رواية عاجر الفصل السابع والثلاثون بقلــم الكاتبـــة زينب ماجد (حصريه في مدونة قصر الروايات)

رواية عاجر الفصل السابع والثلاثون بقلــم الكاتبـــة زينب ماجد  (حصريه في مدونة قصر الروايات)

رواية عاجر الفصل السابع والثلاثون بقلــم الكاتبـــة زينب ماجد  (حصريه في مدونة قصر الروايات)

#عاجر 

{ بقلم الكاتبة زينب ماجد } 

الحلقة_٣٧ 

فز من مكانه اني جمد كلبي من الخوف حسبالي عرف لو كالوله 

بس هو ما اندارلي راد يطلع بسرعة .. 

كتله : شكو ؟ شصاييير 

- بشار مسوي حادث مدعووووم 

- منو داعمه ؟ 

- ما ادري .. رايح اشوف 

كض الباب وطلع يركض حتى يلحك له .. 

اني كلبي يرجف من الخوف لشتي ترعش تكول سعفة 

واني ادعي واتنخى .. دخيلك يا علي .. استرينا يداحي الباب .. 

كمت اروح وارجع وانتظر خبر .. 

نزلت دنيا طبتلي للبيت : خابري بابا شوفي بشار شلونه عليج الله سجاد يكول مدعوووم خابري 

- يعني حتى اذا خابرته راح يكللنا بالمستشفى 

- اي بس نعرف حالته عليج الله بس خابري ابوس ايدج 

اخذت تليفوني واني الحركة ببلعومي 

وضع كلش مربك ويخوف حاسة على ساعة ينكشف الصار البارحة واني الاروح بيها ...

كضيت التليفون وخابرت مرة مرتين على حازم ما رد 

كتله : ما كاعد يردون 

- اني شبيه رجعت لو باقية ابيت جدي هسه شلون اطلع واعرف اخباره شلوووون 

- انتم البارحة وين ؟ 

- يم بيت جدو 

- يعني مو بالبيت 

- لا 

- ها .. شوكت رحتوا 

- علي خذاني .. بقينا هنا اليوم العصر رجعنا كبل لا يجي بابا 

اكلج بدلي واخذيني لبيت بشار امه وخواته هناك خل نفتهم منهم الصار 

- واحنا شعلينا بالصار 

- شنو شعلينا شبيج مو ابن عم بابا وبمثابة اخو 

بعدين حتى الكرايب راح يحجون عليج لا ما رحنا هسه يكولون سمعت لا اجت لا تفكدت تتشمت بينا 

- ما متشمته باحد بس كل واحد ابيته احسن اكعدي دنيا هسه ابوج يخابرنا ويطمنا عليه 

-لا والله اني ما اتحمل تيودين تروحين روحي ما تريدين اني رايحة لوحدي ولو كالي بابا اكله صبا ما رضت تروح وياي 

- مالي علاقة روحي انت وابوج 

راحت تركض ليبرا وصعدت تبدل .. 

واني ضليت افكر اجيبها منا واردها منا .. 

لا خل اروح حتى اشم خبر اذا اهله عدهم خبر لو احد يعرف 

حتى اذا احو واحد يعرف بالصار البارحة احجي لحازم قبل لا احد يحجيلا كبلي 

كمت اخذت حجابي وعباتي 

لكيت دنيا كاعد تنزل .. كتلها : امشي .. 

خذيتها ورحنا على بيت عم حازم نعمة .. 

طبينا امه وخواته مكطعات روحهن بالصريخ والصياح 

ودنيا صفت وياهن تبجي وحجية ام حازم تكلهن : تكولن يا الله نصبتن مناحة هو انتن عرفتن الولد زين مو زين ما يصلح تفاولنه شبيجن 

ندست عمتي : هو شصايرله 

- طالع الولد من المولد عايف ابن عمه بيها وطالع بدراجته جايته سيارة مطيرته هو والدراجة بالهوى وذابته .. الناس مخابرين على اهله وفزعنا وين جانتله هالمسكين هذا ويلاخ 

- الله ما يكطع 

- يا عزا العزاج الله ما يكطع شني  شعدج ويا الزلمة ؟

- قصدي يكومه بالسلامة بس اندار حلكي يا عمه من الهوسة .. ان شاءالله بكوم منها

حجيتها وكمت ويا بناتهم بالمطبخ 

كمت استفسر اكثر .. شوية ظليت نص ساعة وكتلها : يلا دنيا خل نكوم 

ما رضت كالت : اني اضل ويا جدتي 

عفتها ومشيت رجعت للبيت .. بس رجعت كلبي متشمت بيه 

ادعي الله واشكره ما قصر باللي راد يكسرني .. رداها اله ربي ثاني يوم وكسراه .. 

كون عساه ميت وما اشوف وجهه ليوم الدين .. 

