رواية عاجر الفصل الثاني وعشرون 22بقلــم الكاتبـــة زينب ماجد (حصريه في مدونة قصر الروايات)

رواية عاجر الفصل الثاني وعشرون 22بقلــم الكاتبـــة زينب ماجد  (حصريه في مدونة قصر الروايات)

رواية عاجر الفصل الثاني وعشرون 22بقلــم الكاتبـــة زينب ماجد  (حصريه في مدونة قصر الروايات)

#عاجر 

{ بقلم الكاتبة زينب ماجد } 

الحلقة_٢٢

اشرتلي سهى وكالتلي : تعاي اسمعي حتى اهله ما رايدينج اسمعي عمه يكول احنا النسعى بهالطلاك كبلكم 

تنهدت وذبيت حسرة بدون ما اجاوبها وهي تگلي : هنتي نفسج و سويتي كل هالمشاكل وانكتل اخونا عليمن ولج شحصليتي شحطيتي بكترج ؟ 

ارتاحيتي من صخمتي وجوهنا والناس كاعد تعايرنا بيج 

تسمعين حجي الفاتحة وكلها تشير عليج بالمو زين 

ولج اخوج انكتل من ورااااج من ورااااااج 

-مو وكت نحچي بيه لا المكان ولا الزمان 

- لا الا وكته حاجيني بحيدر شنهو مصيره 

- واني شبيدي على حيدر 

- حيدر محبوس ولو انحكم يخسر شغله ووظيفته ويضيع عمره الثاني من وراج 

- كافي تلوميني .. يكفي البيه مأذيني اني ما اذيت اخوتي هم الاذوني ليش ما تكولين اني يتيمة والله جازاهم بالسووه بيه 

- عزا العزاج يمصخمة تتشفين بدم جعفر وهو بعده ترابه اخضر 

- ما كاعد اتشفى بس ما نسيت ... موته ما ينشيني شكثر اذاني وشكر اثر عليه كل عيون الناس ونظراتهم الي وحجيهم وطعنهم سببه جعفر لو من الاول ما متدخل بيه وعليفني مثل ما عافني واني مطلكة جا كل ذني ما شفتهم من الناس وجا هسه اني ابيت رجلي معززة مكرمة 

-بعدج شايلة بكلبج عليه ولج مات مات من وراج وتحجين بيه بشييين كل الجرى عليه من وراج 

- مو من وراي من اديه اني ما وصلت لبيته ولا وكفت بطريقه ولا سعيت بأذيته 

- لا تكليلي ما بريتي الذمة 

- لا والله الجاي اعيشه وقهري وحجي الناس كلها ياهو اليمحيهن مني حتى ابري ما ابري ..عده رب وعندي رب ونتلاكه بيوم الحساب والي حساب طويل ويا جعفر يم ربي 

انسى من اكله بس انطيني سبب ليش تسوي بيه هيج وتقهرني 

يكلي (هيج شلة حال ) ما فكر باخرته من شل حالي يتيمة واستقوى عليه مالي جبير يحميني منه وطغى ونسى الله اكبر الكل وهاي هو صار يم الله .. وهو وياه ينجازون ما ابري 

- عمت عينج ان شاءالله يا طايحة الحظ اخونا مكتول من وراج ودمه هدر وعايلته انهدمت وانت عايشة بحقدج ونفسيتج النكسة . 

- ما عشتي وضكتي الشفته منه حتى تلوميني .. لو ردت ابريه لازم النية من الكلب واني كلبي مو بس شايل محمد تلال هموم منه .. الله يجازي بيهن 

- ولج بعدج تدعين علييييه ولج ميييت 

نزتني حيل ودفعتني : ما ينلام بيج حاقدة نذلة 

والله يا صبا ما احاجيج ولا انت اختي لو ما بريتي الذمة وحاللتي 

- اذا هو ما مسوي شي وتكولون هو المعدل ليش جايين تطالبوني ابريه خو هو السواه صحيح عليمن ابريه .. بس اذا تعرفينه ظالم ومع هذا تريديني ابريه .. معناها انت الظالمة مو اني . 

- الله لا ينطيج ان شالله الله يجازيج على سواد كلبج .. ميت ميت ولج حتى الميت ما افتك من حقدج 

عافتني ومشيت .. ضليت كاعدة ع الدرج 

الزلم طلعت .. اجا عمي دخل للحوش .. شاف النسوان كاعدة وعمتي ام ابوي ومرته كاعدات 

فكعد وحاجاهن وكاللهن : اهل حويزم نكروا دم جعفر 

حجه عمتي : نكروا لو صدك مو هم كتالينه 

- ما ندري عن خبره جا لو مو همه ياهو غيرهم 

- يمكن جعفر عده عداوة ويا احد والعدو استغل الهوسة هاي وعرف من حازم هد على بيته ودكه .. واتربص لجعفر خاطر يشبج لحية بلحية 

- وياهو هاذ الرايد يشبج ويكتل وما ندري بيه 

- شمدرينا بس ما طول الزلم تبروا .. خافن صدك مو همه 

- همه مو همه شيهمنا ننتظر التحقيق هم نفاصلهم وناخذ حكه .. ولو ما الله وياهم ومحمد وعلي 

- والبت هاي جا موش ابنهم عاقد عليها 

- طالبيتهم بطلاكها وهم ما عولوا كالو نردلك خبر واحنا النسعى .. مثلنا ما رايدين هالزواجة الكشرة من غضب الله اعلى صبية الوطتنا ووردتنا هالموارد هاي عبن فعايلهن وسواياتها مال غمات وما يستحن. 

اني كاعدة بمكاني اسمعه 

امتلى صدري غيض بس مالي غير اتحسر واذب حسرات من حجيهم وكلامهم ما ارد على أحد .. ضلوا يسولفون .. اجت يمي منى : شو كاعدة هنا 

- اريد اروحن للبيت 

- رجلي جاي تريدين نوصلج بطريقنا جايب سيارة اخوه !؟ 

- ياريت علوا .. 

