رواية عاجر الفصل العاشر 10بقلــم الكاتبـــة زينب ماجد (حصريه في مدونة قصر الروايات)

رواية عاجر الفصل العاشر 10بقلــم الكاتبـــة زينب ماجد  (حصريه في مدونة قصر الروايات)

رواية عاجر الفصل العاشر 10بقلــم الكاتبـــة زينب ماجد  (حصريه في مدونة قصر الروايات)

#عاجر

#الحلقة_١٠ 

قريت الرسايل لو بادن رجليه من الخوف 

طلع وهو يكول : يلا خاطر اوصلج وارجع كبل لا يصير الحظر 

-اكلك جعفر شمدري اني جنت وياك 

عقد حاجبه : جعفر شني .. شكو 

-هاي شوف دازلي رسايل يهدد ويكلي وين ماخذج 

اخذ التليفون من ايدي وقرا الرسايل وهو عاقد حواجبه وكل ملامح التعب مبينة بيه ، رد انطانياه وكالي : خلي يولي معليج بيه يلا خلي اوصلج 

-شتوصلني ولو كتلني 

- يكتلج ليش ولج جا احنا شمسوين حتى يكتلج 

-مدا اشوفه يهدد 

- دخله يولي يمعودة  امشي 

- لا والعباس اخاف هم منين عرفوا انت جنت وياك 

- شمالج رحمة للعباس هي شني جنت ماخذج وخاتل بيج حتى تتراعشين 

- حازم ذوله لو كضوني ما يرحموني مناك سالفة المكتب وزادتلهم هاي خوش حجة يلموها علي 

- تباتين عدنا وباجر الصبح تروحين 

- لا يا بات خل اروحن 

- شتروحين اصعدي اوديج 

- جا معناتها اثبتها على روحي 

- خايبة انت ليش غمة هو شنو التثبتيه لو مشيتي وهم يعرفون انت جنت وياي ونكرتي غير تعمين على روحج خو انجي بابصدك واحجي الحقيقة بعد تتراجفين عليمن 

- ههي هي حتى يسولي شدة يا ورد 

- وياهو اليسويلج بكيفهم شو دصعدي 

- حازم لا اوكف والعباس ذوله ما يتقارشون 

- ما يتقارشون شني ترا مراجلهم مطلعينها براسج جلمة لو فجوها وياي اشك حلوكهم 

- واني شمستفاد يعني مكتولة مكتولة 

- صبا عرفي الموضوع عليه وامشي 

-وشتسوي 

- مالج غرض وامشي 

-وين تروح 

- دصعدي يا يابه اصعدي 

صعدت : حازم عليك الله كرل شراح اسوي ووين ماخذني 

- لبيت عمج 

- صخام وجهي هو همي طاردني 

- طاردج شني يمعودة بس اهدي انت والج الصافي ترى تعبان والعباس جبتم الطريق نوم ما تحسون بس اني حيلي نهد 

- اي سودة عليه والله ادري بس 

تبسم : اسم الله عليج مو سودة اهدي صبا اهدي اني وياج لا تخافين ما اخليهم يأذوج والله 

-تعبان وازيد عليك ولو عاركوك ما اريد اتعبك اكثر 

- شمالج انت يعاركوني شني يكدرون 

-هاه يعني ما يسوون شي 

- تعبان بالقران وجاي اشوف بنص عين وعلى ساعة ادعمها وتموتين 

- يلا يمعود فدوة الك 

-هاه ، فدوة الي 

تنهدت : والله خايفة 

-اني يمج وتخافين مو عيب مرافكتلج زلمة لو طنطة. 

تبسمت ، حجه ؛ اي دضحكي شحلاتها ضحكتج 

يحجيها وهو يباوع بالمرايا ورا .. 

رجعت ظهري اطمنت بحجيه وامنت 

وصل باب بيت عمي طفى السيارة ونزل عمي بعده ما ساد الدكان صاح حازم : ها ابو يوووووسف 

صاح عمي : هلا هلا ابو علي 

- اطلع خلي اسلم عليك تعبان بعلي هاي جيتي من الزيارة 

طلع همي سلم مباوس وهو يكله : تقبل الله 

- منا ومنكم صالح الاعمال حجي البت بتكم وجانت نارية تروح للزيارة وشفتها وكتلها اصعدي ويانا اخذج ويا العائلة تعرف هي بت وحدها وطريق الزيارة خطر وارهاب وهالجبتها ورجعتها بالحفظ والصون 

- بارك الله بيك ويكثر من امثالك 

- وبيك حجي بس اني عندي عليك عتب وانت بمثابة ابوي 

من كاعد ارجعها اخوها دزالها انت ويا حازم ووين خذاج وشكاعد يسوي بيج .. مو حجي هذا شني اني ابوك نسوان لو عدي سوالف مو زينة 

- لا حشاك والله ابو علي معدل 

- جا معدل وابن اخوك يدز هيج حجايته عليها كوام يابو يوسف بت مثل اختي واخذتها ويا العايلة زرنا ورجعتها حالها حالهم هاي جزاتها من اخافن على اختهم واحطنها ويا عايلتي يتهموني بيها 

- لا يتهمونك شني خله يولي بكيفه النكس هذا لا تاخذ عليه ابو علي هم شوية متصايقين منها وتطلع بلا علمهم وهالتضايقوا وتعرف البت عزبة والحجاية التطوفها صعبة علينا وعلى خوانها 

-هذا شانكم ابو يوسف بس مالت اخذ البت وياي وانتهم بيها هاي بيها غير حجي وانا والعباس لو ما وجهك الطيب هاذ يا جعفر على حجايته مال وين ماخذج وشجاي يسوي وياج اكاومه وابيعه الجواه والوراه بفصل اخليه طول عمره ما يشيل راسه ويا احد 

