رواية عاجر الفصل السادس والاربعون 46بقلــم الكاتبـــة زينب ماجد (حصريه في مدونة قصر الروايات)

رواية عاجر الفصل السادس والاربعون 46بقلــم الكاتبـــة زينب ماجد  (حصريه في مدونة قصر الروايات)

رواية عاجر الفصل السادس والاربعون 46بقلــم الكاتبـــة زينب ماجد  (حصريه في مدونة قصر الروايات)

#عاجر

{ بقلم الكاتبة زينب ماجد } 

الحلقة_ ٤٦ 

نزلي 

نزل من السيارة 

ومشى بيه لكاتب عدل واخذ مستمسكاتي وكض سرا واني مشوشة ومصدومة بفعله .. سواها واتكاتبنا ع البيت وسوا تنازل .. 

طلعنا من كاتب عدل اشترالي عصير بالباب اني بعدني صافنة : زين هسه شنو يعني

-بعد يمج انت شتريدين بس اطلب منج طلب !؟

-شنو ؟ 

-الموضوع هذا يبقى بيني وبينج سر محد يدري بيه . 

-موضوع البيت 

-اي اني امنج على حلالي واتنازلت حتى تامنين وتستقرين بس لو احد سمع هالموضوع .. راح تصير هوسة وحجي هواي ما راح اتحمله وتسويلنا مشاكل فخلي بيناتنا . 

هزيت راسي ، حجه : جوعانة 

- رايدة ارجع للبيت كبل كلشي 

-لازم نعقد ، بس كبلها لازم ابلغ عمج 

- سوي اللي تشوفه وخلي نخلصه اني ما بيه حيل افكر كلش تعبانة 

- دمشي لعد .. 

خذاني للسيارة واشترالي لفة معلاك وعصير من الشارع ومشى بيه اني كمت اكل واكله : موضوع امل شنو 

اندارلي : شبيه ؟ 

- يعني ناوي ترجعها لو شنو موضوعها 

- لا استشرعت بالموضوع كالي الشيخ مو لعب هذا طلاك اتذكر واحكم ويا نفسك كم مرة طلكتها طلاك شرعي صحيح ورجعتها .. اروح اجذب على روحي هذا ثالث طلاك شرعي ويشهود ..

-يعني بعد ما يصير 

-دربي ودربها ما يلتقي بعد هي شافت حياتها واني جزت روحي منها وشكثر ما حاولت اصلح ما كدرت اتحملها ولا اتحمل اسلوب حياتها فخلينا هيج كل واحد بدربه . وجهالي كبروا مو مثل كبل واحتاجها .. علي صار شاب شواربه خطن و دنيا بفرحة الزهرة عرسها بس سجاد وهي رادته يمها وماخذته .. واني قررت اكمل حياتي وياج ما طابتلي مرة غيرج هالحطيت حالي ومالي بيدج حتى يمشي مركبنا ونتعلم من اغلاطنا ونعيش صح ونتعدا الفات 

- بس خلي بمعلومك ارجعلك بس اهلك كلهم بخويطهم اني ما اطبلهم ولا امشيلهم من جبيرهم لحد زغيرهم .. فاتحة عرس شيصير .. لا يطبون بيتي ولا اطبنهم اهلك ما يحبوني امك الكلت هاه زينة وامنتها تاليتها كلبت عليه وهجمت بيتي فما اريد اي بسر منهم 

- هذا احسن حل قاطعيهم كلهم وسدي بابج وعيشي يومج ابيتج . 

- كبل هذا كله اني عندي شي لازم اتفق عليه وياك كبل كلشي 

- جهال اخوج 

-اي ، شلون عرفت 

ابتسمت 

حجه : حاسب حساب تحطيهم بركبتي وما عندي مانع اذا هالشي يونسج ويخليج تحسينهم ظناج وجهالج خليهم ويانا ما عدي مانع هم يتامى شذنبهم وينشمرون 

- اي والبيت يتغير 

باوعلي : شلون ؟ 

- الدرج البرا ينلغي ويرجع ينفتح الدرج الداخلي .. غرفتي تصير فوك والمطبخ الفوك ينلغي ويصير غرفة لجهال اخوتي ويصير كله بيت واحد 

- كلش مشتاق لترتبيج وتدقيقج بهالامور الفترة الفاتت كلش اتبهذلت خلصتها نايم بالاستقبال .. رايد البيت يترتب من جديد وادخل ارتاح بيه مو اجي اكره روحي بيه .. فشنو اللي اتريدينه كليلي بس لازم تصبرين عليه شوية تحت ايدي بس ٤ ملايين ما راح يكفن غير غرفتج واثاثها 

- ماشي 

وصلاني لباب بيت عمي .. نزل هو وعمي كاعد بالدكان .. 

شافني وياه كام على حيله .. طلع حازم سلم عليه هو بسع كال : شعدج وياه ولج 

حازم : السلام حجي حتى نبدي بالكلام 

- يا كلام 

- المرة مرتي ورايد ارجعها لذمتي 

- مالك مرة عدنا حويزم هد المرة وامش 

- ليش وعلى اي اساس 

- جزاة الفضيحة الفضحتها النا مالك مرة ، تاخذها هسه خاطر شهر تحي واحد راكبها وتصيح بتكم كو*** فوتي جوا بسع 

- لا حجي اصبر المرة راح تمشي وياي واني جاي ابلغك 

- تبلغني شنو البت بتنا وما نطيها 

- دامها بتك امس من طردتها سالت عنها وين نامت ؟ 

- خذاها اخوها بس هي الساقطة الشردت من بيت اخوها 

- واجت عندي وتفاهمنا واتفقنا .. وقررنا نرجع 

- الحجي هذا ما يتم بينك وبينها وانت ابن شيوخ وعشاير وتعرف الاصول مثل ما طلكتها كدام الناس وبكعدة زلم وسودت وجوهنا .. يجون عمامك ونحجي بالموضوع 

عمي حقاه بسالفة العشاير .. 

كاله : اذا ع العشاير سهلة اجيبلك زلم وسيد ونعقد يمك 

دخلت لبيت عمي وحازم راح 

شو هذا عمي خابر على حيدر يكله : تعاي شوف اختك تعال .. كايدة حازم وجاية جانت بايتة يمه وجايتني تكلي اريد نرجع . 

واجاني يكلي ؛ اتباتين يمه ولج ؟ اتسودين وجوهنا 

وعلي ما اردج ولا انسكر رجليج اليوم بس اصبريلنا . 

صعدت فوك  هم زين الله يوسف ما موجود .. 

حبست روحي بغرفة جهاله وسديت الباب ، اجا حيدر يعربد ويصيح ويهادد ويريدني انزل 

اجتني هدى .. ما رضيت افتح الباب ولا اجي 

حيدر متسودن .. شلون اريد ارجع لحازم يصيح : اذبحج وما ترجعين والله .. لا انعل سلفى سلفاج اليوم .. 

وصاعد رايد يكسر الباب ورسول جارة 

وخابر على سهى ساعة اجت وتكلي : بعد ما عدنا شغل وعمل غير صبا وعمايلها ما افتكينا امس من مصيبتج اتباتين يم حازم ولج وترجعين الصبح كايدته وتريدين ترجعين .. بكيفج تطلكين وبكيفج اترجعين شني تايهة ولج مالج رداد افتحي الباب احاااااجيج 

- ارجعي لبيتج سهى ولا تدخلين بوضعي .. مثل ما انت كاعدة ابيتج اني رايدة ارجع لبيتي 

- يا بيت هذا مصدكة عدج بيت الطرداج منه يا ما عدج كرامة امداج وامدا كصتج وولج والله لو كضوج وكسوا راسج حق عليج عبن مسودة وجوهنا وما محصلين من وراج غير الفضايح 

- اخلصوا من فضايحي وخلوني اتزوج وانستر وارجع لرجلي شدعوى هلكد الموضوع مضايقكم ؟ 

- ما ترجعين وربج مو بكيفج مو لعب جعاب حويزم هذا السود وجوهنا لو يموت ما نطي مرة بعد . 

