رواية عاجر الفصل التاسع وعشرون 29بقلــم الكاتبـــة زينب ماجد (حصريه في مدونة قصر الروايات)

رواية عاجر الفصل التاسع وعشرون 29بقلــم الكاتبـــة زينب ماجد  (حصريه في مدونة قصر الروايات)

رواية عاجر الفصل التاسع وعشرون 29بقلــم الكاتبـــة زينب ماجد  (حصريه في مدونة قصر الروايات)

#عاجر 

{ بقلم الكاتبة زينب ماجد } 

الحلقة_ ٢٩ 

سمعت كل حجيهم و كلامهم 

واذوا بالحجي هواي وهم يكلوله الضاهر : المرة هاي صدك غاسلة مخك يحازم .. تفضلها على سمعت اهلك وعمامك والله ما جنه نظنك هيج .. جنه نشوفك جبير وما ترضى بالشين بس الظاهر امورك تغيرت من لفاك الشين 

كاله : رحم الله والديك عمي 

عافوه وكاموا .. طلعوا من باب الاستقبال الثاني واني طبيت للمطبخ .. هو ما طلع وراه تركهم يطلعون .. من انسد الباب انداريت باوعت للاستقبال .. هو كاعد وحاط راسه بين رجليه ودايخ 

اندار شافني .. سحب سويج سيارته وجكايرة وكام .. 

تعداني ومشى طلع من البيت .. ما ادري احساسي شنو 

قهر لان ما يحاجيني ولا متفهمني .. لو فرح من ما رضى يعوفني وداعلي كدام اهله وعمامه ووكف وياي وشال مصيبتي عني ؟ 

كعدت بالاستقبال وحدي 

جان عصر وامل طلعت وعلي وسجاد بالشارع يلعبون ودنيا فوك كارصة ... نادرا ما تنزل وام حازم عد بيت محمد .. 

كعدت بالمطبخ .. 

اندكت الباب كمت الها من ورا الباب صحت : منو ؟ 

- اني ام فراس خالة 

فتحتلها : هلا وكل الهلا خالة تفضلي تفضلي 

- جا عمتج الحجية ما موجودة 

- لا والله عد بيت محمد 

- ووحدج كاعدة 

- شسوي 

- ما متمريلنا الحبيبات كلهن ملتمات ومسوياتلهن عصرونية وكاعدات 

- عسى ما يفرق لمتهن ويحفظهن بجاه ام البنين 

- ما تجين 

- لا خالة ما يرضى حرم عليه عتبة الباب اطلعنها 

- يااااا ، بس تريدين الصدك بتي حكه .. جا موشوية مصيبة هاي وطاحت على راسه زلمة وفيديو لمرته صار عد الكل وهي تركص شوية يخاله غيره حطج وكتلج بس هم المصايب الجبيرة نعمة من الله تعرفين بيها معادن وادمج ياهو الصدك يحبج ويوكف وياج وياهو العدو وباللسان حباب .. 

اخوج المن امج وابوج يوم السمع بفضيحتج تعنى لكتلتح 

والكاعدة ابيته يشاكف عنج وشايل الفضيحة وطايحة فوك راسه 

- عمامة كبل شوية جانوا هنا رادوه يطلكني بس ما رضى 

- صدك شكالوله 

سدت الباب ابتسمت وكمت اسولفلها حجي عمامه وكلامه كالت : خايبة هاذ فتحي كلبج يخالة وبلبة كلبج حطي خايبة عكبة تضيعين وانت بهالحال ...

-بس ما يحجي وياي خالة 

- جا حكه خالة تريدين كل هالمصايب الجرتله وهو يشوف فيديو الج تركصين صار عد الكل ويعدي وياج جن ما صاير شي ويضاحكج لا والله خالة لو عد زلمنا حرام يحطونهن ويكصبوهن بس حازم زلمة يخاف الله وحكيم تحمل المصيبة وتهده برحمانه 

والا راد يوكف كلبه يا خالة من كبر المصيبة بس ما جار عليج ولا اذاج لو ع الزعل هينة .. لا تنترين ولا تزيدين فوكه بتي اكسبي راعي لا تعوفينه ترا بس الله يعلم الجاي يمر بيه وشجاي يسمع من الناس لا تصيرين انت والدنيا عليه . 

-الله كريم مراعيته والله وحاطته بعيوني بس بعد شسوي بقت يم الله اليهدي سرنا . 

-الله يهديكم ويثخن لبنكم ناخية الزهرة وانت شتريدين شتحتاجين كليلي اني يومية اطلع للسوك اتسوك للبيت خابريني واني اجيبلج التريدينه بتي انت 

-الله يطيج العافية خالة ويجازيج بالحسنى بحق هو الحق 

-الله يحفظج يمه يلا سدي بابج خل اروحن لعمتج ام السان امرلها اودعناج. 

سلمت ومشت سديت الباب وراها وطبيت للبيت 

يصوصي والكهرباء طفت من اني احجي ويا الحجية .. 

سويتلي قوري جاي وكعدت برا لوحدي اشرب واصفن بدنياي .. 

ضوجة حيل رغم اهله وكرايبة كلهم داير مداير بيته بمنطقة وحدة .. بس ما يقبل اطلع لو امشي حتى لو واحد منهم دعاني .. كتبلي حبس بالبيت وما يحجي وياي عقاب ع الصار . 

احاجي روحي : هسه لو مكينتي وغراضي عدي 

جا هسه حاطتلي ثوب اخيط والتهي ما اصفن هالصفنة هاي .. 

خل اكلله بلكي يجيبلي المكينة 

بس شكله خاف يروح يطنكر بالزايد 

شفت الكهرباء اجت كمت دخلت جوا الهي روحي واسوي عشا .. البيت اسوي عشاهم وحد .. وحازم وحد لان الدكتور كتبله لستة توصيات لازم الاكل صحي ما بيه دهون .. 

شويتله ٤ بيتنجانات كبار .. وضميتهن اله 

وسويت عشا البقية .. هو مو شغلي وما ملزمة باحد غير حازم بس من الضوجة واحد وين يروح واني احب شغل البيت خصوصا اذا اكو سوالف براسي اتونس بالشغل .. ما يتعبني .. يلهيني. 

بس اجت امل اني انسحبت بغرفتي وكعدت 

وهي خذت العشا وكعدت تاكل هي وجهالها .. نمتلي ساعتين وكعدت حازم بعده ما جاي .. رحت للاستقبال بس علي وسجاد كاعدين .. امهم ودنيا فوك .. هستوني جاي اكعد طب حازم شايل وياه مسواك مشتري بطريقة وحلويات .. 