شني بويه عيب جا هي عرضكم لو مو عرضكم تتهمونها 

صايرة دايرة من واحدهم خايف عليها شلون خلاها تمشي للزيارة وحدها 

- ما ندري بيها ما تنكض هاي ما تنكض 

- هاي كدامها احجيها كالت اهلي عدهم علم 

صبا : عمي خابرتك وكتلك وكتلي روحي وخابرت حيدر جا بعد المن اكول 

- حرام فلا ادري 

حازم : هسه المهم حجي البنية جانت ويا عايلتي وبذمتي ورجعتها بخير وسلامة سالفة تنضر لان جايه وياي تنحسب علي .. راجعلك باجر ولو لكيت البت متأذاية من وراي لا احط عمامي واكاومنها واشوف شنهو الشافه مني خاطر يكتل اخته ويكللها شسوا بيج حازم 

عمي : لا شني الحجي هاذ ما يصير قابل ما نعرفك شني بويه صدك جذب 

- بعد يمك حجي 

- امن ورحم الله والديك على ردتها 

- واجبي هاذ ياله فوتي بويه انا هم اتأخرت والحظر بعدله دقيقة هسه السيطرات تعل افادي

- دكعد ارتاح خل نطيك مي جا من الباب 

- لا سالم خلي ارجع بعد يمك حجي وبحيل الله امرلك باجر 

- كل الهلا بيك ابو علي الذهب اهلا وسهلا 

راح واني فتت لبيت عمي .. 

عمتي كاعدة بالدوانية و رسول : ها مساء الخير 

ردوا علي ، حجه رسول : شكو شصاير 

- جنت بالزيارة وجعفر مخابرني ودازلي رسالة يهدد 

دخل عمي وراي كالي : انت ليش ما اجوزين ولج ليش ما اتوبين 

-عمي مو كتلك رايحة اخدم واخذ مراد كتلي روحي عساج لا رديتي 

- جا وتروحين ويا حويزم 

- مو اخير ما اروح وحدي اقلها واحد عرف بالموكب صار ما صار علي تعرفون اني وين وشصاير بيه 

-وليش جيتي وياه 

- من صار انفجار و انتحاري كضوه الشرطة ما رضى طلع روحي كال خوية مثل ما جيتي وياي ارجعج صار ما صار عليج بذمتي تصير ارجعج سالمة لاهلج وغاد شتسوين سوي وما خلاني ارجع وحدي حتى زيارة ما خلاني اروح لوحدي خلاني ويا عائلته 

حجت عمتي : جا من الزينات الزلمة خاف عليها من الانفجارات 

- شعندج رايحة اكعدي ابيتج واسكتي طايحة الحظ انت والزيارة و خدمة المواكب شنهووو لو الا نجيبيلنا مصيبة يلا ترتاحين 

- عمي ردت اخدم واطلب مرادي وكتلكم وكتولي روحي 

- من الله ياخذج ويفكنا منج بجاه علي وهاي زيارة الاربعين 

- امين 

حجه : هسه ماطولها ردت سلامات هاهية كطعوا السالفة 

حجي : نكطع السالفة شني جعفر خابرني رايد يكسر رجلها شلون رايحة ويا حويزم وحازم جاني يكلي شني انا فاسد ويتهمها بيا ولو صار ع البت شي انا وياكم كوام وتعال حلها من حدر راس هالما تستحي هاي 

رسول : بويه انت هم على كيفك ماخذ جعفر بحيل شنو هو جعفر يدري عن صبا يعرف شكاعد اتسوي وين تروح وين تجي شتشتغل شو يتصيد مراقف وتعال احنا نبتلي من وراه تعرف حازم واحد مر ما ينجرع تروح تتورط وياه من ورا جعفر 

- جا من هو مر هاي طابكه وياهم ورايحة شعدهااا 

- بويه عي ولد تلد شو بطرك روحها ورادت تخدم الحسين شني كفرت 

- وما تعرف تروح وحدها ترافك حويزم 

عمتي : جا اخير ما تروح ليوحدها وهي بت يا حجي 

-ومن هي بت شعدها مولييييييه 

- يهوووووو 

كام رسول واني سكتت وعمتي ظلت تداهر وياه 

طلع عمي وعمتي كالت : دكومي بتي جيبي الفراشات انت هم تعبانة خاطر تنامين كومي 

كمت اريد امشي وجليه ثكال .. مأذياتني حيل 

مر سويسو كتله : شيل الفراشات عني حبيبي 

شالهن ونقلهن للدوانية وعمي سد الدكان .. حجيت : عمي راح اسوي جاي تريد 

- سويلي وياج استكين خل اشربنه كلبي وجر منج لا بارك الله بيج 

مشيت حطيت القوري خدرت 

نزل يوسف : ها اليوم يمنا 

-اي والله هستوني جيت من الزيارة 

-ما تسويلي طماطة جوعان والمرة نايمة 

-اي بعيني 

سويت طاوة طماطة والجاي كمل لحد ما لجعت الطماطة شلتها وهي تفور حطيتها بالصينية ومشيت مر رسول صاح : بوياي صوت الطماطة يجيب التايه خل اجيب الخبز واجي 

كعدت بطرف الدوانية وصبيت لعمي وولد عمي وكعدت وياهم اغمس واشرب  چاي واسولفلهم ع الموكب والانتحاري والامور الصارت .. لحد ما صارت ب١ ويوسف ورسول وسويسو مكابليني ومستمرين نسولف 

عمي كال : شنهي انريد انام كوموا غاد وسولفوا للصبح 

عاد اتطشرنا وكمنا .. 

رسول راح لغرفته ويوسف اخذ ابنه وصعد 

باوعت تليفوني لكيت مكالمة من حازم ورسالة ( كون حاجوج  طمنيني ) 

فرشتلي فراش بالدكان وشغلت الهيتر وتلفلفت بالبطانية وانتجيت ع المجمدة وكعدت كتبتله رسالة ( لا ) .. دز ( اتصل لو زحمة احد يمج ) 

خابرته رد :

- جا بعدك ما نايم 

- لا والله ضل بالي يمج وكاعد اتكلب بفراشي 

- سودة عليه فوك همك شلت همي 

- اسم الله عليج كون حاجاج 

- لا هيج طراطيش ورزايل عابرة 

- هم زين ، وين انت 

- ابيت عمي غير 

- القصد وين نايمة هم بالسكيفة 

-لا بالدكان 

-صدك تحجين 

-اي والله جا وين اروح 

-بالدوانية 

-عمي وعمتي نايمين والصدك ما ارتاح عمي من ينام صوت شخيرة ياذي كلش عالي يفززك حتى من نومك 