ما كمت اجاوبها 

ساعة هم يتحلفون ويتوعدون لحد ما صوت حيدر اختفى 

فتحت الباب وكمت اتسمع ليجوا صوت سهى تسولف هي وهدى وتكللها : خية ولو ردت ياهو لجهال جعفر شني نذب لحمنا بالشارع تريد ترجع نشرط على حازم يرضى بالجهال ياله يرجعها خوما نبتلي بيهم احنا شنهي رجلي يرضى يلفيهم لو مرت حيدر ما يرضون 

هدى : ولو حازم ما رضى 

-العب فلك ما اخليها ترجعله والله لا اسويها سودة مصخمة 

تنهدت على كمية الحقارة والنذالة الشايفينها 

هم موافقين بيوسف جيف راضي يخلي جهال اخوتي وياي ورافضين حازم حسبالهم ما راضي بالجهال وكاعد يسوون بيه كل هذا بس حتى ما يحتارون بالجهال 

نزلت جوا .. 

خذيت عباتي شافتني : وين ولج تعاي حاسبة البيت كوترة اطبين واطلعين على كيفج 

وكضتني من زندي تريد تلزمني وتصيح بهدى : خابري على حويدر خلي يادبها ولج خابري 

دفعتها مني وسطرتها راشي بكل قوتي شهكت وهي تصيح : يمممه اتضربيني ولج علمود زلمة يالمفلفلة يالعاشكة يم الزلمممممم ولج اتضربيني وانت الرايح والراد يتملعب بيج يالدايحة الساقطة 

- ارجع وجهال جعفر الجنتي تصيحين اخونا واخونا وعاركتيني عليه انت لمي بزره .. ما اخذهم ولا اريدهم وبعنادج اي راجعة لحضن رجلي ورايدة اشبع بيه وانت اشبعي بالجهال . 

عفتها وهي اتسودنت كامت تهامش تريد تاكلني وعمتي تفازع بيناتنا عفتها وطلعت .. من البيت .. اتوجهت لمحله لكيت ابنه علي كتله : بس اطيني تليفونك اخابر ابوك 

كاعد احجي .. وطب حيدر للمحل وهو يكلي : تعاي ولج كضيتج شعدج بالمحل هنا 

لزمه علي كال : دهد ايدها هد 

- وخر مني لا انعل ابيك 

- خوش زلمة انت وتنعل ابوي 

حجاها وطكاه كله .. وحيدر اتلازم وياه .. 

واتمدد بالكاع وياه يتمرغلون .. طلعت من المحل بسرعة . 

ركبت سيارة وطلعت لبيت حازم كبل .. 

دخلت البيت وقفلت الباب عليه وكعدت .. لا عندي تليفون واخابر ولا اريد اروح لاحد بعد وادخله .. تعبت منهم كلهم وتعبت من انانيتهم وغثتهم ولعبت روحي منهم محتاجة اكعد ابيتي واحس بهدوء ايامي واهدا .. ما رايدة احد غير اهدا 

حازم مخابره علي وكايله ع العركة 

رايح كبل ومتوجه لعمي وعمي تاهمه هو ماخذني منهم ومتعارك ويا عمي ورايح على محمد ما راضي برجعتنا ولا راضي يجي وياه على عمي ماشي على جبيرهم مو هنا بالعمارة .. مودي جهال المنطقة على بيت حيدر يسال عني .. طالعة رقية تكله : ما موجودة 

وابيت عمي ماكو 

راسه مفتر ودايخ وين اني .. 

واني كاعدة بالبيت ، راجع للبيت ورايد يفتح الباب مقفول .. سمعته يعتب بالباب شو هذا ضل مصدوم من شافني : صدك تحجين لو اتجذبين ؟ 

- شكو 

- ما خليت سما وكاع ما دورتج بيهم وانت هنا 

غير تكليلي 

- وشلون اكلك وتليفون ما عندي 

- وهسه شنو 

- والله شوفلك مكان تنام بيه لحد ما تجيب السيد وتجي تعقد باجر 

- صدك تحجين 

- جا شنو تريد تنام يمي واحنا مطلكين 

- اي نعقد 

- وشلون منين نجيب سيد هسه بالله ونعقد 

- والا سيد احنا نعقد بيناتنا غير زوجي والناس كلها تعرف مطلكج وراح ارجعج 

كضيت الباب : شنو بيناتنا حازم 

- نردد العقد ونعقد لنفسنا 

- لا ما اثق بهالامور 

- اكلج شو طبي جوا 

- حازم روح جيبلك سيد 

- ويا سيد كاعدلي هسه 

- اي لعد اطلع خليها للصبح 

- ما بيه حيل وخري 

- هو شنو الما بيه حيل امشي روح يم جهالك 

- انام يم جهالي وعدي مرة هنا ليش 

- غير نعقد 

- اي نعقد بيناتنا 

- ما يصير والله 

- لا تحلفين يجوز .. عقد دائم ومؤقت الاثنين يجوز الشخص يعقد النفسه ويا الشخص الثاني بدون شهود 

- لااااه وكم مرة عاقد لروحك مؤقت بالله لازم تعرفلها ودربك 

ابتسم : بالعباس ما مسويها دعوفيها هسه وتعاي اكعدي هنا خل اعلمج الصيغة 

- صيغتش 

- رددي وراي 

- حازم لا ما اقتنع والله 

- درددي لا تخليني العب الـ ٤٥ 

- يا فوكاها يعلط ما اريد اتزوج روح 

- مو اذا ما رددتي وياي راح اهجم عليج .. وراح نطلع من السلام اثنينا 

- اطلع لوحدك والله اني ما اقبل 

- درددي اشتعلت شعل .. رددي 

- حرام والله 

- ولج بابا لا تحلفين .. بس رددي وياي .. 

كام يرددلي الصيغة واني اردد وراه 

كمل العقد صلى على محمد كتله : شنو عود عقدنا 

- اي هاي هيه كملت صرتي مرتي 

- خب دروح والله ولا رجلي 

كضاني وهو يكعدني : رددتي وياي راضية 

- اي راضية 

- تريديني ؟ 

- اي 

- جا بالعافية علينا 

مد طوله وسد الضوا 

- عزا يمه دهر افتح الضوا خفت 

- دتعاي غير ابو ابوي مستلك صارلي ست اشهور من وراح دتعااااي 

- حازم حرام 

- الله ليجيب الحرام بيناتنا

ذبني للدوشك وانحشر وياي .. 

حازم لا 

كاعد ابعد بيه بأيدي كض ايدي وكام يبوس باصابيعي وهو يحجي : يروحلج فدوة حازم هو واهله 

ابتسمت : بس خليها لباجر 

- ممنوع 

- حازم 

- روحه وكلبه وعمره 

يحجيها وهو يهمس باذاني ويشتم بركبتي .. تيهت بعد شريد اكول .. غير انو اكتشف اني حيل مشتاقتلة ومتلهفة عليه . 

جانت اول ليلة من بعد ستة اشهور انام مرتاحة من صدك 

بدون تفكير ولا وجع راس ولا مسؤلية 

هاهية انتهت 

بعد ما افكر منين اجيب 

ولا افكر شلون اشتغل وشلون اجمع وشلون اقنعهم اخذ بيت واكعد بيهم وشلون ادبر عيشتي وشلون اجيب زبائن اكثر واشتغل اكثر .. كلها ذبيتها من راسي وظهري ونمت ليلي كله واني على صدره 

احس عليه بالليل كل شوية يكعد .. ويحضني حيل يبوس راسي ويرجع ينام وهو حاضني .. 

