رواية عاجر الفصل الخامس والثلاثون والسادس والثلاثون بقلــم الكاتبـــة زينب ماجد (حصريه في مدونة قصر الروايات)

رواية عاجر الفصل الخامس والثلاثون والسادس والثلاثون بقلــم الكاتبـــة زينب ماجد  (حصريه في مدونة قصر الروايات)

رواية عاجر الفصل الخامس والثلاثون والسادس والثلاثون بقلــم الكاتبـــة زينب ماجد  (حصريه في مدونة قصر الروايات)

#عاجر 

{ بقلم الكاتبة زينب ماجد } 

الحلقة_٣٥ و ٣٦ 

اجا : ها ها خير 

حجيت واني اتعداه : بالله خوية فكي عني 

طلع حازم وراي بدون حجي كض ايدي : وخر مني 

- ششش بدون صوت صعدي بالسيارة 

- ما اريد وخر مني 

- كتلج صعدي 

بشار : خير صاير شي 

- كلشي ماكو هالمرة هواي تحب تدلل .. اصعدي 

حازم سواها بضحك كدامه وبشار يضاحكه .. صعدني بالسيارة روحي مشتاطة لو بيدي اكضه اكله بسنوني 

صعد بالسيارة مشى لمضمد .. كالي : انزلي 

- حركها مو هواي .. ما اريد 

- ميخالف يعقمها الج ويداويها 

- ما اريد .. ولا تحاجيني ولا تسمعني حتى صوتك ما طايقتك ما طايقة عيشتك كلها .. طكت روحي منك .. خليت اخوي يرجعني غصب حتى تهينييييي حتى تسحكرني وتستصغرني كدام مرتك 

- انت ليش كله ابالج اني رايد اهينج اني رايد العب عليج اني رايد استغلج هالسوالف هاي منو اليحطها ابالج لج بابا اني رجلج مو عدوج 

- العدو ارحم منك 

- لااا وشسويتلج حتى العدو ارحم مني طكيتج لو شسويتلج 

- لا وين طكيتني حشاك انت تسويها 

- اذا هذا الراشدي حاسبته طك تجاوزج شيسمونه ؟ 

- بيش اتجاوزت جيت يمك حاجيتك انت الاجيت عليه 

- غير لبسج تلبسين للركبة وجهالي موجودين 

- واني شنو ذنبي انحكم بجهالك .. عدي بيت بالشماعية وعوفني اخذ راحتي البس اليعجبني اكل اليعجبني حاكمني بيهم ومكعدني غصب كدامهم على يا مال 

- هذا حجي سهى 

- انت كل ما تصير حجاية لو مشكلة تصيح سهى كلمن عدوه كبال عيني ولو هي ما حاجية بس صدك ما تحجي غلط كالتلي اتفلي بكصتي لو عقدلج ولو طلك امل صدك .. وحجيها صدك لا ضليت مطلك ولا عقدتلي 

- اني ما عاقد .. اي هاج اسمعي 

جر التليفون وخابر:  الو 

هلا استاذ وليد شلونك يابه .. الحمدلله نسال عنك 

اكلك استاذ بس ردت اتذكر منك الموعد 

.. فتح سبيكر ... اي مال العقد شوكت 

رد : يوم ١٧ بالشهر 

- ها رحم والديك 

- ليش اكو شي 

- لا بس حتى احسب حسابي على هالموعد مشكور يابه زاحمناك 

- لا كل الهلا بيك  يابه 

- الله يسلمك الله يحفظك 

سداه : ها وهسه ياهو الموعده يوم ١٧ 

انت حاسبة المحكمة مالتي مالت الخلفوني .. غير يطوني يوم احضر بيه واعقد 

ما جاوبته ولا رديت عليه .. حجه : دنزلي يلا خلي يداوي ايدج 

فتحت باب السيارة ونزلت مشيت كباله .. 

وهو نزل وراي مشى .. دخلت هو حجاله للمضمد طاح جاي على ايدي كاله : سهلة بس تحط من هذا المرهم 

حطلياه ولفاها اليه .. 

واندار يرجع .. كتله : لا تعتقد بضماد ارجع ما اريد 

- صبا وتالي 

- التالي يمك 

- ما طولج معاندة وتتامرين ما اسوي شي وحق هو العباس مو خادمج اني ولا مأمور عدج اخذتيني وانا هاذ حالي من اول ما اتزوجتج كتلج يا بت الناس اني عدي مرة الي منها جهال ومتحملها لخاطر جهالي عدي منها بنية مراهقة وولد اثنين ينرادلهم متابعة اذا ما اريدها الروحي اريدها الهم واريدج تجين يمي بالبيت ومننوع اكعد ابيت الشماعية وما ارضى ذني كلهن حطيتهن كبالج من كبل لا نتزوج صحيح لو لا ؟ 

- يعني مختصر الكلام ما تعزلي 

- اذا مشيتي عدل و عفتي اسلوبج هذا احتمال اسويلج الشي اليريحج بس ما طولج راكبة راسج علي .. لا والله .. 

- لا مو هيج .. انت شفت امل عافت الشغل ورجعت كابلتك وكابلت جهالك .. فاتندمت اتزوجتني ورايد تطفرني لا عيني اني من يمي احس على روحي واطلع ما طول خلصت حاجتي وما عدت اهمك وافيدك انسحب من حياتك واخذ راحتك ويا عائلتك 

- كملتي ؟ 

- وديني لبيت الشماعية 

- الله يقصر شعشوع هذا ششالع كلبي 

فر السيارة ومشى بيها وصفها كبال باب بيته .. 

باوعلي وهو يطفي السيارة ويسحب السويج وينزل ويسد الباب وراه .. 

تنهدت وفتحت الباب ونزلت .. وراه 

ومشيت دخلت لغرفتي وقفلت الباب .. اجا فتح الباب مقفول دكاه .. ما جاوبته .. لفيت راسي ونمت .. 

لليل يلا كعدت على صوت الباب يندك

كمت فتحت الباب علي يكلي : اكو مرة جاية عليج تريدج 

- ابوك وينه ؟ 

- طالع للمحل 

هزيت راسي جريت الشال ومشيت 

وحدة من جيرانهم كالت : شلونج خية 

- هلا بيج عيوني تفضلي 

- لا يزيد فضلج والله دزوني عليج كالوا خياطج زين واني عدي قطعة واريدج تخيطيلياها خوش خياط عدي عرس اخوي ورجلي ما يرضى البس البنطرون و هاي الملابس الحلوة واريدلي خياط زين وكالوا عليج خياطج يخبل 

- كل الهلا بس ليش ع الباب فوتي 

- ماكو احد 

- ماكو احد فوتي خية فوتي 

رادت تنزع من رجلها 

كتلها : فوتي خية مكرمة 

ومشيت كدامها ورحت لغرفتي 

كامت تصلي ع النبي .. وحجت : هسه هذا ثوبج انت مخيطته ؟ 

- كل الالبسه من خياطي ما ارتاح بالجاهز ولا بخياط غيري 

- بس يخبل ولو القالب غالب انت حلوة 

ابتسمت : عيونج الحلوة احبيبة وين القطعة

طلعتلياها .. شفتها قطعة مشجرة 

كتلها : لو سادة جان خيطتها الج احلى المشجر ما يطلع حلو وانت عدج مناسبة 

- اشتريلج يعني قطعة سادة 

- عدي قطعة سادة 

فتحت الكنتور واني اطلع الها القطعة كالت : فرشة الجرباية مالتج حاضر لو خياط 

- لا خياطي  حتى البردة خياطي 

- بس يخبلن عليج الله ما تخيطيلي مثلهن كون نفس اللون ونفس الخياط وشكد ما يصير سعرهن اطيجياهن 

- اذا تريدين اخذيهن ما صالي هواي من خيطتهن هاي اول مرة اعلك البردة وافرش الجرباية  بس اذا تريدين خضيهن خاف تكشين 

- لا يا اكش شني خية يهودية واكش منج شكثر تحسبيهن الي 

- اثنينهن ٥٠ 

- لا هواي .. عليج العباس نزليلي شوية 

ابتسمت : دخذيهن وعود دزيلي فلوسهن ويا فلوس القطعة من اكملها .. 

- يصير دفعات هسه اطيج ٢٥ واسبوع واطيج ٢٥ اني رجلي يشتغل يومي واخذ منه كل يوم خمسة واجمع فهل اجمعلجياهن وادزلج 

- سهلة بعيني 

كاعد احجي .. وسمعت صوت حازم برا اجا 

كامت : يا خية ابوكم اجا انا اكومن 

- ضلي اشوفج التصاوير يا موديل يعجبج 

كمت اشوفها اختارت فصال .. وع القطعة .. 

كتلها ويا القطعة يصير ٢٠ 

كالت وعلي هواي نزلي بعد 

كتلها ما يطلعلي بيه ربح والله لان الفصال المختارته لازم اتسوكلا كوم غراض يلا اكدر اسوي يكلف .. صارن كلهن .. ٦٥ الف .. 

كالت بحيل الله اناوشج على كيفي ميخالف 

كتلها : على راحتج شوكت ما يصير عدج ناوشي عسى ما خمسة خمسة 

كامت بوستني منا ومنا من كتلها هيج 

اخذت قياسها وحطت بيدي ٢٥ وطلعت .. اجا حازم فات للغرفة باوع اني اكلب بالقطعة .. حجه : شعدها المرة شرايدة 

انداريت للمجر سحبت المكص .. 

