سكريبت انا قرفت!!كامل وحصري لمدونة قصر الروايات
سكريبت انا قرفت!!كامل وحصري لمدونة قصر الروايات
-انا قرفت!!
رفع وشه من التليفون وقال ببرود:
-عايزة ايه يعني؟
دموعي نزلت واتكلمت بصوت مبحوح من الزعيق:
-انت هتفضل تعاملني كده لحد امتي!!
احنا بقالنا سنتين متجوزين وانت حتي صباح الخير مش بتقولها!
-و ده مدايقك في ايه؟
انتِ عارفة من الاول وراضية
قولتلك مبحبكيش قولتي ماشي، مش مشكلتي انك معندكيش كرامة!
زاعقت بأعلي صوتي:
-طــلــقـنــي!!
قام واتكلم بنفس البرود اللي مراحش من صوته:
-اعتقد اننا اتكلمنا في موضوع الطلاق ده قبل كده
بس شكلك مش بتفهمي بسهولة فهعيد تاني
انا مبطلقش!
بعدين خد تليفونه وطلع برا الشقة
وانا انهارت ع الارض
انا هنا، وده جوزي عُدي
انا وعُدي منقربش حاجة لبعض
مامته صاحبة ماما وبس
وللأسف مامته اختارتني اكون زوجة لأبنها الوحيد
وماما طبعا م صدقت ودبسونا في بعض
الفرق بيني وبين عُدي حاجة واحده، اني بحبه وهو لأ...
ماما مصاحبه مامته من حوالي 15 سنة، من وانا عندي 5 سنين وهو كان عنده 8
ودلوقتي انا بقيت 20 وهو 23
لما عُدي خرج فضلت اعيط كتير كالعادة، وقررت اني هبدأ اتعامل معاه زي م بيتعامل معايا
خدت بعضي وقومت احضر الغدا عشان بحب اطلع طاقتي في الطبخ
وعملت صينية مكرونة بالبشاميل وفراخ مشوية انما اييييه، تحفة
سمعت صوت الباب بيتفتح
وخطوات عُدي الهادية وهي جايه ناحية المطبخ
قولتله ببرود منغير ما الف واحضنه كالعادة:
-روح غيّر وتعالي كُل
-امم، ماشي
راح وانا حطيت الاكل علي الطربيزة
قعدت وبدأت آكل منغير م استناه كالعادة
جيه بعد شوية وبصلي باستغراب بعدين بدأ ياكل هو كمان
و علي عكس عادتي برضو منطقتش كلمه واحده واحنا بناكل
كان كل شوية يبصلي كأنه مستنيني اتكلم
بس لااااا، وربنا لطلع عليك المُر كله يبنالـ...
عدي يومين
وانا بقيت تتجاهله تماما
وطبعا قلبي بيتقطع بس عاملة نفسي جامدة
-عملتي الاكل؟
-اه، روح اغرف
-مش هتاكلي؟
-لأ
-تمام
بعد ساعات...
-هنا!
هنا اصحي
-ايه بقا
-انتِ نايمة ع الكنبة ليه؟
-وانت مالك؟
مش لما كنت بنام جنبك كنت بتفضل تقولي انتِ ملزقة؟
-ا..اه، تمام
عدت ايام كمان وانا لسه ع وضعي
-هنا
-همم؟
-النهاردة الأربع
-بعدين؟
-يعني نازل الشغل
لو عملتي زي كل اربع ولقيتك تحت منغير م تستأذني هجيبك من شعرك، سامعة؟
-ماشي ربنا يسهل
بصلي بقرف ونزل
هفهمكوا، انا كل يوم اربع بنزل اتمشي واشتري حاجات من وراه عشان عارفه انه هيرفض انزل
عشان كده بنزل من وراه وكل مره بيجيبني من قفايا
واني احَرم؟
ابدا
نزلت برضو
معرفش عدي وقت قد ايه وانا بلف في المحلات والشوارع
بس الشمس بدأت تغرب
فقررت اني اروح
كنت قدام طريق بيمشي في عربيات
مشيت عادي جدا
و وانا بعدي فجأة شوفت عربية جاية نايحيتي بسرعة جدا
اتجمدت مكاني وعيني وسعت
مقدرتش اتحرك
وفجأة...
