رواية جميلة البارت 25-26من الجزء الثاني بقلم الشيماء محمد
#الحلقه٢٥ من الجزء الثاني
#جميله ☺️
اللهم صل وسلم وبارك علي محمد
وبدأ وليد يفهمه عايزو يعمل ايه بالظبط وبالفعل وليد راح لنبيله وبدأ علاجه وتمارينه لها
وليد : يالا بقي معاد تمشيتنا
نبيله : مش قادره يا ابني بلاش النهارده
وليد : لا بلاش ايه ! النهارده بالذات ما ينفعش وبعدين انا محضرلك مفاجأه هتعجبك قوي
نبيله وافقت وطلعوا الجنينه مع بعض و وليد اخدها وكل ما توقف يمشيها شويه كمان
نبيله : خلاص مش قادره تعبت خالص
وليد : معلش حبه كمان
نبيله : لا مش قادره
وليد : لازم تقدري يالا
نبيله بصتله واستغربت اصراره : ليه يا وليد لازم !
وليد : علشان تشوفي اغلي انسان بتحبيه فلازم تكوني قويه
نبيله عنيها لئلئت بالدموع وإحساس غريب ملاها وقوه غريبه دبت فيها واتعدلت ومشيت بصمت جنب وليد وقلبها سابقها مش عايزه تفكر ومش عايزه تحط اي امل بس ماشيه بصمت جنب وليد لحد ماهو وقف وبص حواليه
ونبيله قلبها هيخرج من مكانه وبتبص حواليها واخيرا لمحوا حد بجلابيه وشال علي دماغه ومعرفوش مين ده وافتكروه حد من الجناينيه و وليد قلق وراح ناحيته علشان يمشيه قبل ما وليد يوصل ولما وصله اتفاجيء ان ده وليد فابتسم وقربوا من نبيله
وليد وصل لعندها وكشف الشال عن وشه وبصلها وهيا بصتله كتير ......
لحظات واقفين قصاد بعض محدش فيهم ناطق بحرف حتي .. وليد قرب من امه ومد ايده علي خدها مسح دموعها اللي نازله بصمت وهيا مسكت وشه بايديها الاتنين وبتهز دماغها مش مصدقه ابدا ان ابنها بين ايديها ..
نبيله بصوت تايه : ابني ...... ابني
عيطت ودفنت وشها في حضن ابنها اللي ضمها قوي ودموعه هو كمان نزلت
وليد : امي ...
عيطوا الاتنين و وليد كمان دموعه نزلت وبعد عنهم يراقب الطريق
نبيله : حبيبي ... ابني ... وليد
عيطت كتير وهيا بتقول اسمه
وليد : ايوه انا وليد يا امي .. انا وليد
نبيله : عمري وسندي ليه غيبت عن امك كل ده !! ليه سيبت امك يا قلب امك
وليد عيط : غصب عني يا امي ... غصب عني ... سامحيني
نبيله : مسمحاك يا قلبي بس كنت فين يا وليد عشرين سنه يا ابني سيبت امك لميس تحبسها وجميله مراتك حبستها وندي اختك خالد حبسها وذلها وابنك .. ابنك فهد ميس علمته الكره وملت قلبه بسواد ليه يا وليد غيبت كل ده .. عملوا فيك ايه لما سافرت ؟
وليد باس ايديها : ضربوني بالنار وحطولي فلاشه فيها اسرار عسكريه واتحبست بتهمه تجسس .. عشرين سنه يا امي محبوس واول ما خرجت جيت لهنا خرجت بفضلك انتي .. انتي اللي خرجتيني
نبيله عيطت : يا ريتني كنت بره كنت خرجتك من زمان .. غصب عني يا ابني .. سامحني انت كمان
وليد باسها : اسامحك علي ايه بس .. المهم انك دلوقتي بخير واوعدك ان كل حاجه هترجع زي الاول واحسن .. المهم محدش يعرف دلوقتي يا امي برجوعي لحد ما اطلع شهاده اني عايش ..
نبيله : ما تخافش محدش هيعرف مني ابدا بس جميله مراتك عرفها
وليد ابتسم : انا معاها ما تقلقيش
نبيله ابتسمت : طول ما انت معاها ما بقلقش عليك ..
فهمها هتعمل ايه وهتتصرف ازاي وسابها ومشي و وليد رجعها مكانها ..
نبيله فضلت طول الليل تشكر ربنا علي رجوع ابنها وتدعي انه يحميه وينصره علي اعداؤه كلهم ....
وفي يوم الحفله الكل متجمع
خالد وعلاء ومحي وميس
محي : هاه يا ميس ؟
ميس : ما تقلقش يا عمي
محي : كل حاجه جاهزه !
خالد : طبعا كله جاهز والنهارده هنجيب اخر العيله دي بقي
ميس : وفهد ؟
محي : يا يكون مننا يا يكون عدونا
علاء : اختياره واضح وهيكون زي ابوه
خالد ابتسم : يبقي نخليه يموت موته ابوه ويتقابلوا في الجنه بقي ....
الكل ضحك بس ميس في جواها شويه خوف علي فهد منهم ....هل ممكن تكون حبته بجد ! ولا اتعودت علي وجوده في حياتها ! ولا عرفان بالجميل لانه لولاه مكنتش هيا رجعت لمكانتها دي من تاني ! ايه احساسها ده ! هل ممكن تتنازل عن انتقامها من جميله وعيلتها علشانه ؟؟ برزت الاجابه واضحه قدامها ... لأ والف لأ حتي لو هيكون الثمن موت فهد نفسه مش مهم المهم انها هيا اللي تنتصر في النهايه وهيا اللي تتربع علي عرش عيلة نصّار
عند وليد نصّار الكل متجمع
يزيد و اكرم وادهم وعماد متجمعين مع وليد اللي قلقان جدا من الحفله ومتوتر
ادهم : كله عارف مطلوب منه ايه ! مش عايزين غلطات
وليد : انت هتكون موجود في الحفله صح ؟
ادهم : مش عارف بس يوسف هيكون موجود مع امل لان خالد عزمه واصر انه يحضر
وليد : محدش عزمك ؟
ادهم : لا طبعا عزموني كلهم بس بفكر ما اروحش علشان اكون معاكم انت واكرم خلينا نراقب الوضع من بره
اكرم : احنا مستعدين كويس لاي حاجه فما تقلقش كده يا وليد وانت كمان يا عماد
عماد : ما اقلقش ازاي وبنتي في وش المدفع !! دي بنتي
وليد : ما تقلقش عليها
عماد : امال انت قلقان ليه لما انا مقلقش ؟
وليد : لان بنتك في امان لكن المشكله كلها في فهد هو اللي هيكون فعلا في وش المدفع
يزيد : عمو حضرتك برضه اطمن اهم حاجه بس حضرتك ما تظهرش دلوقتي وان شاء الله الليله تمشي زي ما احنا مخططين
وليد : ان شاء الله بس جميله مش المفروض تكون فاهمه خطتنا ؟
اكرم : اي جميله فيهم ؟
وليد : ان جيت للحق الاتنين بس انا بتكلم عن مراتي
ادهم : لا يا وليد الاتنين ما ينفعش يعرفوا لان الستات عاطفيه بطبعها وعواطفهم بتفضحهم ومراتك بالذات من النوعيه اللي ما بتعرفش تسيطر علي عواطفها ابدا وطيبه زياده عن اللزوم دي مش بعيد ترفض اصلا الخطه كلها وتروح تقولها لفهد
وليد سكت شويه : هيا فعلا طيبه وتعملها
اكرم : يبقي مالوش لزوم تعرف حاجه خلي ردود الفعل كلها تكون طبيعيه
وليد : ربنا يسترها ....
.............
فهد بيتغدى مع ميس وعلاء وموبيله رن فبصله كانت جميله فابتسم بتلقائيه وميس كشرت لانها فهمت من ابتسامته انها جميله وفهد بصلهم و وقف : الحمد لله بعد اذنكم
ميس : انت ما اكلتش
فهد : شبعت كده كملوا انتو
ميس بغيظ : كل ده علشان تكلمها ! ماهو ممكن تكلمها بعد ما تاكل او ممكن ما تكلمهاش خالص وهتشوفها بعد كام ساعه
علاء شد ميس من دراعها : في ايه يا ميس ما تهدي كده
ميس : يعني ما يتغدي الاول
فهد واقف باستغراب : شبعت خلاص في ايه يا ميس ! مالك ؟
ميس : مجنونه وبقطع في شعري مالي يعني !
فهد : غريبه .. بعد اذنكم
سابهم وطلع اوضته رن عليها
جميله : ساعه علشان ترد ؟ افرضنا كنت مخطوفه مثلا !
فهد : افتكري حاجه كويسه بالله عليكي مش ناقصه هيا
جميله : ماشي بس اتأخرت ليه عقبال ما ترد !
فهد : كنت بتغدي وخليتيني سيبت الاكل وقومت وميس تحت شايطه
جميله ضحكت : ههههههههه طيب انا ما يهونش عليا ما تاكلش
فهد بابتسامه : وبعدين !
جميله : وبعدين عمتو عامله حبه محشيات تحفه مش قادره اوصفلك طعامتهم
فهد : اممممم وبعدين ؟
جميله : مفيش بعدين بقي تعال اتغدي
فهد : وابوكي !
جميله : ابويا بره تعال بس وانا هنزلك تحت مش لازم تطلع البيت
فهد : مجنونه انتي مش ناقصه مشاكل
جميله : ومن امتي الفهد بيخاف هاه يالا قوم وتعال بطل رخامه
فهد : يا بنتي مش حكايه خوف بس فعلا مشغول و مش فاضي دلوقتي ورايا مليون حاجه
جميله بزعل : يعني النص ساعه دي هيا اللي هتفرق ! خلاص براحتك
فهد بتردد : نص ساعه بس
جميله ابتسمت : اصلا لازم اجهز واروح للكوافير خلال ساعه اقولك تعال انت وصلني للكوافير بدال انتظاري لوليد واهو كده بقي رسمي
فهد : طيب ان كان كده ماشي اجهزي و جايلك
جميله قامت جري لعمتها باستها
عمتها : انتي نازله دلوقتي ؟
جميله : لا هجهز لحد ما فهد يجي
عمتها : فهد ؟ اشمعني ؟
جميله : عرض يجي يوصلني وانا وافقت واه ما اتغداش جهزيله طبق
عمتها ابتسمت : هجهزله طبعا حبيب قلبي .. ربنا يحميه يارب
جميله باستها : يارب يا عمتو يارب
جميله جهزت كل حاجتها ومنتظره فهد
الباب بيتفتح وبيدخل ابوها
عماد : هو وليد لسه مجاش ؟ تعالي يالا انا هوصلك
جميله بصت لعمتها اللي اتدخلت : لا يا عماد ارتاح انت خطيبها هيوصلها
عماد : خطيبها ؟ فهد ؟ اشمعني يعني ؟
جميله : كان قريب يا بابا وكلمني فبنرغي وعرض عليا يوصلني فوافقت .. هو في مشكله اني وافقت ؟
عماد : لا يا بنتي مفيش .. خطيبك وابن عمتك .. ربنا بس يعدي الليله علي خير
موبيلها رن وجميله طارت عليه وكان فهد
جميله : لحظه نازله
جميله مكنتش عارفه تشيل شنطتها وفستانها وكمان طبق فهد
عمتها : هاتي حبيبتي انا هنزل معاكي
عماد وقف : خليكي مرتاحه انا هنزلها
عمتها : لا يا عماد انا عايزه اشوفه واهي حجه اشوفه بيها ..