حجه : ليش ما تجاوبين هاي مو قلة احترام 

- لما تحترمني وتحسبني بشر بهالبيت وكتها طالبني احترم 

- يعني قصدج ما تحترمين 

- فاقد الشي ما ينطي 

حجيتها واني اعدل الثوب .. اتقرب مني فزيت حسبالي راح يضربني صاح : اسم الله شبيج بس احط السويج 

ام السان ما فالحه غير بالسانها وهي من الخيال تفز 

- وانت ليش تفززني 

- واني يمج جاي احط السويج ع الميز 

الجرباية ليش ما بيها فراش البردة وين 

- بعتهن 

- شنووو ؟ تبيعين فراشنا ليش 

- البارحة فرشته وانعجبت بيه كمت بعته 

- شني محتاجة وكمتي تبيعين فراشاتنا 

- عاجبني .. واحسب احسابك باجر اريد اروح للسوك اشتري غراض للقطعة 

- واني على يابو علي انهي ذيج وكعدتها من الشغل اتطلعيلي انت 

- اطلعلك اني شنو .. بدال ما مكابلة التلفزيون واكلب ليل نهار لا شغلة ولا عملة اشتغل بيش ضارك طالعة وعايفة البيت لو عندي جهال وذابتهم وملتهية بشغل حاطني وتقارني بذيج واني لا داده ولا ماما .. ما ضارة احد بشغلي الهي روحي واني بغرفتي ما من حقك تمنعني 

- هلا لا يابه مو حقي وين عمي اني اكدرلج اكدر للسانج .. الا مسودن 

- اي خطية ما تكدرلي .. ما حاطني هنا غصبا عني مخليني مكابلة شعيط ومعيط 

- ظالمج كاتلج الظلم .. كاطع المصرف عنج وحال الضيم يا حالج مطلعج تشتغلين بالظهرية الحمرة وماخذ فلوس شغلج .. ما جنج صايرة بعرض الباب اكل ونوم وما مطالبج ولا غاصبج غير تكعدين كبال عيني بس !

- تعيرني اكل ونوم وعود ارتاحيت بجالك 

- لا اعيرج شني لا خلفة الله علي واجبي بس حطي الله بين عيونج من تسويني ظالمج 

- اريد تعزلي بغير هالحجي ظالمني 

- كاتلجن العزال تعزلي لو تحطها فوك المريخ وتطها مترة هم ترضى المهم تعزل 

- مترة وبيها راحة بال جنة .. ومن حقي ما طالب اكثر من حقي 

- من تكصين السانج وتهدين عود وكتها احجي وتأمرين 

- هسه معليه اني باجر اريد اروح للسوك 

- ويامن 

- جاهل اني ويامن وحدي 

- ممنوع 

- محتاجة غراض اجيب للخياط 

- اي مو وحدج هسه صالج ساعة تلبكين وتكولين اشتغل بالبيت وصميت حلكي عمي ما حجيت اتلهي بس مال روحة رجعة وحدج كل شوية ممنوع 

- اكلك شنو اغو اني ترا كبل لا اخذك فارة عكا ومكا لوحدي لحد ما عباتي يبست من الشمس جاي هسه تخاف عليه من الشارع ولازم واحد وياي شني جاهل 

- زمان اول انسي اليوم احنا ولد اليوم وطلعة لوحدج ممنوع 

- اي كوم روح وياي 

- اني عندي دوام 

- وشلون 

- نخبط معجون 

- يا فدوة شكد تضحك 

هزيت ايدي ابتسم : اخذي امي 

- امك ساعة يحتاجلها يلا تشيل سيارتها من الكاع وتفحط وتدورها يمنا يسرة يلا تستعدد وتكوم تريد المرة تحتار بيه بالسوك وهي مريضة 

- اخذي علي 

-مو عده مدرسة 

- كولي اريد اروح وحدي 

- اي اريد اروح وحدي شني مو جاهل اني الا تحط وياي رفيج يلا امشي .. كل فترة احتاج اروح سوك شني اكعد اتوسل بهذا وذاك فدوة منو يروح وياي ..

- بيش الساعة تطلعين 

- ٩ 

- ب٨ خاطر اوصلج

سكتت حجه بتسال : ماشي 

-عود اشوف اذا كعدت ب٨ 

- المهم ما تكلي ماشي وتامر الا تيبس خشمها ام راس 

- اي طبعا لان ما تعزلي 

- يا طلابة الكشرة 

كام وطلع من الغرفة .. 

كصصت القماش وكملته وصفطته كلت اجيب باجر غراضه حتى اخيطه .. كمت طلعت فراش وفرشت الي دوشك بالكاع واخذت بطانية ونمت .. 

طب للغرفة باوع : شنو هاي جديدة تنامين بالكاع ؟ 

- منا لما تعزلي لوحدي هيج الحال يضل 

- لااا 

- هذا الموجود مو جايبني غصب ... تلكاها 

- خوش 

عاف الغرفة ومشى .. اني مندارة ومتغطية 

رجعت ظهري ونزلت الغطا تنهدت .. ما ادري يمكن طوختها بس لعبانة نفسي جابني هنا غصب عني وروحي ما متقبلة الكعدة والله يريدني اطخ واتوسله ليش بشنو غلطت اني حتى اطخ ما علطت ويا احد هم الغلطوا وياي وفوكاها اني الموزينة ولازم اقدمله فروض الطاعة حتى يرضى عني ويسويلي الاريده .. اي عساه لا سوا .. 

انداريت واطيت وجهي للجرباية 

بس شمستفادة نايمة بصف الخشبة وهو صعد لضرتي ! 

اني ازعل وهي تستفاد !؟ 

رجعت ظهري للكاع وباوعت بالسكف ... 

وهو ما عول اني اني انداريت عنه راح يركض لذيج 

اني هم غبية .. رحت ورطت روحي وخذيتلي واحد بركبته كوم جهال ومرة .. عود كلت محتاجني وراح يراعيني .. هاي عافت الشغل ورجعت كابلته وخلصت شغلتي .. ورجعلها مثل الورد 

معقولة كام ما يحبني 

هو متغير هواي وياي من رحت لبيت الشماعية لا خابر ولا تفقدني ابن عمه الجان يتفقدني وهو ولا جنه .. بس خاف هو الجان يدز ابن عمه حتى لا يطخ 

لا هو متغير وياي حيل مو حازم الاولي الجان هايم بيه واشريد يكلي تامرين هسه يريد يذلني يلا يسويلي السالفة 

ما انذل لو مو يروحلها لو يطلكني .. 

يريد يطلك خل يطلك ما ارجع وياه عدل الا يعزلي فلا اتنازل ولا اطخ .. يدلل 

جريت الغطا  فوك راسي وانداريت 

بس ما جاني نوم .. رجعت اباوع بالسكف 

ايع هسه هو وياها نايمين فوكاي بالطابق الفوك !؟ 

شهالعيشة ايه اني بعد ما اتحمل اتراجعت ما اريد خل يطلكني ارجع لايام الفكر ولا هالمحركة وحركان الدم ما اتحمل .. 

كمت من مكاني 

هالحسبات ذني مو مال دوشك و بطانية 

مال قوري جاي واعدل راسي ذبحني من التفكير 

كمت للباب فتحته حتى اروح للمطبخ 

جان تصد عيني للاستقبال .. شفته امدد 

تقدمت لكيته مطفي ضوا الاستقبال ومتمدد ع التخم ولازم الريموت يباوع ونايم بلا ما يدري بروحه 

تنهدت .. وذبيت حسرة واني اباوعه .. 

رحت لغرفتي اخذت الغطا والمخدة .. ومشيتلا .. 

دنكت عليه دا ارفع راسه من التخم حتى احط المخده .. حس ومد اديه وهو يمط روحه ويحضني ويحاوطني باديه ويشم بركبتي ويكلي : يابووووية شكد مشتاقلج وعلي

- دشيل راسك 

- مو على اساس مزاعلتني وما تريديني 

- مو الك هاي لله واجب الزوجة خاف بعد يومين الله يحاسبني يكلي شفتي بلا مخدا وغطا وعفتي .. واني اخاف الله 

- جا خافي الله بيه وتعاي نامي يمي 

- شكرا 

غطيته وسحبت روحي هو ما كال لا جر الغطا ورد كمل نومته بعدها النومة بعيونه .. مشيت للمطبخ لكيت امل موجودة .. ما درتلها بال سحبت القوري .. 

حجت : رايدة عزال عيني .. ما مكفيتج الغرفة تريدين نص البيت ؟ 

مجاوبتها 

حجت : والله خوش الاجا من تالي عكباك بت الفكر الحانت كاعدة بصريفة داك رجلها تريد نص البيت تعال اقسم بيتي واكسر جهالي بنص بيت حتى هي تاخذ نصه لوحدها . 

- ما جابرته كتله كعدتي ببيتي ما رضى هو الجايبها لروحه 

- اشايفه علينا نفسج ابيت سحاله .. الطليان ما تكعد بيه مو عاد بشر 

- والله عاد سحالة اني راضية المهم ما اكابل الشكول الزفرة وراسي مرتاح هاي كافي 

- من همه الشكول الزفرة 

- يعرفون نفسهم ما يحتاج اسمي 

- ماكو زفر غيرج من يوم ما دخلتي بيتي هجمتي يهجامة البيوت 

- انت اللي خطبتيني اله قبل لا هو يخطبني بس من شفتي خطبني عن حب اشتعلتي 

- حسبالي خوش بنية بس طلعتي وحدة حية 

- ما نشرتج ولا شهرت بيج ولا فضحتج ولا اذيتج بيوم حتى اني الحية بس دائما البعير ما يحس بحدبته 

- احترمي روحج لا وحق الحسين اكضج انتفنج نتف بكدج اني وتغلطين 

تجاهلتها صبيت جاي وطلعت .. طبيت لغرفتي شربت الجاي واني اصفن .. كملته وطلعت امل ماكو صاعدة وحازم بعده بمكانه نايم .. تنهدت وتقربت من الباب انتجيت عليه اباوعله .. 

شكد فاشلة اني .. كاتلة روحي طلكني وطلكني .. 

واني من اشوف وجهه روحي ترد وحرام ما اكدر بلياه .. 

مو حاجة بس روحي تحبه .. من اشوفه جني شايفة الدنيا كلها كبالي .. شكد مشتاقتله . 

