رواية نسمه متمردة الفصل التاسع وعشرون والثلاثون بقلم أمل مصطفي حصريه في مدونة قصر الروايات
رواية نسمه متمردة الفصل التاسع وعشرون والثلاثون بقلم أمل مصطفي حصريه في مدونة قصر الروايات
نسمه متمردة
بقلمي أمل مصطفي
البارت ٢٩
**********
بعد مرور شهرين...
مرّ الزمن بثقله على كل من نسمة ومروان، فراقٌ قاسٍ أرهق قلبيهما، رغم الشوق القاتل الذي ينهش أضلاع نسمة، إلا أن موقفها ظلّ ثابتًا، شديدًا، وكأنها صخرة صوان لا تلين.
حاول مروان مرارًا أن يقترب، أن يعيد ما انكسر، لكنها لم تستجب، ولم تمنحه فرصة.
في تلك الأثناء، حضر والدا أيهم إلى مصر، وبقيا إلى جواره بينما يتعافى. رفض أيهم أن يعود معهما، وأصر على البقاء، غير قادر على ترك مروان وهو في حاله المنهك.
رقّ قلب سهير لابنها، بعد أن رأت وجعه وذبوله بسبب بُعد نسمة، ذلك البُعد الذي لم تكن تتوقعه،
وهي التي تعلم كم كانت نسمة تعشقه. لذلك، قررت ألا تزيد وجعه بخصامها، فعادت تتحدث معه، و تعامله بطبيعية، كي لا تتضاعف آلامه النفسية.
********
طرق مروان باب غرفة حنين.
استقبلته الصغيرة بفرحٍ طفوليّ، وقالت:
— بابي، اتفضل.
احتضنها مروان بحنان، وقال:
— حبيبتي، فين مامي؟
أجابت ببراءة:
— بتتوضى علشان نصلي العصر.
قال بلطف:
— انزلي لتيته، عايز أتكلم مع مامي شوية.
أومأت برأسها ثم تمتمت بقلق:
— حاضر، بس بلاش تزعلها... هي بتعيط على طول.
ربت على كتفها بحزن وهمس:
— ما تخافيش، إنتي مش عارفة أنا بحب مامي قد إيه.
خرجت نسمة من غرفتها، وجدت مروان ينتظرها. تسارعت أنفاسها، وشعرت بتوتر عارم يتملّكها، من شوقها الشديد له
فهي تتهرب من مواجهته منذ حادثة أيهم حتي لا تنهار أمامه وقد حسمت أمرها بالانفصال.
رفع مروان عينيه فور أن شعر بوجودها، وأدرك توترها من نظراتها المرتبكة. تحدث بصوت يحمل وجع الهروب المتكرر:
— ممكن نتكلم؟
تهرّبت منه بنظراتها، وقالت بصوت منخفض:
— آه... طبعًا، اتفضل.
اقترب منها بخطوات بطيئة، وقال بشوق خافت:
— ممكن أفهم؟ هتفضلي بعيدة عني لحد إمتى؟
أيهم، الحمد لله، بقى كويس... عذرني و سامحني، وأمي وخالتي كمان. وجبت حقك من نانسي، وشاهي... هوصل لها و هندمها على كل حاجة عملتها. هجيبلك حقك إنتي وأيهم.
تنهد بحسرة، وأكمل:
— ليه مش بتسامحي؟ ليه كل ما تحصل مشكلة بينا، تتمردي عليا و تبعدي؟ ليه بتستمتعي بعذابي؟!
ردت نسمة بصوت مرتجف، تخنقه دموعها:
— أنا عمري ما تحملت زعلك، ولا حزنك... بس إنت كنت هتقتلني من غير لحظة تردد.
اعتبرني متّ في اليوم ده... بجد، وانساني. أنا وإنت ما بقاش بينا حياة خلاص، كل شيء انتهى.
أنا كنت بستنى أطمن على ماما وأيهم...
والحمد لله، اتحسنت حالتهم. وأنا... عايزة أطلق.
تبدلت ملامح مروان في لحظة، و أطبق على ذراعها بقوة آلمتها، وقال بنبرة غاضبة:
— إياكي تنطقي الكلمة دي تاني! أنا لصبري حدود... فاهمة؟!
قالت، ودموعها تنساب بلا توقف:
— لا، مش فاهمة... أنا من يوم ما جبتني من شقة سيف، وأنا مش بعتبرك جوزي.