عماد : ان كان كده ماشي
نزلوا جميلتين مع بعض وفهد اول ما شافهم نزل من عربيته واخد الحاجه اللي في ايد خطيبته وحطها في العربيه وبعدها جميله مامته سلمت عليه : حبيبي جابتك علي ملى وشك
فهد : عادي يعني .. المهم اخبارك ايه !
جميله امه: انا كويسه حبيبي اتفضل اتغدي بقي في الطريق
فهد : انتي برضه سمعتي كلام البت دي ؟
جميله امه : ده انا ما صدقت انك تاكل من ايدي
فهد ابتسم واخد منها الطبق وركب جنب جميلته واتحرك بيها واول ما اتحرك شويه خبطته في دراعه
فهد : اه في ايه يا بت ؟
جميله : تاني بت دي !؟ اسمي جميله مش بت
فهد ابتسم : بت وبت وبت ... وبعدين اكشفي الطبق ده وامسكيه واكليني يالا
جميله : لييييييه !! سي السيد وانا مش واخده بالي ؟
فهد : لا وانتي الصادقه سي فهد فاهمه .. جربي قوليها كده ؟ سي فهد
جميله بصتله كتير وبعدها بصت قدامها
فهد : ما تكتميش في نفسك لاحسن يجرالك حاجه يوم خطوبتك .. قولي اللي جواكي
جميله بصتله : عهد سي السيد ده خلص من زمان .. من زمان جدا علي فكره
فهد : عمتي ندي قالتلي ان جميله امي كانت بتقول لابويا سي وليد .. ايوه انا مش مصدق الكلام ده بس اهو
جميله : وليه مش مصدقه ! ماهو ممكن بتقولها بحب مش شرط نظام سي السيد .. الواحده لما بتحب بجد بيكون جوزها حبيبها وتاج راسها بس ده لما يكون يستاهل بجد
فهد وقف علي جنب : وياتري بقي ايه المانع انك تقوليلي سي فهد ؟ انتي ما بتحبينيش بجد ولا انا ما استاهلش ؟؟
جميله : لا دي ولا دي
فهد : امال ايه ؟
جميله : انا اقولها طواعيه مني لكن انت بتطلبها بنظام سي السيد مش نظام الحب
فهد : انتي يعني دخلتي جوايا وعرفتي ده !
جميله : الاكل هيبرد
فهد : تعالي طيب ناكل
جميله : لا انا اكلت هأكلك انت
فهد ابتسم وهيا اكلته وبعدها بصلها واخد من ايدها الشوكه واكلها هو
جميله بعد شويه : علي فكره انا اتأخرت جدا علي الكوافيره
فهد : علي فكره انتي جميله جدا ومش محتاجه اصلا لكوافيره
جميله ابتسمت : بجد !
فهد : عندك شك في ده !
جميله : معنديش شك طبعا في جمالي لكن عندي شك في ذوقك انت
فهد كشر وبصلها وهيا ضحكت جامد
فهد : وتقولي ان انا بارد وهيا ما شاء الله عليها
جميله : طيب اعمل ايه ! من عاشر القوم
فهد : لا يا قلبي انتي بارده من يوم ما عرفتك
جميله : ماهو لازم اكون بارده علشان اقدر اتحمل برودك
فهد وصلها وقبل ما تنزل شدها من ايدها قربها منه
فهد : بفكر النهارده اعمل مفاجأه لابوكي وأجيب مأذون واتجوزك
جميله : نتجوز نتجوز ولا قصدك نكتب كتابنا ؟
فهد : اي حاجه المهم ان المحصله اني اقدر المس دول ويكونوا ملكي
حط ايده علي شفايفها بحب وهيا اتحرجت وبصت للارض
جميله : بابا مش هيوافق بلاش
فهد قرب منها قوي : طيب نجرب
جميله : ياريت يا فهد ياريت
فهد بهمس : انتي حاسه يا جميله باللي انا حاسس بيه ولا الاحساس ده جوايا انا بس !! يعني انا مش عارف افكر اهو بيني وبينك كام سم وانتي ما منعاني اني اقطعهم والمسك
جميله حست ان كل دفاعتها بتنهار من قربه : حبيبي مش حكايه منعاك
فهد : حبيبك ! هو انا حبيبك ؟
جميله بعدت : هو انت عندك شك في حبي ليك يا فهد !
فهد بصلها كتير : مش حكايه شك في حبك بس شك في برودك
جميله ضحكت بتريقه : هههه ههه ههه بايخه
فهد ابتسم : بعض ما عندكم ... المهم انزلي يالا
جميله : مش هتنزلني ؟
فهد: هنزلك طبعا
نزل معاها وهيا فتحت الباب علشان تاخد حاجتها وهو كان وراها فحط ايديه حواليها وضمها قوي لصدره وهمس : وحشتيني يا مجنونه
جميله ضمت ايديه اللي حواليها بايديه : يا مجنون احنا في الشارع
فهد دفن وشه في شعرها : ولا يفرق معايا النهارده هلبسك دبله عليها اسمي وهعلن ملكيتي ليكي ومحدش هيقدر يبعدنا عن بعض
جميله هنا لفتله : مهما يحصل مش هنبعد ؟
فهد باستغراب : اكيد مش هنبعد
جميله بخوف : فهد هو لو انت اكتشفت اني كدبت عليك في حاجه هتسامحني
فهد فكر شويه : حاجه زي ايه !
جميله : اي حاجه
فهد سند بايده علي باب عربيته المفتوح والايد التانيه علي سقفها وجميله محصوره في النص
جميله : هتسامحني ؟
فهد بصلها : بتحبيني ؟
جميله : ايه ؟
فهد : جاوبي علي سؤالي .. بتحبيني ؟
جميله : طبعا بحبك واكتر من بحبك كمان
فهد ابتسم : خلاص ده اللي يهمني مهما يكون اللي كدبتي فيه اكيد عندك اسبابك بس اتمني تقوليلي
جميله حطت راسها علي صدره ومسكة ياقة جاكته وكأنها بتستمد من صدره الامان والقوه
جميله : اكيد هقولك اكيد ... المهم حاليا اننا مع بعض
فهد ضمها : وهنفضل مع بعض .. يالا بقي ادخلي يدوب فعلا تلحقي تلبسي
جميله ابتسمتله وهو دخلها وقابل صاحبه السنتر وطلب منها ان الكل يهتم بجميلته والمكان كله يكون في خدمتها هيا فقط ...
روح فهد وداخل مبتسم وسرحان وميس كانت في انتظاره : للدرجه دي !
فهد فاق علي صوتها : نعم !
ميس : لا مفيش .. اسر جوه ادخله واجهز يالا
فهد راح ناحيتها وضمها وهيا بتزقه بس كتفها بين ايديه
فهد : مش لايق عليكي الغيره يا ميس هيا حاجه وانتي حاجه !! انتي مش محتاجه تغيري منها
ميس : انا مش غيرانه
فهد بصلها : طيب كويس روحي بقي كلميلي ابوها وشوفي هيوافق نجيب مأذون الليله ونكتب كتابنا ولا لأ ؟
ميس بصتله وزعقت : مأذون ليه وانت مستعجل ليه ! براحه يا فهد
فهد : وانتي ايه اللي مضايقك يا ميس الله ؟ انا عايز اتجوزها
ميس : هتتجوزها ..نعدي بس الليله وبعدها ربنا يسهل .. اتفضل لابن عمك
فهد مشي خطوه ووقف وبدون ما يبصلها : هو انتي ليه حاولتي تقتلي وليد قبل كده ؟ ياتري كنتي غيرانه برضه ؟ وممكن تفكري تقتلي جميله لو غيرتي منها ؟
ميس اتصدمت بسؤاله وفضلت شويه مش عارفه تنطق وهو لف وبصلها ومنتظر اجابه ؟؟
فهد :معندكيش اجابه ؟ هكتفي بالغيره
لف وهيطلع بس هيا اتكلمت : كان لازم أأدبه .. بعد عني وسابني وراحلها وعملها هانم فوقي ورماني في الشارع فكان لازم انتقم لكرامتي المهدوره بس ما تقلقش ابوك اخد مني حقه وزياده .. ورماني في السجن زي المجرمين .. انا ميس شريف اترميت في السجن وده لان جميلته امرت بكده وما خرجنيش الا لما ساوم بابا علي نصيبه في الشركه ولولا عمك محي رجعلي حقي الله اعلم كان حصلي ايه !!
فهد : امممم طيب
ميس : عندك اتهامات تانيه !!
فهد : مش اتهامات مجرد استفسارات .. انا ما بتهمكيش ابدا
سابها وطلع يجهز وبعدها اتحرك هو وميس وعلاء علي النادي اللي هيعملوا فيه الحفله لان عماد رفض انها تكون في الفيلا عندهم
راح ومعاه اسر وامل يجيبوا جميله من الكوافير وهناك كان ابوها وعمتها و اخوها اللي امل اول ما شافته جريت عليه وعماد بص لابنه اللي اتحرج من ابوه
امل : بقالي كتير ما شفتكش
وليد : معلش بقي الظروف كده هانت يا قلبي
امل : بجد انا قلبك !
وليد بص لابوه كان باصص بعيد فبص لامل ومسك ايدها : اوعي تشكي ابدا في حبي
لمح عماد بيبصله فساب ايدها بسرعه وامل ابتسمت من خوفه من ابوه
امل : للدرجه دي بتخاف منه ! انا كمان بخاف من بابا جدا
وليد : لا طبعا يا حبيبتي ده مش خوف .. مش خوف ابدا ده احترام
امل : وايه الفرق ؟
وليد : لا فرق كبير جدا .. الاحترام ده بيكون نابع من جواكي وعن اقتناع منك وبتعملي الحاجه من باب الحب اما الخوف فده بتكوني مجبره تنفذي لانك خايفه
امل : المهم النتيجه واحده في الاخر
وليد : مش وقته دلوقتي .. فهد داخل لجميله تعالي ندخل معاه
دخلوا كلهم لجميله اللي فعلا كانت اسم علي مسمي وفهد كان في قمه انبهاره بيها ... حطت ايدها في ايده وابوها بصلهم ف فهد وقف وعماد قرب منهم
عماد : دي بنتي يا فهد .. اغلي ما املك .. النهارده حطت ايدها في ايدك فاتمني انك تكون قد المسؤليه دي ..
فهد ابتسم : ان شاء الله يا عمي
عماد كان عايز يقوله انه مش عمه وانه خاله بس سكت وطبطب علي كتفه بحب الخال والاب كمان ...
اخدها وراحوا لمكان الحفله والكل استقبلهم والكل بيهني ويبارك ..
فهد رقص مع جميله والكل كان بيصورهم وفرحان ماعدا ميس اللي نظراتها مليانه غل للجميلتين ...