رحت غسلت كلاصي والقوري وغسلت استاني ومشيت نمت .. 

للصبح كعداني حتى ياخذني وياه للسوك 

وصلني لراس السوك وكال : من ترجعين خابريني عود كليلي رجعت 

واطاني ٥٠ الف 

مصرفج هذا .. 

كتله : صدك ذكرتني بالمصرف هاي ٢٥ الف جابلياها بشار من جنت بالبيت 

- مال شنو 

- اتسوكلي وجابلي فلوس كال هاي الج 

- اني وصيته يوصلج مسواك بس فلوس ما منطي 

- شمدريني اني قبلت المسواك بس الفلوس كتله ما اريدهن ما محتاجة .. وهو حتى ما كالي المسواك منك 

- اني كتله ذبهن بالباب وارجع .. هسه اطينياهن وانزلي ولا تنسين خابريني من ترجعين 

نزلت ورحت للسوك جبت غراض للخياط و جبت تور وقماش مال بردة و جبت قماش مال جرجف .. واخذت حجابات ومكياج الي وشحاطة جديدة ورجعت .. 

دزيتله رساله ( رجعت ) 

ما جاوب ولا خابر .. 

اعتزلت البيت لا اطلع اكعد وياهم ولا اكل من جدرهم ولا اختلط 

كل وكتي بغرفتي .. كاعدة ع المكينة واخيط لو من اتعب اتمدد ع الجرباية واتباع تلفزيون .. ومن اجوع اطلع اكصص بيتنجانة واكليها واخدر وياها جاي لو بتيته لو جبن وهيج مخلصتها خفايف .. 

حازم رغم يسولف وياي ويحجي 

بس اني دايرة عني .. واني نفسي ما ادري ليش احس حاقدة عليه لين رجعني غصب و ما عزلني وعايفني محبوسة بغرفتي حتى لا اكابل مرتة وبته . 

بيت نعمة دزوا خبر ماخذين كوستر للامام ومسوينها عائلية ويلمون ع الروس .. حازم كال : اني ما اروح انتم روحوا 

حط اسامينا اني و بته ومرته وعلي وسجاد .. ودفع فلوس مقاعدنا بالكوستر .. الزيارة كربلاء نجف .. نطلع منا بـ٣ بالليل بوجهنا للنجف نزور الامير والكبور ونتوجه لكربلاء نزور الامام الحسين ونرجع ... كلت فرصة ازور بيها اعل البيت كلبي طاك على زيارتهم . 

حضرت ملابسي وعبايتي .. وكلت اناملي شوية ب٢ ونص موقته التليفون اسبح بساع والبس واطلع .. الكوستر يم بيت عمه نعمة 

كعدني حازم ب٢ كبل المنبه 

كال : مو تروحين وياهم يلا اكعدي هم يلا تحضرين روحج وتمشين 

مطيت جسمي .. 

وكمت دخلت للحمام وطلعت بس محد منهم كاعد بس اني 

كتله : شني جا امل ما تروح 

- راسها ماذيها تكول ما بيه حيل بس دنيا تروح وياج والولد نامو علي ما يقبل يكعد نعسان 

- وفلوس المقاعد الاطيتها غير حجزت النا خمس مقاعد 

- هسه فدوة عود اخذو راحتكم بيهن .. بس ديري بالج على دنيا لا تخلينها تغيب من عينج ايدج بيدها ولو مالت عنج شوية خابريني وبلغيني مفهووووم دنيا 

- ما افاركها بابا والله كله وياها 

- لا تحملني مسؤلية بتك .. اني ما اكدر اتحمل 

- ما اتعبج والله ما اسوي اي شي شتكولين اكلج حاضر 

- ميخالف ديري بالج عليها 

- راح ادير بالي بس شيصير اني مو مسؤلة 

مو مثل اول من درت بالي وخفت عليها تالي طلعت اني المو خوش واني المتهومة 

خزرني : لا تعييدين هالسوالف هي فهمت الدرس واني كتلها لو رجعت وعادت لا احط راسها واكصه .. امشي 

سكتت هي .. 

اخذتها وطلعت .. حازم طلع ورانا يوصلنا 

جانت دنيا ليل وباردة دنيا ختلت بيها وهي تكول : يممممه اشه باردة 

كتلها : لو لابستلج شي ثخين خاف تتمرضين 

- شمدريني هيج بارده 

لكينا بشار واكف بالكوستر ويكعد بيهن .. 

حجه حازم اصعدن .. صعدت دنيا كبالي كاللها : هناك كعدي يم حوراء بت خالج 

مشت كعدت يمها اندارلي : حجزتلج اول كرسي شتريدين بعد 

ابتسمت : يطيك العافية 

صعدت وحازم وراي كضيت اباب السيارة ورفعت وحازم حاط ايده على ظهري : اسمعي .. خلي عينج عليها 

- ان شاءالله 

- هاج هاي مصرف الج الها اذا اشتهت شي لو رادت شي اشتريلها 

- زين 

- ديري بالج على نفسج اني راح ارجع انام بغرفتج 

- ماشي 

- من توصلين الحرم خابريني ازور 

- ان شاءالله 

عدل عباتي وبشار واكف يعد بيهم ويكعدهم كاله : بشار عود عينك عليهم امل مريضة ما راح تروح 

- بعيوني ابو علي 

- جيب دنيا كبال صبا لا تخليها ورا ويا عوفها 

- دنيا تعاي ليجاي .. 

حطاها ع الكرسي المتحرك واني بصفها باول كرسي يم بالباب بالكوستر .. حجه حازم : لو سمعت منها رايحة منا لو منا لو ما سامعة الكلمة ترا اذيج 

- ماشي بابا 

- ديلا توصلون بالسلامة 

قبطت السيارة وسدوا الباب والمقعد اليم الباب من ذيج الجهة كعد عليه بشار بس صفحة ووجهه علينا طلع جكارة ودخن كالتله دنيا : بعدنا ما تحركنا ودخنت .. 

خزرها وهو يكلها : انت ياهو مالتج 

سكتت واندارت .. همست الها : عوفي خيرلي 

صاحوا : بنية تسهيل امر الفاتحة لام البنين تسبقها الصلاة على محمد وال محمد 

صلينا كلنا وقرينا الفاتحة 

والسيارة مشت بس جانت باردة حيل 

حطيت راسي ع الجامة ليل وبرودة وبعدني نعسانة .. 

حجه بشار وهو يكض بالعمود الستيل مال السيارة ويكعد ع الدجة مال الباب ويكلي : شلونج 

-هذا لوني .. شلوني يعني 

ابتسم 

حجت دنيا : حنطية لونها 

مسوي وشم جديد على ايدك 

باوع لايده .. اي 

- صدك بطلت من الشغل 

- اي 

- ليش جا تضل بدون شغل 

- طالب منج 

- لا بس جاي اسأل 

- معليج 

سكتت باوعلي .. اكثر شي اكره اكعد اشتغل عد واحد يامر ويتامر عليه ابن الطركة هو انت يشر حالك حالي لو تحترم البشر الكدامك لو لا تشغل احد حاسب روحه مو صاحب محل لا جن تاجر وصاحب ناطحات سحاب 

ابتسمت ابتسامة مصطنعة واني اجامله لان يباوع بوجهي ويسولف واني اريد اعيش اجوائي مال الليل والبرد منو كايله اني رايدة اسمع قصة شغله وابو شغله 

ما سكت .. ضل يكمل وهو يسولفلي 

واني اكله اي . ها .. اي .. لخد ما كتله : خوية اعذرني نعست 

حطيت راسي وجريت العباية على وجهي ضحك وكال : حقج ما نايمة الليل 

صدك حطيت راسي وغفيت .. 

لحد ما وزعت امه لفات كبة تمن وجايبة ترمز جاي تصب للي يريد 

بثواب الائمة المتوجهيلهم 

اخذت وكتلها .. بس جاي فدوة

اخذ بشار الجاي من ايد امه واطانياه كالي : يكولون عليج تغلبين الخلفة بالجاي 

- ليش الخلفة يشرب جاي 

ضحك 

اخذت الحاي اشرب ودنيا تحجي 

اكثر واحد يشرب جاي بالعالم صبا حتى ويا التمن والمركة تصب جاي وتشرب 

-شنو السالفة ، صدك 

- بعد شسوي ادمان 

-الناس تدمن ع المخدرات ع الشرب انت ع الجاي 

-هاي مقدرتي 

كمت اكل احس الولد يوخر بعينه ويرجع يباوعني 

ما ادري اني كاعد اكبرها لو هو مهتم واكو شي وراه .. 

ليش هيج يباوعني محد ينتبه لان نظراته عادية بس كل بنية تحس اذا اكو نظرة غريبة عليها 

ونظرات بشار مو طبيعية .. 

ولا نظرات دنيا اله .. طبيعية 

وصلن للزيارة هناك اخذتها ورحنا نتوضى .. رجعنا بشار واكف ليغاد ضحكت دنيا وهي تكله : جا ما طبيت تزور ؟ 

- لا تانيتكم 

- مشكور 

- خلصتوا 

حجيت : شكد ونطلع للكبور 

- ساعة ونص زيارة وترجعون للسيارة 

- زين امشي دنيا 

مشيت وهو مشى على مشيتنا ودنيا تحاجي وتسولف وياه وهو كوة يطلع الحجاية .. 

دخلت اني وياها زرنا وصلينا وطلعنا .. هو واكف ليغاد كتلها : تريدين شي مشتهية شي 

- لا 

تحجي وتباوعله .. 

