رواية عاجر الفصل السادس 6 بقلــم الكاتبـــة زينب ماجد (حصريه في مدونة قصر الروايات)

رواية عاجر الفصل السادس 6 بقلــم الكاتبـــة زينب ماجد  (حصريه في مدونة قصر الروايات)

رواية عاجر الفصل السادس 6 بقلــم الكاتبـــة زينب ماجد  (حصريه في مدونة قصر الروايات)

#عاجر

{ بقلم الكاتبة زينب ماجد } 

الحلقة_٦ 

صفنت : هذا الزلمة چنه رزلاني !؟ 

احتاريت اضوج وانقهر لو افرح جيف خايف عليه ورايد مصلحتي !؟ 

عفت المحل وطلعت .. هو اندار وطلع وراي وگف بالباب 

اسعد منتظر ع الشارع راكب سيارته ، اشرتله : روح روح 

سوالي باديه بمعنى : ليش ؟ 

لوحت ومشيت للفرع رجعت فتت .. يعني ارم يباوع ما ادخل ولا حچه 

خابر اسعد بسرعة كال : شني وين رايحة 

- لا نسيت حاجة عمي وصاني عليها خطية لازم اروحلة 

- ها ويمتى تروحين انت ؟ 

- يمكن بالليل اخلي واحد من الولد يوصلني .. 

-ها .. اي ، جا يمتى اشوفج واحجي وياي 

-كلي امرني خوية اذا معتاز شي ابطن عيني 

-لا سالمة عينج هيج سالفة زغيرونة ردت اكلج بيها .. وتفيدج والله اني رايد افيدج الله شاهد جيف انت مرة مستورة وبت اوادم 

-الله ينطيك العافية ان شاءالله جا من اردن .. عود خابرني وكلي بيها 

-ها خوش ولو انا ردت احجيلجياها بالوجه تعرفين الحجي المكابل يصير بيه لذة مو مثل هاي التليفونات 

- يا هو الحجي بيه لذة وطعم 

-ههههه جا شلون خصوص وياج

-ديلا خوية. اني اترخص منك خلني افوت لبيت عمي . 

صدگ فتت لبيت عمي 

حجه عمي : ها شني شو رديتي 

- يمكن نسيت جيزداني يمكم 

كمت ادور بالدوانية چذابي .. افتريت كتله : ماهو جا يمكن ناسيته ابيتي واني ما ادري 

دخل يوسف وعمي يكول : جا عمي انت مضيعة صول چعابچ 

يوسف : ها السلام عليكم .. هلا صبا شلوووونج شخبارج 

- هلا بيك خوية بخير الحمدلله 

- شني ما شني شلونج ابيت الجديد ؟ 

- سبع رحمات نعمة الف الحمدلله والشكر 

- الله يديمها الله يديمها .. جا شني شو عباتج على راسج ما تكعدين ؟ 

- لا والله رايحة هم ياله امشي لبيتي صار الغروب 

- هاه ، جا ما تتعشين 

- عساك سالم بعد كلبي .. اروح غاد واتعشى الثلاجة متروسة خير من الله 

- ها اي الله يدم النعمة .. جا خل اوصلنج 

- لا عساك سالم بعد كلبي تسلم 

- بطريقي يمعودة ماخذ امي لهذا اليسوي حجامة 

- ها جا عمتي خيرها ؟ 

- لا رجليها ماذياتها وهو يعالجها ترتاح هم قريب منكم ديلا امشي 

كام يصيح على عمتي جانت بالحمام 

كالتله : ابني بس نصلي ونطلع 

عاد اني صدك هم مشيت توضيت وصليت حتى لا تبطى عليه صلاتي 

من تبطي الصلاة اتصير شمثگلها لا تكضي شغل ولا ترتاح ولا انت الكايم مصلي الشيطان منين ما تلتفت يلهيك . 

كملنا وخذنا يوسف بسيارته ومشى بينا للشماعية وصلاني .. وسلموا عليه ومشوا .. ردت اطب .. فكت الباب سارة : ها ستيتة هسه اجيتي

- اي والله .. شني رجلج نايم 

- راح يطلع اعشي واجيج 

- ديلا انطرج 

فتت شوية واجت تعشينا وضلت يمي للعشرة ومشت .. ضليت كاعدة ع التلزيون اتابع لحظة وداع .. دگ تليفوني اسعد 

رديت 

-ها الو 

-هلا خوية 

- شني بعدج ابيت عمج 

-لا والله رجعت عمت عيني ابو سيف ما خلاني هو الوصلاني بسيارته 

-ها خوش .. مرتاحة شني الاخبار الاحوال 

-الحمدلله 

-شني كاعدة هسه يمج صوت 

- اي والله صوت التلفزيون 

- اي .. اسال عنج معتازة شي وضعج امورج 

- الحمدلله .. اسعد خوية اذا محتاج شي كول اني اختك 

- سالمة بس اختي شني مخلفتج امي 

- لا جا الا تخلفني 

-لا لا مو اختي اني جايج بسبب ورايد افاتحنج بموضوع 

- اي .. كول 

- انت مرة وحيدة ومستورة وخوش مرة واني حيل تعجبني المرة المعدلة مثلج 

- الله يسلمك 

- اني عود ردت افاتحنج بموضوع زواج 

-زواج! خوية انت مو متزوج 

-لا لا الموضوع بعيد عن العائلة 

- بعيد عن العائلة 

-بعيد عن العائلة شلون !؟ 

- يعني رايدج الي مرة بس بيناتنا ما اريدن احد يعرف وشتريدين وشتامرين عسى ما تطلبين للبن العصفور اجيبلجياه .. واعتبري الدين البيني وبينچ مسدود 