وليد بره اتمني لو يقدر يدخل لابنه ويشاركه فرحته دي ... كان موجوع جدا خطوبه ابنه من بنت خاله وهو مش مسموحله يحضرها .. وجع ما بعده وجع
اكرم حط ايده علي كتفه : معلش
وليد : معلش ايه ؟
اكرم : يعني ان انت مش معاه بس ان شاء الله تتعوض في الفرح
وليد ابتسم : ان شاء الله
وليد واكرم وادهم انتظروا اي شيء يحصل لكن الحفله ماشيه بسلاسه جدا ....
فهد لبس جميلته شبكته وحط في ايدها دبله خطوبتهم والكل اتفاجيء بفهد نصّار بيرفع ايد خطيبته بعد ما لبسها الخاتم وبيبوسها وهيا اتحرجت جدا اما ميس فاتمنت لو تقطع ايد جميله واتقابلت عنيها مع ضرتها جميله اللي شافت نفس الحقد والكره لسه مسيطر علي ميس ... راحت و وقفت جنبها
جميله : ما تفرحي لابنك .. مش بتقولي انه ابنك !! افرحيله بقي بطلي الكره ده يا ميس
ميس بغضب : انتي مين انتي علشان تقوليلي اعمل ايه وما اعملش ايه هاه ! بنت اخوكي دي هعمل فيها كل اللي اتمنيت اعمله فيكي انتي هيا هتكون بديلتك
جميله بصتلها : ابني مش هيسمحلك تأذيها زي ما قبله ابوه ما سمحلكيش ولولا انك خنتيه كان زمانه هو هنا بيجوز ابنه بنفسه
ميس : هتشوفي فهد هيسمحلي ولا لأ .. فهد ابني وتربيتي انا
جميله : بس نبعه الطيب وبذوره الطيبه موجوده جواه ودي كفيله ترجعه لاصله
ميس : هنشوف
جميله : هنشوف
كل واحده وقفت في جنب قصاد بعض .. غريمتين واحده قويه بكرهههاوحقدها وواحده قويه بطيبتها وقلبها الكبير .. بس ياتري مين فيهم اللي هيفوز في الحرب دي !!
فهد مع جميلته اسعد ما يكون وحس لاول مره انه عايش وبيتنفس .. حس بقيمه الحياه .. حس بالسعاده اللي اول مره يدوق طعمها ... حس بالحب مالي كل حياته ..
جميله طلبت من الدي جي اغنيه او تحديدا مقطع لفهد تغنيه بنفسها
فهد ابتسم ومنتظر يسمع هتغني ايه ؟
غنت وصوتها مكنش حلو قوي بس الكل حبه وتجاوب معاه ....
أمل حياتي يا حب غالي ما ينتهيش
يا أحلى غنوه سمعها قلبي ولا تتنسيش
خد عمري كله بس النهارده خليني اعيش
خليني جنبك خليني في حضن قلبك خليني
وسيبني أحلم سيبني ياريت زماني ما يصحنيش
أمل حياتي .. عينيا .. يا أغلى مني عليا
يا حبيب امبارح وحبيب دلوقتي
يا حبيبي لبكره ولأخر وقتي يا حبيبي يا حبيبي
( نطت بعدها من الكوبليه ده لكوبليه تاني خالص والكل ضحك )
قد كده مشتاق إليك قد كده ملهوف عليك
نفسي أنده لك بكلمه ما تقالتش لحد تاني
كلمه قد هواك ده كله قد أشواقي وحناني
كلمة زيك واللي زيك فين ده أنت زيك ما اتخلقش اتنين
سكتت والكل ضحك وصقف وفهد راح ناحيتها مبتسم وحط ايده علي كتفها وضمها كده وهياخدها وينزل بس الكل حاول معاه هو يغني الا انه رفض تماما وده لانه ما يعرفش اصلا اي اغاني
قعدوا الاتنين
فهد : جميله قوي الاغنيه دي !! مين بيغنيها
جميله بصتله : انت مش عارف مين ؟
فهد : لا معرفش
جميله : لسيده الشرق الاوسط
فهد : ايوه اللي هيا مين يعني ؟
جميله : لا انت حالتك ميؤس منها .. دي ام كلثوم وكل اغانيها رائعه جدا والاغنيه دي اسمها امل حياتي كلها رائعه
فهد : انتي غنيتيها كلها ؟
جميله : لا طبعا انا يدوب كام كلمه منها الاغنيه طويله جدا بس دول اكتر مقطعين بحبهم
فهد ابتسم ومسك ايدها : قوليلي ايه الكلمه اللي عايزه تقوليهالي وتكون قد هواكي وما اتقالتش قبل كده ؟
جميله ابتسمت : مفيش .. مفيش كلمه ممكن توصف احساس الانسان في الحاله دي وعلشان كده هيا بتقولها كده
بتقول نفسها لكن ملقتش اصلا
ميس جت ودخلت بينهم
ميس : العشا يالا .. البوفيه جهز وانتو لازم تفتحوه .. قوم يا فهد
فهد ابتسم وقام وهيا في ايده اتعشوا والحفله بدئت تخلص والناس بدئت تمشي
ادهم بره : امال ناويين علي ايه ؟
اكرم : ممكن بعد ما الكل يمشي ؟
ادهم : ممكن هنشوف
الكل مشي ومحي طلب من فهد يروح خطيبته بنفسه وعماد وجميله و وليد يروحوا او اسر يوصلهم بس وليد رفض لان معاهم عربيتهم
فهد روح خطيبته وقاعد معاها في عربيته ويدوب بيتكلموا كان عماد واقف علي الشباك
عماد : يالا يا جميله الوقت اتأخر تصبح علي خير يا فهد
اخد بنته وطلع وده ضايق فهد جدا لانه ما لحقش يشبع منها ابدا
الليل كله فهد بيسمع اغنيه امل حياتي وعجبته جدا جدا ..
الصبح بيلبس وميس دخلت عنده
ميس : تاني جينز يا فهد ؟
فهد : اه ليه ؟
ميس : هتروح الشركه ازاي بالجينز؟
فهد : مش رايح الشركه انا خارج انا وجميله مع بعض
ميس : من اول يوم خطوبه مش هتروح شغلك ؟
فهد : ايوه علشان اول يوم .. ميس انا مش ههمل في شغلي انا مركز فيه جدا فما تقلقيش وبعدين البركه فيكي يا قمر
باسها وخرج راح لجميله اللي نزلت بسرعه
فهد :انا مش مصدق ان باباكي وافق نتغدي مع بعض بالسهوله دي
جميله : بقيت خطيبي خلاص هيعترض ليه يعني وبعدين علي فكره بابا مش خنيق بالصوره اللي انتي متخيلها دي
فهد : اه فعلا فعلا
جميله : بكره لما تعاشره هتعرف بنفسك
فهد : ماشي المهم هنروح فين ؟
جميله وصفتله المكان لحد ما قالتله يقف
فهد : هاه يا جميله ناويه علي ايه وجينا هنا ليه ؟
جميله شاورت علي النيل قصادها وعلي المراكب قدامها
فهد : ايه مش فاهم ؟
جميله : هنروح القناطر
فهد : قناطر ايه ؟
جميله : هنركب المركب الكبيره دي وهنروح القناطر وهنرجع اخر النهار من زمان قوي وانا متفقه مع نفسي لما اتخطب هنروح انا وخطيبي القناطر
فهد باصصلها وصاحب المركب واقف متابعهم وكذا واحد واقفين عايزين يلقطوا اي زبون
فهد : انتي متخيله اني ممكن اركب دي ! ده بجد ؟
جميله : اه هتركبها يالا
فهد : انتي مش طبيعيه ابدا .. حبيبتي عايزه مركب اشتريلك بدال الواحده عشره لكن مش دي
جميله بتحاول تقنعه لحد ما فهد اخيرا رضخ لرغبتها واخيرا سبقته ونزلت تركب وفهد بيحاسب
جميله نادت من تحت : فهد .. فهد ( بصلها ) هاتلي ورد من الراجل اللي جنبك
فهد بصله واخد من ايده الورد وهو فوق حدفهم علي جميله بعنف واحده وري التانيه وكأنه بيضربها بيهم حدفهم كلهم بغيظ ماعدا واحده خلاها في جيبه
صاحب الورد كان مذبهل بس فهد رضاه بأضعاف اضعاف تمن وروده
ركب معاهم واشتغل الدي جي وجميلة كانت بتهيص و فهد بيتفرج لحد ما وصلوا وقعدوا يلعبوا ويجروا وفهد كل ما بيحاول يقرب جميله تبعده او تهرب منه لحد ما هو وصل لاخره معاها ..
اتمشوا الاتنين وكانوا في مكان هادي و فهد وقف وسند علي شجره وهيا وقفت جنبه بتتكلم وهو باصصلها ومش بيرد
جميله : انت مش بترد ليه !
فهد : بسمعك
جميله : انا اتكلمت كتير انت اتكلم
فهد : انتي بعيده عني ليه ! بيني وبينك مسافه كبيره ليه ؟
جميله قربت خطوه : انا قريبه اهو
فهد ضحك وبص للارض شات حاجه تحت رجله : للدرجه دي
جميله : للدرجه دي ايه !
فهد : مش واثقه من قربك مني ونتايجه فسايبه مسافه كبيره بينا ؟
جميله : ولنفترض ان كلامك صح فيها ايه ؟
فهد : فيها ان ده مش عاجبني .. مش عاجبني تقفي معايا بيني وبينك مترين
جميله : دول مش مترين دول اقل حتي من متر واحد
فهد : انتي بتتكلمي بجد ولا بتهرجي !
جميله هتتكلم بس فهد مسك ايدها اللي رفعتها وشدها جامد لدرجه انها خبطت فيه وجت تبعد بس ايده التانيه كانت حوالين وسطها مثبتاها علي صدره فرفعت دماغها تبصله
جميله : سيبني يا فهد
فهد : مش عايز اسيبك انا مرتاح كده
جميله بتحاول تخلص ايدها من ايده او تبعد ايده اللي علي وسطها بس قوته اكبر منها بمراحل
جميله : انا مش مرتاحه كده ابعد
فهد : انتي مرتاحه كده بس عقلك هو اللي بيصورلك غير كده
قرب بس هيا بعدت وشها علي قد ما تقدر
جميله : وبعدين معاك .. فهد سيبني بقي
فهد : يا بنتي انا خطيبك
جميله : وهو يعني ايه خطيبي هاه ! مجرد دبله في ايدي في اي وقت تتقلع يبقي انتهي الموضوع
فهد هنا سابها مره واحده : وهو علاقتي بيكي هيا الدبله ؟؟ هو انتي شايفه ان ده اللي رابطنا ببعض !
جميله : لا طبعا يا فهد مش الدبله اللي ربطانا ببعض .. انت فهمتني غلط .. انا قصدي ان الخطوبه دي شرعا مش معترف بيها .. ماتديلكش اي حقوق عليا .. فهد انا علي الاقل واضحه في مشاعري وانت عارف اني بحبك لكن انت غامض
فهد : انا عايز اتجوزك اعتقد مشاعري واضحه .. اكيد مش بكرهك
جميله : اكيد مش بكرهك دي مش معناها ابدا انك بتحبني ... لازم تقولها صريحه
فهد : لازمتها ايه ! يعني هل الكلمه في حد ذاتها هتحسسك بالامان مثلا ؟ هل لو قلتهالك هتقربي مني اكتر !