- كومي ولا تهتمين ما دام كدام ربج انت لا ظالمة ولا زانية لا تهتمين لحجي الناس 

- مو بيدي منى كل كلمة منهم مثل السجين على كلبي وسهى وعمي اكثرهم

- تعرفين سهى وحجيها صحيح تجرح وتقسي بس ماكو اطيب من كلبها .. دكومي احبيبة وذبي حملج على ربج ما طولج انت عده مظلومة مو ظالمة رايتج بيضة ويعينج . 

- الله كريم 

كمت اجيب عباتي من غرفة رسول  وطلعت صار عمي بوجهي صاح : صبااا

- ها عمي 

- مرت اخيج وفروخه اخذيهم وياج 

جا خليتهم بس لازم تلزم عدة ما يصير تضل هنا والولد يفترون تتضايك 

- اي هلا بيها 

باوعت لشهلاء مرت جعفر .. كتلها : يلا كومي 

حجت سهى : انا اكولن لو تروحين لاهلج غاد مو ترتاحين اكثر ؟ 

حجت امها : جا خذيتها بس تعرفين احنا نص قطعة واخوتها واحد متزوج فوك والاخر جوا .. وانا وابوها واختها واخوها جوا بالغرفة خافنها تتضايق عدنا اكول لو تضل ويا صبا ما طولها بلا محرم 

- بس البيت بايعه حيدر يعني شغلة شهر نشيل 

- تشيل وياج جا صعبة شو من هسه كمت اتطردين 

- لا مو اطردها شعدي بس لان البيت مبيوع 

صاح : انت اسكتي اسكتي اخذي البت وصمي حلكج .. جاي تراددين وانطرين بكيفج بزر اخوج ذول وعائلته الراحو من وراااج 

- راحو من وراي شلون شنو قابل اني كاتلة اخوي 

- من ورا مصايبج وفعايلج الما ينلبس عليهن ثوب امشييي 

- وما طول كتاله معروف والكتلاه من وراي خوب ذاك هم وروح كاومهم ليش خليتهم يطلعون افصلهم واخذ لبزر اخوي بيت يكعدون بيه من ورا مصابي وخل يستفادون .. 

- انجبي خوووثة رررعنة امشي تحجي هي عدها السان وتحجي ما تبروا وانسحبوا من السالفة 

- تبروا لو مو همه ؟ اذا مو همه وما عدك دليل عليش تكول من وراي واذا هم ومتأكد اني الاكلك هد واخذ حيفك منهم .. بدال ما راجع عليه 

كام يصيح ويغلط وعماتي يكللي : فوك شينج تراددين يالنمرررة صمي حلكج 

- عمه اني ما جاي ارادد بس ثكيلة كلمة اخوج مات من وراج .. احمل الحجي كله الا هاي اني ما الي ذنب بكتلت جعفر 

صاح عمي : اخذي مرت اخوج وبزره ولا تسمعيني حسج لا وحك هو علي اكضنج اشرمنج شرم .. طايحة الحظ اخذيها 

اندارلهن وهو يكول شوف اني شلون انكل غراضهم بعد من البيت . 

ندستني منى : يلا يلا .. كافي امشي 

شهلا تكومين خاطر نوصلكم كلكم 

- اي 

كامت شهلاء واني اخذت بت جعفر يطلع عمرها خمسة مدري ست سنين .. كضيت ايدها وشديت عليها وابتسمت الها .. حضنتني الجاهلة .. مسحت على راسها وتحسرت بقهر 

لو ما الحرام ادعي عليك شسويت بجهالك 

صاح رسول على منى كاللها : رجلج 

كالتله : اي اي 

اندارت النا : يلا 

مشينا و شهلاء نزلت الشيلة على وجهه ومشت ويانا 

وصلانا للبيت .. ومن الباب سلمت على منى وراحو .. وطبينا البيت .. اول ما فاتت شغلت الها المروحة 

كالت : جا مبردة ماكو 

- لا والله ما لحكت اشتري وهالفترة كعدت من الشغل .. فما عدي اجيب اذا تريدين سبحي واطيج هدوم 

- بس عدج اسود 

-لا يا هدوم محرم كلهن قديفة بس وصلوا بقطع سود هواي جبت وياي قطعتين اذا تريدين اجرخلج وحدة واسويها ع السريع 

- تكدرين 

- اي بس خل اسوف عدي غراض اسود 

دورت حاجاتي .. عندي بلك وهالامور فكتلها طبي اسبحي وارجعي لدشداشتج هاي على ما اكملج الخياط 

- ان شاءالله 

طلعت القماش الاسود و كتلها : شهلا انت قياسي مو ؟ 

- اي 

ايدي ماخذة ع المكص بدقيقتين كصصت القماش كله على قياسي .. وركبت الخيط الاسود .. وكمت اخيط بالمكينة وهي طلعت تحجي وياها بتها وترضع بابنها .. 

اباوعلهم رغم اني من جنت عدها تأذيت منها هواي .. هي من النوع بالوجه يضحك ومحبوبة وتنحط بالكلب بس البكلبها يختلف عن اللي بوجهه اللي تريده تحطه على ايد جعفر .. وحجيها وكلامها كله ضحك وشقى يتبطنه بسامير يابو بسامير . 

بس انقهرت على وضعها هسه مهما يكن كسرتها جبيرة 

راعي بيتها راح وصبحت هي و جهالها للمجهول .. اهلها من اول الطريق تعذروا كعدتها عدهم وذبوها عليه . 

فرغم تعبانة كعدت وكسرت ظهري ع القماش لحد ما خلصتلها الثوب بساعتين وشوية .. كتلها : هاج البسي شوفي 

خذته مني وراحت بالمطبخ تقيس .. ونونة بت جعفر بقت كاعدة تباوع فتحتلها ادية وكتلها : تعاي يماما 

ركضتلي : شبيج 

- انت تشبهين بابا 

ابتسمت وردت اغير الموضوع حتى لا تتذكره كتلها :  جوعانة يحبيبتي اسويلج اكل 

- لا 

- شتريدين اجيبلج لعد ؟ 

- اريد بابا 

يا يمة قبط صدري من حجتها دمعت عيوني بسرعة 

كتلها : تجين تخيطين ويايا ؟ اعلمج 

- يلا 

حطي رجلج هنا 

بس حطت رجلها ع الدواسة جرخت المكينة ضحكت 

كتلها : شوووف صرتي تعرفين تشغلين المكينة 

ياا بس لا تصيرين خياطة احسن مني 

طبت شهلاء كالت : ها ؟ 

- اضيكلج ياه احسه شوية عريض 

- لا لا خلي هيج احسن المن اضيكه .. 