- لا اوكف بعد اختك بيني وبينك شني قصدك زواج متعة لو تخطبني من عمي بس بالسر بدون ما يدرون عائلتك لو شنهي نيتك ؟ 

- لا لا ما اريد لا عمي ولا خال يدخل بيناتنا .. اني رايدج بس انت ما اريد احد يحط عيونه بنصنا وينغص حياتنا لا ادللج دلال اصير خادمج والله 

-يعني قصدك زواج متعة 

-جا هو هم شرع الله شني ترفضين شرع الله زواج موجود بالقران ومكتوب مو عيب ولا حرام 

-خوية انا لا مفتي ولا احلل ولا احرك خاطر افتي بشرع الله حلال لو حرام بس اسألك بالله لو حسن طالب وفاء زواج متعة ترضاها 

-هسه ليش ادخلينا ابامور بعيدة احنا علينا بنفسنا 

-لا مو انت تكلي شرع .. الشرع ترضاه على اختك تتزوج بالمتعة ؟ 

- صبا .. صبا اتسمعني الله بالخير عليج 

-يا خير خوية خليت بيها خير وانت جاي تطلبني متعة شكالولك علي تايهة لو مالي اصل !؟ لا تشوفني الدنيا ذبتني بس ترا انا من بيت محترم واهلي جانوا ناس طيبين ومستورين لا عدنا مرة اتدور متعة ولا وحدة مو خوش 

- جا انا كتلج مو خوش غير اتسمعني اني مو كتلج لو ما شايفج ابنية مستورة وشريفة اني اجيج اوصلج 

- ولو جنت شايفني هيج جان رحت لعمي وخطبتني منه .. مو تفاتحني بموضوع زواج متعة 

- ما بيها شي الناس ياهو مالتها نتزوج واني احسبلج مصرف واطلعج اونسج ولا يحتاج تشتغلين ولا تتعبين .. ودينج مسدود وبما يرضي الله 

- لا والله خوية قدرك على عيني وراسي بس حجايتك هاي و موضوعك هذا الفتحته لا تحجي ولا تفتحه بعد اليوم اسوي روحي ما سمعت بس مرت الاخرى .. لا والله خوية اني هم ما طالعة من فطر الكاع وما ارضى احد يشوفني متعة .. بنات الناس مو متعة لاحد خوية .

-هسه انت ليش اتعقدينها اني ما كلتلج شايفج متعة 

-لا شنهي الما شايفني متعة هاي انت جاي تكول محد يدري وبيني وبينج جا ربك مو يكول لا تواعدوهن سراً اذا تشوف زواج المتعة ما بيه شي وشرع الله روح لعمي وكله اني رايد صبا زواج متعة واذا وافق بعيوني اني اوافق 

-لا شني اروحله خير خو ماكو شي 

-جا مو تكول زواج المتعة حلال وبالقران وشرع الله ؟ قريت بالقران الله كاتب زواج المتعة حلال ما قريت بالقران لا تواعدوهن سرا .. امشي نفذ شرع الله بالعلن .. ولو رضولك ارضالك .. وبعلم اهلي وعمامي  وتروح وتفاتحهم وتكللهم اريد بتكم زواج متعة ويرضولك ويسكتون ويطونك حرام والله ما احجي .

-لا شوفي هي شوية صعبة مالت اروح واخطبج متعة ما صايرة ومحد يرضاها .. بس اني كتلج بيناتنا عمي مو زواج متعة زواج على سنة الله ورسولة ودائم بس بيناتنا بعد 

-هي شني خوية بيناتنا .. اسعد هذا الحجي ما يصير جا لو شافوني الناس وياك شمدريهم اني متزوجة ما يكولون هي وصاحبها .. جا لو سمعوا اخوتي لو عمامي ماخذة بالسر غير يكصون ركبتني ساعتها تتبرى مني والله حتى ما تكلهم مرتي خاف تدرى مرتك وتصيرلك مشكلة .. مو هيج 

-لا ليش مكبرة الموضوع .. انت اخوج مو منتسب بليل مثل هيج وكت من اخوج بالدوام يعني.. شلها غرض الناس وشعليها 

-وسمعتي هم شعليها خوية هذا حجي .. رديت على تليفونك وكاعد احجي وياك لجل الجورة البينا والاحترام بس على حجيك هذا خوية تعذرني ما بيناتنا غير كل شهر اوصلنك الفلوس مالت الدين ..  وكان الله يحب المحسنين 

- لا لا تاخذينها هيج صبا اسمعيني 

-من رخصتك خوية خل اروح خل اروح اشوف الباب ياهو الجاي يدك مع السلامة اترخص 

سديته وغميته : من دهر كون 

جاي رايدني متعة الچلب ما استحى من يكولها 

شافني معتازة وحالتي مو زينة كال اصرف عليها واتمتع بيها 

شلون تفكير نكس اوفي دينج .. يوفي بالمتعة الچلب 

جا اذا المتعة ما بيها شي عليمن رافضين حسن وهو الرايد اخته بدون علم مرته و ويحطلها بيت وبعلمهم والله ها شني ماخذها متعة 

يحرم المتعة على اخته وما يرضى ويجي يمي يريد يتزوجني بدون علم واحد من اهيلتي .. لا والوعد كامت الزلم تشوفني صيدة سهلة الملذاتها جيف مالي معين ومرة وحدي ومحتاجة بحجة اصرف عليها واتونس بيها .. امداني . 

