سكريبت اتغيرتي اوي!! كامل رووووعه وحصري بقلمى قصر الروايات
سكريبت اتغيرتي اوي!! كامل رووووعه وحصري بقلمى قصر الروايات
-اتغيرتي اوي!!
=انت شايف كدا؟!!
-مش عارف اشوف غير كدا
"لفيت وشي بعيد عنه وانا غضب الدنيا كلها جوايا جاي بعد السنين دي يقول ان انا بردو الي اتغيرت انما هو ملاك "
=تمام تصبح ع خير
-هدى انا بكلمك استني
"بصتله بخنقة والدموع اتجمعت ف عيني ، انا ذنبي اي ذنبي اي ف خناقات انا مليش علاقة بيها ، ذنبي اي ابعد عن اقرب انسان ليا ف الدنيا كلها ، ذنبنا اي نروح ف الرجلين ، بس... انا الي دايما متمسكه انما هو ... هو باع "
=قول ي سليم عاوز تقول اي تاني
-انتي بطلتي تحبيني ؟!!
"سأل السؤال دا بطريقة خلتني ارتبكت ، انا اه معدتش بحبه بس انا ليه جسمي ارتجف كدا لمجرد انه سألني "
-ردي عليا
= هو انا كنت بحبك ف الاول عشان ابطل احبك اصلا انت شكل بعدك عن هنا دمر خلايا الذاكرة عندك
"قولت كلامي ولفيت وشي ومشيت لكن لقيته فجأه شدني ليه "
=انت اتجننت ابعد ي سليم بدل والله العظيم هفوقك بقلم ع وشك
"قولت كلامي بعصبيه وانا بحاول افلت ايدي من ايديه الي ماسكها جامد "
- انتِ لسه بتحبيني ي هدى
= اي القرف الي بتقوله دا ابعد بق عني ارحمني ، انت بعدت بدون كلام شيلتني من حياتك كأني كنت كيس شيبسي خلصته ورميت ورقته ، بعدت عني انا.. عن هدى اقرب حد ليك ... او اه صح انا بس الي كنت مفكرة كدا ، انا الي كنت شايفه اني اقرب حد ليك زي م انت اقرب حد ليا ، بس انا بأنب نفسي كل يوم ع تفكيري دا ، انت عارف انا حصلي اي وانت مش موجود ، عارف مريت ب اي ، عارف تعبت اد اي وانا بلوم نفسي ع حاجة مليش ذنب فيها ، عارف دماغي كانت بتفكر ازاي وبتلومني وتعذبني كل يوم عن اليوم الي قبله ، م ترددد
قولت جملتي الاخيرة بصريخ وانا دموعي مغرقة وشي
شديت ايدي منه بسرعه وطلعت ع اوضتي
بكييت ... بكييت كتير اوي ، ع كل حاجه وهو ... كان كل حاجه او...مازال كل حاجه
قضيت ليله من اسوأ الليالي الي عشتها ف حياتي ، سابني لسبب تافه زيه وزي امه م هي السبب هي السبب ف كل حاجه انا معرفش خالو اتجوز الحربوقة دي ازاي ، بس انا مليش ذنب والله ، وهو كمان ملوش ذنب ، بس الفرق بينا .. انا كنت بحاول بكل طاقتي ارجع علاقتنا تبقى كويسة تاني انما هو كان م صدق اننا بعدنا
نمت بتعب وانا بفتكر ذكرياتي كلها معاه انا قضيت طفولتي كلها معاه انا الصغيرة بتاع العيله حتى بين اخواتي ، كنت انا وهو اخر العنقود بتوع العيله الفرق بينا تلات سنين ، ف مكنش ليا غيره كل العيله كبار واحنا بس الصغيرين ، لعبنا... ضحكنا ... هزارنا ...حتى رخامتنا ...وازعاجنا كنا سوا وبنقلب البيت ، بس وصلنا لنقطه متمنتش ف يوم اني اوصلها معاه هو بالذات ، اه كنت بحبه من صغري مكنتش بشوف غيره اخويا وصاحبي وحبيبي اخواتي كانو اتجوزوا وكذلك اخواته ومفيش غيرنا وللاسف...اعترفت ليه ، كنا اطفال عادي يعني ، بس لما كبرت فهمت انه مكنش ينفع و واحده واحده ابتديت مفكرش فيه كحبيب بل كأخ وكان شعور احلى بكتير ولما وصلت للنقطة دي.... بعدنا