جذبها إلى حضنه بقوة فيها شيء من الرجاء، وقال بشوق مكسور:
— يعني أنا ما بقيتش حبيبك؟ مش مشتاقة لحضني؟ زي ما أنا هموت على حضنك...
أغمضت عينيها بقوة، محاولة حبس الألم داخلهما، لكنه أكمل بهمسٍ حنون:
— آسف... آسف يا حبيبتي، الموقف كان صعب عليا جدًا. اسألي ألف راجل... لو رد فعله كان أقل من كده! اعملي اللي إنتي عايزاه،
بس كفاية بُعاد .
شهرين... كتير أوي. تبقي قدامي ومش قادر ألمسك؟ ونتعامل كأننا أغراب؟! إنتي بتعاملي أيهم أحسن مني، و مهتمة بيه أكتر...
ردّت بحزم ممزوج بالحزن:
— مش مهتمة بيه ولا حاجة... كل الموضوع إنه فداني بنفسه، والواجب يخليني أكون جنبه لحد ما يسترد صحته.
ثم قالت برجاء:
— أرجوك يا مروان، خلينا زي ما دخلنا بالمعروف، نسيب بعض بالمعروف... وتكون بينا ذكريات جميلة.
نهض بغضب وقال بعنف:
— لا يا نسمة! مش هطلّق، ولازم تشيلي الفكرة دي من دماغك. وأهلك مش هيسمحوا بكده.
ردّت بلهجة غاضبة وعينين دامعتين:
— والله يا مروان، لو ما وافقت على الطلاق، لهرب، ومحدش فيكم هيعرف طريقي... ياريت تكون من غير فضايح.
*******
صرخ مروان بغضب وصوت عالٍ:
— أنا ما بتهددش! وأعلى ما في خيلك اركبيه... سلام!
ثم خرج وهو يرطم الباب بقوة خلفه. جلست نسمة تبكي بمرارة على ما وصلت إليه الأمور بينهما، تشعر أن المسافة قد اتسعت، وأن الجرح بات أعمق من أن يُرمم.
---
خرج مروان يتقدمه الغضب، لا يرى أمامه سوى اشتعال قلبه. أخرج هاتفه واتصل بأحمد.
— أحمد، أنت فين؟
— عند شهد، خير؟
— محتاج أتكلم معاك ضروري.
— أنا خارج، هقابلك فين؟
— لأ، أنا هفوت آخدك... سلام.
سمعت شهد المكالمة، وهتفت بسؤال مرتبك:
— رايح فين؟
ابتسم أحمد بخفة وهو يرد:
— مروان شكله متضايق، وعايزني... عارف، أكيد نسمة لسه رافضة ترجع له.
قالت شهد بحزن وهي تنظر إليه:
— بس أنا ما لحقتش أقعد معاك...
اقترب منها أحمد، ومسح بخفة على وجنتها بأنامله، وهمس برقة:
— هرجع تاني يا قلبي... أنا كمان ما شبعتش منك.
ثم طبع قبلة حانية على جبينها، وخرج مسرعًا.
---
توقف مروان بسيارته أمام الفيلا، خرج أحمد وركب إلى جواره. لم يحتج إلى السؤال، فقد كان وجه مروان يغني عن كل الكلمات.
— خير يا مروان؟ شكلك متضايق...
أجاب مروان بحزن شديد:
— نسمة مصممة على الطلاق. أنا تعبت، بقالي شهرين بحايل فيها، وصابر على بعدها... وكنت بقول بكره تلين أو تقدر... بس مافيش فايدة.
هزّ أحمد رأسه بأسف وقال:
— أنا كلمتها أكتر من مرة. أول مرة أشوفها دماغها ناشفة كده، ولا حتى كبرت ليّا أو لبابا...
هتف مروان برجاء موجوع:
— أنا محتاجكم تساعدوني... لازم ترفضوا الطلاق.
رمقه أحمد بنظرة إشفاق، وقال بتردد:
— بس إحنا عمرنا ما غصبناها على حاجة.
ردّ مروان بثقة ممزوجة بالألم:
— إنت عارف إننا بنعشق بعض... ورأيكم مش هيكون غصب، أنتم بتسندوا بيتي عشان ما يتهدش... ويوقع.
*******
بقلمي: أمل مصطفى
تحدث أحمد بصدق، قائلاً:
– أنا معاك يا مروان، وأنت عارف... لأنّي واثق من عشقك ليها، بس اللي حصل لنانسي كان غلط.