- امشي عاجبني اشتري شامية حارة 

- شطوله 

- منوه 

- بشار 

- ليش هيج تباوعيله 

- حلو 

- حلويش يمعودة صدك لو كالوا مراهقة 

- شفتي الوشم المسوي يموت 

- انت حيل مركزة وياه ولج 

- لا ما عدي شي بس هيج .. هو صدك شاب حلو قابل اجذب 

اشتريت شامية و فستق وحامض حلو 

عجبتني سبحة لحازم حيل حلوة اشتريتها 

وهي عجبها سوار .. خذيته الها .. اجا ورانا بشار 

كال : السيارة مناك 

كتله : ندري 

- شو احسج عصبية ليش 

- مو عصبية لا 

- ما ادري هيج حسيتج 

- بعد انت شتحس بكيفك 

- ضوجتج بشي 

ضحكت دنيا وكالتله : هي صبا كله هيج لعد لو تشوف شمسوية ابابه بالبيت كاعد ينام بالاستقبال ما تقبل ينام بالغرفة 

خزرتها 

ضحك هو : طاردته من الغرفة 

- مطاردته هو عاجبه يسهر ع التلفزيون واني احب انام بعدوء بدون صوت 

- ها .. 

مشيت حجه : يحقلج عمي يحقلج غير قطعة 

انداريتله : شنوه ؟

باوعت دنيا : شكو 

نكر : شنو 

- شحجيت 

- ما حجيت شي 

خزرته .. ومشيت منه .. ورحت للسيارة كعدت ليورا ما ردت اكابله .. اجتي بت عمهم كالت : مكاني 

- اخذي مكاني ليكدام تكعدي 

- لا عفية كلمن مكانه 

كمت رجعت لمكاني دنيا كاعدة ليكدام مكابلته .. وهو كاعد ع الدجة .. كالتلي : صبا انت شكد عمرج ؟ 

- ٦ وعشرين تقريبا ليش 

- بكد بشار بشار انت ٦ وعشرين لو ٧ وعشرين ؟ 

- ٢٧ 

- يعني اكبر منج بسنة 

- واحنا شعلينا 

باوعلي .. حجت لا بس هيج كاعد اقيس 

ذبيت حسرة وانداريت ضل يباوع بوجهي 

وكف بالباب وصار كلش قريب مني رجعت ظهري و سحبت رجلية اكثر حتى لا يطخني من تتحرك السيارة 

مشت السيارة كامت تخضه وهو واكف سوا روحه ينخض عليه وحجه : اسف اذا ضوجتج 

ما باوعتله ولا جني سمعت .. 

ضل واكف يباوع شوية ويرجع يباوعلي .. ودنيا مستلمته حجي وهو يحاجيها حتى يشركني بالحجي ويسألني 

دقايق وصلنا المكبرة ..

كلها نزلت اني اترددت انزل .. كلت هسه شيدورلي اهلي دائما انسى مكانهم بالمكبرة 

حجه : ما تروحين تزورين اهلج 

محد موجود بالكوستر ما جاوبته دنيا نزلت ويا خالتها

اجا : ضايجة مني 

- انت منو حتى اضوج منك 

- اه .. ترا ما كلت شي هيج اشاقيج

- منو كايلك ارضى تشاقيني وهيج شقى سخيف عرف ولف ونتشاقى 

- عرف ! 

ابتسم 

-اعذرني والله ما اعرفك 

صاحوله راح يركض خابرت على سهى كالتلي تروحين للسيد الصدر .. ومناك ادليج 

نزلت من الكوستر اريدلي ستوتة توصلني لسيد الصدر 

حجه ابن عم حازم غير بشار : وين تريدين خوية 

-لسيد الصدر 

- ذيج الستوته راح ياخذنها للسيد صعدي وياهن 

رحت صعدت وصلنا غاد .. زرت السيد وصليتله وطلعت خابرت سهى داتني على كبور اهلي .. ذبيت عليهم مي وقريتلهم الفاتحة ورجعت لكيت نسوان بيت عمهم نفس الستوتة رجعتنا ..

رجعنا وتوجهوا بينا من الكبور لكربلاء 

ضليت دايرة عنه شكد حاول يحجي وطخ بالحجي ما طخيت وياه بحرف عرفت نيته عاطلة 

اذا مرت ابن عمك اللي بحسبة اخوك تكلي خوش قطعة 

لعد لو غريبة شيسوي شكد عينه نكسه 

بس الظاهر دنيا معجبه بيه حيل 

وصلنا لكربلاء 

كالوا كدامكم ٣ ساعات زوروا وكملوا وارجعوا للسيارة 

اخذت دنيا وكتلها خل نكعد بمطعم ناكل متنا من الجوع 

كعدنا كاعد ينزلونا الاكل اجا بشار اشرتله دنيا 

كتلها : شكو تصيحيه 

-احسن ما نضل وحدنا بس بنات كاعدين بالمطعم 

-ليش كاعدين هنا مو الاهل مسوين دولة وبرياني 

دنيا : صدك ما ندري الغي لعد خل نروح ناكل وياهم ع اللمة 

-محد كاللنا ابقوا لو عزمونا جايبينه الهم نروح نكعد شنو ملطلطين 

بشار : شنو القصة هو اكل 

-طلبنا بعد 

-اي يخلوه سفري واخذوا على كعدتهم 

دنيا : خل نروح يمهم 

- علويش بعد طلبنا نكمل ونكوم حتى نروح لاحمامات فد مرة 

-هي شنية اريد اروح وياهم 

-محد منهم كال جايب اكل كلمة تنكال تفضلوا محد كالها نروح نحط روحنه كوة شبيج 

-اي ناخذ اكلنا 

-لكيناهم ماكلين شلون 

-اني راح اروح 

-اكعدي 

-انت كعدي اني رايحتلهم 

-اني كلت لابوج ما اكدرلج 

-اي كليله عادي 

-تروحين وحدج 

-اندلهم 

عافتتي ومشت وكفت يم بشار وكف برا يشرب جاي 

اشرالها تروح بس هي ضلت واكفة يمه نزل الاكل اني كمت اكل وهو وداها يم اهله ورجعلي بسرعة كعد كبالي 

اشرت لابو المطعم : شيله سفري خوية 

-

بشار : هاي ليش مو اريد اكل وياج 

ابو المطعم : ينشال 

-اي سفري 

شال ماعوني ماكلة منه شوية وماعون دنيا ..

حجه:  ليش ضجتي 

-لانك ما تستحي 

-هاه صار طك بطك 

-شعدك مكابلني ترا مرت ابن عمك غريبة لا اعرفك ولا تعرفني ولو رجعت وكلت لحازم سوالفك بالعباس يسويها سودة مصخمة عليك 

-واني شمسويلج حتى تكولين سوالفي بويه بس كعدت وياج على فرد طاوله ضجتي 

-بس لان كعدت نسيت شحجيت 

-شحجيت ؟ 

-تعرف كل الزين 

-لا ما اعرف كليلي ؟ 

-فاركني 

-كاعدة بمطعم وحدج ورجلج وصاني عليجن شلون اعوفجن 

- شريف بعد 

-غصبا ما عليج 

حط ابو المطعم هذيت الاكل ورحت احاسب كال : دفعت الخساب لا اتدفعين 

-بصفتك شنو بالله 

- هيج ثواب 

-شكد الحساب ؟ 

-ما يسوى 

جريت ٢٥ من جيزداني ذبيتها عليه ومشيت 

اجا وراي : تصرفج هذا عيب ترا 

- ما استخي شعدك وياي 

ضحك وهو يهمس : هو عود ليش كل حلوة مغرورة !؟ 

-شكد طايح حظ 

مشيت منه ورحت لكيت دنيا كاعدة وياهم بس ما صابياها كاعد دا تسولف ويا مرت خالها شافتني مرت عمهم : يا جا جبتي غداج وكعدتي ويانا 

-لا بالعافية اتغديت .. دناوي هاج هذا غداج متي من الجوع لو ضالة متغدية وياي مو اخسن 

حجت مرت عمه : يا جا ما صبيتلها البت اطني ماعون 

كتلها : لا يمعودة بالعافية جبتلها كباب وكلش طيب كبابهم ترف وطعم اللحم صافي 

-بالعافية 

كعدت اسولف وياهم 

لا ام حازم لا امل .. بس مرت محمد جاية صفيت وياها وكعدت اسولف وبعدها طبينا زرنا سوية وطلعنا 

طريق الرجعة كتلهم رجلي حجز واطه فلوس مال خمس مقاعد اريد المقاعد الوره اريد انام وهذا حقي وسويتها وياهم ضحك كامن يراددن وميقبلن هم بضحك بس ابن عم حازم ليكدام كاعد كوم الورا كلهن واطانا الخمس مقاعد الورانية النا 

 تعبت كل وحدة حاطة ابنها هاكده بكرسي شكبره واني و دنيا متكسرين بكرسي جانبي ومتحرك .. اخذتها ورجعت حتى اتمدد شو هاي اتمددي وحطي راسج على رجلي وكالتي : عليج الله عود من نوصل كعديني متت من النعاس منايمة ابد 

ابتسمت الها وعدلت العباية عليها وخليت ايدي عليها وهي تغفي على رجلي .. اخذت جنطتها على كيف وحطيته ع الجام تجيت راسي عليها ونمت ..

كل البسيارة ناموا تكول دخلنا بسبات 

محد بينا حس لحد ما صاحوا .. يلا اكعدوا وصلنا 

فتحت عيوني .. طبطبت على ايد دنيا : دناوي .. كومي وصلنا 

كعدت وهي تكول : جسمي كله ماذيني 

-اي اتكسرنا من نومة السيارة امشي نكمل نومتنا بالبيت 

كومتها حتى ننزل بس النوم بعده بعيونها تتطوطح 

كضيتها من وراه ومشيتها وخذيت ايدها ورحنا للبيت .. 

لكيت حازم كاعد منتظرنا بالاستقبال ذبت روحها دنيا ع التخم نامت 

واني مشيت للغرفة كبل ردت اكوم للحمام بس اتعاجزت النعاس كلش ماخذني ذبيت روحي .. ونمت .. حسيته متمدد يمي وصوت التلفزيون يباوع ومنصي .. ومتغطي وياي .. 