جميله : يا فهد مش الكلمه دي برضه اللي هتقربنا من بعض بس ده ما يمنعش اني بتمني اسمعها منك
فهد : جميله ... يالا نمشي لاني صراحه وصلت لاخري معاكي
جميله مشيت قدامه بغضب وهو جنبها
فهد : يعني في الاخر انتي اللي زعلانه ... قرفاني في عيشه اللي خلفوني بالفلسفه بتاعتك دي وانتي اللي زعلانه
جميله : دي مش فلسفه ده صح وغلط ولا انا مش زعلانه
فهد : صح ماهو باين علي ملامحك
جميله : انت علي فكره اللي مضايق مش انا .. انا مضايقه علي ضيقك انت
فهد : انا مضايق لانك بعيده عني
جميله : انا مش بعيده عنك ابدا .. ومش ده القرب يا فهد بالنسبالي
فهد اخد نفس طويل : طيب يا جميله براحتك
جميله مسكت ايده وقفته : اليوم اللي هشيل اسمك فيه .. هكون ملك ايدك فعلا ومحدش ساعتها يقدر يبعدنا ولو لحظه عن بعض .. بعدين كلها اسبوع يا فهد
فهد : كلها اسبوع .. مش كتير يا جميله
جميله بتوهان : ربنا يستر بقي في الاسبوع ده
فهد : خايفه منه ليه ! هيعدي زي ما باقي الايام بتعدي
جميله : باذن الله يعدي علي خير
قضوا يوم ظريف .. ركبوا عجل وساقوا احصنه واتغدوا والعصر روحوا فهد روح جميله وبعدها روح هو كمان كانت ميس في انتظاره
فهد : خير في حاجه ؟
ميس : اتأخرت جدا
فهد : ما انا قلتلك مع جميله
ميس : تخيلت ساعه او اتنين بالكتير مش النهار كله
فهد : المهم ياقلبي انا طالع ارتاح
ميس وقفته : اتصل بعمك عماد وعمتك جميله .. سوري اقصد عايده وخطيبتك واخوها واعزمهم يتعشوا هنا الليله .. اعزمهم كلهم
فهد باستغراب : اشمعني يعني النهارده ؟؟
ميس : لان دي العادات يا فهد تاني يوم خطوبه اهل العريس بيعزموا اهل العروسه بس بما انك اليوم كله بره وقافل موبيلك فمعرفتش ابلغك .. اتصل واعزمهم
فهد اتصل وكلم عماد اللي كان رافض بس وافق بالعافيه وخصوصا لما قاله ان ميس مصره جدا علي العزومه دي ..
وطلب وليد والكل يجي ..
ميس : هاه قالك ايه ؟
فهد : وافق بالعافيه
ميس : طيب كويس .. اعمامك كمان جايين كلهم .. بقولك
فهد : قولي بس بسرعه لاني عايز اريح ساعتين قبل ما الكل يجي
ميس : ما تعزم صاحبك الجديد
فهد : مين صاحبي الجديد ؟
ميس : يزيد بتاع شركه الامن
فهد : اشمعني ؟
ميس : يعني عمك عايز يتعرف عليه اعتقد عايزو في شغل
فهد بصله بعدم تصديق
ميس : ايه !
فهد : يعني ده بتاع امن اعزمه مع عيلتي واهل خطيبتي ليه مش فاهم !
ميس : ده تقريبا مش بيفارقك يا فهد مش مجرد بتاع امن .. ده صاحب وبعدين ....
فهد بنفاذ صبر قاطعها : خلاص هكلمه واقوله يجي هو ومراته .. ارتحتي ! انا طالع انام ومحدش يصحيني قبل ساعتين سلام
ميس ابتسمت وهو طالع : اتصل بيه
فهد : حاااااضر
فهد طلع اوضته واخد شاور سريع وكلم يزيد طلب منه يجي يتعشي معاه هو ومراته ومع استغراب يزيد فهد بلغه ان دي رغبه ميس وانها عايزه تتعرف عليه والعيله كمان وده وتر يزيد فوافق
كلم ابوه اكرم و قاله ...
اتجمع اكرم ويزيد وادهم و وليد وعماد
ادهم : اعتقد العزومه دي مش لله في لله
عماد : طبعا مش لله في لله .. هما معملوش حاجه في الحفله علشان الصحافه والناس اللي كانت موجوده دلوقتي هيتسلوا علينا
وليد : اهدي يا عماد
عماد : اهدي ازاي وانا رايح بعيلتي كلها عندهم ! اهدي ازاي ؟
اكرم : احنا مش هنسيبك وبعدين يزيد هيكون معاك .. والبودي جارد هيكونوا موجودين واحنا هنكون مراقبينكم
ادهم : فعلا يا عماد قلقك مش في محله احنا كلنا حواليكم ... ما تقلقش .. اه صح خالد اتصل بيوسف عزمو علي سهرتكم دي وبفكر اخليه يروح وابعت معاه آسيا تكون حمايه وسطكم
عماد : آسيا بنتك اللي جابت وليد !
ادهم ابتسم : ايوه هيا
عماد : اه ابعتها
وليد : يا عماد هما مش هيعملوا حاجه هما مش هيكشفوا كل اوراقهم مره واحده وعلني بالشكل ده
ادهم : عنده حق .. التنفيذ هيكون في الظلمه مش كده زي ما خلصوا من وليد في الظلمه
عماد : امال العزومه دي ليه !
ادهم : ممكن ببساطه يكونوا بيلعبوا باعصابكم .. او هيبدؤا يلعبوا علي العموم هتعرف الليله .. المهم ابعت آسيا ويوسف ولا لأ ؟
وليد : والله براحتك بس اعتقد مالوش لازمه علشان كمان وليد
عماد : وليد ماله !
وليد : هيضايق علشان امل لازم ساعتها تكون مع يوسف
عماد : يعني يا ربي ابني ما يحبش من بنات الدنيا كلها غير بنت خالد وبنتي ما تحبش غير ابن ميس
وليد اتنرفز : فهد ابني يا عماد وابن اختك مش ابن ميس وامل بنت ندي كمان
ادهم مسك وليد من ايده وضغط عليها : اهدي يا وليد اعصابنا كلها مشدوده .. وبعدين دول عياله الاتنين وخوفه عليهم طبيعي
وليد : يخاف عليهم ماشي بس ما يحسسنيش كل شويه وكأني حاططهم كبش فدا لابني .. عياله في غلاوه فهد ابني بالظبط
عماد : انا عارف ده يا وليد بس ده ما يمنعش اني برضه خايف عليهم
اكرم : طيب يا جماعه احنا كلنا مصلحتنا واحده مش عايزين ننسي ده يالا يا عماد روح لعيلتك يدوب تاخدهم وتروح وانت يا يزيد هتاخد مراتك فعلا انا رأيي بلاش
يزيد : فعلا بلاش هيا وهعتذر باي سبب
اكرم : طيب يالا كل واحد يروح يالا يشوف وراه ايه
الكل مشي واكرم فضل مع وليد اللي قلقه فوق الكل ...
............
فهد نايم وميس طلعت تصحيه
ميس : فهد يالا اصحي بقي اعمامك وصلوا .. محي وخالد وعمتك
فهد بصوت نايم: جميله جت !
ميس بغيظ : بقولك اعمامك
فهد : وانا بقولك جميله وصلت !
ميس : لا جميله هانم ما وصلتش
فهد غمض عنيه : لما توصل صحيني
ميس شدت المخده من تحته وزعقت : اتعدل وقوم اجهز وانزل لاعمامك بلا جميله بلا بتاع بقي .. يالا اتفضل
فهد اتعدل وبصلها : دي اول مره تتكلمي معايا بالاسلوب ده !
ميس : لان انت افورتها قوي ..
فهد : افورتها في ايه ! هاه !
ميس : مش وقته كلامك ده الناس تحت اتفضل قوم وانزل
سابته وخرجت وهيا علي اخرها منه وعلاء قابلها
علاء : وبعدين معاكي ما تسيطري علي اعصابك شويه .. دي كلها ساعه وكل حاجه تنتهي
ميس : مش قادره .. قال ايه جميله وصلت .. حاسه اني شايفه وليد اللي قدامي .. عايش في ابنه .. ومهما زرعت كره جواه الي ان بنت الخادمه جت ومسحت كل حاجه من جواه وملتله قلبه حب .. حب .. اكتر كلمه بكرهها في الكون ده كلمه حب
علاء : اهدي .. الحب ده هينتهي تماما وهتطفي نارك دي من تاني .. سبق وطفيتيها والنهارده هطفيها .. نهدي بقي ويالا ننزل
نزل وميس كانت نظراتها علي ندي وامل ونبيله .. نظرات غريبه ..
فهد لبس ونزل وقعد وسطهم
ندي : خطيبتك جايه امتي !
فهد ابتسم : مش عارف هتصل بيها لحظه
ميس : وتتصل ليه ماهي هتيجي
ندي : سيبيه يفرح بخطيبته .. اتصل يا حبيبي
فهد اتصل وقام بعيد يكلمها
فهد : اتأخرتوا ليه !
جميله : خلاص اهو
فهد : يعني قدامك قد ايه ؟
جميله : داخلين من بوابه الفيلا
فهد ابتسم : اوك سلام
قفل وبصلهم : وصلوا هطلعلهم
طلع وندي ونبيله ابتسموا اما ميس فالغيظ هينطق علي ملامحها
فهد استقبل جميلته وسلم علي الكل
فهد : اتفضلوا الكل متجمع جوه ..
دخلوا بتوتر وفهد مسك ايد جميله وشدها علشان تأخر معاه ومشيوا وري الكل
جميله بهمس : وبعدين معاك
فهد : استني عايزك
فهد وصل لباب الفيلا ولقي اعمامه واقفين يستقبلوا عماد واخته فهو سحب جميله وجري وهيا جريت غصبا عنها لانه بيسحبها من ايدها اللي ماسكها
جميله وقفت تنهج : هيدوروا علينا
فهد ابتسم : ما يدوروا .. تعالي
اخدها عند حوض الورد .. وطي وقطع ورده حمرا وعطاهالها
فهد : بغض النظر مين اللي زرع الحوض ده بس عمتك قالتلي جمله عجبتني قوي .
جميله ابتسمت : قالت ايه !
فهد : قالت اي ان كان اللي زرعه المهم انه اتزرع بحب واتروي بحب وعلشان كده انا بديلك ورده منه
جميله : ودي معناها ايه؟
فهد اخد نفس طويل : دي المفروض يعني تقولك اللي انا مش عارف اقوله فمشي دي النهارده اوك !
