رواية عاجر الفصل السادس وعشرون 26بقلــم الكاتبـــة زينب ماجد (حصريه في مدونة قصر الروايات)

رواية عاجر الفصل السادس وعشرون 26بقلــم الكاتبـــة زينب ماجد  (حصريه في مدونة قصر الروايات)

رواية عاجر الفصل السادس وعشرون 26بقلــم الكاتبـــة زينب ماجد  (حصريه في مدونة قصر الروايات)

#عاجر 

{ بقلم الكاتبة زينب ماجد } 

الحلقة_٢٦ 

وفاء : عاش من شافج عيوني ضميتي راسج بعد ما انشافيتي 

حجتها وحازم واكفلي يلغاد .. ما جاوبتها صحت له : جيت جيت 

عبرتها وطلعت وهي اندارت تباوع وراي قريت لسيارته وصعدت وياه : شكو شغلت بالي خير 

- خل يولون لا تضلين 

- منو هم الخلي يولون 

- عوفيها هسه 

- دحجي شغلت بالي شصاير 

- ما صاير بس ادري راح يصير شي اهلي كلهم ما رايدين هالزواج يكضي على خير .. فاخاف من كل خطوة لا تأثر علينا وجيت وفاء لبيت عمج مو خالية امل جانت يمها 

- امل جانت يمها .. ليش يعني شعدهن 

- ما ادري علي ابني اجاني كالي امي هنا عد وفاء جاية تحف .. ركبت سيارتي كلت حتى اخابرلها تنزل اوديها للبيت .. شفت وفاء طلعت ولابسة اسود باسود .. خابرت على امل كالت اني رجعت بالطريق .. عرفت بينهن ملعوبة وجاية هالبومة تطبقه براسج 

- وشني ملعوبهن 

- ما ادري ولا رايد ادري .. سدي بابج واكعدي لحد ما موضوعنا يمضي على خير كعدتج باربعين جعفر مالها داعي لا هو جان يحبج ولا انت باريته ولا الناس عايفتج بحالج..  بعد وجودج شنو معناته !؟ 

-هسه مو هاي اني الرايده اعرفنه وفاء عليمن اجت حتى وحدها مو امها وياها ونكول جبرة وجيرة .. زين امل ليش لهسه تمر لوفاء يعني حازم معقولة متكدر تمنع امل من وفاء شوفة عينك شكثر سسولنا مشاكل .. مالك كلمة على امل 

سكت ... باوعتله : اني ما اقلل منك بس ليش ما تكدر تحاسبها تطب لوحده انت فسخت زواجك وياها شنو معناتها وشتريد !؟ يعني ما كافي المشاكل السوتهن النه !؟ 

بالحجي تكلي اني ما اسكت لاحد واناملي على سالفة بس دا اشوف امل لعبت بينا لعب وكل الصار بيه وبيك هي سببه لو ما رايحة لجعفر من البداية جان كل هذا ما صار .. 

-اتعارك وياها واطردها ايام وترد شسوي !؟ عدي جهال منها احطها بركبتي واكتلها 

-اني مكاعد اكلك اكتلها بس ما معقولة تروح وتجي وتحشد وتلعب لعب وانت متكدر تسويلها شي هاي واني بعيدة عنها لو صرت ابيتك وتكابلنا شراح يصير !؟ 

هسه انت عرفت اجتي لوفاء ومشت شسويت ؟ 

- تصايحت وياها شسويلها اكثر من هيييييج 

- وتشوف مصايحك ديجيب نتيجة وياها !؟ بالعكس هي دا تمشيك مثل متريد وعود صيحلك شوية وتسكت متهتملك 

- وشلون امشيتني 

-ليش نسيت شلون وافقتلها على خطبة وفاء ونفذتلها اللي اتريده 

-وهسه وفاء  وين ؟ انت ليش تاكلين خـ * هي لو كادرة تمشيني صدك تلف وتدور حتى تمنع زواجنا اني وياج 

- لا تغلط 

- ما اغلط بس لا تخربطيييين 

- اني ما كاعد اخربط بس تخابرني طلعي لا يسووولج شي .. شني اطلعي خو ردهن .. حطلهن حد الى متى نضل شايلين هم لامل ها شراح تسوي ها شراح تعمل .. اذا انت رجلها ما تكدر تسيطر عليها منو اللي يسيطر عليها 

- اكلتي خ* هوااااي كاااافي 

- لا تغلط افتهمتتتتتت مو متكدر لامل ترجع تذب حركتك بيه 

- لج بت الاوادمممم شسويلهاااااااا مرة هي اتشاعف وياااااها ؟ اتعارك اطردها يردون العمام يكضوني مرتك ومرتك وام جهالك وهاي شوفت عينج هاجرها وصايرين اخوان وعايفها بس لجهالها بعد شسووووي عدي جهال منها من اطلك امهم واذبها جهااااالي ما يضيعووون ما يضلون بين بيت جدهم وبيتي ويسيبووووون 

ما مرتاح وياها واااااااللله ما مرتاااااااح  وجزعت من سوووووووالفها بس شسووووي 

لو زلمة اكضها وانعل والديها بس هاي مررررة وام جهاااالي اليجرالها يجرى على جهاااالي لو طلكتها ولدي يصبحون ولد المطلككككككة وبتي تنعاب بامها .. كافي جارع البكلبي وساكت منها لا تزيدين بهمي 

سكتت وبقيت دايرة وجهي ع الشباك 

بقى يسوق بدون كلام شافني دايرة وما احجي .. ندسني وهو يغير الموضوع بسؤال : متعشية ؟ 

ما جاوبته .. 

طبطب على ايدي : مو احاجيج 

-ما اريد شي حازم 

- جا شبيج ؟ 

- ما بيه شي 

- انا غلامك يبوي وصلنا لهالمرحلة الگشرة 

انداريتله بسرعة باوعت عليه كال : اي جا غير اعرف شبيج احجي 

-من احجي تكلي سكتي ومن اسكت تكلي شبيج احجي 

-لا اتقشمر وياج والله عمي احجي غردي براحتج لا تسكتين يلا 

- ما اريد شكراً 

-لا احجي بداعتي هو اني شيونسني غير سوالفج الغمة 

باوعتله ضحك .. حجيت : من تشوف روحك عاجز وما تكدر تسوي لامل حل لا تجي تذب حركتك بيه وتكوم تغلط عليه .. افتهمت 

-واني شغالط 

-لا حشاك ما غلطت 

-عمي اسف ما تنعاد بس لا ضوجين 

بقيت عاقدة ودايرة وجهي مشى ايده على زندي :صبا هسه مو كتلج اسف جا بعد شكول 

- لااااا تغلط وتصيح ولازم بس تنطق اسف ادوس دكمة واغير وجهي واكوم اضحكلك وانسى كلشي 

-يابويه انت هم طلعتي شخيخيطة 

-اني هم !؟ ومنو غيري حتى اني هم ؟ 

- يا بويه ... سلام الله على ابو الحسن صدك من كال السكوت من ذهب .. خل نسكت لا انوب نزيد الطين بله وهو مبلل من كاعة 

درت من عنده ..

كام يسوق بدون حجي صف كدام ابو مشويات كال: شمشتهية اجيبلج ؟ 

- ما اريد شي 

 اخذ المحفظة وباكيت الجكاير والجداحة ونزل .. وكف يم ابو المشويات طلب منه ودخن جكارة اخذ منه واجا صعد حط الاكل بحضني وشمر جكارته ورجع ساق .. ما فتحت ولا شفت شجاب .. 