- هاه طلعت السالفة وراثة عدكم يعني 

-شقصدك ؟ 

كام يضحك بصوت ناصي وتعب 

كتله : دروح الله مسلطك علي تقلد وتعيب هذا هم حظي روح 

-صبا 

-ها 

-مرتاحة بنومتج بالدكان 

-اي الهيتر يمي مشتغل دافي المكان 

-يعني احسن من مكانج البارحة 

-ييييييي لا تكولها وعلي اصطكيت من البرد وكملتها علي امك كتلتني 

-كتلتج !؟ 

-جا عليمن تعاركت وياها غير هطرتني بالكتلي 

- وليش ما كتيلي 

-راحت بعد 

-ما ادري وعلي كالت كاعد احاجيها ودفعتني وطيحتني 

-اي كالوها كتلني وبجى سبقني واشتكى 

ضلت على امك يمعود 

اعوفك تنام اخذ راحتك 

-صبا 

-ها عيني 

تنهد : اني عينج 

- كول 

-تعبان وكل عظم بيه يون من التعب 

-مأجور ان شاءالله تعبك ميروح ان شاءالله عن الإمام 

سكت .. غفى .. رد حجه بين النايم والكاعد 

:الهيتر اذا مشتعل يمج طفي خطر عليج 

-لا ما عليه شي 

-لا الهيتر طاقته عالية يموع الواير ويسوي كوارث اذا بقى فترة مشتغل

دست الدكمة : طفيته 

-عفية هيج اريدج تسمعين الكلام 

-ايباه 

حجيتها واني اتمدد 

-تغطي زين 

-حازم شتريد 

-اريد انام تعبان 

-الله يساعدك اروحن اني اخذ راحتك 

- صبا 

-ها 

-ما اريد اكولها وحابسها بصدري بس لا تروحين 

-ليش 

-تعبان ووجودج يهون تعبي 

سكتت 

كام يحجي وهو غافي 

محد جاي يحس بيه شكثر جاي اتعب

مرة وجهال وبيت بس ضايع .. انام بتعب واكعد متعوب 

الله مفضل عليه والحمدلله رزقي ماشي ووضعي زين بس راحة الرجال بزوجة تحس بيه اتداري .. 

-الله يهديها 

-ايست تهتدي الهداية تحتاج نية صافية وهي ما لها نية 

كل البراسها تشتغل وتجمع لا تدري عني ولا عن بيتها ولا عن جهالها 

حسبالها تربح الدنيا بالفلوس  ما تدري هي كاعد تضيع كلشي بس ما جاي تحس 

ومن انبهه واكلها راح نضيع منج وتعضين ادين الندامة 

تاخذها بقوة ولا موبالاة وعود هي المرة القوية وما تنكسر وماكو احد يلويها .. اني اتمسكت بيها هواي وايدي تعبت واني لازمها واحاول اردها لدربي 

-ايدك فلتت منها 

.. من شهرين وانت عايف اديها ولازم غير ادين 

-ادري بس مرتاح حتى لو جانت راحة جزئية 

سكتت 

هو كام يغفي .. 

كمت من مكاني طفيت ضوا الدكان 

حجه بصوت خفيف : شكاعد اسوين 

- طفيت الضوا حتى انام 

- نعستي 

-مو كلش لان شبعت نوم بالسيارة 

- نوم العوافي 

تبسمت رجع غفى 

استحيت ما اعرف اسد الخط لو اتركه 

هو ما يصرف رصيد لان الاتصال ع الشبكة بعد الساعة ١٢ مجاني تقريباً .. بس موقف غريب اترك اتصال مفتوح هيج وينام 

زين اكعد اسمعله وهو ينام لو شسوي 

بس الصراحة شعور كلش مريح من داخلي وهو موجود 

ما ادري اذا هو حاس نفس الشعور لهذا ميريد اسده .. 

مرت الساعة هو غط بنومه كلش واني اتمرجح بين احلامي 

واستعيد ذاكرتي وهو جان وياي وداير مدايري رغم شكد ما جان الجو بارد .. وجوده دافي 

همست وكأني احاجي روحي وهو غاط بنومه 

ما ادري الله منين جابك وحطك بطريقي وصرت بين ليلة ويوم من اغلى اشيائي .. اتمنيت الوكت ما يخلص رغم التعب الجان بجسمي بس جانت روحي من جوا حيل مطمنه ودفيانة .. اكو انسان مهتم بيها يفكر بيها 

تمنيت ابقى بذاك الشعور وذاك الاهتمام وما يخلص الوكت وياك وارجع 

اول مرة احس الآمان انسان 

والدفو انسان .. والراحة انسان 

بمكان لا بيه دفو ولا راحة ولا امان ... 

همس : صبا 

-يا دهر وانت كاعد .. عزا العزاني 

-ثقي والجينا من اليوم وتعب خدمته بعده باجسامنا ودمه وحرمته اني محتاجلج اكثر ما انت محتاجتلي 

اخذت نفس عميق واتنهدت براحة واني استمع له 

كمل : سبحانة الحط راحة الرجال وسكينته بمرة لو يملك مال قارون و ملك سليمان وما عنده مره ما يرتاح ولا يسكن والراحة الاشعر بيها من انت موجودة لو حسج يمي وعلي ما حاس بيها كبل . 

فجأة انخلقن بكلبي فراشات 

وروحي طارت فوك حلقت فرحانة واذني تسمع منه هالكلام .. 

حجه : الاريده منج ما طولج وياي 

لا تخافين من أحد ولا تحسبين احساب لاحد وحطي على بالج اني بظهرج يمتى ما تلتفتين امشي بزودج ولا تظنين اخليج تطيحين واني وراج 

هو يحجي ووجهي مبتسم 

احس بروحي طارت فوك الغيم ومحد بالعالم بگدي 

غفى  واني دفنت راسي بالمخدة 

وعايشة شعور دافي فجأة نسيت اني نايمة بدكان وحالتي حالة بكلمات بسيطة خلتني احس اني مرتاحة والجو دافي والدنيا حلوة حيل ومن كد الامان اللي حسيته غفيت ونمت بكل هدوء . 