حد زقني من ورا
اخر حاجة شوفتها كان راجل ماسك راسه وبتنزل دم
كان عُدي
اول ما استوعبت انه هو
اغمي عليا...
فتحت عيني بصعوبة بسبب النور
كنت قاعده علي سرير في مستشفى
حاولت افتكر ايه اللي حصل
وافتكرت!
خرجت جري من الاوضة وكنت بجري في الممرات منغير الطرحة حتي
عايزة اشوفه بس!
عايزة اتطمن عليه!
وصلت عند السكرتيرة
-جوزي!! جوزي فين!
-اهدي يا مدام، جوزك اسمه ايه؟
-عُدي احمد!
-اهو وراكِ
لفيت وبصيتله وهو جاي من بعيد وشكله متعصب وماسك جاكيت في ايده، وراسه كانت ملفوفه
جريت عليه باقصي سرعتي وحضنته جامد وانا بعيط
اول ما وصلت لحضنه حط الجاكيت بسرعة علي شعري وغطاه هو و وشي كله بعدين شدني اكتر لي
-اهدي
-ا...انا اسفة
-شششش، اهدي وتعالي نروح الاوضه
خدني وهو لسه مغطيني وروحنا الاوضه اللي كنت قاعده فيها
دخل وقفل الباب وراه وانا قعدت علي السرير وفضلت اعيط اكتر من الاول
-انا آسفة يا عُدي والله انا آسفة
فضل باصصلي بعتاب ومتكلمش فانا فضلت اعيط اكتر واكتر
قعد جنبي وشدني لحضنه
مسح علي شعري وقال بصوت هادي:
-اهدي ي حبيبي
-بس...بس انت...انت اتعورت بسببي!
-خلاص ي حبيبتي حصل خير
المهم انك بخير
-بس...بس انت...
قاطعني:
-اهدي بقا ي هنون انا كويس والله طالما انتِ كويسة
مسكت في التيشيرت بتاعه اكتر وهو قرب مني وطبطب علي ضهري
هو ايه الطيبة اللي نزلت عليه فجأة دي؟
لبست الطرحه وروحنا ركبنا عربيته عشان نروّح
-ع فكرة
بصيتله وقولت:
-ايه؟
-انا لسه متكلمتش ع موضوع انك مشيتي في المستشفى منغير طرحه ده عشان مراعي انك مش في افضل حالة
عيني بدأت تتملي دموع وانا لسه بصاله
بصلي بطرف عينه وهو بيسوق بعدين بص قدامه تاني ومسك ايدي بعدين قال:
-خلاص اهدي
-انت طيب ليه؟
ضحك وبانت ابتسامته العسل اللي وقعتني من الاول
-متتعوديش ع كده ها
-مستفز
ضحك اكتر وكمل سواقه
روّحنا وصلينا
ونمت علي الكنبة كالعادة
بصراحة معرفتش انام علشان كنت بفكر في طريقته الغريبة النهاردة
و وانا بفكر، فجأة حسيت بيه بيفرد جنبي
فتحت عيني وبصيتله باستغراب
-عايز ايه؟
-انام
-طب م تدخل جوا
-امم، لأ
-ليه؟
-الجو هنا احلي
-عُدي!
-نامي ي هنا
-مش هنام غير لما تقوم
-خلي قلبك طيب النهاردة
انا طالع من حادثـ*ـة ومش قادر
-م انت زي القرد اهو
مسك راسه وفضل يئن بتمثيل
وانا زي الهبلة صدقت
حطيت ايدي علي ايده اللي ع دماغه وقولت بقلق:
-انت كويس؟
وقليل الادب شدني لحضنه
-نامي بقا واسكتي
سكت فعلا ونمت
دخلت في غيبوبة حرفيا
اليوم اللي بعده صحيت قبله وحضرت الفطار
-صباح الخير...