وكف كدام باب بيتي ، عفت الاكل بمكاني ونزلت .. حسيت نزل وراي باوعت مشى للدكان عفته ودخلت للبيت .. شوية وفات وراي شايل علاليك كتله : شنو رايد تبقى هنا 

-بس انطيني الكرسي رجلي ونت عليه اذتني 

جبتله كعد .. كام يعكد بروحه متألم من رجله سكتت 

اخذت العلاليك للمطبخ لكيته جايب معلاك وبطل بيبسي وصمون وحلويات وكرزات  من الاسواق . 

صاح : علكي التلفزيون واطيني الريموت 

اجيت علكت وانطيته كض ايدي وسحبني كعدني على رجله : اني اسف ما اغلط وقدرج على راسي بس من اصير عصبي اكوم اخربط يعنيييي 

يحجي كمت اباوع بوجهه حجه : حاقدة عليه 

- لا اسم الله ليش بس شايلة هم هاي واحنا بعدنا ع البر من اعيش وياك شلون اطلع من ضيم اهلي اطب بضيم امل 

- واني وين رحت 

- مو هو هذا المضايقني انت اديك مربطة عنها بسبب جهالك وحجي عمامك وهي مستغلة موقف وكاعد تمشي وتسوي اليحلالها بكيفها 

- الحل 

- الحل يمك ما ادري اني لو عندي حل خو اكلك بس انت التعرفها وانت التتعامل وياها اني ما رايدة عداوة ويا احد ولا ناوية احد براسي واخطط وافكر اني تعبت بحياتي حيل كل الاريده ايامي تمشي بهدوء ويرتاح بالي تعبت احسب وانتبه واشيل هم .... قاطعني 

- يولون اني اتصرف وياهم ... جا انا ليش كتلج طلعي بسرعة حتى لا يوجعن راسج لا تفكرين بيهن خلي يولن . 

حجاها وهو يبوسني بخدي 

رفعت اديه وحاوطتهن على ركبته وحضنته حطيت راسي على راسه

سكت كام بس يتنهد .. حجه : وخري عني امشي .. روحي جهزي العشا 

ابتسمت ومشيت جهزت صينية وحطيتها لكيته مركز ويا فلم لعادل امام .. ساعدته يكعد بالكاع وكعدت يمه اباوع الفلم .. حجيت : راح تبات هنا 

-جا تظلين وحدج 

- جديدة على احمد راضي 

-بهالفترة مو مناسب خلي بس الله يفضها على خير والله كريم .

ضليت اباوعله .. اندارلي : تريدين اروح 

ابتسمت وكمت فرشتله وذبيتلا الغطا .. وتمددت يمه .. 

خابرت عليه امل بـ ١٢ هو بين النايم والكاعد رفضه وذباه صامت وجر المخدة واندار نايم .. باوعت ... لابس فانيلة داخلية سودة ... حطيت راسي على جسمه .. 

صدت عيني بالحايط .. شريط حياتي كله مر عليه من وكت ما ابوي زوجاني لعدنان واني جاهل لعيشتي عد عدنان وضيم امه ومعايرها وغلطها لحد طلاكي وتوسلي وبواجيي بس حتى يرد عليه برسالة وما يعبرني .. لجعفر وقسوته وطغيانه لحد ما كتلني وطردني ورحت لعمي .. ويمت العندي واداينت حتى ابنيلي صريفة تحملت حر وبرد ما ضاكه احد .. لحد الله حطلي حازم بطريقي .. من يوم ما نزع شحاطته وضل حافي حتى اعبر للبيت وما اتطين .. من ذاك اليوم الله جازاني وانطاني العوض عن كل ايام المر المريت بيها 

رجال وصل الموت وانذب بالسدة من وراي وبمعجزة حيا 

وما تاب مني .. رجعلي اقوى يصد عني كل الرايدين يتناوشوني ..  حتى اقرب ناسه .. 

عمري العشته كله وحدي 

اجا اليترك كلشي ويحط يمي حتى لا اضل وحدي .. 

مديت ايدي حضنت ظهره وبست جسمه واشتمينه 

تحرك من نومته وهو مغمض رفعت نفسي عنه وهو اندار على ظهره وفتحلي اديه حطيت راسي بحضنه .. مد ولمني بين اديه وقرب وجهه لراسي اشتم شعري وباسني .. 

اندار صفح واني على اديه .. وعصرني حيل بحضنه : ليش ما حاي تنامين يبعد روحي . 

- لا تتركني ابد .. الكل عنده اليعوضه اني بس اللي ما عندي بالدنيا غيرك . 

باسني بكصتي : يمج .. نامي ارتاحي لا تفكرين .. 

رجع عصر عليه بحضنه وعدل الغطا .. ورد يغفي .. نمت بحضنه للصبح . 

ثاني يوم الصبح  ب٨ حازم طلع لدوام 

عاد اني كعدت على كعدته غسلت البيت كله وكاعد اشتغل خابرتني مرت جعفر .. كالتلي : انت بالبيت ؟ 

- اي 

- جا ليش  شعجب ما جيتي ويانا للاربعين 

- حازم ما رضى .

- ها زين .. اني راح اجي للبيت حيل تعبانة مو مال اضل عد بيت عمج ولا اروحن لاهلي 

- ديلا هلا بيج 

ذبيت الفاصولية ع النار تستوي واني طبيت سبحت وطلعت كضيت ثوب عدي لازم اكمل خياطه بس الكهرباء طافية .. فرشت جرجف يم الباب وكعدت اطرز .. وشغلت بالتليفون قصيدة 

لا تخليني وحيد وكلبي حاير .. كلبي حاير حبيبي كلبي حاير 

لشوفتك مشدوه شوفي وعقلي طاير .. وعقلي طاير حبيبي وعقلي طاير . 

مندمجة بين الخياط واني اسمع 

فاتت مرت جعفر ومنى وجهالهن .. ذبيت من ايدي وخذت نونه حطيتها على كلبي : بنيتي يمه .. التعبانة 

حجت منى : يا تعب موت احمر بالعباس النجف ما تنطب من الحر متنا شني ماكو كهرباء 

تحجي وتنزع بالحجاب وتذب 

: لا والله بس مي البوري بارد طبي ذبي مي وارتاحي تراب النجف ثكيلة متنحمل اذا متسبحين 

اجاني ابن منى : خالة ماكو اكل 

- يا عمت عين خالتك .. جا ما متريكين 

شهلاء : اسكتي روحة جية كلاص مي محد اشترى 

- يا جا والفلوس اللميناها ع الروس ؟ 

- شمدريني اروح اطلع صوتي واني كاضة عدة 

من جيوبنا طلعنا واشترينا ماي واتريكنا لفات بيض سلك من هاي البصف الامام .. بس الجهال وين تقنعهم بلفة سلك حرام نونة ما كلت 

- يا مو كلت لسهى البارحة اندز على صدور دجاج ونسوي لفات منا. 

منى : - سهى تكول ما ادري الفلوس كلهن يمج 

- يمي شنو غير عد عمي تاخذ وتدز واحنا لامين .

شهلاء : حتى عمي سمعته يكول الفلوس عد صبا 

- ياااا 

جر هدومي ابن منى : خالة كوووومي جوعان 

ذبيت من ايدي وكمت بسرعة طكيتلهم بيض وطماطة وجبن  وكعدت اوكل الجهال .. شو منى وشهلاء هم كعدن  ضحكت .. 