لل٦ الصبح كعد عمي وطب للدكان 

فزيت بسرعة وكضيت تبيفوني حسبالي الخط بعده طلع مسدود، حجه عمي : كومي بويه خلي افتح الدكان 

شلت الفراش حطيته ع التنور ومشيت نمت بمكان عمي اتغطيت.. 

 وكملت نومتي للصبح بـ تسعة كعدتني هدى: يلا اكعدي شلون تبقى الفراشات ممدودة يجونا خطار شي شنكلهم ست صبا نايمة كومي . 

مطيت نفسي ظهري متشنج كلش فد دور .. اريد احط رجليه بالكاع واروح للحمام ما اكدر ادوس مورمات من تعب الخدمة والمشي مال الاربعين ، كتلها : كعدت 

كضيت التليفون لكيت حازم داز رسالة ( صباح الخير كون احد ضوجاج اليوم خو محد حجه وياج ) 

عفته بلا رد .. 

وكمت يا يمة مو رجلين صخر يذبحن من الالم 

نفضت البطانية وكوة ادنك الم واصفط بالفراش .. انفتح باب الشارع وفاتت سهى انداريتله : هلا شجابج 

سلمت عليه والوجه مخطوف كالت : وين جنتي البارحة 

- بالزيارة 

- ويامن ولج عزا العزاج كومي وياي بسرعة 

- شكو ؟ 

- اخوتي بالطريق جايين وناوين على كتلتج 

طلع عمي كاللها : هلا بوية شلونج 

مشتلا : هلا عمي 

باوسته : فدوة عمي ابوس ايدك ختلها اخوتي جايين وراي والله خليت ابو التكسي يطير بيا ناوين على كتلتها اليوم 

عمي : عليمن بويا شسوت البت !؟ 

- ما ادير بس الشر بعيونهم امشي وياي ولج 

كاعد تحجي اندكت الباب، حجه عمي : اصعدن لبيت يوسف بسرعة خلني اشوفن سالفتهم شنهي 

مشينا بساع ولزمنا الدرج .. اول ما فتح عمي فات جعفر وهو يصيح : وينهااااا اليوم اذبحها والله .. طلعها وينهااااااا 

- تعال جاي شنهي الوينها البت عدي شحدك تكضها 

- عمي اتكتر رحمة على والديك البت الطينت روسنا وفضحتنا لا ما اكتلها واغسل عاري منها ما اطلع ابن ابوي واااااالله 

- شسوت البت ولك جانت بالزيارة واجتي جدامها مورمة شنهي كفرررررت 

- يا زيارة صبا تكو*** عمي .. صبا طالعة ويا حويزم وحدهمممممم 

- انجب ولك عرضك هاي سكططط تفشر على عرضك 

- عرضي اغسل عاره بيدي وينهااااا 

كام عمي وعمتي يجروه وهمي يصيح ويكله : الزلمة مرني وحجالي المرة رايحة وياهم للمواكب خدمت غاد وهو ما رضالها ترد وحدها جيف اجت وياهم وصاير انفجار بكربله .. هالرجعها 

- الحجي الحجاه جذب عمي تريده يجي يكلك اني كو*** يوا بتكم طبعا يطلعلك روحه شريف بس الصوج باختنا العار هاي لا ما اليوم اكتلنها واطم عارهااااا 

كام عمي يصيح و حيدر وجحفز يصيحون 

واني غده وجهي اصفر .. وسهى تصفك بوجهه وتكلي : عليج الله احجي الصدك وين جنتي البارحة 

- والحسين الرحاله وهاي اجدامي مجبده من دربه جنت بخدمته وبزيارته وكل حجيهم باطل وحق هو دم الحسين 

حجيتها وبجيت 

هدى واكفة وميلاد والجهال .. وكلنا ماخذنا الخوف من صياح اخوتي بنص البيت .. كامت عميتي تكعد بيهم وتكللهم : غير تفهمونا السالفة ونعرفها بهداي حتى نحكم 

جا هي بربده بربدة .. اكعدوا وفهمونا 

عمتي تحجي واحنا ع الدرج نتسمع 

دك تليفوني يمهم .. ربك محد منهم منتبهله بنصهم .. 

سويسو جابه واجاني .. كالي ( هذا تليفونج جاي يدك ) 

جريته ولنه حازم 

حتى انوب كاتبه عليه حازم ابو الانشائية ) خاف احد ما يعرفه لو يختلط باسمه .. اسم  ووصف من امدا حظي وقسمتي ... 

بسرعة جريته لا احد ينتبه منهن وهن واكفات مركزات ويا حجي عمتي 

سديته بساع وقفلت الجهاز .. 

عمي : البت جانت بالزيارة انتم تصدكون الغربة وتجذبونها ورايدين كتلتها هي شنهي سهلة تفضحون ارواحكم بارواحكم رعنان .. غير نعرف السالفة من الاصل شنهي ونكعدها ونفتهممممم 

جعفر : عمي مرت الزلمة اجت امس وهي تشكي حازم ماخذ صبا ما ماخذ مرته للموكب ومتعاركات هناك مرته كايلتلها اطلعي و هي داكة رجل ما تقب وامه متعاركة وياها كايم حازم ماخذها وحدها وماشي وين رايح بصبا محد يعرف .. كل هذا الحجي نجذذذذذبه عمي مرته الجايه تشهد عليه 

- ولكم الزلمة امس اجاني وشاد حزامه ويكول اكاومنهم من يجيبون سيرتي البت مشت ويانا وما رضيتلها ترد جيف صار انفجااار .. يمكنها مرته حاي تشهد زور عليه غيرانه النسوان كلشي يطلع منهن جا احنا نركض ورا حجي النسوان ونفضح اروااااحنا 

حيدر - عمي الله بالخير عليك 

نحجي لو نسكت صبا مو عدك جيبها وحاجيها وخل نعرف الحك من الجذب واريدك تفهمني احنا غلطانين وهي الصح وهي الحق 

عمي من كتلت صبا ياهو الخذاها للمستشفى ؟ حازم 

ياهو الحجه لصبا بالبيت وحط سالفة تكعد بيت وحدها ؟ .. حازم 

ياهو الخلاها تاخذ قساط ودبرلها الفلوس من اسعد ابن بيت ابو اسعد ؟  حازم .. 