- براحتج 

- الفراشات وين 

- هسه افرشلكم بعيني 

- لا بس دليني اني افرش 

- لا بس كضي حسوني اني افرشلكم 

كمت فرشت الها فراشين واني فراش من الجهة الثانية 

ووزعت المخدات تمددت هي وتصخر بنونة تجيبلها حفاظة 

اني جريتلها المروحة الارضية خاف بس ع المروحة السقفية يحترون .. علكتها الها كتلها : كون محترين 

- لا زين 

تمددت واني تمددت بمكاني .. 

كمت اسمعها تنحب وتبجي .. تنهدت وكتلها : الله يعينج داده حملج ثكيل الله يعينج شتسوين واحنا وياج لا تنقهرين اترحميلا 

ما جاوبتني .. 

انداريت وضليت اجيب فكري منا واحطه منا .. 

واحتاريت بسالفتي سالفة .. ادري اهله من زمان نا يهوني وما رايديني ومو صوج بيهم ولا هم مو زينين بس احنا الغلطانين هم يشوفوني وحدة ماخذة ابنهم بالسر و الغلط غلطي يوم الرضيت لهذا الزواج يصير بس ما جان ابالي يصير زواج حقيقي كلت مجرد عقد يسمح النا نحجي بالتليفون ونسولف باطار شرعي .. ما جان مطالبني باي شي .. وكلت محد مراح يدري ورضيت 

روحي مثل الطفلة اللكت ابوها بحازم 

رضيت بالسر حتى ما يبتعد مني لانه يخاف يبقى بعلاقة اسمعا بالحرام .. ما جنت رايده اخسره وهو الوحيد اليسندني ما جنت اعرف راح يصير كل هذا .. 

ما ادري ذنبه لان هو الجان رايد نعلن 

مدري ذنبي رضيت من البداية .. هسه اني بعين الناس مو زينة . 

حازم مريض راح يقبل يطلك 

ما معقولة يأثرون عليه ويخلونه يطلكني .. 

اني هم ثولة .. بعد الصار كله اتأمل اني وحازم نصير 

مستحيل .. بعد ما اخوتي كتلوه وهم انتهمو بدم اخوي البيناتنا صار مستحيل . 

بس شلون راح اخلص عمري 

البيت باعه حيدر وقبض فلوسه وما ادري شوكت لازم نفرغه ونطلع 

زين نطلع وين وهو بالسجن !؟ راح يرضى ينطيني الفلوس ارجعهن وارجع البيت !؟ 

لازم اشتغل ارجع فلوس البيت من حيدر 

ما ادري احجي ويا عمي وهو يحلها 

بس لو ما حلها شلون !؟ 

ضليت بهالتفكير لحد ما نمت 

كعدت بالسبعة الصبح من الحر على صوت الجاهل يبجي 

ونونه بطرك الشورت ذابة روحها وشهلاء دا تريد ترضع بابنها ويبجي ، كتلها : صباح الخير 

- صباح النور الكهرباء ما تجي 

- سحب تطفي ب٤ هسه شوية بعد تجي الوطنية 

-هذا انحمس من الحر ما جاي ينام 

- اطلعي برا اكعدي هوى شوية 

كامت بيه واني كمت للحمام ذبيت على روحي مي وطلعت يمها : ها نام 

-اي احسن 

-بلكت ادبرلا مروحة شحن هذا لو ظل هيج يموت 

-عدنا مبردة ببيتنا وراح نفرغة ليش ما تجيبيها لهنا 

- بكيفج جيبيها 

-بس شيجيبلنا ياها 

-محد من اخوتج فارغ يجيبها 

- لا يا اخوتي سودا عليه يطلعون من غبشة للشغل ما يردون الا المغربية 

- خطية 

هسه اشوف احد يجيبلكمياها 

كاعد نحجي ورفعت راسها سارة : ها صباح الخير كعدتي 

- صباح النور 

كمت اسولف وياها كالت : اخو رجلي عده بيكم تريدين احاجيلجياه خطية ميكول خوش ولد 

حجت شهلاء: علوا حتى اجيب غراضنا مناك 

باوعتلي : هسه اكله 

صبا دوريلي احاجيج 

- هسه اجيتج

انداريتلها حجت : شني راح تضل يمكم !؟ 

- جا وين تروح بيت جعفر اجار وراح يفرغونه 

- واهلها 

- ما عدهم مكان 

- يا جا انت العدج مكان 

- ما عدي شي تكعد وياي شو اني والحايط بس المشكلة بالبيت .. حيدر باعه وفلوسه ما ادري وينهن .. لو اجانا ابو البيت وراد البيت شنكله 

- وحيدر ما راح يطلع 

- ما ادري عليه قضية ما اضن يطلع 

- وشلون جا كبل اجت ما راحت لبيتها 

- اليوم خمسة بالشهر وايجار محد دافع عمي كال اخذيها وياج لبين ما نفرغ غراضها ونجيبهن بس ما ادري بعد اذا تضل على عمي يومه بسنة 

- بس مو خوش تضل عدكم .. ما راح ترتاحين 

- هسه اني شلون مرتاحة يمعودة حتى تجي شهلا وجهالها يقلقون راحتي اقلها مضيومة وجهالها ايتام اكسب بيهم اجر .. خل اروحن اجيبن صمون حتى اسوي ريوك 

سلمت عليها وطلعت جبت صمون وبيض بخمسمية وجبن بخمسمية .. واشتريت لنونة كيكة وعصير .. ورجعت لكيت نونة كاعدة تبجي فتحتلها اديه : يمه بنيتي منو مبجيها 

اجتني تدلل عليه وتشكي امها كتلها : ختولي 

شوفي جبتلج وياي 

اطيتها سكتت 

اجتي الكهرباء وجهت المروحة على حسوني وشهلاء ضايجة 

رحت للمطبخ سويت ريوك واسمع صياح شهلاء ويا بتها وصفكتها .. اجيت : شبيج وياها 

- تريد تلفزيون احنا بحال تلفزيون تصخمت وجوهنا وبيوتنا انهجمت 

- وهي شمعرفها بهالامور البنية تريد تباوع افلام كارتون خليها 

- لا بعده ترابه اخضر بحال تلفزيون اني 

حجت وبجت . 

