رواية عاجر الفصل الرابع 4بقلــم الكاتبـــة زينب ماجد (حصريه في مدونة قصر الروايات)

رواية عاجر الفصل الرابع 4بقلــم الكاتبـــة زينب ماجد  (حصريه في مدونة قصر الروايات)

رواية عاجر الفصل الرابع 4بقلــم الكاتبـــة زينب ماجد  (حصريه في مدونة قصر الروايات)

#عاجر 

{ بقلم الكاتبة زينب ماجد } 

الحلقة_ ٤

-عمي ما يريدني كوا هي .. ليش رايد تذلني بيه ؟ 

-لا اذلج ولا هاي السوالف ردي على ذمة رجلج وفكينا 

-وكبل اسبوع من خابرته ليش ما رضى ، من كتله فكر وردلي جواب ليش ما كالك اريدها وردلياها 

-زلمة ما عده مكان جا شيسويلج يبوك 

-وهالزلمة هذا رايد تجيبه حتى ينام وياكل براسي 

-اسمه زلمة فوك راسج 

-لا والله من رخصتك عمي لا اعاندك ولا اوكف بوجهك انت مثل ابوي بس عدنان انا طلع من گلبي ما اريده 

-واحنا بكيف كلبج 

-جا هي بالكيف عمي ما اريده شفت المر منه ومن امه عليش بعد ما صفكت وكلت يا الله اجا الفرج وراح ارتاح .. تردني لعدنان وارجع لذاك الطاس والحمام 

- اسكتي ولا تخلينا اخربنها وعلي كلها الغيها اخابر الزلمة واخربها كلششش 

-عمي كبل شويه الله هاديك وكلت ما بيها شي وسدي بابج وصيري سباعية شغيرك 

-وشنهي تسودنت خاطر الله جان هاديني بت الجلب هسه من اكضنج وادوس بمصارينج وانعل والديج احد يلوم بت الجلببببب .. مالج طلعة وغصبا ما عليج تردين لعدنان 

- لا والله اعذرني رجعة لعدنان كطنة وشيلها من اذنك لو مو تكتلتي لو تحط طلقة براسي ما ارجع . 

- تتعاندين ويااااي ولج تتعانديييين وياااااي 

كامتله عمتي تصيح ويوسف وكف كدامه .. وهو يصيح ويهدد 

كمت اصيح : والله ما ارجع لو مو تهدد ما ارجع ولا ارضى بعدنان الما رادني واني مشمورة ومحد بحالي وهانت بعينه العشرة ما اريد وارضاه اليه زلمة . 

كمت اصيح وابجي .. وهو يهد يريد لزمني ويوسف يصيح : دوخري هسه اطلعي امشيييي 

جريت عباتي من الغرفة .. وطلعت لبيت ابو اسعد فكيت الباب وصعدت للصالون ، اتلكتني وفاء : ها ؟ 

كعدت ابجي وحجيتلها الصار، حجت : والعباس هذا كله حجي هدى الله لا ينطيها ان شاءالله ناخية الحسين شلون وحدة لا انت الكاعدة عدهم مفتكة ولا رايحة عنهم مفتكة تعرف رجلها ابو نسوان .. 

-واني شذنبي بيه وفاء والله يا رسول حاسبته مثل اخوي حرام لو مرة باوعتله بغير نظرة 

- خية هن ذن الغبرات الما يعرفن يملن عين رجولتهن ولا يلزمنهم يذبن سمهن على غيرهن خاف رجلها يدور منا منا .. هي لو بيها خير وثاقة برجلها وبروحها جا ما سوت كل هاذ بس تعرف بروحها مو مرة ورايد يثني عليها . 

- وهسه كليلي شلون 

- شني شلون اتكعدين ابيتج عمج ياهو مالته بيج رب اليتوسل بطليقج حتى يردج ويخلص منج هسه يحكمج ، لا تخلين لاحد حكم عليج صيري سباعية وارفعي صوتج واتعلمي تكولين لا .. 

كافي مدنكة علباتج الهم شيحجون ويكفخون اتسكتين 

لا منطينج لا مشتريلج لا مانين عليج بشي والله بس اسمهم زلم وانت مرة احسن من خيرهم .. 

- ولو هدوا عليه للبيت وكتلوني ... واتولاني عمي هو واخوتي 

- والله لو مو يكتلونج لو يسوونها دموم كليلهم ما ارجع لعدنان وخابري وبلغي اني ما اريدك وحتى عمتج ام هذا الكوا* كليلها ابعدي ابنج عني ما اريده لا يكرب ولا يوصل اني ما اطيقه ولا اريد شوفته بعد 

-يا وخابر عدنان على عمي وكاله هيج كالت شبيج غير يكضوني يشكوني بالنص 

-وتضلين مكفخة جوا اديهم ؟ 

-لا بس ما ادري شسوي والله محتارة .

-دبقي الليلة هنا يمنا لا ترجعين وخلي الامور تهدأ وعمج يهدا بلكي عمتج تكدر تهدي وتسكته بس كون هاي الكح* ما تحط روحها وتدخل .

بقيت كاعدة وحايرة والعبرة ببلعومي تكص كص 

لا حول ولا قوة الا بالله ، حسبي الله ونعم الوكيل ربي لا ردت منهم شي ولا كتلهم انطيني ما رايدة غير اكعد مرتاحة بلا ما احس بروحي عالة على احد وما يخلوني الا يكربسوني براس واحد . 

فرشتلي وفاء الي والها بالصالون وبقينا نباوع ع التلفزيون لحد ما صار الليل ، كلت خل اكوم اروح للحمام كبل لا انام .. 

الحمام بصف باب الغرفة مال الصالون مسويتها وفاء للصالون يغسلن بيها النسوان .. 

طبيت وطلعت .. 

لكيت اسعد كاعد يطلع .. عدلت ربطتي 

حجه : ها شني صبا هنا 

- اي والله خوية 

- خير شني اكو شي 

- لا هيج اجيت اعاون وفاء واتاخر الوكت وكلت اضل يمها مو مالت ارد لبيت عمي . 