دمعة نزلت من عيني وانا بفتكر اخر مقابلة بينا وهو مسافر ، كانت مرات خالو دخلتني ف مشكله انا مليش ذنب فيها وحصل خناق بس هو سافر واحنا متصالحين لكن بعد كدا ايقنت اني ... مكنش ليا مكان م البداية
عدى تلات سنين ي سليم ، تلات سنين احساسي بالذنب اني ممكن اكون سبب ف الي حصل بينا بينهش ف قلبي كل يوم عن الي قبله ، تلات سنين كان نفسي احكيلك فيهم اي الي حصلي وازاي كنت محتاجالك جنبي ، تلات سنين بقنع نفسي فيهم اني ... بطلت احبك ، بس انا حتى مش عارفة طبيعة مشاعري ناحيتك عامله ازاي
نمت وانا جوايا حزن كبير اوي واتمنيت ان كل دا يطلع كابوس وافوق بق
تاني يوم
=صباح الخير
الكل قال صباح النور
كانو كلهم موجودين انا بايتة مع تيته عشان ماما وبابا بيعملوا عمره لسوء حظي سفرهم جه وقت غلط واخواتي كمان معاهم للاسف
قعدت وانا بتلاشى نظراته ليا
امه اتكلمت : عامله ي هدهد مرتاحه هنا
= اكيد مرتاحة دا انا قاعده مع تيته وجدو وخالو حبيبي اعتقد مفيش حاجه اجمل ولا احلى ولا مريحة اكتر من كدا
قولت كدا باستفزاز
خالو رد بحب : والله ي دودي لو م كان الواد سليم جه كنت خدتك تقعدي معانا فوق
= عادي ي حبيبي نخليه هو ينزل يبات مع تيته وانا طلع ابات فوق
امه بصتلي بضيق ف ابتسمت ببرود وابتديت افطر
كنت بتكلم مع جدو وببصله عيني جت ف عين سليم فضلنا باصين لبعض فترة حسيت الزمن وقف وكأن عنينا بتاعتب بعضها عينيا كانت بتقول حاجات كتيرة و الاهم عيون سليم الي مليانه ندم وحزن
= الحمدلله شبعت
قولت كدا وانا بقف بسرعه وعملت اني بمسح وشي ومسحت عيني الي دموعها نزلت غصب عني
تيته بقلق : اي ي حبيبتي مكلتيش ليه
= الحمدلله شبعت والله ي تيته
تيته : دا انتي مكملتيش رغيف عيش
-تلاقيني سديت نفسها ي تيته
قالها وهو بيبصلي بحزن
= السفر خلاك بتفهم والله
قولتها ببرود وانا ببصله وبعدها استاذنت وطلعت اقعد ع السطح شغلت اغنية عبالي
"تتذكر لما كنا اصحاب لما كنا نسهر تحت نجوم الليل
تذكر اديش كنا قراب نقضي كل الوقت ع درج البيت
اااااااااااه
ترجع الايام ي الله شو عبالي
عيد الي كان لو ليله من الليالي"
سرحت وانا بفتكر يوم م كنا سهرانين وانا وهو واخواتنا وف الاخر صفصفت علينا احنا التلاته انا و هو و بنت خالته الي اصغر منه بسنتين مبطيقهاش وهو كذلك لانها بت رخمة ، كنا بناكل مصاصات كنت بقول نفسي فمصاصه قالي عاوزه قولتله ايوة راح اشترا تلاته وقولتله ع الطعم الي بحبه وصورنا المصاصات يومها فضلنا سهرانين بنتكلم ونهزر كان بيتكلم عن البنت الي بيحبها كالعاده ، السهره مخلتش من مناقرتنا وبعدين شغل اغاني قولتله ع الاغاني الي انا عايزاها رفض وبعدها زنيت قالي حاضر وجابها كانت اغنيه لتامر حسني " عمري ابتدى " كنت بسمعها وكل شوية اخطف نظرات عليه واحنا بنضحك بنت خالته باباها جه خدها واحنا كملنا سهرتنا سوا وبقيت العيله طلعوا قعدوا معانا