وهناك من الاكي اخذ مني حكه مربع واخلي الله يحركه بنار جهنم وما مبري الذمة ع السواه .. عساه بنار احر من نار جهنم .. تاكله وتعيده من جديد وتضل تحرك بيه الى ما لا نهاية 

مرة متزوجة لا يمك ولا بكربك ولا كاعدة وياك ولا امننتك 

تجي تهد عليه للبيت ورايد فضيحتي .. مالها حوبة يم الله 

لا والله شو كسراه تكسر ما قصر الله 

خابر حازم 

كال : ها وين انت 

- غير بالبيت شنو وين 

- حسبالي ابيت عمي راجع بس حضريلي هدوم اسبح كلش تعبان 

- ماشي 

اجا محضرتله هدومه والخاولي بالحمام سبح وكمل وطلع وتمدد 

اندار وهو يكلي : صدك ما سالتيني عن حال بشار خطية 

- غير تعبان كلت تنام وترتاح وعود اسألك 

- خطية حيل متأذي رجله لازم عملية 

- غير يدير باله هو هم صوجه 

- شصوجه يمعودة جاي بدربه ابو السيارة هو الغلط 

- وراح تسوونها عشاير 

- خابرنا على اهله الضاربه شويلي بقطاع عشرين اجو اهله وكالوا شتأمرون احنا حاضرين 

-قابل الطاكه متعمد ؟ 

- ما متعمد يا بويه بس الغلط منه بشار جاي بشارع ذاك طالع من الفرع بدون ما ياخذ حذره .. من الفرع للشارع كبل .. على سرعته .. مطير هالمسكين هذا 

- هاه .. يعني تفصلونه 

- شمدريني يم عمي السالفة هسه انت حايرة بالفصل .. دسدي الضوا خلي انام 

كمت من مكاني سديته 

واتنهدت واني اباوع لحازم التف ونام 

هسه هذا لو كليتله الصار شيسوي ؟  يروح على بشار يكتله لو شيعمل بحالي .. يا علتي بكبر بغداد الضميتها حرمتني الزاد والفضيتها شاعت بالبلاد 

التليفون ع الميز دك وحازم نايم 

جريته بسرعة وصميته حتى ما يبين صوته وكمت واني اباوع الاسم ( سهى ) رحت للمطبخ ورديت ... اجاني صوتها 

- الو 

- ها سهى 

- ها ولج اصبية بشري بالي يمج 

- ربج ما قصر وعلي 

- يا الله شصار 

- اليوم اندعم وشالوه للمستشفى ويمكن راح يسوون عملية الرجله 

- اييييه بعد ايدي ربج الف الحمد لله والشكر شلون اندعم 

- طالع بدراجته واندعم 

- حيل الله لا يقصر ان شاءلله كون بصحته وعافيته لا يكوم ولا يشيل راسه شلل نصفي يتعذب دنيا واخرة

- دعيت كبلج شكد 

-وحازم كون درى لو حس على شي 

-لا ما حس على شي بس سهى بعدني خايفة خاف لا يسوولهم ملعوب 

-حطي عينج بعين الله واسكتي شتسوين قابل بيدج شي رجلج هم صعب وبهيج امور ما يتفاهم

- والله يا سهى والنعم بالله بس كلبي خايف اليوم كضيته كله جاك الذيب اجاك الواوي بالكوة عليه رحت يغاد وكابلت اهله .. اكو خوفة بكلبي 

- راح اتعمين على روحج بخوفج .. اركدي ابيتج ولا اتطلعين ابد عود هو لو راد يكلج امشيلهم روحيلهم لا تصيرين خيرة ولا تمشين 

سهى تحجي واني بالمطبخ مطفي واحجي 

انداريت واني اسولف .. والكا حازم وراي واكف بالعباس جمد دمي بجسمي جريت التليفون بلا شعور سديته وعيوني جحظن من الخوف .. غير انطق واكله شبيك 

هو الحجاها عني وكالي : شبيج 

- مم . ما شسمه .. ما بيه شي 

- شو كاعد تحجي بالظلمة وهمس ويامن جنتي تحجين 

- سهى ااااا شسمه كاعد احجي ويا شمسه سهى 

- انطيني التليفون 

سحب التليفون وباوع بيه صدك سهى باوعلي : جا شبيج خايفة اكو شي 

- لا 

قدملي التليفون كاعد اسحبه .. جراه : اكو شي ضامته عليه من رجعت وليجاي وانت مو على بعضج شصاير 

- ما صاير شي 

- جا شنهو الضامته عني 

- ما ادري ماكو 

- جا عليمن تكليل لاختج جاك الذيب اجاك الواوي وخايفه واهله شنو الموضوع 

- ماكو هيج سالفة تخص سهى 

ضل يباوع بوجهي 

مديت اخذت التليفون ومشيت منه .. 

رحت للغرفة اجا وراي .. حجه : صبا اذا اكو شي يخصج احجيلي لا اتضمين علي وتخليني نايم على اذاني 

- ماكو شي حازم شبيك كاعد اكلك شغلة تخص سهى وعيالها وكاعد نحجي 

- وتحجين بالظلمة وبسكوت

- لا بس غير حتى ما اكعدك 

- ها ، يعني هسه ماكو شي 

- لا 

- خوش ، نامي 

ذبيت التليفون ونمت واني اتكلب بفراشي هو بقى كاعد شوية ورجع لنومته بس اني للفجر حرام لو شافت عيوني النوم .. تنهدت واني على ظهري شال راسه : ليش ما كاعد اتنامين بيش تفكرين ؟ 

- ما جاي افكر بشي .. بس نايمة الظهر هواي 

- ها 

كام من مكانه وراح لاحمام اتوضى ورجع صلى 

اني هم كمت اصلي وادعي الله يهديني للحل الصحيح اكله لو اضم عنه والبيه خير اليه يمشيني بيه . 

