سكريبت كامل وحصري لمدونة قصر الروايات
سكريبت كامل وحصري لمدونة قصر الروايات
_ جرا ايه يا بطل هنفضل في تالتة ثانوي دي كتير ولا ايه!
بصيتله من تحت لفوق وانا شايلة الكتب
وبعدل النضارة
_ خدي بالك انتي انا اقل من ٤٠ في المية مش هجوزك
_ لا والله .. تمام.
جري ووقف قدامي
_ على فكرة كارمك .. واسألي على تنسيقي برا
_ عضلات قلبك مقوياك مش كدا
رفع عضلات دراعه قدامي وهو فاتح زراير القميص وبيغمزلي!
_ الچيم واضح .. وعهد الله ١٥٠ جنيه حلال
_ بقولك ايه.. متوقفنيش تاني عشان مش فضيالك
مشيت واديته ضهري وسمعته وهو بيقول
_ كل الدعم يا أول جمهورية
بصيت على الشارع في زهول ومديت في خطواتي.
يا رب ما يكون حد خد باله من المتخLف دا
روحت الدرس وقعدت في مكاني وانا مستنياه يدخل
ياسين
زميلي في الدراسة وأول حد أعجب بيه والوحيد.
دخل بعدي بشوية وابتسم للمستر وقعد وهو مش مهتم لوجودي
كالعادة!
فضلت بصاله طول الحصة لحد ما المستر سألني ومعرفتش أجاوب فـ الكل بدأ يهمس ويضحك لأن السؤال كان تافهه
حتى ياسين!
طلعت بعيط في الشارع
وعلى اول شارعنا لمحت عزيز واقف وماسك في واحد
اما شافني بعيط سابه وجري عليا
_ مالك يا ست الحُسن ايه الي معيطك !
_ وانت مالك خليك في حالك
حاولت ابعده عن طريقي لكن جسمه العريض وقف قصادي
منعني من الحركة.
_ لو مادة مضايقاكي قولي
استفزتني الجملة والفضول خلاني امسح دموعي واركز معاه
_ هتعمل ايه! هتبلطج على المادة زي ما بتعمل مع أي حد!
ابتسم وعدى الجملة وقرب راسه
_ لا نلغوها لاجل عيونك .. احنا عاوزين ننول الرضا
بصيت في عنيه لحظة
وسيبته ومشيت.
تاني يوم عديت عليه لقيته لسه بيفتح الورشة بتاعته وبيبتسملي
صوت عزيز حلو بيصحى عليه رجالة الحي
وبنات الحي
بنات الحي الي بيقفوا في البلكونات يصتادوا نظرات ليه وهو قالع التيشيرت ولابس فانلة كات!
خلاص يا عزيز دا انت دافع ١٥٠ جنيه جداً.
_ رمشك خطفني من صحابي وانا واد صياد
عملت نفسي واقفة بشتري ساندوتش فول من عم صبحي الي جمبه.
لقيته بيبتسم ونغزة وشه بتبان
_ لفيت بلاد وبلاد
مديت ايدي بالفلوس لعم صبحي
_ هات ساندوتش يا عم صبحي
_ اوماله يا ست البنات
وعيني راحت ناحيته وهو لسه محافظ على ضحكته البشوشة وبيرفع الحاجة وبيحطها برا الورشة
_ اتاريكي ساكنة النحيادي يا سلام يا ولاد
صوته حلو
بشوش .. ضحكته مميزة بتزينها نغزة لطيفة في جانب وشه اليمين
عينه عسلية بتضوي مع الشمس بلون بيحوي بغروبها
وشعره دايماً متبهدل بنشارة الخشب الصبح
وتراب لعب الكورة في النادي بليل
بس رغم دا عشوائيته محببة للعين والقلب!
عزيز التهامي ابن عباس التهامي أكبر تاجر أثاث في الحسين.
_ اديني ساندوتش انا كمان يا عم صبحي
قالها وهو بيبتسم وبيقرب ناحيتي اما انا عدلت النضارة وبصيت قدامي
_ الا البطل رايح على فين بدري كدا ؟
_ وانت مالك ؟
_ لوحدك !
_ هو ايه الي لوحدي!
