احجيلا الموضوع وافهمه يمكن يملون راسه يمكن يديرونه علي 

- لو جان يحبج صدك ويثق بيج محد راح يديره ولاحد يغيره لا تخافين ، حسج عينج اسمعنج مخابرته لو متواصلة وياه .. اذا يريد يفهم السالفة هو يتعنى ويجي ليجاي ويفهم من عدنا السالفة الصدك هاي اذا صدك مشتريج ولو ما اشتراج ما تشترينه ولا تخابرينه . 

سكتت بس النار بكلبي 

اعرف حازم مال يجي حتى يفهم السالفة ما يسويها 

اني احس لازم اخابره واحجيله واشرحله حتى اذا صار عصبي ونهرني وطردني بس راح يفكر بكلامي ويعقله ويقارن شكثر اني جنت متضايقة ومتعوبة وما احب طبت بشار وراح ينصفني 

خابرت سهى حتى تصف وياي اهابر حازم واحجيلا 

كالتلي : ابد لا اتخابرين ولا اطخين راسج ولج خليلج عزة نفس فوك طاعنين بيج ورايد يطكج بطلقة انت تنزلين راسج وتتوسلين بيه واتشرحيله 

- سهى هذا حازم مو اي احد هذا رجلي حا اذا ما اشرحله اله لياهو اشرح 

- ورجلج ما يعرفج 

- يعرفني بس الحجي تلاكينه براسه هواي وراح تختلط الامور براسه اذا مو اني اوضحها واحجيله ما راح يصفى باله 

- ابد لا تخابرين والله تتندمين خليها ورا عمي خل يردلج كرامتج .. ولج لا تصيرين ذليلة انت صاحبة الحق عليمن تتلوكيلا 

- سهى واني شعدي غير حازم 

لا اهل لا بيت لا عزوة .. هو كلهن 

- واتذلين روحج يطكج طلقة واترجعين اتبرسين بقنادره فدوة صدكني فوك ما اتزعلين واديرين وجهج وهو اليصالحج طاعن بيج ورايد يكتلج انت التتوسلينه راح تكتليني بضعفج وشخصيتج هاي القندرية ولج شوية عزي نفسج ما خليتيلج قيمة عده كام نا يحترمج ما يقدرج .. فنه لو شوا سوايته هاي ويا مرته ذيج .. يطلكها منا ثاني يوم يرجعها وهو الممنون وهي الشايلة خشمها وانت ضالة مدبكة باديه بلكت يرد عليج ويصدكج من امداج اي والله . 

هزئتني وما خلتني اخابر لحازم واحجيله 

حسيت نفسي صدك الحق اليه واني المظلومة واني الاحتاج واحد يعتذرلي ويعزني مو اني اعتذر وانتظر احد يسمعني .. اني ما سويت شي ليش خايفة وليش اتوسل حتى احد يسمعني . 

داروا عقلي وحجوا براسي حجي عن العزة والكرامة والشخصية وما لازم اتنازل ولازم هو اليطخ وهو اليصالح واني  واني واخذتي العزة بنفسي ومخابرت ولا برررلته الموضوع 

بينما هو جان منتظر مني تبرير 

جان من داخله مصدكني ومامن اني ما عندي شي 

بس موقفي من بشار كالي اشردي واني استمعت لكلام بشار وخفت وشردت وما بررت ولا حجيت وطلعت من بيته بدون اذنه وبدون ما اشرحله وضعي .. ضلت اباله مصدر شك . 

وجان كل هالوكت معتزل اهله وكلامهم وطعنهم بيه واشكال انواع الحجي اليحجوه وجان ساكت منتظر مني بس تبرير يقنعه اني ليش استاجبيت لبشار وشردت وما ضليت ابيتي وبررت ..  وباقية اباله يفكر .. اني لو ما عندي شي ليش اشرد !؟ واسمع لبشار 

اما اني فاستمعت لحجي عمي وسهى وانو لازم اخلي لنفسي كرامة وعزة نفس وما طاخ راسي 

وبين اني وما اطخ راسي ومنتظرته يعتذرلي .. 

وبين هو وشكوكه وضنونه وليش شردت وما حجتلي ولا بررتلي 

دخل حجي الشيطان بيناتنا .. اهلي يحرضوني عليه ويكلولي لو يثق بيج ما صدك اهله .. وبين حجي اهله اليكلوله لو صدك ما عدها شي ما تشرد بدون ما تحجي وتبررلك بس هالخايفة وشردت لعمها يدافعلها . 

جنت اكول ازعل يوم يومين وتكضي .. 

واولها وتاليها حازم يشتاقلي ويخابرني ويعرف السالفة مني 

حازم ما يعوفني .. حازم يحبني وراح تبرد السالفة ويعرف الحقيقة بنفسه ويرجعلي يرجعني من بيت عمي لبيته . 

بس الصار .. 

خابروا على عمي وسووا كعدة .. 

واتفقوا الكعدة اليت عمي .. واجوا وهم جايبين حازم .. 

وحجي اهله يكلوله اكو مرة واحد يتعدى عليها وتسكت وما تحجي لرجلها وعمي كلهم خافت ما يصدكها 

وهم يكلولها لو صاحبة حق ما خافت ولا شردت من بيته وعافته ينسجن ويطلع وما سالت عنه .. 

وعمي يكله حقها غير راد يطكها ويصوبها وهو الطاعن بيها اتضل ابيت طاعن بيها شلون لو هو ثاق من مرته ما يشك بيها وهو يعرف صبا شنهو 

حجي منا وححي منا 

حازم ما حاجي .. غير كايل العمي : الرايدته هي شنو 

كايله عمي : يا اطلعون حقها وتعذرولها عن السويتو بيها وطعنتوا ابختها وتشيلها ابيت بعيد عن اهلك وكرابتك .. يا اطلكها 

واني حرام والله كلمة الطلاك لا حاجية بيها ولا جايبتها على الساني اني كل الردته من عمي احجي لحازم الحقيقة وابررله بس هم ما خلوني .. 

فحازم من سامع هالحجي 

كايله : تأمروني امر .. 

هذا الحجي اني فوك وكعدت الزلم جوا .. 

شيخ دين وياهم من كرابتهم كاله اشهد شيخنا  وعمها يشهد .. 

صبا بت سنية و حافظ طالق على سنة الله ورسوله وبالثلاث 

يا صبا يا بت سنية طالق طالق طالق .. بعد ، خل ترتاح مني وتاخذ راحتها 

طلك وعاف الكعدة كلها وطلع .... يتبع

 تكملة الرواية من هناااااااا 

لمتابعة باقي الروايه زورو قناتنا علي التليجرام من هناااااااااا

بدل ماتدور وتبحث علي الروايات عمل 

متابعه لصفحتنا على فيس بوك هنااااااااااا

الرواية كامله من هناااااااااا

مجمع الروايات الكامله 1اضغط هناااااااا

مجمع الروايات الكاملة 2 اضغط هنااااااا