رجعت للفراش قريت الاخلاص والمعوذات حتى اخلص من الوهواس والقلق واهدا وانام .. وصدك هديت ونمت 

ثاني يوم لكيت حازم طالع .. 

مر اليوم كله واني وحدي وحازم ما بين دوامه .. رجع نام ساعة وطلع للمستشفى .. 

مرت اربعة ايام على هالروتين 

طكت روحي من البيت كلت خل اطلع للسوك محتاجة مسواك لبيتي و غراض للخياطة مالتي .. فكلت لحازم الصبح وصلاني لراس السوك وطلع لشغله اتسوكت للبيت وجبت الاحتاجة ورجعت 

لكيت مرت ابن عمهم بالكيا واني راجعة هم طالعة للسوك 

كالتلي : هم رحتي لبيت ابو ثائر شفتي ابنهم بشار 

-هو طلع 

-جا ما كالج حازم امس طلعوه 

-لا والله ما كالي سوا العملية لو لا 

-يا خية لو ما انت وياهم بيناتكم جم بيت جا شكلتي 

-والله ملتهية بالبيت والشغل ما طالعة ولا ادري عن احد 

- يا خية سووله عملية و من امس طلعوه من المستشفى وجابوه للبيت .. 

- ها هم زين 

- اي اليوم مسوين ثواب ابوه ذابح لسلامته 

تجين 

- ما ادري غير اشوفن حازم 

- خية هي شمرة عصا تندارين عليهم بعد اتكلين لحازم عليمن 

- بعد هو ما يرضى اذا ما اكله 

- جا خوش كليله 

وصلنا سوا هي راحت لبيتها واني دخلت لبيتي لكيت دنيا ع الدرج 

- ردت اطب للبيت مقفول وين جنتي 

- بالسوك شعجب كاعدة من الصبح 

- بيت اهل بشار ذابحين ومسوين ثواب ع الغدا

- ما عزمونا 

- لا عزمونا شلون بس بابا كاللهم اني بالدوام 

- وابوج ما كالي 

- حتى لو هاي غير نروح نشوفه اني وياج بابا ما يرضى اروحلهم وحدي وامي ما موجودة بالشغل 

- دنيا رحمة لاهلج اكعدي واسكتي 

- لا فدوة بس نشوفه مسوي عمليه خطية 

- واحنا ياهو مالتنا 

طبينا للبيت ذبيت جيزداني والتليفون خذت تليفوني وخابرت 

صحت : دا تخابرين منو ؟ 

- بابا 

عفتها وكمت اعزل بالمسواك واغسل بيه 

وهي تحجي يوا ابوها كالتلي : هاج بابا يريدج 

خذيته : ها حازم 

- اخذي دنيا وروحو لبيت عمي 

- مو كاعد اسويلك غدا 

دنيا : جذابه بعدج هستوج طبيتي مسواك ما معزلته 

- دخذيها وروحو اتغدوا هناك وكليلهم يعزلولي غداي واني راح انزل عليكم 

- خاف عيب نروح بلايا عزيمة 

- يا عزيمة انت غير بيت عمي نحتاج عزيمة بس اني لان عدي دوام كتلهم مااجي اخذي البنية وروحيلهم 

- ماشي 

سديته منه وكتلها : روحي بدلي لعد على ما اسبح وابدل 

- دقايق واجهز 

رحت سبحت وبدلت وكمت اصيح من فوك : دنيااااااا يلا يمعودة سبحت ومشطت وخلصت وانت بعدج لو عروس هم خلصتي ع الوقت هذا 

ما كضت لربع ساعة اني اصيح 

نزلت وراحت لغرفتي طلعت من مكياجي : يا شكاعد تسوين 

- بس اريد مسكارة 

- ولج ابوج لو شافج تحطين مكياج الله يمسحنا بالكاع 

- هسه بابا شمدري 

طلعت من الحرارة جوا مسكارة وسوت رموشها وهي رموشها ثخان طلعن عبالك مكانيس وعيونها بيهن خيط شكار بالمسكارة حيل برزن .. حطت خدود وحمرة سحرية بس لونت شفتها ومسحتها وبللت شفتها حتى تبين طبيعية 

واني اباوعلها : رايحين نخطبلج لو نشوف الولد 

- حتى لو غير نروح حلوين 

- حلوة والله بس امشي 

لفت حجايها ومشينا الهم هو حاطينه بالهول سلمت على امه وخواته وما سلمت عليه بقى يباوع عليه .. ودنيا سلكته سلك بالاسئلة وخايفه عليه هواي 

هو يجاوبها وعينه تبوك جابتله اخته شوربه ووكلته 

ما رضى ياكل .. كمت من كدامه رحت للمطبخ .. سالت مرت اخوه عن حاله وحجتلي .. 

صبوا غدا الاستقبال والهول والحوش انترس ترس 

هاي كله هم ما عازمين بس عمامهم البالمنطقة وولدهم واحفادهم قبطنا بيت كامل .. عود نصنا ما جاي ..

اخذت جدوره صغار وعزلت غدا حازم .. 