احتركت حرك من حجي هالاغم هذا 

عفية مجتمع المرة شكد ما تحاول تشتغل وتوكف على حيلها وما تحتاج احد يشوفونها وحيدة وسهلة لملذاتهم .. ما يشوفون بالمرة غير متعة 

من الله يطيح حظهم ويخزيهم . 

على خواتهم ما يرضوها بس على بنات الناس لااا غير الشرع حلل 

وابو الوصخ السجادة ما يندلها وحاط شرع الله علچ بحلكة 

لثاني يوم اني فايرة وطالعة روحي .. 

.. خابرني حازم .. رديت : الو 

- ها كواج الله 

-هلا شرايد 

-شرايد !؟ شنو هالنبرة 

-انتم شايفيني سهلة !؟ من شفتو ما عدي معين ومالي احد بظهري كلتوا هاي نعاونها ونستغلها ما بيكم واحد كصته تعرك ويستحي على روحه لو كل واحد بيكم يباوعني بعين نظراته ونزواته 

- سالمين بويه ياهو المباوعج هيج 

-جا مخابر شني عرف ولف لو هم ادورلك فرصة 

 بس كافي مصخت بالعباس مصخت 

-مشكورة عمي وخلف الله عليج 

سد الخط بوجهي .. 

باوعت للتليفون .. اي وزعلتهم ازعل ياهو مالتي بيك 

عوزني افكر بحازم زعل لو لا .. 

كمت مشيت للمطبخ احضرلي شي .. 

وراسي يچرخ حجي .. سكتت روحي واخذت نفس اباوع للبيت 

اني شمالني انهديت بالرجال وصفيته ويا اسعد !؟ 

اسعد اطاني اقساط مليونين ونص وكعد يساومني 

وحازم كل خيري الانه بيه هسه بجاله وما استغلني ولا حجه وياي شغلة مو زينة 

هو لو ما حازم اني اكعد بهذا البيت ؟ 

لو اثثه لو اجيله غرض .. مو جان هسه اني بصريفة عمي يدمغ فوك راسي وهدى توز و ميلاد دايرة عني وحالي بس الله يدري 

اني هم مدري شلوني الزلمة لا حجه ولا نطق واني توليته 

شني جزاتها هاي ارزله !! 

هسه اعتذر منه 

لا يمه عليمن اعتذر خلي هيج خاف هم يفكر بشي مو زين 

يلزم حدوده وياي .. ويعرف اني مو سهلة ولا ع الكيف يمتى ما راد عند الطلب والله مساعدني .. جا ساعدني لله اني شعندي واجازي 

.. بس ما ادري هم طوختها 

هو شسوا وصيحت بيه .. 

ضليت بين الوم روحي و بين الاقوية تصل صادة وما تنطي مجال 

.. الانسان لازم يحطله خط رجعة ويا ناسه 

الزلمة لا استخف ولا حاجاني بشي مو زين بالعكس هو النبهني وكالي اسعد طامع بيج .. ونهاني اصعد يوصلني جيف عرف بنية اسعد 

اني لا عمام ولا اهل 

وحازم خوش زلمة لو رايد يستغلني مو هسه من اتعافيتي 

لا جنت بوضع ومريت بايام محد درى بيها غيره وجان يكدر ويجي ويطب للبيت ويشتغل .. عينه ما شالها ولا شفت بنظراته عين نكسة 

ساندني صدك و سواها وياي لوجه الله 

وحتى امس من رحت خاطر اوفي دين طلع ما حاطني بدفتر ديونه

يعني ما مطالبني بدين ولا رايد مني شي 

لليل دزيتله رسالة 

كتبتله ( حيل اعتذر منك ابو علي صارت بوجهك بس والله اني مو سهلة ولا ارضى احد يشوفني بنزوة بس اتصايقت حيل من حجي اسعد واختلطت عدي وغلطت وياك .. اسفة ) 

دزيتها .. 

انتظرت يرد ولو بحرف .. 

بس ما جاوب ابد .. استحيت حيل ماخذ بخاطره مني 

خابرته طول بالرد لحد ما راد يخلص الاتصال .. جاوب 

-ها يابه 

- ها 

- كولي 

- شكول 

- جا مو مخابرتني ؟ 

- اي مو هاي دزيت رسالة ف .. يعني ردت اعرف .. اذا شسمه قريتها يعني . 

-اي قريتها 

-ها زين يلا مع السلامة 

-صبا 

- ها 

- محتاجة شي رايدة شي !؟ 

-لا عساك سالم الله يحفظك انا بس شوية خربطت وياك بالكلام بس وهاي كلت اعتذر 

- اخوج التحق 

-اي ليش ؟ 

-سدي بابج بوية ولا تكثرين طلعات .. من هو ما موجود لا تخلين الناس تشوفج طالعة وطابة للبيت من بجي اطلعي براحتج 

-ليش 

-لمصلحتج .. حذرتج من اسعد وعرفتي حجايتي حگ .. واخذي حجايتي هاي وامشي بيها 

-ان شاءالله  واعتذر منك هواي 

- اذا تحتاجين اي شي لا تترددين مسواك شي .. ترا اني مو مثل غيري الما سويته وكت الجنت اكدر ما اسوي بغيرها واني ما شايفج بالنظرة التكولين عنها بالعكس لان شفتج بت ناس وحمولة والدنيا موازيتج وكفتلج والا انا والكل يعرفني ما اصف ويا النسوان ولا الي بدربهن . 