حجت منى : اكلج حكه صدك البارحة سهى ووفاء تعاركن الا شوية 

- عليمن 

- وفاء كامت تحجي عليج بين الكاعدين على اساس خربتي قسمتها وسهى كامت ترد .. اخير شي وفاء ذبت حجاية شكبرها كالت لو ما جانت تجينا للبيت تدور متعة خليني ساكتة 

وكبت بس عمتي ام يوسف كومتها وطردتها وكالتلها حجايتج عيب وما يصير تحجينها وردتها خوش رد وكضت سهى خاطر لا تصير مشكلة وطلعت وفاء 

- وياهي التدور متعة اني !؟ 

- شمدريني حتى سهى حاجتني كالتلي صبا شمسوية حتى وفاء تذب عليها هيج حجاية 

- شمسوية خذيت حازم .. راح تمدحني وعرف حازم من الاول هل كالي اطلعي مرته جانت يمها الظاهر طالعات الهن بسالفة جديدة 

منى : مرته مبينه ما تنكدر الله يساعدج عليها شلون راح تجرعينها . 

- هي ما تكمل ويا احد .. الدنيا ما تنطي كلشي .. بس المهم حازم عدي الباقي كله سهل .. وحازم يعرف بكل ذني السوالف ما يمشن عليه . 

اكلن وتمددن ينامن  بس حارة هستوهن غفن اجت الكهرباء شغلتلهن المبردة وكمت ترستها الهن وطفيت ضوا الغرفة وجريت البردات حتى يرتاحن ضليت مكابلة جهالهن وشايلة حسوني اهز بيه امه تعبانة نايمة .. كمت وزعتلهم من الحلويات الجابها الي حازم البارحة وفتحت الهم كارتون ... شوية اباوع حتى الجهال ناموا

 بس حسوني يلوب من اسنانه خذيته وكعدت وياه بالمطبخ .. 

طشرتله البتيته والخيار والخواشيك وغراض المجر ووكفت ركبت الغدا وكابلته وكعدت يمه اخيط بيدي خابراني حازم كتله اجو وكمت احجيله 

كال : شمسوية غدا 

-فاصولية بس مو بلحم عندي بس شحم سهيته اعزلك خاف ما تلكى غدا ابيتك 

-ياريت حتى امر اخذ حيل جوعان واكل البرا جزت روحي منه . 

كمت حطيتله بجداري صغار لحد ما اجا اطيتهن الها من الباب وهو اطاني جيس وبيه علبه ؛ شنو هاي ؟ 

-كنافة شفتها بطريقي واشتهيتلجياها 

-يبعد روحي .. جان كتلك ارتاح بس خطية البنات نايمات 

-نوم العوافي لا خل اروح هم اغسل ابدل هدومي ذني من امس علي .. طبي يلا مع السلامة 

راح واني شايلة حسوني 

مشيت للمطبخ فتحت العلبة اكلت شوية .. حيل طيبة بس تنغصت لمنى  تحب الحلا عود من تكعد تاكلها هي وشهلاء  وعود اكل وياهن .

شلت بطرف اصابيعي حطيت بحلگ حسوني كام يجر باصبعي يعض بيه كمت اشمشم بيه .. ثردتله صمون وجاي ووكلته وغسلتله وحطيته على رجلي اهز حتى ينام .. 

كمت اباوع .. الله يحفظه 

الله ما كاتبلي هالنعمة .. ما كاتبلي ريحة طفل من بطني اشمه واونس روحي بيه .. اليوم بحيلي بعد سنين لو راح حيلي ياهو الالي ياهو اليشيلني واني عاجر ؟ 

الحمد لله على كل حال 

بست حسوني وصليت على محمد حتى لا اضره بنظره .. 

سمعت الباب انفتحت وصوت جهال دخلوا البيت .. انفتح باب المطبخ طبت سهى : جا نامن 

- اششش الكل نايم 

- هاج هاج ابني يمعودة محتركة حرك .. خل اطب اسبح اكو مي 

- روحي 

شلت حسن يم امه وجريت جهال سهى للمطبخ صبيتلهم وكعدت اوكلهم طلعت هي : بس اطيني هدوم منج بسع 

رحت جبتلها اعرض ثوب عدي واطيته الها لبسته وكعدت وياي تاكل ويا جهالها وتسولف .. كتلها : جا ما جيتي وياهن 

- حسبالي اضلن ابيت عمي رجلي ما رضى شلون ولد عمي موجودين اجاني بهالظهرية يهلهل كتله اقلها اخذني لبيت اهلي اناملي ارتاح جا اروح غاد غير عمتي الكاها محضرتلي شغل مال يومين بيه حيل اني 

- دكلي وروحي نامي .. 

- وين رحتي امس اتلفت ما لكيتج 

- سولفتلها 

كالت : برابيكه هواي رجلج هاليعرفلهن 

ضحكت وهي كالت : فدوة عينج ع الجهال بس اناملي شوية عليج العباس 

- دروحي نامي كبل لا تطفى السحب ب٤ 

ركضت تمددت يم رجلين منى ونامت 

حتى جهالها تغدوا وذبوا ارواحهم  طفت ب٤ ماكو ربع ساعة اجتي الوطنية .. ضلوا على نومتهم لحد ما طفت الوطنية 

حطيتلي قوري جاي .. 

ومنى رجلها كام يخابرها كعدت تحجي وياه وشهلاء كعدت لابنها ترضعه .. واحد انزعج من واحد لحد ما كعدوا كلهم .. طفيت الحاي ورحت لميت الغطا والمخاد وجبت صينية جعك ابو الدهن واستكاين الجاي غسلن وجوهن وجهالهن عرك وياهن ع الجاي يحطون كعكهم بيه .. واني اسولف وياهن 

صاحت منى : ولج اصبيييييه جايبة كنافة وضامتها عني ومقشمرتني بكعكج هذا اليابس 

ضحكت : والله ضميته الج اعرفج تحبي 

سهى : سم وزهر مر دجيبي خل اكل وياج 

حطنه وكامن ياكلن .. واني اخذت شوية منهن اكلت .. 

حجيت لحازم ضل يضحك كال : لو ادري هيج جان كثرت 

-لا الله يكثر خيرك لا لكمة هنية تكفي مية 

- وهسه هن موجودات 

- ليش رايد تجي 

- لو بيدي اي والله  والا مالي راحة وانت ماكو والله بس نصبر والله كريم بس لازم نبدي نحضر لهالموضوع بحيل الله الجمعة اهيض الولد وياي خاطر اصبغلج الغرفة و اجيب اخشاب 

-حازم ابيض بروح اهلك مو برغندي 

- والله شو كلت اخضر فاتح مطفي .. ابيض يتوصخ ما ينراد

- لا لا اني اذا ما اشوف الابيض ما يرتاح راسي قابل عدي جاهل يوسخ شو بطرك روحي بس الابيض لون النظافة يحسسني براحة نفسية 

- هاي الج ابيض ابيض

لليل خواتي اجوهن رجولتهن والبيت فرغ بس اني وشهلاء

شغلنا مسلسل وكعدنا نباوع 

خابرني ب١٢ 

متعارك هو وامل علمود سالفة وفاء وشلون اطب البيتهم ومتحاوزة عليه وهو متعدي عليهم ومتطابخين ورايحة هي جارة عبايتها وعلى بيت اهلها .. 

ثاني يوم جانت الكعدة  النهائية مال الولد الويا جعفر دك بيت حازم وكاوموهم وادخلت ناس يابو ناس بالسالفة لحد ما اتحسن حازم واجت سادة وشيوخ للفصل .. من ٥٠ مليون .. الى ٦ ملايين صار الفصل على دكة بيت حازم .. فلوس تعويض لتصليح البيت اللي ابنهم دكه ويا جعفر . 