لما اجا .. صبيتله وكعد بالمطبخ ياكل اني اكلت وياه شوية 

كتله : نرجع للبيت 

-شوية اصبري خل انكمل ونرجع متضايقة 

-لا بس عدي شغل 

-تلحكين 

صبوا جاي وراح هو كعد بالهول عمه كاعد 

شفت امل كبالي واكفة وحازم كاعد بطنها عالية 

حجه عمه بسالفتهم وكاله حازم : بيتها موجود يمتى ما تجي هلا بيها 

كاله : لا تاخذها انت وامك وترجعونها باديكم 

-سهلة 

عمه يحجي و انتبهت بشار يباوعلي وامدد رجله ع السرير 

باوعتله ودرت عنه كتله : حازم راح اروح للبيت اني 

حجه :روحي بريه اذا تعبتي هم حكج حازم هو ياخذ عايلته ويرد 

حازم :لا اصبري اوصلج وارجع 

-شتوصلني هو هذا بيتي 

كام من مكانه واني طلعت وصلني للبيت رغم السيارة تحركت اقل من دقيقة .. حجه : محتاجه شي ؟ 

-لا شريد قابل 

-ضجتي ؟ 

-لا يمعود ما ضايجة بس نعسانة رايدة انام 

-نامي لعد لحد ما ارجعلج 

دخلت للبيت .. هستوني كاعد انزع وابدل بثوب خفيف 

اجتني رسالة ع التليفون .. سحبت حتى اشوف من بشار كاتب ( اريد احجي وياج ) 

ما جاوبته 

اتصل .. ما رديت حجه 

رجلج هذا بعده عدنا جاوبي 

ما كتبتله ابد .. رجع اتصل مجاوبته 

مسحت رسايله واتصالاته بسرعة 

وضليت امسح وراه .. لحد ما بطل .. تركت التليفون واتمددت 

بعد ما اتصل لفيت راسي ونمت ..

ساعة وما احس الا حازم يشيل راسي ويحضني وينام 

سحبت التليفون باوعته ماكو اتصال ، ذبيته وانداريت لحضن حازم باسني بكصتي .. كتله : مو على اساس ترجع امل 

-رجعناها 

-وما بقيت 

-شبقى يمعودة البيت الجهال مسوينه هوسة مالي مكان احط رجلي ما ارتاحيت واني تعبان والصدك اتعردت على مكاني هذا من اغيره عيني ما تاخذ نوم 

حضني وهو يكلي .. لا ما اجي يمج واشم ريحتج واحس بيج ما ترتاح روحي ولا اهدا وانام حتى لو بس داير مدايري ما نايمة يمي مامن 

بسته ورجعت راسي بحضنه ونمنا .. 

شوية ودك التليفون .. صحيت بس بقيت جامدة وحازم حاضني .. 

مط نفسه ورجع ظهره .. فتح اني سويت روحي نايمة بعدني .. حجه : صبا تليفونج يدك صبا 

- نعسانة ما بيه حيل 

انداريت وشفته رقم غريب بس رقم بشار .. ذبيته بسرعة 

وقفلته ما سلني رجع لنومته بس اني طار النوم من عيني .. لحد ما شوية وكعد بدل وسبح وطلع .. ما فتحت التليفون .. ضليت خايفة منه لو بودي اشمره بالزبالة واخلص منه 

ماكو ساعتين ورجع حازم للبيت اني كاعد ع المكينة كال : ليش تليفونج مغلق 

- ما ادري من سديته الظهر لهيت عنه هسه افتحه كول 

- ماكو جبت عشا وصوني فوك وجبتلج وياي 

مسوية عشا كباب عروك 

- جا سويلي اني ما احب اكل البرا خل اصعده وانزل اتعشى وياج .. 

كمت سويت العشا وفتحت التليفون .. 

نزل وكعدنا ناكل .. دك التليفون .. كمت من مكاني 

باوعته بشار .. اذا ما ارد هسه يكول منو واخاف عيوني تفضحني وارتبك ويشك واخاف ارد واتورط شسوي هسه 

دست رد بسرعة 

كال : الو 

- رايد احاجيج ليش ما تجاوبين 

- ان شالله عيني اخلص عشا واخابرج .. 

- حازم يمج 

- ان شاءالله 

- راح انتظرج 

سديته ورجعت كال : منو 

- ع الخياطة 

ما جاوبني ضل يباوع اخبار الرياضة ع التلفزيون .. 

انسدت نفسي ضليت بس اصب جاي واشرب .. شوية ورجع طلع كال : رايح لعمامي 

من راح خابرت على بشار .. 

اول ما فتح خط طحت بيه ورزلته 

ولك انت ما تستحي ما تكول لو طاح التليفون بيد حازم و شاف رقمك وجاوباك ما تكلي شتسوي 

- رايد احاجيج تكدرين تجيني 

- تجيني شنو اعرفك تعرفني واجيك ولك استحي على روحك وخاف ربك كافي الصار بيك ما اتعضت ما انوديت شنو من بشر انت 

- ما رايد اسويلج شي بس رايد احاجيج 

- حاجيت ملك الموت ان شالله وخلصني منك يا عار يا طايح حظ مرة ثانية لو خابرت الا ابتلي بيك ولي 

سديته .. ما رجع خابر 

لليل من رجع حازم بالليل اريد انام .. دك التليفون 

بس من رقم غريب مو رقم بشار .. حازم استغرب كال : منو كاعد يخابرج بهالوكت 

- ما ادري رقم غريب 

- جيبي بالله 

اخذه رد .. بسرعة انسد بوجهه من اجا صوت حازم 

كال : منو هذا ؟ 

- مدريني رقم غريب 

عقد حاجبه اتضايق 

ربع ساعة ورجع الرقم يدك .. هم رد حازم بس ما جاوب انتظر كلمة من الرقم الثاني ذاك ما حجه من حجه حازم : الوووو 

انسد بوجهه مرة ثانية .. 