- اي بيها الخير هذا بيتج يمتى ما تجين هلا بيج 

- الله يحفظك ويخليك 

-شني بيتج كعدتي بيه لا 

-لا يا هو كبل كم ساعة اشترينا شكعد 

-اي محتاجله شغل هواي .. عدي كم جيس مال اسمنت ليش ما اتخليني اروح البخلجياه واعدلجياه كبل لا تنزلين بيه 

-والله خوية علواه ما اكولن لا ، تندله انت مو 

-اي اي غير رحتله هو من يترتب ويتنظف يطلع لوز وداعتج 

-اي 

-باجر من الصبح اغبشلج ما طول باجر كاعد وبعيني تدللين 

- سالمة عينك الله ينطبك العافية 

-تروحين انت لو لا 

-لا والله باجر ما اعتقد اروح بعد عمي ما اعرف رايه شنو 

- خير ان شاءالله ، جا اروح واشتغلج بيه وعود اخابرج 

- ان شاءالله 

-يلا تصبحين على خير 

- اجمعين الله وياك 

عفته ورديت نمت بالصالون يم وفاء بقيت اتكلب الليل كله .. 

لثاني يوم كعدنا الصبح .. اتوقعت احد راح يتفقدني يخابرني 

يكلي ليش بايته ابيت ابو اسعد .. 

تليفوني فارغ محد داز رسالة ولا احد مخابر .. 

ضليت اشتغل ويا وفاء .. 

لهناك الضحى خابرت على رسول واعداني يروح يسوي الكهربائيات 

ماكو ما رد .. كلت خاف نايم لو مشغول ، عفته وكملت شغل .. 

للظهر رجعت خابرته هم ما جاوب 

لهناك دزتلي هدى رسالة ( ام الزلم عوفي رجلي لا والعباس اشهرج شهيرة واخلي سيرتج على كل السان بربو* تريد رجلي يروح البيتها وتنحصر وياه ام الرجولة ) 

لعبت روحي من هي ردت من تليفونه برسالة 

عرفت ما وراه رجه لو ما يدري ويتعاجز يمشي وياي .. لو يخاف من المشاكل وعزل نفسه . 

لبست عباتي ورحت لابو الانشائية بلكت الله يعرفله واحد كهربائي يسويلي الكهربائيات .. مشيت ما هو .. ومعزل الظهرية ما لحكت عليه 

رقمه ع اللافتة مال المحل فوك مكتوب حازم بو علي .. 

اخذت الرقم وخابرته ، رن .. 

شوية رد : الو 

- الو مرحبا اني صبا بنت بيت الحجي 

- يا هلا صبا امريني 

- ما يامر عليك ظالم بس اجيت للمحل عبالي موجود لكيته معزل وخذت رقمك من اللافتة 

- اي هستوني عزلت وراجع بالطريق ، اكو شي 

- اشياء مو شي 

- خير صارت مشكلة 

- عمي بعد ما حان راضي حط شرط ما اكعد بالبيت الا ارد لطليقي وخابره وكاله اذا عدها بيت ارجعها 

- اها .. اذا عدها بيت جا شكد شريف هذا 

- والله ما ادري شسوي .. وشلون اقنعه 

- الله يكون بعونج 

- اكلك ما تكدر تحجي وياه وتقنعه وتحل السالفة هو يستحي منك ويحترمك . 

- بصفتي ياهو !؟ 

- ما ادري يعني .. 

حجه وكأنما ديحاول يتسحب من السالفة : هسه اني وصلت للبيت جاي من الدوام .. من رخصتج .. عود بعدين شوف شلون الله كريم . 

- ها اي اسفة اعتذر منك اني هم ثگلت عليك مع السلامة 

سديت الخط بسرعة 

اني هم اتسرعت على يا مال اروح احجيله واشكيله وتعال اقنع عمي 

اني شبية شو حيل رحت زايد .. زلمة وكفلي وساعدني اشتري البيت وما قصر بعد اشركه بمشاكلي شنو .. 

اني غبية وما اعرف اتصرف 

هسه شيكول عني الزلمة ماخذه رقمه ومخابرته حتى اشكيله 

واني اصلا خابرته علمود كهربائي شحجاني وشكو اشكي 

وحتى سالفة الكهرباء ما حجيته 

شكد عبية من امداني 

دومني مفشلة روحي 

رجعت بس حيل مفتشلة من رده 

حقه الرجال من يدخل تصيرله مشاكل هو في غنى عنها يروح يتهمونه لو شوف شيكولون عليه .. حقه ينسحب اني الما استحي وخابرت 

احتقنت حيل احس صحنت ودخنت والدمعة صارت بعيني من الفشلة 

وحالي باسوء حال ، المن التجئ المن اشكي وافزع .. 

هسه بالله هذا شيكول عني شكد خفيفة اخذت رقمه وخابرته 

شكد ما استحي 

بقيت الوم واكل بروحي 

رجعت كتبتله رسالة ( حيل اعتذر منك اني حيل ثقلت عليك بس بالعباس اني خابرتك علمود كهربائي محتاجة بس ما ادري هيج حجيت مو بقصدي اشرككك بمصايبي .. وحتى رقمك راح امسحه اني اخذته بس علمود اسألك عن كهربائي اعتذر منك حيل ) 

دزيتها .. ومسحت رقمه 

ورحت اشتغل .. 

وكل شوية اباوع التليفون خاف رد .. 

بس ما رد هنوب افشتلت اكثر .. دمعت عيني .. واختنكت حيل 

وفاء وكفتني ع الصبغ وبالي مو يمها اوكف بالشسوار على مكان واحد واصفن .. وكل شوية تندسني واتكلي انتبهي وارجع امشي الشسوار ع الشعر حتى الصبغة تاخذ لون . 

رد الظهر اسعد كال : رحت لبختلج البيت وصبغتلح الغرفة بالعباس سيرتلجياه لوز .. 

- اللهي نطيك العافية تسلم 

- شبيج شو احس بعيونج حزن 

- لا هيج شوية تعبانة 

- خير اكو شي .. 

- لا يا ماكو .. شكو قابل بس من الصبغات وهاي عيوني اتحسسن 

- لا والله احس بعيونج حزن واحسج مقهورة ومو على بعضج 

- الله كريم 

- اخابرج وافتهم منج فد شوية .. وشتريدين وشتحتاجين اني خادم الله 

- لا حشاك خادم ربك . 

- لا انت صبا عزيزة .. تأمريني امر 

- ما يامر عليك ظالم فدوة رحتلك . 

مشى واني بقيت اشتغل وبالي بغير مكان وجسمي بايد 

للعصر .. واني الهموم اتلال .. 