-الله يحفظك لاهل بيتك بجاه الحسين 

-يحفطج سدي يلا ونامي ولو واحد ادنالج لو وازاج بس اشري وتلكيني عد عيناج 

-ينطيك الصحة والعافية ان شاءالله مشكور 

-الشكر لله .. يلا مع السلامة 

-الله وياك 

-صبا 

-ها 

-انا مو اكال حلا .. بس الحلاوة المسويتها وجايبتها الله يشهد جانت اطيب حلاوة اضوكها بعمري .. ويا ريت ما تحرمينا منها 

ضحكت :جنك على حلاوة من عيوني 

ضحك وكال :ديري بالج على نفسج زين وبابج سدي واودعناج . 

-مودع بالله 

سديته من عده بس شني 

لا اهيس برجلين ولا ادين احس عدي جناحات وطايرة 

كمت اتبسم واضحك لوحدي .. 

تنهدت .. 

جا هسه شحلاتها لو حظي يطيحلا بهيج زلمة ! 

بس لا متزوج وعنده عايلة .. 

اني هم مدري شلوني 

افكر بروحي ما افكر بغيري .. 

الله يحفظه اللهم ويا بخت الماخذها بهيج زلمة . 

عشت بشعور حلو 

واحساس حيل دافي من يكلي خافي على نفسج وينصحني و ويرشدني .. شكد فرق جبير بين اسعد اللي اداينت منه مو ساعدني .. واستغلني .. وبين اللي شالني من الكاع وحطني بالسما بدون غاية . 

مشيت بنصيحته 

وصدك الفترة الحيدر اخوي بيها بالدوام ما طلعت ولا وشوفت طولي للمنطقة .. سادة بابي وكاعدة .. خصوصا من كضت العشرة الاولى من محرم كضت القرايات وكمت ما اروح من يسوون 

بس من خلصت العشرة الاولى بعد محد دزتلي اقماش اخيطلها 

النسوان بس كبل محرم والعشرة الاولى يدزن خياطن وما تلحك تحك راسك 

كلها تريد كبل الحجة .. بس من كضت الحجة ولا طلب اجاني . 

النسوان كامن ما يفصلن .. لان بعد شهر ونص لفرحة الزهرة يسلكن ارواحهن بهدوم سود لحد ما تكضي ايام ابو عبدالله . 

مسواك بيتي كضى .. 

والفلوس العدي بدت تخلص .. يومية ادزلي على ٥٠٠ صمون وجبن 

لو اعتاز تايت لو شغلة للبيت اودي بيت بنات سارة .. ما تحس الا الفلوس ما هنه بجيبك ... 

احتاريت .. لا عدي طلبات خياطة واشتغل .. 

ولا ضلت عدي فلوس .. هاي عود اذا اجا نهاية الشهر منين اطي فلوس سحب ؟ ودين مالت اسعد خوما اخرها واخلي يستغلني اكثر ويضغط علي .. 

هسه لو ما حيدر ماخذ المليون من عدي جان لا فكرت ولا شلت هم اشيل من المليون واطي لحد ما تكضي ايام محرم وعود يتحرك الشغل واعوض .. 

نزل حيدر جان عدي الفين دينار .. 

اتلكيته وسويتله تمن احمر وروبة اتغدا ونام .. 

وكلت اكلله ما طوله كاعد وياي يعاوني .. هو يشيل عني فلوس السحب واني ادبر فلوس الدين .. والمسواك نتعاون بيه العده يجيب. 

نام وكعد العصرية 

سريتله جاي وكتله : حيدر محتاجة فلوس مسواك 

- واني منين اجيبلج 

- جا منين اجيب وعلي شغلي بالضيم ولا طلب خياطة .. دكيت لافتة خياطة وحفافة بس محد اجت ولا وحدة دكت الباب منين اجيب 

- شمدريني منين اجيبين .. من كعدتي ابيت وحدج ما فكرتي منين اتجيبين 

- هسه انت من جنت كاعد عد جعفر مو تطي ١٥٠ الف بالشهر جا اطيني مثله 

- وشني اني كاعد عدج !؟ 

- اني ما كلت كاعد عد... اريد اخلص حجايتي 

شو ما احس الا يدفر كلاص الجاي بالكاع ويكلي : بت الخ** انت حاسبتني كاعد عدج شني نزل اني ولج غصبا ما عليج اكعد ما عاجبج اكسر راسج رايدة تهرمين جيف اجيت تردين فلووووس لو تطيني لو اضل على حل شعري 

- اني ما حجيت هيج ليش تحسبها هيج .. كوم التعاونوا ما ذلو واني بمحرم شغلي مو زين منين اجيب غير انت اخوي 

- انعل اليوم الصرت بيه اخوج طااايحة الحظ 

كام بدل وطلع من البيت .. 

ما رد غير لنص الليل .. اني بحجة كله ويا سارة اتعشى وياها الثلاجة تصوصي ما بيها ولا حاجة وما عندي غير الفين دينار ششتري بيهن .. 

ثاني يوم .. كعدته الظهر كتله : ما متريكة وما عندي فلوس كوم جيبلنا صمون وريوك 

- سوا روحه عصبي شلون مكعدته 

ضربني راشدي وكامي يغلط ويصيح ودفر الصوبة ووكعت الشيشة مالتها وانكسرت .. .. ربك ما مشتغلة جان هسه كبت وشيطفيها 

عاف وطلع .. 

كامت الصوبة من اشغلها اطلع دخان .. 

اطفيها نموت من البرد .. اشغلها نختنك الا افتح الباب .. افتح الباب نثلج .. واحتاريت بيها. 