طلع لمحله ورجع ب١١ بالليل واني على فد نومة 

مد راسه وباسني بركبتي وشمني : شنو صبا ما جعتي ما شبعتي نوم 

مطيت روحي ووخرت ركبتي منه : شتريد ؟

-اكول ما جعتي 

سحبت الغطا وهم نمت 

وجريتها نوم للفجر .. كعدت عيوني منفخة من النوم 

صليت الفجر وصلاة المغرب والعشا قضاء .. ومشيت اخذت قماش ومشيت كعدت برا .. شغلت الشمعة وكعدت العصافير تزقزق وصوت الصبح والجو حيل يريح النفس 

اجت دنيا كالت : كعدتي 

- اي والله طكت صفحتي من النوم من البارحة 

- حتى اني حتى ما كاعد يجيني نوم بس جانت زيارة حلوة تونسنا 

- اي الحمدلله

- لو كل مرة يسوون هيج نتونس 

- الله كريم 

- اذا اسوي ريوك تتريكين 

- منج من الشيطان تسوين ريوك 

- هيج عاجبني 

- يلا علوا شدي حيلج 

راحت سلكت بيض وسوت جاي وحطت جبن كعدنا اني وياها نتريك ونسولف .. وكعدت اسولف الها على حساتي كبل وشلون خفت اصاحب لو اطي نفسي لزلمة واحجي وياها خاف يستغلني وبقيت آلف من كلبي واحجيلها حتى انصحها لانها بعدها رغم طويله وضخمة بس عقل مراهقة حتى لو جانت حية وتسوي الشغلة وتضم راس تبقى تصرفات الطفولة مبينة بيها لو شما حاولت تكبر بروحها وعود هي بنية وجبيرة .. طايشة وتحتاج النصيحة 

طلع الصبح هي صعدت فوك اني ضليت اخيط على ضوا الفجر .. لخد ما كعد حازم الصبح .. سبح وطلع .. صاح : قمصاني شنو كلهن ما مغسولات .. شلبس هسه 

مجاوبته 

صاح على امي كعدتله كالتله : بالغسالة 

- بالغسالة شعدهن يصلن يصومن غير تغسليهن 

- اليوم اغسلهن 

- وهسه شلبس 

- ماعدك كلش 

- شني الما عدك كلش غير قمصاني كتلج غسليهن الباااارحة 

- شسوي راسي ماذيني ونسيت 

كام يصيح ويهوس 

مشى لغرفتي ما لكى قميص بس تيشرتات 

كال : هسه اروح بتيشيرت بالله 

عفت خياطي وكمت طلعتله تيشيرت رسمي لونه زيتوني ابو الياخة حطيته ع الكرسي صاح : خو انت شايلة ايدج كلش 

- والله جرب غيري تعرف خيري 

- تجرب ليش انت مو مرتي ملابسي ما تدرين عنهن 

- ليش ادري عنهن مو مرتك موجودة وهذا بيتك .. 

كام يصيح ويجفص لحد ما طلع .. عاد لميت كل هدومه وكمت غسلتهن .. عود زعلانة عشتو وعايفته الها طاحت براسي .. 

شريت كل هدومه بس ل١٢ وامل ما نازله 

والجهال اجو من المدرسة وهي ولا يمها نايمة فوك

كمت سويت غدا وصبيت للجهال وضميت لحازم .. 

نزلت هي كبل جيته من اجا ضايج وعاكد حواجبه كومي صبيله وكابلي وتكله : لا تضوج بعد عمري اهدومك انغسلت وهذا غداك اتهنى عليمن ضايج بعد والله اني راسي مأذيني ما بيه اشيلنه 

اتغدا وما حجه .. ولا اني حجيت اروح كباله اكله اني غسلت واني طبخت وهي اتصدرت ع الجاهز عفتها .. ورحت كملت خياطي طب للغرفة صاح 

- هم راح تجرخين المكينة براسي 

- اكلك ضايج روح طلع ضوجتك بغيري اني شلي علاقة 

من جنت حاط البيت بيدي ما قصرت بس ما طول البيت صار لم طيرة روح حاسبها الها لا نجي تصيح يمي 

- دعوفي المكينه لا اكسرها والعباس 

حجاها واتمدد ونام ع الجرباية 

للعصر اجت امل دكت الباب صاح : فوت 

طبت لابسة عبايتها عقد حاجبه : وين جنتي ؟

- رحت لراس الشارع احلل  .. طلعت حامل ... يتبع 

#عاجر 

{ بقلم الكاتبة زينب ماجد } 

الحلقة_٣٦

متمدد ع الجرباية واني كاعدة مقابيل المكينة من كالتله حامل .. باوع عليه وكعد من نومته : ها بالخير ان شاءالله 

- ما فرحت ؟

- لا ليش ما فرحت بيها الخير ان شاءالله تكومين بالسلامة 

ضحكت وهي تكله : بلكت الله اخت لدنيا 

- ان شاءالله 

- رايحة لاهلي ابشرهم 

- روحي 

طلعت اني ضليت مدنكة .. 

هو يباوع عليه .. صبا 

ما جاوبته .. حجه : كومي سويلنا استكان جاي 

ما كاني سمعت انداريت للمكينه اعدل بالمكوك 

ضل ساكت ما حجه يباوع 

.. كام طلع للحمام سبح واجا يبدل .. حجه : محتاجة شي اجيبه وياي من اجي ؟

مجاوبته عافني وطلع 

للمغرب رجعت امل باب غرفتي مفتوح 

كالت : ما باركتيلي 

- بالخير 

- بس لو الدود حركج حرك جيف عاجر وما تخلفين واني حامل منه 

- الحمدلله ما دامه كاتبلي ما يصيرلي ضنا اني مقتنعة وراضية بقسمة الله هو اليختار النا مو احنا نختار اقدارنا 

- وقدرج من السم مالج خلاج عاجر وحرمج من ريحة الضنا خليج للمتعة بس وكت النومة يذكرج الاصل اني وجهاله 

- بالعافية عليكم 

اذن الاذان .. كمت من مكاني وعفتها بالباب اتعديتها ورحت اتوضى .. رحعت مديت سجادتي وصليت بس استهضمت .. شنو فرقي عن النسوان ربي مو اعتراض على امرك بس اني هم مرة وهم اتمنى اسمع اليكلي ماما وجاهل اشيلنه واحضننه ويصيرلي ضنا .. محمود مشكور ربي بس حيل مقهورك 

كلامهم ياذيني كاني اني خليت هالعيب بروحي مو انت ، يعيبوني بعاجر وانت الردتني لهالدور ولا اعتراض على امرك بس والله ربي ياذيني حجيهم ما اتحمله 

كمت احجي وابجي لربي .. انفتح الباب فات حازم مجنت متوقعة جيته بهالوقت لان هيج وكت هو بالمحل .. مسحت دموعي واتنهدت .. حجه : شبيج 

كمت من مكاني واني الف السجادة 

بقى واكف يتسائل : ليش جاي تبجين 

رديت واني اجر خشمي واحط السجادة على صفحة بدون ما اباوع عليه : ما بيه شي 

-جا عليمن جاي تبجين 

ما جاوبته انداريت للكنتور طلعت غطا ومشيت للجرباية 

ضل يباوع عليه .. شافني اريد انام ، اتقرب مني مد نفسه واخذ ايدي : تعاي كعدي اريد احجي وياج 

سحبتها منه : ما اريد احجي 

-رايد اسولف وياج بشغلة 

-أجلها 

-انت مو تريدين تعزلين 

هو يحجي اني اتمددت ونمت جر الغطا من راسي يحاجيني : خابرته للخلفة واتفقت ويا يطلعلي باجر الصبح اطلاع 

- يعني شنو ؟ 

-يعني مو تريدين تعزلين من باجر راح ابدي بالعزال واخطط وابني 

- بالخير 

- لا تضوجين 

-من شنو 

-من حمل امل ترى والله اني ما اهتم لهالأمور 

-طبعا ما تهتم اذا عدك مرة تخلفلك ومرة للونسة ليش تهتم 

- تشوفيني متونس وياج مو راح يصيرلنا شهر اخوان غصبتج طالبتج انت ليش دوم تحسسيني طاب وياج على مصلحة شنو مصلحتي بيج بس اريد افتهم 

ما جاوبت .. 

كمل : غير مرة احبج واعزج والج قدر عندي .. حتى من ردتي تاخذين بت اخوج رغم ما راضي وكتيلي اريدها الي ما اهتميت لروحي وراحتي وافقت المهم انت ترضين 

- ورجعتها 

-تريدينها والعباس ما عدي كل مانع خابريها واتفقي وياها واروح اجيبها بعد ؟ 

هزيت راسي ومحجيت .. هو كاعد طرف 

تقرب كعد يمي اخذ راسي باسه وبعدها سحبني اله وحضني 

بس لمني بحضنه دموعي جرن مثل المطر .. 

كال : يا بعد حيلي واهله عليكن تبجين عوينة ابو الجاهل 

- حازم مو بيدي .. بالعافية عليها ما شالله الله يجيبه بالسلامة بس حسرة بكلبي اتمنى يصير عدي ضنا وطفل يكلي ماما .. اني كل ما اصفن ارجف اكول لو بعد عمر طويل والله يحفظك الي من بعدك وين اروح ويا شارع يلفيني ؟ 

الداير مدايري كلها ذياب ساكتة لان انت موجود 

جربت وشفت وكت الدنيا ذبتني حتى بالشارع بقيت .. 

- اذا ما صارلج ضنا عمي اني اصيرلج ضنا .. اني ابنج واني اهلج واني عشيرتج .. عليمن تهتمين وعليمن اتضوجين .. ما طولني اني موجود ابد لا تشيلين هم . 

رجعت ظهري ومسحت دموعي وكتله : الله يحفظك . 