ياهو الشهد بالبيعة ؟ حازم 

ياهو الصلح الكهربائيات وبنى الحمام و لبخ البيت ؟ حازم 

ياهو الدبر الها اثاث البيت وجابلها؟ حاااازم 

ياهو الجر واير السحب وياهو الكاعد يدفع لصبا صاله شهرين ؟ حازم 

كسرت التلفزيون ذاك اليوم يومين واجا واحد غيره جديد ياهو الجايه الهااااااااا ؟ حاااازم 

اقنعني حازم كل ذني كاعد يسويهن ويا صبا وهو ما عنده شي وياها .. هسه احنا ما نفتهم ومرته جذابه وتفتهم اني اريد اوكف كبالك وكلي حازم مسوي كل ذني ويا صبا وما محصل منهااااااا شي وهيج 

عمي كوه عليها كاعد وياها انا 

كوا تريد تطرني من البيت ليييييش شتريد اختي 

تريد تكعد وحدها لييييييييش وشعدها تريد وحدها ؟ 

ردت ابيع البيت ما رضت وكتلها لا ابيع 

ثاني يوم يخابرني مكتب السيد يكلي البيت احنا متكفلين صاحبته ما ينباع الا برضا صاحبته لو صار غير هالكلام ما تلوم الا اروحك 

ياهو الحاي يطلع ورا صبا ويهدد؟ 

وصلوا يهددوني يكتلوني ويصكوني منووووو 

مو حازم الحان يشتغل وياهم من دخلوا الامريكان وعافها من صارت الطائفية ؟؟ الكاعد يهددوني ما ابيع البيت ربع منوووو ؟ 

كامت سهى تضرب بوجهه وتصيح ( تعزيتي واتصخمتي يمعزاية ولج شمسوية انهجم بيتج ان شاءالله ) 

اني سمعت هذا الحجي وسهى تلطم على راسهم وعمي صغالهم وكلامهم كلب عليه كمت ارجف من الخوف 

شلون اقنعهم حازم سوا كل ذني وما عنده شي وياي ! 

شلون اقنعهم اني بريئة من كل اتهاماتهم 

شكول وشنو الاحجي ويقنعون 

انكر .. شنكر منو اقترح عليه البيت لو منوس اعدني لو منو الوكف وياي ما اكدر هم بعلمهم اني سويت كلشي ويدرون حازم السعالي بالبيت بس ما عندي وياه شي 

ومن كد ما سوالي كل ذني بلا مقابل اني اتعلقت بيه 

بس شلون اقنعهم اني ممسوية وياه غلط ولا حرام 

شبرر عن نفسي .. 

كامت دموعي تجري بقوة .. اتلاحكت روحي .. وسبقتهم كبل لا عمي يصيحني ويذبني بين اديهم ، صعدت فوك السطح طبيت بحمام بيت يوسف وسديته عليه 

واتوجهت لابا عبدالله 

كتله ها يابو سكينة مالي كلام ابرر بيه عن نفسي وشما احجي راح يجذبوني وانت شاهدي ومشهودي بمصيبتي وشدتي .. ناخيتك واني الجنت بخدمتك امس التوكفلي وما تعوفني بديهم احلفك بالامام العباس تعرفني مشيت بدربك بحسن نية وكل نيتي اخدمك واطلب مرادي منك  .. تعوفني واني الجنت خادمة لزوارك .. تهموني باطل واريد الحق تطلعه منك وتنصفني .. دخيلتك اني 

احجي والدموع تتجارى على خدي 

وتنخيت بالإمام الحسين يوكفلي بهالشدة ويخلصني منها 

فتحت التليفون لازم اگل لحازم بالصار ويصير عنده علم 

ماكو غيره يحلها .. لو ما ادخل يكتلوني وعسبالهم عندي شي وياه 

دكيت عليه .. 

فتح خط كال : يا هلا صباح الخير

- حازم الحكلي 

فز : ها ولج 

- اخوتي ناوين على كتلتي وهسه اني لابده بالحمام دخيلتك اني الحكني فدوة 

- يكتلونج ليييش عليمن 

- مرتك رايحة لجعفر اخوي كايلتله رجلي اخذ اختكم ومدري وين راح بيها وحاجية كدامهم حجي ما ادري شكايلة ومخليتهم يفورون 

- امل 

- اي حازم عليك الله فدوة اذا ما لحكت عليه والله يكتلوني هسه تعال 

سد الخط منها وكام على حيله صاح : علييي علييييي 

فز علي ونزل يركض كاله : امك وين 

- طلعت لشغلها ما ادري 

كام حازم من حيلا كض سيارته وتوجه لسوگ الكيارة .. صفها ونزل يمشي بهمة ويفوز عصبية وصل لمحل امل لكاها واكفة كاعد تعامل زبونة كاللها : ولج وين رايحة البارحة انت ؟ 

- خير حازم شصاير !؟ 

- البارحة وييين رايحة 

- وين رايحة كعدت بالبيت حتى السوك ما وصلت 

واكعد صوتك منا خلي اخلص شغلي 

- شغلج موووو 

لزم بالحمل والمكياج والعطور وكام يدفر ويشمر 

كامت تصيح هي واحتركت اعصابها وتتعارك وياه

وهو يكللها : - طالعة من وراي وبدون عليم  رايحة لاهل البنية ولج .. ولج بت يتيمة ذبيتيها بتهايمج اممممممل .

- حقي بت مالها رداد رحت لاهلها يردونها ويبعدونها عنيي وعن بيتي 

- بيتج موووو .. بيييييتج 

كام يدفر بالغراض وهي تتعارك وياه بالسوك وصياحهم علا 

وهو يصيح : تتهمينها بيه ولج .. تسودين وجهي كدام وادمي واتزغريني كبالهم ولج انا ناهب البت .. اني عدي شيييي وياها 

- تليفوناتك تركع وياها وتصيح ما عدي شي وعلي لا اشهرنك واخزيك 

- اعلمج التشهرينه ويتخزينه ياااهو 

اخوها كام يفرغ بيناتهم .. 