خابرت على حازم كلت اساله اذا عده شيشة  .. رد 

: يا هلا 

- هلا بيك شلونك 

- بخير اذا انت بخير 

- اذا اني بخير 

- ها جنج مو بخير 

-يا خير الاشوفه من هالجايف اجوي 

- شماله ؟ 

- متسودن علي شماله بعد 

- عليمن ؟ 

-سولفتله 

قاطعني واني مندفعة واحجي بحركة : صبا صبا .. لحظة اقاطعج 

الله بالخير عليج يابه 

- الله بالخير 

- صبا يوم الاشتريتي البيت .. وقررتي اتكعدين وحدج جنتي حاسبة حساب حيدر يشيلج لو يعاونج بعيشة ودين !؟ 

- لا 

- جا حاسبته ليش 

- جا منين اجيب 

- اذا اتعرفين بروحج ما تكدرين وما تدبريها تشتغلين  وتوفين ليش ورطتي روحج بهيج موضوع 

- لا ليش ما اعرف ادبر بس هاي ايام محرم ما بيه شغل لا وحدة تفصل ولا وحدة تحف .. عود على فرحة الزهرة يلا يبدي الشغل . 

-يعني فترة مؤقته 

- اي 

-شنهو الاي جا وين رحنا كولي فترة واداينج وعود اسجلج  وعلى كيفج من يصير عدج انطي 

- لا فدوة لعينك اني جم دوب اضل مثكله عليك انت حتى اسمي ما مسجله بدفتر الدين صاحبك حلو لا تاكله كله 

- هسه انت شعليج ما دامني صاحبج وحلو عمي اكليني انا راضي وعوينة اهلي لو كتلج لو شفتي مني شي ما يرضيج 

- لا جا انا مخابرتك اخذ منك لا والله اصلا ما مخابرتك على هاي 

- جا عليمن 

- علمود شيشة النكس دفر الصوبة وكسر الشيشة وكامت ادخن .. لا اكدر افتح الباب ولا اكدر اطفيها 

- هسه اذا على الشيشة سالفتها سهلة .. 

-يعني عندك 

-حتى اذا ما عندي بالسوك منا بس تعبر يسوونها ب٣ الاف

-ها ، اي هو اكدر اجيبها للسوك ان شاءالله اخذها 

-لا اليسويهن مو خوش واحد لا تروحيلا انت .. تريدين اجي واخذها تريدين تجيبيها الي للمحل وتروحين لبيت عمج من ادزلح رسالة تجين تاخذينها 

-ها اي خوش لا لعد اجي خاف حيدر يجي ومن تجي يعني شسمه 

-افهم افهم اني هم اكولن تجين افضل 

همي نفسج وتعاي هسه خاف للمغرب يعزل الولد وما الكاه 

-خوش 

كمت بسرعة بدلت وكاعد الم غراض بالكنتور هدوم حيدر كلهن وكعن .. كاعد اشيلهن كلت من ارجع ارتبهن ولو هو ما يفيد وياه ترتيب ساعة تكعد اصفط ومن يجيب يجرهن كلهن يباوع البي يريده ويعرفهن مطشرات ويمشي

 كفيتهن وكعدت من عندي جنطة جوا الهدوم 

شلتها .. واجا ابالي ادورها 

صدك افتحها والكا بيها كومة فلوس .. 

حسبتهن مليون وميتين الظاهر مستلم راتب ..

سحبت المليون منهن ورجعت الميتين وطلعت ..

طلعت للداخلي وصلت غاد نزلت مقابيل محل حازم ع الشارع .. 

دخلت سلمت واطيته الشيشة .. كال : روحي لبيت عمج .. واني من اخابرج عود تعاي 

- اكلك كبل لا تروح 

- كليلي 

- هاي المليون اللامتهن كبل جان ماخذهن اخوي شتكول اخليهن تحت ايدي مصرف .. لو اوفي بيهن اسعد ؟ 

- لا وفي بيهن سعد طبعا 

-معناتها ما يضل عدي مصرف تحت ايدي 

-ولو خليتيهن تحت ايدج تصرفيهن ويضل الدين عليج وياهو الكال اخوج يخليهن تحت ايدج حرام مثل ما اخذهن باول مرة يرجع عليهن .. وفي احسنلج 

- هاه هيج تكول 

- اطينياهن اني اطيهن اله .. واتفق وياه ما عليهن ربح وبعد كل شهر من تريدين تجين تطين فلوس الاقساط تحطيهن يمي بالمحل واني اطيهن 

-خوش لعد انتظرك تخلص الشيشة 

-ديلا 

اخذ مني المليون .. وراح 

رحت على بيت عمي سلمت وكعدت يم عمتي 

سالتها اذا عدها فلوس ادايني من يصير عدي اوفيها 

كالت ما عدي والعدها كاعد تصرفهن على علاجها 

خابرت على خواتي اثنينهن ما عدهن 

حازم كالي بس استحي اخذ منه اكثر .. 

رجع خابرني كال كملتها

عاد رحت لعمي للدكان كتله : عمي انطيني فلوس كروة 

كال : شني جا ما عدج 

-والله عمي الشغل ميت والعندي صرفتهن وحيدر ما يرضى ينطي فلس 

- دهاج هاج هاي الفين روحي بيهن .. ولا اظلين تشكين وتتباجين 

- خلف الله عليك 

اخذتهن منه ومشيت للمحل .. 

