رواية زواج لدقائق معدودة( الجزء الثاني) البارت الحادى عشر 11 بقلم زهرة الربيع حصريه في مدونة قصر الروايات

رواية زواج لدقائق معدودة( الجزء الثاني) البارت الحادى عشر 11 بقلم زهرة الربيع حصريه في مدونة قصر الروايات

رواية زواج لدقائق معدودة( الجزء الثاني) البارت الحادى عشر 11 بقلم زهرة الربيع حصريه في مدونة قصر الروايات

لو سمعتي الكلام وقتلتي نوح هجوزك سند ولدي..وانتي عارفه اني اقدر اعملها ..ها قولتي ايه

سماح وقفت مكانها والتفتت لها وقالت بخوف..... انتي..انتي بتتكلمي جد 

حليمه ابتسمت وقالت... وجد الجد كمان.... انا عارفه انك رايده سند ....وانا مهلقلوش واحده تحبنا وتقدرنا كيفك انتي

و لفت حواليها وقالت بخبث....بس  علشان اعمل كده لازم نوح يموت اديكي شايفه كل يوم جايب له عروسه...و دلوك اللي اسمها غنوه دي طلعت عايشه ....ويمكن كمان نوح يوافقله على جوازه منها ...انا عارفه انك ياما صبرتي ايام ما كان يحب شروق وكنتي مطمنه  لانك عارفه ان شروق عينها من نوح وعمرها ما هتتجوزو ...لكن دلوك اللي اسمها غنوه دي عينها منه وممكن في اي وقت نلاقيهم متجوزين الا بقى لو سند عرف ان غنوه هيه اللي خلصت على نوح ساعتها هيسلمها لحسنين بيده ومهيتجوزهاش واصل وساعتها انا هقنعه بيكي 

سماح لمعت عيونها وابتسمت بفرحه بس اختفت ابتسامتها بسرعه وقالت..... واحنا كيف هنخلوه يعرف انه غنوه هي اللي قتلته

حليمه ابتسمت وقالت...... دي سيبيها عليا انا ... شوفي هتعملي ايه 

في الاسطبل كانت شروق بتتألم جامد من رجلها لانهم واقفين طول الليل وقالت ببكا ....يا رب يا رب انا مقادراش مقدرش تاني اااه

 غنوه نزلت دموعها على حالتها وقالت ....اتحملي يا حبيبتي ...حقك عليا يا شروق انا السبب في كل ده 

شروق لسه هترد نبيل قال بغضب.... دي حقيقه انتي السبب فعلا و مش اول مره تبقي السبب في المصايب اصلا

بقلم...زهرة الربيع

 شروق قالت بألم..... نبيل ملوش لزوم الكلام ده

 نبيل قال بغضب.... لا يا شروق له لزوم هي واخوها السيي في كل المشاكل دي وانا وانتي غلطنا اصلا من الاول اننا ساعدناها 

حميد قال بحزن.... انت معاك حق تتضايق يا دكتور... بس احلفلك بايه ان غنوه ملهاش ذنب في كل ده.... انا كنت بكلمها يوماتي وبقول لها ان كل حاجه هنه تمام و لو في حد غلط وهو السبب يبقى انا

 نبيل قال بغضب...يبقى نقطنا بسكاتك بقى مدام عارف انك غلطان... البنت هتموت من وجع رجلها  طول الليل انتو ناسيين  انها مش هتقدر تحمل على رجلها التانيه زينا كان المفروض تتصرفوا وتطلعوها بره الموضوع اختك غلطت لما خرجت وقالت انها عايشه نوح كان هيمشيهم اصلا 

غنوه قالت بحزن.... ما كانوش هيمشو يا نبيل هم جايين ومتاكدين ان انا هنا لان حليمه عرفت اني عايشه وهيه اللي كلمته

نبيل قال بغضب..... ما هو حتى ده برده من استهتارك 

هنا شروق قالت بألم... يا جماعه بس احنا في ايه ولا في ايه ..ده بدل ما تلاقوا حل للي احنا فيه ده انا ما اقدرش اقعد واقفه كده ولا دقيقه تاني همووت

نبيل قال ...طيب ماشي يا حبيبتي انتي اهدي بس وانا لما يجي هتكلم معاه وان شاء الله يقبل حتى يفكك انتي بس 

غنوه قالت بسرعه.... انت متتكلمش واصل  كيف ماقال سند عشان متذيدش الطين بله.... لو عايزين كلنا نطلع من هنه اسمعوا كلامي 