حازم تلاوى وياه وجر امل من السوك وطلعاها وركبها السيارة وهي تتصياح وتتعارك وياه .. صف اباب بيت اهلها وكاللهم : هاي بتكم وجايبها الكم واليوم تحكمون بامرها 

يا ترد وياي لبيتها بس بشرط من هالساعة يحرم عليها باب الخوش لا شغل ولا عمل ولا توصل الباب ااااابد .. لو هي مطلكة مني بالثلاث 

لازمينه ويهدون بيه واكعد يمعود وكول يا الله 

كاللهم والله اليوم اعديها وياها يا تهدم كلشي وتنجب ابيتها يا مالها وياي عيشة ومو باجر ولا بعد ساعة هسه تقرر ما اطلع اليوم لا ما اسويلها حل ووووووالله 

كامت تصيح هي : تريدلك حجة حتى تبطلني وتكعدني 

ونجوم السما اكربلك مني اعوف محلي واعرف رزقي وخيري على يا مال حتى اكابلك واصيرلك خدامة الك ولخلفتك .. والله حتى ترضى عني من عسى ما رضيت يا محلي ما اعوفه ولا اعرف شغلي بعددد . 

- هاي الج .. وهاي كدام اهلج  يا امل يا بت عمي نعمان انت طالق طالق طالق 

اتخبلوا اهلها وامها كامت تلطم ويجرون بيه واهدا ، كاللهم : ابد والله ما تصيرلي مرا ولا اريدها وخلي يفيدها شغلها وجهالي التعيرني بخدمتهم لا خلفة الله عليج لا من عين باجر اجيبلهم ام تسوى راسج تخدمهم واتداريهم واعلمج . 

حجاها وطلع 

لكى اكثر من مكالمة فائته من صبا ورسايل 

دكت عليه .. انطاه رفض وطلع . 

... 

صبا : سد الخط بوجهي وما كالي شي من عرف بمرته رايحة على اخوي وشاهرتني .. كلت هسه نص ساعة يجي ويوكفلي ويحلها 

هو الليل كله يكلي لا تخافين واني موجود 

لا تشيلين هم .. ثقي بيه واني احل كل مشاكلج 

متأكده راح يجي وراح يحل كلشي . 

صارت هوسة جوا .. وعمي كام يصيح : نزلنها 

سهى : عمي والله العظيم ما عدها شي خو كعدت عدك سنة وتعرفها والله على نيتها وما عدها اي شي 

- والحجوه اخوتج شنهوووو والمرة الاجت وشچت منها شنهووووو كلهم غلط بس اختج الما تستحي صح نزلنها 

- عليك الله عمي ابوس ايدك والله ما عدها شي اني اخابرلها يومية واعرفها والله ما عدها بس يساعدها ومستخطيها دومها تسولفلي من يساعدها لو عدها شي وياي جا كالتلي 

- وخري عني اكلك 

عمتي : اذكر الله حجي ولا تظلم بخت البت يمكنها مظلومة جا انت من تذبها بين ادين خوانها يكتلونها وذمتها بركبتك 

- لا الي ذمة ولا الي غرض بيها البت الاجت امس وجذبت علي وكالتلي جنت بزيارة وجانت تهرم لا الي شغل بيها ولا ادافع عنها بعد عسى ما يوذرونها اخوتها هم اليديرون شانها 

صعد وهن كلهن تراكضن وراه ويتوسلن بيه .. 

كام يصيح ويدور بالغرف وصل للحمام ضرب عليه حيل باب الحمام حديد فزيت دموعي كامت تتجارى من الخوف .. 

كال : اطلع ولج .. 

- عمي والحسين ما عندي وياه شي بالعباس جنت بالزايرة وحق هو مصاب زينب رحت للزيارة ما عدي شي 

- - اطلعي اكلج .. فكي الباب 

- عمي الله يخليك لا تعرفني محلفتك ببوفاضل 

- تبرى منج ابو فاضل طايحة الحظ ولج اني تغشيني اصبييييه اطلعييي 

كامن يجرنه واني ابجي واتوسل بيه وما فتحت الباب 

صعد جعفر .. كاله : عنك عمي اكسر الباب واطلعنها 

وكفت عمتي كالت : حرام اريد زلمة يكسر الباب والله ما اخلي وما اطيكم البت .. 

- وخري منا عمة 

- اليريد يكسر الباب يكتلني ويميلني عنه 

عمي : ميلي عنه خلي ياخذ البت ويمشي 

- ما ياخذها وحك هو اخو زينب ما ياخذها لو غلط البت كله من اديكم .. ياما كتلكم ولكم بت هاي داروها عينكم عليها .. تفر شوارع الله كلها خاطر تشتغل وتحصل اللكمة  وصعبت عليكم لكمتها ما بيكم  زلمة الحواها وكاللها اني اطيج مصرفج واوكلنج واشربنج ولا اتطلعين وتشوفين طولج للشارع هسه جايين وصايرين زلم بروسها 

جا من ذبيتوها بالشارع تشتغل وتشتري وتبيعون بشغلها وتبوكوها وما تهتمون وين تروح ووين تجي ما نشدتو ارواحكم الشارع الذبيتوها بيه شنهو البيه الزين والشين واليغسل راسها واليخدعها ما فكرتوا بس من تغلط تجون تفاكك وخوش زلممممم 

ميلو والله ما اطيها

كام جعفر يصيح ويريدها توخر وعمتي واكفتلي 

واني ورا الباب جسمي يرعش من الخوف كمت اخابر لحازم وميرد .. اتصل عليه اريده يسمعهم شلون يريدون يكسرون الباب وياهذوني بس حازم ما كاعد يرد مدري وين راح 

احتار كلبيي شسوي ووين اطي وجهي

ووين اروح منهم .. دخيلتك اني يالحسين 

بجاه هذا مصابك لا تعوفني .. يتيمة ومالي احد غيرك يابو عبد الله 

اتنخى ودموعي تتجارى من الخوف 

من الصياح كامت الجهال تتباجى والنسوان تتصايح وعمتي تصيح .. نزلوا الولد من نسوان ولد عمي .. وبقوا جوا بالاستقبال رايدين ياخذيني 

فوك الساعتين اني محبوسة بالحمام 

واخوتي جوا كاعدين ويحشون بعمي 

وعمي انشحن حيل كل شوية يجي يهدد ويتوعد يكتل ويذبح . 