صاح : علي بابا هاك كوم ودي لاختك فوك وامشي جيبلي ملابسي حيل تعبان .. يلا ابني 

رحت للغرفة طلعت ملابسه اجا علي اخذهن وصحت لسجاد كتله : گل لبابا متعشي لو يسوولك عشا شاويلك بيتنجان 

راح ورجعلي : يكول ابوي سوولي ما متعشي 

كمت شويتله طماطة وحطيتله روبة وزلاطة .. وانطيتها لسجاد ورحت للغرفة .. احاجي لو يريدني اكله ع المكينة 

بس اني حتى احتاج فلوس اشتري ملابس نص اثوابتي كصصها .. احاجي لو يفشلني ؟ 

لزمت قلم التحديد وكتبت ع المرايا ( اريد اشتري ملابس ما عندي ) بخط واضح وجبير بنص المرايا

طب هو للغرفة ، استحيت اشوف ردة فعله واحنا ما نتحاجا طلعت بسرعة من الغرفة لكيته ماكل اكله كله .. فرحت .. شلت الصينية ورحت اغسلها .. رجعت لكيته مطفي الضوا ... 

ما عرفت من مطفي شايف الكاتبتة لو لا 

المهم سديت الباب ونمت .. للصبح صوت المنبه يدك وهو نايم يجيب راسه منا ويحطه هنا .. شلت روحي اكو ضوا بالغرفة كمت على حيلي شغلت الضوا حتى يكعد وكضيت الباب اريد اطلع ...

انتبهت للمرايا مكتوب ( حطيت فلوس وممنوع الطلعة ) 

باوعت حاطلي فلوس ومخلي العطر فوكهن .. سحبتهن خمسين الف 

باوعت وراي بعده دافن راسه نايم .. 

طلعت واني احاجي روحي .. اذا ما ترضى اروح اجيب لروحي المن منطيني فلوس .. خو خليهن عندك وانت جيب .. جا منين اتسوك واجيبلي هدوم واني محبوسة من السطح لو من الحمام 

كمت سويتله بيض سلك وجبن عرب وجاي خدرته وحضرتله الاستكان على ما غسل وبدل تركت المطبخ ومشيت للغرفة رجعت نمت بمكانه . 

تريك ريوكه وطلع 

كتبتله رسالة ع التليفون ( راح ادز بيد ام فراس اقمشة اخيطهن الي اريد مكينتي اللي ابيت الشماعية ) 

ما رد ولا حجه بس خابرت على ام فراس اوصيها على كم اقماش 

كالت ( بعيني ) صدك شوية ومرتلي واخذت مني الخمسين وراحت للسوك مشتريتلي ثوبين حاضر كلش حلوات عجبني مشتريتلي ٥ اقمشه كشمير مختلفات بين السادة والمشجر . 

للظهر خابرتني مرت جعفر كالتلي : حازم برا يكول على مكينة ما افتهمت 

كتلها : طلعيله مكينتي وكل غراضي الخيوط والمكص والشغلات كلهن لا تنسين شي واكو علاكة جبيرة بالكنتور هم دزيها بيها غراض مال تفصال تفيدني 

- خوش 

سديته منها .. صدك جابلياها وكعد ينزل بيها 

طبت امل للبيت ويا طبته ب٢ ونص .. كالتله شنو هاي ؟ 

ما جاوبها كام يصيح على ولده يساعدونه ودخلوها جوا للغرفه وحطلها مكان وثبتها بعالاثناء اني صبيتله اكله .. 

وكلت لسجاد : گل لبابا اذا كمل خل يجي يتغدا 

راحله .. مشى بدل وغسل واجا ياكل نزلتله امل تحاجي ما يحاجيها استغربت ! كالتله : مو احاجيك ليش ما ترد 

ما جاوبها 

كامت تدردم .. ذيج تسوي المصايب وانت ادير عني 

اني ليش ما رضيتها الك وردت غيرها عبن اعرفها سماوية تغيرك عليه ها هالمزاعلني جيف هي زعلانة عليك  وما تتحاجون اني ياهو مالتي بنصكم .. 

يمه سراحية مي حاطتله بيها ثلج ركعها بالكاع وكاللها : امشي كوووومي مني دايخ بت ***** 

كامت تتعارك وياه شلون يسب ابوها 

وهو كام يزيد .. وصارت هوسة .. عاف اكله ودخل للغرفة 

اني بالمطبخ دخلت عليه تصيح : الله لا ينطيج العافية ان شاءالله ما ينلام من خلاج الله عاجر بس شيسوي بعد ويكسر عينج يا العاجر . 

مجاوبتها وسويت نفسي ما سمعتها ابد .. 

كملت شغلي ورحت طلعت الاقمشة والمكص وكعدت برا اكصص بالقماش واصفطه بمكانه وارجعه .

وبقيت كاعدة بالاستقبال وحدي اعدل بالاقمشة واكملهن حتى من يطلع حازم اكعد ع المكينة .. لل٤ امل طلعت من البيت اني على كعدتي بالكاع مصفطة واتمعمر بالمكص 

طلع هو واجا كعد بالاستقبال 

ما باوعتله بس حسيته يباوع حتى يعرف شكاعد اسوي .. 

طبت امه للبيت سلمت ليمت غراضي وكمت سلمت عليها وكالتله : شني متعاركين انت وامل 

- وشنو الجديد ؟

- شنو السبب 

- اني روحي طالعة منها ومحمل عليها هواي والا اكو مرة ترد لبيتها ٢ ونص وترجع تطلع ب٤ بيت هو يمه لو فندق 

- جا غير شغلها !؟ 

- انعل ابو شغلها لابو الجابها علي 

- تكول حا مو كلت يتزوج وبعد مالي غرض بيها 

- مالي غرض بيها شي مرة على ذمتي لو لا .. 

كام يتحاجى اندكت الباب كام الها طلعت ام فراش تلكيتها وكعدت يم عمتي اني رحت على علي كتله : اخذ من ابوك فلوس وامشي جيبلي كعك 

وسويت كعدة وحازم كاعد بالاستقبال وام فراس تسولف وياه .. 

كعدت يمها وكالت : عين النبي عليج خالة شسويتي بالقماش خيطتي 

- لا والله بس كصصت كلت فد شوية اكعد ع المكينة 

- خياطج حلو حلو 

- اي والله جانن نسوان المنطقة كلهن يجني بس بعد ما اشتغل بس لروحي 

- عليمن خالة التجيج خيطيلها واخذي شغل ايدج  طاكاتج بعصه شو هالكاعدة وما عدج شي 

حجه حازم : ام فرااااااس 

- هاااا 

- اي شلونج شخبارج 

ضحكت عرفت شقصده وامه تكلي : جا ما طول عدج مكينة ما تخيطلي شمالج 

- انطيني قماش واخيطلج بعيني كم سعودة عدنا نخلف نجيب غيرها 

ضحكت هي وام فراس وتكلها : بربو* غاشة الوادم بلسانها 

حجت ام فراس : خية هو ابن ادم شعده غير السانه .. والبنية هالتكلج اخيطلج شتسويلج بعد وترضين 

كمنا نضحك .. 