نبيل ضحك بسخريه وقال.... ليه اتجننا علشان نسمع كلامك تاني

بس قاطعته شروق لما قالت بلهفة ثقه....انتي عندك حل يا غنوه

غنوه ابتسمت وقالت... عندي حل بس لو هتسمعي الكلام وتقنعي بيه الدكتور ....لانه اكيد مهيرضاش بيه 

شروق بصتلها باستغراب وقالت.... حل ايه ده

 عند نوح كان رايح يبص عليهم في الاسطبل واتفاجأ بسند نايم على كرسي قدام الزريبه صحاه باستغراب وقال...سند ..انت ياض

سند قام مفزوع ورفع سلاحه وقال...مين مين

بس اتنهد بارتياح لما لقاه نوح ونوح قال بدهشه ...هيكون مين يعني... نايم هنه ليه

سند اتنهد بارتياح وقال...مفيش قولت ابيت هنه حراسه يعني

نوح قال باستغراب حراسه..حراسه ايه هو انت كلب

سند اتنهد بضيق وقال..الملافظ سعد يا نوح انا قولت يعني لحسن اللي اسمو حسنين ده يرجع تاني وياخد غنوه..احم يعني هيه او اي حد منهم

نوح ابتسم بسخريه وقال...ااااه...لا وانت بسم الله ماشاء الله عنتر زمانك ....كل دول حرس وغفر ممالينش عينك وجاي انت تحرس السنيوره بالطبنجه اللي كيف اسوك السنان اللي في يدك دي...ما علينا قوم روح ناملك نومه مرتاحه متقلقش مهتروحش مكان المره دي

سند وقف وقال...انت هتفتحلهم

نوح قال بخنقه...هطل عليهم... بس مش هيطلعو متتعبش نفسك

سند قال..احم.... انا معايزهمش يطلعو اصلا انا كمان معاجبنيش اللي عملوه..بس هاجي معاك

وراح معاه ونوح امر الغفر يفتحو الباب واول ما فتحوه اتفاجأ بغنوه بتبكي وبتقول...ردي علينا يا شروق يالهوي البت شكلها ماتت يالهوووي

نوح اتصدم بشده خصوصا لما لقى شروق مغمضه عنيها ومش بترد قرب منهم بسرعه وقال..فيه ايه ...مالها شروق فيه ايه

نبيل قال بغضب..فيه ايه غير انك موتها من التعب

نوح اتفزع وقال بغضب..موت ياخدك تف من بقك

غنوه قالت بسرعه..الحقها يا عمده البت بتموت تعبت قوي من نص الليل ومبقتش ترد انت عارف انها مبتقدرش تقف على رجليها الاتنين زيينا

نوح بقى يفكها بسرعه وهو بيقول بغضب وخوف..ومنادتيش على الغفر ليه يا بقره انتي..شروق...شروق ردي عليا

وكان شاددها لحضنه وبيفك اديها بسرعه ولهفه

 ونبيل معجبهوش الوضع خالص واتخنق من الغيره وبص بعيد عنهم علشان يقدر يتحمل

نوح فكها وشالها بسرعه وطلع بيها جري بس غنوه وقفتو وقالت بسرعه...احنا دكاتره وعندينا فكره كبيره الاحسن تفكنا نساعدك... الاولى نلحقها وبعد كده اربطنا تاني

نوح وقف ثواني وملتفتش ليها بس قال بخنقه..فك غنوه ياسند...وبص لحميد بطرف عينه وقال .....غنوه وبس

وطلع بسرعه

غنوه ابتسمت بحماس ونبيل وحميد بصولها بذهول

 اختفت ابتسامتها وقالت بتوتر..معلش انتو بردك رجاله وتتحملو ...وبعدين اكيد مش هنسيبوكم

نبيل بصلها بغيظ وسكت كان المهم عندو شروق تطلع من المكان ده

سند فكها وجرها من دراعها وقال بسخريه....اكيد دي افكارك العبقريه

غنوه قالت بتوتر..افكار ايه...البت تعبانه بجد

سند ابتسم بسخريه وقال ...امممم انا كمان تعبان

ضربت كتفها في كتفه وقالت بدلال...سلامتك..ان شاله انا

سند حاول ميبتسمش وقال بغضب..انشاله يا رب ...انجري قدامي

ومشيت معاه وراحوا السرايا

 هناك كان نوح دخل جري و طلع على اوضه شروق وحكم هويدا جريو وراه بقلق

وهويده كانت بتقول بخوف..... البنت مالها جرالها ايه ...عملت فيها ايه يا نوح 

نوح قال بسرعه.... متخافيش يا مرت عمي تعبت بس وهتبقى بخير ان شاء الله

و راح حطها على السرير بتاعها وبقى يحاول يفوقها بس طبعا كان ممكن تفوق لو كانت مغمى عليها اصلا 