هتف مروان بغضب:
– لا، مش غلط! واحدة ضحكت على مراتي وودّتها شقة، وهي عارفة إنها هتتعرى وتتفضح، ووافقت عشان الفلوس! كان لازم تدوق من نفس الكأس.
قال أحمد بعدم رضا:
– بس يا مروان، مش لدرجة إنها تتمسك عريانة في بيت دعارة! دي فضيحة ليها ولأهلها!
رد مروان بغضب جحيمي:
– وهي فكّرت في مراتي لما عرّيتها قدام راجل غريب؟! تستاهل! أنا مش ندمان... ولسه حساب الحيوانة التانية. وحياة كل دمعة نزلت من عيونها، وكل ليلة بعدتها عن حضني... هدفعها التمن غالي.
---
سهر:
– وبعدين يا أيهم؟ مش كفاية كده؟ يلا نرجع.
أيهم برجاء:
– أرجوكي يا ماما، أنا خلاص هستقر هنا، ومش راجع تاني. هفضل مع أخويا. فهّمها يا بابا، أنا مش صغير، وعارف مصلحتي فين... ومش هبعد عن مروان.
جاء مروان من خلفه، ووضع يده على كتفه قائلاً:
– لسه خايفة عليه مني، يا خالتي؟
سهر بإحراج:
– لا، مش قصدي... بس إحنا اتعودنا على هناك.
اقترب مروان منها قائلاً:
– حضرتك عارفة إن أيهم أخويا... من أول ما تولد وأنا مش باعتبره ابن خالتي، هو أخويا وصاحبي وصديق عمري. والأخوات برضو بيختلفوا وبيتخانقوا، بس بيرجعوا تاني.
ثم احتضن أيهم قائلاً:
– أخويا في عيوني، كأنك موجودة... وأكتر.
*********
بعد أسبوع في الفيلا
قالت سهير، وهي تنظر إلى ساعة الحائط بتعجب:
– غريبة! أول مرة نسمة تتأخر في النوم كده.
رد والد مروان بهدوء:
– هي مفيش عندها كلية النهارده.
أضافت سهير، وهي تشرد بعينيها:
– ممكن تكون راحت عليها نومة...
قال مروان وهو ينهض:
– أنا هطلع أصحيها.
نظرت له سهير و الحزن يغلف ملامحها، علي حالة و حيدها وهتفت بصوت خافت:
– نسمة مصممة على الطلاق... خايفة على مروان من الصدمة، هتكون صعبة عليه.
مروان بيعشقها، ومش ممكن يفرّط فيها.
وهي كمان بتحبه... بس كرامتها مجروحة، ومحتاجة شوية وقت لحد ما تنسى.
********
صعد مروان إلى غرفة حنين، التي أصبحت غرفة نسمة منذ الحادثة. حاول كثيرًا استرضاءها،
اعتذر لها عن سوء ظنه، لكنها تمردت ورفضت أن تكون زوجة له مرة أخرى.
فتح الباب و دلف إلى الداخل. لم يجدها جوار حنين. طرق باب الحمام، فلم يلقَ ردًا. فتح الباب بحذر... وجده فارغًا.
تمتم بدهشة:
– معقول تكون في جناحها؟
استدار بلهفة، لكن شيئًا ما على "الكمودينو" لفت نظره...
***""**
جلس مروان على طرف السرير، يحمل ظرفًا بين يديه.
كان مكتوبًا على أحدهما: "ماما سهير"، وعلى الآخر: "بابا وأحمد".
حدّق في الظرف الخاص بوالدته، ثم نهض وهو يشعر بالاختناق، ونزل إلى الأسفل.
– اتفضلي،
قالها وهو يناول الظرف لوالدته.
نظرت سهير إلى ما في يده، وسألته بفضول:
– نسمة سايباه في أوضة حنين؟
تناولت الظرف وبدأت تفتحه، ثم سألت دون أن ترفع عينيها:
– وهي فين؟
هتف مروان بضيق:
– مش موجودة... و تليفونها مغلق.
فتحت سهير الجواب، وبدت ملامحها متوترة وهي تقرأ، وقد شعرت باختناق ابنها قبل أن تنطق كلماته.
> بسم الله الرحمن الرحيم
ماما سهير، بابا، وجدي...
أنا آسفة جدًا على الطريقة المخزية اللي سبت بيها البيت، بس ماكنش قدامي حل تاني.