العشيرة اخذت مليونين .. واطوا لحازم ٤ ملايين حتى يصلح واجهة بيته الي خربت ... بس هو عاف الواجهية وثاني يوم خابر خلفة وطلع عمال حتى يبني لجهاله غرفة فوك يم غرفة امهم . 

اسبوع يلا خلص الغرفة 

بهالاسبوع كله هو وامل زعلانين .. هي ابيت اهلها وجهالها بين بيت اخوه وبين بيت خوالهم .. وبته عد خوالها ويا امها 

كمل غرفتهم وحول الكنتور مال الجهال والغراض والهوسة فوك .. 

وجاب صباغ وصبغ الغرفة مثل ما ردت ابيض .. 

من سامعة امل جاية للبيت متعاركة وياه 

لان ناقل كنتور جهالها للغرفة الفوك الاصغر من الغرفة الجوا .. وكايمة مشخطة الحايط حتى تحرك كلبه 

كايم متعارك وياها وطاردها .. 

ورجع خابر ع الصباغ رمم السوته وخربته .. 

من كالي كتله : خو رجع كنتور جهالها للغرفة الجوا واني خليني بالغرفة الجديدة الفوك 

كال : ختولي  من كبل لا اسوي الغرفة الفوك  هي متفقة وياي اخذ غرفة الجهال واتزوج وخلصني من صارت صدك وشافتني راح اتزوج وارتاح منها كامت تطلعلي بهالافلام اطك بعقلي اطلكها وانعل والديها والله .

- هسه احجيلي المهم .. غرفتي شوكت تجيبها 

- اني وين احجي وانت وين 

- اي شتسوي يا كلبي خو ما تضل تحرك بكلبك .. ما دام رممته وصلحته انسى الحجي والقهر ميفيد 

- جزعت منها صبا جزعتتتتت 

- اي شتسويلها انسى .. وفكر بغرفتي اريدها حلوة وتكمة ها 

- والله تستاهلين ابو التكمة بس ما ضلي غير ال٥ ملايين الضامها لمهرج و ذهبج وغرفتج من ضمنهن .. هاي واحسبي الزفة وهوسة العرس 

- والصالون و البدلة وهالسوالف 

- بعيني والله يمكن اشوف عمي بلكت يدايني مليونين زياده 

سديته وياه ورايح لعمه كايله ما عدي .. 

رايح لاخوه متعذر من عده .. عرف ما راضين بالزواج فما ينطونا .. رايح لواحد من جماعته مداينه ٥ ملايين 

اطاني منهن ٤ للذهب مليون للمهر .. 

اني طرت من الفرح من كالي ٥ ملايين جهزي نفسج بيهن 

خابرت على سهى كتلها كالت : اي بالعافية بلكت بيه خير ويفيدج احنا شرايدين قابل نكرهج .. 

كتلها : اريدج وياي نروح نشتري الذهب .. 

كالت : باجر العصر امرلج 

صدك ثاني يوم مر عليه حازم على اساس اروح لسوك الأولى .. 

بس سهى كالتلي : سوك الكيارة احلى 

عاد كتله : اخذنا للكيارة 

كال : الا هالسوك يعني 

- مو يكولون حلو ليش 

- ماكو شي اخذج 

- امل تشتغل بيه 

حجت سهى : وشلها غرض بامل السوك مسجل باسمها خوية 

- ما كلت شي خوية راح اخذكم

كتله : لا عادي اخذنا السوك الاولى اني من الاول جنت ناوية للاولى 

سهى : شبيج غبية الكيارة اكبر واحلى 

ندستها وغمزتلها وكتله : لسوك الاولى عيوني 

هز راسه وساق بدون كلام لحد ما وصلنا لسوك الكيارة 

كتله : ليش كتلك الاولى 

- كملي يابه وخابريني وديري بالج على جيزدانج 

- ماشي 

مشينا للذهب اول شي .. خذيت كلادة زينة وحلقة و محبس وتراجي .. الضا من الفلوس تقريباً ٧٠٠ وكسور 

ورحت على ابو القماش كصيت ١٠ اقمشه حتى اخيطهن شلحات للبيت على يكفي خصوصا .. بس سهى كالتلي : اخذي جاهز كشخة وهم خيطي 

واخذت بنطرونين و٣ تلث قمصان ستريج من اللي نازل بالسوك مثل اللي يلبسوه الاتراك بالمسلسلات  مليان السوك بلبس المسلسلات التركية . 

بعدني كاعد افتر بالسوك .. اني وكفت على محل شحاطات اعامل الولد و وسهى كدامي تشوف وتعامل عجبتني شحاطة كاعد ادفع بفلوسها وسهى دكلي : صبا تعاي شوفي حلو هذا 

- روب نوم ابيض اخذ 

- اي ليش متاخذين حلو 

كتلها بيش كالتلي : ب٦٠ الف 

- يمعوووودة اروح انطي ٦ على روب البسه مرة 

- ليش ولج يخبل بليلة عرسج جا شتلبسين 

حجت البنية : اذا تريدين انزلج من سعره اسويلجياه بخمسين 

سهى : اخذي يخبل والله وعود هم ناخذ غيره خفاف 

جان توكف امل .. عرفت المحل الها .. انطيتها ظهري وندست سهى : امشي 

سهى شافت امل وامل عرفتها كالتلها : ها خير اليوم هنا 

جريتها : امشي سهى 

جرتني سهى : جاية اريد هذا الروب .. بيش اتحسبيلنا ما دامج طلعتي عرف 

جريتها : سهى 

- الفكر صار عدها فلوس وجاية اتلم هدوم وتلبس براس الزواج ؟ 

سهى : بجال رجلها عيوني ليش متشتري 

عفت سهى ومشيت من المحل ليكدام 

كامت امل تصيحيني ما رديت ومشيت ليكدام ما اريد اي شي يخرب العرس حتى لو مشكلة هلكدها هي ما تعول على مشكلة تكبرها واروح اصير كدامها اتورط . 

اجت وراي سهى : شبيج خفتي منها جبانة 

- اني جبانة سهى ما عايزة مشاكل خلي تفض سالفتي على خير 

- لو تشوفين الوجه شصار من كتلها اشتريت ذهب ب٤ ملايين وشوية كامت تنكط سم 

- وليش كلتيلها 

- يطبها طوب مو ضرتج هي 

- سهى امشي رحمة لربج خل اخابر حازم 

- شتخابرين بعد رواب النوم والمكياج ممشترين 

- منلحك والمغرب غرب 

- اكلج هي عدها محلين مفتحة ؟ 

- ما ادري الاعرفه محل 

- لا شبيج عدها محلين 

- اول متعرفت عليها وشفتها جنت ما اعرف حازم اتذكر كالت اريد ازوجه واخلص منه يلا افتح المحل الثاني لان اذا هسه كتله اريد افتح محل ثاني يعرضلي وميخليني 

-مخليها عيوني مخليها انت الراح تروحين خدامة عده وعد جهاله حتى هي تحوش فلوس وتصير براسج 

- يمعودة وتصير المهم عندي حازم يصير الي عسى ما تفتح شركات بالعافية عليها ، اني ياهو ماتي . 

خابرته كالي : منتظر اطلعيلي 

رحنا وصلانا وسهى ذبتها عليه كالتله : شفنه مرتك بالسوك 

ما جاوبها كالتله : بس ما تحاجينه وياها مشينا بسرعة ما نحب المشاكل . 