كعدت الصبح .. منطيته ظهري وهو حاضني من ورا 

انداريت باوعته هو نايم كمت امشي اصبعي على ملامحه واستشعرهم .. فتح عيونه ، ابتسم من شافني كباله .. رجع غمض وكام يسنح هو عايفلي وجهه العبي بيه ، همست :  ما رايح لدوام

- انعل ابوه اعوفج حتى اروح اكابل الوجوه الزفرة ليش 

ضحكت ورفعت نفسي وذبيتها على صدره : يعني اليوم اليه 

- اليوم وباجر وعمري كله الج مو لغيرج 

- انت هددتني ودزيتيلي ورقة بيها رصاصة شنو معناها تكتلني لو تكتل غيري 

- اكتلج واكتل روحي ولا اتصيرين لغيري ولا اعيش بعدج 

- انت متحس نفسك مخبل 

- اي والله بيج 

حضنته وتهت بحضنه .. 

ساعتين واحنا متلازكين ابعضنا ما بودنا نكوم ونفارك بعض . 

رجع غفى .. 

اني كمت على حيلي ، كضني : وييين رايحة 

-جوعانة 

-عمت عينه اليخليج جوعانة 

سحبني لصدره وهو يوخر شعري من وجهي : شنهو المشتهيته يبعد كلبي 

- مو نوعية مشتهية اكلة بسيطة نتوسطها بيناتنا ونتريك بهدوء 

باسني بكصتي وكام لحيلا : راح اكوم اجيب ريوك 

وانت جهزي اللي تريدينه 

مشى للحمام اني كمت اباوع لوضع الاستقبال الزولية البردة كمت افتر بالبيت خلص حمام واني اباوع ، حضني من ورا وباسني من ركبتي : بشنو دا تفكرين 

- نصبغ الغرفة القديمة خوما تبقى محتركة 

- تأمرين امر ، بس هسه جهزي الريوك خلي ناكل وبعدها شيري و رتبي البيت على راحتج 

مشى جاب صمون حار و انواع واشكال الاجبان الغالية و البيض .. سويت صينية مرتبة وكعدت واني منتجية بحضنه ومشغلين التلفزيون كبالنا وساعتين احنا نتريك على كيفنا والصوبة مقابيلنا . 

اندكت الباب .. 

كمت فتحتها .. علي ضل يباوع عليه : رجعتوا 

- اي متريك ؟ 

-لا هستوني كعدت 

صاح حازم : الساعة راح تصير ب٩ يا ابني وانت لا رايح الدوامك ولا للمحل شمنتظر شوكت تعرف السهر 

-عوفه خلي يكعد يتهنى بريوكه وبعدين احجي 

دخل علي .. واني مشيت طكيتله بيضتين وجبتلا كلاص 

حجيت : منو الفوك 

باوعلي علي : محد بس اني 

-ودنيا 

حازم : يم خوالها ما اكدر اعوفها بالبيت وحدها من اطلع ، وسجاد ويا امه .. بس علي جاي يبات هنا ما يروح لامه 

علي مدنك ياكل ، رفع راسه : يعني رجعتوا يابه 

- كول ابني عندك شي 

-لا حاي اسألك هذا احسن شي سويته اقلها انت ترتاح وتستقر 

- بس لازم تعاوني نعدل البيت ونصبغه 

- شوكت 

-باجر جمعة من الصبح نطلعله 

- سهلة 

-بس كمل ابني وروح للمحل بسرعة ولا اتغيب عن المدرسة علي .. التزم بدوامك لا تروح تنفصل 

- ما انفصل متفقين كلنا نغيب 

-دكمل بابا وكوم 

- هسه دعوفه توليته كمل وكمل خلي يخلص ريوكه على راحته . 

خلص علي ومشى انداريتله : دخابر سيد اتأكد منه ع العقد 

- تسولفين صدك انت 

- يمكن غلط 

- شنو غلط تعتقدين اني ارضى ازنى بمرتي 

- هسه خابر 

كض تليفونه خابر المكتب كاله زوجتي طلكتها وخلصت العدة ورجعتها ورددت العقد بيناتنا بدون شهود ورجعتها لذمتي العقد صحيح 

كاله : بالمذهب الجعفري ما يشترط شهود بين الزوج وزوجته بالزواج فقط بالطلاق لضمان حق الزوجة والأسرة واذا رددت الصيغة بشكل صحيح انت وياها العقد صحيح ورجعت لذمتك 

سداه : شكتلج اني بابا قابل طفل ما افتهم بهالامور 

- بس هاي شلون يعني وحدة ما متزوجة تروح تردد العقد بدون علم اهلها ويا صاحبها وتتزوج هاي صعبة 

-الباكر ما يصح العقد الا بقبول ولي الامر الاب او الجد من الاب بعقد النكاح .. اذا ما توفروا تكون ولية نفسها وتكدر تعقد لنفسها ونفس الحال اذا جانت مطلكة او ارملة .. ما يحتاج اذن من احد حتى تتزوج امرها بيدها . 

- اول مرة ادري 

- وانت شعرفح بالامور الفقهية ؟ 

- وانت منين تعرف ؟ مزوج كبل غير امل 

- رجعنا لهالسالفة 

ضحكت وذبيت روحي عليه اتشاقى وياه ، وحجيت : اريد اروح لصالون ارتب وجهي واريد اشتري ملابس .. وغراضي اللي ابيت حيدر اريدهم شلون راح يرهمن ذني 

- التريدينه اخذي فلوسه من محفظتي كدامج ، والغراض اني اوصي ناس يجيبولياهن 

- والجهال همينه فدوة 

- سهلة 

ضل كاعد ما بوده يكوم مني ولا يفاركني لحد ما صار العصر .. راح مر ابيت محمد وبلغهم برجوعنا وطلع للداخل ودز واحد صاحبه على بيت عمي يبلغهم برجوعنا وكايله : انريد جهال المرحوم المرة تريدهم 

عمي متبري مني كدام الزلمة وداز رسول على بيت حيدر 

منطينه غراضي وغراض الجهال كلها .. وجابهم اليه واجا.. يمه من طبوا عليه احس امتلى البيت بطبتهم حسوني بس شافني صرخ : عمممممممه 

مديتي ايدي وشلته من الكاع للهوا اذب بيه : روح عمتك وكلبها 

حضنته لكلبي حيل واني اكلهم : طك كلبي عليكم والعباس .. 

ودنكت لبنونة اخذها بحضني : شلونج حبيبتي 

- زينة 

- كون عمة رقية اذتكم لو ضربتكم

- اي وتعاركت هي وعمو حيدر 

- ليش 

- كتلتنا بالصوندا واجا لكاها ضاربتنا واتعارك وياها 

تريد تطردنا بالشارع 

- ختولي الله لا يعوزنا الها .. راح اسويلكم غرفة لوحدكم وارتبها واحطلكم بيها تلفزيون  وتعيشون يمي بعد للابد 

- بس كون منروح لبيت عمو حيدر بعد 

- ولا تروحون منا وجاي كله يمي 

حازم كاعد ومبتسم حضنتهم وكتله : متعشي يروحي 

- متعشي بس شوفي الجهال خاف جوعانين 

- جوعانين ؟ 

- اي 

- شمشتهين ؟ 

- اصابع بتيتة 

حجه حازم : وسوي لعلي  اذا تكدرين خاف يرجع خطية 

- اصلا خابره راح اسوي صينية نكعد كل احنه 

كمت واني اخذ جهال جعفر .. 

طلعت هدومهم واختاريتلهم اتراكات .. ودخلت سبحتهم وكعدتهم كدام التلفزيون 

حجه حازم : تليفونج هذا ما بعته اخذي بعد علموديش ابيعه 

- دنطي لبنونة خلي تلعب على ما اكضي العشا، بيه نت 

- تريدين اسويلج منظومة انترنت واشدلج راوتر 

- والله يا ريت ضوجة 

- تامريني امر بويه جنج على انترنت . 

كمت سديت الباب عليهم حتى تبقى الغرفة دافية .. 