دموعي نزلت حطيت ايدي ع قلبي الي وجعني اوي وقعدت اعيط
-مالك في اي انتي كويسه
قالها بخضه وجه جنبي بسرعه بيبص عليا بقلق
زقيت ايديه بقوة
=كويسة طول م انت بعيد
انتبه للاغنيه
-واضح
=انت عاوز اي
قولتها بزعيق وانا بفصل الاغنيه
-وطي صوتك
=مش هوطيه ولو عاوز صوتي يوطى متظهرش قدامي بق انت اي ي اخي عاوز اي
-عاوز اعتذرلك
ضحكت بسخرية وانا ببصله وعيوني كلها عتاب
=كبيت عليا كوباية الشاي ولا المصاصة بتاعك لزقت ف هدومي وسختها ؟!! امشي ي سليم ، سافر ، ارجع مكان م جيت ، كمل حياتك زي م كنت
-حياتي ناقصة من غيرك
=كدااااب اخرسسس
قولتها بصريخ وعياط
=اخرس متكدبش انا الي استحملت تلات سنين من غيرك ، استحملت تصرفات امك معايا الي زي الزفت ، استحملت كدبها عليك وصدقتها وكدبتني ، استحملت تبعد وانت عارف انا متعلقة بيك اد اي ، استحملت تشوفني تعمل نفسك مش شايفني ، استحملت كل دا ، وانت ولا على بالك ولا على بالك البني ادمة الي مكانتش بتطمن غير وانت موجود مكانتش بتعمل حاجه من غيرك ،البني ادمه الي انت كنت كل حياتها ، وانت كنت عايش حياتك عادي جدا ف متجيش تقولي حياتك ناقصه من غيري لان مفيش حد ناقص غير امك
قولت كلامي دا وبعدها تعبت .. تعبت اوي واغميي عليا
-هدى هدى فوقي
رفع راسي ع مخده وراح جاب ميه من الاوضة الي ع السطح وابتدى بفوقني
-هدى انتي شايفاني
=س.سي. سليم
خدي ف حضنه وفضل يعيط
-حقك عليا انا اسف والله حقك ع قلبي ، سامحيني ي هدى بالله عليك انا اسف ، انا كنت بتعذب من غيرك والله كنت بتعذب ، انتي كنت اقرب حد ليا من صغرنا وكنت بتكلم ع حبيبتي الاولى عشان اضايقك مش اكتر لكن انا بحبك انتي
ف اللحظة دي حاولت اتمالك نفسي واخرج من حضنه
بعدت عنه شوية بحاول استوعب الي قاله
-انا فعلا بحبك ، بعدي الفترة دي كان عشان كدا عشان انا بحبك
=كداب
-والله م بكدب عليك ي هدى انا فعلا بحبك
=الي يحب مبيجرحش وان جرح يبقى حبه ملوش لازمة
قولت كلامي و وقفت جنب سور السطح وانا بتفرج ع الناس الي ف الشارع
-انتي ليه بتعامليني كدا انا سليم صاحبك و حبيبك
=معدش منه الكلام دا روح شوف غيري ي سليم عشان انا معدتش حمل تعب قلب اكتر من كدا ياريتني سافرت مع بابا وماما
-للدرجادي معدتيش طيقاني ؟!
=للدرجادي كنت محتاجاك وملقتكش ، متقوليش الظروف وغصب عنك عشان مخبطش راسك ف السور ودا الي نفسي اعمله
ضحك بحزن وهو بيتنهد
-كان نفسي اعرف الي حصلك والي بيحصلك بس ماما حلفت عليا ان كلمتك لا هبقى ابنها ولا تعرفه
ضحكت جامد بسخربة عليه
=والبيه طبعا سمع الكلام ، والله ي سليم لو مكنتش عامله حساب لخالو ل كنت همسك امك دي اطلع عينها انا معرفش هي حاطة نقرها من نقري ليه
-عشان عارفة اني بحبك
سكت وجسمي اتنفض لما سمعت الكلمه دي منه اول مره احسه بيقولها بصدق كدا عيونه عمرها م كدبت عليا انا بالذات بس .... معدش ينفع