_ رايحة " انت مالك " دي لوحدك .. دي خطر
وغمز وهو بيقرب اكتر
_ انا ممكن اجي معاكي على فكرة انا ابن بلد بردو وافهم في الأصول.
شديت الساندوتش وبصيتله بقرف اما هو ركن على العربية وبصلي
_ من امتا والحلو بياكل فول!
برقت وانا لسه مدياله ضهري
حتى عدم أكلي للفول واخد باله منه!
وقال وصوته بيضحك بغرور.
_ زودلي شطة يا عم صبحي
روحت الدرس وقعدت ورا
لقيت ياسين جاي عليا من بعيد .. عدلت الطرحة بسرعة وبصيت ناحيته
_ قاعدة هنا ليه .. دا مش مكانك
_ انت واخد بالك من مكاني!
_ طبعاً .. انا واخد بالي منك من زمان اصلا
ابتسمت بساذجة وانا مش مصدقة الي بيقوله
_ وراكي حاجة بعد الدرس ؟
_ لأ
قولتها بسرعة وانا بلغي كل الترتيبات الي ورايا انهردا والمذاكرة الي عليا.
اتفقنا اننا هنخرج سوا بعد الدرس وفعلاً خرجت معاه وقضينا اليوم سوا وانا مش مصدقة نفسي
_ يااااه الوقت سرقني انا لازم اروح ! هقول لماما ايه
_ عادي .. قوليلها كنتي بتذاكري عند واحدة صاحبتك
_ ايوه .. فعلا.. ياسين شكرا على اليوم الجميل دا
ابتسم
_ ليلى بقولك .. في امتحان انجلش الاسبوع الجاي وانا الحقيقية مذاكرتوش ممكن تقعدي جمبي و....
قبل ما يكمل كنت موافقة
وروحت
_ كنتي فين!
_ كنت فـ.... ايه دا !!!!! وانت مالك اصلا !
_ راجة الساعة عشرة من درس طلعاله من سبعة الصبح!
_ انت ازاي تكلمني كدا .. انت اصلا مين!
_ كنتي فين يا ليلى!
_ خليك في حالك يا عزيز .. واعرف انت مين وانا مين
_ قصدك ايه بالكلام دا
_ بالظبط .. الي في دماغك
قلتها وسيبته ومشيت
روحت وقولت لماما زي ما ياسين اتفق معايا بالظبط
ودخلت الاوضة كلمته طول الليل
تاني يوم الصبح كنت ماشية جمب الورشة مشفتوش!
مفيش اغاني .. الجو هادي .. حتى عم صبحي مش مشغل الراديو زي عادته.
استغربت لكن مهتمتش .. عدلت الطرحة
انهردا هقابل ياسين .. دا المهم
وكالعادة بعد كل درس بدأت تكتر مقابلتنا
وبدأت ابعد عن الدراسة واحدة واحدة لحد ما في يوم واجهته وكان بعد امتحان الفيزيا الي كالعادة غششته كله
وبعد ما الوقت خلص كنت بدأت الحق اكتب لنفسي اي حاجة لكن الورقة اتسحبت.
_ ياسين! ... انت ملاحظ انك مخبيني
رد ببرود _ دا الي هو ازاي يعني
_ مش عايز حد يعرف اننا نعرف بعض ولا مرتبطين
_ مرتبطين!!!!!
ضحك بسخرية
_ مرتبطين دا ايه يا حبيبتي .. هو اي واحدة اخرجلي معاها يومين تقولي مرتبط بيها .. دا انا على كدا مرتبط بالمدرسة كلها!
_ قصدك ايه!
_ قصدي ان امتحان الفيزيا دا كان سهل اوي .. خسارة انك مش هتجيبي فيه حاجة.
وسابني ومشي
رجعت اعيط بردو في الشارع
ومشيت .. عيني جات على الورشة ولمحته فيها
أخيراً بعد أكتر من اسبوع!
دخلت الورشة لقيته لف وبصلي من غير اي رد فعل
قربت منه .. وقفت قصاده
ولقيتني برمي نفسي في حضنه
حسيت بجسمه وهو بيتنفض وبعدها حسيت بهول العملة الي عملتها
بعدت عنه وانا بأستغفر وببصله وانا مكسوفة
_ انا اسفة .. بجد اسفة
وانا برجع خبطت في كرسي خشب كان بيتعمل فمسكت معصمي بألم.