-روح صلي الفجر ويلا عشان تفطر
اتنهد وراح اتوضي وصلي
ورجع بعد شوية وانا كنت بدأت اكل
-هتفضلي كده كتير؟
-كده ازاي يعني؟
-بتعامليني ببرود
-بعاملك زي م بتعاملني
-امم
كلنا واحنا ساكتين ولما خلصنا غسلت المواعين وروحت عشان اغيرله ع الجرح
قعدت جنبه وفكيت الشاش ببطء بعدين حطيتله مطهر وحطيت شاش جديد
-خلصت
-شكرا
-عفوا
قومت غسلت ايدي وبعدين دخلت اوضتي قعدت علي التليفون
وبعد شوية خرجت عشان اشرب
وانا بشرب افتكرت شكل الدم امبارح وانا عندي فوبيا من الدم
الكوباية وقعت من ايدي غصب عني ودوخت
ومعداش ثانية غير ولاقيت عُدي جاي جري عليا
-انتِ كويسة؟!
سندني وقعدت علي الكرسي
كنس الازاز من الارض وبعدين قعد جنبي
-في ايه ي هنا؟
-مافيش، افتكرت شكل الدم امبارح مش اكتر
مسح ع شعري وقال:
-خلاص بقا انسي متفكريش في الموضوع
-عُدي؟
-نعم
-انت بتتعامل معايا كده ليه؟
-مش فاهم؟
-بقيت حنين مره واحده ليه
بعد ما قولتها الضهر اذن
-هقولك بعدين
بس دلوقتي هروح اصلي
راح فعلا يصلي وانا كمان روحت اصلي
ولما خلصت لقيته قاعد في الصالة وماسك التليفون
-مش ناوي تقول؟
قولتها وانا بقعد جنبه
-اقول ايه؟
-انت بتعاملني بلُطف ليه؟
-عشان مراتي
-بس انت كنت بتعاملني وحش!
-انا مش فاضي للكلام ده ي هنا
-تمام
سيبته وروحت اوضتي
هو عنده انفصام؟
لأ بجد هو عنده انفصام؟
-بقولك
-نعم
-انا عايزة اخرج
-مش فاضي
-هتفضي امتي؟
-معرفش
-طب انا زهقت من قاعدة البيت!
-يبقي روحي عند مامتك
سيبته ودخلت اوضتي
بدأت الم حاجتي بكل هدوء
بعدين طلعت
-تعالي بقا وديني عند ماما
-تمام
نزلنا و وداني فعلا بالعربية
وقبل ما انزل قولتله:
-ورقة طلاقي توصلي
ولو برضو مُصر متطلقش عادي جدا
هخلعك
نزلت وقفلت الباب وطلعت بيت اهلي
-ايه ده؟
-ايه ي ماما؟
بنتك
بعدين ضحكت بسخرية وانا بدخل وقولت:
-بنتك ايه بس
اقصد الخدامــة اللي خلفتيها وسبتيهاش تاخد قرار واحد في حياتها
حتي لما جوزتيني
جوزتيني واحد انتِ عارفة انه مبيحبنيش، ولما رفضت علمتي ايه؟
فاكرة؟
انا هفكرك
ضربتــيني واجبرتيني اوافق عليه!
وحتي بعد م اتجوزت مسألتيش فيا
اتأملت تعابير الصدمة اللي كانت علي وشها وكملت:
-بس عامةً، انا هخلعه يا ماما
وانتِ مش هتقدري تمنعيني
دخلت اوضتي وقفلت الباب
وانا سامعاها بتزاعق وبتقول:
-تخلعي مييين
-انتِ عايزة تجيبيلي العاار
وكلام من الهبل ده كتير
غيرت هدومي بهدوء ونمت
عدت ايام
مسكت تليفوني
وعُدي مبعتليش ولا ماسيدج
ولا فكر يرن عليا حتي
اكيد، هتوقع ايه من واحد زيـ...ينهار اسود!!
-حرامـ...
كتم بوقي بايده وقال بهمس:
-اسكتي يخربيتك
انا عُدي!
-انت...انت ايه اللي جابك؟!
-جيت اجيب مراتي
-لأ مش مراتك وهخلعك ي عُدي
وبعدين انت دخلت من البلكونه ازاي؟!