مروان مصمم نكمّل، وأنا مش قادرة. وهو مش مخليني أختلي بنفسي.
بابا وأحمد واقفين في صفّه.
ماحدش فيهم فكر أنا حاسة بإيه، أو عايزة إيه.
ماحدش احترم رغبتي.
ماكنش قدامي غير الهروب.
أنا عارفة إن كده غلط، بس والله غصب عني.
أنا مخنوقة ومحتاجة أبعد. سامحيني إنتي وبابا.
أنا مسجّلة فيديو لحنين، يصبّرها على بعدي.
أنا بحبكم، و هفضل أحبكم حتى بعد الطلاق.
بنتكم... نسمة
تركهم مروان بغضب، وركب سيارته وانطلق بسرعة.
تمتم بحرقة وهو يضغط على عجلة القيادة:
– ياااه يا نسمة... معقول؟
مش قادرة تسامحي في غلطة كانت وقت غضب؟
للدرجة دي أنا مش فارق معاكي؟
مهتمّة بزعل الكل... ما عدا أنا؟
للدرجة دي كنت أعمى... لما افتكرت إني أغلى إنسان عندك؟
********
يتبع
نسمة متمردة
بقلمي أمل مصطفي
البارت ٣٠
**********
وصلت نسمة بعد سفر طويل.
وقفت أمام الباب، وضغطت على الجرس.
فتحت فتاة غاية في الجمال والنعومة، لا تقل عن نسمة في شيء، سوى اختلاف لون عينيها. شهقت الفتاة بفرح، ثم ألقت بنفسها في أحضان نسمة بلهفة:
– مش ممكن! نسمة! حبيبتي! وحشتيني!
بادلتها نسمة لهفتها، يشوبها بعض الحزن، وهي تحتضنها بحب:
– و إنتِ أكتر يا حبيبتي... فين خوخة؟
صاحت الفتاة بحماسة:
– ماما! يا ماما! تعالي شوفي مين عندنا!
خرجت خديجة من الداخل، وما إن رأت نسمة حتى تهللت ملامحها.
قالت نسمة بفرح:
– وحشتيني أوي أوي يا خوخة!
ردّت خديجة بمرح:
– آه يا بكّاشة! بقى كده تروحي وتقولي عدولي؟ مروان خدك مننا!
شعرت نسمة بالحزن يتسلل إلى قلبها عند ذكر اسمه، وقالت بصوت منخفض:
– أبدًا يا قلبي... أنا جاية أقعد معاكي مدة طويلة، بس ياريت... مافيش حد يعرف بوجودي خالص.
ارتفعت نبرة صوت رجولي من الداخل:
– يبقى أكيد فيه كارثة!
التفتت نسمة نحو الصوت، و ابتسمت رغم ألمها:
– إزيك يا بابا...
قال متولي وهو يقترب منها:
– إزيك يا حبيبتي... في إيه؟ وليه مش عايزة حد يعرف؟
ردّت ببكاء وهي تحاول تمالك نفسها:
– ممكن... بلاش أتكلم دلوقتي؟
احتضنها متولي بحنان، وقال:
– براحتك يا حبيبتي... لما تحبي تتكلمي، أنا موجود. بس لأزم تعرفي إن الكلام بيخفف كتير.
قالت بصوت خافت، وهي تشيح بنظرها بعيدًا:
– حاضر يا بابا... بس أرجوك، بلاش أي حد يعرف إني هنا. أنا محتاجة أرتّب أموري... بعيد عن أي ضغط.
********
في غرفة فريدة
قالت فريدة بصوت قلق:
– إيه اللي حصل بينك وبين مروان خلاكي تعملي كده؟
أجابت نسمة وهي تبكي بقهر في حضن فريدة:
– واحشني أوي يا فريدة... يوم واحد بس يعدي من غير ما أشوفه، بموت من الألم.
تنهدت، وواصلت وسط دموعها:
– إنتي عارفة؟ أنا بقالي شهرين بنام مع حنين، بس كنت بشوفه وأسمع صوته... كان بيهون عليّا الفراق. دلوقتي حاسة إن روحي بتتسحب مني. مش مصدقة إني خسرته.