=انا اسفه مش هقدر ابادلك المشاعر دي
-هحاول عشانك
=في حاجات كدا لما مبتجيش ف وقتها بتبقى ملهاش لازمة
-هخلي ماما تعتذرلك حقك عليا
=انا مش طالبة غير اننا نبقى كويسين امك ملهاش لازمة ف حياتي اصلا لو كلمتني هخلي خالة يطلقها انا مش طيقاها اصلا
ضحكنا احنا الاتنين ، من واحنا صغيرين ومرات خالو بتتراخم عليا دايما وهو كان دايما يزعق معاها عشاني وكنت اقعد اقوله هخلي خالو يطلقها
=منستش حاجه اهو اومال ي ابن سيدة كنت بتتعامل زي امك كدا ايه
- كنت بهرب منك
اتخضيت م الكلمة هو انا آكلة لحوم البشر ولا اي
-كنت عارف اني بحبك بس عارف ان ماما مش هتهنيني بحبي ليك ف سافرت
=سافرت وسبتني معاها تررازي فيا ، تعرف ان من يوم م مشيت وانا مبحتكش بيها خالص عشان بفتكرك وبتخانق معاها امك كيادة ي سُلُم
ضحكنا احنا الاتنين وبعدها رجعت لضيقي تاني
=عمري م هنسى انك حطتني ف موقف كنت اتمنى الموت ولا اني اتحط فيه ، مش هنسى انك هربت وسبتني اواجه كل حاجه لوحدي ... كلام امك وتلقيحها وتصرفاتها المستفزة ، وقدام ماما وخالو ملاك برئ ،اوقات بحس انها لازم تطلق بجد ، مش هنسى انك معبرتنيش مع اني عارفة ان اخباري بتوصلك ، عرفت اني تعبت ، عرفت ان انتكست بعد م مشيت وكنت نفسيا و جسديا زي الزفت وف المقابل .... مسألتش ، معتقدش اني ممكن انسى كل دا ، زي لما معرفتش انسى ذكرياتنا الي كنا عاملينها سوا ، عارف جملة "خاصمت الشوارع الي مشينا فيها عشان يهدى بالي وارتاح م الآلام " انا فعلا عملت كدا ، كل مكان روحناه سوا ، كل مكان عملنا فيه ذكرى بعدت عنه ، حتى هنا عند تيته مكنتش بقعد ف البلكونه ابدا ، لحد م بقيت كويسة
-لحد م بطلتي تحبيني؟!!
=افهمها زي م تفهمها معادتش فارقة كدا كدا في عريس متقدم وبابا موافق عليه وكذلك ماما وانا لسه هتقابل معاه والمقابلة انهارده
قولت كدا وسيبته ونزلت ، سيبته ف صدمته ، هو ازاي فاكر اني لسه البت العببطه الي بتحبه حتى لو انا .... منستش
بعد المغرب لقيت باب اوضتي بيخبط
= ادخلي ي تيته
-انا سليم
=ثواني
لبست الاسدال وفتحت الباب
=في حاجه ولا اي ي سليم
-اه تعالي ع السطح
= انا بجهز مش هينفع اطلع وبعدين عريسي زمانه جاي انت عبيط ؟!!
-هدى انا مبهزرش
قال كدا بعصبيه انا عارفة سببها كويس اوي
=اولا صوتك يوطى ، ثانيا اطلع البس عشان هتقابل الناس مع جدو وخالو لان اخواتي مش هنا وانت عارف انهم ف السعودية مفيش هنا غيرك انت وهادي اخوك وزمانه جاي م الشغل اجهزوا وابقوا اندهولي
لقيت الي زقني ودخل الاوضه وقفل بالمفتاح
= انت اي الي بتعمله دا انت اتجننت ي سليم
-ايوة اتجننت ، اتجننت لما فكرت اسيبك ، اتجننت لما دوست ع قلبي ومشيت ، اتجننت اما مدافعتش عنك قدام امي ، اتجننت لما فضلت تلات سنين اعرف اخبارك من تيته وخايف اكلمك ، اتجننت لما مديتش اهتمام لحبي زمان عشان عارف ان ماما مش بتحبك ولا انتي بتحبيها ، اه اتجننت ي هدى
قال كلامه بزعيق وصوت عالي
لقينا الباب بيخبط