بعد شويه وصل سند ومعاه غنوه اللي دخلت على الاوضه وقالت .....مش كده يا جماعه وسعو كده ادوها النفس

 هويدا بصيت لها بغضب وقالت.... كله من تحت راسك كل ده بسببك

حكم قال بتوتر ....مش وقته يا هويدا خلينا نشوف البت مالها 

ونوح وقف وقال بسرعه ....بسرعه شوفيها فيها ايه بسرعه

 غنوه قالت ...طيب بس هكشف كيف وانت واقف كده اطلع وانا هشوف لو حاجه بسيطه يبقى خير ولو حاجه كبيره لا قدر الله نشوف لها دكتور متخصص

نوح قال بسرعه.... انا هشوف لها دكتور تاني احسن...انتي دكتورة اعصاب كيف هتعرفي عندها ايه 

غنوه قالت بسرعه.... ما هو الجسم كله اعصاب اصلا ...وبعدين يمكن يكون ضغط مرتفع من الزعل ولا حاجه ..انتو عندكم جهاز ضغط هنا 

نوح قال بسرعه ....ايوه بتاع عمي حكم ... هجيبهولك

غنوه قالت....تمام هاتو وطلعو كلكم يلا علشان اعرف اكشف عليها 

وبالفعل طلعوا كلهم واول ما طلعوا شروق قعدت وقالت بهمس ....الله يخرب بيت افكارك يا غنوه ...نوح قلقان قوي لحسن تجرا له حاجه 

غنوه ضحكت وقالت...هيجراله تيه يعني اهو كيف البغل... انا مش قولتلك لو عرف انك تعبانه مهيسكتش ادينا خرجنا وعلى حسها ترتاحي لك شويه اكون انا حليت الموضوع معاه

شروق قالت بحزن...ايوه  بس نبيل  بعد ما ورطناه معانا نسيبوه كده 

غنوه اتنهدت قالت.... لو فضلنا كلنا هناك محدش هيحل ولا يربط .....لكن كده ممكن نتصرف ونعمل حاجه ...انتي ريحي بس دلوك وملكيش صالح  بحاجه

شروق هزت راسها بالموافقه بحزن

وغنوه  طلعت وقالت... متقلقوش طلعت مشاكل في الضغط عادي من التوتر ....هتبقى زينه دلوك 

حكم قال.... الحمد لله يا رب

 سند قال...تعال يا عمي لحسن انت كمان ضغطك يرفع مناقصينش هننزل نقعدوا تحت و سيب الدكتوره هي هتتصرف ...وبص لغنوه بسخريه واخذ حكم ونزل

 غنوه ادت هويدا علبه برفان وقالت.... وانتي يا خاله هتمسكي علبه الريحه دي تفضلي تشممي فيها شويه شويه وباذن الله هتفوق

 نوح قال بسرعه...هاتي انا هقومها

غنوه وهويدا بصولو وهو خد بالو للهفته وقال..ام انا قصدي انا مورايش حاجه ممكن افضل جارها لحد ما تفوق

هويدا ما صدقت ابتسمت بسعاده وقالت.... اتفضل يا ولدي وانا هروح اعملها لقمه تاكلها عشان لما تقوم دي من امبارح مكلتش يا نضري

نوح اتنهد وقال..تمام...وقولي لسماح تعمل لي كبايه ليمون اعصابي فلتت

و اخذ علبه البرفان ودخل عند شروق وساب الباب مفتوح مرضاش يقفله عليهم

وشروق اول ما دخل غمضت عيونها بسرعه

غنوه ابتسمت برضا ولسه هتنزل على السلم وقف قدامها سند بسرعه قالت بخضه...بسم الله الرحمن الرحيم.... فزعتني يا سند انت مش قلت نازل مع عمك حكم 