وضليت كاعدة وياهن حازم ماطلع ضل كاعد .. ويسولف ويداهر ويا امه .. كعدت ابوع بيه وركزت بيه وهو يحجي احس مشتاقتله حيل ما ادري شوكت يتعدى الموضوع ويصلح اللي بينا .. 

ضليت صافنة عليه وعلى حركاته لحد ما اندار عليه باوعلي وحط عيونه بعيوني ابتسمتله .. اندار وهو يحك كصته ويرجع يمسح على لحيته ويذب حسره ..  

كام من مكانه وهو يكللها : يمه اني راح اكعد بالغرفة انتم اخذو راحتكم 

امه : جا ما تطلع اليوم 

- لا والله ما ناوي اطلع 

- جا ومحلك 

- حاط بيه حسنين كاعد يشتغل 

- مو مثلك عينك على مالك دوا 

- كعدت الناس ومسامرها ما كمت احملها يمه خليني هنا احسنلي . 

كام طلع اني هم شلت الصينية وكمت للمطبخ نظمتها وردت امشي لغرفتي لكيته واكف ع المرايا يمشط بلحيته .. صرت وراه وبست ظهره ومحجيت شي .. عفته ودخلت للغرفة 

كعدت ع المكينة انظم بيها هو خابر على محمد كاله : ها ابو جاسم وين انت 

- هستوني طلعت خير 

- اكلك سمعت جاياتك كم فلس 

- منين سمعت االله اكبر اليوم استلمت السلفة شدعي عليج يمه ماكو غيرها ذبتها يمك 

- هسه دسمع يا خوية اني هم اخيك وما احط عيني على فليساتك بالعافية 

- جا شتريد 

- التلفيزيون مال الصالة مالك حيل عاجبني 

- خب دكوووم واضل بلا تلفزيون 

- والله يا محمد هاي مشكلتك بعد خوما اكعد احتار بعندك لو ما عندك 

- وفلوسك كليله ما تشتري تلفزيون 

- اخ اشتري ليش واخوي عده صدك جذب .. دسده خوية سده خل اروحن اجيبن التلفزيون 

كام يضحك محمد وهو يكله : لا بداعة امك مو هسه اقلها خليني بس اشتري بمكانه 

- اذا عفتك تكوم تجر بذيلك ما تشتري بس من اخذه تستعجل ومن عين باجر تجيب جديد 

- امرنا لله عمي اخذه 

- شنو مان عليه انت ترا ما اخذه والله احترم نفسك 

- بس التلفزيون مو الستلايت 

ش لا طلعت صدك ما تستحي امشي ولي امشي صوجي مقدرك وكايل اخوي ومخابرك ول .. 

صاح بيه وسده .. 

اني كاعدة ع المكينة انظم ومبتسمة على سوالفهم

راح جاب التلفزيون واجا حطاه ع الميز وكعد يربط الستلايت بيه ووكف علي كدام التلفزيون و صعد هو فوك ويصيح : ها اكو اشارة 

وعلي يصيح : لا لا 

اجت اجت ... راحت راحت .. اجت 

وساعة صياح لحد ما ثبته ع الصحن .. ونزل 

اني عفت من ايدي المكينة والخياط وكمت للمطبخ اجهز العشا .. ورا صلاة المغرب طبت امل .. باوعتلي واتعدتني ومشت راحت للغرفة مالتي شافت حازم كاض الريموت ويصفط بالقنوات 

صاحت : دنياااااا .. دنيااااا 

صاح سجاد : نايمة ماما

- لحد هسه نايمة كعدهااااا 

نزلت دنيا وبيبيتها ترزل بيها جيف انام هواي .. 

حطيت العشا وكلهم كعدوا ياكلون واخذت صينية عشا حازم للغرفة حطيتها كباله .. 

ورحت كدام المكينة هستوني كعدت واني شايلة ماعون مخلية بيه كلاص جاي ولفة مال حميسة .. واخذت الثوب طبت امل للغرفة كالتله : اريد احاجيك 

ما جاوبها 

حجت : اريد احاجيك ليش داير عني لازم نخصم المشاكل البيناتنا ونحلها خوما نضل هيج وبزرنا يباوع مشاكلنا 

- شرايده ؟ 

اندارتلي : امشي اطلعي هناك خل احجي 

ما باوعتلها ولا رديت وحجيت صاحت : مو احاجييييج 

صاحب بيها : امشي للاستقبال وجاي وراح لا تعجرييين 

مشت وهي متضايقة .. 

هو عدل البيده وعاف التلفزيون وكام .. 

وهي طلبت من جهالها يصعدون فوك تريد تحجي 

كلهم صعدوا .. الباب مفتوح والبيت صار هدوء .. كعد حازم وامه وهي حجت 

- انت اتزوجت واني ما عارضت زواجك وجبتها وخذيت غرفة جهالي وحطيتها وسكتت بس الله من سن الزواج الثاني شرط العدالة والواحد لازم يعدل بين نسوانه 

بس اني اشوفنك مو عادل بيناتنا 

هي سوت مصيبة وجابتلنا حجي ومتازعل وياها ومع هذا انت مكابلها وكاعد بالغرفة واني وياك ما صاير بيناتنا شي وانت كارهني ولا ترد عليه ولا تحاجيني وهاجرني وهاجر غرفتي ما صاعدلها وناسي دربها منين 

يصير ؟ انت مو انسان مؤمن وين عدالتك بيني وبينها 

راد يحجي كالتله امه : صبر صبر شوفي بتي اني تعرفيني وياج ضده من اول هالزواج بس هسه لو كتيلي ويامن اكلج لا والله مو وياج مو اكرهنج .. بس بتي اكو اصول 

انت مراعية الاصول ويا رجلج ؟ 

زلمة مريض وطاح وتخربط دريتي عن اكله شربه شيحتاج ما يحتاج ؟ شلون يعدل بين اثنين وحدة يكللها ما مبرية الذمة تطلعين وتخالفة وتطلع وتطب وتتأخر وما تدري عنه شكل اشرب لا مكاعدته لا مكابلته .. وبين وحدة كلمة كال ما تطلع ما ثنتها .. شكك هدومها وكاللها ممنوع اتطلعين راحت تخابر للجيران يجون يشترولها ما وكفت وكالتله شنو مشكك هدومي وما تريدني اطلع لو راددته .. متزاعل وياها وداير عنها .. وهي مراعيته من الصبح تكعد كبله خاف يتريك برا واكله بيه دسم تركضله تسويله اكله وتحضر غداه وتفكر بعشاه واني متابعتها القميص الينزعه حازم اليوم الظهر الكاه مشرور ع الحبل بالكراج .. جا عدالة بتي يعادل وحدة خادمته وراكضة بامره ويا مرة لا طايعته لا تدري عنه ولا مجابلته 