اطاني علاكة الشيشة مالت الصوبة وكال: جبتلج بطريقي نفط عدج 

- لا والله جاي اخذ من جارتي 

- جا بطاقة نفط ما عدج ؟ 

- لا والله .. اريد امشي بيهن هن والتومينية 

- دصعدي خل اوصلج قريب 

- لا رحم الله والديك ما اريد اكلفك 

- طريقي اصعدي 

مشيت كعدت ورا وراح كال : راح احجيلج ويا واحد كرايبنا بلكت يكدر يطلعلج راتب مال رعاية اجتماعية 

- راتب رعاية شلون يصير 

- مال مطلقات .. الهن راتب ١٥٠ الف بالشهر كل شهرين ٣٠٠ احسن من ماكو 

- يا جا شفايتلي اقلها يضلي بس فلوس السحب والعيشة 

- سهلة اكله يمشيلي بيها حتى لو بجم فلس مو مشكلة 

والتومينية اني الاحد الجاي اخذ اجازة واوديج الصبح اسمج ويامن انت 

- ويا طليقي لهسه يستلم بحصتي 

- سهلة 

- وشغلة لخ اذا تدورلي شغل بلكت احد عنده شغلة اكدر اشتغلها انت صحبانك ومعارفك هواي دورلي احسن ما اضل كاعدة وحاطة ايدي على خدي اقلها اشتغل 

- سهلة بعيني اشوفلج 

وصلني قريب من فرعنا وصفيت ونزلت ليغاد شلم ومشى 

واني رجعت للبيت .. نزعت عباتي وكعدت امسح الشيشة والمعها خاطر اترس الصوبة واشغلها 

واني انظفها لكيت فلوس بوسطها .. 

حسبتهن ولهن ٥٠٠ الف .. خابرت على حازم بسرعة 

كتله : ذني ٥٠٠ الف لكيتهن بالشيشة مالاتك 

- اي حطيتهن الج مصرف 

- جا لو شاعلتهن يصيرن رماد 

- فلوس حلال ما يشتعلن 

- يا .. لا عليك الله جا اني وفيت اسعد ارد انطلب لك 

- ذني لا طلب ولا دين 

- جا رد اخذهن اني ما اخذ شي مو الي ولا ارضى احد ينطيني 

- صبا ذني مالاتج 

- لا عليك العباس رد اخذهن واذا ما رجعت هسه البس وارجعن والله ترا مسودنة لا تشوف عقلي وعبالك عاقلة 

- هههههه هو موجود عقل حتى اشوفه 

- هاااه .. لا عليك العباس رد اخذهن 

- صبا ذني مو مني 

- جا منين ؟ بس عليك الحسين لا تجذب 

- والله خمس 

- خمس شني 

- اني عدي بيت ملك ومحل الانشائية ومتوظف يعني واجب عليه الخمس .. كل بداية سنة هجرية اروح للمكتب خاطر يطلعلي زكاة .. 

- يا على بختك تتصدق عليه 

- ذني مو صدقة ذني زكاة يعني مو فضل مني .. ذني واحب عليه اطلعهن من اموالي والا اموالي واكلي كله يصير حرام اذا ما انطيتهن .. المكتب يحبلي شكثر اطلع زكاة ويكلي ادفعها للناس المحتاجة هاي الفلوس شرط لازم المحتاج يكون ملتزم دينيا ولازم  يصلي الما يصلي ماله نصيب من امرال الزكاة .. 

يعني انت اذا ما خذيتيهن اني الانضر ولازم اروح ادورلي واحد محتاج واتأكد منه يصلي حتى انطي  او انطيهن للمكتب هو يوزعهن بمعرفته على الفقراء .. خو انت اولى بيهن ؟ 

- يعني عليك الحسين مو صدقة 

- وحق الله الاحسن من الكل .. مو صدقة ذني فلوس خمس .. يعني زكاة واجبة  وحق رب العالمين من شغلي وعيشتي .. لا اتشكريني عليهن اشكري رب العالمين لان هاي الاموال لله . 

- الحمدلله مشكور والله يزيد خيرك ناخية الحسين الشهيد 

- الله يحفظج ويستر عليج يابه . 

سديت الخط من عنده وكمت رحت لسارة كتلها : ذني الفلوس ضميهن يمج من يظلن يمي ياخذهن مني حيدر واظل بالضيم. 

ما كالت ضمتهن عدها .. 

ورجعت سويتلي جبن وجاي و كعدت اكل واباوع ع التلفزيون 

اجا حيدر كال : جا ما مسوية عشا 

-جيب واسوي 

- عاندتي يعني 

-اعاند عليمن مصرف ما عدي اتسوك واني بطرك روحي هالدزيتلي بالف جبن وصمون .. تريد عشى اتسوك خاطر اسويلك 

كام يغلط ودفرني بخاصرتي ويشتم بيا ومشى للكنتور 

جر الجنطة و فتحها لكى الفلوس ٢٠٠ .. فز كال : حاط مليون وميتين هنا وينهن 

-المليون الخذيته مني رديت اخذته ومشيت اطيته لابو الاقساط احسن ما يضل يطلبني 

-خذتي فلوس ؟ 

- لا فلوسك شني .. المليون انت مو اخذته 

-راتبي ذني راتبي المليوووون مالي وينه 

-كل الروحك المليون الخذيته وينه 

هم بكل حيله عليه  ولزمني بكل قوته من راسي : هسه تكومين اتطلعيني المليون 

وكام يحر براسي واني اصرخ اكله : اطيته والله 

لزمني ما خلا راسي ما ركع ضربني بوكسيات دفرات ويصيح : هسه اطلعين المليون .. شال التلفزيون كسره .. دفر الميز كسر الجامة الجوة .. الكنتور دفره انكسر الباب مالته .. جر البردات هجم البيت هجم 

ويصرخ : ما اخليلج اليوم شي بالبيت والله لا ما اطلعيلي المليووووون 

كمت ابجي واتصايح وياه تلازم وياي اني اجر بيده وهو يعت بيه يريد يطلعني بالشارع .. لازمني من ثوبي .. واني اجر .. انشك ثوبي من الظهر كله .. 