- هسه على كيفج اهدي يا عيني وخلي البنية تباوع قابل من طفيتي التلفزيون راح يرجع .. شغلي احسن ما تتذكر ابوها 

درتلها افلام كارتون .. وكعدتها 

وجبت صينية الريوك ما رضت شهلاء تاكل مقهورة على رجلها حيل 

الواحد بعز الفاتحة ما يحس بمصيبته لحد ما يصفى لوحده وتجي ايام الصعبة بعد الفاتحة ويحس بالفراك يلا ينكسر وينقهر . 

دموعها تجري .. 

اكلت ووكلت نونة .. وكتلها : اني راح اروح للسوك اتسوك .. البيت بيتج لا تتقيدين بعد اني وياج هنا 

- مو مبيوع 

- اشوف احلها ويا عمي لا تفكرين 

- اني هم زيدت همي عليج فوك همج .. وانت ما ناقصة والله جنت اكله للمرحوم خطية جوز منها عوفها خلي تشوف نصيبها ما يرد مني . 

- الله يرحمه 

عفتها ورحت للسوك اتسوكت ورجعت بس اتأذيت .. عمليتي كامت تون عليه من شلت علاليك المسواك .. حجيت ويا سارة كالت خابرت حماي كال : عده شغل العصر جا راح 

عاد خذيت تليفون شهلاء وخابرت على عمي كال : هسه اهيض الولد يلمون البيت غاد .. 

:وعمي فلوس البيت  روح لحيدر لا يجي ابو اللييت ويشمرنا بالشارع 

- احلنها عود الله كريم .. 

سديته منه .. وكعدت للكاع اصفن بزماني 

تنهدت وحازم بين افكاري .. لا اكدر اروحله ولا روحي مرتاحة بدونه .. ما ادري تاليتي وياه شنو .. شكثر جاي اشتاقله بنص هاي ظروفي لو هو وياي تهون .. حملي كل ما حاله يثكل . 

لشوية اجت امها واختها وامها خابرت على عمي .. حتى يجيبون غراضها .. صدك راحت امها واختها لمن غراضها البالبيت وسونه بقج وحملوا البيت  .. وجابوه بسيارة حمل مرتين راحت ورجعت .. 

انترس البيت غراضها 

عاد اني وياها تساعدنا وجرينا العيكل مال المبردة وشكلناها ورتبناها ع الغرفة لان جهالها نطو من الحر 

وبقج الفراشات و الهدوم فضيتلها خانة من الكنتور الها .. 

بس هي متضايقة ومقهورة .. ما حاجيتها حقها بين ليلة ويوم تخربطت كل حياتها 

بجى ابنها كتلها : اكعدي اني اكمل 

كملت الشغل ونضدت الفراش فوك .. وشفت صمون ماكو هم طلعت احيب رجعت لكيت المبردة تصب مي والحديقة متفيضة فجريت الصوندة ورحت حتى اسد البوري 

شهلاء تحجي ويا امها تكللها : كتلج يمه خليني ابيتي لورا السبعة .. هسه اني اكابل واعيش ويا الرجلي انكتل من وراها .. ما كاعد اكدر اباوع بوجهه مو اعيش وياها . 

تنهدت ودخلت . غيرت هي وكالت : عود اخابرج بعدين يمه 

-غراضكم برا بالحديقة ومشغلة المي وناسية الصوندة والمي ترس الحديقة وتفيضن 

- شسويلهن يطبهن طوب  اذا تلكيلج احد يشتريهن الغسالة الكاونتر الكنتور حيل محتاجة فلوس 

- كنتورج كم باب اذا يفيدج نصبي الح وللجهال 

- لا ابيعه احسن 

تركتها ورحت سويت عشا كلت شوية وتمددت تبجي وتنوح لوحدها 

اني عفتها لوحدها كعدت .. احس حيل روحي مشتاقة لحازم اريد بس اعرف اخباره اشوف شكله .. اخر شوفه الي وياه من تعارك ويا اخوتي وكتلوه 

قررت باجر الصبح اروح بلكت اشوفه .. 

لما ردت افرش ونمت .. نونة اجت بفراشي تمددت وياي .. 

بس جان الجو بارد من حطينه المبردة .. تغطينا ببطانيات لحد الفجر يلا طفت الكهرباء وعركنا ونكعد من الحر غبشة 

فضيت الريوك ومشيت للمستشفى 

لكيت محمد موجود همين  رحت للسستر كالتلي :  حالته افضل واحتمال نطلعه هاليومين 

- يعني تعدا مرحلة الخطر ؟ 

- اي الحمدلله بس بعده وضعه يحتاج رعاية وعناية خاصة .. 

- اكدر اشوفه 

- اي طبعا روحي شوفي 

- اخوه موجود من راح يشوفني راح يصيح 

- وانت شتعوديلا 

- مرته بس مشاكل بيناتنا 

- اعرفها مرته اجتي كم مرة 

- ذيج الاولى 

- ها انت الثانية .. المن لعد اخذتي من مرته وجهاله اذا مشاكل بس هاي هم حظ المسكينه من هو مريض حصتها تتعب وياه من يطيب يجيج .. لا تخافين هو انتن هيج حظجن كاعد من الله 

- اي صح .. حظي حيل كاعد مشكورة خية 

عفتها ورحت دخلت للردهة حازم نايم غافي 

بس شافني محمد فز : انت شعندج هنا ؟ 

- شلون صحته 

- ولج انت ما تستحييين ما تخجلين 

يحجي بصوت ناصي جراني من العباية حتى يطلعني كتله : مو من حقك 

دفعني برا .. لو وصلتيلا يا زبالة الا اكسر رجليج وخري يلا 

كلها ايام يطلع وورقت طلاكج تنذب بخلقتج هاي الزفرة 

اخوج مات واخوي على حافة الموت وانت ولا هااامج 

- هو قبل يطلك 

- هو الرايد الطلاك .. هو الرايد يفتك من دخلتي حياته ولهساه دمرتي دمرتينا كلنا .. وخري من دربه امشي 

-منو الدمر منو ؟ اخوك التكول رايد يطلكني .. هو السبب يا ما كتله لو احد عرف بزواجنا راح تصير مصيييبة طلكني عوووفني .. راح تعارك ويا اخو وفاء بنص بيتي ما حسب حساب لسمعتي ولا شيصير بيه وهسه تكلي يريد يطلكك .. اي يطلك اني الافتك .. اني الاخلص مو هو .. 