اني اول وحدة وكفت ضدها وحسبتها بت تريد تهجم بيت ابني وعايلته ونهرتها بس الشفتها منها ما يشبه الفكرت بيه .. عابيناها من عرفنه متزوجته بالسر وحسبناها مو خوش بس طلعت البت يتيمة ومضيومة وتريد بس التنستر جوا جناحة وهاي شوفت عينج اطبين اتطلعين تتصايحين وياها ردت عليج تعاركت وياج من طبت وليجاي سوتلها مشكلة لو بس تريد تعيش ؟ 

لا بالله مراعية جهالج اكثر منج تركض تسوي ريوكين وغداوين وعشاوين لرجلها وللبيت لا كالت شني همه جهاله واخدمهم ولا كالت شني مرته بس تطلع واني اخدم وانظف 

بنية شايلة رجلها والبيت وجهالج وحتى انت شايلتج والله كم مرة الاكيها شارة هدومج من بين الملابس ع الحب لا كشت ولا كالت شني اخدمها .. البنية لا جاية هدامة بيوت ولا رايدة مشاكل عليش يمه ما تخاوينها وتمشين وضعج وياها وتكفين المشاكل من البيت ؟ 

- واني شعدي وياها مو هالعايفتها 

- خالة هي العايفتج مو انت لو رادة عليج بحرف حرام تسوينها بحور بس البت تحجين وهي ساكتة .. عبن زلمتها مريض وما رايدة تتعب راسه بالمشاكل .. هو الزلمة شيريد غير مرة تداري وتطاوعه 

من ادارين رجلج واطاوعينه احجي بالعدالة بتي هسه حرام لو عدل بيناتجن ظلمها .

شني يمه خليني من جيت وكعدت وشفت خالة ياخذج الصبح يردج نصاص الظهاري تنامين شوية ورديتي طلعتي ما رجعتي الا تظلم الدنيا حجي هذا يمه يا زلمة يرضاها حتى حازم يرضالج 

- واني رايحة العب غير اشتغل يا خالة

حازم : وياهو الطالب منج تشتغلين 

- ليش جا ما كاعد اصرف ما كاعد اجيب لجهالك 

- تعيريني بالتطينه الجهالي اكعدي ولا تطين ياهو الرايد منج تجيبين للجهال اني اجيبلهم ملابسهم 

- اكعد ليش احنا مو اتفقنا تاخذلك مرة وتخليني لشغلج 

- رحم الله والديج هاي اني خذت مرة وعفتج لشغلج عليج مكاعدتني هسه جا اذا متفقين وجاية تريدين عدالة وتصيحين هاجرني وانت سنة ما كربتيني ولا ادنيتي لفراشي 

ما رايدة عدالة ولا مضايقج هجري امل اني ادري انت ما تهويني بس الجايبتج كبريائج وغرورج شلون هاجرج ومكابل غيرج .. 

غير امور ابالي اني كاعد اتأكد لو عرفت الج ايد بيها ساعتها ما تعرفين اليجرالج مني 

- وشني هاي الامور 

- امور خليها بگلبي . 

كامت من عنده متضايقة روحها طالعة .. 

اني سديت باب غرفتي لا تجي تذب حركتها بيه .. وجريت الريموت اكلب واشوف التلفزيون هذا شبي .. لكيت قناة ابو ضبي .. تركته طالع مسلسل ( ابله نوره ) عفته وكعدت اباوع و اخيط واكل شوية 

لهناك طفيت وعفت التلفزيون مشتغل ونمت ع الجرباية ما نمت بالكاع .. دخل هو لكاني ع السرير جر المخدة ونام بالكاع ما نام يمي 

تنهدت : والله عاد صارلي كم يوم اني كاعد انام بالكاع حتى ما اضايقه بس هاهية شني خو ما اضل نايمة بالكاع وهو فوك .. يريد يجي يمام يمي هلا بيه ما يريد براحته . 

صبح الصبح مطنكر شلون نام بالكاع ظهره متكسر من البساط كالتله امه ( صباح الخير ) يكللها ( عرفيني يمه ظهري اموتني ) 

كالتله : ادهنه الك .. 

عاف وطلع لدوامه اندارتلي : رجلج شبيه ظهره 

- نايم بالكاع 

- عمت عينج واني امس امدح بيج واكول خيرة منومته بالكاع ولج 

- لا والله بس ابنج يتعاير شلون شافني نايمة ع السرير نام بالكاع .. منو جابره ما نام بمكانه 

- يا صدك يتعاير هذا جا شني تنامين بالكاع 

- اندري غير هذا ابنج المدلل الشايف روحه 

- تغديله فدوة ام الوصخ شايف روحه 

- جا صدك شايف روحه مجذبة اني ..

- اتهدي اتهدي مدحناج كبر راسج 

- اي والله شكو تمدحيني هم صوجج اكول اسوي ريوك نتريك لو نرجع ننام 

- والله شكلج .. نعسانة بس جويعانة وهاذ حميد من فلك الفلكه امس كام يعاتب جيف ضالة هنا وما اردن لبيته 

- والله خبصنا هالمحمد هذا شنو ما نطيج كوة .. خابري كليله صبا ما تسمحلي اطلع ممنوع 

- فلك الفلكج ما تسمحيلي ولج 

- طبعا اسعيدة شوفي لا تشوفيني خيرة ترا بالعباس باب البيت لو عكبتي لا اكض مسدس سجاد ابو الصجم واطكج تعرفين وين 

غمتني وهي تضحك : دكومي كومي سويلنا الريوك جا كومي .. 

- اي هيج صيري حبابه عوفي محمد 

ما دام اني محبوسة هنا تنحبسين وياي شحدج اطلعين باب الحوش 

- تتأمر ست صبا 

- جا وين اروح محد يعبرني هالكدرتي عليج 

كضيتها وكمت اضحك وهي تضحك وياي وتغمني : ديلا سويلنا اريوك يلا . 

- من هاي العين وهاي العين 

كمت سويت وكعدت وياها نزلت امل عاكدة حواجبها ما كابلتنا .. طلعت كبل .. وراها كمت للبيت 

بالليل من طفيت ونمت بفراشي طب حازم لكاني هم نايمة ع الجرباية .. هاد فتح الغطا ونام بمكانه ما نام بالكاع بس انطاني ظهره 

عاد اني عفتله الغطا من انطاني ظهره وكمت جبتلي غطا ثاني اتغطيت بيه ونمت . 

وضل هذا حالنا 

مرت ايام واحنه على هالحالة .. 