لحد ما اخوتي طلعوا من البيت وعمي استقر بدكانه وتواعد وياهم يكضني ويطيني الهم يتصافون وياي 

صحت على سهى كتلها : امنيلي الممر اطلع من بيت عمي 

- ووين تروحين 

- ووين تروحين ولج كعدي بلكي نقنع عمي 

- تشوفين عمي كام يتحلف وياهم واقتنع بكلامهم شلون ترديني ابقى 

- ووين تولين ولج ستري علينا 

- اخوتج لا ستروا عليه ولا رحموني خاطر ابقالهم .. شمنتظره يعفون عمي وهم اليتعطشون الدمي امنيلي الطريق وخليني امشي عن عيونهم 

نزلت هي وميلاد امنن الممر ووكفن اكبال الباب مال الدكان .. واطني عباتي وجيزداني وحجابي ونزلت على كيف مريت من الدكان ما شافني عمي .. فتحت الباب 

صاح : ياهو الطلع 

لزمت الباب ودست للشارع العام .. 

كضيتها مشي منا للعيادة مال الدكتورة .. 

سديت باب العيادة مالتي وكعدت 

ما يندلون العيادة الاشتغل بيها ولا شنو اسم الدكتورة الاشتغل وياه .. اشتغل ويا دكتورة وكبل .. اصلا محد منهم حاول يستفسر ويشوف المكان اللي اشتغلت بيه بس من يحسون غلطت بشي يجون وكل الحيل بيهم لكتلتي .. 

كمت ابجي واندب حظي 

وارد باللوم على امي وابوي واكللهم من انتم ما تحبون البنية وما تريدونها وتستعرون منها المن خلفتوني .. من اني وبالكماط ودفنوني اتذبوني واني ما افتهم بيد الرجال يعذبني والرجال يذبني على اهوتي واخوتي على مصلحتهم يدوروني .. لو اهلي دافنيني واني صغيرة جان بريتهم الذمة ورحمتهم ولا دفنوني بهالحياة هالدفنة هاي . 

رجعت اخابر بحازم ما يرد 

مرت ساعات لا خابر لا كالي انت شلونج ما لونج .. لا حجه وياي .. جا حجي البارحة وين راح 

وعوده واني واني والسفطهن عليه وعيشني بقصر مال اوهام وينه

استلمته رسايل 

مع الاسف عليك طلعت مو زلمة واني الثقيت بيك وامنت تالي تعوفني هيج ما تجاوب ولا تريد 

رسالة ثاني ( اخوتي رايدين يكتلوني من وراك وانت ضام راسك ما استحيت على شواربك ما كلت شنو ذنب هالحرمة الورطتها !؟ ) 

رسالة ثالثة ( بالحجي تلبك لبك وبالفعل ضميت راسك صوجي اني الامنت بيك كتلك خل ارجع دكيت الا تاخذني وورطتني ) 

( وبعدك ما ترد ) 

( مسلمتك بيد العباس ابو فاضل الياخذ حوبتي منك وين اخو زينب ها ) 

....

حازم : الو 

عم صبا : الو السلام عليكم عمي 

- وعليكم السلام والرحمة يا اهلا ومرحبا بحجي راضي 

- هلا بيك بويه ، مريتلك للمحل مامش 

- اي والله ما موجود بس اني بنيتي هسه جايك 

- جا هسه انا جدام محلك 

- على راسي متوجهلك اني والعم ابو صالح وان شاءالله نشرب جاينا يمك 

- ها جا زين انطرنك بالبيت تجينا 

- مسافة الطريق واحنا يمك 

- ديلا متانينك متانينك 

رجع حجي راضي للبيت كاللهن خدرن الجاي بساع 

وخابر على ولده واخوة صبا يجون .. كلهم التموا دقايق و حازم وعمه ع الباب 

تلكاهم الحجي ورحب بيهم ودخلوا للدوانية 

والحجي صاح : سويسو اكعد بمكاني بالدكان ولك على ما يطلعون الوادم . 

ركض سويسو يكعد بالدكان ورسول يركض يجيب الجاي .. وجعفر وحيدر كاعدين وواحدهم يفور غيض من حازم ويوسف .. يرحب والحجي يسولف ويا عم حازم . 

حجه حازم : كلت مارلي للمحل حجي وما ردت اتعبنك هالجيتك ليجاي .. اذا عدكم سالفة كولوها 

جعفر : كبل كلشي البنية يمك 

- يا بنية !؟ 

- تعرف كل الزين شجاي احجي 

الحجي : جعفر مو هيج الحجي ، عمي البت جبتها امس وكتلنا جنا بالزيارة بس حرمتك الله يحفظها جاية لجعفر وتتهمك وتتهم بتنا بامور مو زينة 

- دريت بهالموضوع والحرمة التهمتني بشين اطلكت يعني مو انا الاكرب الشين وانت كلش زين تعرفني زلم وما كربت الحرام يوم 

جعفر : ما توصل الحرام وانت ملفلفها من جوا شعدك ماخذ المرة وحدها لغاد شنو معناتها .. حطيت براسها تكعد ابيت وحدها وقنعت عمي وشعدت البيعة .. وهسه رايد تهجج حيدر ودازله جماعة خاطر يهددونه ويخلي البيت الك ولعمايلك ويالسكطط 

- اسمع لك والعباس لو ما كاعد ابيت محترم والزلم كاعدة لا اكوم احط رجلي بحلكك .. جاي تتهم ياهو ووووولك صاير زلمة من تالي وتحط عينك بعيني وتحجييي 

- وغصبا ما عليك واني الاشك حلك اليكرب عرضنا افتهمت لو لا 

-عرضك جان بالشارع طايح واني اللميته وشلت بيها للمستشفى وسترتها واطيتها من دمي وضمدتها وجبتها وكت الجنت ما تدري عن عرضك عاااار جاي تفج حلك وياي 