جميله ابتسمت واخدت نفس طويل من الورده وبصتله بابتسامه حركت قلبه : همشي دي النهارده .. هديه مقبوله فهد نصّار
فهد ابتسم ومسك ايدها : ماشي يا جميله نصّار
جميله ابتسمت : يا ريت فعلا بس لسه
فهد قرب منها قوي : قريب جدا .. قريب
رفع ايدها لشفايفه وباسها وبعدها حط ايده علي كتفها وضمها وداخل بيها لجوه
جميله : ياريت نفضل هنا
فهد وقف : انا معنديش مانع خلينا
جميله ضحكت : مش هينفع يالا بينا
فهد دخل بيها ونظرات الكل كانت متعلقه بيهم وقبل ما حد يتكلم جرس الباب رن وكان يزيد وده انقذهم من اي تعليق ... كمان جت سالي ودخولها عمل حاله صمت
سالي : ايه سكتوا ليه ! يعني مش معني اني كنت مخطوبه لفهد والخطوبه اتفسخت اني هقاطعه ده احنا برضه اولاد عم ولا ايه !
فهد وقف : اكيد طبعا يا سالي .. انا بس محبتش اضغط عليكي وقلت انتي لما تكوني مستعده هتيجي
سالي بابتسامه عريضه : واديني جيت وعايزه ارحب بعروستك في العيله ..
جميله وقفت وسالي سلمت علي الكل
ميس اعلنت ان العشا جاهز في الجنينه والكل اتعشي و وليد واكرم وادهم بره منتظرين ايه اللي هيحصل
قعدوا في الجنينه بعد العشا وميس قاعده مركزه مع فهد اللي غرقان مع جميله في ضحك وهزار وهو رفع دماغه بصلها واتفاجيء بنظراتها دي
فهد : في ايه مالك !
ميس وقفت فالكل سكت وبصلها
ميس : تعرف انك نسخه من وليد ابوك ! تشبهه في كل حاجه لا مش كده وبس انت كمان ماشي علي خطاه
فهد : ميس انتي بتقولي ايه ! وبعدين انا اشبهه في ايه ؟
( وليد بره سامع الكلام ومتحفز جدا )
ميس : وانت ما تشبهوش في ايه ؟ انت نسخه منه ...
فهد وقف : ميس كفايه اذا سمحتي ونبقي نتكلم بعدين
ميس : بعدين ليه حلو قوي هنا .. وحلو قوي دلوقتي .. ولا انت خايف تطلع فعلا شبهه ؟
فهد اتنرفز : لا يا ستي مش خايف اشبهه في ايه وليد نصّار ؟
ميس : وليد رجل اعمال ناجح وذكي انت زيه .. وليد دخلت خدامه البيت حبها وعشقها انت زييه .. دخلت موظفه الشركه حبتها وعشقتها ( فهد كان هيتكلم بس ميس قاطعته ) ما تقاطعنيش انت تسمع وبس ... ايه مش جميله مجرد موظفه وانت حبيتها .. جميله التانيه برضه كانت مجرد خدامه وابوك حبها .. ابوك رمي مراته لمجرد انه شك انها حاولت تأذي جميلته .. انت رميت خطيبتك بجرد ما شكيت انها اذت جميلتك .. ابوك طلقني وانت فسخت خطوبتك .. ابوك قال جميله خط احمر .. انت قلت جميله خط احمر .. ابوك اهمل شغله وبقي عاشق ولهان وانت اهملت شغلك وبقيت عاشق ولهان وبتقضيلي يوم في القناطر ويوم مع حبيبتك والله اعلم بكره فين ! تبقي شبهه ولا لأ !! لا مش بس كده ده انت حبيت واحده بنفس الاسم .. جميله .. وجميله دي برضه نسخه من جميله التانيه يا تري ليه !!
فهد بتريقه : ايوه سمعيني بقي ياتري ليه جميله دي هيا كمان نسخه من جميله الثانيه ؟؟
ميس : الاسباب كتيره قوي يا فهد .. ممكن لانها تربيتها !! او ممكن لانها عمتها !! اوبس انت ما تعرفش ... اووووه يا فهد حرام مسكين ... ما تعرفش ان جميله خطيبتك تكون بنت خالك عماد ... و ما تعرفش ان جميله عمتها تبقي امك !!!!!!!!!
انتظروني
#الحلقه٢٦ من الجزء الثاني
#جميله ☺️
زي ما وعدتكم بحلقه هديه انا وفيت بوعدي
ياريت تفاعل بقا
ميس : الاسباب كتيره قوي يا فهد .. ممكن لانها تربيتها !! او ممكن لانها عمتها !! اوبس انت ما تعرفش ... اووووه يا فهد حرام مسكين ... ما تعرفش ان جميله خطيبتك تكون بنت خالك عماد ... و ما تعرفش ان جميله عمتها تبقي امك !!!!!!!!!
فهد فضل شويه مش مستوعب هيا قالت ايه او مش عايز يستوعب
فهد : انتي بتقولي ايه ؟ مين دي اللي امي ؟ ومين دي اللي بنت خالي ؟
ميس : الست اللي قاعده وراك دي .. جميله مامتك
فهد بص وراه لامه ومر في دماغه كل ذكرياته من اول يوم شافها فيه .. دموعها ، وقوعها في حضنه ، ابتسامتها ، دموعها ، احساسه الغريب ناحيتها ، اللخبطه اللي هو فيها .. حاجات كتير فكر فيها
ميس اتكلمت : ايه مش مصدق اسألها
فهد مفيش صوت اصلا طالع منه علشان يتكلم بيه فطلع سؤال همس او فحيح : الكلام ده صح !
جميله امه عيطت وهو اتهيألو انها ما سمعتش فزعق بصوته كله : ردي عليا
وليد بره وقف بس اكرم مسكه من ايده : اقعد يا وليد مش وقتك .. اهدي
جميله مامته شاورت بدماغها اه
وفهد مش عارف يفكر .. حس انه عقله اتشل تماما .. مش عارف حتي يتنفس
ميس : ايه يا فهد مش هتسلم علي مامتك ؟ مش كان نفسك تشوفها ! اهي قدامك اهي اجري عليها واحضنها واسألها ليه سابتك وانت عيل ابن اربع سنين ؟ وليه دلوقتي ظهرت في حياتك ؟ وليه بعتت بنت اخوها توقعك في حبالها
فهد رفع دماغه بص لميس باستغراب وكأنه رافض الحقيقه دي
ميس : ايه ؟ مش ده اللي حصل ؟ مش بنت اخوها لعبت بيك .. مثلت عليك الشرف والقيم والمباديء .. نفس حركات عمتها اللي وقعت بيها وليد ... تعرف ان والدتك علاء عاكسها مره ورفعت عليه سكينه .. خطيبتك برضه علاء هزر معاها وكان نفس رد الفعل .. الاتنين بينشنوا علي اكبر راس .. بيحددوا هدف ويوصلوله .. وزي ما ابوك وقع في شباك جميله انت وقعت في شباك بنت اخوها .. وزي ما ابوك رماني انت رميت بنت عمك سالي .. الزمن بيعيد نفسه من تاني ...
لو كسر القلوب كان له صوت كان الكل سمع صوت قلب فهد وهو بيتكسر .. بيتحطم واحده واحده ... بيتنفس بالعافيه بس محدش حاسس بيه ...
فهد بص لميس : طيب انتي اكيد عرفتيها اول ما شفتيها ليه مقولتليش ؟ ليه سيبتيني اخطبها ؟ ليه اصلا طلبتي مني اخطبها؟
ميس : كنت عايزه اقولك بس لقيتك بتحبها .. كان لازم اتأكد الاول هيا بتحبك فعلا وتستاهل تكون خطيبتك ولا هيا داخله زي عمتها .. وللاسف هيا زي عمتها .. عطيتها فرصه تعترفلك لكن سكتت .. ما حبتش اظلمها قلت يمكن تكون البنت زيك ما تعرفش حاجه وحبتك بجد بس بعدها اكتشفت انها عارفه كل حاجه
جميله : فهد انا ما لعبتش عليك ما تصدقهاش .. انا بحبك
ميس : بتحبيه ! قصدك بتحبي فلوسه ومركزه
جميله خطيبته زعقت : فلوسه ومركزه دول تحبيهم انتي مش انا
فهد هنا نطق : ما تكلميهاش هيا كلميني انا .. انتي كنتي عارفه انك بنت خالي ؟؟
جميله : فهد انت وعدتني تسمعني
فهد : بس ردي علي سؤالي .. انتي كنتي عارفه ولا لأ ؟!
جميله : ايوه كنت عارفه
فهد : وكنتي عارفه ان عمتك دي تبقي امي فعلا ؟
جميله : ايوه بس والله دي بتحبك اكتر من الكون وما فيه .. فهد بس اسمعني
فهد : هششششش .. مش عايز اسمع منك اي حاجه .. مجرد اسكتي .. انتي بالذات اسكتي
جميله : لا مش هسكت انا بحبك
فهد شاور بدماغه مش عايز يسمع ومره واحده بص ليزيد : بس انا سألتك ! ايوه سألتك انت ازاي معرفتش ؟ انت شركه امن كبيره ازاي ما عرفتش ؟
خالد هنا وقف : لا هو كان عارف يا فهد بس كان معاهم في اللعبه
فهد مش فاهم حاجه : معاهم ؟يعني ايه معاهم ؟
خالد : الاول تعرف يزيد ده ابن مين ؟ ( فهد عنده حاله ذهول ) انا اقولك ... ده ابن اكرم الاسيوطي .. واكرم ده كان البودي جارد ودراع ابوك اليمين .. وبمجرد ما عرفوا انت مين وبتسأل عن مين اتفقوا عليك .. راح اكيد لجميله واتفقوا ساعتها كلهم عليك
فهد مش مصدق فبص ليزيد : انت كنت عارف ؟ كنت عارف انها امي؟
يزيد : ايوه كنت عارف .. والدي طلب مني اساعدك تفتح عنيك لحقيقتهم وانت لازم تفتح عنيك .. وتشوفهم علي حقيقتهم دول اذوا ابوك واذوا امك وبيأذوك انت كمان دلوقتي .. فتح عنيك يا فهد
فهد بصله وحاسس انه تايه مش فاهم حاجه ومش عارف ازاي سعادته اتدمرت في لحظه كده ... من شويه بسيطه بس كان اسعد راجل في الدنيا .. كان عاشق دلوقتي هو مدبوح .. مدبوح وبينزف ومحدش حاسس بيه ابدا ...فاق علي صوت خالد بيزعق ليزيد
خالد : انت تخرس خالص .. وكفايا بقي كدب وتأليف .. فهد دول بيلعبوا بيك .. بدايه بصلاح صاحب ابوك اللي جه ياخدله قرشين وينقذ شركته من الافلاس ألفوا فيلم طويل عريض .. هو بعت بنته لعمك علاء وكلنا عارفين ان علاء بيضعف قدام البنات دي حقيقه محدش بينكرها لكن اقنعوك انت ان علاء ابتزهم مع ان العكس هو اللي صح هما اللي ابتزوه وطبعا يزيد جه وحبك الدور عليك وفهمك ان انا كمان هددتهم صح ! امتي شوفتني بهدد حد ! هاه ! ( بص لاسر ابنه ) وانت كمان صدقته صح !! صدقت ان ابوك قتال قتله وبيروح يهدد الناس في بيوتها وعلشان ايه ! علشان فلوس .. ملعون ابو الفلوس اللي تعمل في الاهل كده وتفرق بين الولد وابوه ولا ابن اخوه .. فوقوا يا اولاد نصّار فوقوا وميزو مين بيضحك عليكم ومين بيدافع عنكم !!