لا هو يحاجيني ولا يكربني واني مكملة كل واجباتي اتجاهه .. 

مو احتياج ولا جفيان مشاكل وحتى اداري وضعي وياه .. بس اهتمامي بتفاصيله من حبي اله رغم زعلان بس احبه واشتاقله واعرف حجم المشكلة والحجي الكاعد يسمعه من وراي .. فلهذا عاذرته وحبي ما قل بزعله . 

اما امه فكمت اشوفها تميل الي اكثر من امل .. رغم شكد جانت صافة وياها .. وكامت تبقى يمنا اكثر مما تروح لبيت محمد .. والصدك اتونس وياها بدونها البيت كلش ضوجة يصوصي .. فمن تريد تروح اعرضلها ما اقبل . 

كام حازم يحط يمها المصرف من يطلع الصبح 

يعوف ١٠ الاف خاف نحتاج شي ندز بس هي شوية هم كلاوجية تقطر علينا تقطر والباقي من المصرف تخلي بجيبها ونضل احنا نسيس

.. بهالفترة اجا رمضان وحازم اتسوك من كلشي كونية تمن كونية عدس لحم دجاج مخضر شعرية وهالسوالف كلهن جابهن .. 

فاول يوم وبعدني بحماسي .. بدعت بالاكل واحتاجيت زبد للكعك كتله : علي روح اخذ من بيبتك فلوس جيب زبد راحلها تكله : خلي تسوي بزيد الا زبد عليمن هالصرف 

رحتلها : خالة ميصير بزيت يخرب الا زبد 

- عوفي هو ياهو الياكل كعك الواحد من يفطر بعد يضله نفس ياكل شي 

- خالة هسه اني احبه دززي 

كتله : روح اخذ من عمك محمد ومن يجي ابوك اخذ منه ورجع لعمك 

صدك راح جاب واجا

احتاجيت كشمش للبرياني كالت : مو الكل يحبه عوفي 

وهم ما رضت تطي .. اضطريت اعرفه 

لحد ما رجع حازم 

اني مسوية اكل حازم برياني بس بزل .. 

بزلت التمن بزل و الدجاج فلسته مسلوك وحطيت الحبشكلات .. وسويته برياني صحي والباقين صفطتلهم كبة وبرياني وكاستر ومقبلات و وطرشي وعصاير والبان .. 

فطروا واكلوا الاكل كله بس ولا واحد انطى رأيه بالاكل طيب لا .. بس اكلوا .. بس فرحت لان انوكل كله .. 

كمت حتى الم السفرة كتلها : دنيا نقليلي المواعين للمطبخ 

سمعتني وغلست كمت اصيح عليها اجتني امل تكلي : وشني بتي خدامتج وتسخرينها بت الاوادم احترمي روحج وما مسموحلج اتصخرين اي واحد من جهالي حتى علي افتهمتي لو لا .

عفتها ومشيت لميت السفرة ونقلتها وغسلت المواعين وحطيت قوري الجاي على نار هادية شمرت بمي وتايت بالبيت وجريته بالماسحة ورجعت وراه بالوصلة وركضت للحمام خمس دقايق هواي عليه بالسبح بسرعة طلعت علمود الجاي ليحترك 

حازم جان كاعد .. حطيت صينية الجاي وصبيت لعمتي ولحازم وكعدنا بدا الجزء الرابع مال باب الحارة .. واني حيل احبه ومتابعته كتلها : اي خالة بروح ابوج لديري خلي 

بقته كتلها : انطيني الف خل ادز حب شمس 

كالت : انت شكثر تصرفين ملاحظة روحج اشكد اتطلبين

كتلها : خالة مو المصرف يمج 

- جا المصرف اتصرفينه غير ع البيت لو على بطنج المرة الزينة التلم رجلها مو تبذرهن على حب وكشمش وهالسوالف 

- خالة هاي اول مرة اطلب روحي وادز حب 

كل مرة غير اطلب اسوي اكل قابل بس اني اكل غير الكم 

- لا اقتصدي شني تبذرين تبذرين تبذرين ما يصير

شي كعك شي حب شي مادري شنهو لا ما يصير هاي بس المرة الرعنة التصرف هواي وما تلم رجلها 

كتلها : هاهية خالة لا تدزين ما اريد اشرب جااي وانتهت 

سكتت بس العبرة وكفت ابلعومي لان اصلا هالعشرة هاي مصرفنا اللي بالبيت اني جهاله شنحتاج شنشتهي ندز .. بس تكلي رعنة على مود حب شموازيني 

حازم كاعد يشرب جاية وسمع الحجي .. خلانا نسكت وكل وحدة تندار 

صاح : سجااااااااد 

اجا يركض : ها بابا 

- هاك هاي خمسة اشتري حب شمس بالفين وباكيت جكاير وشوفهم شتريدون من الدكان طلبوا 

اندارتله كالتله : عدي العشرة ما صارفة منها غير الف ونص معجون بس ابني لم فلوسك لا تبذر 

- يمه اني منطيجياه تلمينه رحمة للعباس كاعد ايجار لو اروح واجي مشي حتى ابخل بالالف والالفين على عائلتي غير هاي العشرة مصرفهم

-لا هذا الحجي مو صحيح خوما الصرف كله للبطون ضملك جم فلس جدد سيارتك اشتريلك قطعة باجر عكبة ولدك يكبرون وانت عندك اثنين نسوان شنهي تخليهن طول العمر متكابلات .. 

- يمه والعشرة راح تشتريلي بيت لو تجددلي سيارة شبيج يا يمة 

- عشرة على عشرة ثلثمية بالشهر .. شوف بالسنة شثكر تلملك 

- يا بويه واني اكطع مصرف عائلتي حتى الملي كم مليون نهاية السنة شبيج يا يمة 

صحت : كافي خلي نسمع ما افتهمنا شي من المسلسل 

حجيتها حتى اقطع حديثهم لان لا هي راح تقتنع بحجيه ولا هو بس كاعد يتصايحون 

صدك سكتوا وسجاد جاب حب واجباس وحلويات .. 

اخذ منه باكيت الجكاير .. واشرله عليه انطاني العلاكة .. اخذت الحب وباوعت امه ما راضية كتلها : سعودة تريدين حب لو لا ؟ 

 -اكلي شبعي ام بطن كلها على *  ذابتهن 

ضحكت ودغيتها من خصرها : اكلي داكلي عيني سعودة المسعودة بلكت تصير بيج لحمة ويتخطبونج بدل ما ضالة مكابلتنا وكاعدة 

- انهجم راسج 

ضحكت وكمت اسلس واكل وياها وهو كام طلع .. 

ثاني يوم الصبح لكيت حاطلي العشرة ع الميز تواليت وكاتبة : هذا مصرف البيت اشتري منه واليزيد منه مصرفج . 