ومشيت اسوي العشا ، طب علي جايب صمون وكام ياخذ من الماعون واني اكلي .. ابتسمت وهو طب جوا يمهم اخذ التليفون من بنونة وكعد يلعب وياها ويضحك ويا الجهال 

كضيت العشا والتمينا كلنا .. 

وهو يسولف ويا علي على باجر حتى يفرغون غرفة امه الفوك ويصبغ البيت 

كاله علي : يعني اگل لاني تاخذ الغرفة لو ابيعها او شنو 

- انت كللها اتريدها نحملها الها ، ما تريدها نصورها ونذبها عد نجار تنباع يمه 

- ماشي 

كمت فرشت للجهال ونتمددت بنصهم لحد ما نامو 

حازم متمدد ع القنفة فرشت الي واله ، علي صعد للغرفة فوك و حازم نزل بالفراش يمي طفينا ونمنا .

ثاني يوم من الصبح احنا صعدنا فوك وهو مفرغ الجوا كلها حتى يصبغها ، امل ما رايدة الغرفة تريد فلوسها، وتريد الهدوم الغراض البيها عاد حازم كاله : بابا اعرضها للبيع وشكد ما تصير اطي فلوسها لامك . 

فرغنا الغرفة الفوك .. وصبغها 

والمطبخ طلع الكاونتر ولبخه ولغة موضوع مطبخ فوك سواه غرفة وصبغة لجهال اخوي .. 

بالليل عم حازم و اخوه مروا بيه يعاتبونه 

شلون تطلع غرفة امهم وشلون تفرغها وما يصير ونفسية الجهال وهاي ام بزرك وعشرة عمر 

كاللهم : ذيج امهم تبعد عنا خطوتين الرايد يشوفها من ولدي مو بعيدة عنهم بس البيت اني رايد اغيره خوما اعرف الغرفة مهجورة بحجة غرفة امهم ! هذا بيتي ورايد ارممه واغيره 

وجاب نجار فتح الغرفة وحمل هوو ولده غراض امل كلهن ذبوهن ابيت اهلها وكاللهم : بعد انتم بيعوهن واخذوا فلوسهن 

صبغ البيت كله كلف فوك المليونين تقريبا وهو طلب من عمي فلوسي يجبيهن من صديق يوسف ذاك راد مهلة شهر يجيبلنا الفلوس 

عاد حازم راح اداينهن 

ومشى اشترالي غرفة نوم بس هالمرة تركية مو صاج 

ولغى الدرج الخارجي ورجع بنى الفتحة من فوك وفتح الدرج من الداخل .. واشترى سريرين ابو الطابقين مال جهال لجهال جعفر واشترالهم كنتور صغير .. ورتبت غرفتهم بصف غرفتي واخذت الطابق الفوك كله ورتبت غرفة جهال حازم . 

والغرفة مالتي الجوا حطيت بيها مكينتي ورتبتها كعدة وبلازما حتى ما ندمر الاستقبال .. ورجعت رتبت البيت كله من زواللي على كلوبات ترسته وخليته يضوي 

رجعنا البيت الجان مطفي ومظلم صار يضوي نهار ومرتب ويخبل .. حازم ارتاح نفسيا لان جان بمهذل مخلص ايامه ينام بالاستقبال وهدومه مطشره وهو يغسلهن بيده .. ورجعت هدومه اترتبت وهدوم جهاله والوضع كله غيرته. 

بس اهله  سووله مشكلة جيف لغى البيتين ورجعه بيت واحد وخلا غرفتي فوك والبيت صار الي طول بعرض كالوله : رجعت ذيج ورممت البيت وذاب مرتك ام جهالك حجي هذا 

كاللهم : ما عدي مرة .. لحد يجيني برجعتها لان الموضوع طلع من ايدي استشرعت وطلع حرام بعد ارجعها الا تتزوج ثاني يحللها ترجعلي والصدك لو سوتها حتى جهالي امنعهم منها .. البيني وبين امل انتهى هي اختارت شغلها واني اختاريت اعيش ويا زوجتي .. فلحد يدخل ولحد يجيني يكلي سوي هيج واعمل هيج .. انتهى كلشي واللوم عليها هي العافت وراها ومأمنه تضغطون علي ارجعها بس ما حسبت احساب لهاليوم اللي تتحرم عليه للابد ومالها رجعة وبيتها وغرفتها كبال عينها يصير لغيرها .. كلشي من ايدها لحد يحجيلي خطية وجهالك وبزرك .. وضعنا انتهى واني هسه

من رجعولها خبر هي اتحرمت على حازم للابد 

واني جيبة جهال اخوي بالبيت وهي وجهالها عد اهلها تخبلت .

جنت هستوني كاعدة الصبح 

حازم طب يسبح واني كاعدة يويا بنونة للمدرسة امشطلعا وابدللها .. وكعدتها تغفي يم الصوبة كمت سويت ريوك ع السريع ريكت حازم وسويتلها لفة وحطيتلها موزة بجنطتها واحاجيها : ركزي بدروسج حبيبتي لا تبقين مغفية 

حازم دير بالك عليها 

بلكت الله تصير نقلتها البنية هم كرهت المدرسة من كثر ما انقلت من مدرسة لمدرسة .. 

- هي صايرة ، ديلا بابا كومي اصعدي خل اوصلج واطلع لدربي 

لبستها جنطتها .. وبستها وعدلت كذلتها وحطيت بيدها ٥٠٠ دينار : ركزي حبيبتي ماشي 

- ماشي بس نعسانة 

- حتى تبطلين من التلفزيون بالليل وتنامين .. يلا امشي 

مشت لسيارة حازم 

واني رحت لحازم لفيت ايدي عليه : وين رايح بدون متنطيني بوستي الصبح 

- منا البنية يمعودة 

- راحت .. قربلي 

بسته ضحك .. وباس خدي وعافلي مصرف عشرة الاف 

كتله : لا زيدهن احتمال اروح للسوك اتسوك محتاجة كم شغلة 

- شكثر يكفيج 

- ٢٥ 

حطلي ٥٠ وكالي : الباقي عود رجعي 

بسته ووصلته للباب وكمت الوحلهم بيدي وهو يطلع بسيارته 

ضحكت بنونة حيل نعسانة .. 

دخلت قفلت الباب ورحت الم بالبيت والفراشات .. 

وطلعت للمطبخ كاعد اصفي الاكل من المواعين ما احس الا باب الشارع انفتح وامل اطبلي للبيت ، واني قافلة باب المطبخ 

كامت تحاول تفتح بالباب ما انفتح وياها 

كتلها : خير شعدج شرايدة 

- دفتحي افتحي واعلمج ياهي التاخذين بيتها وتكعدين جهال اخوج بت الفكر واني وجهالي نصفى برا 

- ليش برا دزيلي جهالج غرفتهم موجودة 

: بواكة الزلم لعبتي بعقله ومشيتي بكيفج وخذيتي بيتي 

المفضوحة ام الزلم .. اذا انت مرة افتحي الباب وشوفي شسوي بحالج .. اني وجهالي نطلع من البيت ويصفالح ام حلك الخااااايس 

اني قافلة الباب مال المطبخ وهي تصيح تريدني بس افتح 

كسرت الجام وتريدين بس اطلع الها ، ما بردت كلبها بس كتلها : حافر الحفرة يعثر بيها والفلم السويتي انت وبتج علي واطلكت بسببه الله كلبه عليج وطيحج بيه .

- طيحتيني بيه خايبة بس فكي الباب وشوفي شسوي 

كضيت تليفوني وهي تصيح خابرت حازم ، رد : ها بوية 

- حازم دا تسمع ؟ هذه ما عولت انت تطلع هجمت عليه للبيت 

- منو هاي 

- امل تكلي خذيتي بيتي وصار الج ولجهال اخوج وكسرت الجام وهاي كاعد دا تصيح وتريد بس تفتح الباب حتى تكتلني 

كال : هسه اني اتصرف 

سده من عندي .. ودقيقة ونزل علي كام يجر بيها

واهلها اجو وراها وهي تصيح وتبجي بالشارع وتصيح : بواكة الزلم خذت بيتي منييييي .. 