وانت يا اسر .. حته عيله تضحك عليك .. كانت عايزه تبتز عمك ولما معرفتش لفت عليك انت ... عيله تلعب بعمك وتلعب بيك انت كمان لا وتقنعك ان عيلتك وحشه ابوك بلطجي وعمك مغتصب صح !
علاء : بنت الايه جاتلي وخدرتني وابتزتني ولعلمك دول اخدوا عشرين مليون تمن الفيديو صوروه ليا وانا متخدر
فهد : لا ما اخدوش فلوس بس كانوا ....
علاء قاطعه : كانوا ايه .. فوق بقي؟ دول بيلعبوا بيك
سالي اتدخلت : فعلا يا فهد بيلعبوا بيك .. جميله من ساعة ما لاحظت انها لفتت انتباهك وهيا بتقولي كلام صعب وحتي لما اتخطبنا كانت كل شويه تقولي انها هتاخدك مني .. وانها هترميني بره الشركه خالص .. واتبلت عليا اني خطفتها !! انا فعلا في لحظه غيره زقتها علي السلم بس من غيظي منها لكن خطف ؟؟ انا اخطف يا فهد .. انا سالي ادبر لخطف وقتل .. انت ازاي صدقت عني ده ؟ ده احنا متربين مع بعض يا فهد .. انا وانت ...
فهد : بس انتي فعلا خطفتيها
محي : انت لسه مصدق انها اتخطفت اصلا .. يا ابني فوق ... واحده بتتخطف تتصل بمديرها في الشغل !! يعني ازاي هاه ؟ بلاش دي ...اللي خطفها ده مش اول شيء يعمله ياخد تليفونها ! بلاش اتصلت بيك وانت مع يزيد تحديدا وقال ايه حدد مكان موبيلها .. لا وكمان هيا سابت موبيلها مفتوح لحد ما انت توصلها وفي الاخر يزيد يجيبلك واحد يقولك ان سالي اللي دبرت الخطف .. دي كلها لعبه يزيد علشان تقرب من جميله .. وبكده خلصوا من سالي وفتحوا الطريق لجميله تقرب منك ..
فهد عقله بيراجع الاحداث كلها من تاني !! اتصال جميله بيه وهو مع يزيد ... سرعه يزيد علشان يحدد مكانها ... وصوله لها .. يزيد اصر ان فهد يمشي بسرعه بجميله قبل البوليس ولا فعلا مكنش فيه بوليس !! دماغه كلها اتلخبطت مبقاش عارف حاجه ولا فاهم حاجه... وكمان افتكر كلام يزيد اللي كل شويه يحاول يقنعه انه بيحب جميله وانها بتحبه
ميس : ده حتي نبيله اللي اكرمتها وحطتها في مستشفي من اكبر المستشفيات اتهمتني اني حبستها واتهمتني اني رميتها في دار مسنين .. انا كان ممكن ارميها في الشارع بس عملت بأصلي وراعيت ربنا فيها ياتري يزيد قالك اني عملت فيها ايه تاني ؟
يزيد فعلا حاول يقنعه ان ميس حبست نبيله ...وانها رشت الدكتور
فهد : قالي انك رشيتي الدكتور وفتحتيله مستشفي
ميس : طيب انت قابلت الدكتور ! سمعت منه اني انا فتحتله مستشفي بحالها ! سمعت منه يا فهد ولا سمعت من يزيد بس
يزيد : فهد انا ممكن اجيبلك الدكتور ده دلوقتي حالا
ميس : هتهدده ولا هترشيه !!
يزيد جه يتكلم بس خالد منعه : انت ما تتكلمش هنا .. انت اتكلمت كتير الدور علينا احنا نتكلم .. فهد كل اللي حواليك دول شله واحده وعصابة واحده كل واحد له دور
ميس : فعلا داخلوا مصممين علي اللعب علي الكل مرحموش حد .. جميله لعبت عليك واتخلصت من سالي خطيبتك .. يزيد بيلعب علي انه يخلص عليا ويهد ثقتك بيا .. صلاح لعب عليك وبعت بنته تلعب علي اسر وتسيطر عليه .. دكتور وليد بيلعب علي امل وحطها في جيبه
امل بصت لوليد اللي بيشاور بدماغه لأ وعنيه متعلقه بأمل
امل بدموع : لا وليد غيرهم
ميس : هو وليد بلغك ان فهد يكون ابن عمته ! صارحك يا حلوه بحقيقته ولا كنتي عاميه انتي كمان !
امل بتشاور بدماغها لأ
وليد : امل ما تصدقيش كلامهم وبعدين ده مكنش سري علشان اشاركك فيه
خالد : لما ما تعرفش انت مين واصلك ايه يبقي ازاي مش سرك ؟ لما تضحك عليها وتلعب بيها يبقي ازاي مش سرك ! انا لسه عارف بموضوعك من ميس ولو كنت عرفته بدري قسما بالله لكنت هبقي قتال قتله بجد وهتكون انت اول جريمه ارتكبها
ندي : اول جريمه !! امال حياتي اللي دمرتها دي مش جريمه ! ( بصت لفهد ) فهد اوعي تصدق اي حرف من كلامهم دول طول عمرهم بيكرهوا ابوك لانه انظف منهم كلهم
خالد : ندي !! انا مش هسمحلك تتمادي كتير
ندي : كفايه بقي يا خالد كفايه .. معدتش هستحمل اكتر من كده .. انت بتدمر الكل واولهم عيالك الاتنين هتدمرهم بانانيتك .. فهد فوق يا ابني
فهد مسك دماغه : كفايه بقي ... كفايه .. انتو عايزين مني ايه !
يزيد ومحي وميس وجميله كلهم نطقوا في نفس اللحظه : عايزينك تفوق
فهد بصلهم كلهم : افوق ؟؟ علي ايه ؟؟ مين كداب ومين صادق ؟ مين فيكم مهتم بيا انا بجد ! مين فيكم مش طمعان في منصبي ومركزي ! هاه !! ياه يا وليد نصّار قد ايه بكرهك ... ياريتك ما كنت ميت علشان اقف في وشك واقولك اني بكرهك ...
وليد بره عنيه دمعت ومش عارف يتصرف
وليد : انا لازم ادخل
اكرم : هيقتلوكم انتو الاتنين يا وليد
وليد : انت مش شايف ايه اللي بيحصل ؟
اكرم : معلش
جميله امه وقفت ومسكت دراعه : حبيبي ابوك كان بيحبك فوق ما تتخيل
زق ايدها بعيد وكأنها نار بتلمسه : بيحبني وعلشان كده سابني وسافر وراح اشتغل في التهريب !
جميله : ده كدبهم ... ابوك عمره ما اشتغل في التهريب ابدا دي كانت خطتهم علشان يخلصوا منه
فهد : ولما هما عايزين يخلصوا منه يقوم يكتب ثروته باسم ابنه علشان لو جراله حاجه يمسكوا في ابنه ! هو ده الحب ؟
جميله : كان بيأمنلك مستقبلك
فهد زعق : ملعون ابو الفلوس علي اللي عايزها
جميله : حبيبي
فهد مسكها من دراعها جامد : انا مش حبيبك ومش ابنك فاهمه !! اوعي تتخيلي للحظه اني هقبلك ..
وليد بره هيتجنن وقام خرج من العربيه واكرم جري وراه مسكه : اقف هنا
وليد : لا مش هتفرج اكتر من كده الواد ده لازم يفوق بقي
اكرم : يا وليد اصبر احنا كنا مخططين لده واهم نفذوا خطتنا بحذافيرها وهما اللي كشفوا الحقيقه بنفسهم وعرفوا فهد ان جميله امه خليهم بقي يكملوا
وليد : بس مش بالطريقه دي يا اكرم .. مش كده ابدا مش هسمح لوليد يغلط في جميله امه ابدا .. اوعي يا اكرم بقي
زقه ودخل جري علي الفيلا
فهد بيكمل كلامه لامه : اوعي تتخيلي اني هعتبرك في يوم امي !! امي هيا ستك ميس فاهمه !! هيا الهانم وانتي الخدامه واللي عملك قيمه واعتبار مات وغار في ستين داهيه فخدي كلابك دول واطلعي بره بيتي ( زعق جامد ) اطلعي بره وانتي ( بص لخطيبته ) دبلتك اهي مش قلتي ان دي اللي بتربطنا كان عندك حق فعلا( حدفها في وشها ) ما عدتش تلزمني... اطلعوا كلكم بره بيتي
هنا فهد اتفاجيء بحد بيشده وضربه بالقلم والقلم رن والكل وقف لما شافوا وليد قدامهم
وليد : مش لما يكون بيتك الاول تبقي تطرد منه .. بتطرد امك من البيت علشان ميس الكلب .. للاسف ميس ربتك وطلعتك كلب زيها ... يا ابن ميس
الكل مصدوم والكل في حاله ذهول ومحدش عارف ينطق اما فهد فصدمته اكبر من الكل
فهد : انت !!! انت مش ميت ؟؟
وليد : للاسف مش ميت ... مش ميت علشان اسمعك بتطرد امك وعيلتك من البيت علشان خاطر شويه كلاب .. كلاب محتاجه تتلم وانا هلمها كلها
( بصلهم كلهم وهما مش مصدقين ابدا انه عايش )
نبيله اول واحده نطقت : ابني ... وليد ابني اخيرا ظهرت .. اخيرا ظهرت يا وليد .. خلي كل التعابين دي تدخل جحورها
وليد بصلها وراح وطي تحت رجلها وضمها
وليد : ايوه اخيرا ظهرت يا ست الكل
ندي كمان جريت ورمت نفسها في حضنه وعيطت قوي : وليد وليد .. وليد انت عايش .. وليد اخويا ..( مره واحده بصتله ) وليد طلقني منه يا وليد .. مش عايزه افضل معاه وهاتلي عيالي منه واحميني منه
وليد ابتسم لاخته : ما تخافيش منه خلاص انا رجعت
محي : بقي انت عايش ... عايش وسايب ابنك لينا علي الرغم من اننا اعداءك ( بص لفهد ) مش بس امك اللي سابتك كمان ابوك
وليد زعق : اخرس يا محي .. حسابكم معايا عسير .. وبكره هيطلع اثبات اني علي قيد الحياه وعايش وكل املاكي هترجعلي والشركه بتاعتي وكلكم هتكونوا في الشارع .. وانت يا سي فهد زعلان اني كتبت كل حاجه باسمك .. ما تزعلش هاخد منك كل حاجه وانت لو ما اتلميتش هتبقي في الشارع
فهد : الشارع ارحم مليون مره منك .. انت ما تتخيلش انا بكرهك قد ايه انت وهيا .. بكرهكم كلكم
هنا جميله الصغيره صرخت : عمتوووووو
عماد و وليد جريوا عليها لانها اغمي عليها ووليد شالها
عماد : خرجها من هنا
وليد خارج وبصلهم : ارجع مالقيش حد فيكم في بيتي
اخد جميله وعيلتها ومشي واخدها علي المستشفي وقابلتهم ليلي اللي قالت انها اتعرضت لارهاق شديد نفسي وعصبي وانها المفروض تبعد عن الانفعال والا ممكن يحصلها انهيار عصبي بس ازاي تبعد وحياتها كلها متلخبطه كده ...