ابتسمت .. وخذيت العشرة خليتها عندي ورجعت نمت 

للظهر كعدت بدعت شسوي ع الفطور .. سويت مطبك سمج وروبة ومرك تبسي وكيك و كاستر عليه شعرية وزلايط وصفيتها سفرة تموت .. 

سالت عمتي حازم كالتله : شو اليوم ما خليت مصرف 

كاللها : ما يحتاج اذا تحتاجون شي خابروني واني اجيب قررت اخذ بحجيج واقتصد  

ابتسمت ودنكت .. 

عمتي كضت فطورها ومشت لبيت محمد وحازم طلع اني كعدت بغرفتي اتابع واسلس حب .. 

عادة برمضان يختل برنامج النوم 

الكل يسهر بالليل لحد صلاة الفجر .. بس حازم وامل ينامون فاني من تصير ب١٢ وحازم يتمدد بفراشه اطفي التلفزيون واطلع اخلي ينام وافرش سجادتي بالاستقبال واقرا قران اخلص ختمة واقرا ادعية . 

الساعة جانت بـ ٢ واني ارتل 

سمعت صوت بالكراج .. سديت القران وبسته وعفته ع السجادة .. وفتحت البردة حتى اشوف صوت منو اللي بالكراج يبسبس 

جان مطفي الضوا البرا ... مشفت شي 

فانداريت اريد اطلع للحوش .. طبت دنيا من برا كتلها : وين جنتي 

- معليج 

- ويا منو جنتي تحجين 

- ويا منو شنو كاعد تتبلين عليييييه رحت للحمام واجيت لازم اخذ اذنج 

- ليش دا اصيحين ابوج نايم 

- اي لعد لا تكوغين كبالي افتهمتييي يلا ولي 

- لا تغلطين ترا والله اروح اكعده واكله عليج يشوف شغلة وياج 

- لا يمه خوفتيني  دروحي روحي 

كاعد تمشي .. طفت الكهرباء .. ضوا بجسمها حست هي بسرعة عدلت نفسها وصعدت فوك .. 

كلت معليه اني شلي شغل ادخل البنية عدها ام وهي مسؤلة عنها اني مكروهة وجابت بت من احجي انعاب .. رجعت اقرا قران لحد ما صار وكت السحور سويت وكعدت الكل 

امل تصيح على دنيا 

ودنيا متضايقة ما تقبل تنزل تاكل 

صعدت الها لاكيتها تبجي سالتها شكو شبيج ما راضية تحجي 

صاح حازم : شبيها 

- ما ادري دموعها تجري وما ادري شبيها ومن. مضايقها 

كام صعدلها ونزلها وهي عيونها مورمة وتبجي وتباوعلي .. 

كعدت يسولها لكم وهي تكله : بابا راسي يوجعني ) 

- ميخالف بنيتي بس ذني ما يصير تصومين وبطنج فارغة 

امل تابعي البنية اذا الصوم ياذيها فطريها 

- شمدريني شو هي من صايمة ما اتاذت هسه تتأذى 

- خاف ضغطها نازل لو احد مفتح جا خطتها 

يحجي ويوكلون بيها .. 

كضيت السحور ونظفت اللبيت ورجعت للغرفة حازم كاعد يصلي الصبح .. كمل صليت بمكانه وطفينا ونمنا وهم منطيني ظهره 

ثاني يوم الظهر هستوني جنت كاعدة كاعد اصلي 

وحازم بالغرفة هستوه جاي صايم و يريد ينام .. وامل دخلت البيت ربع ساعة ضلت فوك ونزلت تمطر وترعد فوكاي وتصيح : تعاي ولج تعااااي 

امس بتي تبجي وراسي يوجعها ما تكولين اني شمسوية بيها 

- شمسوية 

- تتهمين بتي وتكليلها ويامن جنتي تحجين برا 

- ما تهمتها سمعت صوت وجنت رايدة اطلع وطبت هي سألتها وضلت تتجاوز وعفتها 

- انت منو وتتهمين بتي اشايفة بتي مثلج ما مترباية 

- رمضان وعيب هالحجي كتلج ما تهامتها اذا هي كاعد تجذب عليج مشكلتها

طلع حازم : صوت بنات الاوادم شكووو صايمين ما نرتاح صياحجن واصل ليويييين 

- اسمع تعال شوف شمسوية امس بحال دنيا البارحة 

- ما سويت بس سألتها 

كامت تبجي دنيا وتكله : اباب كضتني من اذاني تكلي وياكن جنتي تحجين 

- عزا العزاج يمتى اني كاضتج من اذانج 

- والله انت كضيتيني اكللها ما جنت احجي تكلي بس يكعد ابوج الا اكله شفتها تحجي ويا واحد 

صاح حازم : شني هالحجي عيييييب 

- بابا هي تكول عليييه هيج 

وكامت تبجي بقوة وامل تكول : وانت ما تستحين تتهمين بت زغيرة بس اذا انت متهومة ومفضوحة شنترجى منج تسترين غيرج بس والله والعباس لو كربتي بتي لو حاجيتيها وعلي اشرمنج شررررم 

- اكلج احترمي نفسج احسنلج كاعد اكلج اني ما تاهمتها 

حازم كام يصيح و دنيا تبجي وتصيح وامل تصيح اخر شي ختمها وهو يصرخ بقوة ويصيح بدنيا تصعد ويا امها ويصيح بيه : امشي منا بسرعة 

- ليش كاعد دا تصيح عليه اني ما غلطت ويا احد 

- امشي من كدامي لا ومحمد ما تلومين الا روحج 

عفته ومشيت للغرفة بس كمت اغلي طب للغرفة تخصرتله : انت مترد بتك الكاعد تجذب وتتهمني تصيح عليه 

- وخري مني صايم وتعبان .. وخري 

- وبس انت صايم احنا كفار بتك كاعد تتهمني واني احلف ما كاضتها من اذنها ولا تاهمتها 

- صحت بيها وبيييييج فضينااااااا كافي 

سكتت عنه وطلعت كمت اروح واجي والعبرة خنكتني .. 

كضيت تليفوني خابرت على سهى ما سولفتلها بس كتلها : متاقتلجن واحس كاعد اختنك من البيت ومنهم .. رايدة التم وياجن اكعد تعبت 

كالت : يجي رجلي واكله نروح للشماعية وتعاي وخلي نفطر اليوم كلنا ونلتم ونسولف ونضحك . 