كاللها : هاي عاشت اديكم احسن 

رجعت كلتله : هي مفتحة محلين لو محل واحد على ما اذكر واحد 

حجيت اني : وانت منين تذكرين .. 

حجه حازم : ليش فاتحة محلين 

جاوبتني : جانت تخابرني وتحجيلي غير 

انداريت الها : تخابرج من يمتى انت وياها تتخابرون 

- كبل ليموت جعفر من مات كطعت بعد 

- وعلموديش تخابر ؟ 

حازم : علموديش اختنا كباحتها طك بطك يعني تعترفين جنت انت صافة ويا جعفر وتاخذين المعلومات من مرتي 

سهى : واني ياهو ماتي هي ماخذة رقمي من جعفر وتحجي وتخابرني حتى امنع اختي منك . 

انداريت الها : يعني جنتي متفقة وياها عليه 

- جنت خايفة لا ننفضح 

جرني حازم وكالي : شارع منا لا تلتفتين عوفي الموضوع راح ومشى شيفيد الحجي بيه . 

انداريت واني اكللها : والله يا سهى ما ادري شكلج انت اختي رايحة متفقة وياها عليه !؟ 

- واني غير لمصلحتج 

حازم : سدو الموضوع كااافي .. ششتريتو احجي 

- ذهب وغراض 

حجيتها برد بارد 

- بالعافية 

رجع كاللها : يعني امل فاتحة محلين !؟ 

- اي حاطة عاملة بمحل وهي بمحل ثاني 

هز راسه .. ضليت اباوعله : ما خلصت مسواك وراية بعد هواي 

- تروحين غير مرة تكملينهن 

-اطلع الصبح للاولى 

- العصر اني اخذج 

- خو من الصبح اكضيهن حتى اجيبن غراض للقماش 

- سالفة تروحين للسوك انسيها لو اني اخذج لو لا تفكرييييين خوووش اني ما اتزوجتج حتى تصيريلي مثل ذيج اني رايدج مرة الي بالبيت افتهمتيييييييي 

حجت سهى : يعني وحدة تشتغل وتبني نفسها ووحدة جوا ايدك تدمغ عليها 

- خوية خليج محضر خير ولا تدخلين 

- جا ترضى لذيج تطلع وتطب بكيفها وما ترضى لهالمكررررودة 

- ذيج هالثنيت عليها ومخليها حالها حال الجلب وراي تفتر بلكت تخرب علي .. اني لا حاوي ذيج ولا اريدها بس ما كاضني منها غير الجهال .. غيرها لو حذى حذوها ما يكضني عنها شي 

تنهدت وبلعتها وسكتت بس استهضمت 

حجتها سهى : قصدك عاجر يمتى ما طخ وما عجبك وما مشت على مايك تطلكها وتذبها 

من حجتها سهى كتلها : سهى كاااافي 

حجيتها ودموعي اتطافرن كمت اصيح : كافي عوووفي الموضوع كااافي 

سكتت وهو حجه : صبا لو ما غاليه عليه ما اسوي كل.... قاطعته 

- كافي مرايده اسمع اي شي اعرف بروحي عاجر وادري لو حركت روحي مثل الشمعة حتى اضويلك راح انشمر شمرت الجلاب .. ما يحتاج تكثر حجي واذا مراح تسكتون نزلوني هنا وكملوا حيجكم بس خلصوني من كلاااامكم ما ايرد اسمع . 

سكتوا هو وياها بس دموعي ما وكفن طول ما السيارة تمشي 

صف اباب بيتنا فتحت سهى الباب اني جاي اريد افتح كض ايدي : ابقي احاجيج 

- سمعت ما يكفي شكراً 

نكثت ايده من عندي ونزلت وبقن الغراض بسيارته .. 

نزلهن وعافهن بالحديقة وصاح طلعتله سهى اخذتهن منه وراح .. 

رجعتلي كالتلي : ولج غبية راح يخليج ابيته خدامه لمرته وجهاله افرضي نفسج واملي شروطج عليه من هسه واعزلي كون مطبخج واكلج وحدج خوما تكعدين لهاي ام الوصخ خدامة 

- مراح يقبل سهى الله يخليج عوفيني 

- طبعا ميقبل يريدج لجهاله وذيج المستفادة 

- وهو منو الما استفاد براسي حتى امل ما تستفاد خليها مستفادة بس كون اكو سكف يحميني ورجال بيه رجه يراعيني 

- وشناقصج انت حتى تدورين سكف ورجال شو بيتج عدج وايدج خير الف شغلة تشتغلينها وتحصلين 

- يا بيت الحيدر يخاف يطبلا و يتجرا عليه لان حازم بظهري ليش نسيتي من بصموني وبيعوني الجواي والوراي لولاه اني وهاي بالشارع والفلوس بجيب حيدر .. اسكتي سهى رحمة لوالديج اني ما محتاجك بيت محتاجة سكف يحميني وهالسكف حازم خليني جوا جناحة اقلها ضيمه ولا ضيم اخوتي وعمي 

حجت شهلاء : هسه صلن ع النبي عيني شو مشتريات السوك كله وجايبات كومة ذهب بعد يا ضيم فدوة دذكرن الله 

سهى: شبيج انت يا ذهب .. هاذ شغلته تلبسها يوم العرس وراها اضمه بعلبه لفد سنه ختى تنطي يجدد سيارته لو شوف شمحتاح وياخذهن .. حاسبتهن الها 

بس هضيمة تصير خدامة تحت ايد امل وذيج مفتحتلها محلين وصبا المكرودة تكعد تنظف بيتها وتوكل جهالها حتى تحي ست الحسن تشمر عليها وتغلط وذاك صام حلكه وساكت والله هااا ام جهالي ما اكدر احجي وياها 

صبا : ترا متعارك وياها وعد اهلها 

- تلكينها هي الطالعة حتى تخلص من ضيمه وربج لا طاردها ولا هم يحزنون 

- وخلي تطلع شسويلها 

- وانت ضلي خدامة 

- سهى لا تزقنبيني الله يخليج 

- لا ما كاعد ازقتبج بس مثل ما ذيج الها حقوق انت هم ما طول ما عدج جهال .. اضمني راحتج اقلها يعزلج عن امل ما تشبعين ضيم منها وانت مكابله بزريتها 

- وليش احسب بزريتها خو احسبهم بزره واداريهم لعيونه 

- خفى على هالعيون خايبة يا عيون .. مرة اتختخ براسج شمالج انت غبية 

- ميعيش بهالدنيا غير الغبي  الما يفكر خليني غبية ولا تفتحين مخي على امور اني ما مفكرة بيها خليني على كد امنياتي غرفة صغيرة تجمعني بيه وانتهينا 

- ضلي خل اشوف حازم وين يوصلج هالبلوه هاذ ياخذج للشط ويرجعج عطشانة 

- خليه 

- اي خاف تكولين ليش ما نصحتني 

كومن سون عشا رجلي راح يجي 

وانت باجر خابري على منى تروح وياج للاولى حتى تكملين غراضج 

- ابنها مريض متكدر 

- جا شلون هم ارجعلج 

- لا ما ضل هواي اني اروح واكضيهن 

- تكدرين 

- شعدي 

- اذا صارلي مجال ورضى البلوة مالتي عود هم اجيج 

- ان شاءالله 

خابرني حازم ما رديت عليه .. ضل يلح كم مرة قفلت 

ثاني يوم هم ما رديت .. العصر كتبلي : اني كدام الباب اطلعي 

دزيتله : ما اريد اروح شكرا 

- دكومي طلعي لا اطب والله اطلعج بيدي 

كمت لفيت حجابي وعباتي .. وطلعت ركبت وياه 

حجه : جبتي فلوس حتى تكملين غراضج 

مجاوبته 

صاح : احاجيييج 

- امشي 

تنهد وكال : شبيج من امس واليوم مكلوبه علي ترا اختج شيطان اذا ضليتي ورا حجيها تخرب بيني وبينج والله . 