كمت اجر بروحي واستر نفسي .. جراني وذبني بالباب هدومي مشككة وسركا الباب وصاح : ساقطة كح*** اليوم ما تلفين البيت ولا اخليييج والله 

كمت ادك واتوسل بيه يدخلني 

ما فتح كمت اصيح عليه ينطيني عباتي .. ما نطانياها

ولا فتح الباب الحو بارد يكص كص ماكو احد بالشارع واريد شي اتستر بيه ماكو . 

رحت دكيت الباب على سارة .. فكت الباب تسودنت  من شافت شعفتي شكبرها و هدومي مشككة وبالشارع صرخت : شصابر وياج ولج 

- بس اطيني هدوم وعباية الله يخليج 

- ياهو الكاتلج شصاير 

- رجلج موجود ؟ 

- اي كاعد جوا 

- لا تحسسينه بس جيبيلي ثوب وعباية 

- دطبي فوتي يا احسسه 

- لا لا ما اريده يشوفني بهالحالة عيب بس اركضي جيبيلي 

ركضت جابتلي هدوم وعباية لبستها .. كتلها : اطيني ٥٠ من الفلوس العدح

- ولج فوتي جوا وين طالعة بهالبرد 

- لا مشكورة بس اطيني 

لحت عليه ما رضيت لان هم حالهم حالنا غرفة وحدة اروح انام ابيت بيه رجال غريب ما ترهم .. اخذت فلوس منها واطتني نعالها وطلعت ع الشارع 

جان حظر التجوال يبدي من ١٢ 

والساعة ب١٢ وثلث امشي بالشارع والبرد كص وجهي كص وعيوني تجري واتحسب ربي عليه .. وجسمي من الكتل وصل البرد عليه كام الالم ينز عليه من كل مكان 

طلعت للشارع اريدلي سيارة تفوت ماكو .. 

احتاريت شلون بيه .. ماكو سيارات لا كيات لا احد بالشارع 

والشارع يصوصي بس صوت الهوى . 

كعدت بالنص ساعة بالشارع ما وكفلي احد وعيوني ورمن من البجي 

ضليت امشي وادك مشي بالبرد بلكت الكى احد مفتح لو احد يوكفلي بسيارته 

الا شفت اسواق شاب كاعد ومرجع باب الاسواق بس بعده ما معزل 

دكيت الباب عليه صاح : تفضل 

كاملي لكاني مرة وابجي كال : خيرج خوية محتاجة شي 

- بس رايدة اوصل لاهلي 

- ما عندي سيارة والله جان شلتج بعيني طبي خوية ضلي عدنا للصبح وروحي 

- لا مشكور بس حسبالي تعرف احد عنده سيارة يجيني 

- لا والله بس اخوي وهسه الساعة متاخره هو بالجوادر جان خابرته 

- زين تكدر تنطيني تليفونك اخابر بيه 

- كدامج خوية صدك جذب 

انطاني التليفون وكسرلي بطل عصير قدملياه مسحت عيني من الدموع واني ادك رقم حازم واكله : يطيك العافية 

دك دك .. رد الو 

: الو حازم اني صبا 

- هلا صبا .. شو الرقم غريب 

- تكدر تجيني 

- اجيج وين

- حيدر كتلني وطردني بهالليل وما رضى يفتحلي 

-ووين انت هسه 

- بالشارع صالي ساعة اريدلي سيارة توكفلي ماكو .. ولو اتعبك 

- جايج 

سد الخط بسرعة 

واني كعدت انتظر ربع ساعة ورجع خابر 

رد عليه الولد كام يدليه على المكان .. لحد ما وصل وصف السيارة .. 

شافني بهالوضع اتخبل عيونه صار دم من الحركة والعصبية 

كال : اليبيع الشرف ذب عرضه بالشارع جا مو اجا كعد وياج بحجة ما عدنا نسوان يكعدن وحدهن شمرج بهالليل ما كال شيصيرلج ومنهو اليتعرضلج .. غيرته ما شالته كصته ما عركت شنو من ملة هذا من يا ماي نكس الله خالقة 

ضل يصيح وصعدني بالسيارة اني بس الدموع تجري 

كال : اتمديي لا اتكعدين خاطر اكل للسيطرات مريضة وناقلها 

اتمددت واتغطيت بعباتي .. 

واني احجيله ع الموضوع وهو يكلي : خر* بحظج ولج انت شنو من حظ عدج لا اعل بيهم خير لا اخوة لا ارجل ولج شلون وياج كليلي .. مرة تنذب بالشااااارع. 

وكل ما يكف عند سيطرة يكلي شوي روحج متخربطة و اني ارجع راسي ودموعي بعيني .. وهو يحجيلهم وينطيهم هويته ومكانه بوزارة الكهرباء 

لحد ما كال : يلا انزلي 

اني حسبالي راح يوديني لبيت عمي .. 

بس صف كبال بيت .. انداريتله : وين جبتني 

- لبيتي غير جا اخليج تباتين بالشارع 

- لا وديني لبيت عمي 

- واوديج هسه شكللهم خابرتني وياهو الكاعد بهالوكت ويفتحلج 

- لا جا ما اضل 

- اكلج فوتي والقران ضغطي علك وروحي واصلة لهنا منج 

- يا جا فوك ضيمي 

- دفوتي رحمة لربچ . 