تنفخت واني اباوع الكزاز بالكاع : هسه بالله هاي شلون اخلص منها ، هسه اني صالي ست اشهر يمها كرباها بس من اجي تكتل روحها ع البيت وايام الله كلها ما تدري عن البيت صاير خرابة ، من عمرته وارتاحيت اذكرت هذا بيتها وجهالها ما مستقرين . 

خذيت المكرافة وكمت الم بالكزاز .. 

دك تليفوني كمتله .. حازم كال : ها ؟

- خذاها علي بس كسرت الجام وكامت تصيح بالشارع وتفشر 

- محروك كلبها خل تولي اني ارجع وارزل اهلها اخليهم يتوبونها ما توصلنا بعد 

- اشك يتوبونها هاي تنرد تستجن ما اتدكرت بيتها صار ٦ اشهر صار عزيز من اجيت وكعدت بيه وعدلته 

- خ تولي باباتي حبيبي سدي بابج واني راح اوصي علي يجيب ابو الجام يصلحه لا تبردون 

- ماشي حبيبي 

شنو مشتهي ع الغدا اسويلك 

- والله يا كلبي اني ما اشتهي غيرج 

- يا عزا حازم غدا 

- كلشي يطلع من ايدج خير ونعمة . 

- ادلل 

- ديري بالج على نفسج . 

- ماشي 

سديته منه وكملت تنظيف .. وكمت رتبت المطبخ وحطيت الصوبة بيه والبرد يطب من الجام اجا علي كالي : بس صعدي خلي ابو الجام يسوي الشباك 

صعدت لغرفتي كضيت وصلة وكعدت المع بغرفتي لان بيضة ولازم ايدي بيها اقل طخة تصير لطخة وتبين .. اخذت بخور مشتريته غالي .. علكته وخليته بيها صار ثعواله .. وسديت الغرفة بالدخان حتى تتشبع بريحة البخور حتى من يطبها حازم تنتفتح نفسيته من يشم عطر طيب ويشوف بياض الغرفة وترتيبها يعجبه بس يتمدد ويرتاح . 

مشيت لغرفة علي رتبت فراشه وغراضه .. 

كعد حسوني شلته واني الاشيه ، غسلتله وجهه ع المغسلة وغسلت اديه ورجليه ومشيت بدلتله ودفيته .. صعدلي علي : خلص الجام .. اني راح اروح محتاجة شي 

- شو ممداوم 

- دوامي ظهري 

- متتريك لعد 

- خاف اتأخر 

- دطب حبيبي اسبح وغسل على ما اسويلك اكل انت وحسوني تروح متريك احسن ما تضل جوعان وتملي بطنك بلفة فلافل خاست بطنك بس من الفلافل 

- اي والله لعبت روحي منها ديلا لعد خلي اغسل وابدل وانزل . 

نزلت واني شايلة حسوني من الدرج لان ملبسته جواريب واخاف عليه يزلك وهو هستوه كاعد .. سويت اكل وهو يلعب بطوبته يمي ، صحت : لا تشمرها ع الطوبة حبيبي هناك ذبها 

نزل علي كام يراوغه ويلاعبه .. 

طبت دنيا للبيت ، ضلت تباوع علينه حجت : انت ما تستحي تطرد امي من البيت 

- انت مالج غرض ابوي خابراني وكالي طلع امك 

- وابوي كالك تروح تطرد امي من البيت وباقي صاير خادم لهاي لوكي بس حتى ابوي يكلك عفية 

اجا هد عليها وصكعها على راسه : سكتي الوصخة لا اكسر راسج معليج انت افتهمتي 

جريته : لا تتعاركون هسه تعال اكعد اكل حبيبي معليك بيها 

- رجعتي البومة حاسبة روحها ام البيت

صاح علي : راح اكوملج والعباس 

كتلها : امشي كعدي بغرفتج فوك بلا حجي ولي 

- وبكيفج اني اروح بيت ابويه وغصبا ما عليج وين ما يعجبني اكعد حتى لو بغرفتج انت ما تحكمين اذا امي راحت منا اني كاعدتلج واشوف شلون تاخذين بيت امي . 

كعدت ع الكرسي .. هزيت ايدي وكمت اصيح على حسوني : هاك بس هاي حطها بحلكك يا ابني 

يلعب بالطوبة ما يكعد ياكل واني اسوي واحط بحلكه ضرب الطوبة برجلها .. ضربتها بوجهه وكع ليورا كام يبجي ، صاح بيها علي : بتل بتل جاهل ليش اطكينه 

- بكيفي لا يلعب يمي خوش خل يروح منا ما مفتحيلنا ملجى ايتام هنا بالبيت 

حجيت : هاي امج مكعدتج من الصبح حتى تجين تكملين البدته هي 

- انت اخر من يتكلم خوش 

- دنجبي وولي من كدامنا مالنا خلك صوتج من الصبح 

- على منو جاي تغلطين 

- عليج بتي لا تغلطين مو بكدج اني اتحملتج هووواي 

اجتني تريد تهمشني كضها علي كتله : لا عوفها خل اشوف شتسوي 

كامت تصيح وتغلط وصعدت فوك .. علي شال كتبة اللافهن بتجة ومشى ، حجيت : عندك مصرف 

- بجيبي الفين ضلن من فلوس الجام  ليش محتاجة شي 

شلت خمس الاف : خليهن خاف تشتهيلك شي . 

- مشكورة 

خذاهن وطلع .. واني طفيت الصوبة وفتحت الباب .. حتى حسوني يلعب خفت عليه لا يضربها ونحترك .. 

سويت غدا وجهزته وطفيته وكعدت ع التليفون  

رجعت الفايبر .. والفيسبوك ما عرفت شلون ارجعه ما يصير ومن احط اسمي القديم يكلي لازم اسمك الحقيقي .. عفته .

شفت حسوني ديلعب وحده 

ذبيت التليفون وكمت الاعبه اني واضحكه .. 

خابراني حازم .. رديت عليه 

كال : جبت هاي الحلوة وجاي شمحتاجة اجيبلج من اجي 

- جيب وياك طرشي مدبس 

-تامريني امر 

رجع وهو جايب طرشي عادي : ما لكيت مدبس عادي هذا 

ابتسمت واني اتقربله : ها ما ينفع 

حضنته : كلشي منك ينفع 

-الجهال منا ، علي راح 

كمت اشمشم بيه وابوس بجتفه وبركبته وخده .. 

باسني بخدي 

جاوبت : اي راح ، تبدل حتى اصبلك 

- بالاول اصعدي وياي 

ابتسمت : بس الجهال هنا 

-ما نتأخر شوية 

صعدت وياه نزعته ملابس الشغل وبقيت يمه شوية وعفته بالغرفة وطلعت بنونة كاعدة دا تكتب : ها خير جا هسه الكتابة يا عمة دبدلي ارتاحي 

- عمة اريد اخلصهن 

- اي بدلي ملابسج واكلي واشبعي بطنج واكعدي خلصيهن يلا عفية بالشاطرة 

كامت تريد تبدل كتلها : امشي غسلي اديج ورجليج  ووجهج خاف وسخات من المدرسة  على ما اطلعلج ملابسج 

طلعتلها اتراك شتوي وجواريب 

ولميت كتبها حطيتهن بجنطتها لا يشككهن حسوني اجتني نشفت وجهه واطرافها ولبستها وهي تكلي : عمة جا اعرف البس 

- دلبسي يلا ام السان 

شلت ملابسها مال المدرسة وهي لبست الجواريب مكلوبي كتلها : ها اتعرفين يم راس 

ضحكت .. دنكت ولبستها الجواريب عدل حجت : اكدر اكلج شي 

- كولي يحبيبتي 

- اكدر اكلج ماما 

ابتسمت : يا بختي اني لو صرت ماما 

- انت امي مو شهلاء بعد ما اريدها اني اريد اصيحلج ماما 

- طبعا اني امج وانت ابنيتي وحبيبة كلبي 

حضنتني بستها بكصتها : يلا يماما انزلي وعلى كيفج لا تتزحلكين ع الدرج وانت لابسة جواريب خلي اصبلج غدا 