قالت فريدة بحزن واضح:
– أنا مستغربة... إزاي بتعشقيه وكملتي معاه، رغم إنه جرحك لما اعترف بحبه لشاهي؟ والوقت ده... هربتي منه! إيه اللي حصل أكبر من اللي حصل قبل كده؟
صرخت نسمة وهي تبكي بمرارة:
– الكل فاكر إني سبته لأنه حاول يقتلني!
شهقت فريدة بعدم تصديق:
– يقتلك؟!
تنهدت نسمة بتعب وألم، ثم بدأت تقص عليها ما حدث...
لم يستوعب عقل فريدة البريء كل تلك الصدمات. قالت بانكسار:
– كل ده حصلك... وأنا هنا، مش عارفة حاجة؟
أجابت نسمة بصوت خافت:
– أنا مش زعلانة منه... وعذرَاه من أول ما عرفت اللي حصل.
أنا بعدت... لأنه يستاهل واحدة أحسن مني.
بعدت... لأني ماعدتش لائقة عليه بعد ما اتعرّيت قدّام ابن خالته وأصحابه.
هو يستاهل واحدة تكون ملكه هو لوحده... ماحدش شاركه فيها.
ثم أردفت بكلمات موجعة:
– مروان حاجة كبيرة جدًا، وغالية قوي... ويستاهل واحدة غالية زيه.
بعد ما كنت ملكه لوحده... بقى في غيره شاف شعري وجسمي.
كانت فريدة تبكي وهي تردد:
– بس هو بيحبك... وأكيد عارف إن ده غصب عنك.
هتفت نسمة برفض، ونظرتها مكسورة:
– لا! عمره ما هينسى المنظر اللي كنت فيه جنب أيهم.
هتفضل الصورة دي في دماغه مهما حاول ينساها... هتعكر صفو حياتنا.
وأنا مش هتحمل... حتى لو ما اتكلمش، هشوفها في عيونه.
ثم أضافت بصوت متهدج:
– واللي تعبني أكتر... إنه بيعتذر و يتأسف، عشان أسامحه.
فاكر إني متجنباه لأني زعلانة منه!
لو هو تعبان قيراط... أنا تعبانة مليون!
*********
وصل مروان شركته.
قال مروان:
– أحمد، عايزك حالًا في المكتب.
أجاب أحمد:
– حاضر.
وتوجّه معه إلى المكتب.
– خير يا مروان؟
أخرج الظرف من جيبه وقال:
– نسمة هربت... و سابتلك ده.
اتسعت عيناه وهتف بذهول:
– هربت؟!
لم يتوقع أن تفعلها يومًا.
ماذا حدث لأخته الصغيرة؟ كيف تغيّرت هكذا؟
هو لم يوافقها على الطلاق خوفًا عليها من عذاب الفراق، و أيضًا لأنه يعذر مروان في رد فعله.
أفاق على صوت مروان الحزين:
– تفتكر ممكن تروح فين؟ لأنها مرجعتش البيت عندكم، وإلا مش هتسيب جواب ليكم.
فتح أحمد الجواب، وقرأ محتواه، ثم أغلقه قائلًا:
– إزاي فاكرة إني مش حاسس بيها... وفاهم بتفكر إزاي؟
وجّه كلامه لمروان:
– بص يا مروان، سيبها لحد ما تهدأ... ونعرف هي فين، وعملت كده ليه.
قال مروان بغضب:
– أسيبها شوية؟! بقالها شهرين مش بتتكلم معايا غير في وجود حد منكم، وبتنام مع حنين! كل ده مش وقت كافي عشان تهدأ؟!
– صدقني، هي بتعمل كل ده عشانك.
صرخ مروان بجنون:
– عشاني؟ بتجرحني وبتعذبني عشاني؟ دي نكتة دي!
قال أحمد برويّة:
– لا يا مروان، نسمة أختي وأنا فاهمها أكتر من نفسها.
هي بتتعذّب زيّك.
نسمة شايفة إنها مش لايقة عليك، وإنك عمرك ما هتنسى شكلها مع أيهم.
صدقني، أختي بتعشقك، ومش سهل عليها الفراق.
هي بتموت أكتر منك... أنا حاسس بيها وفاهمها.
هي فاكراك واقف في صفك عشانك، ومش حاسس بيها.
الغبية مش عارفة إن وقوفي في صفك... عشانها.
لأني عارف إن بعدها عنك... موت.
وده السبب اللي خلاني أرفض الطلاق... عشان أحميها من نار الفراق اللي مش هتقدر عليه.
********
بعد مرور شهر آخر...