- راح تخلصين باقرب وقت بس يكوم كال اطلكها وننتهي 

استهضمت وكفت العبرة ببلعومي كتله : اي بس يا ريت يستعجل بطلاكي .. 

- اي تأمرين بس ما تحين ولا توصلين لهنا افتهمتي 

عفته ومشيت .. 

هنا حسيت بروحي صدك رخيصة وشكد ما عندي قيمة

شبية اجيت واتعنيت .. اني غمه لو تاركته هو من يكوم يطلك 

طبعا ما راح ينحرج ويا اهله وناسه علمودي .. راح يفضل رضاهم ويعوفني بعد ما بلاني .. شكثر خفت من البيه احنا حاليا وهاي تاليتها ارملة واياتم وواحد بالسجن وهو بالمستشفى .. شحصلت من هالزواج غير كلمة الماخذة رجل بالسر وما تستحي 

كله مني اني كله صوجي 

رجعت الوم بروحي ودموعي تجري 

اعتزلت روحي كمت حتى مرت اخوي اتجنبها 

كاعدة وياي وما متحملتني ولا احد بالدنيا طايقتي وبس ضيمهم عليه .. اريد واحد راضي عليه ماكو رغم ما الكل محد شايل من جيبه ربع دينار ومنطيني اني الانطي واني المكروهة .

صار يوم السبعة مروا اهلها اخذوها وراحو للبيت عمي 

اني هم سديت البيت ومشيت الهم فورتات .. لحد ما وصلت الفرع شفت الانشائية مال حازم من بعيد مفتحة .

ما اتقربت ولاش فت منو الموجود بيها .. 

دخلت لبيت عمي .. وهم طلعت روحي من الحجي والمناغز والتهايم حتى سهى دايرة عني لحد ما كضت السبعة .. وخلصنا الشغل كعدن يشربن جاي 

اني لبست عباتي جاي اطلع كضتني منى : انتى وسهى متزاعلات ؟ 

- ما تحجي وياي شسويلها

- ليش ؟ 

- شلون ما تبرين جعفر الذمة 

- وانت ما باريته صدك 

- لو حجاها الساني كلبي ما يبري .. بس هي ضلت على سهى 

اكلج كبل لا اروح صدك .. مرت جعفر شنو مصيرها .. احسبي انباع البيت وين تروح 

- بالبيت الجديد التاخذونه 

- زين مصرف الها مصرف جهالها .. راتب جعفر شلون ما يصير الها 

- راتبيش قابل هو بالدولة ويحطولها راتب بعد حظها 

- اي منى اني تعرفين كعدت من الشغل وابو السحب لازم هاليومين ادفعلا .. غير الاقساط العندي والمصاريف مال البيت روحتي جيتي منين اجيب شو بس هاج صبا اخذيها جا مو اني مو زينة ومو خوش ادمية .

- جا نذبهم بالشارع 

- واني كلت اذبهم بالشارع منى منين اجيب يا دوب اني امشية روحي بصمون بربع وجبن ابو الخمسيمية اكضي يومي كله اكل بيه 

- سهله الله يدبرها لا تخافين وربج جهال ايتام شكبرها يم ربج 

- والنعم بالله منى بس ما عندي منين اجيب .. خليهم ما احطهم ابيت عمي ابطن عيني بس عمي اهلها شي خل يحسبولها راتب .. زين جعفر من مات شنو ما ضامله فلوس شي يعني معقولة كلش هيج بس اني المسؤلة بالوجه 

- والله مادري هم احاجي سهى واردلج خبر 

- هو ترديلي خبر عليمن على امي تليفوني لهسه ما ادير حيدر وين وداه .. وما عدي اجيبن 

- عدي واحد مال رجلي بس يعني الف ومية مو ملون 

- علوا يمعودة بس يكول الو وسيمكارت على جنسيتي اطلع نفس الخط بس اريد تليفون 

- اني اوديلجياه ابيد رجلي ادللي 

- مشكورة يعمري يلا خل اروحن 

- بعد وكت لو شايلتلج اكل .. ضل هواي 

- لا يمعودة خل اروح 

وي ما طلعت من بيت عمي كاعد امشي صار بوجهي اسعد 

كال : ها صبا .. بس اذا تكدرين وديلي فلوس الاقساط كلهن دفعة وحده حتى اسد دينج 

- ما عندي انطي دفعة وحده يا دوب اريد ادبر اقساط هذا الشهر 

-مو مشكلتي .. بعد الصار اني كدرت اجيج اكلج بس ما طولج شفتج وديهن وبسرعة اذا تكدرين 

حجاها ومشى .. 

عفته وطلعت لراس الشارع .. ركبت ورحت للبيت لكيته كبر مطفي كله بوجهي لابو السحب كلالي : اليوم شكد بالشهر وما دافعين .. 

- حقك والله هاي ٢٥ واضل عليه ٢٥ تطلبني والله اخوي مات ومرته لازمة عدة يمي و ما عدي احد بالبيت 

-احاجي ابو المولدة والله اني عامل هنا وادللي لو بيدي اني ادفعهن بس تعرفين والله مو يمي 

-دحاجي وافتحلي فدوة 

خابره كاله افتحلها 

رفع الجوزة رجعت واني كل الباقي بجيبي ٢٥ بس .. 

زين شلكى شغل ؟ وشدبر والخياط وين ليوين وحدة تتذكرني وتجي تخيط عدي من القديمات 

رجعت للبيت .. فتحت التلفزيون وصافنة بزماني 

اجت شهلاء وامها طببتها شافت التلفزيون مفتوح كالت : يا جا مو اخيج ميت شنهي بحال تلفزيون انت لو الميت ما يهمج 

- خالة حتى اخبار طالعة بالي مو يمه بس صوت يرد عني الوحشة 

ما ردت عليه وشهلاء تحجي وياها .. 