فهد كان مدبوح مش عارف يفكر او يعمل اي شيء قعد مكانه والكل حواليه
محي : وليد عايش .. تلاقيه كان مع جميله
ميس : كل ده سايب ابنه معقوله !
علاء : مش معقوله ليه ! ماهو سابك انتي مراته وحبيبته علشانها ما يسبش ابنه ليه !
سالي : فهد حبيبي اوعي تكون صدقت اني خطفت جميله انا معملتهاش هيا ويزيد دبروا الخطه دي علشان ياخدوك مني
محي : اهو كل حاجه اتكشفت ووضحت .. ابوك راجع وهينتقم من الكل حتي انت ابنه مش هيرحمك .. ابوك مهرب يا فهد وتلاقيه كان مستخبي في اي مكان لحد ما الحكم يسقط عليه هنا في مصر .. انت لازم تقف في وشه وتمنعه .. تمنع الكلاب دول يسيطروا علي الشركه وياخدوها مننا
خالد : شوفتوا ده حتي ندي مراتي عايزه تطلق مني .. كانت متجوزاني بس علشان احميها واول ما شافت اخوها رمتني انا .. عيله غريبه واهي دلوقتي راحتله ...
ميس : ده حتي نبيله طلعت بتتكلم ومش خرسه .. اكيد كانت عارفه انه عايش !! طول عمرها سوسه الوليه دي ... وانت يا فهد كنت مفكرني انا بخطط وبدبر .. الخطط اهي امك وابوك اللي بيدبروها ...
فهد وقف : انا مش عايز اسمع حاجه تانيه زياده ... بعد اذنكم ..
نبيله هنا طلعت من اوضتها : رايح فين يا فهد ! اوعي تكون مصدق كلمه من الكلام اللي بيقولوه ده .. دول سبق ونهشوا ابوك وجميله وهينهشوك لو سمحتلهم دول كلهم بيكدبوا عليك
فهد بصلها : وانتي مش بتكدبي ! ده انتي من كام ساعه بس كنتي خرسه ومشلوله ولا اه ده كان كله تمثيل
نبيله : لا مش تمثيل انا فعلا كنت خرسه ومشلوله من اخر جلطه جاتلي .. الجلطه اللي جاتلي من تأثير الادويه اللي الدكتور بيديهالي بناءا علي كلام ميس علشان تثبت اني مجنونه وتفضل حبساني .. ولولا انت عالجتني انت ودكتوره ليلي و دكتور وليد كان زماني لسه مشلوله
فهد : ولما خفيتي ما قولتيش ليه !
نبيله : وكان مين هيحميني من ميس ! انت يالي ما بتسمعش غير ليها ! دي لو قالتلك ارمي نفس في البحر بترمي وانت مغمض . انا كان لازم احمي نفسي منها ... ولعلمك انا اللي رجعت ابوك ولو كنت خرجت من بدري واتكلمت من بدري كنت رجعته من زمان لكن للاسف ميس كانت مكتفاني
الكل بصلها وعرفوا انها كانت غلطه انهم سمحوا لفهد يعالجها ...
محي : رجعتيه !! اممم لما الحكم سقط بتاع قضيه التهريب رجعتيه
نبيله : ابني مش مهرب يا محي وانت عارف دا كويس .. انت اللي هربت الشحنه وانت اللي موت مرات ابنك وحفيدك ولا نسيت ! واتهمت ابني فيها وراح علشان يثبت براءته قتلتوه او حاولتوا تقتلوه وكل ده علشان تكوشوا علي المجموعه
محي : انا !! اه صح تصدقي !! انا فعلا قتلت حفيدي !! صدقها يا فهد صدقها !! ولما انا قاتل بقي ليه ما قتلتش فهد هاه ! لما قتلت ابوه علشان المجموعه يبقي اقتل العيل اللي هيكبر ويورثها كلها .. رد انت يا فهد ليه ماقتلتكش وانت عيل ابن اربع سنين لا حول لك ولا قوه .. ليه سيبتك مع ميس وليه عطينا لميس حقها اللي ابوك اخده منها ! لما احنا وحشين قوي كده !
فهد : انا معدتش عايز اسمع حاجه منكم
نبيله : فهد انت لازم تقف وتسمع
فهد : انا مش عايز اسمع
كان خارج بس ميس وقفته : انت سايبني ورايح فين ؟
فهد وقف من غير ما يبصلها : عايزه مني ايه !
ميس : ابوك رجع يا فهد واول حد هينتقم منه انا !! مين هيحميني منه ان مكنش انت !!
فهد : ما تقلقيش هرجع بس محتاج اكون لوحدي شويه
سابهم ومشي مكنش عارف يروح فين او يروح لمين واكتشف انه وحيد ... فعلا وحيد معندوش اي حد .. افتكر انه بقي عنده جميله هتكون شريكته وحبيبته وتؤام روحه لكن كان غلطان .. هو كان عارف ان ميس وحشه بس علي الاقل كانت صريحه وواضحه .. مكدبتش عليه .. كانت بتكره جميله وقالت ده .. ادبت وليد واعترفت بده .. كانت واضحه لكن جميله خطيبته ازاي قدرت تضحك عليه ؟ ازاي خبت عنه كل ده ! ازاي هو فتحلها قلبه وشاركها في كل حاجه ! ده كان عنده استعداد يشاركها في عمره كله .. ازاي حبيبته عملت فيه كده ! حبيبته ؟؟ هي فعلا حبيبته ولا ده كمان كان جزء من خطتهم علشان يستولوا علي كل حاجه ! تمثل عليه الحب ولما يحبها تاخد كل حاجه وتخلص منه زي ما جميله امه عملت في وليد ...
غمض عنيه مش قادر يتحمل كل اللي حصل ولاول مره دموعه تنزل منه .. لاول مره يحس بالضعف والعجز .. كان وعد نفسه زمان انه مش هيضعف ومش هيحب ومش هيسمح لاي حد يدخل قلعته وحصن نفسه باسوار عاليه وعمل مسافه بينه وبين الكل .. عمره ما كان عنده صاحب او صديق او حبيب .. ازاي سمح لجميله تخترق اسواره ودفاعاته وليه استسلملها ؟ ليه حبها ؟ ليه سمحلها توجعه بالشكل ده ! ازاي اصلا سمح لقلبه يدق ؟؟؟ دي كانت غلطه واللي بيغلط بيتحمل غلطه ونتيجه غلطه هيا الوجع ده .. اللي بيحب لازم يتوجع ودي ضريبه الحب .. الوجع .. بس وجعه هو اضعاف مضاعفه وجع من الكل .. من اللي المفروض يكونوا اهله واقرب الناس ليه .. من امه وابوه وحبيبته .. وجع لا يمكن حد يتحمله ...
...................
وليد في المستشفي مع مراته جنبها ....
جميله بتعيط و وليد بيحاول يهديها
جميله : ابني يا وليد .. شوفت عملوا ايه ! قلبوا كل حاجه علينا !!
وليد : جميله حبيبتي اهدي ... انا كنت عارف انهم هيعملوا كده وكنت معتمد علي ده
جميله اتعدلت وبصتله : انت كنت عارف انهم هيدبحوا ابنك كده ... هيدمروا قلبه ويدمروا كل حاجه حلوه في حياته ؟ انت سمحت لده يحصل يا وليد ؟
وليد وقف : مش بالظبط كده !! بس كنت عارف انهم هيكشفوا الحقيقه وده اللي انا كنت عايزوا انهم يكشفوا بنفسهم ان انتي امه
جميله : وبعدين ! هاه ! ابنك ما فكرتش فيه
وليد زعق : فكرت يا جميله !! عارف انه هيتوجع بس هو كمان لازم يفوق .. هو لازم يعرفهم علي حقيقتهم
جميله : يعرفهم ازاي وهما قلبوا كل حاجه ! حتي يزيد خلوه يشك فيه ومش هيصدق منه حاجه تاني
وليد : هيعرف يا جميله .. ولسه وجعه ما خلصش وصدماته ما خلصتش .. الخطوات الباقيه كلها صعبه بس لازم يخطيها بنفسه
جميله : هيعمل ايه ! هاه ! بتخطط لايه تاني ! هتوجعه ازاي تاني !
وليد سرح : هتشوفي ... وجعه هو اللي هيحركه .. حبه هيحركه .. اتمني ان فهد يكون ذكي ويعرف يستغل وجعه ده صح ...
جميله فجأه : تعرف ان انت بقيت شبههم
وليد بصلها : شبههم ؟
جميله : ايوه شبههم .. لما تلعب بطريقتهم تبقي شبههم .. لما توجع اقرب الناس ليك تبقي شبههم .. لما تفكر بمنطق الغايه تبرر الوسيله تبقي نسخه منهم
وليد زعق هو كمان : سبق ولعبت علي نظافه وتعاملت بطريقتك .. طريقه الحب وطريقه تقابل السيئه بالحسنه بس كان التمن ايه ؟ عشرين سنه محبوس ميت دقت من العذاب الوان .. كنت بموت كل يوم ميت مره ... شفت العذاب الوان يا جميله وهما بيتهموني تهمه وري التانيه بسبب خالد .. جرايم معرفش عنها حاجه .. كان ده العدل هاه ! وانتي !! انتي اترميتي في السجن ولا نسيتي ! ابنك اتاخد من حضنك !! جوزك اتاخد من حضنك واترملتي وانتي في عز شبابك .. ولا نسيتي ؟ لازم اتغير ولازم العب بطريقتهم ولازم اكون بنفس حقارتهم والا هيقتلوني المرادي بجد انا وابنك ... ولا انتي مستعده تخسرينا من تاني ! مستعده لعشرين سنه فراق تانين بس يا تري العمر لسه فاضل فيه عشرين سنه تانين !! مستعده يا جميله ! ولا خلاص انا وابنك معدناش نفرق معاكي واكتفيتي باخوكي وعيالو !!
جميله عيطت : انت عارف ان الكلام ده مش صح ! مفيش شيء في الكون كله ممكن يعرضني عن ابني او عن جوزي
وليد : يبقي تسيبيني ارجع حقوقنا اللي ضاعت باي طريقه .. ابنك هيرجع لحضنك وده وعد مني ...
جميله حطت راسها بين ركبها وضمتهم بايديها وفضلت تعيط خوفا علي الاتنين يضيعوا منها .... وليد قعد جنبها وضمها كلها ..
وليد : ما تخافيش يا جميله .. ما تخافيش .. مش هيقدروا يأذوا حد فينا تاني .. وليد اللي قدامك دلوقتي مختلف تماما عن وليد بتاع زمان وزي ما انتي قلتي اني بقيت شبههم لاني دلوقتي بلعب بقوانينهم مش بقوانيني انا .. فما تخافيش
جميله رفعت دماغها : ينفع تروحني ؟
وليد : انتي تعبانه خليكي هنا الليله
جميله : علشان خاطري روحني بيت اخويا لازم كلنا نكون مع بعض .. وبعدين جميله كمان زمانها منهاره من اللي حصل لازم اكون معاها .. ( فجأه فكرت في فهد وعيطت ) فهد كمان اكيد منهار بس للاسف محدش جنبه ياخد بايده ومحدش جنبه يفهمه الصح والغلط !! ابنك لوحده يا وليد بيتألم ويتوجع لوحده
وليد : مش هيتوجع كتير ..