- ما باقية وراه حجيها 

- جا شبيج زعلانة مني 

- ما زعلانة

- واذا ما زعلانة ليش ما تردين علي من اخابرج 

مجاوبته 

.. هز راسه وساق .. حجه : اني مو قصدي اضايقج بكلمة ولا بعمري حسبت انت ما تخلفين لو فكرت بهيج موضوع وروح هو الصدر .. بس صبا يكلك اليتفق ما يختلف واني جاي اتفق وياج واكلج وحدة اثنين تلاثة الغيرن علاقتي بمرتي وخلاني اكرهه وما اطيقها ورايد عمري وياج لا تعيدين اغلاطها .. بيها شي ؟ 

جا من انبهج واكلج غير حتى اعيش وياج عيشة هنية ونتجفى المشاكل .. 

- بس كلمتك ثكيلة 

- شكلت حتى ثكيلة كلت من تغلطين اغلاطها ما يكضني عنج شي 

- ما جبتها هيج .. كلت امل الكاضني عنها جهالها انت لو غلطتي ما يكضني عنج شي عايرتني بس ما ذبيتها بوجهي يعني مالي كدر عندك من اغلط وياك راح تبذني 

- بالقران ما حجيتها هيج كلت اذا تحذرين حذوها يعني تهمليني وتعوفيني وتفضلين روحج علي، وهذا حقي جا انا من ماخذ مرة المن !؟ غير تشاركني حياتي اكعد تكعد وياي تسولف وياي تكابلني تشوف شناقصني شرايد شمحتاج وبالمقابل اني مكلف عن كل التريدنه وتأمرين بيه .. اوفره الج ليش تشتغلين وليش تنشغلين عني اني رايدج الي .. حقي لو مو حقي . 

- واني ما كلت شي ولا طلب شي سهى هي تحجي وانت مجان لازم تجاوب عليها 

- اختج اتدوس بالمصارين سهى فد وحدة بربو*. بلسانها اعترفت جانت متفقة ويا امل وجعفر حتى تخرب بيناتنا .. هاي مو اخت عدو . 

-ما اضن احد من اهلك رايدني لو هاديك عليه حتى تكول عليها عدو الكل ما رايد علاقتنا وزواجنا والكل بالضد منها مو بس سهى 

- بس اختج مسمومة غيرها رافض وما يدخل 

اختج كل كلمة تذبها تخرب بيها 

- اي انت كول اختج واني اكلك مرتك واهلك وخليها وين ما توصل 

- لا شلنا علاقة بيهم اني اليهمني انت .. والله من امس واليوم النوم شايفة بالعباس اغفي وافز بلكت مخابرتني لو حانة عليه ودازة رسالة شجاني على هالواهس ما ادري كاض الجكاير وادخن وافكر بيج تكول مراهق بعلي 

ابتسمت .. اخذ ايدي وهو يكلي : تضحكين بعد ما حركتين حرك تضحكين 

وعض ايدي صحت : ااااخ ايدي ااااخ 

وخر وباسها : وعلي مسودن بدونج والعباس ما ارتاح من تزعلين جن الهوى متزاعل وياي مو انت اضل مختنك منين ما اصد ما ارتاح لحد ما اشوف هالضحكة هاي . 

- الله يحفظك ويحميك اليه 

- الج بس !

- ايييي 

كلتها واني ارفع خشمي ضاحك بكل غرور 

ضحك بصوت عالي وهوي كلي : غير اروحلج فدوة اني اذا مو الج المن 

ابتسمت وفرحت ونسيت طنكورت امس . 

وصلاني السوك وصف ونزل وياي للسوك لان وحدي وكاعد اختار لعرسي رغم هو ميفتهم بسوالف المكياج بس واكف وياي .. ومرينا بالاحذية كام ينطي رأية بالشحاطات والملابس الاختارهن 

وصلنا لمحل ملابس مال نوم هو وكف ليغاد اني اختاريت اليعجبني واخذت واحد ابيض مال ليلة العرس من ضمنهن .. طلعت كال : شبقالج 

- ما بقالي شي اصلا حتى الفلوس يمكن بقن منهن بس خمسين 

- زين .. وشراح تشترين بيهن 

- اكلك صدك هو مو لازم اني اشتريلك كم ملبس ويا ملابسي يعني هي هيج العادات 

- لا ما اريد اني اشتري روحي 

- بس لازم 

 - ذوقي نحس اصلا اني تلث ارباع ملابسي سود فما راح تعرفين شنو الاحبه من الاسود عوفي هاي اصرفيهن عليج اشتريلج شي تحبينه 

- اشتري عدسات 

- عدسات شني ذني 

- ذني الينحطن بالعيون 

- بكيفج اني ما اعرف بهالزواكات اذا تلبسهن بس بالبيت اشتري 

-عدسات هن بالبيت شنو 

- جا تطلعين عين مزوكة 

- احسب عيوني ملونة شلون تضمني بالبيت 

  - اشتري عمي اشتري اليعجبج امري الله جا اني اكدر 

اشتريت عدسات وكم شال جديد بقن منهن عشرة الاف زيدت عليهن من فلوسي وجبت غراض احتاجهن للخياط .. وطلعنا وكفني برا وكلني لفة تكة وقوطية بيبسي واشترالي طاطلي ولبن ورجعني للبيت وجهي يضحك وفرحان 

حجت شهلاء : شوفي شكد فرق من انت وياه محد بينكم .. صبا نصيحة صح سهى اختج وما تكرهج بس لا تخلين احد يأثر عليج بعلاقتج ويا رجلج ما طول الله ما اطاج غيره كضي بيه بديج ورجليج لا تتعاينين ويا مرته ولا تبارعين الغيرج 

غيرج من تطالب وتتشرط وتفرض عدها اهل عدها السدافعون عنها .. انت مالج غيره شما بيج تكسبينه وتشوفين هو سهل ما يحتاج غير تعدين وتبلعين.. ترا ماكو رجال ميغلط ويصير عصبي ويخربط انت اجرعي منه واكسبي الج .. لكبرتج 

الدنيا مو كل يومية تنطينا واحد خوش يتناطح ويتعارك لخاطرنا 

وحازم مشتريج لا تسمعين الغيره هو وحده الرايد مصلحتج .. مثل ما هو يدور مصلحتج .. دوري مصلحته وما بيها شي لو حملتي بزره تكبرين بعينه ويكبرج على الكل . 

- الله كريم ، مشكورة 

فتحت وياه بالليل اتصال نحجي كبل لا ينام .. 

اتفق وياي على غرفة نوم نروح باجر ونختارها .. وهم البردات والفرشة والسوالف ذني 

رحنا ثاني يوم اختارينا غرفة ب٣ ملايين حيل حلوة ... 

حملها واخذ سيارة ووصل للبيت ووياه النجار صاح لواحد من ولد عمه يوكف ويا النجار على ما يوصلني ويرجع . 

ثاني يوم هم خذاني اختاريت البردات والفرشة مال النوم هم خذالياها من الزينة ام الـ ١٠٠ الف بيها كركش ومخاد ولونها لون الحليب ينكال الها اوف وايت . 