كال : منو هذا الرقم 

- يا مو كتلك غريب ما اعرفه 

دفع التليفون عليه وكالي : من يخابر ردي انت خل اشوفه يحاجيج 

.. رجع دك التليفون بسرعة 

انخطف لوني كمت اباوع بوجه حازم كتله : ما اعرفه والله 

- واني جاي اتهمج بس من يسمع صوتي محد يرد ردي انت هل اشوف خاف مرة وتستحي تحاجيني 

ضل كلبي يرجف وايدي اريد اخذ اصبعي ع الرد وادوس انعقد الساني .. دست رد وهو فتح السبيكر كلت : الو منو 

محد جاوب كلت : الووو 

اخذت نفس .. ذوله كاعد ديلعبون علينا دسده سده 

سديته و هو ضل يباوع حجه : ما مرتاح لهالسالفة 

منو هذا الكاعد يدك 

- ما ادري ما شفت محد يرد 

- بس من سمعوا صوتج ما سدوا الخط من يسمعوني يسدونه شنو السبب 

- ما ادري 

- خلي ولي بعد لا تجاوبينه ابد 

عفته .. 

لليل ب٣ اندزت رسالة حازم نايم .. حازم نايم خفت اتقرب للتليفون هسه يكلي شكاعد تسوين بيه بهالليل .. بس لو بشار الداز الرسالة .. لا احس حازم نومته خفيفة ما كاعد يشخر لو كضيت التليفون يحس .. سويت روحي نايمة صدك شوية وكعد راح للحمام ورجع نام 

اني ما شلت راسي ابد كأنما نايمة 

للصبح صدك نمت .. كعدني حازم عاقد حواجبه : صبا اكعدي 

مطيت نفسي ووقوست عيوني كوا اباوع واني اشيل راسي : شكو 

- منو هذا الكاتبلج من ينام رجلج خابريني ؟ 

فتحت عيوني : منو هذا 

- اني الكاعد اسألج منو هذا 

- ما ادري 

- صبا شكاعد اتضمين عليه 

- ما اعرفه منو 

- الرقم البارحة يخابرج هسه دازلج هجي لو لا 

- ما اعرفه حازم يعني شسوي 

- مستحيل ما تعرفينه وهو كاتبلج من ينام رجلج خابريني 

- قابل اجذب عليك ما ادري 

- التليفون راح يضل عندي واحاول اعرفه منو هو عسى ما اروح للشركة وانبش اهل تهله ولو عرفت الج ايد بالسالفة وتعرفين وضامة عليه والعباس محد يخلصج مني .. 

-اخذه وخلي عندك قابل شعندي بيه وكاعد تتهمني ومكعدني 

-جا واحد كاتبلج هيج وما تريدين اكعدجججججح 

- هسه عليمن اتصيح خلي عدك وخلصني منه 

خذاه وراح لدوامه .. 

زين شلون يربي والله قهر هسه اعرف واتجاهل 

بشار ما راح يعرفني وراح يدخلني بمشاكل 

اكل لحازم .. بس شكله حازم راح يشك بيه انوب نكرت وارجع اكله حرام يذب الصوج بيه ويكلي ليش نكرتي من الاول .. وما يصدك 

غسلت البيت وفرشته واني فكري يجرخ 

كملت رحت على بيت عم حازم دخلت عدهم .. محد موجود بس النسوان .. كتلها : اعذريني خالة ما جيتكم بعد ولا سالت عنه شلون بشار شلون صار 

- والله بعده رجله بالضيم والعشاير جر وعر طكت ارواحنا بس من الكعدات لو تفض ونفتك حتى هو تعب طكت روحه 

-خطية وينه هو 

-بالاستقبال نايم عمت عيني الليل كله يون من الوجع ما نام 

-خطية 

-جا اروح اني ما طوله نايم كلت اشوفنه خطية حازم كلش مقهور عليه 

- لا طبيلا شوفي نايم كاعد 

مشيت للاستقبال بس انفتح .. هو شال راسه 

محد موجود .. كتله : شلونك خوية شلون صرت 

ابتسم 

من عفت الباب انرد باوعت وهمست : ابن النعال شرايد مني عوفني بحالي انت متجوز 

- اجيتي برجليج محد جابج 

- كافي حازم لو عرف انت يذبحك واخذ الرقم وراح يعرفك مو بعيده عنه 

-جاية اتنبهيني 

-لا جاي اكلك جوز مني خلي حياتي تمشي بدون هوسة 

- اني جديات ما رايد اذيج ولا رايد اسببلج ضرر بحياتج بس اني ما ادري عقلي كله مشغول بيج 