ما اتحملت رحت للحمام بحجة اغسل بجيت لحد ما خويت .. 

صاحت عليه وفاء : صبااااااااا 

غسلت وجهي من البچي واني اكلها : ها ها جيت 

 - موبايلج ديدك 

- اي 

مسحت وجهي وطلعت كتلها طب صابون بعيني حرك عيوني حرك .. منو ديتصل 

- ما ادري شوفي 

اخذت التليفون من شفت رقمه نهاية ٦٦ ديتصل 

ما ادري ليش انخلقن بكلبي فراشات وطارن .. وورجف كلبي كام يدك بقوة وانلوت بطني بنفس الوكت 

رديت : الو 

- ها ابويه وين انت بالبيت لو وين 

 -لا ابيت صاحبتي 

- عليش 

- هيج كاعد اشتغل اني اعتذر منك يعني اني والله 

- اكلج بابا الله بالخير عليج .. سوالف اعتذر وثكلت عرفيلياهن على صفحة والبسي عباتج خاطر امشي اسويلج الوايرات 

- تعرف للكهرباء 

- اها والمنطقة هاي كلها ياهو اليشدلها كهرباء غيري غير شغلتي هاي ابا عن جد .. وموظف بوزارة الكهرباء شبيج انت . 

- ها اي .. جا خوش الله ينطيك 

حجيتها بضحكة ، كال : ديلا استعجليلي خاطر ارجع كبل المغرب .. 

- يلا دقايق 

بدلت ولبست عباتي وكتلها : وفاء راح اروح اسوي الكهربائيات 

ما عندج جوا ايدج خاف احتاج ما بجيبي غير ٢٥ 

- هاي ٥٠ اخذيها وروحي كملي وباجر بحيل الله اذا كدرت اروح وياج اعاونج بتنظيفه 

- مشكورة يا حبيبتي 

باوستها وطلعت ع الشارع 

لكيته واكف اباب محله ، اتقربت منه 

كال : يلا 

صعدت وياه كعدت ورا 

حجيت : الظهر حيل افتشلت منك والله كمت الوم بروحي 

- لا تكلفين روحج بهالتفكير يابة . 

- لا بس ، ما ادري 

- هسه شنو وين وصلتي ويا عمج قافل ما يقبل 

- لا اني من امس بايتة عد صاحبتي لا خابر واحد بيهم لا سأل صارت السالفة صنطة اكول لا ارد ولا اهيج السالفة خلي يطلعون منها 

- يعني من البارحة انت بايتة ابيت صاحبتج 

يرضى عادي 

- اي عادي هم جورة صارلهم سنين هي تجي تبات اني اروح 

- جا غيرته ما شالتة من عافج تنامين ابيت بيه ٤ زلم مشوربة وواحدهم فاسد وعينة نكسة ، شالته الغيرة من تنسترين وتنامين ابيت واتسدين عليج الباب 

- من الفاسدين 

- بيت ابو اسعد النمتي عدهم لو غيرهم 

- اي 

- شلون غير اعرف ولدهم واحد واحد .. رب مال نسوان وسوالف مكسرة . 

- ما ادري عنهم اول مرة ادري 

- شني محد منهم محاجيج محد منهم داكلج ناعم مو تشتغلين ويا بتهم 

- اي بس على كد الصالون ما اختلط بولدهم .. بس البارحة هو صعد للصالون ما ادري شعجب واني خادم ومن هالسوالف استغربت مبادرته .. بس خطية اليوم رايح للبيت كال لابخ الغرفة وصابغها 

- منو اسعد 

- اي قبل شوية 

- شوفي خوية انت بحسبة اختي والعباس يشيلني ويطكني ان شاءالله لو ناويلح بنية سوء لو رايد استغلج ... بس نصيحة من اخيج اسعد لا تخلينه يتقرب منج كلش .. 

انت يمكن على نياتج وما تعرفين نوايا الرياجيل وشيفكرون وتحسبينه مثل الاخ ومتعاطف لا خوية هذا مو متعاطف هذا شايف بيج مرة كاعدة وحدها وفهمج كفاية 

- يعني شسويلا ؟ 

- ابتعدي كلش 

- واذا خابر وهو يطلبني فلوس البيت كله 

- لا خلفة الله عليه غير اقساط وماخذ ربح ع الـ ١٠٠ تلاثين الف قابل مسويهن لله غير مستفاد .. خوما يتولى عليج بيهن . 

- ها .. اي 

- خوية انت فقيرة وعلى نياتج والله لا ينطي الدنيا الذبتج هالذبة هاي بس نصيحة من اخيج ولو كثرت نصايحي بس والعباس لمصلحتح 

فتحي خوية ولا تبقين تحسنين الظن باحد كل واحد كدامج شكي بيه يريد يستغلج 

مو هاي اني هسه كبالج وماخذج اسويلج الكهرباء شكي وفكري 

عليمن ماخذني بسيارته ورايح يسويلي عرف ولف شنو مصلحته 

فكري وشكي بنوايا الكل .. 

لا تحسبين احد طيب 

وادمنا السانها طيب وكلوبها خبيثة 

وانت سدانة والها عيون لو ظليتي بطبعج هذا والله يورطونج بسالفة خوية ..  واهلج واخوتج جلاب مو بس ذياب .. هالتشوفينهم يتمنون وهم واحدهم لا فلس لا عانة .. 

الزلم صلفة وتعرف تحجي وتطبلح بزواغير يابو زواغير ومستعدين مو يلبخلج حايط لا يصير خادم حتى يحرجج وياخذ اليريده منج .. صدكي وثقي نص الضاع شرفهن من المستحى على ابو السان حلو ولعب بعقلها واستحت وما عرفت تكله لا وتوكفه عد حده .. ضاعت بالرجلين 

فتحي واعرفي شلون تتصرفين وصيري سباعية 

فكري واي واحد يريد يتودد اني خادم شتريدين اني عدج 

ويصيرلج فاندام ابو كلب الاسد لا تصدكين ترا كل هالفعاليات بس حتى يلوي ذراعج بعدين يلزمها ضدج .. لان هو داخل بيت ولابخلج بيت لو مسويلج حاجة من تحجين وتريدين تتفلتين لو تشكين اطلعين انت المو خوش

هسه يكلولج شكو مدخلته بيتج ومخليته يلبخلج بلاش لو ما امأملته ومنطيته مجال .. وادمنا بكلشي تحط انته وشما يغلط الرجال الصوج ينذب بالمرة هي الانطت مجال .. لان لو ما مطية مجال محد يتجرأ ويتقرب منها . 