تيته بقلق : هدى.. سليم ... مالكو افتحي ي هدى
-مش هفتح ي تيته ولا هي هتقابل العريس
تيته بزعيق : ولد اي الي بتقوله دا سيب اختك تلبس واطلع يلا بره وازاي اصلا تدخل وتقفل كدا
-مش هخرج ي تيتة
قالها بزعيق ودموعه نزلت وقعد ع الارض وحط وشه بين كفوفه وفضل يعيط
-انا اسف حقك عليا والله بس متسيبينيش انا بحبك ي هدى والله بحبك اوي انا عارف اني غلطت ف حقك بس متعمليش فيا و ف قلبي كدا هحاول بكل الطرق اخليكي ترجعي تحبيني بس متسيبينيش
تيته : اي الي بتقوله دا ي سليم قولتلك سيب اختك واخرج الناس ع وصول
مهتمش لكلامها ورفع وشه ليا وشه كان احمر وعيونه حمرا اثر عياطه
انا ف حياتي كلها مشوفتوش بيعيط اصلا بس امبارح وانهاردة عيط كتير اوي طلع عنده دم
-متسيبنيش انا مليش غيرك ، هاخدك ونسافر نعيش بعيد عن ماما ، هبعدك عن اي حاجه تعبتك والله بس متسبينيش
بصتله بحزن ، لو كان جه من سنه ونص فاتو كان ممكن اوافق بس دلوقتي مش هقدر ولا هعرف ، بصتله تاني واتكلمت بهدوء
= بص ي سليم دلوقتي انا مفيش ف ايدي حاجه اعملها غير اني اقابل الناس الي جايه وجدو ادى كلمه ليهم بعدين نبقى نحل الي بينا
-ارفضيه
قال جملته برجاء
طبطبت ع كتفه يهدوء
=الي فيه الخير يقدمه ربنا يلا سيبني بق اغير هدومي وبعدين تيته قلقانه بره عيب كدا
قام خرج وتيته زعقتله وانا دخلت غسلت وشي ورجعت اوضتي عشان اجهز وكلام سليم بيدور ف بالي
بعد العشا الباب خبط
=ادخل
كان هادي ابن خالي الكبير اتكلم بحب
=مش يلا ي عروستنا ولا اي
ابتسمت بخجل
اتكلم بغيرة : تحطي وشك ف الارض متبصلوش انا بعرفك اهو معندناش بنات تبص ف عين رجاله غريبة وتقعدي بعيد عنه انا هبقى واقف براقبكوا كدا اي وضع مش هيعجبني هدخل اموته
ضحكت بخفه ، هادي اسم ع مسمى فعلا شخصيته جد وفيه هدوء مش طبيعي بس معايا دايما معاملته مختلفه بيقول دايما انه بيعتبرني بنته نظرا لل ١٥ سنه الي بينا ، رجالة العيله غيورين بطريقة مش طبيعية بس دي من اجمل المميزات
=عيب عليك دا انا تربيتك ي دؤدؤ
ضحكنا احنا الاتنين وخرجنا
خرجت لقيت سليم بيزغرلي ف بصيت لهادي وقولت بهمس
=اخوك هيولع فيا
رد عليا بنفس الهمس : يتفلق ي دودي
ابتسمنا وسلمت ع الموجودين وقعدت جنب مامة العريس
مامة العريس : ي زين م اخترت ي حسام زي القمر ي حبيبي ربنا يتمم ع خير يارب
=شكرا ي طنط
قولتها بخجل وانا تكه وهعيط مبحبش المواقف دي
عيون سليم متشالتش من عليا وعمال يزغرلي
جدو بابتسامه: طب نسيب العرسان سوا
وقامو اتنقلو للصاله وسليم دخل البلكونه الي ف الريسبشن الي احنا فيه
وعينه عليا لاني قاعده ع الكرسي الي ف وش البلكونه
حسام اتكلم : اخبارك اي
=بخير الحمدلله
كنت حاطة وشي ف الارض انا مرتبكة وسليم عينيه معايا وواقفلي حسيت اني هعيط ف ندهت ع هادي وجه ع طول
هادي بقلق : اي ي حبيبتي مالك
خليته يوطي وقولتله ف ودنه
=خلي اخوك يطلع م البلكونه انا حاسه اني محاصرة وهعيط ي هادي هو مش بيريح نفسه ليه