سند قال ....نزلت وقعدتو واطمنت عليه وطلعتلك عايزك ضروري

غنوه قالت بتوتر..احم... شوف انا فاهمه حقك تزعل من اللي حصل بس انا كيف ما قولت لاخوك مكنتش اعرف اي حاجه عن اللي حصل لنوح ولا اللي حصلك 

سند بقى يقرب منها قوي وهي بقت ترجع لورا لحد ما لزقت في الحيط وبص لعيونهاجامد وقال.... ضاعو سنتين من عمري سنتين كاملين وانا افكر فيكي كل دقيقه وكل ثانيه وانتي طلعتي مفاكرانيش واصل 

غنوه قالت بسرعه ....ومين قال لك اني ما فاكراكش وانا عندي حد افتكره غيرك

سند ابتسم بسخريه وقالت..... لو افتكرتيني كنت سالتي وكنتي عرفتي حالتي من بعدك ...طب مخطرش في بالك تطمني عليا بعد ما فوقتي في المستشفى.  ولا بعد ما خفيتي ..ولا حتى بعد ما سافرتي 

غنوه نزلت عيونها بكسوف وقالت.....بسال عليك يا سند بس بالمداري  ما هو انا ماقدرش اسال اخويا عليك طوالي واقلو سند عامل ايه...كنت اسالو عنكم كلكم كويسين بيقولي كويسين

سند  ابتسم وقرب اكتر وقال.... اوعي تقولي لي بتتكسفي يا بت الجزار 

غنوه اتوترت من قربو وقالت..... ايوه بتكسف يا سند ده اخويا الكبير

 سند رفع حاجبه وقال.... وايه اللي يكسفك هو احنا في بينا حاجه تكسف ....هيبقى سؤال اخوي عادي 

غنوه بصتلو بدهشه وضحكت بخفه  وقالت .....سؤال ايه ...اخوي 

وضحكت تاني وقالت.... يا وجع الاخوه

و لسه هتمشي شدها بقوه وقرب منها في لحظه جميله اتمناها كتير 

غنوه  بقيت تحاول تدفعه بس مقدرتش عليه كان متمكن منها جدا

بعد عنها بعد ثواني وداس على شفته  وقال..... وحشتيني يا بت ...كل حاجه فيكي وحشتني... فرحتي بانك لسه موجوده مخلياني مش عارف اربيكي على اللي عملتيه

 غنوه دفعته بغضب وقالت ....ده انت اللي عايز تتربى ومشفتش بجنيه تربيه.... لو عملت كده تاني هفتح دماغك ياود الحاكم انا غنوه الجزار  لتكون شايفني سماح يا بتاع الملوحه 

وسابته ومشيت خطوات وهو ابتسم على مناغشاتها اللي اشتاق لها قوي وقال بصوت عالي...مش هعديلك اللي عملتيه فيه ده انا كنت هزور العباسيه بسببك

التفتتلو وقالت بثقه...محدش قالك تتعلق بيا قوي كده انا ياما حذرتك لكن نقول ايه رجاله طريه 

ضحك وقال ...دلوك طريه ولسانك طول عشان مش تحت يدي من شويه كنتي كيف الفار على العموم مسيرك تاجيني وتوقع تحت سكيني

غنوه غمزت وقالت...السكاكين دي لعبتي خاف على نفسك يا ود الحاكم

ومشيت وسابته وهو بص لطيفها وضحك وهو مبسوط جدا انها رجعت تاني لحياته 

عند  نوح كان قاعد جنب شروق بيحاول يفوقها واتنهد بحزن وقال ....ليه يا شروق توصليني اعمل فيكي كده ليه...انا عمري ما اتصورت في يوم اني ااذيكي ولا حتى في خيالي

شروق كانت سمعاه بس خايفه تفتح عيونها وهو اتنهد بتعب وقال.... في حاجات كتييييير كتير قوي كنت مستنيك ترجعي عشان اقولهالك ...عايز اقول لك اني ..اني طلعت ما عرفش اعيش واصل من غيرك .... السنتين اللي غبتيهم عرفوني قد ايه ما ليش حياه من غيرك كل الايام شبه بعضها

عارفه...انا  فضلت طول السنتين اصحى بدري وقت ما كنت اصحى  علشان اوصلك ووادعك قبل ما تروحي مدرستك

وابتسم بسخريه على نفسه وقال.... واوقات اكون مستعجل عشان الحقك ..بس ارجع افتكر انك مش موجوده معدتش هوصلك ولا هودعك ..ولا هتاخدي مني مصروفك اللي فضلتي تاخديه حتى وانتي عروسه..كنتي تقولي مصروفي من نوح حاجه تاني مهستغناش عنيه طول عمري