يحجي وينصح واني اسمع .. 

-لا مشكور والله وعيتني اني عبالي لان جيران وراد يساعدني يعني ما خطر ابالي شي . 

- لا جيران بيش الكيلو يعترف بجيران .. لو جيران  صدك وعلى حب الله خو يحسبلج الفلوس دين وتوفيهن على كيفج ويتساهل وياج وانت مرة محتاجة  وجيرانه شكو حط ربح عليهن ؟ هن الاخذتيهن منه مليونين ونص سواها ٣ ونص تقريبا .. جورة هاي !؟ 

صفنت : صحيح 

- فاسد خوية احذري منه . 

- مشكور الله ينطيك العافية ان شاءالله 

- الله يحفظج ديلا انزلي وخل اشوف .. شكثر تشتركين سحب 

- ما ادير شكد يحتاج 

- ٣ امبيرات ما تحتاجين اكثر 

- اي ما عندي شي 

نزلت للبيت .. فتحت الجوزدان .. انطيته ال٧٥ كلها كتله : هاك خوية خليهن بيدك وانت ادفع وسوي واشتري اني ما اعرف شكد وشتحتاج 

- خوش 

اخذهن وراح اشترى لفة مال كهرباء .. ونقط .. ومشى على المولد وكام يسحب ويرتب وضل ويا الولد للمغرب لحد ما سحب واير وشكله بالكهرباء وربطه .. اشتغل كلوب واحد اصفر بالغرفة باقي البيت كله بلا اضوية 

ربط النقط وسواهن .. وكمل كال : تحتاجين هواي بالبيت 

التوتاليت ما بيه قاعدة بس بلوعة شني .. اضوية ماكو .. قواعد مال اضوية ماكو .. وهو شكو حتى ابريج ماكو كلشي ما عندج .. 

انت حاسبة احسابج هكو جوا ايدج لو شلون 

- لا الحمدلله تدبر 

- والنعم بالله ديلا كومي خلي اخذج 

- وين اروح هم ارجع لبيت وفاء انام لو العمي الرايد يكتلني 

- جا اتضلين هنا !؟ 

- اي عادي اخابر خواتي باجر يجن علي من الصبح 

- لا خوية بالليل تبرد وانت ما عندج لا فراش لا بطانية شلون 

- لا عادي ادبر نفسي واصبر افضل ما اسمع حجاية من احد لو اصير عالة على احد 

- زين بس الليلة 

- وين اروح 

- روحي لاخوج بس هالليلة واصبح اطلعي 

- لا اروح اورط روحي 

- اخت كرايب احد روحيله بس سواد الليل

- ما عليه شي والله اتحمل بس سواد الليل وباجر اخابر خواتي يجن عليه ويساعدني 

- لا خوية شلون اعوفج صدك جذب .. 

- ما عليه شي والله 

- ضل يباوع بوجهي 

- عاد كومي روحي وياي لبيتي ام علي موجودة والعائلة ونحطج فوك روسنا 

- لا عساك سالم اتحمل والله ابقى هنا . 

- ما يصير يا خوية 

- يصير وربك بس سواد الليل اتحملها ويفرجها ربك 

كام يمشي ويرده الهوى .. 

مشى ربع ساعة ورجع جايبلي دوشك وبطانية ومخدة 

كال : ذني طلبتهن من ابو المولدة سلكي حالج بيهن شلون ما جان وبحيل الله باجر اني يمج 

- ان شاءالله 

اخذتهن منه وركب سيارته وراح .. وحطيت الفراش بالغرفة وقفلتها عليه وكعدت .. بقيت اتكلب منا ومنا .. لل٢ بالليل .. احس بطني كامت اصوصي من الجوع .. اريد انام ماكو شي اكله 

والفلوس كلهن اطيتهن اله اشترى بيهن مال كهرباء ودفع فلوس السحب .. وما بجيبي ولا ربع دينار .. 

كمت اتكلب بفراشي .. 

اندزت رسالة الساعة ٣ بالليل  .. كاتبلي ( من عمى بعيني كون اني نسيت اجيبلج وياي صمون لو حاجة تاكلينها نسيت سالفة الاكل والقران .. خو ما جوعانة ؟ ) 

دزيتله ( لا عادي مو كلش جوعانة ) 

دز ( والله يا خوية قصرتي لو مخليتني اجيبج وياي اريد انام ما عرفت طعم النوم من وراج شلون نسيت اجيبلج اكل شلونب هالوضع ما اعرف ) 

( لا تشيل هم عادي هي للصبح وتفرج ) 

ما رد بعد 

بقيت اتلوى من الجوع والبرد واجبر ب روحي ع النوم .. 

للصبح كعدت على صوت الجيران .. صياح الجهال برا .. ما بيناتنا حايط محرد جينگو .. كمت لحيلي اتفقد البيت .. احاول انظف 

خابرت خواتي اثنينهن كاللي باجر نجيج من الصبح باجر احنا يمج .. صليت اسولف وياهن شوية وسديته ضليت كاعدة برا 

صاحت عليه البنية من السياح :هلو يبنية  انتم نزلتوا جديد ؟ 

- هلا بيج حبيبتي اي والله 

- يا عمري كل الهلا بيج اذا تحتاجين شي كولي لا تستحين 

-فدوة الكلبج اي والله  احتاج مكناسة ووصلت مسح وهالامور اريد انظف البيت اذا عندج ولو اسوي عليج زحمة 

- يا ابطن عيني صدك جذب هسه ادزلجياهن 

دقايق ودزتلي صوندة وماسحة وفرجة ومكناسة وتايت ..

جلفت البيت جلف حتى الحيطان غسلتهن طلعت يلمع .. ومسحت البرة 

ورسكت المي ع الحديقة الحشيشها صاير اعلى من الحايط يحتاجلها كص .. بس سجين ما عندي 

رجعت الادوات واتشكرت منها حيل 

ورجعت .. اريد ارجع لبيت عمي اجيب المكينة غراضي شغلاتي بس ما عندي ولا فلس 

اريد ادز اكل شي  ما عندي شلون هسه شسوي !؟ 

حازم كال يرجع ارجع وياه 

والله ما ادري شسوي .. 