بص لسليم لقى العصبيه باينه عليه ودموعه خانته ونزلت هادي بصله بمعنى يخرج لكنه رفض
هادي اتكلم بهدوء : اي رايكوا تتنقلوا البلكونه التانيه دي هواها تحفه واهو تعرفوا تتكلموا
ارتحت لما عمل كدا وفعلا اتنقلنا البلكونه التانيه
فضل يعرف عن نفسه والكلام المعروف ف الرؤية الشرعية قعدنا حوالي ساعه وبعدها استأذن ومشي كانو اهلوا مشيوا من فترة
حسيت اني مرتاحه هو شخصية محترمه وعارف ربنا قولت هصلي استخارة والي فيه الخير يقدمه ربنا
غيرت هدومي وقعدنا نتعشى كلنا ولكن سليم مكنس موجود
جدو بتساؤل : اومال سليم فين ي هادي
ردت امه برخامة : طلع يقابل خطيبته ي حج
جد بصدمة : خطيبته ؟!! اي الي بتقوليه دا ي سيده
رد عماد بضيق : متاخدش ف بالك ي بابا
كل دا وانا وهادي بنبص لبعض بصدمه
تيته بقلق : مين خطيبته دي سيده
ردت امه باستفزاز : ربهام بنت اختي م انتي عارفة بق انه بيحبها من وهو صغير
انا وهادي بصينا لبعض بصدمة
سليم مبيطيقهاش دي بت ملزقة ورخمه
اتكلم خالو وهو بيزعق : انا ابني مستحيل يخطبها وبعدين خطيبته اي ، هو خطبها من ورانا يعني
اتكلمت باستفزاز : لا انا اتكلمت مع سماح اختي وهي موافقة ف هنروح نخطبها
تيته : حفيدي هيخطب البنت الي هو عاوزها محدش هيجبره ع حاجه
حسيت القعدة بقت وحشه اوي هي اتجننت دي ولا اي
=شبعت الحمدلله
اتكلمت ببرود : اي ي حبيبتي مستحملتيش تسمعي باقي الحكاية عشان لسه بتحبيه
= انتي بتكلميني انا ؟!!
اتكلم خالو بعصبيه : انتي شكلك اتجننتي ي سيدة
ردت هي بصوت عالي : لا متجننتش ي عماد بنت اختك بتحب ابنك
=لا دا انتي شكلك اتجننتي بجد بق ، انا سكتلك زمان من تلات سنين لما اتبليتي عليا وطلعتيني غلطانة قدام الكل ومقدرتش ارد عملتي تفرقة بينا عشان تفكيرك المريض انما والله م هسمحلك بدا المره دي وان عملتي حاجه لسليم هو مس عاوزها والله العظيم م حد هيقفلك غيري انتي فاهمه
قولت كلامي بعصبيه وسيبتهم وطلعت ع السطح
كنت رايحة جايه وعماله ازعق ع السطح
=دي اتجننت يعني مكفهاش زمان مكفهاش السنين الي انا وابنها اتعذبنا فيهم لا جايه تكمل يارب يارب ارحمنا منها ومن شهها
-اي مدايقك كدا
اتخضيت من انه موجود هنا ولكن روحت عليه بسرعه بقلق
= انت كويس ؟ حد ضايقك ؟ الحرباية امك دي زعلتك ؟
ضحك جامد ع كلامي
=م انت زيها خسارة فيك قلقي والله
وبعدها بصتله وضحكنا
-كل مره اضايقك تقوليلي كدا
=امك محتاجه تتعالج ي ابني اقنعها بكدا عشان مطلعش جناني عليها
-اي الي مضايقك كدا هي زعقت ولا اي
اتنهدت بحزن وحكيلته الي حصل
‐مين عارفني اكتر حد
بصتله بحزن
-ايوة انتي وهل انتي عارفة عني اني ممكن اوافق ع البت الرخمة دي ؟
ضحكت بغُلب ، مهما حصل اسلوبه مش هيتغير
-م تكرفي للعريس وتاخديني انا ..انا احلى ، وبعدين ملناش غير بعض
بصتله بتفكير وكنت رسمت الخطه
=تعالى معايا
-ع فين
= قوم بس
خدته ونزلنا تحت
= جدو في موضوع عاوزين نكلمك فيه انا وسليم
كلهم بصولي بترقب ومعاهم سليم