فرشت فراشي حتى انام .. وبقيت الليل كله افكر بمصيبتي 

من باب اكول شلون ادفع اقساط اسعد شلون اوفي دين المولد لا يرجع يطفيها علينا .. شلون بمصاريفنا منين اجيب ششتغل 

ثاني يرم رحت للدكتورة 

كالت : هسه جايتني صارلج شكد عايفة بدون حتى متبلغين لو تكولين 

حجيتلها السالفة كلها كالت : اعتذر والله مقدره ظرفج بس تعرفين هذا شغل واجتي وحدة غيرج خوما ابطلها واحطج 

- لا .. هم حقج 

رجعت احتاريت بكاعي شلون ادبرها .. 

مشيت لعمي كتله كال : جا اني شني مخلفكم وناسيكم ياهو مالتي شو دكاني وصارلي سبوع معزله من ورا الفاتحة اعوض خيارتي لو احيرن بيج 

- جا عمي خابر اهل البنية خل ياخذون بتهم خل احير بروحي مو احتار ب٤ نفرات 

- ولج انت فوك شينج كوااات عينج ولييي 

- جا من اني شينة تذبون عليه شنو ..

- بزر اخوج راح من وراج ساااقطة 

- وما طوله راح من وراي عشيرتك وين عمي روح اخذ ثاره وجيب حق عياله 

- امشي منا بت الجلببب روحي 

- والعندي عمي والله ما ضلي ١٥ الف .. المن احطهن وشسوي بيهن 

- وفلوسج الجنتي تشتغلين وتضمين لو لان بزر جعفر ما تريدينهم الجلبه 

- عمي يا فلوس شغل صالي شكد وعمليتي وعلاجي وشدتي كلها حا ما تحسبها شني ساعدتني اشتريتلي حباية دوا .. شو ذبيتوني مثل الجلبة محد باوعني 

- يطبج مرض لو تموتين اهوس بفاتحتج وافتك منج ما اكول الله يرحمج 

- هوس عمي ما كاضتك بس خابر اهل البنية يودون على بتهم اقلها لوقت العدة لبين ما الكالي شغل اوكف على رجليه 

- ناس ما عدهم منين يجبون 

- جا واني العدي عمي شنية 

ترا استحي اروح اكللها خابري اهلج خاف تحسبني طردتها بس والله ما عندي 

- ما عدهم مكان ما تفتهمين ماااعدهم 

- اقلها يحسبولها مصرف . 

- واني اكللهم تعالو احسبوا لبزرنا مصرف شني رايدتني اتفاشل وياهم 

- زين عمي اسعى بسالفة حيدر اقلها يرد لشغله يعاوني بيهم بعد هو هم لازم يحتار 

- وحيدر اني شبيدي عليه غير كوادج هو السجناه 

- ما يصير يتنازلون وتكضي بفصل 

-وياهو العده ويفصل شو دولي انت دوختيني امشيي 

دفعني وسد باب الدكان 

عاد عفته وطلعت .. رجعت للبيت محتارة 

مر يوم يومين ضلت بس الـ ٥ الاف بجيبي 

وما عدي احد اروحله ويشغلني وينطيني .. حتى محد عدي يدايني 

خابرت على سهى ما تجاوبني 

خابرت على منى تعذرت وهي من الاساس حالتها على كدها 

احتاريت بكاعي 

اجتني شهلاء كالتلي : ما عدج خمسة 

-ماليش 

-حسوني محتاج حفاظات وكضيت 

- وانت ما عدج 

- لا والله ما عندي .. واخوي خابر كالي راد يجيبلي شليف مال حفاظات باله وكتله لا خطية شعده هو كوة مدبرها

- جا اني العدي هالتشوفيني بلا شغل وحايرة منين اوفي كلها كامت تطلبني 

- وشلون ؟ 

- خابري اخوج كليله يجيب ما طوله اتبرع انت هم وضعج صعب هالفترة 

سكتت وراحت عني .. مشيت حتى اترس المبردة .. 

وطلعت بلكت اشوفلي شراي للكاونتر لو للغراض المذبوبه بالحديقة .. 

من تصير مصيبة شكثر الزلم التلوم وتهوبز 

ولو احتاجيتهم فرد زلمة ما تلكى .. حتى النسوان الفاكات حلوكهن ومسوياتني علج .. يتكترن ومالهن غرض .. واولهن اختي .. 

يوم السوته المعدل الزين الراح 

ما ذكرت جهاله وعياله بربع دينار بحجة زعلانة وياي ما تحجي وذابين حمله عليه .. 

رحت حاجيت ابو الاسواق كال : اكو واحد يصلح طباخات 

روحيله هو يعرف ناس بياعه شرايه ياخذوهن 

رحت كالي : العصر امرلج 

رجعت للبيت شهلاء تحجي ويا امها تكللها : اذا انتم ما تنطوني اني منين اجيب قابل اكدر اطلع اكدر اشتغل .. شوفي واحد من اخوتي اقلها بس يجيبلي حفاظات لحسوني 

من حست عليه سدت التليفون 

عفت البيت ورجعت لابو الاسواق كتله : الله ينطيك انطيني حفاظات رقم ٤ وسجله علي بس يصير عدي انطيك 

الله هم ما يكطع الزلمة ابن ناس كالي : اخذي خوية 

خذيت حفاظات ورجعت للبيت حطيته كبالها ضلت تباوع عليه

كتلها : لا تستحين تكولين اهلي ذبوني واهلي تبرو من حملي واستثكلوني .. حالي من حالج تذكرين من ذباني وما حملني البنية التطلع من بيت اهلها ما ترجع بتهم لا مطلكة ولا ارملة ترجع حمل زايد وثكل ما يهون ضلته 

لا تلمعين احد وهو ما بيه خير حتى لو جانوا اهلج 

تاليتها تلامين انت .. دربج طويل حطي ايدج بيدي وعاونيني نلكى شغل ونعيش 

- الله وايدج بس شلون واني كاضة عده 

- جعفر من مات ما بقى فلوس ما مجمع 

- لا والله احنا ايجار ومن يكضي راتبه جان يطلع بالسيارة يشتغل بعد الدوام حتى يجيب المسواك 

- زين سيارته وين .. 