-والكاعد تسوي شنو مو اذية 

-ادري حوبتج يم الله جبيرة وطحتني هالطيحة هاي بس 

ما ادري احس روحي تريدج 

-بكيفك تريدني كافي جوز مني وعوفني 

-شنو العاجبج بحازم ما يناسبج كلش انت صغيرة وحلوة وهو 

- وانت معليك لا تدخل بحياتي وما يحقلك كااافي 

-صدكيني ما راح يخلونج تعيشين براحة لو تسمعين وهم يتحلفولج تشردين ما راح يخلونج تكملين وياه فانهيها احسن ما اتظلين متعذبة 

-وانت ياهو مالتك محد اذاني بكدك خلصني منك وجفيني شرك وهاي اخر مرة انبهك المرة الجاية راح اشتكي عنك والله 

عفته وطلعت من الباب الثانية ورحت لبيتي 

لكيت دنيا بالبيت كتلها : ها 

-اخواني نايمين وطاكة روحي ماما بس تصيح فوك وتصخر 

-ما رايحة امج للشغل

- متوجعة من بطنها 

-خاف محتاجتج شي شلون 

-نعسانة اريد انام وهي بس تصيح كومي 

-روحي نامي بغرفتي .. 

مشيت صعدت لبيت امل .. كاعدة ع الكرسي .. 

كتلها :محتاجة شي 

اندارت : لا دنيا وين 

-نعسانة تكول راحت نامت 

-نامت عليها طابوكة ان شاءالله يكلولي هنيالج عدج بنية والبنية ما فالحة غير بالنوم تشوفني كوة اشيل روحي والبيت خيسة وهي تسهر الليل تنام النهار 

-محتاجة شي اسويلجياه كولي انت حامل 

-الله يطيج ما محتاجة بس متوجعة 

-محتاجة تروحين للدكتورة 

-لا ما اريد بس اريد اوكف لحيلي رجليه ماذياتي حيل الحمل كلش صعب عليه جيفن بنهاية الثلاثين 

-كومي خل اخذج للمستشفى خاف بيج شي 

باوعتلي : تكدرين 

-شعدي هسه اوكف تكسي واجيبه ونروح 

-ياريت الوجع اكلني 

كمت نزلت بدلت وطلعت وكفت تكسي ومشيت وياها للمستشفى فحصتها الدكتورة مال الطواري كالتلها الجاهل نازل كلش ولازم تولدين اذا تضلين اكثر الطفل يموت 

كالتلها - بس اني بعدني بالسابع شلون 

- حتى لو سابع اخسن ما يموت لو انت تتأذين روحي للدكتورة التراجعينها واذا ما عدج خل اكتبلج على مدينة الطب روحيلهم 

-لا لا اخابر رجلي ياخذني مستشفى اهلي 

كالتلي : خابريلي على حازم خل يجي 

-تليفون ما عدي ما جايبة 

انطتني تليفونها كال : يلا جاي ..

انتظرنا بالنص ساعة اجا واخذناها لمستشفى اهلي بالكرادة 

دخلوها فحصوها كالوا : لازم تجيب بسرعة 

اطاني فلوس وكالي روحي جهزي للطفل بسرعة واني راح اخابر خواتها يجيبلها غراض 

مشيت ما اعرف الطفل شيتجهزلا ..

وكفت عد ابو تجهيزات طفل كتله حجي عدي مرة راح تجيب ووصتني على جهاز شتحتاج المرة التجيب 

ضحك كالي : وانت ما تعرفين شتحتاج المرة 

-لا والله ما اعرف غراض الطفل ما مخلفة كبل حتى اعرف 

اطاني حفاظات ١ واطاني كماطات ٥ و دشاديش وقمصان مال انفاس وبطانية وشيالة وحليب رقم واحد وعصابة وبوطرة وجونسون ولهاية وغراض كومة حتى ما اعرفلهن جبتهن كلهن ب١٥٠ واجيت للمستشفى 

هم وقعوا حازم على العملية على مسؤليته ودخلت للعمليات 

ضلينا اني منتظرين برا نص ساعة وكالوا : جابت 

فرحنا بس الطفل لازم ينقل لانعاش سلموه لحازم يطلع بيه لمدينة الطب .. واني بقيت ويا امل ولحد هسه ما واحد من اهلها اجا .. كعدت وهي تون وتبجي وكاضة بيدي 

باوعت وهي تصيح : الجاهل وين مااااات 

-ما مات بس اهدي سبيعي ولازم يضل بالعناية خذاه حازم لمدينة الطب .. 

ضلوا يطوها دوا وهي كاضة ايدي وتتوجع وتبجي .. 

هدت ونامت .. واني ضليت كاعدة يمها .. طبت اختها وامها كالن ؛ ها جابت 

-اي الحمدلله بس متوجعة 

التفن عليها كعدت وهي تون ويحاجنها 

وبقن يمها ساعة  ردت ارجع كتلهن : من رخصجن اخذن راحتجن 

حجت امها : جا ياهو اليضل وياها اخيتها غاد جهالها مناك لازم تروح واني رجليه ما يعينيي اعاوننها حا وكفت وياها 

-ما عدي شي بس عبالي تبقن 

بقت امها يمها واختها راحت .. ضليت كاعدة يمهن 

يحجن الغاز مشيت كعدت برا .. تليفوني مو وياي .. ضليت افتر بالممر .. لحد ما شفت الممرض اجا .. اجيته شكللها مغذي وكال : من يخلص صيحولنا نسده 

راحت وامها ودعت ومشت .. 