لحد الظهر صار الاذان 

انسليت سل من الجوع لدرجة دمعت عيني .. 

وكفت صليت بلا سجادة وتربة اتوجهت للقبلة ولبست عباتي وصليت كملت .. كمت ابجي لرب العالمين حالي واني اكله 

تشوفني تشوف وضعي تشوف حالي 

يتيمة لا اهل لا سند لا احد ارتجي عليه غيرك 

وين اروح بيش اشبع بطني 

ربي لا تعوفني بجاه كلمن عنده جاه يمكن 

احلفك بالامام الحسين ربي لا تعوفني بشدتي هاي . 

كعدت اشكيله وابجي 

بهالاثناء اندك الباب .. كمت من مكاني ومسحت دموعي ونزعت عباتي وصحت : منو ؟ 

- اني حبيبتي ثواب 

فتحت الباب ولن مرة شايلة صينية بيها تمن احمر وعليها قطعة سمج جبيرة مكلاية ويمها كلاص روبة وكرصتين خبز .

انصدمت وضليت صافنة 

شكيت لله جوعانة دك الباب حطلي ابابي اكل ! 

كتلها : مشكورة عمري ان شاءالله واصل المن اقرا الفاتحة 

- للامام الحسين اليوم واحد محرم 

- يا وعلي راح من بالي اليوم اول محرم بالعباس .. يجلعها واصل 

عادي اخذ الصينية وارجعلجياها لان شوية هوسة ونازين جديد 

- على راحتج عمري احنا ذاك البيت اللي  بالزاوية يمتى ما خلصتي جيبي الصينية 

- مشكورة 

سديت الباب وحطيت الصينة ودموعي جرن .. 

اريد الرم الزاد ما اكدر كمت اناشغ مثل الطفل 

هيج الله يشوفني ويرعاني هيج اهل البيت كافليني وما عايفيني 

لزمت زاد ابو عبدلله ونشغت وكتله : ها يبو اسكينة اريدك التحسبني بتك سكينة وتوكف وياي بشدتي هاي يتيمة حالي حال بنيتك ومالي غيركم يوكفلي بعازتي وشدتي هاي .. بجاه سكينة عدك التوكفلي واتعاوني وما تخليني احتاج لكل احد ها يبو اسكينة وهذا زادك وهاي ايامك نذر عليه لو وكفتلي وساعدتني وعلي لا انصبلك عزا بنص بيتي واكلهم اطاني مرادي . 

ارتحيت اخذت كرصة الخبر وكمت اكل 

واني جوعانة الاكل هالكد طيب صار بحلكي بحيث بعمري كله ما ضايكة اكل بهاللذة . 

واني كاعدة وانكنك بالاكل .. 

اندكت الباب .. كمت الها ، ولن حازم كال : حيل اعتذر جنت بالدوام وهاي جيتي والله .. اكلتي 

- كل الهلا اي والله دزوا ثواب 

- كون جعتي بالليل 

- لا شوية 

- جبتلج تمن وقيمة لكيت بالطريق توزيع العالم طابخة اليوم نزلت اخذت 

- الله يتقبلن من الناس خطية بدوا طبخ 

- جبتلج من المحل مالي قاعدة مال تواليت وجبتلج مال دوش وكلوبات .. وبعد شتحتاجين اكتبلي 

- لا جا هواي والله 

- لا تخافين ترا اني اعجبج ما اطي بدون مقابل كلهن مسجلهن عليج بورقة وقلم دين توفيني ديني من يصير عدج 

- اي اذا هيج خوش 

ابتسمت ، ضحكلي 

وباعي اهم شغلة جبتلياها شني هي 

- شنو ؟ 

راح للسيارة واجا .. جايب صورة 

صورتمن ؟ 

دارها عليه صورة سيد مقتدى وسيد الصدر .. 

: ها صورة السادة 

- باعي راح الزكليجاها على باب البيت من برا خاطر ابن ابوه اليفكر يتقرب لباب بيتج وعلي من يشوف الصورة يشرد هسه يكول هاي وراها جيش المهدي شيفكني لو اندكيت بيها .. 

- اي والله دخيل بختهم اني .

لزكها ع الباب وعافه مفتوح 

واخذ القاعدة مال التواليت وسواله خبطة جايب مواد بالسيارة وراح دك وحفر وعدل .. ويطلع ينقل ويرجع يشيل خطية ادمر اتدمر .. 

لحد ما كضى .. كال : حطيتلح القاعدة بس ابد لا توصلين ولا اتذبين مي ولا اتدوسين عليها .. منا لباجر لحد ما تلزم و تيبس ترا تخرب 

- ان شاءالله مشكور تعبتك 

احجي وهو يباوع بوجهي ، كتله : ها 

- جا ولو توازيتي شلون ؟ 

باوعت بوجهه

 اريد احصر الضحكة اوخرها من وجهي خرب بيها غير لزكت واني اكله : يلا هي كلها يوم 

- كلها يوم شني هي لو طكت ساعتها تعرفين يوم تعرفين كاع الله غير تضيج بيج الوسيعة 

طكيت ودرت وجهي .. ضحك هو 

: يمعودة كاعد احجي صدك هسه شلون 

يمه غصيت من الضحك اريد اطلع الكلمة من حلكي ما تطلع كمت اكح 

كال : يعابيج الله هسه اتضحكين ولو وازتج هم تعالو الحكولي 

كمت اصيح : اخ يايمي 

اختنكت كافي عليك العباس 

كام يضحك بقوة : ولج احجي صدك والله مو شقى خرب بيومج 

اكح واصيح : يا يمة دخيلك يا علي ضحكة خير 

- كومي روحي وياي لحد باجر وردي 

- لا يمعود شني السالفة روح 

- جا اروح وانت منا لباجر شني وين تودين روحج 

- كافي عليك العباس كافي 

كمت ابجي من الضحك 

- هي شني الكافي فطيرة كاعد احجي جديات هسه اتضحكين ولو اجتج تحطين ثوبج بين سنونج وتكومين تصيحين يايابه يابويه 

حجاها لو متت من الضحك كامت دموعي تجري 

هو هم كام يضحك بقوة .. اطاني غمه وطلع ميت من الضحك 

راح ومشى غير اريد اسكت كل ما اتذكر يكلي اتحطين الثوب بين سنونج ابجي من الضحك واختنك .