- دكومي خل اطلعج افررج شوية تغيرين جو اوكلج شي ابرد كلبج كومي 

- لا مالي خلك 

- عوفي الخلك كومي خل نتعشى امشي 

جر ايدي كوماني .. كمت لفيت حجابي واخذت عباتي وطلعنا .. امل واكفة بالمطبخ تثرم .. كالتله : وين رايح 

- كولي 

- جاي اسألج 

- هيج بشغلة 

كامت تباوع عليه : اذا طالعين تتعشون جيبلنا عشا وياك 

- خاف اتأخر اتعشوا .. وغير مرة اجيبلكم 

- غير مرة شوكت اني مشتهية كباب

- اي ابنج موجود ودزي لراس الشارع بعد تنتظريني منا لمن اجي عليمن 

حجاها وطلع هي ضاجت اني مشيت وراه 

اخذني ضل يفررني طلعني من المدينة على شارع فلسطين صفلي بمطعم : ذول يسوون خوش همبركر كلش طيب يعجبج تجربين لو تريدين كباب لو معلاك 

- لا علواه جيبلي حيل عاجبني اكله 

نزل جابلي لفة همبركر وماعون مقبلات اطانياهن : جا انت ما جبت لروحك 

-  ما احبه اني هذا ، اكلي لا تشيلين همي 

اكلتها كلها احس معدتي ثغرت اللفة حيل جبيرة 

كال : تريدين بعد 

-لا شريد بعد احس الاكل واصل لبلعومي علوا لو سفن تجيبلي 

نزل جاب واطاني ومشى بالسيارة 

صل يفر بيه ويسولف وياي غيرلي جو .. وكف كدام محل مال مرطبات الفقمة نزل اشترالي موطة بس مو بكلاص ولا بكبوس .. تصير بكاسة مال بسكت ضليت اباوع عليها شكد عجبتني 

كلينا اني وياه 

رجعت نفسيتي متغيرة تماما 

طبينا لغرفتنا كبل ..ثاني يوم الصبح ماخذ اجازة ومخابر ع الخلفة اجاه .. اتفق وياه يسد الدرج اللي ابنص البيت ويخلي درج حديد بالكراج يصعد للسطح .. واتفق يبني فوك مطبخ وحمام سوية .. 

لحد ما طلع الخلفة .. 

امل جانت واكفتله اباب المطبخ .. طول برا وهو يتفق ويا الخلفة 

وهي كامت تحجي .. ام الوصخ اجتي من تالي ورايدة تاخذ نص بيتي .. اني اطي جهال وهو يطيها بيوت .. والله مونسته وكاضيتله شغل .. بالعباس اليوم اكلب الدنيا اني اكص من بيتي واطي شبية مسودنة ما براسي عقل زين صابرة وما شامرتها للشارع واطيها بيتي 

اني بغرفتي واعرفها كاعد تسمعني بالحجي 

طب هو كالتله : شتريد بالخلفة 

- ابني 

- شتبني ؟ 

- البيت غير 

- رايد تعزللها للخاتوووون مو 

- وليش ما اعزللها ؟ 

- وتطيها نص بيتيييييي 

- يمتى اشتريتي وصار بيتج ؟ بيتي هذا وهي مرتي حالها من حالج .. وتريد الها بيت تاخذ راحتها بيه تلبس تاكل تشرب ببيتها 

- حالها حاااااالي خلفتلك البت والولد وتكلي حالها حاااااالي جهالي الرفعوا اسمك مالهم حوبة عدك وتريد تحصرني ابيت اني وياهم خاطر هاي النغلة ترتاااااح .. سيطرت على عقلك ودارته وخلتك تعزللها نص البيت 

- احترمي نفسج ولا تدخلين .. بيتي اعزله احركه افلشه بكيفي ما عاجبج الله وياج ومحمد وعلي مو انت التكليلي شسوي ما اسوي 

- طبعا مو اني .. الشور والكول صار الها شتكول حاضررررر 

بالعباس لو تحركت طابوكة من بيتي لا العب جوووووله 

- راح ابني وراح اعزل كل وحدة بطابق انت وجهالج فوك وهي الها الطابق الجوا 

- وفووووووكاعا تطيها الطابق الجوا واحنا تشمرنا فووووك لا وعلي ما اخليك وحجيك ويا اهلي واخوتي 

- ***** باهلج واخوتج شني كجة مرحبا ويكلولي شسوي ما اسوي قابل يتحكمون بيه وراح اطيكم الطابق الفوك لان انفه من الجوا خاطر غرفة الج وغرفة للجهال وراح ابنيلكم مطبخ وحمام حتى ترتاحون 

- لا والله مترة من بيتي ما انطي اگسم بيتي واطي نصه لهاي حتى اتعلك اني وجهالي فوك 

- تريدون الطابق الجوا. ما عدي كل مانع اكيف  حتى غرفة الجهال الفوك اسويها مطبخ وابني بس حمام 

- وجهالي وين ينامون لو اطيتنا بس اطابق الجوا يناموووون بالدوانية حتى ست الحسن مالتك تاخذ راحتها بطابق كامل الها 

- هذا الموجود تريدين الطابق الفوك كولي تريدين الجوا هم كولي ..  غير هالحجي ما عدي 

عافها واجا للغرفة كامت تصيح وتدعي عليه 

كتله : واذا ما رضت 

- بيت اهلها موجود وتعيش عدهم ماكو كل مشكلة 

كاعد يحجي اجت فتحت الباب اندارلها 

حجت بحركة : انت مو جنت رايدني اكعد من الشغل 

مو عفت الشغل وكابلتك وكابلت جهالك .. مو عفت حالي ومالي حتى ارضيك .. معناها طلكها بعد مالها حاجة انت كلت بس اتكعدين ما اتزوج وهاي كعدت 

- امل حامل ولا تخليني اذيج اذكري ربج وامشي مني 

- امشي لييييش مو عفت كلشي حتى ترضى .. ارضييييني 

- عفتي كلشي حتى ارجعج لذمتي وتكابلين جهالج مو لغير شي 

- وشنو فايدتها بعد اذا اني كعدت 

- واني ماخذها متعة حتى اطلك من يخلص الوكت .. امشي كافي جعرتي هواي دوختيني 

- ما ابقالك والله بيتي ما ينقسم .. ما اطي بيتي رايدها اطلع اجرلها بغير بيتي ما اطي شبر منه 

- بيتج انت الضيعتي بيدج 

- وضيعت كلشي وكت الكلت اتنازل وارضيك وتاليتك ما تسوى راح تنطي نص بيتي الها 

- ما طولها مرتي حالها حالج ليش لا .. اروح اجر وابهذل نفسي بالايجارات وانقسم بيتي يوم هنا ويوم هناك ومتبهذل ليش واني عدي بيت خو هذا بيتي ملك وكل وحدة بطابق وكتلج الطابق اليعجبج بعد شسويلج 

ما رضت كامت تصيح وتهوس بنص البيت .. لحد ما عافت البيت وطلعت .. عاد من سمعتها طلعت كمت للبيت نظفته وسويت غدا وصبيت الهم وكعدنا كلنا كاعد نتغدا .. مرت امها على حازم 

كاملها عزمها ع الغدا ما رضت .. وهم ضلت تحجي جيف يريد يقسم وينطيني نص البيت الي 

تكله العدل حلو جا عدالة هي وحدها بطابق 

وامل وفروخها بطابق وين يكفيها تحصر الفريحات حتى ترضي غيرها ما يصير 

كاللها : جا شني ذنبها اذا ما يصير عدها جهال لازم احرمها حقها .. هاي مو عدالة .. العدالة اساوي بيناتهن واني حرام حتى مو مساوي وكاعد اكللها انت التختارين الطابق التريدين اذا تريد فوك لو جوا .. ولا تنسين التحملته من امل ما متحمله من غيرها .. فخل تذكر اني شكثر عديتلها ومشيت الها لخاطر العشرة 

ضلت امها تحجي وتترجاه 

ما رضى .. رجع بالليل اخوها مرله وهم حجه وياه .. هم ما قبل حازم .. رجع محمد حجه وياه وكاله .. عدي حل .. اقسم الفوك غرفة الجهال اطيها لصبا وابنيلها مطيبخ وحمام وسويلها درج وخلي حاجز من غرفة امل والدرج الجوا لعائلتك 

كاله : غرفة الجهال صغيرة ما تكفي غرفة نومي بس الجرباية تاخذ نص الغرفة 

كاله : شيل الجرباية ما محتاجها خلي بس الكنتور والغراض ومدلكم فراشي وارضي عائلتك يا اخي 

- واني اكسر ذيج واحرمها من غرفتها حتى امل ترضى .. خو خل تصعد فوك وغرفة الها وغرفة لجهالها 

- ما يكفيهم ياخي جهال يردون ياخذون راحتهم 

- اي غرفتهم و الكراج مشترك يكدرون ينزلون يكعدون ويلعبون بيه 

حاولوا وياه رادوا .. قفل 

ثاني يوم .. من الصبح ذب مواد بناء ووكف .. 

واجا طلب مني اطبخ للعمال .. 

واكفة بالمطبخ امل زعلانة عد اهلها .. وهو يسولف وياي 

: تصدكين بالله ما جنت رايد اقسم البيت واعزل 

- ليش 

- الفلوس العدي جنت ناوي اشتري بيهن مولدة .. لان ابو المولدة البراس الشارع راح يعزل هذا الشهر كلت اخذ مكانه 

-وشلون نكدر تشتغل بالمولدة ومحلك مناك وشغلك الصبح 

-هاي سهلة احطلي عامل 

-ما ادري 

-رايد اكلج شي بس القرار الج 

-شنو 

-رايد ابيع بيت الشماعية وشكثر فلوس البيعة اتحسبيهن علي دين 

- اني اصلا ما دفعت منه يمكن مليون الباقي كله انت جملته ودفعت اقساط اسعد 

- ميخالف بس يضل بيتج 

- هو عادي بيعه بس يعني اني وخواتي شلون يعني اني احب اتجمع ويا خواتي اذا راح نتطشر احنا نلتم بيه 

- مو واح اعزلج طابق يجنج ما طولج الوحيدة العازلة من بيناتهن يلتمن يمج ويوم اليجن اني ما اوصل البيت اضل يم العايلة  عود 

- اي عادي بيعه 

فرح من رضيت .. 