نزلت تركض واني مشيت للغرفة حازم متمدد ونايم 

بسته بركبته وخده : جا ما تتغدا يكلبي 

- اي بس تعبان شوية 

- دكوم اتغدا وارتاح يلا 

خذيت ملابس حازم مال الشغل ورحت لغرفة جهاله شلت ملابس علي من الكاع ونزلت كلهن ذبيتهن بالغسالة وشغلتها .. نزل حازم والجهال كاعد يلعبون ، حجيت : شفت القرار الجديد 

- شنهو 

- بنونة قررت تصيحلي ماما منا وجاي تكلي بعد ما اريد شهلاء امي اريد انت امي 

حازم : باطل جا اني غرت بس صبا امج يعني اني الصايرلج خط اجيبج واردج للمدرسة ما اتصيحيلي بابا 

ضحكت ومدلها ايده مشتله باسها بخدها وهو يكللها : بعد ابوج وكلبه ، وذاك المصيول لا بابا ولا داده بس وكاحة 

- كتل روحه يريد يطلع للشارع يلعب واخاف عليه 

حجيتها واني احط الاكل ع الطاولة كدام حازم : اي خلي يطلع قابل اتحبسينة ولد هو مو بنية وتخنثينة 

- اخاف عليه وهو وكح تعال اركض وراه 

- المنطقة كلها عرف لتخافين عوفي يطلع يلعب ويرجع لا اتقيدينه ، اي شني اليوم هاي وفعالياتها 

- كملت امل دزت دنيا تكمل وراها 

- دنيا اجتي 

-اي فوك نايمة ، بس حازم حاجيها فدوة بس تغلط وتصيح وتضرب بالجهال ادري امها جاي توزها بس ميصير هيج 

- اتحمليها لخاطري كلها كم اسبوع تكضي فرحة الزهرة وتتزوج .. عوفيها اني هم احاجيها . 

كام ياكل واني صبيت للجهال وحدهم .. وكعدت اوكل بلكت حسوني يقبل ما رضى يحط بحلكة ولا لكمة .. خلص حازم وراح صعد تام واني رتبت المطبخ وصعدت لبنونة : ها حبيبتي 

- ها ماما 

تنهدت من كالتلي هيج ، حسيت الكلمة غريبة عليه 

اول مرة اسمع كلمة ماما : كضيتي دراستج 

- لا بعدني جاي اقرا 

دنكت عليها بستها وكتلها : كملي دافية الغرفة لو اشغلج هيتر 

- شغلي شوية واني اطفي 

شغلته الها وبعدته عنها وكتلها : عينج على اخوج اني راح اروح اناملي شوية 

- ماشي 

رحت لحازم لكيته كاعد يكلب بتليفونه من شافني طبيت ذب التليفون وفتحلي بطانيته .. حشرت روحي بحضنه واخذنالنا ساعتين نمنا بيها . 

كعد العصر حازم راح اتحاجى ويا اهل امل كاللهم : بالعباس مرت الاخرى لو اجت وكربت بيتي لو صيحت ابابي لا اكضها واكسر رجلها .. وانت معتبين كبالي .. مرة طلكتها وطردتها من بيتي ما تستحي ترجعله واطبله تكسر بيه .. 

كايم اخوها متحاجي وياه متعاركين وهو مهددهم لو جتي بعد لا يسوي ما يسوي .. عافهم وطلع لشغله .. طلعت حسوني يلعب بالباب .. 

شو جهال اخوة امل هدو عليه وكتلوه 

اجاني الجاهل ناط من البجي 

خابرته وكتله عليهم كال : ذوله اهلهم موصينهم خل يولون طببي الجاهل جوا بالكراج يلعب. 

دخلته .. 

بس كملت عليه دنيا كعدت مطنكرة وحاطة كورها ويا هالجاهل 

هو حرك ويحب يلعب ومنين ما يندار تكفخه واصيح ومغثوثة ، اتجاهلتها 

بس كامت تزيد حتى ويا بنونة 

حسوني يمكن وكيح ويضوجخا هاي كلش هادئة ومالها غير تقرا وتكتب وحيل مهتمة بدراستها وهاي تجي تغلط عليها ولا جنها جبيرة وتجي بنونة تبجي يمي وتكلي : صيحي بيها تكلي المجدية 

كلت لحازم عليها .. 

وكعد وياها يحاجيها وبابا ميصير وذوله يتامى وخطية .. وميصير اتضربيهم والله يكول وانا اليتيم فلا تقهر .. وانت جبيرة وعاقلة . 

ولا فاد 

تتغيرلها ساعة تخابرها امها توزها تنزللنا شيطان 

اتحملتها شلون ما جان لحد ما طلعت فرحت الزهرة .. 

وكاموا يستعجلون بالعرس 

اني شلت ايدي من عرسها كلش ، كلت توبة الي غرض بيها لو اسويلها شي اتحملها شلون ما جان لحد ما تطلع لبيت رجلها . 

خوالها هم التكفلوا روحتها وجيتها ونيشانها والسوك والصالون .. 

بس الحنة والعرس ابيتي .. حازم كالي : اتحمليهم يومين وتفك 

عزمت منى على عرسها .. 

واجتي اتعجبت على البيت وترتيبة 

صعدتها لغرفتي كالت : اللهم صلي ع النبي ولج اصبية راح يطكونج بعين وعلي .. شغلي قران معوذات حجيهن يهدم بيوت جيف معمرلج البيت . 

- خية جا غير بيتنا شلون بالله ما نعدله 

- يا وعلي يكولون عليج مسوية الزلمة بيدها محبس وراكبته اركوب ..ذبيلج حرمل وعلي يحركن بيتج ذني 

- الله موجود 

صدك كل اليجي ينبهر بالبيت كلبته وغيرته 

اليفوت ينشرح صدره هلكد ما الوان البيت كله ابيض ونظيف ومرتب وكلشي بمكانه واني انكسر ظهري ورا الخطار الم وانظف . 

ما خلن حجاية ما حجنها 

جايبة جهال اخوها مربيتهم براسه 

خذت البيت كله وامل وجهالها سيسوا 

ضل البيت لمطيره .. وراكبته و ساحرته وما عدهن غير هالحجايتن حسرة شافلهن زلمة متوالم ويا مرته لا ما كالن ساحرته لو راكبته .. 

اجو اهل الولد وسوو الحنة بس حسيت اهل الولد معدان كلش .. 

يعني مو قصة ريف لو هيج لا تصرفاتهم كلش تفشل وضحكهن ومكياجهن كلش قرج .. تعاركن بيناتهن وفشار وغلط علمود كيك وهن ابيت العروس لا حطن حرمة للبيت لا للعرس لا كالن عيب . 

الولد يلعب النفس من هذا التسريحة مالته صاعدة متر فوك راسه ولحيته مثخنها بمسكارة سودة وحواجبه سود مطابكات 

شلون حازم رضى ينطي بنته لهيج بشرية ما ادري .. 

خلصن الحنة .. وفكت الهوسة 

ودنيا مشت يم بيت جدها تكمل الحفلة وياهم 

اني لميت البيت كله .. وشغلت قران بيه وبخرته .. 

طب حازم .. 