والله بقيت نص ساعة اريد اسكت ما اكدر 

دزلي رسالة ( لهساع اضحك من خرب بيومج ويوم مصايبج هسه اني احتار بذيج سالفتج شعلييييي ) 

قريتها ورجعت متت ضحك كتبتله 

( رحم الله والديك وعلي يمكن صارلي اسنين ما ضاحكة هيج ضحكة ) 

( دايمة بس ديري بالج مو تنسين وتروحين للقاعدة ترا تخرب ) 

( ان شاءالله ) 

( بس الـ ان شاءالله ومن تجي عود ما اوصيج دكدكي بيبان الوادم ولا تنسين تحطين ثوبج بسنونج حتى يعرفون السالفة داچة ) 

قريتها وخربت من الضحك 

خرب بيومه على هالسالفة هاي يذب حجاياته هيج برهاوة بس يبول الواحد من الضحك . 

رجعت كعدت بالغرفة والعب بتليفوني لعبة حاطها سويسو .. مال طوبة ادور بالجو .. رد اتصل 

رديت : ها 

- سبحت وبدلت رايد اروح للمجلس اليوم مالت ابو عبدالله واتذكرت شغلة 

- ان شاءالله مقبول ، شنو هي الشغلة 

- لا تكثرين تمن وقيمة واذا هاي حاولي تبقين ع التمن والسمج لباجر لا تاكلين 

ضحكت بقوة : ليش 

- لمصلحتج يمعودة القيمة عواقبها وخيمة وانت موقفج حرج 

ضحكت من كل كلبي وكتله : يعني انت سبحت وبدلت ورايح للمجلس اتفكر بالعزا لو تفكر بالتمن والقيمة 

- لا وعلي افكر بالتمن والقيمة كلت هاي اني جايبلها تمن وقيمة لو ذبت ازروك بالجدو وطيرت نصه وين تروح 

كمت اصيح من الضحك كتله : روح عليك الله روح 

- يعابيج الله غير شايل همج 

- جا مو هييييج 

كام يضحك وكال : دولي فلا صوجج بالعباس . 

سده مني .. ادعيله .. هم الله ينطي ما عايفني ويفكر بيه وشايل همي 

احسن من الكرابه لا خابروا لا سألوا صارلي يومين غايبة من البيت محد منهم شال تليفون وخابر حتى عمتي .. 

والغريب هذا ب٣ باللي يدزلي عمى بعيني نسيتج بلا اكل 

ولا شفت بيه عين نكسة ولا نية وصخة محترم وينصحني ويرشدني كانما وحدة من خواته وهيج مهتم ومحترم وشايل همي . 

مشى بوكتها حازم للمجلس وعد ما داخل للحسينية وشايف السيد .. كايله: مولاي هكو بت لا ام لا اب لا خوان لا عوان جانت متزوجة بس جيف عاجر رجلها طلكاها وطردها بالشارع واهل الرحم دبرنالها بيت وكعدت بس البيت السما والطارق خاشوكة ما بيه .. وانت جدك رسول الله وانتم اهل الخير .. الاريده منك من تكمل المجلس تطلب من الناس العنده كنتور طباخ غراض زايدة المسكينة بطرك بطانية ودوشك والليل كله ما نايمة من البرد . 

- لا حول ولا قوة الا بالله ، وين كاعدة 

- بالحواسم مالت الشماعية جوا كلش .. وانت بعد سيدنا ما نعلمك على درب الخير وهذا مجلس جدك الحسين 

- لا لا ان شاءالله اخلص الخطبة واعي الناس للتبرع وان شاءالله احنا اخوتها 

صعد السيد المنبر وكمل خطبته وقبل لا يخلص الدعاء كاللهم : اخوان اكو مرة هيج وهيج حاجتها وهذا مجلس الحسين اليكدر لا يقصر بثواب الإمام الحسين والحسين وجده يشفعلكم وما ينسى موقفكم ان شالله 

هبت الناس اللي اتكله عدي كنتور اللي يكله عندي بوفيه وسرير وابو المجلس كاله عدي تلفزيون هو والمعرض ماله الميز كزاز وخشب صاج وعندي ثلاجة ما استخدمها جديدة بس زايدة  هم اخذها ،  والها مني فوك الغراض ميتين الف .. والناس جمعت كلها طلعت من جيوبها ودفعت .. 

ورجال قيادي الله امكنه كاله : ابو علي كاونترها و غسالة المرة علي عسى ما يصيرن بمليون .. اني كفالهن باجر بحيل الله يمها .. بس التواصل وياك مو 

-اي وياي 

السيد كاله : صوبتها وفراشاتها علي .. والها مني ميتين وخمسين وامشينا هسه نلمهن ونوديهن الها خاف الليلة تنام بالبرد 

راح السيد حمل زوالي ومخاد ودواشك وصوبة صالون جديدة وجلكان نفط واجا . وابو المجلس حط بالبيكم مال الحسينية تلفزيون  ومعرض وطباخ ابو ال٤ عيون بس منضدي ووياه الميز مالته حديد .. وصاح الولد كاللهم اطوني من الحسينية دبة هي والمنظم خاف خطية ما عدها 

وحملوا راحو سيارتين 

سيارة السيد وسيارة ابو الحسينية .. اتبعوا حازم وصلاهم لبيت صبا .. دك الباب طلعتلهم 

كاللها : فوتي جوا خوية 

نزلولها انواع الغراض .. 

صبا : ضليت صافنة زلم تحمل وادخل غراض 

شنو قصتهم منين جابهم المن هاي الغراض .. 

حجه السيد : خوية لا تكولين مالج اهلج مجلس ابو عبدالله بيتج والبيه اهلج واخوتج ان شالله شتعتازين وشتريدين كولي .. وكلشي يرخص ان شاءالله بثواب الحسين . 

- الله ينطيك العافية سيد ما قصرت 

- لا بعد اكو وادم اتواعدت ويا ابو علي يجيبولج غراض .. ان شاءلله على باجر ذني هيج جبناهن خاطر لا تنامين بردانة .. حتى نفط جبتلج اترسي الصوبة نفط وادفي لا اتظلين بردانة وشتحتاجين اكتبي برسالة ودزيلنا وما نقصر .. واني هم ما انساج من الخمس احجيلج ويا المكتب يخصصولج من الخمس مالت الوادم وما تضل شدة ان شاءالله كلنا اخوتج والله يسترج ويحفظج ويبعد عنج كل عين نكسة بجاه هو مجلس الحسين الجابنا الج . 