عرضه للبيع ب١٢ مليون  ونشر خبره بين ربعه وجماعته واهله .. 

خابروه عليه هواية بس يردونه ب٩ و١٠ .. لحد ما خصمها بعشرة ونص باعه واخذ فلوسه 

وباع الغراض البيه جابن تقريبا ٨٠٠ الف 

اطانياهن الي كال ذني الج من نخلص بنيان .. انت اشتري بيهن اليعجبج للبيت

وراح اتفق على المولد بس فلوسه ما كفت .. عمه نعمة دخل وياه شريك .. وكاله : بشار كاعد بلا شغله وعمله خلي هو اليكض المولدة والادارة الك . 

وصدك اشتروا مولدة جديدة ونصبوها بالجزرة 

وكمل بناء البيت .. بناء فوك مطبخ وحمام وسد الدرج من جوا .. 

جهاله ما رضوا بالطابق الجوا استعزوا بغرفتهم ما رضوا يعوفوها .. فراح اداين من محمد اخوه وراح اشترى كاونتر وطباخ  وغراض للبيت الفوك .. كون الطابق الجوا كامل 

وامل بعدها زعلانة عد اهلها 

ولا عزلي بطابق رجعت تشتغل .. اساسا طلعت هي ما عايفة الشغل بس متفقة ويا اهلها وعايفة وحدة بمكانها تشتغل واخوها كاضلها الشغل ومن عزلي طابق رجعت للشغل يومية .. هو ما اهتم ولا حتى حجه .. كال يطبها مرض شتسوي خل تسوي المهم ترجع لجهالها وتكابلهم 

اني من كمل بناء وعزلي بطابق ثاني .. 

اول شي سويته طلبت منه يصبغلي البيت كله ابيض  

ومن بعدها اخذت٨٠٠ وزيدت عليهن ٧٠٠ الف مني واشتريت تخم قنفات للاستقبال وشمرت القديم .. 

ضلن عدي من فلوس ب٤٠٠ الف اخذتلي تلفزيون بس جديد بلازما ووياه الميز ماله كلهن صارن ب٦٠٠ حازم زيد عليهن 

واكو حجية بشارعنا تشتغل بالاقساط تعرف ام فراس جيرانه 

خابرتها وكتلها اريد .. بالاقساط كاونتر جديد وطبلة .. 

وصدك رحت اني وام فراس ويا الحجية وفصلت كاونتر لونه بيجي .. وطبلة جديدة .. واتفقت ويا حازم يطيني ١٥٠ الف للاقساط كل شهر حتى اوفي 

وكلت اشتغل واشتري بالقسط واوافي من شغلي 

وكلبت الطابق البيت الصار الي ع البطانة .. 

حيل فرحت وارتاحيت بالبيت الجديد 

باب الاستقبال دوم مسدود 

وباب المطبخ هو الباب للبيت 

عزمت خواتي كلهن عدي بالبيت اتعجبن على ترتيبه وجماله ودعلي الله يهنيني بيه وارتاح .. واتفقت وياهن بعد كل اسبوعين يلتمن يمي ننجمع ونشوف بعضنا 

وذبيت نفسي ع الشغل 

سويت بيتي معرض .. اروح للسوك اتسوك اقمشة وتور كل وكتي الحازم برا بيه اخيط .. وما اطول بكعدة اني مخيطتلي بردة مال غرفة لو مال مطبخ  لو فرشة اعرضهن والنسوان من يطبن ويشوفن يردن مثله .. اخيطلهن او ياخذنه المعروض بسعر اقل لان مستخدم .. 

وشوية شوية صارت النسوان تعرفني بالمنطقة 

حتى كرابته لحازم كلهم عرفوا خياطي وكامن يدزلي يخيطن عدي .. واني الهي روحي بالخياط اخذ الفلوس اروح اشتريلي زرعة لو تحفية للبيت لو فراش .. وهاي ذابة كل شغلي ع البيت اجيب واعدل بيه 

رغم هو طابق واحد بس ما دخل احد لا ما سالني هاي شلون مسويتها وهاي منين جبتيها مصفطته ومرتبته لدرجة كل اليطب تشيه عينه ويباوع .. 

خو الثريات .. كل شهر اجيب واعلك ويسالني وابعيهن باغلى من سعرهن واجيب موديل جديد احلى منهن وحازم يضحك يكلي انت ما عندج شغل وعمل غير تشيلين وتحطين بهالبيت وتعال حازم اخذني اشتري وتعال حازم شدلي  .. 

-اي شسوي ونستي بهالسالفة الحاجة التضل كبال عيوني شهر املها عيوني تحب الجديد 

امل طولت بزعلتها مال البيت ٦ اشهر 

بطنها كبرت حللت طلعت حامل بولد مو بنية 

هم جانوا يتمنون بنية ... 

بيوم من الايام حازم طلع بفاتحة عدهم بالعشيرة بس بالعمارة .. فراح هو ومحمد ووصاني ادير بالي على نفسي واسد بابي .. 

اني مجطلي المكيف مالتي مال الغرفة ع السحب والوطنية لان المولد مال حازم فليل نهار المكيف معلوك وفاتحة باب الغرفة حتى يضرب ع البيت ويبرده ..

فبليلتها .. فصل المكيف وطفى 

كلت اكو خلل .. من بعدها طفت الكهرباء كلت هسه تحول 

طولت ربع ساعة مو عادتها .. عاد كمت طلعت اباوع بيوت الجيران حتى اذا عدهم معناها الخلل عدنا 

اباوع وبيوت الناس كلها عدهم كهرباء بس بيتي اظلم 

باوعت للفوك الطابق الفوك بيه بس الطابق مالتي طافي .. ما افتهمت شنو القصة 

خابرت على حازم 

كالي هسه اخابرلج بشار يجي يشوفلج الكهرباء 

سكتت ما حجيت 

كلت اسد بابي وهو يجي يشوف الميزانية و يصلحها .. 

شوية واجا بشار يدك الباب ، بقى شوية وهو يدك محد من الفوك نزل وفتحلا الباب .. لبست حجابي وطلعت فتحت الباب 

كال : شنو الخلل

-ما اعرف هاي الميزانية وشوفها 

-اتأمرين امر 

اتعداني وفات للميزانية وشغل الايت يباوع كال : اكو قواطع جوا 

-ما اعرف ما افتهم بالكهرباء 

-الدكم التشغل كهرباء البيت جوا 

-اكو ميزانية صغيرة جوا بس مالها علاقة 

-لا هي بيها 

-بس محد موجود 

-اي غير اصلحلج ياها 

ما ادري غير هاي الميزانية 

عافني ومشى يضوي لروحه وفات جوا ما فتت وراه ضليت برا .. 

صاح : وينها 

-يم الدرج 

-يا درج وينها 

:ع اليمنى بس باوع 

-وينها غير ادلينياه تعاااي

صحت ليفوك : علييييي ، عليييي ماكو احد من الجهال يسمعني 

فتت للبيت وهو يكلي وينها 

-شنو الوينها .. غير هاي كبالك 

فتحها كام يباوع بيها .. بس الوضع مربك 

انسحبت وجاي اريد اطلع من البيت اوكف بالكراج ما احس الا حركة سريعة وراي وضوا اللايت بالكاع انداريت وراي .. طفى اللايت وشمره وكضني حط ايده على حلكي بسرعة 

كمت اصيح واحاول اوخر من عنده وافلت بروحي وما اكدر 

عصرني ويا الحايط حيل وسحب الحجاب من راسي بسنونه .. كمت ادفع واريد بس اوخر منه 

كام يهمس : من يوم ما شفت زرورج وانت تمشين بالبيت بثوب النوم راسي طار من ذاك اليوم ولهذا اليوم واني احلم اكض هاللحم واتلمسه بيدي 

ارفس واصيح وهو ساد حلكي فلتت وجهي وعضيت ايده ضرب راسي بالحايط صرخت رجع كض وجهي وحط ايده على حلكي وقيدني 

وسحبني من المطبخ لغرفة النوم 

كمت ادفع بيه واحاول ابعده برجله دفع الباب وسداه 

ووصلني للجرباية وبعد ايده من حلكي بسرعة ونزلني حط وجهي بالفراش وخنكني كمت ادفر وادفع اختنكت ردت اموت بيده وهو يمد ايده على جسمي 

دار راسي صفح كمت اصيح : وخر مني حيواااااااااا

رجع حط وجهي بالفراش وخنكني اريد اكضه بادية اريد اجر شي ما اكدر بس اضرب باديه وهو يتحرش بجسمي 

بلحظة كدرت افلت منه واجر نفسي 

سحبني وهو كدامي كمت ادفع بيه واصرخ : طايح حظ وخر مني والله اليوم اخلي حازم .... رجع ايده وهو يكلي : محد مراح يسمعج ولا احد راح يصدكج صيري حبابة واسكتي 