ظل متولي وخالد على تواصل مستمر من خلف نسمة، دون علمها.
متولي، كرجل عاقل، وجد موقف مروان طبيعيًا ويستحق العذر، لكنه لم يجد أي مبرر لتصرف نسمة وهروبها.
لذلك، قرر التحدث معها ليُوضح لها أنها على خطأ.
توجه إلى غرفتها وطرق الباب، ثم دخل بعد أن أذنت له.
جلس بجوارها، ونظر إليها بعتاب وقال:
– وبعدين معاكي يا نسمة؟
جوزك بيعشقك، وقالب الدنيا عليكي، وزعلان مع أحمد و أبوكِ، ومصمم إنك متفقة معاهم وهما مش عايزين يدلوه عليكي؟!
وأضاف:
– وأحمد... كلّمني، وأنا كذبت عليه.
أنتِ كده معذبة الكل معاكي.
ردّت نسمة ببرود يخفي ألمها:
– متقلقش... بكرة ينساني.
وبابا وأحمد أكيد مطمئنين، أنا كلّمت ماما أكتر من مرة.
ردّ متولي، وعيناه تراقبان ملامحها المنكسرة:
– أوعي تكوني فاكرة إني مش بسمع عياطك كل يوم...
ولا الأغاني اللي بتسمعيها، وهي بتعبر عن اشتياقك ليه.
هو سامحك... ليه إنتِ مش عايزة تسامحي نفسك وتنسي؟
*******
وصل مروان إلى منزل حماه، وضغط على الجرس.
فتحت له هيام، التي قابلته بحب وفرحة، فهي تعتبره كأحمد تمامًا.
قالت بابتسامة دافئة:
– تعال يا حبيبي، أخبارك إيه؟
أجابها مروان بلطف:
– أنا الحمد لله بخير، أخبارك إنتِ؟
– أنا بخير طول ما أنت بخير.
خرج خالد يستقبله، ولاحظ على وجه مروان علامات التعب و الإرهاق.
تحدث مروان دون مقدمات، بصوت حازم:
– لو سمحت يا عمي، أنا عايز أعرف مكان نسمة... كفاية لحد كده.
أكيد حضرتك عارف مكانها، أصل مش معقول بنتك تغيب شهر، وتكون هادي كده!
قال خالد، وهو يشعر بضيق من تصرف ابنته لأول مرة:
– عارف يا مروان... بس اللي كلّمني أكّد عليا ماحدش يعرف.
قاطعه مروان بعصبية متألمة:
– أنا مش "حد"، أنا جوزها يا عمي... ولا حضرتك نسيت؟
أنا محتاج أرجّعها لحضني، الهروب مش حل.
أنا محتاج مراتي!
رد خالد بأسف صادق:
– آسف يا بني... إنت عارف معزتك في قلبي.
غصب عني، خايف لما تعرف إنك عرفت، تسيب المكان وتروح مكان تاني ما نعرفوش.
وقف مروان، وقال بضيق:
– أنا هعرف... بعد إذنك.
وفي طريقه للخروج، قابلته هيام وهي تحمل العصير، وقد قرأت الحزن والضيق في ملامحه.
قالت:
– رايح فين يا مروان؟
ردّ وهو يختنق بالكلمات:
– ماشي... وجودي مالوش لازمة.
قالت بعتاب:
– كنت هتمشي من غير ما تسلم عليّ؟
تمتم معتذرًا:
– آسف يا ست الكل.
مدّت يدها تسلّم عليه، مد يده، لكنه شعر بشيء بينها...
نظرتها أكدت له ما كان يفكر به.
احتضنها مروان بصمت، ثم نزل بسرعة.
دخلت هيام إلى زوجها، وجدته يضع رأسه بين يديه، يغرق في حزنه.
اقتربت منه، ووضعت يدها فوق يده، وقالت:
– وعسى أن تكرهوا شيئًا وهو خيرٌ لكم.
تنهد خالد بألم:
– ما كنتش أتخيل في يوم إن بنتي العاقلة... تحطنا في موقف زي ده.
واحد تاني كان طلقها بعد ما هربت و فضحته بالشكل ده.
احتضنته هيام وقالت بلطف:
– بكرة ربنا يهديهم... و يرجعوا لبعض. بس قول يا رب.
*********
تحدث سيف بحزن عن صديقه:
– ماكنتش أصدق إن واحدة تعذب مروان كده... وتكسر نفسه.