جميله : انت عارف مكانه !
وليد : ايوه عارف مكانه .. في حراسه عليه بيتابعوا حتي انفاسه ما تقلقيش ...
اخدها وروحوا بيتهم واول ما دخلت جميله جريت تعيط في حضنها
عماد بص لوليد : وبعدين !
وليد : ربنا يسهل
جميله قعدت في الصاله وحواليها عيال اخوها وليد وجميله اما جوزها نزل لاكرم
النهار طلع وجميله قاعده و وليد وجميله ناموا علي رجليها وهيا دموعها نازله بصمت واتمنت لو ابنها هو اللي علي رجليها وهيا تقعد جنبه تواسيه ..
جرس الباب ضرب فالكل اتعدل
جميله عمتهم : انا هفتح خليكم
وليد وقف : لا يا عمتو خليكي
وليد فتح واتفاجيء بفهد قدامه منظره يغني عن اي سؤال
فهد : ازيك يا .... يا ابن خالي
جميلتين اول ما سمعوا صوته وقفوا الاتنين
وليد : اهلا يا ابن عمتي اتفضل
فهد : لا معلش مش هدخل البيت ده تاني
وليد : امال جاي ليه !
فهد : عايز جميله في كلمتين
وليد : انهي جميله فيهم !
فهد بتريقه : والله ما اعرفش غير جميله واحده اللي كانت خطيبتي اما التانيه دي فاسمها بالنسبالي عايده عمتك وبس
امه طلعت : فهد ابني ادخل حبيبي انت لازم تفهمني وتسمعني
فهد : قلتلك امبارح انك مش امي وبعدين مفيش شيء في الدنيا يجبرني اسمع حرف واحد منك ( لمح جميله وراها فشاور عليها ) بس وعدتها اني اسمعها هيا وانا ما برجعش في وعودي
جميله طاقه امل اتفتحت قدامها
جميله خطيبته : طيب ادخل نتكلم ؟
فهد : اطلعي نتكلم مش هدخل
جميله بصت لعمتها ولاخوها فشاورولها تروح معاه
جميله طلعت وركبت جنبه العربيه بصمت ودي كانت اول مره تركب معاه بدون ما يفتحلها الباب ...
وقف فهد عند نفس المكان اللي بيقعدوا فيه كل مره .. علي النيل علي دكه علي الرصيف .. فهد نزل من العربيه وهيا نزلت قعدت جنبه بصمت مش عارفه تقول ايه او تبدأ منين ؟
فهد لما سكوتها طال فاتكلم بجمود : انا وعدتك اسمعك قبل ما احكم فاتكلمي
جميله : ابدأ منين واقول ايه !
فهد : ابدئي من اول يوم دخلتي فيه الشركه ! كنتي عارفه ساعتها انا مين !
جميله عيطت ف فهد اتنرفز : هتعيطي كل شويه هقوم امشي ومش هتشوفي وشي تاني انتي عايزه تتكلمي وعايزاني اسمعك فاتفضلي اتكلمي .. كنتي عارفه انا مين ساعتها ؟
جميله : كنت عارفه
فهد اتنهد علشان يحاول يسيطر علي اعصابه معاها .. كدبها كان من اول يوم
فهد : جيتي ليه تشتغلي عندي !
جميله اخدت نفس طويل وقررت تكون قويه زيه : علشان انتقم لعمتي واللي اتعمل فيها
فهد ابتسم : وانتقمتي ولا لسه ؟ اعتقد انتقمتي .. سالي وطردتيها وميس وانتصرتي عليها وانا و ...... انا ايه ! لعبتي بيا وخليتيني احبك ... مش دي الكلمه اللي كنتي عايزه تسمعيها مني .. اني بحبك !! هسمعهالك يا جميله وهرضي غرورك انا بحبك !! ( صوته كان مهزوز ) بحبك حب معرفتوش قبل كده ! بحبك حب بيوجعني جدا لدرجه اني مش قادر حتي اتنفس ... انتي اصلا اول حد احبه بالشكل ده ! انتي اول حد اسمحله يقرب مني بالشكل ده ... كده رضيت غرورك ؟ كده حققتي انتقامك ؟ اعتقد اه
جميله : فهد انا اه دخلت الشركه علشان انتقم منكم بس كمان علشان ارجع لعمتي ابنها ... عمتي ضحت كتير وعملت كتير علشانا فحاولت اردلها ولو جزء بسيط وعلشان كده دخلت الشركه .. كنت عايزه اكشفلك ميس واعمامك علي حقيقتهم .. انت مكنتش في دايره انتقامي اصلا انتي كنت ........ انت ابن عمتي ... انت حبيبي
فهد ابتسم : حبيبك ؟ حبيبك ؟ غريبه قوي الكلمه دي منك
جميله : حبيبي ولاخر يوم في عمري هفضل اقولها ... انت حبيبي
فهد : حبيبك ازاي ! واصدقك اصلا ازاي ؟ انتي بتكدبي من اول لحظه قابلتيني فيها ! وكدبك فضل مستمر لحد ما ميس اللي بتتكلمي عنها كشفتك ..
جميله : لو قلتلك اول يوم شفتني فيه اني بنت خالك كنت هتقبلني في الشركه !
فهد : لا مكنتش هقبلك بس كنت هحترمك وكنت هسمعك
جميله : تسمعني ؟ اذا كان انا حبيبتك ومش عايز تسمعني اه انت جاي وبتقول هتسمعني بس انت خلاص اصدرت قرارك وحكمك يا فهد
فهد اتنرفز : انا اهو بسمعك
جميله : بتسمعني بس من جواك واخد قرار ..
فهد وقف : يبقي قعدتنا دي تضيع وقت صح ؟
كان هيمشي بس جميله مسكت دراعه
جميله : انا لسه ما خلصتش كلامي .. ممكن تكون علاقتنا انتهت كاتنين مخطوبين لكن ما انتهتش كاولاد عم ودلوقتي هتسمعني ... ميس اللي انت مش بتقبل تسمع عنها كلمه حاولت تقتل ابوك قبل كده
قاطعها : عارف ده
جميله : قالتلك انها ادبته علشان حب جميله مراته ! ام ابنه ! قالتلك ان جميله طلبت منه يتنازل عنها وما رضيتش انها تتحبس .. بلاش كل ده .. قالتلك جميله كانت فين السنين دي كلها !
فهد : كانت بتصطاد حد تلعب عليه تاني
جميله : انت بجد مصدق ده ! انت عرفت جميله اكيد حكمت عليها بموضوعيه .. الشخصيه اللي انت عرفتها دي بتاعت مصالح او فلوس !
فهد : كانت بتلعب وتمثل عليا زيك بالظبط
جميله : لا دي هيا جميله ودي طبيعتها طيبه لدرجه انها امبارح اتخانقت مع وليد جوزها علشان كان قاسي عليك بعد ما انت غلطت فيها دي جميله ... وانا عمري ما مثلت عليك ابدا
فهد : ماشي ما بتمثلوش .. كانت فين اكتر من عشرين سنه؟
جميله : كانت محبوسه
فهد بصلها : محبوسه ؟
جميله : امال مين شال قضيه التهريب ! مش جميله اللي كانت وصيه عليك وفي حاله غياب وليد بقت هيا المسؤله فهيا اللي اتحبست وعلشان كده وافقت ان ميس تاخدك وتربيك لانها خافت عليك يقتلوك .. ومافكرتش غير فيك انت وانت كان امانك مع ميس لانها لو مش في صفك يبقي عدوتك وجميله بموت جوزها كانت قليله الحيله فوافقت تتنازل عنك لميس بس علشان تحميك
فهد باصصلها مش مصدق ولا كلمه : انتي عايزه تفهميني انها اتحبست عشرين سنه ؟
ردي ! هيا محبوسه من عشرين سنه ؟
جميله : لأ .. عملت تظلم واتحبست ٨ سنين
فهد ضحك : وهيا فين بقي الوقت ده كله ! ما رجعتش ليه تطالب بابنها ! ولا اقنعت نفسها بقي ان ده افضلي وزي الافلام العربي القديمه الحمضانه ان الواحد يبيع ابنه علشان مستقبل افضل ؟؟؟
جميله : اتريق براحتك .. ميس سفرتك بره ولا دي كمان ناسيها !! امك معرفتش توصلك .. فضلت سنه قدام فيلتكم قاعده علي الرصيف
فهد ببرود : وبعد السنه دي ؟
جميله : انت كنت بتتعلم بره يا فهد انت فضلت كلم سنه بره مصر ... وبعدين امي ماتت وبابا مكنش عارف يعمل ايه !
فهد بتريقه وضحكه : واختارت ساعتها انها تكون ام ليكي انتي واخوكي ونسيت ابنها .. تمام انا معنديش مانع .. وبما اني بحبك فأنا متنازل عن امي ليكي .. اشبعي بيها انتي واخوكي .. شوفتي بقي انا بحبك قد ايه !!
جميله بتهز دماغها : انت ازاي كده ؟
فهد : وانتي ازاي كده ! هاه ؟ ازاي قادره تقفي في وشي وتدافعي عنها كده ! ازاي واقفه بتغلطي في ميس اللي هيا ربتني ووقفت جنبي ! اوعي تتخيلي للحظه اني هقتنع بالهبل اللي بتقوليه ده ! لو جميله اتحبست و وليد اتحبس فده عقابا ليهم علي شغلهم في التهريب فيستاهلوا
جت تتكلم بس رفع ايده : سمعت منك بما فيه الكفايه ( بص في ساعته ) وقتك خلص اعتقد تعرفي تروحي لوحدك صح ؟؟؟
سابها وركب عربيته بس قبل ما يمشي
جميله : بكره هتعرف الحقيقه وهتندم ... هتندم يا فهد
فهد دور عربيته ومشي وجميله رجعت بيتها واول ما فتحت الباب ابوها جري عليها
عماد : انتي كويسه ؟
جميله بحزن : ايوه كويسه
وليد وجميله واقفين جنب بعض باصين لها بلهفه ومنتظرين كلمه منها : سمعني بس ما سمعش ولا كلمه .. عقله مقفول تماما علي ميس وبس
جميله قعدت مكانها ودموعها نزلت اما وليد فخارج
جميله : رايح فين يا وليد !
وليد : رايح لابنك
جميله بخوف : هتعمل ايه ؟
وليد بتوهان : Chaos ...
عماد : ايه دي؟
جميله بنته : معناها فوضي
جميله مراته وقفت : هتعمل ايه يا وليد فهمني ؟
وليد بصلها : هعمل فوضي يا جميله ومع الفوضي بتكتر الاخطاء ... بعد اذنك علشان ما اتأخرش علي فهد وامه ميس
وتصبحون على خير يارب
تكملة الرواية هناااااااااااااا
تابعونا علي قناة التليحرام من هنااااااااااا
ليصلكم اشعار بالنشر
الرواية كامله من البداية الجزء الاول من هناااااااااااا
الجزء الثاني هناااااااااا من البدايه
تعليقات
إرسال تعليق
فضلا اترك تعليق من هنا