قال وهو بيقعد جنبي علي السرير:
-اسرار مهنة ي حبيبي
ها بقا، قوليلي كنتِ بتقولي هتـ ايه؟
-هخلعك!
-ليه؟
-ليه؟!
ومش عارف ليه ي عُدي؟!
-قولي طيب
دموعي بدأت تنزل بغزارة وقولت:
-احنا بقالنا قد ايه متجوزين ي عُدي وانت بتعاملني بجفاء ومحسسني ان انا اللي جبرتك تتجوزني!
والمشكلة ان انا كمان مُجبرة عليك ولما عرفت انك مش بتحبني حاولت ارفض بس امي ضربتـ*ـني
فضلت اعيط اكتر وقولت وسط شهقاتي:
-ياريتني م حبيتك...ياريتني م حبيتك
شدني لحضنه في ثانية وقال:
-انا آسف، والله آسف حقك علي قلبي
انا غبي والله غبي
-ابعد عني!!
شدني اكتر لي وقال بصوت مهزوز:
-انا بحبك والله ي هنا
بحبك والله ي حبيبتي
زقيته وقولت بجمود:
-مشاعرك جت في وقت غلط ي عُدي
طلقني
لأول مرة، من وقت م اتجوزت عُدي
شوفت دموعه وهي بتنزل علي خده
-انا عمري ما فهمتك ي عُدي ولا عمري هفهمك
شوية تبقي حنين، وشوية اقسي عليا من امي
انت عمرك م عملت نص اللي امي بتعمله
بس سكوتك وبرودك لوحده بيخليني اتعذب
فتحت باب الاوضة بهدوء وقولت:
-اطلع ي عُدي
-هنا...
قاطعته:
-اطلع
مسح دموعه وطلع بخطوات تقيلة، بعدين لف وبصلي بنظرة عمري ما شوفتها في عيونه...نظرة حب!
-انا غلطت ي هنا، بس مش هقدر اطلقك
وطلع برا الشقه
منكرش اني قعدت اعيط
واعيط
واعيط
وكمان اعيط
بعد الموقف ده عدي شهر
وقررت اني ابدأ امشي في إجراءات الخُلع
كلمت محامي
بعدين نزلت اتمشي شوية عشان اهون ع نفسي
دخلت كافيه وطلبت ايس كوفي
وانا بدور ع طربيزة اقعد فيها لمحته قاعد علي طربيزة وقدامه قهوة سادة!
عُدي طبيعته انه بيتعب جدا من القهوة السادة وضغطه بيوطي
مقدرتش امنع نفسي وروحتله
كان سرحان وباصص علي الارض
-ي استاذ
رفع راسه وبصلي
ملامحه كانت شاحبه جدا
-انت بتتعب من القـ...
قبل ما اكمل لقيته وقع من علي الكرسي
-عُدي!!!
طبعا بمساعدة الناس اللي في الكافيه اتصلنا بالاسعاف وخدوه وانا روحت معاهم
كنت خايفة عليه جدا عشان عارفه انه بيتعب اوي من القهوة
وصلنا المستشفى والدكتور طمني عليه
فضلت طول اليوم جنبه
بتأمل في ملامحه
بفتكر كلامه معايا
طريقته الغريبة
مسكت ايده بهدوء، وبدأت اتكلم:
-كنت عايزة تفسير بس ي عُدي
ليه كنت بتعاملني شوية وحش، وشوية حلو
وليه كل مرة اسألك كنت بتتهرب!
دموعي نزلت غصب عني وغمضت عيني وبدأت اعيط بحرقه
-كنت خايف...
فتحت عيني ببطء وبصيتله
كان باصصلي بعيون كلها ندم
-كنت خايف ابينلك قد ايه انا بعشقك، وتسيبيني..