دمعت عيني وبجيت من موقف راحت من الساني كل عبارات الشكر بس كمت اكله : ما اعرف شلون اشكرك وما اعرف شلون اشكرك 

اتخبلوا من بجيت كل واحد بيهم اغتاض صدره 

ويكلي عد عينج واحنا اهلج ولا تخافين واليوصلج لو يكرب بيتج ننعل والد والديه بس خابري على الحسينية واحنا بالخدمة . 

كمت اتشكر بيهم عافوني وراحوا وحازم طلع وياهم 

كمت اباوع للغراض .. هوسة كلها مكومة دموعي تجري 

كاعد اشوف مواقف تعجب طلبت من الامام الحسين يساعدني 

فزعلي زلم الحسيينة كلها ودزهم الي يساعدوني 

بس كلها بفضل حازم هالرجال هذا لو شسوي ما اجازي 

وكفلي وكفة يحير الواحد شيحجي وبيش يشكره 

شوية ورد ..دك الباب 

كال : ها محتاجة شي بعد 

بجيت واني اكله : ما اعرف والله ما اعرف شلون اشكرك 

فضلك علي يمكن حتى اكبر من فضل امي وابوي وعلي .. شدعيلك وشكلك قليل 

- يكليني تعيشين بخير وتنامين مرتاحة ضميري يرتاح .. الله يستر عليج ان شاءالله سويلي مجال اترسلج الصوبة خاف ما عندج محكان 

سويتله مجال .. 

ترس الصوبة وجر المعرض وحط عليه التلفزيون وكال : بعد البقي انت على كيفج رتبي بس التلفزيون يحتاج جهاز ستلايت بحيل الله باجر من ارجع من الدوام اجيبلج من المحل مالتي .. 

- تعبتك وياي هواي 

- صدك جذب يمعودة تعبيش بس كعدي وارتاحي واخلصي 

- الله يحفظك ويرزقك من ارسع ابوابه بجاه الحسين 

- يحفظج الحسين يلا سركي الباب حيل واكعدي لا اطلعين بعد هم بردت الدنيا يلا خوية .. ها صدك كبل لا اروح 

- شنو 

- هاي السيد نسى ينطيجياهن لمولج فلوس بالمجلس خاطر اتشوفين شنو محتاجك .. يطلعن ٨٠٠ الف يمكن 

- صدك عود 

- واكو زلمة قيادي اخونا كلش خوش زلمة اتكفل الج بغسالة وكاونتر جديد .. باجر بحيل الله يوصلنج . 

- ان شاءالله ، بس انت شنو كعدت تشكيلهم حالي 

- لا والله بس كلت للسيد اكو هيج حاله وهو خلص المجلس وحجا للناس والناس ما قصرت . 

- مشكور وما ادري شكلك بعد 

- لا تكولين شي سدي الباب وراي وقفلي زين واودعناج 

راد يطلع .. رد اندار وجر من جيبه : صدك وهاي الجداحة هم الج خاف تحتاجينها اتشغلين بيها 

ابتسمتله .. خلا وطلع وسديت الباب 

اخذت نفس كلش قوي واتنهدت .. يفكر باداق تفاصيلي 

محكان ما عندي .. جداحة .. والله ما اعرف شوصفه الله دازه اليه ملاك مو بشر .. لو ما هو جان هسه الله يعلم بحالي شنو . 

كمت اعدل وارتب بالغراض .. فرشت الزولية وحطيت المخاد .. وشعلت الصوبة وقربتها يمي .. ثاني يوم من الصبح خواتي خابرني جايات بالطريق .. 

وصفتلهن وطلعتلهن ليغاد جبتهن واجيت .. 

هستوهن طبن جايباتلي جدورة وكلاصات ودولكات وخواشيك  وسجاجين وصواني وطاسات وكاسات ولاماتلي هاليكدرن عليه 

وكامن وياي لزمن الحشيش مال الحديقة كامن يكصن بيها .. 

كمت اريد الزم وياهن ، دك تليفوني .. لكيته حازم 

كال : اكو رجال راح يجيج هسه جايبلج كاونتر وغسالة .. انطيته رقمج دليه واطلعيله اني بالدوام 

- خوش 

صدك سده والزلمة خابر .. 

كمت طلعتله جايب كاونتر جديد ووياه سنك .. وغسالة كرافت الجديدة .. 

سويناله مجال ودز واحد وياه راح جاب بوري جديد مال سنك شدلياه .. وكال : خوية اني اخوج ان شالله وشتحتاجين لا يردج غير السانج .. واي واحد يندك بيج لو يسمعج حجاية بس اطيني اسمه واني اتصرف وياه .. 

وهذا مصيرف خليه تحت ايدج 

شال ١٠٠ الف وانطاني 

كمت اتشكر منه وسهى اختي كامت تتشكر وراح .. 

ورا شوية خابر واحد جايب كنتور ابو الاربع بوب .. هم حطه بالبيت نصبناه وجديناه اني وخواتي .. ونصبنا الطباخ ورتبنا الغراض بالكاونتر والدبة جوا الطباخ .. 

خابرت على عمتي كتلها : عمة احتاج منج بس ادزيلي المكينة مالتي وغراضي بيد واحد اني اخاف اوصل لهناك وتصير مشكلة 

- ابطن عيني تدللين هسه اهيض الولد يحملولج غراضج ويجيبوهن الج .. ولا تجين عمه كملي كلشي يلا تجين انا هم اتعاركتلج يوا عمج وحجيت وياها عليج وسكت عن السالفة بس اخاف لو شافج يكوم يشمر وتصيرلج سالفة استقري وكملي ومريلنا مرة الخطار واتصافي وياه 

واني راح اوديلج بي الولد ١٠٠ ما جبتلج شي لبيتج ولا اجيتج تعرفين بوضعي اعتبرها وصلة بيتج 

- مشكورة عمة ما قصرتي الله يحفظج 

سلمت عليها .. وصدك للعصر اجا رسول و يوسف دخلولي غراضي واتعجبوا باثاث البيت منين جبت الكاونتر الجديد منين حبت كنتور التلفيزيون الصوبة السجاد المخاد ..