- ويرضى اطلع واجيكم 

- يا ووين جاية قابل شو بيتج 

- ما يرضى اوصل للكراج يمعودة 

- وليش بالله 

- غير بسبب الصار 

- يا فدوة وشني حاطج بسجن صبا انت ليش غمة 

ساجنج وصايرتله خدامه اله ولبزره وفوكاها هو ابو الراهي متزاعل وياج 

- شسوي سهى شبيدي الصار مو سهل ولهسه الناس ما صامه حلكها منه 

- دخل يولي جا يطلعها بيج شني تموتين روحج واللها الناس تحجي خل تحجي ياهو مالته 

- ما ادري ما يرضى

- لا اضلين غبرة امشي وكليله اريد اروح للشماعية لا اضلين يدمغ فوك راسج وانت ساكته 

- بس هو ما ضاربني 

- جا هي عوزها بعد بس يضربج 

- لو اجيت للشماعية ولكيت حيدر 

- مالج غرض حيدر ملتحق وما يجي بيت الشماعية جيف مرت جعفر كاضة عدة بيه . 

- ما ادري خل اكله واجي يمكن لان من صدك طكت روحي منهم 

سديته منها ومشيت هو متمدد بس ما نايم ديحاول ينام 

كتله : اريد اروح لبيت الشماعية 

ما جاوب .. 

حجيت : مو احاجيك اني طكت روحي اريد اروح هناك اكعد ويا خواتي اشوفهن التم وياهن هنا اختنكت . 

- باب البيت لو تعديتي مالج رجعة منه 

- شني جاي تهدد ؟ 

ما جاوب 

حجيت اذا اني هيج رخيصة واذا اطلع بعد ما لي رجعة 

خليني اطلع ولا هالرخص .. 

جريت الجنطة وكاعد افتح الكنتور كام جراها وسحبني من ثوبي وهو يكلي : هسه ليش تخليني اذيج احترمي روحج وفكيني لا بالعباس ضيم الدنيا المتجرعة من وراج كله اطلعه بيج .. 

دفعني وهو يصيح : كعدي 

كمت ابجي واحجي : كل البالبيت كاعد يروحون ويجون ويطلعون واني هنا صايرة مدمغة يصيحون عليه وانت ما تحجي اني اريد اشوف خواتي معليه ما ابقى .. اريد اروح تقبل ما تقبل 

كام على حيله كال : شنو كلتي عيدي 

درت من عنده ورفعت ايدي خفت يمد ايده حجه : دعيديها وشوفي شسوي بيج 

كمت من مكاني وطلعت برا ابجي .. 

وعفته ينام بالغرفة .. وضل بالي يفكر ويجرخ ويجيبها منا ويردها منا .. بعدين صفنت صدك اني شكو كاتلة روحي ورايحة للشماعية  وتعاي اتسوكي واطبخي واصرفي .. لا حرام الا اعزم اهلي للبيت هنا وكلشي من عنده . ما طول ما خلاني اطلع 

خابرت لسهى كتلها : ما رضى اجي للشماعية بس تعالن انت عندي خل اكوم اسويلجن جدر دولمة يخبل نكلبه ونلتم احسن ما نروح هناك للشماعية 

كالت : جا خلي اخابر على منى اكللها حتى نمر بيها اني ورجلي نجيبها 

- ديلا رديلي خبر حتى اكوم اجهز من هسه 

خابرت ورجعتلي كالتلي العصر احنا يمج .. طلعت اللحم ذبيته يموع ورحت للغرفة فتحت الكنتور .. كعد هو حسباله هم كاعد الم غراضي شافني طلعت ملابس داخلية ولفيتهن بالثوب .. عرف اريد اسبح 

رجع راسه حجيت : عزمت خواتي راح يجن العصر 

جيب سمجتين وكيلو بقلاوة و كعك ابو السمسم .. بس السمج اشوي برا لان كاعد اطبخ ما اريد ازفر المطبخ والاكل يلكف زفر ذبه ع الشوي يسكفه .. 

- انت كاعد تتأمرين عليه عود واتعزمين بكيفج بدون علمي 

- اتأمر واعزم عاجبك عاجبك ما عاجبك 

- ما عاجبني شسوي ؟ 

كام نزل رجليه من السرير وكف الغطا .. حجيت : روح لبيت اخوك افطر اذا ما عاجبك وهذا العندي مو مانعني اطلع .. اتحمل 

كاعد امشي جرني : ليش ما تتعاملين مثل الاوادم 

- وكت ما تعاملني مثل الاوادم وما تصيح عليه كدام بتك ومرتك جني جاهل ذاك الوكت احجي .. 

وخرت ايده ومشيت اسبح .. طلعت لكيته غافي مشيت للمطبخ اسوي الدولمة .. بس سلك ماكو .. مشيت للغرفة هو نايم ندسته باصبعي فز : لا تنسى تجيب شلك خوووش 

- انت مخبلة شلون تكعديني هيج 

- لا تنسى 

عفته وطلعت كام يدرم وراي نزلت امي وهو طلع كال : بس السمج والسلك لو هم اكووووو اوامر ثانية ست صبا ؟ 

شلت عيني واني اثرم ومجاوبته 

هز ايده وطلع وهي تكلي : سمج ودولمة ليش هو منو ياكل للفطور حتى كل هذا 

- عازمة خواتي 

- عازمة خواتج ابييييتي 

- لا عازمتهن ابيتي 

- يا بيت هذا البيتج 

ما جاوبتها كالتلي : دخلي وحدة من خواتج تجي ليجاي لا ما اشحتها من الباب والعباس  واشحتج وياهن 

ما جاوبتها 

كامت تغلط وتشمر واني اثرم .. 

رجع حازم شايل مسواك اشكال والوان اكثر من اللي طلبته 

كالتله : ممنوع خواتها يطبن للبيت ما اقبل 

حازم : دطلعي لسوكج ولا تدخلين بهالامور روحي 

عليييي .. علاااااوي 

- ها بابا 

-بلغت ابو الفرن كبل الفطور بساعة تاخذله السمج بصينية يشوي اني راح افطر برا ابني انت ضل هنا وشوف البيت شيحتاج . 

حجه وفات جوا ... 

نص ساعة ودكن الباب خواتي .. فتح الهم علي .. 

دخلن وجايبات مرت جعفر وياهن مبوشة .. تلكيتهم كلبي طار بطبتهم كمت ابوس بيهم وبالجهال 

البيت صار هووووسة امل نزلت وحازم تعرضلها ع الدرج كاللها : امشي خلي اوصلج بطريقي للسوك .. كدامي 

سكتها وخذاها وجهال خواتي وصياحهم وهوستهم ملا البيت وهن بالاستقبال يضحكن ويسولفن وياي : زين سويتهن وجبتن شهلا 

سهى : رجلج راح لو بعده حارة احتركت كهرباء ماكو 

- لا والله هستوها طفت راح كومن يمي بالمطبخ 

اجن وياي للمطبخ وكامن يساعدني لفينا الدولة ع النار وسهى كصت السمج ودهنته بليمون وطماطة وكصصت خضروات وجهزنا صوتني السمج دزيناهن بيد علي وسجاد .. 