=سليم بيحب هنا صاحبتي وواخد معاد من باباها انا نسيت اقولكوا
هادي بصلي وكتم ضحكته لانه فاهم اني بكدا ضربت عصفورين وبومة بحجره واحده
جدو : صاحبتك الي بتجيلك هنا دي ي حبيبتي
= ايوة ي جدو
جدو بابتسامه : دول ناس محترمه جدا ي عماد
عماد : وطالما ابني عاوزها ف انا موافق لو كدا نروح نتقدم ي حبيبي
سليم يعيني كان عمال يبصلنا كلنا بصدمة وانا و هادي ماسكين ضحكنا بالعافية والحرباية امه تقريبا داخله ع شلل
تيته بحب : كبرتوا ي حبايبي وبقيتوا عرسان
امه اتكلمت : وانا مش موافقة
اخيرا سليم اتكلم : بس انا موافق وانا الي هعيش معاها ي ماما مش حضرتك والبنت فعلا جميلة ومحترمه ف هنروح نتقدم بكرة وانا كدا كدا واخد معاد من باباها انهاردة الصبح ونسيت ابلغكوا عشان عريس هدى
فرحت انه كمل اللعبة معايا وفرحت اكتر انه هيحل عني او ... شكله هيطلع عيني لما نبقى لوحدنا
الدنيا هدت اخيرا دخلت اوضتي ولقيت موبايلي بيرن ببص لقيته هادي
اتكلمت بضحك
=كنت متاكدة انه انت
هادي بضحك : انا اصلا لقيتك جيباه ونازلة قولت ربنا يستر بس عجبتيني والله
= قولتلك تربيتك بق المهم دلوقتي سليم هينفخني
رد بهزار : هخليه ميموتكيش متقلقيش
ضحكنا احنا الاتنين
اتكلم بجدية : انا عارف ان سليم بيحبك ي هدى ، بيحبك من زمان
=اممم
كمل كلامه : سليم جبان وانتي العكس تماما
= والمطلوب ي هادي اعمل اي
اتكلم بضحك : هتعملي اي اكتر م الي عملتيه بس والله عجبني
=كان لازم اسكت امك عشان ميجيليش انا سكتة قلبية انا معرفش هي بتموت فيا كدا ليه
اتكلم بهدوء : فكك منها المهم انك عملتي الصح ي دودو وانا مبسوط بالي انتي عملتيه اي نعم صدمه حتى ع سليم بس دي الحاجه الوحيده الي هتفوقه
=ياريت يفوق
اتكلم بحنية : انتو الاتنين ولادي ولو كنت شايف ان حاجه من الي حصلت دي هتإذيكوا كنت رفضتها ، متفكريش كتير يلا ونامي ي دودو تصبحي ع خير
= وانت من اهل الخير
قفلت معاه وحسيت براحة كبيرة اخيرا
سمعت خبطت ف بلكونه اوضتي ، قومت اشوف اي بفتح لقيت سليم لسه هصرخ حط ايديه ع بوقي
-شششش اسكتي اياك تصرخي
هزيت راسي بالموافقة وهو شال ايديه وقفل البلكونه وقعد ع سريري
=قوم ي بابا من هنا وبعدين اي الي جابك اصلا مش عيب كدا ي ابو الرجوله
-بقولك اي انا بحبك وانتي بتحبيني ليه الافلام دي
رديت بكذب وضيق
=ي ابني افهم انا اصلا صليت استخارة وارتحت وهبلغهم رايي بكرة وهعمل خطوبتي انت لسه عايش ف زمان
قام بسرعه من ع السرير
-انتي بتقولي اي ؟!!!
= الي سمعته ي سولي
-انا مشيت معاك ف التمثيليه الغبية الي عملتيها دي عشان امي تسكت لكن انا مش هتجوز غيرك ي هدى
= يبقى هتبور ي قلب هدى
بصلي بحزن
اتنهدت بصوت عالي
=ي سليم افهم احنا مينفعش نكون لبعض الاوقات كانت عكس بعضها الظروف مسمحتش وانت جيتلي متاخر وانا جيتلك بدري التوقيت مكنش ف صالحنا ف خلاص انساني انا عارفة انك قوي وهتنساني زي م نسيت الي قبلي
-انتي شايفة كدا ؟!