- هو مسوي حادث بيها من ميت وما ادري محجوزه 

- شتعرفين تشتغلين 

- خياط ما اعرف بس اعرف احفن .. اعرف اخبز وخبز خو تعرفيه 

- الله كريم 

اني اكول لو اروح اجيبلي طحين ونعجن النا فد انجانتين واذبهن عد ابو الاسواق  ما دام تنورج هاذ بعد عليمن نبيعه و كل خمسة بالف لو مشن اطي منهن واخذ الباقي مو احسن النا !؟ 

- اي والله ولا نضل هذا حالنا 

شوية واجا ابو العتيك .. 

استغلنا غرفة نوم اخشاب كاملة خذاها ب٧٥ 

والكونتر ب٢٥ .. والتلفزيون بعشرة .. 

والمراوح و بقيت الغراض كال اطي بيهن كلهن ٥ 

جبناه منا رد منا حط فوك السعر خمسة الاف بس 

كتلها كالت : شنسوي شو هو راعيهن وراح .. بيعيهن 

بعتهن واخذت من الفلوس رحت اشتريت طحين وعجنه بس مو هواي جربنا بعشرين كرصة حتى نجرب يصير لو لا .. 

وحت تعنيت للشارع العام هناك الاسواق والمحلات عليها رجل اكثر 

شفت ابو شواية الدجاج 

كتله : اذا اريد احطهن عدمن تنصحني 

كال : حطيهن عدي ومن اعزل ب١١ ونص تعاي اخذي اجرهن 

صدك خليتهن عده .. 

ورجعت اخيط قماش طول جايبته من زمان اخيطه مال جرابي واحطله لاستيكة .. النسوان تحب هاي السوالف تاخذ 

رجعتله ب١١ وربع 

لكيته بايعهن كلهن اطاني ٤ الاف .. 

وكالي : هاي نص دجاجة ضلت محد اشتراها هم اخذيها وياج من تضل لباجر تيبس ومحد ياخذها مني 

كتله : اطيك اجرها 

كالي : توكلي خوية رزقي ورزقج على الله 

هم شكرته ورجعت للبيت 

فرحنا بالدجاجة خليناها .. واكلنا منها شوية وشميناها لباجر كلنا نفلسها ونسويها برياني . 

ايام كمنا اني وياها نشتغل بالخبز واخيط الاكدر عليه وانطي لوحده ليغاد عنه عدها اسواق بس حجيه تعرض الجراجف والخياط عدها ووصيتها لو سألن ادليهن بيتي 

كالت : بعيني 

كل هالفترة محد ذكرنا اليمر مرت الخطار ويروح .. 

لا احد يكول شتحتاجن شناقصجن .. شاكلتن اشربتن .. 

حتى خواتي ما اثنيهن رغم الصدك هن حالتهن هم مو كلش رجولتهن على باب الله كوة يدبرون اللكمة بس اعتب لان الحمل والحجي كله عليه 

لحد ما كملت عليه 

واندكت الباب ابو البيت .. كال : خوية اني متفق ويا ابو البيت يطلع وابو البيت ما هو واني اريد بيتي 

- كتله بس ابو البيت انسجن .. وبعدها قضيته 

- واني ياهو مالتي اريد بيتي انا هم بايع ويريدون يطلعوني 

- ووين نروح خوية .. 

- اني شمدريني وين تروحن هذا البيت اشتريته وبشهود شهدوا وبصموا واني اريد بيتي كدامكم بس هالاسبوع تفرغون البيت . 

حجاها وراح .. 

كمت افرك بوجهي .. دخيلك يا علي وين اروح 

جا غير يكلي حيدر الفلوس وينهن واطيهن اله وافتك .. شلون بالله 

رحت لعمي .. كال : باجر اني وياج نغبش ونروح لحيدر لاون يبلغنا الفلوس وين خاطر ناخذهن ونرجعهن للزلمة ونطي فلوسه وتضلون بالبيت 

صدك ثاني يوم تعنين للسجن وقابلنا حيدر 

جان يكول : ما اطيكم مكان الفلوس .. تريدون تذبوني هنا واني اخسر كلشي وانتم تعيشووون بجالي 

- وياهو العايش بجالك البيت بيتي وانت بعته ومرت جعفر وجهاله بركبتي وين نروح اني وياهم !؟ 

- مالي غرض تروحين على الجلب مالج تكليله يتناز عن الدعوة ويبريني واطلع واني وكتها اتصرف واكضي هالقضية ولو عفتوني مذبوب بالسجن وما رحتوا خليتوهم يتنازلون عني والله لا اخليكم بالشارع ويطبكم وجع 

كام عمي يحجي وياه ويتصايح .. 

ما ينفع .. طلعنا اني وعمي كالي : مالج غيرها روحي على حازم وقنعي يتنازل عن القضية 

- حازم ناري على طلاكي ولا خابر ولا سأل كل هالفترة اروحله اطلب منه تنازل ليش خو روح اكضيها بالعشيرة 

- بالعشيرة عليش هو اوله وتاليه رجلج مو عاقد عليج وبعدج على ذمته روحيله وقنعي يتنازل عن اخوج ..

- هسه جايين تكلولي رجلج 

- ما دامه ما طلكاج معناها بعده رايدج 

- شرايدني لو رايدني يخابر يسال عني هو حاله من حالكم ذبني اروح اتوسله واتلوكله حتى اخوي يطلع ؟ 

- هسه ضلت على هاي كلشي مسويتها معضله روحي ابجيله اتوسليله وخلي يتنازل عن القضية . 

عافني وراح .. 

ضليت اجيبها منا اردها منا 

شلون بالله جا اروح لحازم ولو طردوني ؟ 

خلي اخابره خوما اروحله لاهله .. 

خابرت ما رد .. 

شلون بالله هسه وين الكاه ابيته لو بالمحل لو وين 

وشكله اترجاك طلع الكتلك وعوقك .. لو شرخص روحي 

والله اهلي ذلوني مذلة من شاعة السودة الصرت عدهم . 