انا بخاف احب، بخاف يحصلي زي بابا، بابا اللي حب ماما طول عُمره وكان بيتمناها من سنين
وبعد م اتجوزها عيشها احسن ايام حياتها
وهي؟
عيشته اسوء ايام حياته لغاية م مـ*ـات مقهور ي هنا
خُفت ابينلك حبي وتعملي زي ماما
وبدأ يعيط بهستيريا
الدكتور دخل اداله مهدئ ونام
عُدي طلع قلبه مش قاسي
ولا بيكرهني
ولا بيحب غيري
عُدي طلع خايف
عنده تروما
وبيحبني بجد!
اتصلت بالمحامي خليته يلغي كل حاجة
وقررت اني افضل مع عُدي
قررت افضل مع حُبي الأول والأخير...
اليوم اللي بعده صحيت لقيته باصص عليا وهو قاعد علي السرير
-صباح الخير
-صباح النور
-عامل ايه دلوقتي؟
-بقيت احسن لما شوفتك..
ضحكت وقولتله:
-طب يلا شد حيلك بقا عشان نروّح
-حاضر
قام من علي السرير دخل حمام الاوضه وغيّر
وانا كنت بلبس الطرحة قدام مرايا صغيرة
خرج و قعد جنبي وفضل يبصلي بس
-باصصلي كده ليه؟
-اصلك...وحشتيني
ابتسمت وكملت اللي بعمله
-يلا انا خلصت
خرجنا وخدنا اذن عشان نخرج من المستشفى و وافقوا
وخدنا طبعا الطريق مشي عشان عربيته مش موجود
-هنا
-نعم
-انا آسف
-مش وقت اعتذار
اقفل كل اللي فات
روحت لبيت اهلي لميت هدومي وطلعت
كان عُدي قاعد علي الكنبة وماما قاعده قصاده
بصيتلي بقرف وقالت:
-علي الله اشوف وشك هِنا تاني ي هنا
واقسم بالله لو زعلتي جوزك هـ...
عُدي اتكلم بحدة:
-اعتقد ان ده بيتها وهي تيجي في اي وقت هي عايزاه
وكمان انا اللي كنت مزعلها ي طنط فمش لازم التهديدات اللي ملهاش لازمه دي
وحتي لو هي اللي مزعلاني انا اللي هاجي اصالحها وابوس راسها وحضرتك مالكيش الحق تتدخلي في اي حاجة بينا طالما هنا مقالتلكيش حاجة
بعدين بصلي وقال:
-يلا ي هنا
طلعنا من الشقة وروحنا لبيتنا اخيرا
غيّرت وطلعت عشان احضر الاكل
-بتعملي ايه ي هنا؟
-بعمل الاكل
شد ايدي وقال:
-مش عايز اكل
-اومال؟
-عايز اقعد معاكِ
-طب ايه رأيك اعمل فشار ونشغل فيلم؟
-حلو ده
عملت الفشار وفتحنا الكنبة عشان تبقي زي السرير
حاوطني بايده وبدأنا نتفرج علي الفيلم
-يابني ركز في الفيلم بقا
-اركز فيه ازاي وانا جنبي حد بالجمال ده
-عُدي!
-قلب عُدي
-انا بحبك
-وانا بعشقك والله
عدت ايام وانا وعُدي علاقتنا بقت حلوه جدا جدا
وبقينا عايشين كأزواج فعلا
-كتكوتي
-قلب كتكوتك
قعدت جنبه بملل وبدأت اتكلم:
-انا زهقانة
-طب يلا نخرج
-لأ مش قادرة
-طب عايزة نعمل ايه؟
-انا خايفة اوي
-ليه؟
-من الولاده
-متخافيش ي حبيبتي هتعدي باذن الله
-انا بكرهك
-حبيبتي ربنا يكرمك
-بس بحبك اوي
-وانا بموت فيكِ
-عُدي!
-قلبه
-انا قرفت
-ليه ي حبيبي
-طلقني
-حاضر
-انت عايز تخلص مني!!
-لأ والله مقدرش
بدأت اعيط وقولت:
-كداااب
-والله ابدا
-عُدي!!
قال بملل:
-قلبه
-انا بولد!!
-ينهار اسود!!
-عُدي!
-ايه كمااان
-طلقنييييي!!
-تمت-
تعليقات
إرسال تعليق
فضلا اترك تعليق من هنا