= دا الصح ي سليم عشاني وعشانك دا الاصلح لينا وبعدين انت احلى اخ ف الدنيا
-متقوليش الكلمة دي انا بكرهها
قالها بعصبيه ف اتخضيت
-ي هدى انا بحبك افهميني بق افهميني
= يمكن كنت افهمك زمان لكن دلوقتي مينفعش ، امشي ي سليم انا عاوزة انام
-نامي هو انا ماسكك
= متعصبنيس اخرج
- حبيت اوضتك فجاه م تنامي ي قلبي
غمزلي وقتها ف زغرتله
= والله هنده لتيته وهتبقى فضيحتك بجلاجل
-م دا الي انا عاوزه عشان يخلوني اتجوزك بق
= اه يا سافل
خبطته بالمخده ف وشه جامد ع غفلة
- ي غدارة
= يلا ي سليم بجد عاوزو انام
اتكلمت بهدوء وتعب لاني كنت هموت و انام اليوم كان طويل فعلا
-قوليلي انك بتحبيني
=ي ابني همد ايدي عليك
-يلا ي دودي مش هخرج غير لما تقوليها
= يبقى اشبع بالاوضة هروح انام ف الاوضة التانيه
جيت اخرج شدني ليه كنت قريبة منه اوي الفاصل بينا كام سم بس ، عيونا اتقابلو عيونه الي مصره تهز كياني ف كل مره اشوفها
بعدت عيني
=سيبني ي سليم عيب كدا
-بصي ف عيني وقولي انك مبتحبنيش ومش عاوزاني وانا اوعدك اني مش هضايقك تاني وهتقدم لهنا و مش هفكر فيكي تاني غير انك اختي
اترددت ، خوفت ، انا بقول دايما اني نسيته وبعتبره اخويا ، هو سابني ومشي سابني لدماغي الي سوحتني اول لقاء لينا بعد م المفروض نسيت ، اول مواجهه ، اول مره اواجه نفسي فعلا نسيته ولا لا
-مبتبصيش ليه ولا خايفة
=اطلع بره
-هعلي صوتي وهصحيهم كلهم لو معملتيش الي انا عاوزه انجزي
بصتله حطيت عيني ف عينيه معرفتش اتكلم
-اتكلمي سامعك
= ليه سبتني
قولتها بدون وعي ودموعي نزلوا
-انا بحبك اديني فرصة واحده فرصة واحده والله هكون ادها
=لا انت متستاهلش تاخد فرصة انا اديتك بدل الفرصة الف وانت رميتهم
-انا اتغيرت اتغيرت ي هدى وبحبك
=كداب والله كداب
-والله بحبك
=سبتني ليه سبتني ليه وانا مليش غيرك سبتني وانت عارف اني بتنيل بحبك سبتني وسط صراع وندم سبتني ومشيت وهربت عشان جبان انا تعبت اوي تعبت وانت مهتمتش سبتني وسط تساؤلاتي وحزني وتعبي سبتني ليه ومشيت وانا بحبك
- بت..اي
=بتزفت بحبك انا كنت فاكرة اني نسيت كنت فاكرة اني اتخطيت بس مكنتش اعرف اني لما هشوفك هرجع افكر فيك تاني مكنتش اعرف والله مكنتش اعرف ان قلبي هيفضل متعلق بيك ي غبي
صحيت من نومي وانا دموعي ع خدي يااااه كان حلم طويل اوي وحلو اوي بس الواقع مش موجود
تيته : صباح الخير ي حبيبتي
=صباح النور ي تيته
تيته : يلا عشان تفطري
= حاضر
هادي : صباح الخير ي دودي عامله اي
= الحمدلله اومال سليم فين
هادي باستغراب : سليم مش هييجي دلوقتي ي حبيبتي لسه ف السفر وبعدين في خبر تحفه
ف اللحظة دي اتاكدت اني فعلا كنت بحلم ليييه بجد ، كان حلم حلو حلو اوي ياريتني م صحيت
= هغسل وشي واجي
دخلت الحمام سمحت لدموعي تنزل وانا بفتكر الحلم سليم كان متغير اوي كان بيحبني اخيرا غسلت وشي وحاوات ابان طبيعيه وخرجت
هادي : سليم خطب بنت في فرنسا هي مصرية وطلع جدو وبابا عارفينها وبعد شهرين هيرجعوا عشان يعملوا الخطوبه هنا ، هو اتقدم واهلها وافقوا ف قلت اقولك ي حبيبتي
سكت شوية
= مبروك باركله بالنيابة عني
هادب : ليه م تباركيله ي دودو
= حاضر
قعدت افطر وانا بالي مش فيا خلصت اكل ودخلت اوضتي
طلعت النوت بتاعي وانا دموعي سبقاني وكتبت ف اول
"هل انتهت قصتنا قبل ان تبدأ؟!!
لقد كنت اعلم النهاية منذ البداية لكن....عزّ عليّ الطريق
لقد كنت معلقا بين اشياء لن تعود مره اخرى ،وتبقى معاناتي الدائمة....ان ذاكرتي لا تعرف النسيان"
اتنهدت وانا بكتب اخر سطر
"لو كنت أعلم أن الحلم يجمعنا لأغمضت طول الدهر أجفاني
تمت
تعليقات
إرسال تعليق
فضلا اترك تعليق من هنا