واختاريت شكل التيبلام هم اخذهن وياه .. وسجادات وبطانيات ومن هالامور اخذلي وخابر على خواته يجن يجهزن غرفته .. مرتباتها وناصبات الغرفة وهو حاط سركي وقفل ومفتاح وقافل ع الغرفة . 

واتفق ويا عمي الزفة الجمعة 

ورحت اني ومنى للصالون خصلت شعري ورتبته .. 

ورحت حجزت بدلة للعرس و اتفقت ويا صالون تجهزني بعرسي .. 

ما سويت حنة مشيتها هو عرس هو حنة 

وعزمت حبايبي والبنات اليحبني من الاخيطلهن يم بيت عمي وجوارين بيت عمي واطيتهم موعد ب٢ الظهر عد بيت عمي . 

كبل يوم من العرس .. 

دك تليفوني رقم غريب كلت وحدة من حبايبي رديت 

اجاني صوت كالي : هاهية راح تنسين كلشي بيناتنا وتشوفين حياتج وتحبين ثاني

عرفته صوت عدنان ، سديته بوجه ما جاوبته 

ثاني يوم  كعدت من الصبح حازم جان منتظرني .. 

اخذني اني ومنى جبنا البدلات ووصلني للصالون ورجع لبيته هو عازم ناس وخابصها حتى يعلن زواجه ويسد حلك الناس كلها 

وصاحبه مزورق سيارته سودة وعالية وحاجزها للزفة .. 

اجا دوري بالمكياج ب١٢ .. طلبت منها مكياج خفيف لانو ميلوكلي القوي .. فحطتلي عدسات لبستنياهن وسوتلي مكياج سحب رصاصي ووردي  وحطتلي رموش .. صار كلش حلو .. 

كتلها التسريحة اريد رفعة للتاج والباقي اريده مبروم .. سوتلي مثل ما طلبت  صارت تجنن حيل انعجبت بروحي .. بالمكياج وجهي يزهر مو مثل من ما احط جنه صحراء .. 

منى دهنتلي جسمي بوطرة وحطتلي عطر ترستني .. والبنية رسمتلي على زندي وكتبتلي اسمه وحطتلي خرز لماعية لزك .. خابراني حازم كتله : خلصت تعال 

كال : اطلعي اني قريب وادخلي للمصور حتى ناخذ صور وارجعج للبيت 

- تمام 

طلعت من باب الصالون .. لابسة البركع و الكب سمعت صوت عدنان صاح عليه بس كلت اتخايل طبيت للتصوير .. ودخلت للستوديو كبل 

حجت البنية : اكو ولد يريد يحجي وياج 

اندايرت لمنى : هو عدنان لو اتخايل 

- لا شفته هو 

- وهذا شدراه اني هالصالون واجاني 

- والله يا اختي ما ادري دكومي اطلعي طردي كبل لا يجي حازم فدوة 

طلعتله منى .. كام يصيح بالساتوديو ويكللها : ما عدي شي وياها بس احاجيها 

امدا حظي جا هو العمر كله ما كلبني هسه صرت عزيزة بيوم عرسي اجا يخرب عليه 

كامت تتصايح وياه منى .. اني جوا وهو يكللها : لو مو تصيحين رايد احجي وياها كلمتين وامشي ما اطول والله 

نزلت الكب على راسي ولزمته من يم صدري وكتله : عدنان عرفني بحالي الله يخليك خربت حياتي ذيج لا تخرب حياتي هاي امشي منا 

- بس اريدج تخلين ابالي اضل طول عمري احبج ولو فد يوم اتوازيتي وما اتحملتي ارجعيلي تلكيني منتظرج ..

كاعد يحجي وطب حازم واني اكله : دروح فدوة لعينك امشي 

كضاه من ياخته : انت شعدك هنا 

طبيت وابو الاستوديو وكف .. وهو يطرد بعدنان وعدنان مثل الشارب ويخربط وحازم صار نار 

منى طبت يمي كامت تلطم على خدها : عزا العزاج يصبا ولج حظج ما كعد بسالفة .. جا هو ما ذكرج غير هسه .. شجاباااه صخام اي والله 

طب حازم للاستوديو وهو يكلي : تعاي هنا هذا شجابه وراح وشعدج طالعتله بكل هالمكياج تحااااجينه 

- ردته يروح والله 

- ردتي يروح لو شوفني شكد حلوة ترا خسررررتني مو هاي سوالفج 

- والعباس ما طلعتله الا لما جلب 

اما الاستوديو كامت تحاجي وتكله : ترا صدك لزك ما رضى يطلع راد يحجي وياها كلمتين وهي ما رضت وجفيان شر طلعتله 

سمعها وتخبل كالي : امشي كدامي 

- الصور 

- انعل ابو الصوووور امشيييي 

نزلت الكاب على وجهي ومنى ساعدتني وصعدنا بسيارته وهو عصبي نار بس تجرعها ما حجه ولا نص حجاية .. وصلاني لبيت عمي كتله : حااازم 

- اششششش الحجي مو وكته اعرف شوكت اكضج واحاسبج خل تكضي على خير ونتحاسب 

ندستني منى : دنزلي يلا امشي 

نزلت كالت : ما طول مشاها وسكت سهلة عود من تصيرون كبال بعض تتجازون بشبكة بحضنه قشمري شبيج قابل هو ميعرفج لا ادلغمين عرسج اليوم ذبي كلشي وراح 

تحجي وهي تدخلين .. جانن الحبايب كلهن ملتمات 

وصاحباتي المنا ومنا .. فعفت الموضوع وراي .. وعديت 

وشغلن التلفزيون قرص DVD اغاني ردح .. 

اول اغنية جانت لحاتم العراقي مشتهرة بوكتها .. على عنادك يالاسمر .. فكامن البنات يهزن ويركصن .. تغير الجو عندي وكمت اضحك وياهن 

سحبني وكومني اركص وياهن على الأغنية 

كلمات بيها تكول : 

خلي تفيدك امك .. الا احب ثاني 

بعد ما اشيل همك ... الا احب ثاني 

اريدك تنسى اسمي وتنسى عنواني على عنادك يالاسمر 

اني كمت اهز وياهن .. والبنات يصورن ووحدة منهن كالتلي جتف صبا جتف فواني اضحك وياها هزيت .. والبدلة دلع وصدري كله طالع .. وكمنا نتمايل ونركص وهن لازمات ادية يركصن ويايا

وحسبت حساب بيناتنا لإن بس بنات .. 

وكلهم معارفي .. كرابته ومعارفه  بعد محد منهم جاي .. 

كالوا اجو .. طفينا الاغني بسرعة 

ورجعت لمكاني وهن يصيحن وخرن من الهوى خلي يجيها لا يخرب المكياج .. سوولي مجال كفخني هوى المبردة تنهدت 

واهله كاموا يطبون .. 

امل وبته وامه واخته كلهن موجودات .. شعلن اغاني .. وركصن 

وامل ذبت لحم عود هي ما مهتمة وما تغار .. 