وهو مقهور وضايج .. عرفت علمود بته ، كعدت يمه : حازم هو انت تعرف الناس ذوله الخذوا بتك 

- سالت عنهم خوش ناس 

- وين كاعدين 

- ورا السدة 

- حازم ما اريد احبطك بس احس استعجلت 

- ليش 

- حازم معدان فد مرة كلش يفشلون على كيكة تعاركن مكافش والفشار يطافر من الساناتهن لا يكولن اكو جهال لا احترمن حرام حتى جهالهم يفشرون فشار يخرع 

- شنو القصة 

- انت ما تعرفهم يعني 

- لا ، يصيرون بيت صديق خالها وامل موافقة ودنيا موافقة كلت اسال عنهم اذا خوش ناس اطيهم وبعد قرارها 

- قراريش رحمة لاهلك هي دنيا تعرف تقرر ترا صغيرة وامعا وخوالها يمشوها والله اكول خربها وسويلك هوسة وخربها كلش معدان بتك مدللة تشوف الويل عدهم . 

- شخربها تروح تحقد عليه يمعودة ما طول هي وامها مقتنعات بعد شسوي ؟ 

- ما ادري بس ما ارتاحيت الهم . 

نمنا لثاني يوم هوسة العرس ابيتنا .. 

رجعت من الصالون العيون مورمة من البجي .. 

اجتي للمطبخ تكلهم : اريد اخرب العرس ما اريد اتزوج 

خالاتها وامها تسودنت وتريدين تفشلين وتريدن تصخمين وجوهنا وهاي كل بنية تحس مثلج وامشي ولا اتخربين ميكاجج 

كعدت بالمطبخ ابدلتها .. 

تمسح بعيونها وترجع العين تكت دموع .. 

راحت خالتها تجيبلها كلينكس .. وخالتها الثانية كاعدة ، كتلهم : اني وياها والله لو تخرب هالزواج احسن البشرية ذولة مو مال ننطيهم مرة 

بسرعة باوعتلي وشكت : يفشر عليه لان كتله ما مخلصة صالون يكلي بس اكضج ادكج فشلتينا كل هالوكت بالصالون 

- اكو واحد يحجي ويا مرته هيج بيوم عرسها شنو بايعين البنية ترا صغيرة والف وتحد يتمناها 

حجت خالتها : خية انت ياهو مالتج ندري بدودتج صارت متر جيف راح تعرس بعنادج بس كضيها 

- خية عليمن ادود بالعكس ارتاح البيت يبقالي بس اني لمصلحتها 

دنيا اتعلكت روحها بيه اشرتلي اجيها كضت اديه 

اديها ترجف كتلها : اذا تريدين اخلي ابوج ينهي العرس هذا كله 

- ما اريده بس امي ما تقبل ننهي 

- امج راح تعرس لو انت ؟ 

- يصيرون اصدقاء خالوا بالسوك وتكلي لا تفشلين خالج 

- انت مقتنعة بيه 

- لا بس تريديني انسى بشار 

- ومزوجتج حتى تنسين بشار 

بجت : مكاعد انساه اني ما اكدر انساه مو بيدي اني احبه 

- هششش اسكتي مكياجج 

راح اخابر ابوج واكله يخربها 

- اي عفية والله ما ايود بس اخاف من امي 

صارت خالتها وراي 

كالت : خية انت شتريدين من البت 

حجت دنيا : خالة والله ما اريده اريد ابقى ابيت بابا 

- ترا حرام عليكم البنية صغيرة ليش كاعد تسوون بيها هيج والله حتى تنسى خطيبها القديم مورطيها بواحد ثاني معيدي مينحرع 

- مالج غرض .. واطلعي منها انت 

خابرت حازم ما حصلته .. ويا الزلم 

اجتي الزفة وهي ادموعها كاموا ينزلون مطر 

دخلت امي وهي تكللها : اسمعي لو فتحتي حلكج وخربتي عرسج لا احط ظهرج واكسره هش سوالف المسلسلات التركية عوفيهن . 

- ماما ما احبه 

- وشستفاديتي من الحب ما طيح حظج وشرد كافي لا تخلين غيرج يلعب بعقلج صيري مرة وقوية وامشي .. يلا بتي الولد خوش ولد وعده محل وخير من الله امشي يلا . 

خذتها ومشت للغرفة 

اجتي الزفة وزفوا الولد دخل جوا تباوع وجه دنيا اي تعابير فرح ماكو .. الوجه بيه سبع لطامات .. بس محد رضالها تتراجع وهي اتأخرت ببدلة العرس يلا صاحت اريد افسخ ذاك الوكت كله ساكتة .. مدري حاجية لامها ورادتها ما ادير بس واضح البنية ما راضية بالزواج وامها شايفته الها عن طريق السوك الولد يشتغل بالسوك وراضيته لبتها حتى تنسى بشار وتتعداه 

بس دنيا لا حابة الولد اللي عرسها وياه هالساعة 

ولا ناسية بشار .. حبت شخص ما قدر احساسها .. 

زفوها وخذوها من البيت .. امل كامت تبجي عليها بالغرفة من طلعت من دخل حازم للبيت .. طلعت من البيت وراحت لاهلها .. اما حازم وجهه اسود .. على بته شلون طلعت خذا سويجة وراد يطلع : وين 

- عوفيني هسه 

كامت دموعه تجري من انزفت بته وانطاها 

رجع بالليل حيل تعبان 

سولفتله على دنيا وبواجيها اتخبل كال : وليش ما دزيتي علي واحد ليش خليتيها تنزف .. اني سالتها البارحة بويه راضية بزواجج هذا زواج مو لعب اذا نا راضية يكليلي وكالتلي راضية بابا 

- ما راضية بس امها حاكمتها 

ما اخفي عليك تضل هي بنية ومو عيب 

هي حبت بشار حيل النذل ما جان يستحق هالمحبة وهي صغيرة واتعلقت بيه وامل رايدتها تنسى ه القنعتها بهالزواج بس اتراجعت باخر لحظة تصيح ما اريد 

- وهسه شلون اروح اجيبها 

- شتحيبها البنية انزفت لبيت رجلها .. ادعيلها انت اب  ودعائك يم الله مستجاب الله يوفقها ويسعدها 

بقى الليل كله متكلب ومتزوهر 

وكل شوية يكول .. لا اجيبها بتي مدللة ما مجبورة تتحمل هالمعانات .. اجيبها وانعل والديهم 

- دنام وللصبح الله كريم 

- وشلون لو كاعدة تبجي 

- ليش تبجي .. تلكاها عروس وملتهية بليلتها 

- انت عاد لا تكومين تمضر*** شني ملتهية بليلتها اكوم اجيبها وانعل والديهم بعد تبجي وما تريد العرس شني زايدة عندي 

- حازم وين تروح البنية عروس 

- اسسس سكتي مو عروس 

- عيب والله ، هسه رايحلهم وفشلوك وكالولك بتك فوك ويا رجلها شتكلهم جيبوها 

- انت عود ليش اتغثيني بهالحجي هاذ 

- حازم شغثك غير البنية عروووس 

- اي لا تحجين هيج عليها ما اقبل 

- شنو الما تقبله 

- لا تكولين ويا رجلها عيب استحي 

- يا جا غير اتزوجت 

- اكوم منج الكعدة وياج تكصر العمر 

كام نزل ويدخن جكارة ورا جكارة وعيونه مدمعات عليها 

نزل علي يمه .. كام يمسح بعيونه دخلت باوعلي حجه : خابريها خاف كاعد تبجي 

- حازم عيب نخابرها هسه 

- انعل ابو العيييييييب خابريها اكلج 

ودفر الطبلة الكدامه 

ضل يباوعلي علي .. رحت جبت تليفوني 

دكيت مرة مرتين .. ما ردت 

تلكاها مسويته صامت 

- وهسه شلون نعرف هي شبيها ما بيها 

- يصير الصبح ونروحلها 

- بيش الساعة هسه 

- ب٤ الصبح 

- ساعتين وبدلي نروحلها 

- ماشي 

ضل كاعد لا اجا النوم ولا عينه غفت 

وعيونه مجمراته ومتندم شلون اطيتها اني شلون رضيت لامها وخوالها المخانيث يزوجونها على كيفهم بس لا اني سالتها وخذيت رايها وهي جانت موافقة .. انعل ابوهم يصير الصبح واجيب بتي هسة لو مدري شيصير ، احتركوا اهلج امل بت تبجي تغصبينها ع الزفة حتى لا تتفشلين ويا الناس بت الخ* لاكي بتي بالشارع اني وابيعها حتى لا اتفشل ويا واحد . 