واني جريت تخم نفز يصير سرير تمددت عليه وضليت اراقب مغذيها هي هدت ونامت عليه .. من هلص رحت صحتله شاله منها .. 

خابر حازم على رقمها جاوبته 

كتله : ها شلونه الجاهل 

- بالانعاش خذوه ما شايفه 

- وشلونه هسه تضل غاد 

- والله ما ادري ابقى اعوفه بس شلون اعوفه 

- هم كالولي انطينا غراضه وروح لا تكعد اتاني اطينا رقمك من يصير زين نخابرك نكلك تعال بس اني كلبي ما يطيني اعوف ابني وامشي 

- كعدتك مالها فايدة بس تعب 

- اي بالعباس تعب متت 

- ارجع نام والصبح ارجعلا 

- ولو باكو 

- ينباك بمدينة الطب شلك بيها ياهو اليبوكه متكلي 

- امل شلونها 

- نايمة بس متوجعة حيل 

- هي بعمرها ما جايبة عملية كله طبيعي 

هاي اول مرة 

- لا وعمرها هي نهاية الثلاثين والحمل بهيج عمر متعب الانسان ماله طاقة لروحه مو ادور حمل وانسان ثاني 

- اهلها راحو 

- بس انها وضلتها مالها فايدة اتمنيت تروح حتى اخذ السرير اقلها امدد عليه 

- اكو غطا شوفي كليلهم لا اتضلين 

- لا عادي ابقى بعباتي 

- ديري بالح على نفسج 

- ان شا ءالله 

سديته منه وحاولت اغفي شوية 

وكامت تصيح من الوجع .. كمت الها ورحت صحت الممرضة اجتها فحصتها كالتلها : وصاخة الطفل كلها بعدها ابطنج اتأذيج لو بقت حاولي تسوين مساج لبطنج ادفعين بيها واطلعين من الرحم 

سوتلها كامت تصرخ من الالم 

كالتلي : سويلها بس على كيف 

كمت امسح لبطنها حتى بس امل تصرخ من الوجع وتوخر بايدي .. 

كالتلها : لعد كومي لحيلج ادخلي للحمام حتى تنزلين وصاخة الطفل 

كوة كمت اكعد بيها كامت تبجي من الالم 

حطيت ايدي جوا راسها وكضيت ايدها وكعدتها وبقيت لازمتها ونزلت رجليها وهي تتىجع وتنوح .. هستوها وكفت وجان ينزل منها دم .. للكاع .. مثل الاكباد 

خفت حيل رحت ركضت للمرضة 

كالت : هي هاي الوساخة بس مال لحكت للحمام .. اخذيها وهسه اصيح المنظفة 

خذيتها وكعدتها بالحمام نزلت دم الجاهل كله وهي تكض بيدي وتعصر من الالم وجهه صار كركم 

غسلت وساعدتها تبدل .. ورجعتها والمنظفة كاعد تنظف الوصاخة 

كعدتها ع السرير ونومتها .. كالتلي : ما اعرف شلون اجازيج على وكفتج اليوم تعبتج هواي 

- لا يمعودة لا تعبتيني ولا شي .. المهم ترجعين لجهالج سالمة كافي عندي 

ضلت تغمض وتحاول تغفي .. 

رجعت اني غفيت ونمت للفجر اجا الممرض يطيها العلاج كعدت بسرعة  هي نايمة.. سوالها وكالي : نامي وقتت الموبايل ارجعله من يكمل 

رجعت اغفي هو شوي واجا شاله 

وكملتها نومة لحد نا اجتي اختها ومرت اخوها ب٨ الصبح جايبيلها ريوك .. جايباتلها كيمر عرب ووكلنها .. وشربنها جاي .. اجا الدكتور فحصها وسال بطنها طالعة .. 

كتله لا 

كال : شكلت اتريكت 

- اي اكلت كيمر عرب 

اتخبل كام يصيح وهو يكللها : كيمر عرب وانت عملية وطنج ما طالعة راح تحجر بطنج وتتأذين . 

وطلب منها تمشي بيها ما بيها تمشي 

كامت اختها تمشيها دقيقتين وترجع متكدر تمشي متأذية 

اجا حازم انطاهم فلوس العملية وكتبوله العلاج والتوصيات .. وطلعناها من المستشفى 

خذيتها لبيتي واهلها جابولها سرير ابو النفر حطيته الها بالاستقبال .. وحازم نلتهي بالجهال غاد بمدينة الطب واعلها ترسوا الاستقبال .. 

عاد اني سبحت ورحت اسوي غدا .. 

برياني ودجاج وصبيت لاهلها وعمتي .. وهي شربتها سوب دجاج 

بس حيل متأذية راحو اهلها وضلت انها وعمتي يمها .. 

خليتهن يمها ورحت انام .. شوية واجتني دنيا تكلي : بيبي تريدج 

رحت الها اركض كالت : كومي امل للحمام نا تكدر 

خذيتها وغسلتلها ورجعتها

واطيتها دواها وبقت تحجي وياهن ورجعت نمت

شوية واسمع نسوان اخوتها و كرايبنا .. كمت هم دزيت على بيتيفور وسويت جاي وضيفت .. 