شوية وكالوا .. اجا العريس البسن بنات 

وامل ذبت كوله : فرح گلبي بيوم الدكن طبوله فرح گلبي 

فات هو لابس قاط كامل اسود وحتى القميص اسود مزين ومحدد لحيته ما ادري شوية ليش ما دققت بتفاصيله ولا شفت بس اللي اكتشفته اني ماخذتي زلمة قطعة .. فد شي 

كعد يمي وريحته تفوح تسطر سطر 

صاح على اخته : اخلااااص بس غطيها رحمة لوالديج صدرها كله طالع 

- يا ومنو الاكو بعده محد طاب 

- دغطيها يا خوية 

ندسني : اتغطي 

صاحت اخلاص : الكاب مالها وين 

اطتهياه منى ولبسني ونزلن الكب على جسمي وغطني 

وامل هوسة ورا هوسة وتدبج عود فرحانة ما مهتمة .. ما تغار 

اجتي دنيا كالتلي : بابا صورة اني وياك صورة 

خزرها : عوفي التصوير بتي 

اخلاص امنعي شكو تصوير يصير ما اريد ولا صورة تطلع 

- سويت كبلا تكول منعتهن كلهن 

- حتى دنيا اخلاص 

صاحت اخلاص على دنيا .. ودنيا ما رضت كامت تتحاجى يواها عاد عمتها سحبت التليفون غصب ومسحت شو صورة مطلعتني بيها .. ضاجت دنيا وطلعوا 

حطوا صينية الحنة كبالنا .. وهن يهوسن جابن الذهب .. كالتله اخلاص : هاك لبسها 

- شعرفني بسوالف ذن لبسها انت 

- يا غير انت 

- اخلاص سوي الاكلج عليه خوية 

باوعتله عاكد حواجبه كوا متحمل الوضع عيونه بكصته 

محجيت شي .. لبستني الذهب كامل واطته بس الحلقة واخذت ايدي اخذ الحلقة منها حطاها باصبعي .. اطتني الحلقة .. وهي تكله ايدك .. اخذ الحلقة من ايدي ولبسها ورفع نفسه جر تليفونه 

يخابر كالتله : وكلها حتى توكلك 

يكللها : شكرا ما مشتهي 

- يا ما مشتهي شنو حازم غير مال عرس دوكلها 

كامت امه وامل وكرابتهم يضحكون لان ما يريد يوكلني .. 

اخذت الچطل بيدي ردت اكل .. جرت ايدي منى كالت : وكلي 

- ميريد عوفي براحته 

سحب ايدي واكل القطعه وهو يكل لاخلاص : الزلم راح يطبون سووا درب 

- والحنة بعدنا شيطبون 

- عوفوها شيلوها 

- يا والمن مسويات صينية 

- دشيليها الزلم منا يا خوية دشيليها 

واتستري انتي نزلي هاي على وجهج 

حجاها وهو ينزل الكاب بقوة واني مسوية تسريحة 

ندسته ومديت ايدي كرصت زنده : لا جر افتهمت 

- وخري ايدج لا تكرصين لا اكسرها والله 

واني كاضة لحماية بيدي وكارصته من حجاها لويت لحمايته حيل وعفته .. كال : سهلة  

اندار ورد حجه : تخلص لو ما تخلص وعلي وحدة وحدة 

حجيت همس : اذا جاي تهدد امشي اطلع وانهيها كبل لا تصير خوووش 

مدنك هز راسه وهو صاك على نفسه 

ورجله من العصبية تتحرك .. صاحوا : نسوان البسن راح يطبون 

حجيتها : من هسه احسم امرك تريد لو لا 

طب عمي همس : دغطي روحج لا والعباس اشيل الصينية هاي ووووو ...قاطعه عمي وهو يوكف وعمه وراه 

وسلم عليه وكاله : البنية يتيمة وامانة عندك وصارت امور هواي وانت تعرفني شكثر اعزك والله شاهد اصبية مثل بناتي 

ومن هالحجي وحازم يجاوبه : سالم ان شاءالله بعين 

كوموني وهن هلهلن وعمي يكلي : يلا بوي حطي ايدج بيد رجلج وراعي ولا اتطلعين عن طوعه وموفقة ان شاءالله وشايفة كل الخير 

كوماني عمه واني نازل الكب لنص وجهي .. 

وهو يكله : كض بيد عروستك عمي .. كض ايدي جريتها 

سحبها وعصرها حيل رادت تتكسر بيده وهو يتحرك يريد يمشي .. ندسته حيل واني امشي ورا خطواته 

طلعني من بيت عمي جان محضر فرقة طبل 

بس طلعنا الباب اشتغل الطبل والموسيقى وسيارات وجماعته وربعه وولد عمه كلهم جايبهم ركضوا وديحوا وهوسوا كعدوا الفرع كله على حيله .. حتى يكسرون السالفة الصارت كبل من كالوا ماخذها بالسر .. كسرها بزفة سمعها القطاع كله . 

ركبني بالسيارة وكعدني ليورا .. 

ركب عمه ويانا ليكدام وصاحبه كاله : مبروك ابو عليوي شايف خيرها ان شاءالله . 

- الله يسلمك  اسماعيل الذهب على راسي . 

اني ما ادري ليش اختنكت .. صابني شعور ما ادري شلونه 

خصوصا اصابيعي وجعتني من عصرها بيده مو زفة كتلة مبطنة .. حتى ضحكة ما شفت منه وداير عني الوكت كله 

جبدن عيوني صارن دم .. 

حس هو اني كاعد اجر بخشمي وابجي والسيارة تمشي ومغلين بيها ( يلاكونا لو بيهم زود ) 

قرب وجهه يم اذاني وكالي : لو مو تبجين لو اليوم تمطرين وترعدين احاسبج والله 

شلت راسي وحجيت بصوت ناصي : وليش خذيتني ما طولك انت ما رايدني 

خزرني : دنكي منا شارع فضحتيني .. رااااسج 

وكض ازندي .. دنكت ووخرت ايده من زندي واني اهمس : وخر مني لا تكضني 

اندار عمه كاله : ها 

حازم : ما نطولها عمي العشا كبل الصلاة مو احسن 

- وصلنا وتحجي بالعشا .. بس مصور مصويرن لو توكف لو شنهي 

- لا لا للبيت 

همست وقربت : اصلا هيج يوم اكشر حرام يتصور ويبقى بالذاكره .

ما جاوبني ضل ساكت والزفة وهوسة السيارات لحد ما وصلنا لبيته .. اول ما نزلت من السيارة .. واشتعل الرمي يمه طار كلبي .. ختلت بيه بسرررعة وكضيته حسبالي ناس هجموا لو مدري شكو 

جان يطلع واحد من صحبانه فرغ شاجور بالجو ويصيح لعيون حازم ابو علي ولصببببح .. كاضني هو وحط ايده عليه يوكفني وهو يرفع ايده يحيي بيه واشتغلت الموسيقى وخواتي يحجن : بالعباس راحت كلوبنا شني هي هاي سواية مال رمي 

اشتغلت الموسيقى بالفرع وهم كرابتهم وعمامه وناسه كلهم بمنطقة وحده بست يبعد عن بيت شوية .. كلهم مجمعين بنفس المحلة .. حركوا الشارع حرك بالدبج والركص والهوسات . 

دخلوني للبيت وحطيت رجلي ببيت حازم وانتقلت بيه وهنا جانت مفرق مختلف بحياتي ومن يومها اتغيرت حياتي جذريا ودخلت نفق غير نفق حياتي القديم  .... يتبع 

تكملة الرواية من هناااااااا 

لمتابعة باقي الروايه زورو قناتنا علي التليجرام من هناااااااااا

بدل ماتدور وتبحث علي الروايات عمل 

متابعه لصفحتنا على فيس بوك هنااااااااااا

الرواية كامله من هناااااااااا

مجمع الروايات الكامله 1اضغط هناااااااا

مجمع الروايات الكاملة 2 اضغط هنااااااا