تعنيت للمحل ماله لكيت ابن عمه ، كتله : حازم وين الكاه 

- شتريدين من عنده 

- عندي قضية وياه 

- ابعدي منه وعوفي كافي الاجاه منج خوية 

- جا وما يطلك اذا عوفي عايفني معلكه ليييش 

- اي بس يكوم لحيلا يطلك 

- وما كام 

- لا بعده نايم بالفراش رجله مكسورة وايده لهسه مشدوده وعمليته خضرة 

- عد بيت محمد مو 

- روحي خوية روحي 

ركبت وطلعت لمنطقتهم ونزلت مشي لحد ما وصلت لبيت محمد دكيت الباب طلعتلي مرت محمد كتلها : حازم عدكم 

- لا مموجود 

- بس هاي سيارته 

- ما موجود عيوني شتريدين 

- امه هنا 

- شتريدين منها 

- اريد احجي وياها 

دخلت وعافتني ع الباب 

طلعلي محمد كال : تمشين منا لا تخليني والعباس ابتلي بيجكافي الجرالنا من تحت راسج بيوتنا انهدمت من وراااج روووحي 

- وياهو الكاتل روحه عليكم مو كتلي يطلكج طلاكي وين شو روحي وانتم معلكيني شنو تلعبون علي .. 

- يطلكج وطلاكج يجيج ع القندرة افتهمتي لو لا 

- القندرة لاهلها اني رايده طلاكي حجي السان ما اريده اانتم الهجمتو حياتي مو اني 

- وياهم اهلها 

- حازم وينه 

- لح بت الكلب تروحين منااااا 

طلعت امه : ها يمه شعدج لافيتنا يالبربووووك 

- الحجي مو وياج ويا ابنج .. رايده احجي ويا ابنج 

- ما عدي ابن يحاجيج روحي منا يلا 

تحجي وسمعت حازم كام يتصايح ويا محمد يكله : انتم عايفينها تلعلع بالشارع فوتوها 

كاله : خل تولي 

وحازم يكله : دخلها خل اربيها وادليها دربها دخلهاااااا 

امه تكله : خل تولي هاي الدايحة .. كافي الجرالك منها 

فتت ورا امه كتله : مني هاي التربيها وادليها دربها 

كام يحاول يتجى ع العكازة حتى يكوم .. 

اندار لمحمد : خلونا وحدنا 

- حازم خل تولي 

- محمدددد 

صاحت امه : اطردها تحايجها شني شوف شصار بيك منها .. اطردها 

صاح بيها محمد كاللها : خلي يتصرف وياها ويصرفها .. عوفي يمه 

جر امه وهو كاض العكازه كتله : تربي منو وتطرد منو 

- احتاجيتي واجيتي .. لو اني غلطان 

- لا مو غلطان واني ما ادورك الا بوقت الاحتاج ومحتاجة تتنازل عن اخوي حتى يطلع من السجن 

- بهالصلافة جاية اتطلبين مني اطلعه 

- ليش حتى ما تطلعه .. مو جنت تشمر واني واني وحضاين والعب واسوي .. لو بس حجي وهوبزة وكل خير ما بيك 

- امشي اطلعي منا لا افركه لحلكج امشي مني 

- لا وشنو ناسي موضوع طلاكي عوفني يا اخي شجلبت ما اريدك .. طلكني اقلها اروح الكالي واحد يعيني يساعدني اعيش بجاله .. معلكني بيك شنو علج 

- لازم الواحد هذا حاظر تحت كترج حتى رايدة الطلاك 

- اي محضرته طبعا عندك اعتراض 

سطرني راشدي وكالي : امشي اطلعي برا وطلاكج يوصلج 

كمت افرك بأذاني وعيوني دمعن من ضربني 

اخذت نفس وباوعتله : والتنازل عن حيدر ويا الطلاك .. ومن انت زلمة واجه عوف القانون والمحاكم على صفحة واتحاسب وياه وجه لوجه 

لزمني من راسي وكال : اني شايف بشر كباحة مثلج نذلة ما شفت .. وكت التكاتلت وياهم اجيتهم بطرك روحي ما حسبت محضرين سلاح لو الات يضربون بيها .. بس الضاهر صدك اليكولونه عنج ما تسوين .. امشي منا طايحة الحظ 

جرت دموعي ... 

تقربت منه اكثر كل الصار بيه من وراك اذا انت مو كد الصار كله فضحتني ليش خليتني على كل السان ليش .. من انت مو كدها ليش 

- جنت كد الصار كله ودرتها كلها وخليت العشيرة والكل يتفقون يزفونج الي وجان هسه انت ابيتي لو انت الطاوعتي اخوتج ورحتيلهم بغبائج  او باتفاقج ما ادري .. من تلومين لومي عقلج لان اني العليه سويته وزايد انت التسببتي بالصار ودار كله .. فوك شينج البلاوي المسويتها من ورا ظهري واني يا غافل الكم الله . 

- يا بلاوي هاي المسويتهن 

- ما يحتاج تروحين وطلاكج يوصلج 

- اني مو بعازتك اصلا وحتى روحي كشت منك وانتظر طلاكي اكثر منك .. بس الاريده تتنازل عن قضية حيدر 

- طلعي برا 

تقربت منه اكثر : اذا باقي ذرة احترام وتقدير للي بيني وبينك اتنازل عنه ادري راح يطيح حظي من يطلع وادري راح اجني على روحي بس ما ضلي غيره يساعدني بحمل جعفر المات وذباه عليه .. عوف البيتي وبينك اعتبرني غريبة وناخيتك تتنازل عنه . 

ضل يباوع بوجهي وعاقد حاجبه .. 

هز راسه وكال : ما طولج كلتي غريبة وناخيتني انا زلمة ما ارد التنخاني ونخوتج ابشري بيها .. اطلعه .. وطلاكج يوصلج .... يتبع 

تكملة الرواية من هناااااااا 

لمتابعة باقي الروايه زورو قناتنا علي التليجرام من هناااااااااا

بدل ماتدور وتبحث علي الروايات عمل 

متابعه لصفحتنا على فيس بوك هنااااااااااا

الرواية كامله من هناااااااااا

مجمع الروايات الكامله 1اضغط هناااااااا

مجمع الروايات الكاملة 2 اضغط هنااااااا