دخلت للبيت حوش صغير .. وفتحلي الباب .. فتت لمطبخ 

.. مشى كدامي .. 

حجيت : مرتك موجودة !؟ 

- شتسوين بيها 

- هي موجودة 

- لا ما موجودة 

- يعني وحدك بالبيت ؟ 

- لا الجهال موجودين لا تخافين تعاي .. 

فتحلي غرفة جوا كال : ذوله جهالي ٣ نايمين افرشي بصف بتي ونامي وذيج هن الفراشات فوك الكنتور مالهم 

- جا امهم وين 

- نامي .. فوتي 

تقربت للغرفة دخلت هو كال : حللي وارتاحي انام واح اصعد انام فوك ما اضايقج ولا راح انزل . 

سد الباب وسمعت خطواته ع الدرج 

جريت فراش وبطانية ونمت على صفحة .. كلوب بالترك مال غرفتهم ضارب على غرفتهم مو ظلمة كلش .. حطيت راسي .. الوجع يون براسي من كل صوب 

اباوع لروحي وين صفيت 

حتى من اشتريت بيت ما اتهنيت يكتلني ويطردني منه 

واني البطرانة الحسبت روحي عدي بيت وكاعد اوفي بيه وفرحانة بنفسي .. وهاي تاليتي ابيت الغريب وما اعرف كاعي من سماي 

الى متى يبقى هذا حالي ومنو اليحميني من اخوتي 

وشلون بيه وياهم لا يعيشوني ولاي عوفوني اعيش 

والله ابتليت بيهم 

وضليت بين افكاري وبجي والم وقهر جبير بكلي 

غفيت .. ونمت 

الصبح كعدت على صوت الجهال جاي يبدلون .. ويصيحون ومستعجلين وهو يصيح : يلا بووووية راح اتصير ب٨ استعجلوووووو 

شلت راسي .. حجت بنية يطلع عمرها ١٢ .. ١١ هيج 

كالت : ها خالة كعدتي 

- هلا حبيبتي 

- منو انت 

نزلت البطانية مني واني اكعد كتلها : شسمج 

- دنيا 

- حازم ابوج 

- اي 

شفت علي .. كاللها : مو كتلج خالة صبا الا تنبشين يلا استعجلي ابوي منتظرنا بالسيارة .. 

حجيت : علي ماما وين 

- ما موجودة 

حجاها واني انتبه لطفل يجر بجنطته ويصيح : دفتر الاملاء مالتي هنا عفته 

صاح علي : عوفه عود شك ورقة من النص وامتحن يلا ابوي كام يصيح 

اتراكضوا للسيارة .. ومشوا 

بقيت وحدي بالبيت .. اي صوت ماكو 

ادري شلون امن عافني بالبيت ومشى يمكن مو زينة يمكن ابوك حاجة من بيته هيج واثق بيه وعافني وحدي بالبيت .. 

فتحت الثلاجة .. 

كلها معلبات لحم واجبان وصمون بايت .. 

ووصخة بحاريث الاكل ومربى متبدية .. 

سديتها ومشيت اباوع ع البيت 

انوب رحت للحمام .. وطلعت بس باردة تكتل .. رجعت دخلت المطبخ كعدت بالكاع ..وانشف باديه واحطهن جوا اباطاتي من البرد .. 

انفتح الباب ..

باوعت الجام مالت المطبخ مالهم مجلد ما ينشاف منها شي 

دخل للمطبخ .. فزيت لبست حجابي .. ورحت اركض للغرفة الجوا 

صاح : صبا 

-ها 

-تعاي 

-يربي شلون بيه جا لو درى بيه واحد من اهلي اني بايته ابيت رجال غريب .. 

حجيت : تكدر تاخذني لبيت عمي 

-دتعاي 

مشيت واني الف بحجابي وهو يفتح بالصوبة 

كال : تعاي اتقربي يم الصوبة 

-حازم اني ما اكدر ابقى بالبيت وياك وحدي اعذرني بس ياريت تاخذني لبيت عمي 

-اخذج وين ما تريدين بس تعاي ادفي 

تقربت من الصوبة كعدت بيها وهو ينصي النار ويوازن نارها

وهو يعدل بيها .. شميت ريحته وهو لابس سترة ع الدشداشة مالته ولاف الشماغ على ركبته من البرد . 

ريحته شامتها من كبل .. 

شكد ارتاح من اشمها .. تطيني احساس بحنية ودفو ..

ابتسملي :جبتلج ريوك وصمون تتريكين وتشبعين بطنج وبحيل الله اوصلنج لبيت عمج 

- ولو سالوني بيت عمي وين جنت بايتة شكللهم 

كاعد احجي واقرب ادية للصوبة اتحمى 

وهو يعدل بيها ، انفتح باب الحوش انداريت .. 

انفتح باب المطبخ بسرعة ومرة طبت للمطبخ شافتني 

وهي صرخت : منو هااااااي حازم ؟ .... يتبع 

تكملة الرواية من هناااااااا 

لمتابعة باقي الروايه زورو قناتنا علي التليجرام من هناااااااااا

بدل ماتدور وتبحث علي الروايات عمل 

متابعه لصفحتنا على فيس بوك هنااااااااااا

الرواية كامله من هناااااااااا

مجمع الروايات الكامله 1اضغط هناااااااا

مجمع الروايات الكاملة 2 اضغط هنااااااا