ووراها مسكه هو كمان.
_ اهدي .. اهدي
مسك رباط ضغط كان لافه على ايده ولفه على معصمي.
_ متقلقيش دي مجرد كدمة بسيطة اما تروحي حطي مرهم وغيري الرباط.
اتنهد
_ في ايه ؟
لقيت نفسي بحكيله كل حاجة من اول ما عرفت ياسين لحد الي حصل
_ انا مش هقدر اساعدك
_ انا عارفة انك شايل مني يا عزيز
سكت وبص بعيد
_ انا بس جيتلك عشان معنديش حد احكيله وكنت فاهمة انك...
ركز معايا وفي الجملة الي كنت هقولها.
_ اني ايه!
_ مش مهم
مسحت دموعي وقومت
_ انا اسفة عطلتك عن شغلك.
وقومت من مكاني وسيبته ودخلت العمارة بتاعتنا.
عدا يوم والتاني والتالت وأسبوع كامل مبروحش فيه دروس.
وبعد الأسبوع ما خلص وقررت ارجع لحياتي
لقيت عزيز واقف ساند على تربيزة خشب بيشتغل عليها وبيقرب
_ اتفضلي
_ ايه دا ؟
_ دا شوال .. عشان تجيبي ياسين والفيزيا والثانوية كلها فيه
ضحكت وانا ببص لملامح وشه الجادة والس مقدرش يحافظ عليها وابتسم وهو بيغمزلي
سيبته ومشيت وروحت الدرس
واتعودت بعدها اشوفه بيبصلي باهتمام
اجري اقوله درجاتي كلها في كل المواد
ويوصلني لو مكان الدرس بعيد او لما ياخدنا انا وهو الكلام.
وعدت فترة الثانوية العامة
وجات لحظة النتيجة.
سمعنا صوت الزغاريد من كل حته حوالينا
ونزلت انا لقيته واقف على اول البوابة بتاعتنا
عيني دمعت وبدأت اعيط
قعد جمبي على السلم
_ ايوه بردو ايه الي مزعلك انك جبتي ٥٩
_ اروح بيها فين
_ بيتي
بصيتله وانا مش مصدقة انه بيهزر في الموقف دا
لقيته بيقرب
_ انتي مش محتاجة تنسيق عشان تخشي دا
ومسك ايدي وحطها على قلبه
_ مش وقت محن يا عزيز الله يعمر بيتك
_ نا .. بيتنا ... وبيت الخمساتشر عيل بتوعنا
_ ليه داخل الالومبيات بيهم ولا ايه
_ صحيح .. مبادرة تحديد النسل .. نخليهم اربعتاشر
_ اربعتاشر اه
_ والخميتاشر يجي في الوقت الضايع
_ وقت ضايع اه
_ ياااااه .. هيبقوا شبهي وشبهك .. شبهي وشبهك ايه بقا دول خمستاشر .. بصي هيبقوا شبه شجرة العيلة كلها
_ مفيش فايدة
ضحك وهو بيقوم وبيقعد قصادي وبيجلس على وضعية القرفصاء
_ بقولك ايه ؟ .. انتي عارفة ان مفيش كليات قمة مش كدا
مسحت دموعي _ لأ في
شال النضارة من على عيني وبصلي وعينه بتلمع بحب.
_ لو في حاجة قمة هنا .. فهم عنيكي قمة في الجمال الحقيقة
_ عزيز!
_ ماما قاعدة فوق مش كدا !
_ انت رايح فين انت مجنون؟
_ هي تلاقيها عايزة ترميكي في الشارع دلوقتي .. فبيتي أولى بيكي.
_ عزيز!
رجع السلمتين الي طلعها وهو لسه محافظ على نظرته وعينه الي بتلمع من اول ما عرفته.
_ قلب عزيز، اؤمرني امر .. دا احنا عايزين ننول الرضا.
__________________________
تعليقات
إرسال تعليق
فضلا اترك تعليق من هنا