إنتِ عارفة؟ كانت الستات بتجري وراه، وهو ماكانش بيهتم.
دائما فريد كان بيتضايق ويغير منه ويقول
– فيك إيه زيادة عني؟!
المال، والصحة، و العيلة... كلهم موجودين، وبرغم كده بيختاروك إنت.
دلوقتي لما ببص عليه، بشوفه تايه... حزين... حاسس إن خاطره مكسور.
ردّت شيرين بحزن:
– ربنا ينتقم منها اللي خربت بيتهم.
كنا دايمًا شايفين كرهها وغيرتها من نسمة من غير أي سبب،
بس ماكنتش أتخيل إنها غبية للدرجة دي.
قال سيف باحتقار:
– ليه حقارتها باينة من زمان...
فاكرة لما جيت لك الكلية عشان افتح معاكي موضوع الخطوبة؟ قالت إيه؟!
فلاش باك
وقف سيف أمام كلية "شرين"، مستندًا على سيارته الفاخرة، و بشكله الوسيم اللافت، ينتظر خروجها.
لقد عزم على امتلاكها... وانتهى الأمر في رأسه.
كان يتخيل رد فعلها عندما تراه... حين سمع صوتًا خلفه يقول بدلال:
– إيه ده! باشمهندس سيف! وأنا بقول اليوم ده ليه طعم جميل.
التفت سيف نحو صاحبة الصوت، وقال بفتور:
– أهلاً... هو حضرتك تعرفيني؟
قالت نانسي، بدلال ونعومة متعمدة:
– أوعى تقول إنك نسيتني؟! لا، أنا كده أزعل!
تحدث بضيق حاول إخفاءه:
– أبدًا... بس أنا مش مركز.
– أنا صاحبة نسمة... شوفتك عندها.
هتف كأنه تذكّر:
– آه، لما جيتي مع شرين.
نظرت إليه نانسي بضيق مصطنع:
– بقي فاكر شرين و ناسيني أنا؟!
ده أنا الكل بيقول عليّ من الوجوه الجميلة اللي مش ممكن تتنسي!
في تلك اللحظة، كانت شرين تعبر بوابة الكلية، لتراه واقفًا أمام سيارته، يتحدث مبتسمًا مع نانسي.
شعرت بطعنة حزن وألم يخترق قلبها.
حدثت نفسها بمرارة:
وأنتِ كنتِ منتظرة إيه؟...
إنه يشوفك مثلًا؟ أو ينسى إنك مجرد واحدة فقيرة صاحبه، بيعطف عليها؟
لا... فقيرة إيه؟! إنتِ تحت الفقر بمراحل.
فوقي يا شرين... الناس دي بتدور على بنات من مستواهم، ملفتين، يتمنظروا بيهم.
فاقت من شرودها على صوته يناديها...
********
هناك عند سيف كاد يرد على نانسي، لكن عيونه علِقت بمن ملكت قلبه بجمالها الهادئ و حيائها الرقيق.
ترك الفتاة الواقفة أمامه، و نداءه خرج سريعًا:
– آنسة شرين! يا آنسة شرين، استني!
باسنت، وقد لاحظت توتر صديقتها، سألتها بفضول:
– مين اللي بينادي عليكي يا شرين؟
ردّت شرين بتوتر و إحراج:
– ده... بشمهندس سيف.
قالت باسنت بدهشة:
– طب مش هتردي عليه؟ ده جاي علينا!
ردّت شرين بعصبية مفاجئة:
– و إحنا من إمتى بنكلم شباب؟!
اقترب سيف منها، وقال بنبرة مباشرة:
– آنسة شرين، أنا بنادي عليكي.
أجابته بجفاء واضح:
– آسفة، أنا مش بكلم شباب.
وحضرتك بتنادي عليّ في الطريق و قدّام كليتي!
ده هيدي فرصة للناس يتكلموا عليا.
قال سيف بغضب مكبوت:
– مين ده اللي يقدر يجيب سيرتك بكلمة؟
ده أنا آخد روحه بإيدي!
شعرت بسعادة داخليّة، لكنها أخفتها وقالت ببرود:
– خير، حضرتك عايز إيه؟
– كنت عايز أتكلم معاكي في حاجة... خاصة.
جاء صوت نانسي من خلفه، يحمل في نبرته حقدًا:
– ويا ترى... الموضوع إيه؟!
ردّ سيف بحدة وهو يلتفت نحوها:
– أظنّك سمعتي... إنه "خاص".