شروق اتأثرت وبقت تحاول تكتم دموعها خصوصا لما قال بحزن واضح في صوته....بس انتي كبرتي واستغنيتي عن نوح نفسو مش عن فلوسه وبس ... مبقتيش محتجاني ولا بقى يهمك زعلي ولا وجعي ...دايسه عليا كيف كل الناس بس محدش فيهم همني انت بس اللي همتيني....انا  عارف اني غلطت في حاجات كتير واستاهل تزعلي وتبعدي

ولمعت عيونه بالدموع وقال....بس مقادرش اشوفك بتكرهيني ممتحملهاش  

بقلم...زهرة الربيع

هنا شروق قعدت بسرعه تلقائيا وقالت بدموع.... انا عمري ما اكرهك يا نوح ولا استغنى عنك انا ....

بس قطعت كلامها وبلعت ريقها بخوف لما اخدت بالها للي عملته وشافت الصدمه في عيونه 

نوح وقف بذهول وقال... انتي كنتي سمعاني...كنتي حاسه 

شروق قالت برعب...لا لا لسه دلوك صحيت

 نوح قال بغضب.... وحياة امك يا بت هويدا

شروق لسه هترد الباب خبط 

نوح بصلها بغضب وقال...ده انتي نهار اللي خلفوكي ممعديش اصبري عليا راجعلك

سمع خبط على الباب وراح ناحيته وهي بقت تلطم على خدودها بخوف وبتلعن غبائها 

نوح لقى  سماح جيباله كوبايه عصير الليمون وايدها بترتعش

 بص لها باستغراب وقال.... مالك يا بت  يدك بتترعش كده ليه

 سماح قالت بخوف.... ابدا يا نوح بيه ...تعبانه شويه من الصبح 

نوح قال ...طيب طالما تعبانه بتشتغلي ليه من قله الخدم ....روحي ريحي النهارده وقولي لام جمال توصل لك اكلك على الاوضه 

 سماح اتملت عيونها بالدموع وقالت .....شكرا يا طيب يا امير 

وادتلو الليمون ومشيت

تحت كانت حليمه واقفه بتوتر وخوف ونزلت سماح وهزت لها راسها بالموافقه بحزن ودموعها نازله

حليمه ابتسمت بسعاده شديده وفضلت مستنيه عند السلم واول ما لقت سند نازل جريت عليه وقالت بلهفه ....الحقني يا ولدي... الحقني 

سند قال باستغراب ....في ايه ياما مالك

حلبمه قالت بدموع مزيفه.....مصيبه بلوه يا ولدي  دلوك روحت  المطبخ اشق عليهم  لقيت البت الجديده دي اللي اسمها جنه بتتحدت في التلفون  ويا اللي اسمها غنوه وقالت لها انها بعتت كوبايه الليمون لنوح اخوك وحطتلو فيها كل  الدوا  كيف ما قالتلها

 وانا دلوك معارفاش دوا ايه اللي حطتهوله في الليمون ما داهيه تكون هتسمه وتقتله هو لاخر علشان اللي عملو فيهم امبارح

سند بص لها بذهول وقال.... انتي بتقولي ايه ياما ...انتي متأكده سمعتيها قالت كده اكيد غنوه متعملش حاجه زي دي 

بس قاطعته حليمه وقالت ... يا مري بقول لك سمعتها بودني يعني اخوك ولا غنوه بتاعتك دي .... اقولك عايزه تقتل اخوك تقولي متعملش كده ...روح اطمن على اخوك الاول ولو كان زين يبقى انا فهمت غلط 

سند اتصدم بشده ورغم ثقته في غنوه لكن خوفو على نوح اشد جري بسرعه على اوضته وووووو

تكملة الرواية من هناااااااا 

لمتابعة باقي الروايه زورو قناتنا علي التليجرام من هناااااااااا

بدل ماتدور وتبحث علي الروايات عمل 

متابعه لصفحتنا على فيس بوك هنااااااااااا

الرواية كامله الجزء الاول1 من هناااااااااا

الرواية كامله الجزءالثانى2 من هناااااااااا

مجمع الروايات الكامله 1اضغط هناااااااا

مجمع الروايات الكاملة 2 اضغط هنااااااا