رجع علي اخذ اخته دنيا وداها لبيت خاله .. 

وخواتي ذبن حجاباتهن اخذن راحتهن بالبيت ونصبنا سفرة واكل وسوالف وضحك .. ما جان لا امل ولا حتى الجهال اجو فطروا ويانا علي جاب السمج وراح لبيت عمه وسجاد لييت خاله . 

كضينا الفطور وكعدنا اجت ام فراس حسبالها عمتي موجودة 

وكعدتها تشوب جاي ويانا وعلى سوالف اجتي تونست وضلت كاعدة خابرت مرت ابنها كالتلها : خايبة انداري لبيت حازم شلون كعدة بنات حلوة تعاي 

صدك جكت عباتها واندارت علينا صبيتلها جاي ولا كانها غريبة بسرعة تذب ميانة وتخرب ضحك .. نسولف ونضحك 

كالتلي : خية بشري تصالحتي ويا رجلج لو لا 

- هو رجلي يتصالح ابو خشم اليابس احتاريت شسويله 

- وشسويتي 

- والله مراعيته بس بعده مطنكر 

- مراعيته بيش احجيلنا 

وغمزتلي 

- يا  اذا على البالح صايرين اخوان 

- ولو تزعلين عليه بس امداااااج 

وغمتيني باثنين اديها 

خايبة شبيج غمة جرجري 

- يا واروح اچيت عليه واغتصبه غير نايمة ويا بفراش واحد ومندار عني شسويله بعد 

- والتجيبلج راسه ؟ 

ضحكنا واني اكله : وشلوون 

باوعت منا ومنا : الفروخ مصيبة لا يسمعونا اسمعي ولج .. اتانينه ما تنامين .. لحد ما يطب للغرفة ويطيح بعبج ويندثر بصفج هنا شسووووووين 

باوعت مو بس اني كلهن حاطات روسهن ويسمعن حتى ام فراس كالتلها : اي كملي وبعدين 

كالتلها : ها عمة شو جنج فلفلتي 

ضحكت بصوت عالي وهي تكله : بربو* كملي خليني اعرف شلون داير راس ابني 

ضحكنا كلنا ورجعت مدت راسها وتحجي بسكوت : تذبين كلشي عنج والضوا معلوك 

حجت ام فراس : بالعباس فلا تستحين خايبة طلعتي هم بيج بيلا 

- هسه دسكتي يا عمة خل نفسد هالغمة هاي 

سهى : اي والله ترى غمامة مستعدة تضل بعد سنة بس تكوب وتنظف مثل الخدامة وما تسوي حل الروحها 

- ما تسوي شني جا غير اليوم تخلي يلعب جوبي 

- اي دكملي وبعدين 

- من تذبين منج امشي كباله بهالحال وطفي الضوا وانحشري بفراشه بهالوضعية 

ضحكنا وام فراس تصيح : دهر كون خايات انتن فلك معبه بتنك والعباس 

- خالة دسمعي بلكت فد يوم تتزوجين وتسوين للحجي هيج داتستفادي 

- كرادة حظي ويا حجي يشتغل 

صرخنا من الضحك وهي تكلها : ها يعني مفكرة بالموضوع بس غاثج العمر بيه عطل 

يمنا تباطحنا بالكاع على مداهرها ويا عمتها .. 

كالتلت الها : دكملي خلنا نشوف التالي شلون .. نامت واندار عنها ونام وفشلن خططج شلووون 

- يا همة خططي ما يفشلن .. غير تسمع مني 

تكوم تتكلب بفراشها وتتنححنح 

- تتنحنح شلون ولج 

- تذب حسرات وتتكلب وهي تكلب اطخه 

الطخه جدحته تنعل والدي وعلي وتجيب راسه 

- ولو ما انجدح 

- معناها رجلج عطلان لو ما انجدح بعد اني اطيتج الطريقة .. وضلت يمج تبشرينا جدح لو مبلل وعطلان . 

كامن يضحك لل١٠ كلهن طشن 

واني ضلت السالفة ابالي .. سبحت واجيت شسورت شعري .. سمعت الجهال وامل اجو .. حطيت حمرة وكحل وخدود وعطرت نفسي وكمت اسرح بشعري بالفير وارد ليورها .. 

لحد ما فات للغرفة .. 

باوعته حط السويج وباكيت الكجاير ع الميز واجا بدل ملابسه واني كاعدة .. 

كمل شو هذا طفى الكلوب 

يويل حظي خربت الخطة غير اني اطفي الكلوب 

بس ما اتوب الا اسوي روحي بعدني محتاجة الضوا واشغله 

دخل لفراشه هو وكض الريموت شغلت الضوا ما حجه  مشيت كدامه كضيت الكحل وسويت  روحي اتكحل .. 

باوعتله ما يباوعلي .. 

جريت ثوبي وذبيته ومشيت كباله وطفيت الضوا .. وجريت الغطا اللي هو متغطي بيه .. وانطيته ظهري 

شو هذا كام يذب حسرات كبلي .. 

بالخطة غير اني الاذب حسرات .. شو هذا مخرب كل خططي 

انداريت على ظهري .. هو جامد بمكانه .. 

كلت خلي اتنحنح وطخه واندار .. سويت روحي اندار جسمه قريب من يمي .. انداريت وصرت قريبة منه وهو طاخ بيه 

مدري شبية كلبي كام يدك

كلت هسه راح يهجم .. شو هذا كام وطلع من الغرفة .. 

شلت راسي وكعدت : صدك يحجي عود !؟ 

يويل حظي عطلان ما يجدح .. 

غميت روحي ورجعت جريت الغطا فوك راسي ونمت .. 

المكيف مشتغل .. شو بسرعة غفيت .. حسيت بيه طب طفى المكيف .. رجعت لنومتي بين الغافية واحس بالحواليا.. 

طفى التلفزيون اني غافية على وضعي 

فتح البطانية واجا رفع راسي ومد ايده جوا راسي واخذني بحضنه .. 

فتحت عيني وصحيت 

اخذ نفس وهو يشتم بشعري .. 

انداريت وضميت راسي بصدره .. رفع وجهي وباسني بخدي ..

بعده هستوه باس خدي 

ما نحس الا صياح دنيا وصريخها وهي تبجي من كل حسها  .. فز من مكانه وطلع يركض ..... يتبع 

__________

تكملة الرواية من هناااااااا 

لمتابعة باقي الروايه زورو قناتنا علي التليجرام من هناااااااااا

بدل ماتدور وتبحث علي الروايات عمل 

متابعه لصفحتنا على فيس بوك هنااااااااااا

الرواية كامله من هناااااااااا

مجمع الروايات الكامله 1اضغط هناااااااا

مجمع الروايات الكاملة 2 اضغط هنااااااا