قالت نانسي بتهكُّم:
– و إيه اللي يخلي بينك وبينها حاجة خاصة؟
ياما تحت الساهي دواهي!
شرين، وقد تجمعت الدموع في عينيها، شعرت بالقهر.
لقد أعطاها الفرصة، تلك الحقيرة، لتشوّه سمعتها،
وتتحدث عنها بالباطل، وتجعلها حديث الجامعة...
قال سيف بانفعال:
– احترمي نفسك، و اعرفي بتتكلمي إزاي!
أصل ردّ فعلي مش هيعجبك أبدًا!
استعدت شرين للابتعاد، لكن سيف أوقفها بنبرة راجية:
– استني... يا شرين!
قالت شرين، والدموع تغالب صوتها:
– عايز إيه تاني؟ أنا فقيرة، آه...
بس شرفي و سمعتي هما كل ثروتي.
ومش من النوع اللي ممكن يعمل حاجة تغضب ربنا!
ردّ سيف بهدوء وهو يُخرج هاتفه، ويتصل برقم ما، ثم قام بتشغيل مكبر الصوت:
– ماما، كلمي شرين لو سمحتي؟
نظرت إليه شرين بعدم فهم، ثم أمسكت الهاتف وقالت باختناق:
– ألو؟
جاءها صوت والدته:
– كنت عارفة إنك مش هتوافقي تتكلمي معاه...
بس هو جالي وطلب إيدك، وأنا وافقت.
وطلب تخرجي معاه تتفاهموا براحتكم، وأنا كمان موافقة.
سيف شاب كويس ومحترم، وأنا حبيته.
وعلى فكرة، دي مش أول مرة يطلبك فيها،
بس أنا اللي قلت له يستنى لما تخلصي امتحاناتك.
اتفاهموا... وأنا معاكم.
يلا، مع السلامة، و هستناكم على الغدا.
رد سيف بابتسامة قبل أن يغلق الهاتف و يعيد إلى جيبه:
– حاضر يا ماما، مش هنتأخر عليكي.
ثم التفت إلى نانسي وقال بحزم:
– آنسة شرين خطيبتي.
واللي يفكر يمسّها، هكون في وشه...
وأتمنى ما تشوفيش غضبي.
قامت باسنت ونهى باحتضان شرين و تهنئتها بفرح
، أما هي، فكانت لا تزال في حالة ذهول، غير مصدقة ما يحدث، وكأنها في حلم لا تريد الاستيقاظ منه.
– يلا يا شرين.
ودعت صديقاتها، وركبت السيارة بخجل، وجلست في المقعد الخلفي.
سيف نظر لها في المرآة وقال:
– تعالي قدام، يا شرين... أنا مش بأعضّ.
ردت بخجل:
– أنا كده هكون مرتاحة أكتر.
– خلاص... براحتك.
وصلا إلى مقهى هادئ، و جلسا معًا.
– تشربي إيه؟ – سألها.
– لا، شكرًا.
– يا بنتي، بلاش تتعبيني، الله يخليكي.
– كابتشينو... فانيليا.
طلب سيف:
– اتنين كابتشينو فانيليا، لو سمحت.
ثم نظر إليها بجدية وقال:
– بصي يا شرين، أنا ماليش في اللف والدوران.
أنا معجب بيكي، ولقيت فيكي الزوجة والحبيبة اللي بتمناها.
وعايز أكمل حياتي معاكي.
تنهد قليلًا ثم أضاف:
– أنا ماليش غير أخ واحد، عايش في ألمانيا...
وعم واحد هو اللي رباني بعد أهلي.
كنت عايش معاه هو ومراته لحد ما ربنا افتكرها.
– إيه رأيك؟
نظرت إليه شرين بصمت، ثم قالت بهدوء وحسم:
– كل الكلام ده جميل...
بس أنا مش موافقة.
*********
يتبع
تكملة الرواية من هناااااااا
لمتابعة باقي الروايه زورو قناتنا علي التليجرام من هناااااااااا
بدل ماتدور وتبحث علي الروايات عمل
متابعه لصفحتنا على فيس بوك هنااااااااااا
الرواية كامله من هناااااااااا
مجمع الروايات الكامله 1اضغط هناااااااا
مجمع الروايات الكاملة 2 اضغط هنااااااا
تعليقات
إرسال تعليق
فضلا اترك تعليق من هنا