خلص الليل كله محتقن وضايج ويدرم 

تندمت حجيتله على بواجيها .. صدك صارت ب٧ ضبط حتى مو ودقيقة كال : يلا كومي خل نروحلهم 

- هسه ! 

- كومي لا تفكين حلكج امشي 

كمت ونوم ما نايمة عدلت نفسي ورتبتها ومشيت ويا كتله : هسه عيب طابيلهم هيج لازم ناخذلهم صينية ريوك 

- واخذلهم زقنبوت شني فرحان ماخذين بتي 

- غير هيج العادة 

- انعل ابو العادة هلي نروح نشوفها ونجي 

- اقلها بس ناخذلهم كيمر من الطريق 

- صمي حلكج ولا تحجييين 

سكتت عنه عصبي ومقهور عليه ما جادلته 

وصل ليغاد عنهم اطاني فلوس كال : انزلي اشتري كيمر وهاي السوالف الطايح حظها مالتج 

خذيت ونزلت اشتريت كيمر عرب وكاهي ومربى 

ورحنالهم دكينا الباب عليهم ب٨ الا ثلث .. الناس نايمين 

رحبوا بينا ودخلونا للاستقبال وهم يتراكضون ويشيلون بالفراشات 

كلت لام الولد : عذرينا بس جيف صغيرة ضل باله عليها وراد يشوفها 

- خطية هسه اكعدنهم واخليها تنزله 

صعدت الهم واني انطيت لاخت الولد الكيمر والكاهي خذته وابوهم كعد ويا حازم .. شوية ونزلت هي لابسة كلابية .. بس شافت ابوها كامت دموعها تجري 

حضنها عيونه مدمعة همس الها : دناوي بابا اذا ما تريدين الزواج هاذ امشي وياي وارجعي للبيت ولا تفكرين بمنو يحجي ومنو يكول اني ابوج انعلج والد والديهم 

مسحت دموعها وهي تكله : لا بابا مسلم خوش ولد وحباب اني بس مشتاقتلك 

- يعني مرتاحة بويه 

- اي مرتاحة عادي 

- يعني ما تروحين وياي 

- لا انت اطمن عليه اني زينة ما بيه شي 

- خوش اني هم امرلج بس تحتاجين شي بس رمشيلي اني اخابرج واجيبلج التريدينه 

باسته وهي مدمعه وتكله : الله لا يحرمني منك بابا حبيبي 

باسها بكصتها وسلم عليهم وكالي : يلا 

كضوا ع الريوك كاللهم : لا والله تعبان وما نايم دايمة ان شاءالله 

كمنا طلعنا .. 

ورجعت للبيت .. ذب روحه ع النوم 

يوم كامل هو ما كاعد .. اني من بعد العرس صار ضعف بجسمي .. صخونة لزمتني دمرتني دمار .. ما يدري عنه ولا اني كايللتله 

من سمعني اون واني يم الصوب 

كعدلي : صبا شبيج 

- ما بيه شي 

كف الغطا منه واجاني : مصخنة يابويه غادية نار 

- جسمي ديوجعني حيل 

- دكومي كومي وياي خل اخذج للمستشفى 

- لا ما بيه 

كومني غصب غسل وجهي .. وخلا علي يم الجهال وخذاني للاستشارية مال مستشفى الجوادر .. اطوني حبوب وما قبلوا يطوني ابر كالوا : حرارتها حيل مرتفعة لازم تسبح بمي بارد حتى تنزل حرارتها وتاخذ علاجها 

رجعني للبيت كعدني بالحمام واني اون واوخره : باردة حازم وخر 

- بعد كلب حازم وعمره جا غير حتى تنزل حرارتج يا عيني خوما اتضلين هيج 

كعدتي ع الدجة مال الحمام 

وجر الملابس مني وفتح المي بالسطل بارررررد 

كمت اون : لا عليك الله لا 

- بس اتحملي اي بعد كلبي غير حتى اطيبين 

كام ياخذ بالطاسة ويذب على رجليه على كيف واني اون 

وياخذ بيده ويبلل بادية ووجهي .. كمت ابجي من الوجع والبرودة 

نكع الخاولي بالمي البارد وكامي صيح على بنونة تجيبلي ثوب قديفة ثخين .. جابتله من كنتوري لبساني وطلعني من الحمام وكاللها تحيب بطانية .. 

جابت بطانيتنا الثخينة 

كعد وحطاني بحضنه ودثرني بالبطانية ومخلي الخاولي على راسي ووجهي واني اون وهو لامني بحضنه مثل الطفل .. عركت حيل .. 

كام من مكانه جاب خاولي وملابس جدد 

ونزعني الثوب ونشف جسمي من العرك ولبسني الثوب الثاني وغطاني بجرجف خفيف وبعد الصوبة عنه .. ورجع الخاولي المبلل على راسي ..

حرارتي خفت وارتاحيت .. ضليت نايمة يمه وهو متمدد بالكاع وصدره بوجهي ويكلب بالتلفزيون . 

طب علي انطاه فلوس

كاله : امشي جيب دجاجة مشوية خطية الجهال جاعت وصبا مريضة مو مال تكوملهم . 

راح علي .. 

وهو خابر دنيا .. اطمن عليها شافها مرتاحة ما عليها شي 

ارتاح .. وخف التوتر عده . 

طول وياي المرض تلث تيام دكتني الانفلاونزا دك .. 

يلا طبت .. ورجعنا لحياتنا الطبيعية .. 

بالسبعة حازم اشترى لدنيا عقد ذهب وانطانياه وديته الها هدية بحفلة السبعة مالتها .. فرحت بيه حيل بس البنية ما بيها ملامح عروس كئيبة حيل وامها تندس بيها وتكللها : بتي بتي اتحملي وصيري مرة وداري رجلج . 

بس هي ما متقبلة الزواج هذا 

من بعد السبعة بايام .. مراسله بشار 

وهو مجاوبها ومباركلها زواجها 

كايلتله : اتباركلي لو تقرالي الفاتحة اني من يوم ما عفتني الضحكة راحت من وجهي والفرحة ماتت بكلبي .. رجلي ما كاعد اتقبله من وراك حتى بالليل من يجيني اني اتخيله انت .. اني لحد هسه ما كاعد اكدر اطلعك من كلبي 

مخابرها بشار عود على اساس حتى يقنعها تشوف حياتها وترضى بالامر الواقع .. طاب رجلها هي خايفة وسادة التليفون 

كاتلها الا تفتحله التليفون وما راضية تفتح التليفون 

ساحلها وجايب السلاح عليها الا تفتحله التليفون ويشوف ويامن جانت تحجي 

خايفة وفاتحة تليفونها وشايف الرسايل والمكالمة .. 

بلا تفاهم اسحب اقسام وحط طلقة براسها واكتلها بدون حتى يسمعها . 

جان وكت ظهر وحازم راجع من الدوام هستوه متغدي ونايم 

واني متمدده يمه واكلب بتليفوني 

دك تليفونه فز .. كتله : اسم الله شبيك فززتني ليش هيج فزيت 

ما اهتم لكلامي وكض التليفون بسرعة 

مخابره ابو الولد كايله : بتك غسلنا عارها تعال اخذ جثتها من عدنا كبل لا نذبها للزبالة .... يتبع 

 تكملة الرواية من هناااااااا 

لمتابعة باقي الروايه زورو قناتنا علي التليجرام من هناااااااااا

بدل ماتدور وتبحث علي الروايات عمل 

متابعه لصفحتنا على فيس بوك هنااااااااااا

الرواية كامله من هناااااااااا

مجمع الروايات الكامله 1اضغط هناااااااا

مجمع الروايات الكاملة 2 اضغط هنااااااا