كمت ارافس واريد اوخره اختنكت 

كام يهمس راح اوخر ايدي بشرط ما تصيحين اذا صيحتي راح اذيج 

رجعني ع الكنتور وهو يكلي : متفقين ما تصيحين 

وخر ايده كمت اصيح رجع ايده عضيتها

سحبني للفراش وراد يدورني كمت اصيح ما احجي ما اصيح فدوة بس وخر من عندي 

رخى ايدى وهو يكلي : صيري حبابة 

-عليك الله وخر مني ليش رايد تهجم بيتي والله حرام عليك 

وخر مني فدوة يتيمة ومال احد ليش رايد تأذيني حرام عليك والله 

-ما تعرفين اني شكثر متمني هاللحظة 

اتمنى الساعة الاكدر الزمة بيها وتصيرين بين اديه متمنيج من زمان 

- وخر من عندي اني مرة متزوجة والله حرام عليك عليك الله عوفني 

كمت ابجي بنحيب .. اديه رخت على راسي من بجيت 

فلتت منه بساع كال : اعرفج بشرط شششش 

-وخر مني 

-ششششش لا تخليني ارجع اذيج 

-اطلع منا لا والله الم الدنيا عليك 

-اسمعي ولا تصيحين تريديني اعوفج .. اتطلبين الطلاك من حازم وتعوفي .. واني اخذج اعيشج ملكة اترسج ذهب والله 

-اني مرة متزوجة حرام عليك وخر مني 

-تطلكين 

- حازم لو درى بالسويته مراح يعوفك ابد 

-اذا احد صدكج ثقي والله لو حجيتي تنكلب ضدج 

-وخر مني واطلع منا 

الدنيا ظلمة واحس بروحي اتنفس حيل ومحترة حيل واسمع بس صوته واحس بيه ما كاعد اشوف 

حجه : متفقين اطلبين الطلاك من حازم 

-دازتك امل حتى تسوي بيه هيج يا ما عندك غيرة وشرف النسوان اتمشيك واتديرك 

- كدامج يوم .. لو ما طلبتي من حازم الطلاك .. راح اوكعج ابلية ما اتطلعين منها .. وما راح تتخيلين شراح اسوي بيج 

حجاها وهو يريد يتقرب مني دفعته مني 

بس جسمي يرعش من فوك ليجوا .. كمت ارجف 

عافني وطلع من الغرفة ركضت سديت باب الغرفة بسرعة .. وسركيتها 

وكعدت ورا الباب لميت روحي وكمت ابجي 

كمت اناشغ بقوة .. وحاضنة رجلية .. شمسوية حتى يصير بيها كل هذا ربي دخيلك خلصني .. 

اجت الكهرباء واشتغل المكيف 

كمت من مكاني وحطيت اذني ع الباب ماكو احد بالبيت 

فتحت الباب .. واتفقدت البيت فارغ ركضت على باب المطبخ قفلته ومشيت للحمام كمت اغسل بروحي واني كاشي من نفسي .. وابجي بقوة 

طلعت من الحمام طفيت المكيف ولفيت روحي وارجف .. 

اخابر حازم واكله ع الصار وياي .. لو ما يصدكني 

بس ما اكدر اسكت .. لازم اكله بس مو مال تليفون .. يجي واحجيله كلشي واتغدا بيهم كبل لا يتعشون بيه . 

ضليت الليل كله ارجف وافكر وخايفة ومترددة 

ساعة اكول اكله وشيريد يصير يصير .. وما اضل تحت تهديده وخايفه ..

 وساعة اكولن لا حازم بكل مرة يشك بيه من يصير موقف يصدك المقابيلي من ما يلكى عدي دليل واقرب مثال تهمة بته .. صدك بته رغم كتله مو اني وتليفونها ما صدكني وصدكها لحد ما ابنه حجاله الحق يلا صدك .. 

- اخاف اجني على روحي لو حجيتله 

عمه وامل واهله كلهم راح يصدكون ابنهم ويمكن يشهدوله ويكلوله جنه واكفين من اجا سوا الكهرباء ابيتك وما صار شي ولا سمعنا شي .. لو احد يشهد هو جان وياه من اجا صلح 

ما يسوونها يسووها ويشهدون لابنهم زور ساعتها اني شنو موقفي وشراح اسوي لو هم شهدوا لابنهم وبروه ؟ 

خصوصا هو يحجي بثقة ومتاكد ما عليه شي 

لو خايف ما سوا هيج بس مامن اني مالي ظهر يطلعلي ويكدر يكسرني ويخلي حازم يصدكهم ما يصدكني .. 

شسوي يا ربي وهو هدداني اطلب الطلاك من حازم 

هذا التريده امل واكص ايدي اذا ما هي متفق وياه على هالسالفة ما طولها طولت بزعلتها ضامتلي 

للصبح ضليت بحسراتي وافكاري 

اكول لو ما اكول .. غفيت من التعب والبجي بلا ما احس 

من كعدت خابرت على سهى حجيتلها الصار كله .. كامت تلطم تخبلت كالت ولج لا تكولين ولا تحجين ما تكدريلهم 

- وشلون اسكت ع السواه بيه 

- صبا والعباس ما تكدرين لاهله وكرابته يسوولج شدة يا ورد ويورطونج وعلي اكول اتصمين حلكج وتسكتين ما تجيبين سيرة هالسالفة حتى لروحج

- وشلون وتهديدة 

- غلسي وسدي بابج من يطلع حازم لعزيز كلبج ما تفتحينه حتى لو لبزره تره كلهم خايسين وامهم اتدزهم وحق ربج حتى سالفة الكهرباء هم مسوينها حتى يوطونج ويطلكونج من حازم اتظنين بتهم حامل وزعلانة وضاربها بالف قندرة ومكابلج ويباوع لحلكج وتريدينهم يسكتون لا ما يحيكولج سالفة من جوا الكاع وعلي تلكينهم كلهم متفقين ويدرون ومنتظرين بس تحجي يطلعونج انت المو خوش ويمكن يصفطون عليج حجي ويخربون عليج 

- واسكت

- اسكتي ووكلي امرج لله واهل البيت يتكفلونج لا تحجين ابد خليها علة بكلوبهم يمكن هم متانيج تحجين ورايدينها من الله لا تطينهم هالحجة ..

- والسواه بيه 

- اتعدا عليج يعني 

- مو بالمعنى بس حسيت بجسمى وشي كلش يلعب النفس شعور بودي اكتل روحي ما اتذكره 

-حطي عينج بعين الله ولا تحجين هو اليحاسب ويردلج حقج 

ضلت تحجي وياي قنعتني اسكت ما احجي .. 

خابرت حازم كالي : للمغرب احتمال اوصل لا تحسبين احسابي انت سدي بابج واكعدي 

ضربت اباب قفل ورجعت نمت بس اتكلب بفراش ومزوهرة من الخوف والتفكير لحد ما نمت 

لليل الباب يندك بقوة 

وضوا البيت كله مطفى .. 

فزيت من فراشي بس كلبي راح كلت شوف سراح يسوون بيه وشعدهم هالمرة .. طلعت من الباب وحازم يصيح : يمعوووودة 

من سمعت صوته روحي ردتلي ورحت اركض لباب المطبخ فتحته فات وهو يكلي صدك جذب لو يكسرون البيت ما تدرين وين... 

كاعد يحجي شبكته وبجيت 

قطع كلامه وهو يكلي : شبيج صبا .. كاعد ترجفين شبيج شصاير وياج 

- ماكو شي بس خفت وحدي 

- ليش خفتي شصاير 

- لان انت ما موجود وطفت الكهرباء صارت بيه خوفة 

-ما اجا بشار صلحها 

-لا صلحها بس خفت 

احجي وارجف اخذ ايدي وهو يكلي : طفلة يا بابا خوما طفلة تبجين وترجفين عليمن متكليلي يوم واحد غبت عن البيت جا لو انقلت محافظات شتسوين 

- اموت ما اتحمل .. حازم عليك الله لتعوفني بعد 

- ما اعوفج يابه بس اهدي 

اخذني ومشى وهو يشغل اضوية البيت ويحجي : شني مكعدة روحج بسجن قافل الباب ومطفية البيت شبيج 

-اخاف 

-تخافين منين غير اعرف 

دخل للغرفة وهو يكلي طلعيلي هدوم دطلعيني خل اطب اسبح 

دخل للحمام واني ارجف ما ادري اكله لو خايفة يكتشف الموضوع 

طلع انطيته ملابسه عقد حاجبه : شنو هذا العلى راسج مضروبة 

- شنو 

- هاي كصتج شبيها 

انداريت للمرايا باوعت زراك بكصتي ما ادري شلون صاير بس جذبت وكتله : ها انضربت البارحة بالظلم ما ادري من كاعد افتح الباب 

- غير اديرين بالج يا بويه 

- شفت الجهال فوك مريتلهم 

- ما موجودين 

- ليش 

- من امس واليوم ما تدرين هم مو بالبيت ما تحسين هوسة ماكو فوكاج 

- ما انتبهت 

- لا من البارحة العصر راحو لبيت جدهم يم امهم ضلوا .. 

على طاري امهم امس بالكعدة هم صار حجي والكلمة واصلة لجبيرنا غاد .. وحلفني ارجع بت عمي يقصد على امل كتله اني ما طاردها حتى ارجعها .. كال احنا نرجعها باجر. اح يتعنى لبغداد حتى يدخل ويرجعها للبيت 

- علوا تكابل جهالها بلا ما ضالة محتارة بيهم 

- اي احسن خل يجيبونها اقلها امن الجهال احد يمهم .. 

- هي شكد صار عليها 

- ما ادري يمكن هذا الشهر السادس مدري السابع والله ما ادري بس يحتاج اجدد العقد لان اني بالمحكمة مطلكها ومتزوجج الج .. هم يحتاج لوفة محتمي يحل هالسالفة 

كاعد يحجي دك تليفونه .. 

كالي : انطينياه من يمج 

ناوشته محمد اخوه .. رد وهو يكله : ها ابو جاسم 

حجاها وفز :  شبي بشار ؟ ...... يتبع

 تكملة الرواية من هناااااااا 

لمتابعة باقي الروايه زورو قناتنا علي التليجرام من هناااااااااا

بدل ماتدور وتبحث علي الروايات عمل 

متابعه لصفحتنا على فيس بوك هنااااااااااا

الرواية كامله من هناااااااااا

مجمع الروايات الكامله 1اضغط هناااااااا

مجمع الروايات الكاملة 2 اضغط هنااااااا