كتله : اهل الرحم هواي سيد حجه حالي بالمجلس البارحة واهل المجلس اتبرعوا وانطوني .

باركولي وانوني ال١٠٠ مال عمتي ومن كل واحد انطاني ٢٥ كالوا : هاي وصلت بيتج 

شكرتهم وراحو 

عفنا منى يم الجهال ورحنا للسوك اشتريت الاحتاجك وقماش وتول .. ورجعت للبيت .. جرخت البردات وخيطتهن .. ووجوه للمخاد جديدات وحلوات .. 

خابر حازم كال : كلش اعتذر منج ما اجيت اليوم عندي شغل بس باجر بحيل الله يمج 

- كل الهلا بيك باي وقت 

وبقيت ويا خواتي 

سويت تور خفيف مثل الباب فاصل بين المطبخ والغرفة .. ورتبت تول وخيطته للتلفزيون وغطيته وللميز .. وطلبنا من الحيران جاكوج وصعدت منا خفيفة دكة الشيالات مال البردة .. وعلكتها صارت شكد حلوة .. وركبنا الكلوبات القوية..  نور البيت 

ودواسات اباب المطبخ واباب الغرفة ويم الحمام .. 

وزاوية مال الحمام هم شدتلياها منى 

اباوع البيت صار غير شكل .. هلكد حلو 

وخواتي طايرات من الفرح اكثر مني يكولون واخيرا صار عدنا بيت اهل نتعنى نجي نرتاح بيه .. ودزينا على حلويات ونمنميات وكعدنا سوينا عشى وناكل ونسولف الليل كله لحد ما نمنا وجه الصبح 

خابروا ارجولتهن للظهر اثنينهن راحن فرغ البيت ..

كمت احط بخور اعطر البيت انظف بالحديقة واقلم بيها وارتب .. 

شوية واندكت الباب .. 

لفيت حجابي وفتحته .. حازم كبالي .. 

: ها السلام عليكم 

- هلا وعليكم السلام 

رديت عليه واني اباوع ايده 

هاج هاج جبتلج ثواب تمن ولحم .. 

: الله ينطيك العافية 

- جبتلج الستلايت .. خاطر اتابعين مسلسلاتج ابكيفج . 

- اي والله الله ينطيك هي بس هاي المحتاجاها 

- سويلي مجال 

- فوت .. 

فات من شاف دواسة اباب الغرفة نزع حذائة وفتح الباب 

لكى الغرفة مكلوبة ع البطانة معدلته ومخدات جدات وبردات ومدفية الغرفة ومشغلة صوبة واضوية وتلفزيون مغشيتة .. 

كال : المعدله مبينة هي كوا 

- لا والله لو ما جايبلي كل هالغراض منيلي معدلة 

- والله اكو نسوان بيوت الزلم تنكل والبيت هوسة ويلعب النفس 

النظافة والترتيب ما تحتاج غير مرة معدلة 

- اللهي حفظك 

-ارتاحيتي امس 

- اووو لو اكلك من اسنين ما نايمة هيج نومة بحيث نمت وما على كلبي هم والله كل ما اصفن ادعيلك اليفتحها بوجهك مثل ما فتحتها بوجهي وغيرت حياتي 

- احنا سبب الشكر للخالق هو اللي يدزني ويدز غيري حتى يساعد عبد صابر وامن بقضاءه وقدره 

- تسلم 

- خل اسويلج الستلايت واروح بسرعة خاطر لا يصير حجي منا منا من تكثر الجيات هم مو زين عليج 

شكلي الستلايت وراح ع الجيران ربط ويا الصحن مالهم واجا .. رتب الترددات وشغلها كال : هاي القنوات كلها طلعتلجياه 

- يعني ام بي سي فور موجودة 

- كلهن بس دوسي على هاي وانقلي اي رقم رتبيهن ليكدام شلون ما تردين 

- الله ينطيك العافية 

- يالله اودعناج 

سلمت عليه وسديت الباب وراه .. 

ورجعت بقيتلي ساعة ارتب القنوات الانوار والعهد وهاي البيها طلميات 

وبعدها رتبت قنوات التطلع بيها المسلسلات .. 

بقيتها على قناة ابو ظبي طالع عليها عمار كوسوفي كلها تحجي بيه 

وكعدت اكمل يخياطي .. بس هلكد مرتاحة نفسيا 

هاهية يعني خلصت من هدى 

ومن عمي 

ومن اخوتي ومن حجيهم ومضايقاتهم ومنيتهم عليه واستقريت ابيت وافتكيت من كلشي .. ما ادري اني بحلم بعلم ..  

بقيت يومين عايشة بهدووووووووء تام ماكو اي شي .. 

الثوابات ادك بحيث ما احتاج اطبخ الثلاجة انترست ثوابات .. 

ومخلصة  اخيط واباوع ع التلفيزيون لو اكعد اسمعلي قصيدة لاحمد الساعدي وادندن وياها واني اخيط .

كاعدة فد مرة .. ودك تليفوني 

خابرني رقم غريب ما عرفته .. ردت ما اجاوب بس كلت خاف وحدة من حبايبي رايدتني اخيطلها، لو شي خل ارد السمعته زلمة اسده والسمعتها مرة اجاوبها واتجاوب وياها

دست رد .. 

وخليته على اذني اجاني صوت مو غريب : الو 

-الو منو 

-اني حيدر شني ما حافظة رقمي 

-ها هلا حيدر لا والله ما مخابرني فد يوم لو جايني حتى اعرف رقمك 

-خير كول 

-وين انت بالشماعية ؟ 

دليته كال .. طلعيلي 

صف كبال الباب ونزل .. طب للبيت 

كتله : اكو شي ، صاير شي 

-لا ماكو بس ما عدنا مرة تكعد وحدها وتعيش على حل شعرها منا وجاي اني الامر الناهي بهالبيت وراح استقر هنا بعد .... يتبع 

تكملة الرواية من هناااااااا 

لمتابعة باقي الروايه زورو قناتنا علي التليجرام من هناااااااااا

بدل ماتدور وتبحث علي الروايات عمل 

متابعه لصفحتنا على فيس بوك هنااااااااااا

الرواية كامله من هناااااااااا

مجمع الروايات الكامله 1اضغط هناااااااا

مجمع الروايات الكاملة 2 اضغط هنااااااا