الحجي : جا هو هيج الحجي يا بويه تهدو 

جعفر : وشفتها فرصة من طاحت وشلتها حطيت سالفة البيت وحدها وبنيت اطماعك عليها 

- اطماع بيش ولك اني اطمع شنهي ناقص مال لو ناقص غيرة مثلك ناموس سرز 

- ماكو ناموس سز غيرك يا ما تستحي 

كام حازم : خاب تعال جاي ياهو هاذ الما يستحي 

فزوا يوسف ورسول يكضون بيه وجعفر يكله : اليوم ادفنك وياها واااالله 

-ولك زلمة انت وتسويها لا ما اكضنك احط رجلي بيك يا عااااار دهد انت هد خل اعلمنه المراجل لهالسكططط 

كام يوسف يطرد بجعفر وطلعه وعم حازم والحجي يهدون بحازم .. كعده الحجي وكاله : جعفر ارعن وامسح جلماته بوجهي بس اكعد انا عدي وياك عتاب 

اخوتها جاي يكولون انت الكاعد تدفع الها سحب وانت مشتريلها غراض البيت وانت الجاي تصرف عليها 

- ولو نفرض سويت ذني تتهموني لو تشكروني !؟ 

- يا عمي الوادم ما تكول لله تحط بكل سالفة تهمة وحجي الوادم ما يرحم واحنا ناس مستورين 

- وانا شنهي فاضحكم حجي شتعرف عني فاسد لو واحد ما يخاف الله 

- لا والله يا عمي نعرفك ونعرف اهلك وطيب اصلك بس امور جثيرة ومنها حرمتك جاية على بيت جعفر وشاچيتله الحالة 

جعفر ارعن بس عمي احنا ما نتهمك احنا رايدين نعرف السالفة والبت بتنا ما نريد الفضيحة خاطر لو هكو شي نلمة بيناتنا كبل لا يصل لحلوك الوادم وتلطخنا 

حجه عمه : حجيك ذهب حجي 

بس الله بالخير عليك 

- الله بالخير والرحمة 

- هو اليسوي الزين بهالدنيا صار مو زين 

- بس الزين ما ياخذها لكربلاء وحدها 

- ومنو الكال خذيتها وحدها 

-مرتك 

-مرتي باطلة عمي وعلى بطلانها طلكتها كبل لا اجيك 

والي شهودي البت جانت تخدم بموكب لا يمي ولا كرباي 

والزيارة رحنا عايلة وابني وبتي جانوا ويانا 

والبنية فوك الراس عرك تعاركت وياي خاطر ترجع لوحدها بس ما رضيت صار انفجار بكربلاء والبت ياعمي اجتي ويانا من ترد ويجرالها شي جا ما انلام ما تكولون انت الخذيتها وانت العفتها حسبتها امانة وهذا كتاب الله حالها من حال جهالي داريتها وصنتها لحد ما وصليتها لبابك 

- وسالفة التهديد 

- انا راعي تهديد عمي 

- لا مو هيج بس المكتب عمي انت جنت تشتغل وياهم تحارب الامريكان جزت منهم بحرب الطائفية وشلت ايدك كلت ما الطخ ايدي بدم مسلم منين ما جان صح حجايتك هاي يو لا ؟ 

نفسهم يعمي الجاي يهددون حيدر ما يبيع البيت ولو باعاه يكتلونه 

- عمي الله بالخير عليك جماعة جنت وياهم انتهم بيهم اعلى يا مال وانا ياهو ماتي الزلم من اول ما كعدت البنية وابيت ومحد منكم جاها وفزعلها تنخيتهم بالحسينية وكتلهم هالمرة وحيدة وهم الفزعوا وجابولها التريد لا اني مشتريلها ولا اني مطيها .. 

عن الحلفان جتني توفي دين عبن انا الخذته مني كله ذاك حاسبه الها دين وهي الما رضت الا انا ردت اطيها لوجه الله كالت ما اخذ من احد شي وشاخذ من محلك تسجله دين ومن اجا الشهر وما عدها اجتني تتعذر عبن محرم ما بيه شغل اتانيها ع الدين استخطيتها وشلت الها من فلوس الخمس واطيتها بعد عمي اتهموني بيها مو عيب 

العيب مو علي العيب ع الذباها وما درا عنها 

هسه جايين تعلموني العيب شنهو 

جا من لميتها من الشارع تريد تطيح ودمها بطولها ما عرفتو العيب .. من جاعت وبردت ما عركت كصصكم وكلتوا عيب اتهموني بعيب جيف ساعدت لوجه الله .. من طردتها من بيتك جيف ما رضيتلها بكعدتها بالبيت وانت مكعدها عدك بصريفة تخر عليها وتوسلتكم واحد واحد خاطر تسدون الصريفة بنايلون ما عرفتو العيب .. من ايام محرم تفتر الشوارع وتنشد الوادم بنسوانها وزلمها واخيها كاعد وياها ما يطيها حك لكمتها خاب ما كلتو عيب .. تعيبوني جيف ساعتها 

اذا جانت المرجلة عدكم عيب فوالله يا عمي العيب بيكم 

هذا انا وهاي تربيتي ما تعلمت اشوف حرمة معتازة والذياب اتدور حولها وكل واوي يتصيدلها خاطر ينهشها وادير عنها واكول معلي .. الحرمة بشارب الخير وبتكم حطيتها بشاربي لا هنتها ولا استغليتها ولا حطيت عليها عين نكسة 

ولو شفتوا عونتي الها عيب 

فانا ارفع عنها العيب واطلبها منكم زوجة على سنة الله ورسوله .....  #يتبع

تكملة الرواية من هناااااااا 

لمتابعة باقي الروايه زورو قناتنا علي التليجرام من هناااااااااا

بدل ماتدور وتبحث علي الروايات عمل 

متابعه لصفحتنا على فيس بوك هنااااااااااا

الرواية كامله من هناااااااااا

مجمع الروايات الكامله 1اضغط هناااااااا

مجمع الروايات الكاملة 2 اضغط هنااااااا