وضلت ضيافة رايحة ضيافة جاية 

والبيت ما خلا لحد نص الليل امها وعمتي نامن عدنا وامل كالت : ما اعتمد عليهن  ودنيا ما تعرف جيبي فراشج ونامي هنا خاف بالليل اتوجع وين الاكيج 

اجا حازم طب نام جوا .. 

واني نمت يم امل الليل كله تكعد تتالم من بطنها ما طلعت واتحجرت كامت تلوب منها .. 

رغم كل المحاولات ما كاعد تطلع حيلت تأذت 

تحس بطنها راح تنفجر من الوجع 

تعبت كلش ما شفت النوم .. 

وجه الصبح يلا نمت على نومتها لل٩ كعدتني عمتي تكلي : كومي سوي ريوك للمرة عيب خطارج 

كمت اسويلهن ريوك بس احس طاقتي خلصت .. من التعب 

طب حازم وهو شايل الجاهل بالشيالة

ركضتله : جبته 

- اي 

- يا عمري

باوعته حيل حيل صغير بكد كف الايد .. 

بسته وكمت امد اصبعتي عليه .. صاحت امه : حازم اجيت 

اخذ الجاهل واني وراه 

كامن بسرعة من شافن الجاهل بيده وصلن ع النبي 

واطاه لامل باسته وكالتله : اخذه ما اكدر الزمه 

خلاه عد امه .. 

حطته بحضنها كالت هذا الهوى مو زين عليه لازم يعيش بجو مثل جو بطن امه .. راحت خذته لغرفتي وطفت الغرفة وكالتلي : سويله ممه 

سويتله .. 

وكالتلي اطيني وروحي لامل شوفيها شتريد 

رحت كومتها للحمام ورجعتها بعدها بطنها محجرة 

ومشيت اسوي الريوك للكل .. 

ريكت حازم وهو يكلي : ميت من التعب حيل 

- واني همينه والله بس شسوي 

- خواتها ما يجن خوما تضلين انت ليل ونهار 

وصى امها تحي اختها او مرت اخوها

اجتي مرت اخوها بقت يمها واني رحت لغرفتي الطفل نايم 

شغلت المروحة على اثنين بس اسمه هوى وذبيت روحي مثل الميت واني نايمة 

شوية وحازم اجا نام يمي 

ساعة واجت عمتي فتحت الباب بلا ما تدكه وهي تكول : يا نايمين والخطار تارس بيتكم دكوموا شوفوا خطاركم عايفينه بلا غدا 

يا يا يا مشغلين هوى من عزا العزاكم ياهو المشغل الهوى 

- اني بس مو عالي اثنين مجرد بس نسمة لان ردت انام 

- دكومي يمه كومي 

حجه حازم : يمه هي ليش ما ضلت عد اهلها جا هنا ياهو اليداريها 

- من دهر الدهرك ولك جا تذب المرة اعلى اهلها وهي المخلفتلك ضنا 

- يمه ما اذبنها بس اني خو ما اكابلنها بنص النسوان 

- كول خايف اعلى مريتك تعبت 

- جا من امس سهرانة يا يمة وتعال فوك الطفل و امل طبخي وضيفي 

- غير جايينك ولك انت شلون معزب 

- يمه تكضي ايام نفاسها عد اهلها وترد بكل جهالها هيج غير

- دكومي كومي سوي غدا للخطار كومي 

كمت اسوي غدا 

بس الجاهل بغرفتي شفتها اطته ممه وخذته يمهم 

خلصت الغدا ورجعت لغرفتي شغلت سبلت وذبيت روحي انام من التعب حتى صفنة ما اصفن من احط راسي كبل انام 

طبت عليه امها وهي تصرخ وتكلي : مشغلة سبلت ع الجاهل عزا العزاااااج كوووون 

فزيت 

-وهو منو الجايبة لغرفتي 

-عمت عينج غير كلنا راح نخلي هنا لان هناك احنا كاعدين مو زين عليه الهوى 

-شمدريني مجان موجود من نمت 

شالته وطلعت بسرعة 

بس الجاهل خنچر كلش حتى رضاعة ما كام يرضع 

حازم كاللها : خلي ناخذه للدكتور 

ام امل كالتله : لا هو بس يريد دفو يصير زين بس هي لان شغلت عليه السبلت اتمرض هسه 

لليل والطفل مخنجر 

خذوه للمستشفى اطوهم تعليمات وادوية ورجعوا 

ضليت نايمة يم امل والجاهل بغرفتي عمتي كل شوية تروحله 

وحازم صعد يم جهاله .. 

بنص الليل نايمة 

وما احس الا صياح عمتي وبجيها 

فزيت اركض واكلها : هاااا شبي 

-ولج مات الجاهل كعدي حااااازم ماااااات ...... يتبع 

———————

#زينب_ماجد

 تكملة الرواية من هناااااااا 

لمتابعة باقي الروايه زورو قناتنا علي التليجرام من هناااااااااا

بدل ماتدور وتبحث علي الروايات عمل 

متابعه لصفحتنا على فيس بوك هنااااااااااا

الرواية كامله من هناااااااااا

مجمع الروايات الكامله 1اضغط هناااااااا

مجمع الروايات الكاملة 2 اضغط هنااااااا